في المحكمة
03-02-2013 04:12 PM


وصلت إلى مباني المحكمة حوالى الساعة الحادية عشر قبل الظهر أي قبل موعد الجلسة بنصف ساعة .. وهي محكمة صغيرة تقع في وسط سوق أم درمان في مكان شديد الإكتظاظ بكل شئ ، قدمت طلب التكليف للباشكاتب الذي قام بقراءته ثم أفادني بأن (القاضي) لم يحضر بعد .. جلست في كنبة من الحديد يجلس عليها بعض من زملائي المتهمين بدأت أقرأ في صحيفة كانت معى لقتل الوقت فجأة وجدت أحدي الفتيات تقف امامي وتتمعن في ثم تسالني إن كنت الأستاذ (جبرا) فلما أجبتها بالإيجاب صافحتني بحرارة ثم أخبرتني بانها (محامية) وقد جاءت للوقوف معي متضامنة دون أتعاب ! شكرتها لحسها الإنساني وطلبت منها أن تعرفني بنفسها فرفضت فقلت في نفسى ما مشكلة سوف أتعرف عليها لاحقاً !
أعطيتها قانون الإجراءات المالية والمحاسبية لعام 2007م الذى كنت قد قمت بطباعته من (النت) وأشرت لها للمواد التي قامت (هيئة نظافة ولاية الخرطوم) بمخالفتها .
دخلت الاستاذه وجلست مع القاضي الذي حضر للتو وبعد دقائق خرجت وأشارت لي بالدخول فدخلت وقمت بإلقاء التحية على القاضي الذي طلب مني سرد الحاصل فقلت له مستهلا :
- يا مولانا القاضي كنت أعتقد أن الدولة سوف تقوم بمكافأتي لرفضي دفع رسوم لم تتم إجازتها ولم يصدر بها قانون كما أن الدولة سوف تكافئني لرفضي المشاركة في جريمة بنص القانون ألا وهي تجنيب الإيرادات والتحصيل خارج الميزانية ودون أورنيك 15 كنت اعتقد ذلك يا مولانا ولكن إذ بالدولة تطلبنى للمثول امام القضاء ..
بعد هذه الرمية (الما بطالة) قمت بسرد ما جاء في المقال السابق وحكيت (القصة كوووولها) وبعد إنتهائي قمت بسؤال مولانا القاضي :
- أليس من حق المواطن يا مولانا أن يمتنع عن دفع أي زيادة في الرسوم إذا لم يطلع على القانون الذي أجيزن بموجبه؟ يعني يجيني أى زول يقول ليا أدفع كذا وأنا أدفع؟
أجابنى القاضي في تهذيب جم :
- طبعاً لا يا أستاذ .. لازم المواطن يشوف القانون ويطلع عليهو؟ ولازم المتحصل إذا في زيادة في الرسوم يكون شايل معاهو صورة من القانون
- طيب يا مولانا انا عاوز قبل ما أدفع اشوف كل القوانين الجات بيها الزيادات دي من أول زيادة لحدت هسه
- نديك يا أستاذ جواب لي ناس الهيئة وتطلع على الحاصل ،وبدأ القاضي في كتابة الخطاب والذي ما أن فرغ منه حتي مددت له نسخة من قانون الإجراءت المالية لعام 2007م التي كنت أحملها معي بالإضافة إلى إيصال مالي يخص الهيئة قأئلا له :
- هذه الهيئة مولانا القاضي تخالف ثلاثة من مواد هذا القانون لأنها تتحصل الرسوم بإيصالات غير اورنيك 15 كما ينص القانون مما يجعلها عرضة للمساءلة
- (أجابنى) : الهيئة لديها تفويض من وزارة المالية لطباعة أيصالات والعمل بها بدلاً عن أورنيك 15
- طيب ممكن يا مولانا أشوف التفويض ده؟
واعطاني مولانا صورة من خطاب يعود تاريخه إلى 1/2/2003م صادر من السيد (محمد الخليفة عثمان) مدير عام وزارة المالية والإقتصاد والقوى العاملة
ينقل فيه موافقة وزارته على طباعة ايصالات الرسوم بالمطابع الحكومية بنمرة متسلسلة وحروف متميزة مع إفادة الوزارة عند طباعة كل طلبية !! (شفتوالشفافية والدقة دي) !!
بعد فراغي من قراءة التفويض قلت للقاضي :
ما أن فرغت من قراءة هذا التفويض المؤرخ 1/2/2013م بينما القانون صادر في 2007م حتي قمت بمخاطبة مولانا :
- يا مولانا انا سمعتا الرئيس البشير (بى أضاني دي) بيقول مافيش مواطن يدفع مليم واحد بدون أورنيك 15 وده الشئ البقولو القانون أها نسمع كلام الرئيس وكلام القانون وللا نسمع كلام زول تاني؟
- والله السيد الرئيس بيقول كلام لكن الناس التحت البينفذو بيعملوا حاجات تانية
- لا يعني أنا أمشى بكلام الرئيس وأمتنع عن دفع الرسوم دي ألا بأورنيك 15 وللا ما أمشي بيهو !!
- .....................................

محححححححكمة

القرار :
1- يقوم المتهم (اللى هو أنا) بحمل خطاب من المحكمة ومقابلة السيد مدير هيئة نظافة الخرطوم لإطلاعه على قانونية الزيادات
2- تحديد جلسة يوم 5 مارس 2013م الساعة الثانية عشر ظهراً

كسرة:
الكلام ده سمعتو بييهو (تفويض) يلغي ليهو (قانون) ؟ لا ومش كده وبس التفويض تاريخو 2003م والقانون صادر في 2007م غايتو نصيحتي ليكم يا ناس هيئة نظافة ولاية الخرطوم (في كل الأحوال) تمشوا (المالية) تجهزوا دفاتر أرانيك 15 بتاعتكم من هسه !!

كسرة ثابتة :
أخبار ملف خط هيثرو العند النائب العام شنو(وووو وووو وووو)+(وووو) ؟
بقى شكلها يجنن .. مش كده؟




[email protected]


تعليقات 38 | إهداء 0 | زيارات 8142

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#600933 [ابو عبد الله]
0.00/5 (0 صوت)

03-04-2013 08:55 AM
السؤال المهم هل رسوم النفايات دي بتدفع مقدماً قبل الحصول على الخدمة ولا مؤخراً ، اذا كانت مقدما قول للقاضي انا خدمتهم دي ما دايرها ونفاياتي بوديها الخلاء برااااااي
اما لو مؤخراً شيل شيلتك


#600584 [المتفائلة جدا]
0.00/5 (0 صوت)

03-03-2013 05:51 PM
إقتباس : الهيئة لديها تفويض من وزارة المالية لطباعة أيصالات والعمل بها بدلاً عن أورنيك 15
- طيب ممكن يا مولانا أشوف التفويض ده؟
واعطاني مولانا صورة من خطاب يعود تاريخه إلى 1/2/2003م صادر من السيد (محمد الخليفة عثمان) مدير عام وزارة المالية والإقتصاد والقوى العاملة
ينقل فيه موافقة وزارته على طباعة ايصالات الرسوم بالمطابع الحكومية بنمرة متسلسلة وحروف متميزة مع إفادة الوزارة عند طباعة كل طلبية !! (شفتوالشفافية والدقة دي) !!
يعنى يا أستاذ الكلام ده ما واضح زى الشمس ماداير ليه تفسير ..وبعد ده تقول لى أرنيك 15 ماخلاص مافى داعى تبحت أكتر من كده..
وبعدين ألف حمدلله على سلامتك الدخلت لى بيت العقارب ومرقت سالم ومافى كلبوش الحمد لله..
ومعليش أنا المرة الفاتت وصيتك أوع تكون نسيت قلت ليك أسال لى من أين أتى هؤلاء؟؟
و ما دام بتدخل وتمرق بدون عوجة المرة الجاية أسألهم لى دين أبوهم إسمه إيه؟؟
ولك الشكر الجزيل


#600497 [مرق خلاها و طفش]
0.00/5 (0 صوت)

03-03-2013 03:59 PM
باجبره باولدى انا خايف عليك العالم دى صيع يابه ولو حاربتهم بالقانون بحاربوك بوسخم و عفنم. هو اصلا لو البلد فيها قانون بجرجروك انتا فى المحاكم و اللا حسنها لافين بالبرادوهات و ضاربين الكندشه. شوف سبحان الله السلاسه فى سرعة استدعائك للمحكمه و تحديد جلساتك و خط هيثرو الباعوهو والشمس فوق لى اسه ماسمعنا بى محاسبة زول بيهو و كانو باعو واحد بتاع اسكراتشات. منو العوض واليهى العوض!!!!

ملحوظه:- احب اشكر الاستاذه المحاميه اطال الله فى عمرها و اكثر من امثالها على وقفتها النبيله بجانب المواطن الشريف الفاتح جبره. ادتنا بريق امل انو السودان لسه فيهو بشر بحس

كسره على الماشى:- بينى وبينكم خط هيثرو ده ما خط مميز بتاع الاسكراتشات ما بكون احتار فى بيعو. انا الخايف منو انو يكون باعو لى كم زول فى ان واحد زى قطعة الارض بتكون واحده لكن ببيعوها جماعى


#600302 [hozifa osman]
0.00/5 (0 صوت)

03-03-2013 12:22 PM
اخبار قضية الفاثح جبرة العند محكمة النفايات شنو (دى بداية الكسرة ,, كل جلسة بى (و))


#600265 [بلال]
0.00/5 (0 صوت)

03-03-2013 11:42 AM
ما أن فرغت من قراءة هذا التفويض المؤرخ 1/2/2013م بينما القانون صادر في 2007م حتي قمت بمخاطبة مولانا
استاذ جبرا / رسوم النفايات تم فرضها بامر محلي والامر المحلي زي القانون ملزم يعني سييك سييك معلق فييك حتدفع يعني حتدفع ومنتظرين اخرتها


#600180 [كوكاب]
5.00/5 (1 صوت)

03-03-2013 10:17 AM
استاذ جبرة ازيك.... خايف يبقى عليك البقى على هانى رمزى لما شال الدستور ومشى عرس على حساب الحكومة وقال هو(م ع) ... بس بقت على الجنيهين ؟؟؟؟ ادفع (بالتى هى احسن)وما فرقت يعنى الحكومة ناقصة(جنيهين)؟؟؟؟والاكلو شوية؟؟؟؟؟خليهم ياكلوها عشان حسابهم مع الله(يزيد جنيهين)


ردود على كوكاب
United States [ابو أحمد السوداني] 03-03-2013 12:27 PM
شوفو بالله نوعية الزول الإنهزامي المخزلاتي ده
المسأله مبداء و ليست جنيهين


#600172 [محموم جدا]
0.00/5 (0 صوت)

03-03-2013 10:09 AM
هو أورنيك 15 دا في أغلب الاحيان غير مختوم بختم وزارة المالية فقط مروس بالمالية يعني خلاص اصبح مصفح ضد التزوير يادوبا حلت للإيدو خفيفة و فهلوي .. لابد من التوريد للغرامات أن يكون مركزيا إذا كانت المخالفات فعلا هي مخالفات للمصلحة العامة و فورية تستحق لتصبح العقوبة في الحق العام عقوبتين مال و زمن لكن يا جبرا عايرة و مدينها سوط


#600161 [الشايقي]
0.00/5 (0 صوت)

03-03-2013 10:00 AM
مفروض يقيموا عليك حدالزنا لان شركة النظافه انثي وانت راجل ماعندك موضوع ومااسلامي دي بذات بتدينك.. اها دا هسي مامنطق؟
ثانيا انت كان ماتمشي تقول ليهم انا من اولاد جبرا واسمي جبرا الا يجيني تكليف من محكمة جبره


تحياتي استاذنا جبرا


#600053 [المطرطش]
5.00/5 (1 صوت)

03-03-2013 03:34 AM
ياخوى جبرة موضوعك دة طويل ...شوف رسوم الشرطة والتاشيرة وحتى فى وزارة العدل والمستشفيات حتى مستشفى الشرطة والامن والجيش ...يكونو شغالين بى تفويض زمن الانجليز..
ياجوى البشكير حقنا دة مافى مسعول بيسمع كلامو ...حليلك يانميرى كان بالشلوت ...

الله يديك العافية

بعد موضوعك ده شوف مشكلة وزيرات ووزير العمل مع النقابة ... اتهامات وفضائح ..

قال...بشكير قال (


#600004 [مفاجأة]
5.00/5 (2 صوت)

03-03-2013 12:50 AM
هم لييييييه ما دايرين يدوك وقت؟!؟
&
مبدئياً كدة
شوف خلي الهدف الأول هو الخضر طبعن عشان الموضوع فيهو ولاية وكدة أقصد سجن وكدة هههه (( ياشباب اذا ممكن شوية معلومات عن الخضر وعن الدكنوراة بتاعته دي أول شيء ))
&
تمشي تقابل مدير هيئة نظافة الخرطوم ده وما تقابل أي زول غيره تمشي وشايل معاك قزازة موية صحة سوبا عشان ما تشرب عندهم أييييي حاجة قول ليهم أنا عيان أكلي وشرابي بي مواصفات ، خليك حريص انت معاك أمر من القاضي ، إذا حبو يخلصوا من الموضوع سريع ــ حا يقابلوك بيهو طوالي حار حار ويدوك النظرية ويخارجو نفسهم من الموضوع ــ أما إذا هم داقسين ساي وماجايبين خبر للحتة الدخلو نفسهم فيها يكون كويس وعلى نفسها جنت براقش ، حا يفكو ليك السكرتيرة ولا مدير المكتب بتاعة ، قول ليهم مافي مشكلة إذا هو ما فاضي وللا عيان وللا في مأمورية يحددو ليك مواعيد معاه إنشالله بعد شهر بس ما تشيل منهم أي ورقة إلا إذا كان معاك زول تاني يشيله هو وما يديك ليها إلا بعد يوم الثلاثاء عشان ما يجو يقولو بعدين قدام القاضي سلمناك طلبك ، ترجع تقول للقاضي حددو لي مواعيد معاه بعد شهر يحدد ليك جلستك الجاية بعد شهر ويوم على الأقل نكون جمعنا شوية معلومات (( هو منو ؟ وساكن وين ؟ وجنسو شنو ؟ وبقية الحت الشديد داك هههه ))
&
ويا شباب المطلوب مننا الآتي :-
1- يوم الثلاثاء إن شاء الله تفضو نفسكم من الساعة عشرة صباح لحدي الساعة واحدة ضهر وتكونو في محكمة السوق .
2- توفير أكبر قدر ممكن من المعلومات عن المتهمين أعلاه ، والهيئات المتواطئة وحجم الربط المطلوب منها وأوجه الصرف لإيراداتها إن أمكن .
3- فتح صفحة في الفيسبوك وتسموها أي إسم أو ممكن نسميها محكمة الفاتح جبرا (هههه)نبدأ فيها بالصور من هيئة نظافة ولاية الخرطوم صور للباب الرئيسي وصور للمباني من الحوش وصور للمكاتب من جوة وصور لليافطة بتاعتهم وصور للمدير وأي صور تخص الموضوع بتاع النظافة دة (( سخصياً يا عمك أنا ما عندي ثقة في أي زول ولا حتى في نفسي عشان كدة موضوع الصفحة يا ريت إذا عملتو إنتا ويكون زي صفحة عيد ميلاد الخط ديك )).
4- ...
5- ...
6- ...
ديل بخليهم للشباب


#599999 [faisalmukhtar]
3.00/5 (2 صوت)

03-03-2013 12:37 AM
الاخ جبرشوف الجهه الكانت مسئوله عن الارانيك الماليه هى المخازن والمهمات وذلك قبل نظام الانقاذ تقوم المخازن والمهمات بتوزيع الارانيك الماليه لجميع الوحدات الحكوميه فى الخرطوم ولجميع الولايات وتقوم اتيام ديوان المراجعه المتجهه الى اى جهه باخذ بيانات الارانيك الماليه من المخازن لمطابقتها مع السجلات المحفوظه لدى الجهة المراد مراجعتها ولذلك كانت الايرادات المحصله تورد للماليه وكانت بورصه المحاصيل فى جميع المناطق تحتفظ باصول ارانيك 15 لتقوم فرق المراجعه باخذها ومضاهاتها مع الصور الموجوده بالدفاتر يعنى لايمكن الاختلاس وبعدين مافى ايرادات يمكن تجنبيهامادام التحصيل تم باورنيك 15 ولذلك استخدم جهه غير المخازن لطباعة الارانيك الماليه يؤدى الى عدم القدره على ضبط توريد جميع الايرادات المحصله وتفشى ظاهرة الاختلاسات وسرقه الاموال العامه مع عدم قدره اتيام المراجعه على اكتشافها ومايتم اكتشافه عباره عن جزء يسير وعليه لابد من وضع انظمه رقابه ماليه لاتسمح باى اختلاسات ويتم كشف اى اختلاسات تحدث فالمبالغ التى يتم تحصليها يمكن ان تدار بها الدوله وتمول بها مشاريع انتاجيه فى مناطق النزاعات تؤدى الى ايقاف هذا النزيف الدموى لابناء الوطن


ردود على faisalmukhtar
United States [[email protected]] 03-04-2013 01:45 PM
يا ود مختار المحتار، أنت لو أصلاًً الجماعة مادايرين إختلاسات تحصل ما كان فتحو خط برلين ده، أنت يا حبيبنا خليك مفتح!
الناس ديل دايرين الموضوع ده يمشي مركوك كده، أصلو المال السايب معرض للسرقة، يخلوها مفتوحة عشان تجي مطبوخة، أنت عايز منو يحاسب منو؟
في حرامي يحاسب حرامي، في فاسد يحاسب فاسد؟
يا حبة خليك واقعي.
ولك التحية ياود قلبها.


#599964 [cour]
5.00/5 (1 صوت)

03-02-2013 11:26 PM
الحمد للة ماسجنوك ولا جلدوك يا استاذ انسى الموضوع وخليك مع السناريوهات لاحسن ديل ولاد كلب (تذكر طلاب جامعة الجزيرة الغرقو)


#599942 [wadhooly]
0.00/5 (0 صوت)

03-02-2013 10:46 PM
والله يا ود جبره لا يمكن ان تعمل من الفسيخ شربات بلد عيره وادوها سوط


#599936 [abu sudan]
0.00/5 (0 صوت)

03-02-2013 10:42 PM
(محمد الخليفة عثمان) مدير عام وزارة المالية والإقتصاد والقوى العاملة
ينقل فيه موافقة وزارته على طباعة ايصالات الرسوم بالمطابع الحكومية بنمرة متسلسلة وحروف متميزة مع إفادة الوزارة عند طباعة كل طلبية
هل الايصالات بها ارقام متسلسلة ومطبوعة بمطابع حكومية ام هى دبل كيت من اى مكتبة


#599933 [الطاهر]
5.00/5 (6 صوت)

03-02-2013 10:37 PM
"من الذكاء ان تبدو غبيا احيانا"
مع كامل الاحترام للاستاذ جبرا، كلنا نعلم ماذا يدور في كواليس الحكومة، زكيف تتم سرقة عرقنا وكيف نواجه بقوانيين وتفويضات مثل تفويض عام 2003 المذكور في المقال، لكن من الجيد ان يواصل استاذنا الفاتح معركته النبيلة ضد الظلم والاستبداد حتى ولو انتهت القصة الي دفعه ال 2 جنية الاضافية.
بل والمطلوب ان تصبح القضية قضية راي عام وان يقف الناس مع استاذ جبرة في المحكمة كوسيلة لتوصيل رسالة "نحن نفهم مايدور وسنحاربكم بنفس اسلوبكم الماكر" لان الواضح ان زمن الانتفاضات والمظاهرات التي يمكن ان تهز اركان النظام قد ولى. الدستور ينص على حقوق المواطنين والمواطنون يفترضون النزاهة في النظام القضائي. المطلوب شخصيات مدنية معروفة لقيادة مثل هذا الخط والقضايا على قفا من يشيل.
كلنا مع جبرا....


#599928 [alsadeg]
5.00/5 (4 صوت)

03-02-2013 10:30 PM
يااستاذ
لو ماقاموا وربطوا النفايات مع الكهرباء
وتكوووووووووووووون انت السبب


#599926 [ابن حلايب]
5.00/5 (6 صوت)

03-02-2013 10:29 PM
يعنى يا ود جبرا لو كنت انا ولا اى واحد من الغلابه البشبهونى كان القاضى حايديه خطاب لمقابلة مدير النظافة طبعا كان اخد ليه سنة سجن لمقاومة السلطات و عصيان الاوامر و الشروع فى تدمير الاقتصاد الوطنى . نحن غلابه يا الفاتح جبرا .


#599924 [مصطفي محمدصالح]
5.00/5 (1 صوت)

03-02-2013 10:28 PM
والله انت طيب بشكل عايز تقاضي الحكومه .........بكره بقفلوك وشوف كلامي ما ضيع زمنك ساكت ادف وخلاص فكنا ............؟؟


ردود على مصطفي محمدصالح
United States [ابو أحمد السوداني] 03-03-2013 12:37 PM
انت أكثر سزاجة و تفكر بشكل انهزامي
ارحم نفسك يا اخوي و القفلة بخافو منها الزيك

مت وانت شامخاً


#599890 [دقنة]
5.00/5 (7 صوت)

03-02-2013 09:16 PM
أنت شخص رائع يا أستاذ الفاتح ،،، خصوصاً وأنت تعطيناً دروساً في الوطنية والأدب والزوق والدفاع عن الحق

ربنا يحفظك من كل سوء إن شاء الله


#599889 [عكليت]
5.00/5 (6 صوت)

03-02-2013 09:05 PM
لقيتك عكليت أكثر مني .. و كمان شايل معاك قانون 2007 للقاضي َ!!! بس أوعه الهيئة تعفيك من الزيادة وتروح نائم .. الي الامام .. اليس هم هؤلاء الذين حولوا الجباية من قبل لشركات ؟؟
اليس هم الذين وضعوا الاصفار من قبل لرسوم القصر الجمهوري ؟؟؟


#599875 [wedhamid]
5.00/5 (2 صوت)

03-02-2013 08:36 PM
يا سـاخر السبيل ....تحية طيبه...

لقد عرضت الموضوع بأسلوبك المميّز الساخر فى مسلسل كوميدرامى ظريف .... و أديت جهات كثيره متورطه فى عملية الإبتزاز و النهب المقنن دا بطرقات منبّهه عشان كل من يهمه الأمر يصحو من سباته و يتقى الله فى خلقه و ما يوصّلوا الناس لحد الإنتفاضه و الثوره و لكن الكل لاهى و مصهين....ألا ترى بأن مقالتك هذه و دعوتك أمام القضاء منبه لمؤامرة تحاك و جرائم ترتكب و المسئولين صم بكم ؟؟؟ ألا يستدعى الأمر تدخل وزير الماليه و أركان وزارته لضبط فعل ضد تعليماتهم ؟؟ ألا يستدعى الأمر بيان من رئاسة الجمهوريه تذكر بقرارات رئاسيه تمنع التحصيل خارج اورنيك 15 ؟؟؟؟ألا يستدعى الأمر صدور فتوى تحرم تحصيل الأموال بهذا الأسلوب المحرم شرعا و أخلاقيا؟؟؟ ألا يستدعى الأمر بصحوة المجالس التشريعيه و الرقابيه المتعدده ديك ؟؟؟ و ألا يستدعى هذا الأمر مساءلة هيئة النظافه و المسئولين و حتى مرسلاتهم و نيابتها التى وجدت فى رفض المواطن الفاتح جبره للإبتزاز و الذهاب للنهاية لفضح هذا النظام اللصوصى الفوضوى و أضاعة زمن القاضاة الرافضين أن يكونوا أدوات تحقير وإذلال للمواطنين و أتمنى إمتناع المواطنين أيضا دفع رسوم المياه دون عداد ( لاحظوا كل أمور الهمبته دى تحدث فى ولاية الخرطوم و التى على رأسها د. عبد الرحمن الخضر ) ....و حسبنا الله و نعم الوكيل ......


#599872 [عباس بن عباس]
5.00/5 (3 صوت)

03-02-2013 08:35 PM
احلق شنبي ده اللي لسه ما قام اكان تلقي حق ولا باطل...ومن الليلة دي ستعطي تعليمات بائعفائك وربما جيرانك من دفع اي رسوم..
ويا دار ما دخلك شر.


#599867 [بي كرت]
4.50/5 (3 صوت)

03-02-2013 08:28 PM
انت متأكد انو الجات تقيف معاك دي محاميه ولا يكون الموضوع اتخلط عليك , لأنو الموضوع العملتو ليك ده شغل حاجب المحكمه .


#599835 [سيف الدين]
5.00/5 (7 صوت)

03-02-2013 07:11 PM
.
استازنا جبرا

انا من الليله راح احرش اي واحد بعرفو انو مايدفع لناس النفايات ويتصلبط فيهم ويقول ليهم جيبو لي القانون عشان اشوفو واعرف الفيهو
او ودونى المحكمة لو ماعاجبكم وما راح ادفع

امانة عليكم يارواد الراكوبة تحرشو اى واحد تعرفوهو يرفض الدفع
واليحصل يحصل


#599830 [البعير]
0.00/5 (0 صوت)

03-02-2013 07:04 PM
دى بلد عايره ومدينها سوط


#599808 [Fato]
5.00/5 (4 صوت)

03-02-2013 06:31 PM
شفقتنا عليك ياجبرة وأنا عندى لك نصيحة خليك ماسك فى شطر البشير وخطابه وماتتنازل أبدا وقول للقاضى أذا كلام الرئيس مابسمعوه ويعملوا بيه تبقى على الدنيا السلام ويبقى الرئيس أضان قفة وأهو تخليهم جميعا فى حيص بيص,موعدنا ولن أقول موعدك لأن القضية هذه قضية شعب بأكمله ضد حرامية لا يستحون.


ردود على Fato
United States [العجلاتى] 03-03-2013 03:49 AM
يقول ياسيادة القاضى ,,,انا عندى شاهد....على كلامى ....خلى يرسل فى طلب البشكير ويقيف معاك قدام القاضى ويحلف كمان ....
البشكير :اى الكلام انا قلتو لكن الناس مابيسمعو كلام ابوهم اولاد عاقين..

القاضى: والله حقو تحلو الموضوع ده وديا وباركوها والمسامح كريم.. نعمل تسوية
حليل محكمة العمد..ده راى فيهو انت شن قولك(ابوسن)

جبرة: خلاس ياخوانا والله خجلتونا( يضع فى جيبو رزمة من اللحاليح.

ويبتسمو تلاتهم ويخرجو مبسوطين..

وقدام العربية يخاطبو جبرة ماتنسانا من صالح دعواتك

ويذهب جبرة وفى العصرية يطلع كرسى قدام البيت وقدامو يرمي الشاى ورافع كرعينو فى التربيزة ومعهو بتو الصغيرة فرحانة بالباسطة .

وخلاص


#599798 [صالة المغادرة]
4.50/5 (4 صوت)

03-02-2013 06:10 PM
يا جبرة القانون والشفافية لحقو امات طه منذ30يونيو1989 والبلدشغالة بفقه الضرورة ولوائح حبيبى اغمت لى وبغمت ليك وهذه العصابة اسسسسسسسسسسسسسسسسسسسسسسسسسسسسسسسسسسسسسسسسسسسسسسستباحت البلد والسين الطويلة كناية عن ان الجماعة اخدوا راحتهم للاخر لاخايفين من الله ولامستحيين من خلقو تانى عندك نضم ياجبرة .


#599792 [القرم تفاحة ابل]
5.00/5 (2 صوت)

03-02-2013 06:04 PM
التحية لك وانت تطالب بحقوقك والتحية لي الا ستاذة لوقوفها معك والتحية للقاضي لي تهذيبه معك


#599788 [خرباش]
5.00/5 (4 صوت)

03-02-2013 06:02 PM
والله يا استاذنا فاتح جبرا انا برضو سمعت من السيد رئيس الجمهورية(عمر البشير) انو واحد ما يدفع جنيه واحد الا باورنيك 15 وانا مستعد اشهد ليك قدام المحكم ـ حتى وزير المالية برضو قال الكلام القالو السيد الرئيس .
مرة انا مشيت جهاز المغتربين مع احد الاخوان ونحن داخلين البواب الرئيسية للمغتربيين لقيت واحدة قاعدة في كرسي ونادت وقالت دعم الحرب وشالت لية تذكرة وقبل ما استلم التذكرة في واحدة تانية نادت بالاتجاه المعاكس وقالت دعم السلام انا قلت ليهم واحد من الاثنين يا حرب يا سلام.


#599771 [ود الجد]
5.00/5 (1 صوت)

03-02-2013 05:40 PM
ينصر دينك استاذي الكريم جبرا


#599770 [بدر السما]
5.00/5 (2 صوت)

03-02-2013 05:39 PM
إنت كدا قبضت ليك واحدة من إضنين المرفعين . شد حيلك وأقبض التانية وخليك مفتح .


#599756 [ابوسروال]
5.00/5 (1 صوت)

03-02-2013 05:28 PM
انت يا استاذ شكلك كدا فاضي قانون شنو ولا ارونيك شنو ديل غرموا ابليس لما هاجر قال ليهم سايب البلد حتي لا يقع في المعاصي __ ابليس لا يعاصي بل يدلك علي المعاصي اذا عصيت.. يقول ابليس إني بري منك اني اخاف الله!!


ردود على ابوسروال
United States [كوكاب] 03-03-2013 11:01 AM
ابيلس زعل قالوا ليهو مالك ؟؟؟؟قال الكيزان ديل نكرو حقى قالوا ليهو كيييييييف؟؟؟ قال ليهم انا علمتهم اى حاجة واى كوز اخش مكتبو القاه معلق يافطة كاتب فيها( هذا من فضل ربى)


#599752 [aviv]
0.00/5 (0 صوت)

03-02-2013 05:23 PM
تسلم يا استاذ , ونحنا منتظرييييييييييييين ال (مححححححححححححححكة) نشوف نهايتها شنون


#599751 [sudani 100%]
5.00/5 (2 صوت)

03-02-2013 05:23 PM
انا لو كنت مدير هيئه نظافه الخرطوم اعمل خطاب استثناء بموجبه اعفاء السيد جبره من الرسوم مع تمتعه بكامل الخدمه و الطاقه التجيب الريح سدها و استريح بعدين يا جبره ياخى ملك علينا كل مره ناطلين لينا بقانون يااخى هو فى ققق....


#599749 [عوض محمد احمد]
5.00/5 (1 صوت)

03-02-2013 05:17 PM
اخى الفاتح التحيه والود الحمدلله لقيتلك قاضى اكرمك وفهم موضوعك يعنى القضيه انتهت ولسه نخلى الجماعه يحضووا ليك العمود وترمس الشاى ورينا الحاصل يوم 6 مارس


#599745 [عبدالماجد قنديل]
5.00/5 (1 صوت)

03-02-2013 05:13 PM
أنت يا أستاذ جبرا القوانين دي مش مفروض تجاز من البرلمان ؟؟؟ هل أجيزت الزيادات دي من
ممثلي الشعب ؟؟؟ والله كل صباح أي واحـد ممكن يصدر قرار يخدمـــه في مسألة ( اللقف)
آه يا بلــــــــــــــد آه ؟؟؟؟؟؟؟


#599735 [البشير على نافع الجاز الفللى]
0.00/5 (0 صوت)

03-02-2013 04:59 PM
المرة الجاية تقول للقاضى انا عايز شهادة الرئيس
هى الحكاية حقااااااااااااااااااااااارة ولا شنو
دىل قايلين البلد هاملة
انا مرة دفعت غرامة حركة بالارنيك رقم 15-


#599734 [خالد حسن]
5.00/5 (4 صوت)

03-02-2013 04:56 PM
دي الفوضي العارمه في زمن المشروع الانهياري
تفويض يلغي قانون .. والقانون احدث من التفويض الالغي القانون الاحدث
شفت نحن رجعيبن كيف في عهد الحمار البشير


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة