المقالات
السياسة
ارشيف مقالات سياسية
نطالب إسرائيل بإرسال فئران فورااا !!!!
نطالب إسرائيل بإرسال فئران فورااا !!!!
02-23-2013 07:41 PM

ناس ما عندها منطق ولا عندها إسلوب للكلام، ولا عندها حتى المقدرة على غتغتة عيوبها المشرورة في صقيعة الله لكل العالم !
آفة الجراد وحدها الحلت بالبلد ؟ ويا دوب فكرتو للجراد الجاكم ده؟ ما إنتو زاتكم الجراد والقمل والكلاب المسعورة المحكرين لينا في رأس البلد من 23 سنة، تنهشوا في بطون الشعب المغلوب على امره, اكلتوا لحمو ونخرتوا عضمو!!
حتى الطفولة البريئة قدرتو مسحتو ملامحها وهجمتو عليها كالذئاب المسعورة!!!
يا تو دولة إسلامية في العالم تعدت على برآءة الأطفال من الجنسين في بلدها؟؟؟ غيركم إنتو ؟ وفي زمنكم وفي عهدكم المسح كل سمحنا ؟حتى الأخلاق مسحتوها بأستيكة! زرعتوا العار والقبح والشر!!
ما عرفنا حتى نصنفكم مع ياتو جنس في الدنيا دي؟ الحيوانات المفترسة تتبرأ منكم ومن عنفكم وخبثكم؟
حتى الحيوان( الله يكرم القاريء المحترم ) الحيوان لا يمكن يعتدي على جناه من جنسه حتى ولو كان جنا بهيمة تانية!! ده الحيوان الما عنده فهم و ربنا ما حباه بنعمة العقل زي البني آدم ،لكنه رغم كده بحترم خصوصية الصغار وما بعتدي عليها!!
الأباليس المعروفين ومذكورين في القرآن ، إنتوا سبقتوهم بي مأئة سنة ضوئية في الخبث والشر والدهاء!!!
إسرائل الدارعين شركم في ضهرها ، تقاتل حتى الموت من اجل قيام دولتها ومن أجل ابناء جلدتها!!
وإنتو تقاتلوا وتطحنوا في شعبكم حتى الموت وتغتصبوا حتى الأطفال الأبرياء من أجل نفوسكم النتنة ومن أجل كروشكم الما بتشبع ولا بتقنع!!
بإختصار إسرائيل بالنسبة ليكم الحمل الوديع في غابة كلها وحوش , إنتو الوحوش طبعا مافي شك!
وبرا خجلة وأمام كل العالم تنشروا في حججكم الواهنة ! مرة إسرائيل رسلت صقر! ومرة ضب ومرة جراد؟
لكن عفيت منها إسرائيل كان الجراد ده فعلا رسلتوا! يعني ما محتاجة حتى تجهز طائرات وتتعب وتخسر جهد جوي وخسارة مادية يفترض تستفيد منها في جهات لها دفاعات جوية تحتاج عتادها القوي!!
إنتو فد صقر بجهجه باكاتكم ! وخرتاية جراد يجي طابيها نفرين من إسرائيل! وما محتاج حتى يتعبوا ويرسلوا ناس من عندهم !!
بكل بساطة خرتايتهم الدايرين يرسلوها دي !! يشتروا بيها ذمة واحد منكم و فيكم ، باقي إنتو ذممكم مشرورة في سوق الله وأكبر، البدفع زيادة جنيه بتبيعوا ليه طوالي!! يشتروا ذمة واحد منكم ويشيلوه الجراد يفكوا في الغبش المساكين عشان يغتس حجر زراعتهم!
اها وإنتو مهمتكم شنو ؟ رسلوا ليكم طائرات قلتو النور مطفي! قبضتوا ليكم صقر قلتو عنده جهاز حساس !! رسلوا ليكم جراد على حد قولكم ، ورغم إنه لو جاي من تالا إسرائل يفترض يكون جاييكم مهدود الحيل والحيلة!!
يعني فد بخة بي جمكسين تكتلوا ميئات! لكن الشكية لي الله مبيد الحشرات ما عندكم !! حيرتوا إسرائيل زاتها ترسل ليكم شنو المرة الجاية ؟؟ والله إلا يفلعوكم بي نبل من بيوتهم؟
بلد يفترض إنه يكون زراعي ولديه من الإحتياطات الوقائية ما يسد الحاجة لي عدة سنوات لي قدام!
أين مبيداتكم الوقائية؟ هل هي غالية التمن ؟مكلفة مثلا؟ بعدين وينه هو محصولكم البهدد أمن إسرائيل عشان تهجم عليه هجوما جرادياَ؟ جيوش الجراد الجات زاحفة دي ليه ما رصدتوها من بدري؟ افقر دول العالم عندها إمكانيات رصد ابسط الأضرار على بلادهم ، وبحتاطوا ليها وبتسلحوا وبتفادوا أبسط الخسائرمن أجل شعبهم ! إنتو القروش كلها حولتوها لي ارصدتكم الخاصة, إمكانيات البلد من زمن الإنجليز قضيتوا عليها وخليتو البلد في الصقيعة زيو زي اي خرابة !!!!
بلد جيعانة وناس قالت الروب ، لكن الحق ما عليكم إنتو ، الحق على الشعب الصامت وكاضم ده! الوقاية ما لاقنها الناس من أبسط الأمراض! كيف توفروها للزراعة؟ إنتو لو على كيفكم الشعب ده كلو تختوه في خور وتحرقوه، عشان البلد تفضل ليكم براكم, على قول عادل إمام تصحو من النوم ما تلقوا شعب تحكموه!! تقعدوا إنتو سيدي بي سيدو وشيخي بي شيخو !!
يشهد الله نحن شفع نتجارى شفنا طائرات رش المبيدات تجوب مشاريع الجزيرة، وطائرات الرش تشوفها كيمان كيمان في مشروع الجزيرة وحواشات سكر الجنيد! هسه كلو بعتوه وقضيتو على الأخدر واليابس!!
وجيتوا تتبجحوا بي كذب وإفك بائن امام العالم وبرا خجلة!! وكل مصيبة تحل بالبلد بسبب إدارتكم الفاشلة تدرعوها في إسرائيل الحيطة القصيرة!
هل إسرائل رسلت وسواس لي صدوركم الخبيثة عشان تعتدوا على حرمة النساء والأطفال الأبرياء وتغتصبوهم؟ هل طلبت منكم تشردوا المرضى من المستشفيات وترموهم في الشارع بلا رحمة؟
هل طلبت منكم تجوعوا الشعب وتزرعوا الفتنة والجرائم الدخيلة على البلاد؟ هل أمرتكم ببيع ممتلكات الوطن محليا وداخليا؟ هل أمرتكم بالكذب والإفك والغش وأكل السحت والتجارة بالدين؟؟وهل ؟ وهل ؟ ألخ
بالله إختشوا ولموا نفسكم, الفساد الزرعتوه في البلد ما بخفى على رب العباد من فوق،غضب الله ما بعيد ، يمهل ولا يهمل ، حق الأطفال والأرواح الزهقت وأغتصبت ظلما وجورا بخلصوا منكم الحي الدائم ، نسأله تعالى ان يسلط عليكم غضبه وسخطه ويرينا فيكم يوم ويفرج فيكم كل العالم، ويكون مصيركم أسوأ من مصير بن على والقذافي ومبارك!!!

متاوقة
نطالب إسرائل ان ترسل في المرة القادمة فئران من حجم الجقور لأنه عندنا كدائس مطاعم كبيرة لهفت البلد ناوين أن نقضي عليها فد مرة!!

يمهل ولا يهمل

أسماء الجنيد
[email protected]





تعليقات 17 | إهداء 2 | زيارات 2682

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#594582 [ود البلد]
5.00/5 (2 صوت)

02-25-2013 07:21 AM
عفارم عليك يا بت الجنيد واسلوبك الحلو الشيق الي الامام بس دار اقول ليك الجماعة ديل ملك خايفة منهم ولا متوكلة علب اللة ساااااكت فعلا من يتوكل علي اللة فهو حسبة وزيدينا لسة وربي احفظك


#594442 [عمر شكلة]
4.15/5 (7 صوت)

02-24-2013 11:03 PM
بس خايف الفئران دى تجى تدخل جوا..........


#594125 [قاهر المنافقين]
4.19/5 (6 صوت)

02-24-2013 03:48 PM
هذه هي حكومة المنافقين (تجار الدين) الله يدمركم كل شئ اسرائيل اسرائيل بالله شوف الكاذب باسم القوات المسلحة (الصوارمي) يستر لفضيحته لما هرب من الثوار في النيل الازرق قال معاهم مرتزقة بيض ههههههه بيض يا ابيض! فتح عيونك كويس ديل ما مرتزقه (ديل ملائكة ارسلهم الله لضرب المنافقين)


#594043 [ابونصر]
4.25/5 (5 صوت)

02-24-2013 02:19 PM
عفيت منك يابت الجنيد بت رجال والله نعمل شنو مع العفن المزكم انوفنا من 23 سنة . الله يخرب بيوتهم وييتم عيالهم الحرامية الكلاب تجار الدين خلوا البلد ماعندها طعم الله يجعل كيدهم في نحرهم .


#593998 [النذير حصيف]
4.19/5 (6 صوت)

02-24-2013 01:43 PM
اين طائرات الرش ؟ اليس من الاجدي ان يوقم مصنع الطائرات بصناعة طائرات الرش ؟


#593933 [lwlawa]
3.38/5 (5 صوت)

02-24-2013 12:52 PM
للاسف ان بني كوز هؤلاء، الواحد لو اختلف مع زوجتو في البيت، يذهب بتفكيره مباشرة الى ان اسرائيل هي (المحرِّشة)...؟!..في غباء مفرط، واحيانا يكون استخفافا بعقول القراء . وهذا زمانك يا مهازل فامرحي ..؟!


#593701 [ناصح]
4.00/5 (4 صوت)

02-24-2013 09:51 AM
سبحان الله الذيكم ادا الحكومه شرعيه همكم اسقاط الموتمر الوطنى وان سقط كل الشعب كله ومن
سبحان الله كيف لمن لم يستطيع صبرا فى بلاهو ان يصبر على بلا غيره استعنتو باليهود والنصاره
سبحان الله بالذى يساعد بالهدم لكى يشمت فى فى ضريرو
انتوعارفين الله مبتلينا بالكيزان ليش لانو بلاهم اخف من بلاكم لانكم اتبعتم اساليب غير اخلاقيه بغض النظر عن اساليبهم وان كان فيهم شى من الرجوله الاسلاميه الا انكم تفتقدونهاوانتم اعلم بى حالكم
ان كانو تجار بالدين فانتم تجار بالددين والدنيا


ردود على ناصح
United States [isic] 02-24-2013 10:33 PM
يامنوفلي صحصح النوم قبلي ماتنصح الناس وإنت نايم


#593545 [عشم باكر]
4.07/5 (5 صوت)

02-24-2013 01:16 AM
اسرائيل ما ليها حق تتعب الجراد و تنزله من الطائرات في صحراء الولاية الشمالية حتي يصل النيل و حيله مهدود ..


#593529 [زوبعة]
3.13/5 (4 صوت)

02-24-2013 12:47 AM
تيتاوي بقي زي نسوان الجبنة ههههههههههههههههههههههههههههه والله ما عارف انت بقوك صحفي كيف صحي زمن الانكاس


#593518 [mustafa nooon]
3.75/5 (4 صوت)

02-24-2013 12:19 AM
يابنتى الله يديك العافية ويخدر ضراعك كفيتى ووفيتى


#593437 [المغترب ابو عاقلة]
4.18/5 (7 صوت)

02-23-2013 10:18 PM
كلامك في الصميم وخفف علينا , المصيبة انو في مغتربين لسة بشكروا في الحكومة واهلهم مطحونين في السودان والعذر انو البلد محاصرة ونحن لازم نصبر لانو الحكومة دي اسلامية , انا بعتبر انو اي واحد بيؤيد الحكومة بحجة الدين هو نفسو ساقط وهارب من المسؤولية ومنافق لانو لو البلد كويسة الجابرك على الغربة شنو ,


#593418 [قاسم]
4.18/5 (7 صوت)

02-23-2013 10:01 PM
مافي زول بيفش غبينتي غيركم.. الله يديك العافية ويحفظك من كل سـوء.. آمين.


#593401 [عباس بن عباس]
4.19/5 (6 صوت)

02-23-2013 09:36 PM
نطالب اسرايئل وامريكا بارسال المزيد من الجراد والصقور والجرذان والذباب والباعوض والقمل والنمل بس بدون طيارين لاننا سنكشف فلول الاعداء باحدث وسائل النظر وسندحر فلولهم ونبيدهم عن بكرة ابيهم ولا حاجة لنا لاستخدام السواطير والذخيرة التي نعدها لليوم الاسود وكله لله.. وكله تحت الجزمه...


#593378 [هاشم ابورنات]
4.13/5 (6 صوت)

02-23-2013 09:12 PM
خلي اسرائيل ترسل كلاب لهذهالكدائس


#593349 [كوكاب]
4.18/5 (7 صوت)

02-23-2013 08:46 PM
قبل جراد اسرائيل شهدت بنفسى فى مشروع (قومى) جلبوا له طائرة(تقوم دفرة) اى والله كما ذكر الدكتور البونى انه اول مرة يشهذ (زول ) تطسو طيارة) فلا قبل ذاك اليوم كنت اعلم او رايت ان الطائرة(دايرة دفرة).دمار المشاريع الزراعية سمة رافقت (الانقاذ) منذ قدومها وهرب اهل الزراعة لكرش الفيل بعد ان ضاقت بهم السبل فالدولة شاركتهم حتى (فى العجور) فتركوا لها الارض انشاء الله (تسويها كفتة) ا الدولة لا تريد الانتظار طويلا (ونفسها قصير)( داير ه الجاهز ومدنكل تشيلو بدون تعب). الجراد والقمل والفار وغيره افات مسلطة من رب العالمين مما يعنى انه عقاب الهى (لاهل الله والمشروع الحضارى)ربما ان سالتهم قالوا ابتلاء. بلا يخمكم.


#593345 [boby fisher]
4.18/5 (8 صوت)

02-23-2013 08:39 PM
ينصــر دينــك يا شيخة


#593312 [هدهد]
4.19/5 (9 صوت)

02-23-2013 07:56 PM
الاستاذة سامية الجنيد هل تصدقى ان الجراد اتمقلب عندما جاء الى السودان ولم بجد شيئا يأكله غير ( الدفيق ) بالشمالية ومات من الجوع وهو لا يدرى ان هنالك جرادا بشريا أشره من الجراد القادم من مصر قضى على الاخضر واليابس بالسودان .


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة