المقالات
السياسة
ارشيف مقالات سياسية
زنقة دستورية(2) مسرح الروائح المزعجة
زنقة دستورية(2) مسرح الروائح المزعجة
02-26-2013 01:40 PM

بسم الله الرحمن الرحيم

يفتح الستار علي نفس المشهد السينوغرافي السابق للمزرعة الضخمة والمراحيض الخشبية الثلاثة " قابعة كما هي ، بينما نري الحراس الستة يحيطون بالمرحاضين المشغولين ، متجولين جيئة وذهابا . بعد قليل يسمع صوت رنين هاتف المحمول الخاص بحارس2
حارس2: ( يبتعد وهو يرد علي الهاتف) .... ألو.... منو؟ ... وينك يا شيخنا ..( حارس1 و 3 يقتربان من زميلهما ويحاولان التنصت علي المكالمة ) ؟...... إنت غيرت النمرة واللا شنو ؟....لا.. ابدا ... اصلو إسمك ما ظهر في الشاشة!!.... قلت شنو ؟.... يهو نمرتك ذاتا.... قلت شنو؟ يازول..!! بتدس إسمك من شاشة الموبايل ( يضحك باستغراب وهو يزيح زميليه بعيدا) يازول !!...دا إنت شيخ كارب خلاص ....؟ عاين ... سيادتو قال دايرك هسي دي....الحاصل شنو..؟ ... لا ... سحلية بالت علي مركوبو!!.... كان قاعد وين ؟ ... ( يخفض من صوته ) قاعد في " المستراح" ..قلت شنو؟ ...لا ..لا السحلية ذاتا إختفت ... ما لمينا فيها ... قلت شنو؟ ....مشت لسيد العمل ذاتو..... ( منزعجا) وين..؟ ....في المستراح التاني !!. .... خلاص يا شيخنا تعال بسراع.... منتظرينك.... قلت شنو؟ .... حتجيب معاك جدادة وديك ؟ ليه ؟... حنعقد ليهن .... يازول بطريقتك دا شغلكم .... عاين .... أوعك تختهم في ضهر العربية بعدين يفطسن.
( حارس2 يغلق الهاتف ثم يشير الي زميليه فيتبعونه الي حيث المرحاض الثاني).
حارس2: ( لحراس المرحاض الثاني بريبة) هيه ياقبيلة.... ما مرت عليكم سحلية بجاي ؟
حارس1: ( لزميله ) الظاهر الجماعة ديل شغالين " فركشة"
حارس3: ( لزميله) وبعد الفركشة ؟
حارس2: " كنكشة"..... البلد كلها مدورنا كدا
حارس1 : ( يفرد ذراعيه ويحركهما كجناحين كأنه يطير)..خمخم..خمخم..خمخم.
حارس3:( يفعل نفس الشئ) لغلغ...لغلغ..لغلغ.
حارس2: ( يقعل نفش الشئ) سفسف...سفسف...سفسف.
( حراس المرحاض الثاني يتظاهرون بالبحث ، في هذه الأثناء يسمع صوت "سارينة" موكب آخر قادم . بعد قليل يظهر من يمين الخشبة رجل يرتدي زيا أوربيا أنيقا ، يبدو أنه من " القادة" الكبار إذ يتبعه ايضا ثلاثة حراس يشبهون الحراس السابقين ).
القيادي : ( وهو يتخايل وسط الحراس بهندامه المتأنق) .... بضاعة اسكندنافية ... ( يدور حول نفسه) آخر موضة. قيافة والا ما قيافة ؟
( الحراس يبدون إعجابهم بمتملق واضح ).
القيادي : ( للحراس) أخبار الشعب شنو؟
حارس3 مكرر: ( تملقا) بيبوسو قضاضيم سعادتك.
القيادي : والمعارضة
حارس1 : ( تملقا) بحاولو يلحسو كوعم
القيادي : والسوق كيف ؟
الحراس جميعا : ( بصوت واحد) نااااااااااااااار
القيادي : وعمكم وينو ؟
( الحراس يشيرون برؤوسهم فقط الي المرحاض الأول )
القيادي : ( يقترب من المرحاض الثاني ) ودا فيهو منو؟
( الحراس يصطفون صفا واحدا ويتظاهرون باطلاق النار من مدافع رشاشة علي عدو وهمي )كرررررررررررر
القيادي : ( يومئ برأسه دلالة علي الفهم) عرفتو.... المشلعاتي!.
( القيادي يمسك ببطنه فجأة فيجري ليدخل المرحاض الثالث ويغلق الباب بينما يعود الحراس الي مواقعهم حول المراحيض الثلاثة ).
سيادتو : ( بصوت عال من داخل المرحاض) شرفت يا بتاع المشاكل؟.
القيادي : (من داخل المرحاض) من المطار علي هنا طوالي يا سيادتك؟ .
سيادتو : 0 باستغراب) يا راجل..!! ونحنا لسه عندنا مطار؟
النائب : ( يتدخل بزهو ) ودولي... سيادتك.
سيادتو : ( للنائب) قبضتو قروش المينا ؟
النائب : قربنا سيادتك ... يومين تلاتة وننجض الشغلانة .
سيادتو : أخبار المعلوم كيف ؟
النائب : جاهز سيادتك ... كده خللي البيعة تتم .
( القيادي يتنحنح فيفهم النائب).... كل واحد باخد نصيبو
سيادتو : ( لنفسه) تاني الفضل شنو يتباع ؟
النائب : الشعب سيادتك ......
القيادي : ( يتدخل ) نبيعو كلو علي بعضو وننتهي.
النائب : لا...لا ...نبيعو مجزأ ... حتة ..حتة ....اسبير يعني ... إشي كلوة .. إشي عين ... كدا بنستفيد أكتر. الأيام دي سوق " الأعضاء" شغال تووش.
سيادتو : ( للنائب) أوعك تبيع البحر .... دا ما حقنا ( لنفسه ) ... الله يخرب بيتكم ... علمتونا الطمع ( يصمت قليلا).... غايتو ..كان إزنقنا ...بيعوه.
القيادي : والله الدنيا دي حلوة حلا .. أحكم ... وأهبر...دا نحنا قادة " لقطة" يا جدع... اربعة وعشرين سنة خدمة ولا اتهزينا ولا اتلزينا.
سيادتو : بعد ما نخلص الشغلانة دي نتطهر ونتوب
النائب : ليه ... ونحنا قاعدين نسوي حاجة غلط ؟.
سيادتو : هسي القاعدين نسوي فيهو دا ما غلط؟
القيادي : ( ببرود واضح) دا قانون الانتخاب الطبيعي يا سيادتك.
سيادتو : ( بحنق) علي بالطلاق دا قانون النفاق الطبيعي.
( يسمع فجأة صوت أزيز طائرات ، الحراس يتوزعون حول المكان مستطلعين السماء ويراقبون بالنظر).
حارس 3: ( يصرخ ) غارة جوية.... غارة جوية.
( المراحيض الخشبية الثلاثة تتحرك بمن في داخلها هاربة حتي تختفي يسار الخشبة ).
يتبع (3)
الدمازين في :26/02/2013م.
محمد عبد المجيد امين ( عمر براق)
[email protected]
[email protected]


تعليقات 0 | إهداء 0 | زيارات 726

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




محمد عبد المجيد امين
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة