ينفع "زلابيا" بس!
02-19-2013 03:55 AM






إن هناك بلداً يستحق أن يدخل قائمة جينيس للأرقام القياسية من حيث المفارقات، فهو سيكون وبدون منازع السودان والأدلة على قفا من يشيل، فمنها ما ذكرناه قبل أيام أن السودان يصنف مع الدول الأكثر فقراً في الكوادر الصحية مع دول ليس فيها كلية طب واحدة، مع أن السودان به ثلاثين كلية طب ومثلها مختبرات وقريب منها صيدلة وكليات تمريض وكليات أشعة وكليات بصريات وكمان تخدير وعلاج طبيعي وهندسات طبية. عليكم الله دي يفهموها كيف؟ نسأل المالية ولا التعليم العالي؟ غايتو البركة في الهجرة التي هي خيار أم خير، لا هي خير ولا الموت أخير.
أردنا بالرمية الطويلة أعلاه التوسل للمفارقة الثانية وهي أن السودان من اكثر الدول المستوردة الغذاء. السودان الذي وصف بأنه سلة غذاء العالم. هذا الوصف لم يصدر من شاعر رومانسي أو سياسي حالم، إنما من منظمات عالمية مختصة درست موارد السودان الطبيعية خاصة إمكانياته الزراعية المهولة. رونالد ريغان الرئيس الأمريكي الأسبق قال وبعضمة لسانه لمجلة عربية: "إن السودان مثل الولايات المتحدة من حيث الإمكانيات الزراعية، لأن لديه موسمين زراعيين صيفي وشتوي". شوفوا حكمة الله فأمريكا ساعدها على ذلك كبر مساحتها مع وجود جبال الروكي والانديز في مواجهة المحيط الأمر الذي مهد للأمطار، والسودان مع كبر مساحته (حتى بعد أن غادرنا الجماعة) أرضه سهلية منبسطة، وليس هناك جبال تصطدم بها الرياح المشبعة بالرطوبة، إنما تتكثف كدا من خلال صراع التيارات الهوائية (نعمتك يا رب)، لكن شكر النعمة استثمارها، بينما العبث بها يكفها.
بعد الرمية الطويلة الثانية نخش موضوعنا لنثبت أن السودان من اكبر مستوردي الغذاء ففاتورة القمح بمئات الملايين من الدولارات وفاتورة الألبان ومستخرجاتها بعشرات الملايين من الدولارات وكذا فاتورة السكر (يا مرضي) وكانت هناك الزيوت النباتية، أما الفواكه مثل أبوصرة من مصر وتفاح من إيران وأناناس من جنوب أفريقيا ثم طماطم من الأردن وبصل ثوم من الصين وسمك من إثيوبيا (ليس التونة والساردين) إنما سمك عديل كدا يمكن زراعته في ترع الجزيرة، اقال الله عثرتها ناهيك عن الأنهار الكثيرة وشاطئ البحر الأحمر.
اها خلونا في القمح الذي هو بمثابة "أب جاكومة" بالنسبة لواردات السودان الغذائية طبعا أهل السودان جديدين في استهلاكه وهذه قصة أخرى فالحكومة الآن تدعم المطاحن الثلاثة الرئيسية بأن خصصت للدولار سعرا خاصا وأهل هذه المطاحن يقولون: "إنها مصممة على القمح غير السوداني، فالقمح السوداني بالنسبة لها لا يصلح إلا للزلابيا والقراصة بالتقلية"، فالبعض يقول إن هذا افتراء على القمح السوداني من اجل اللغف والهبر بدليل أن هناك مطاحن مجربة يمكن أن تطحن القمح السوداني وتخرج منه دقيق ورَدة – بفتح الراء - وكل حاجة وكانت تعمل في أمان الله وتسد ثغرة كبيرة لكن للأسف هذه توقفت أو شبه متوقفة لأن الحكومة لا تدعم القمح المحلي وبالتالي تدعم المزارع الاسترالي وتتفرج على المزارع السوداني، فجوال القمح السوداني اليوم في السوق بمائة وخمسين جنيه فقط مع أن الحكومة قالت بأنها سوف تشتري قمح الموسم الجديد بمائتين وخمسين جنيها، الأمر الذي جعل المزارع يهجر زراعته فمثلا المزروع منه في الجزيرة مائتي ألف فدان عوضا عن أربعمائة ألف فدان جاهزة وبفعل تعلية الروصيرص لأن مدخلات الإنتاج في السماء والأسعار غير مجزية، فمن يقنع هذه الحكومة بتوجيه الدولارات من المزارع الاسترالي لمزارع الشمالية وبعض الجزيرة؟.

السوداني


تعليقات 8 | إهداء 0 | زيارات 2457

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#589825 [واحد]
0.00/5 (0 صوت)

02-20-2013 02:23 AM
يا جبنه انت حكومة شنو ال بتوريها انت ؟!!!!!
ديل يا جبنه عاوزين = الارض من دون ناس = ده ما كلامي ده كلام علي عثمان حسب التسجيل بتاع محكمة الجنائيات في المحادثه المشهوره بينو وبين طيار الانتنوف ال قصفت المدنيين الدارفوريين = الجبن كاتلك = انت جبنه هولندي= الارض للبيع للمستثمرين لو زراعيه يشرد المزراعين ولو معادن وبترول كتل عديل قهمت ايها الجبان ولا ما عاوز تفهم لانك = فاهم بس خائف


#589510 [واحد من الناس]
0.00/5 (0 صوت)

02-19-2013 03:46 PM
الحكومة دمرت الزراعة والصناعة والسكة حديد والخدمة المدنيةالتي بدورها تساعد علي نجاحهم


#589496 [hajabbakar]
0.00/5 (0 صوت)

02-19-2013 03:33 PM
مساحة هولندا 200كلم ×200كلم يعنى اصغر من ولاية الجزيرة
الارض الزراعية تساوى 30% فقط ويعمل 3% من السكان يالزراعة
عدد الابقار فى كل البلاد اقل من 4 مليون راس
واغلب الزراعة اعلاف وينتجون 7مليون طن بطاطس و6مليون طن سكر البنجر و2مليون طن حبوب
عددهم 10 مليون نسمة فقط (نحن كترة بلا فائدة) او كغثاء السيل
تجد لبن النيدو فى كل بلاد الدنيا ومنتجات نسلى والزهور
ونحن نفتتح المشاريع الزراعية والجماعة شايلين مقصاتن وكل يوم نزداد فقرا
الجزيرة وكفى الجزيرة وكفى الجزيرة وكفى


#589375 [مزارع]
0.00/5 (0 صوت)

02-19-2013 01:26 PM
اهو تنضم ساي تتعب نفسك ديل مابسمعوك. ولو جمعتك الدنيا بالسيد زول ود بدر أبو نسب اللعوته قوليهو كلم جماعتك وهو زاتو انو الجزيرة دي حيران جده مابتستاهل من حزبه يعملو فيها كده وانتم الأنساب كلمتكم مسموعة ودي وصية من مواطن مزارع كمل البكاء علي حواشته البقت بور والمزروعة ما ناجحة وخوفي بكرة لن تجد من يزرع من أصلو


#589296 [سوداني مهجن]
0.00/5 (0 صوت)

02-19-2013 12:13 PM
اسع يا أستاذي البوني انت زول جزيرة وانت عايش في نصها عليك الله اكتب لنا عن الأراضي التي بيعت في الجزيرة الي مصر وبعض العرب وأين هذه الأرضي لاني والله ما وجدته إجابة من زول مزارع القاعدين يكتبو ديل كلهم ناس خرطوم ماعارفين الشلخ من الكديب اكتب لنا كل ملابسات هذا الخبر ولك الف شكر


#589131 [نور الدين]
0.00/5 (0 صوت)

02-19-2013 10:20 AM
حفظك الله يابروف وكتر من امثالك


#588984 [ام الرجال]
0.00/5 (0 صوت)

02-19-2013 07:54 AM
كنت اتوقع منك صواريخ ارض جو لاولياء الامر ولكن خاب الامل ..
السودان اصبح سلة غناء العالم وليس غذاء العالم كما كن نظن
السودان من تسبب فى خرابه ودماره وانهياره هم ثله من ابنائه
المستنيرين المتعلمين اصحاب الشهادات العلياء المضروبه


#588962 [عثمان خلف الله]
0.00/5 (0 صوت)

02-19-2013 06:02 AM
الكلام فى موضوع الصحه والمنظمات العالميه ده انا ما بصدقو
نحنا الحمد لله فى موضوع الصحه افضل كتير من دول كتيرة
نحنا هنا فى الامارات امكانات كبيرة جدا لكن لو مسكك وجع ضرس تهم لانو صعب تجد الطبيب الكفوء والاسعار فلكيه ولو جاتك وعكه قويه الا تنادى لله يا محسنين
فى موضوع القمح ده انت بتناقض نفسك يا دكتور لانو فى مقال سابق قلت الناس احسن ما يزرعو لانو بيحتاج وقت طويل والعائد قليل واحسن الناس تزرع الخضروات والفواكه لانو عائدها اكبر وسريع شن جد تحت المخده وغير الراى
نحن عامة فالحين فى السياسه وحمل السلاح بس اما انتاج واستثمار وتسويق زيرو
السوان الكعب ده والله سمعت واحد اردنى شاب مستثمر فى حجر العسل يقول فيهو شعر وانو الفائده اللقاها هنا ما لقاها فى اى بلد وانو اتفق مع السكه حديد تعمل معاهو شراكه لنقل منتجاتو ونحنا شبابنا يشكو العطال


ردود على عثمان خلف الله
United States [ود الجزيره] 02-19-2013 09:04 PM
انت ياود خلف الله شكلك راسك ضرب !!!

United States [طين لازب] 02-19-2013 12:11 PM
انت لأنك بعيد لا تعلم ماذا يجرى على ارضنا ومثالك الذى ضربته ومعجب به لماذا لا ترجع انت وتعمل مثله بدل التهجم على شباب البلد

United States [نور العين] 02-19-2013 10:23 AM
البروف ياعثمان ودخلف الله قال الكلام دا عن القطن وليس القمح ومع ذلك انا بفتكر القمح نفسه مزعج في الجزيرة فهناك بدائل جيدة اخرى يرعفها البوني جيدا فهلا افادنا بها


د.عبد اللطيف البوني
د.عبد اللطيف البوني

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة