معاينة
02-23-2013 02:06 PM


لم يصدق المواطن (صابر( عينيه وهو يقرا ذلك الإعلان عن وظيفة والذي تنطبق عليه كل شروطه من مؤهلات وخبرات وخلافه والذي يخص ملء وظيفة (مسؤول ) بإحدى المؤسسات فقام على الفور بإرسال سيرته الذاتية عبر البريد الأليكتروني الموضوع أسفل الإعلان ولدهشته فقد تلقي بعد عدة أيام مهاتفة تفيده بوجوب حضوره لمباني المؤسسة لإجراء المعاينة .
- كدي مد لينا أيدك دي النوزنا
- توزنوها؟
- أيوه نوزنا ؟ عندك مانع
- لا.. لا ما عندي مانع بس ممكن أعرف السبب ؟
- بعدين لما النتيجة تطلع ح تعرف
يضع صابر يده على الميزان الأليكتروني فيقوم صاحبنا بالنظر إلى الشاشة وكتابة النتيجه في الملف الذى معه ثم يخاطب صابر
- طلع لسانك لو سمحتا
- (في إندهاش) : يا جماعة هي وظيفة وللا (كشف طبي)؟
- يا لو سمحت طلع لسانك وللا ح نلغى ليك المعاينة دي
- (يطلع لسانو بينما يخرج صاحبنا من جيبه متر ويقوم بقياس اللسان وسط دهشة صابر)
- خمسة سنتى ونص
- (يقوم بإحضار جهاز أليكتروني ثم ) :
- ممكن تدخل لينا ايدك جوه الجهاز ده؟
- أيدي دي ما قبيلك إنتهيتو منها وقيستوها وكمان وزنتوها
- لا دي حاجة تانية .. عاوزين نقيس ليك (تخانة الجلد) !
- (يدخل يده في الجهاز وهو يغمغم ) : هو فضلتو لينا فيها جلد ؟
- (صاحبنا ينظر لشاشة الجهاز ثم يمسك بالقلم ويكتب النتيجة على الدقتر) :
- ممكن تخش لينا الغرفة ديك
- (في إنزعاج) : غرفة شنو كمان يا جماعة ؟
- يا أستاذ ما تخاف الوظيفة الإنتا مقدم ليها دي وظيفة مسئوليتها كبيرة ولازم نتأكد ونفحص الزول كويس
- (صابر يتجه نحو باب الغرفه وهو يتلفت وما أن يقترب منها حتي يشاهد لافتة صغيرة مثبتة على الباب تقول ..كشف النظر)
- أقعد في الكرسي ده
- يجلس في إندهاش
- شايف شنو في اللوحة المثبتة الفوق هناك دي؟
- شايف صفين بتاعين صور دولارات أحجامها تبدأ من كبيره ثم أضغر لحدت الدولار السغيروني داك
- (يتجه نحو اللوحة وهم ممسك بمؤشر ثم يشير إلى أكبر صورة دولار) :
- فرنكلين .. الزول الصورتو في نص الدولار ده .. وشو مقبل على وين؟
- يمين
- (يشير للبعدو)
- يمين برضو
- (يشير للبعدو)
- شمال
- (يشير للبعدو)
- يمين
- طيب دي
- والله ما شايف كويس لا عارفا يمين ولا عارفا شمال
- هسه الصورة القدر الضربه دي ما شايفا؟
- طشاش .. طشاش
- ( وهو يمسك بالدفتر ويكتب النتيجة) : في زول يشوف الدولار طشاش طشاش ؟
- (صابر) : أوعا كمان تكونو عاوزين تقيسو ليا السمع؟
- عرفتا كيف؟ السمع ده أهم حاجة للمسئول !! ركب السماعات ديل في راسك
- (ما أن يقوم صابر بتركيب السماعات) : سامع حاجة ؟
- لا ما سامع !!
- كده سامع حاجة؟
- برضو ما سامع
- طيب كده ؟ سامع شنو؟
- سامع ناس بتقول (يا مسؤولين مواصلات مااافي)
- يعني سمعتهم؟
- أيوا
- يعني أضانك ما تقيلة
- لا الحمدلله بسمع كويس
- أضانك ما تقيلة وبتسمع كويس وأيدك ما خفيفة وجلدك ما تخين وعيونك ما بتشوف الدولار وعاوز تبقى مسئول؟ يااااخ إنتا بتباااالغ !!

كسرة :
المقال ده ما عندو كسرة !

كسرة ثابتة :
أخبار ملف خط هيثرو العند النائب العام شنو(وووو وووو وووو)+(ووو) !



[email protected]


تعليقات 25 | إهداء 0 | زيارات 6787

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#594364 [mariam]
4.13/5 (4 صوت)

02-24-2013 09:27 PM
سمعت يا جبرا بسكاكين 2013 (knife), القتالية؟؟؟
يعني نحن جاهزيين ,


#594325 [sudani 100%]
4.07/5 (5 صوت)

02-24-2013 08:11 PM
اكون غبى لو ما جبره طلع كوز و اضانو مكسوره


#594211 [عبداللطيف]
4.07/5 (5 صوت)

02-24-2013 05:34 PM
طيب يا جبرا بعد الاتهامات دي دايرين مقال كارب تثبت فيه أنك ما كوز مندس أو طرف ثالث وبالادلة والبراهين ولا حنصدق البقولو فيك


#594176 [زول]
4.07/5 (5 صوت)

02-24-2013 04:46 PM
يا جبرة انا جيل حكومة مايو وكتائب مايو وجاءتني أبريل والقشرانه القاعدة اسع دي انت ليه نحن أي مشكلة نضعها في خانت المؤامرة والكيد والحقد وأطماع أجنبية لخيرات السودان هل ده مركب نقص فينا أم تهرب لتحمل المسوالية وهل كل حكومة في العالم بتقول كده لشعبها


#594167 [mohamed taha]
4.07/5 (5 صوت)

02-24-2013 04:28 PM
والله قصص وحكاوى


#593537 [mariam]
3.88/5 (4 صوت)

02-24-2013 12:56 AM
يا جبرا يا كوز , أعوزو بالله منك ومن الشيطان الرجيم,


ردود على mariam
United States [هندسه] 02-24-2013 12:55 PM
شكلو جبرة غلغلكم وما لقيتو ليهو حل قلتو تشككونا فيهو..........

ماااااا بنصدق انو كوز


#593441 [المطرطش]
4.07/5 (5 صوت)

02-23-2013 10:22 PM
اخى الفاتح
والله لما قلتا ليهو خش الاوضة انا افتكرت حيعملو ليهو معاينة تانية ...........دى فاتت عليك كيف؟
قال ...معاينة ...قال


#593402 [قاسم]
4.07/5 (5 صوت)

02-23-2013 09:40 PM
انا ما عندي شك في ان عمنا جبرا من صـنع الكيزان عشان يضحكهم ويلطف من وقع جرائم النهب والسرقة حتى يظن الناس أن الحكاية لعب في لعب وضحك في ضحك ولا يأخذون الأمر مأخذ الجد.. وجبرا بأسلوبه الساخر يؤدي هذه المهمة الخبيثة بكفاءة واخلاص وبالطبع يتقاضى أجرا على ذلك وأي انسان عاقل يعرف ان الكيزان لو ما راضـين عن الدور الذي يقوم به جبرا لما اعطوه أي فرصة للكتابة في أي صحيفة ناهيك عن صحفهم ولكانوا حجبوه ومنعوه من الكتابة منعا باتا مثلما منعوا كثير من الكتاب المخلصين أمثال حيدر المكاشفي وغيره.. أعملوا حسابكم من عمكم جبرا ولا تنطلي عليكم هذه الخدعة.


ردود على قاسم
United States [خالد] 02-25-2013 08:28 AM
إذا كان لابد ان نربط الموضوع بكتابه كما تلمح، فان العقل السوي لا يمكن ان يستنتج ان كاتب هذه المقالة كوز، بل علي العكس يمكن ان نستنتج من تعليقك انك كوز أو عندك disorder في التفكير والاستنتاج.

United States [هندسه] 02-24-2013 12:57 PM
طيب والدليل شنو البخلينا نصدقك انت في كلامك دا؟ جيب دليل ونحنا نصدقك

جبرة دا بقى ليكم زي ميسي ما علرفين تقبضوه من وين

United States [قلبي على وطني] 02-24-2013 10:58 AM
فالوا الفهم قسم ... نسأل الله ان يفهمك ويشيل من مخك فهم المؤامرة وهي شماعة كل من ليس له شماعة.

United States [صندلي] 02-23-2013 11:35 PM
ياخي انت انسان اهبل !!!!!!!!!


#593365 [ود الحاجة]
4.13/5 (5 صوت)

02-23-2013 09:01 PM
ياخ المقال ظاااتو ما كسرة يا جبرا يا فنان


#593099 [عبدالماجد قنديل]
4.19/5 (6 صوت)

02-23-2013 03:59 PM
فنان يأ أستاذ الفاتح جبرا متعك بالصحــة والعافية أن شاء الجماعة يكون عندهم وقت عشان
يقرأون مثل هــذا الكلام ، لعل وعسى ، يتعظوا ...


#593085 [البشير على نافع الجاز الفللى]
4.07/5 (5 صوت)

02-23-2013 03:46 PM
يا استاذ انا كنت حاضر المعاينة دى
بس فى حاجة انت نسيتها
الراجل سألوه قالو ليهو" لحست كوعك كم مرة
قال ليهم ولا مرة واحدة
قالو ليهو لما انت مابتلحس كوعك الجابرك شنو والشلاقة ليك شنو امشى ادرب فى الاول وتعال لينا
عالم مابتفهم"


#593075 [القرم تفاحة ابل]
4.19/5 (8 صوت)

02-23-2013 03:40 PM
صابر بهذه الصفات لاينفع ان يكون مسؤلا ولاينفع مع ناس المعارضة وامثاله كثر والحمد لله


#593069 [ALGAM BE LELO]
4.19/5 (7 صوت)

02-23-2013 03:37 PM
مواصفات مسئول غير ((( كيزانى))) :
أضانك ما تقيلة وبتسمع كويس وأيدك ما خفيفة وجلدك ما تخين وعيونك ما بتشوف الدولار
مواصفات مسئول كيزانى :
( اضان ) تقيلة تقل موية المطر المن السما بتنزل ( الملكية الفكرية للمناضل أبوعركى )
( ايد ) خفة بت العطا ( الدنقرت ) تشوف ( ----- ) وقعت كسرت رقبتا
( جلد تخين ) تجر فيهو الشوك ما ( يخربشو ) ده طبعا لو ما هرشوك أخوان نسيبة قبل تبدأ خطواتك
( ريحة الجلد المذكور أعلاه ) تطرد ابو العفين من جحره ( وهنا نقصد ابو العفين المعروف .. لا ما داك البيقصدوه ناس الراكوبة )
( عيون ) رادارية ترصد الطائرات الاسرائيلية حتى لو جات العشية ( يعنى بعد انتهاء صلاة العشاء) وماطافية أنوارا ومركبة سواطير مكان الصواريخ ( لزوم الجهوزية لرد الصاع صاعين أو أكثر )


ردود على ALGAM BE LELO
United States [اوهاج] 02-23-2013 10:04 PM
عيون رادارية ترصد الجراد الاسرائيلى


#593035 [أبو أحمد]
4.19/5 (7 صوت)

02-23-2013 03:01 PM
المشكلة يا جبرا إنه نوع المسئول البتتكلم عنه دة حا يقرأ عمودك ويضحك لمن يقع علي قفاه وكمان ينادي السكرتيرة يقول ليها عليك الله تعالي شوفي جبرا الليلة كاتب شنو والأنكى من ذلك إنه ماحيكون حاسب نفسه مع ناس ديلا ...جبرا إنت بتنفخ ليك في قربة مقدقدة مش مقدودة ولا مقددة... الشيخ العبيد ودبدر قال كلم البسمع (وناسك ديل ما بسمعوا) وأكل البشبع(وناسك ديل مابشبعوا)


ردود على أبو أحمد
United States [mariam] 02-24-2013 10:14 AM
زول جايب ليكم خبر مااااافي ,,, حشرييييين , خليكم في حالكم ,


#593029 [حسكنيت]
4.19/5 (7 صوت)

02-23-2013 02:57 PM
لو ركب ليهم جلد قرنتية وإضنين حمار ويدين كديس وعيون صقر ..لو ما فيه ريحة عفانة وقرة صلاة ما حيتعين


#593021 [ابوبكر]
3.63/5 (4 صوت)

02-23-2013 02:47 PM
نفسي ابيت يوم معاك في حوش في عنقريب ماعليهو مرتبه واتونس معاك ويكون النور مطفي ! الله يجازي محنك .


ردود على ابوبكر
United States [المطرطش] 02-23-2013 10:30 PM
وانا معاكم نتذكر ايام زمان..المزة والعكو ...وحبة من حبوبة بكرية ويجى صاحبنا الشايل راسو (الان وزير) ونتغاتد عليهو ونكب فى الضلمة(شر)...ونحن طبعاشررررررررررررررررررررر.
قال..النور مطفى...قال

United States [مسيخ] 02-23-2013 08:15 PM
نسيت الكريستالة!


#593016 [عبده]
4.07/5 (5 صوت)

02-23-2013 02:40 PM
محن ياجبرة


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة