المقالات
السياسة
ارشيف مقالات سياسية
لله يا محسنين ..عليكم الله زول يشرح لي
لله يا محسنين ..عليكم الله زول يشرح لي
02-27-2013 04:27 AM


والله حقيقه عاوز زول يفهمني الحاجات دي لأنه قدر ما حاولت ان اجتهد وقرأت واطلعت وجرى دمعي بالمايق من التركيز على شاشة الكمبيوتر لكي اوسع من مداركي التي اتهمها بالقصور اذ اجدها تعجز عن الفهم ،
لكن تقول الحكمه على لسان (البلابل) اللي بسأل ما بتوه
فانا أسأل عن :
1- كيف يكون الواحد شيوعي ومن حواريي الشيخ الترابي ومعاض النظام الحاكم ومعارض للناس المعارضين للنظام مثال لذلك المحامي غازي سليمان
2- استاذ جامعي ودكتور في المجال الزراعي كيف يكون مدير لجهاز الامن
3- طبيب أطفال وزير زراعه
4- طبيب اسنان كيف يكون وزير خارجيه ومره وزير استثمار
5- طبيب مستثمر في المجال الطبي لديه مستشفيات وكلية طب كيف يكون وزير صحة
6- بروفيسور رئيس اتحاد نقابات العمال دي بروضو ما قادر افهمها
7- الحد الادنى للاجور 1800 دولار ابت تركب لي في نافوخي كلو كلو
8- الناس المعارضين للنظام كللللللهم على علاقه بجهات خارجيه صهيونيه
9- التوقيع علي الورقه الفلانيه يحولك فجأة الى كافر ويمرقك من المله وان صليت وصمت وزكيت
10- انعدام الدواء المنقذ للحياة مع كثرة الحديث عن التطور في المجال الطبي
11- بناء المساجد وهدم المستشفيات
12- كرار التهامي (دا برااااهو كده) عاوز زول يديني فيه حصة حصتين يمكن افهم
13- علاج المسئولين وافراد عائلاتهم بالخارج سفرهم يتم في يوم وليله والناس التانيين ورقه داخله ورقه مارقه لما المريض يصل الخارج وتكون روحه في الحلقوم
14- بيع التلفزيون للصين
15- ............
16- ............
17- الزول يتحول من وزاره الى اخرى بعد ان اثبت فشله في الاولى كييييف
18- الفساد يعني شنو؟
19- هل تشغيل المخ والاستفاده من المنصب وقضاء الحاجه مقابل حاجه يعتبر رشوة ، طيب اذا كان المسئول زول خايف الله وملتحي وعنده علامة صلاة ومتزوج مثنى وثلاث ورباع ماممكن تكن حاجه غير رشوه
20- دعم قطر للديموقراطيه
ملحوظة:
رقم 15 و 16 ديل ما اظن في زول فاهمن عشان يفهمني ليهن عشان كدا خليتهن بجيهن راجع مع الحجات الباقيه عشان ما اكتر عليكم واشتت تركيزكم

وبجيكم راجع ان حيينا ما متنا


[email protected]


تعليقات 6 | إهداء 0 | زيارات 1063

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#597886 [سودانى طافش]
5.00/5 (1 صوت)

02-28-2013 05:39 AM
أنا أكثر سؤال محيرنى وأتمنى أن أجد الأجابة عندك لسبب بسيط أوليس أنك (دكتور ) !
1- لماذا تجد الواحد فى هذا الزمن الغريب يضع قبل إسمه حرف (دال ) وبعد ذلك تقرأ
كتابته وبها بعض الأخطاء ..!
وإذا إفترضنا أنها نتيجة للسرعة فى الكتابة أوليس من الأجدر له مراجعة ماكتب قبل
النشر فقط مراعاة لحرف ( الدال ) الذى يزين به إسمه ولا يجعلنا ننحرف عن الموضوع الأساسى!


ردود على سودانى طافش
United States [لاظوغلي] 02-28-2013 05:02 PM
أما انك فعلا طافش
هسه كلام الزول دا ما فيه كلمة غلط غير كلمة (معاض) ودي أي طفل صغير بيعرف انه المقصود منها معارض لكن سقط منها حرف الراء
انت لو عندك عقده من الدكاتره ما تكتب دكتور طافش في زول عارفك انت مين؟
بعدين الزول لما يكتب بالعامية غير لما يكتب بالفصحة
ولعلمك الخطأ الغبي في الكتابه هو خطأ تبديل حرف بحرف مثل الذي فعلته أنت باستخدمك الألف اللينة مكان الياء في (محيرنى) والصحيح محيرني بالتنقيط وكذلك في كلمة (الأساسى)والتي يجب أن تكتب الأساسي بتنقيط الياء أيضاً لأن ذلك يفسد المعنى والمعني
لا تنهى عن خلقٍ وتأتي بمثله عارٌ عليك إذا فعلت عظيم
.
.
دكتور لاظوغلي


#597863 [عنبر عمر الطيب]
0.00/5 (0 صوت)

02-28-2013 02:24 AM
اديك يا خوى رقم (15) و (16)
15)مؤهلات الناس الاستولوا على البلد بالليل وبالسلاح وبيحكمونا ؟
16)العجايز التلاتة العندهم لسع النية لحكم السودان وفاتوا مرحلة التفكير المنطقى وخرفوا


#597603 [Alczeeky]
5.00/5 (1 صوت)

02-27-2013 07:13 PM
ياخ بالغت.. الحاجات الساهله دي يادكتور مافهمتها.... لا دا انت موضوعك بايظ خالص..... لكن ماحافهمك ليها استنادا علي فقه الستره.....


#597307 [ابو كوج]
5.00/5 (1 صوت)

02-27-2013 02:06 PM
السؤال لير الله مذلة ايها المتسول وحسبنا الرد على استفساراتكم وفوق كل ذي علم عليم
(1) من ادراك بان الترابي مش شيوعي ومرتد كمان هذا على لسان اقرب الناس له قربا وصداقة
(2) وزير الزراعة اعلم الناس بالزراعة ومن باب الوفاء ان يختبئ بين سيقان الزرع فهو انسب الناس لان يكون رئيسا للاستخبارات لان مهامه يقتضي الاختباء ولو وراء جدر
(3) الا تعلم ان وزراء خارجية السودان يتم فحصهم اولا من حيث امكانياتهم في صحة مخارج الحروف فدكاترة الاسنان هم انسب الناس في هذه المهمة لان فاقد الشيء لا يعطي
(4) ثم كيف يستطيع طبيب ماهر ان يلقف كالآخرين الا من خلال مضماره الذي يعرف مسالكه هل تريده وزيرا للكهرباء والسدود حتى يكشف امر فساده
(5) طبعا لابد ان يكون رئيس العمال بروفا حتى لا يفهمه العمال ويطبلون له بحكم عقدة النقص مع اعتذرنا للبعض منهم
(6) الحد الادنى للأجور نعم 1800 دولار وليس الحد الاعلى افهمها الان
(7) السؤال 09) اطيعو الله واولي الامر منكم
(8) المساجد بيوت الله والمستشفيات تلم مرض المسلمين والكافرين والشر يعم يا حبيبي
(9) كرار بقى وزير بعدما كان مسئول روابط الكورة في خنشيليلة
(10) اولا المسؤلون لا يمرضون واذا جاءتهم وعكه او اصيبوا بها فحوائجهم مقضية من الله ولقد فضلنا بعضكم على بعض
(11) السؤال رقم (17) قيل لاحدهم قاتل فرد متخوفا لو ان لي مهجة اخرى لجدت بها لكنها خلقت فردا والوزراء عندنا لهم اكثر من مهجة فمن راحت مهجته في موقع استفاد بمهجة اخري في موقع اخر وللمعلومة المهجة معناها في لغة الضاد الروح
(12) الفساد معناها الاجابة في سورة البقرة وهي اطول اية في القرآن الكريم اقرأها
(13) نافع يمثل وجه القباحة للنظام وصار سياسيا رغم انف الترابي هذه الاجابة للسؤال 15 اما اجابة السوال 16 فاقرأ نص ميثاق الفجر الجديد
(14) آمل ان اكون قد اجبت على سؤلك ان كنت راشدا


#597303 [هاجر عبدالقادر]
5.00/5 (1 صوت)

02-27-2013 02:05 PM
ما أظن تلقى زول فاهم حاجة او يفيدك في شيى الاجابة بس عند الناس الكبااااار اصحاب القرارات دي
الله يعينك ويعينا


#596986 [ايوب شرفي]
5.00/5 (1 صوت)

02-27-2013 10:56 AM
كدة فهمنى عسكرى رقاص رايس السودان الفضل


د. علي أبو وضاح
مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة