في هيئة النظافة
03-04-2013 11:17 AM


في العاشرة من صباح الأمس الأحد الموافق 3 مارس حملت الخطاب الذي اعطاني أياه السيد القاضى معنوناً إلى السيد / أحمد عبدالرحمن مدير هيئة نظافة الخرطوم .. تعبت كثيراً في معرفة مكان الهيئة لإنعدام أي لافتة تشير ألي وجودها عموما كما يقولون (البيسال ما بيتوه) وبعد سؤال عدد من الميكانيكية والأسطوات إذ ان مباني الهيئة تقع في المنطقة الصناعية .. وجدتها فدلفت إلى داخلها حيث وجدت سكرتير المدير الذي طمأنني بأن المدير موجود وسوف يأتي بعد قليل
وبالفعل لم تمض دقائق حتي جاء المدير وبعد التحية قمت بتسليمه الخطاب وعندما رأيت علامات (التوهان) في وجهة قمت بقص الحكاية عليه وختمتها بأنني قد حضرت لمعاينة القوانين التي أجيزت بها رسوم النفايات .. وكذلك الدفوع القانونية كون أن الهيئة لا تلتزم بالقوانين المالية القاضية بالتحصيل باورنيك 15 .
طيب نجي نشوف السيد المدير قال شنو؟
- شوف يا أستاذ نحنا الأيصالات دي قاعدين نطلبها من وزارة المالية وبيسموها (بديل أورنيك 15) وهسه أهو ده جواب طالبين منهم يدونا 10 دفاتر عشان دفاترنا قربت تخلص
- يعني المالية هي ذاااتا مشاركة في الجريمة دي؟
- ده الحاصل يا استاذ
- طيب القروش الإنتو بتستلموها دي لمن تجمعوها بترسلوها لوزارة المالية وللا بتتصرفوا فيها براكم؟
- والله نحنا في الهيئة ما بنورد القروش دي للمالية ومش نحنا الهيئة الوحيدة البتعمل كده هيئات كتيرة ما بتورد قروشل للمالية !
- طيب ولاية وزارة المالية على المال العام وين؟ وإذا الهيئات والمؤسسات الحكومية الفي البلد كوووولها عملت كده وكل هيئة طلعت ليها دفاتر وفرزت عيشتا قروش البلد دي يعملوا ليها (كنترول كيف)؟ ؟
- والله يا استاذ ده الحاصل !
- طيب هسه إنتو المراجع العام قاعد يراجعكم
- .............................................
- على العموم إنتو براكم ... معاكم ناس تانين بيعملو كده .. حقو تعرفو إنو التحصيل بدون أورنيك 15 وتوريد المتحصلات دون تباطوء إلى وزارة المالية دي جريمة ويعاقب عليها القانون وأنا لن أدفع ولن أشارك في هذه الجريمة
- يا أستاذ أنحنا قلنا ليك هسي ادفع؟ يا اخي أدفع على راحتك نحنا أصلوا ما بنحب الأمور توصل للقضاء إنتا ممكن تواصل في الموضوع زي ما عايز لكن موضوع المتأخرات ده بنحلو ليك
- يا أستاذ الموضوع ده طلع من أيدي وأصبح موضوع رأي عام وأنا هنا بمثل ألآف المواطنين ..
- (بعد أن طلب لي كباية كركدي) : لو ممكن بس أشوف قوانين
الزيادات التمت في الرسوم دي؟
- جداً (وخرج من المكتب وعاد وهو يحمل عدة أوراق مدبسة)
- ده القانون يا استاذ وهو مجاز من المجلس التشريعي وصادر سنة 2012 ونحنا الزيادة الجات في القانون ده عملناها هسه عام 2013
- يعنى إنتو مما عملتو الهيئة دي زدتو الرسوم مرة واحده اللي هيا بالقانون ده ؟
- أيوه
- لكن الحاصل إنو الزيادات دي تمت أكتر من مرة يعني نحنا مثلاً كنا بندفع ستة جنيه وبعدين بقت تمانية وهسه بقت عشرة
- لا .. الزيادات تمت مرة واحدة
- أنا ما ح اغالطك لكن في ناس من الفئة بتاعتنا هسه بتدفع 10 جنيه .. طيب ممكن تديني صورة من القانون ده؟
- والله مكنة التصوير بتاعتنا بايظة لكن ممكن ترسل ليا أي زول أديهو ليهو بعد ما أصور ليك نسخة
- (وتاني رجع للحكاية) : يا أستاذ موضوع المتأخرات ده ممكن نساويهو ليك !
- تساويهو ليا دي شنو؟ خلي السكرتير بتاعك شايفو فاتح النت يدخل صفحتي على الفيسبوك شوف عدد الناس المتابعة الموضوع ده .. ذاتو عشان تعرفو رأي الناس فيكم وشكاويهم وملاحظاتهم وأكيد القصة دي ح تفيدكم !

كسرة :
موعدنا غداً في المحكمة بإذن الله تعالى
كسرة ثابتة :
أخبار ملف خط هيثرو العند النائب العام شنو(وووو وووو وووو وووو)؟


[email protected]


تعليقات 47 | إهداء 0 | زيارات 8856

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#603961 [تختخ]
0.00/5 (0 صوت)

03-06-2013 11:43 PM
تحياتي الاستاذ الصامد الصابر المثابر الفاتح وأهنؤك فما ضاع حق وراءه مطالب فقد نقلت الاخبار اليوم أن (أضان) أمنا الحكومة قد عادت لها نعمة السمع فهاهو الرئيس ـــ حسب نشرة التلفزيون الرسمي ــ قد وجه بمحاسية من تسببوا في ضياع خط هيثرو وفي الشريط الاخباري أن الوزير ــ وزير النقل ــ أفاد أن اللجنة توصلت لادلة(دامغة).ايا كان لك الشكر الجزيييييييييييييييييييييييييل (والياء )بقدر (الواو) في كسرتك ــ علي الدرس والمثابرة.معذرة أضطررت للكتابة هنا لعدم علمي بالبريد الالكتروني الخاص بك


#603804 [العجلاتى]
5.00/5 (1 صوت)

03-06-2013 07:56 PM
اولا ياخوى جبرة اديك نصيحتين ختهم حلق فى اضانك:
ماتشرب الكركدى البيجيبوه ليك ..لانو ده بيعمالو فى (hand writing )يعنى الضرب بالفقراء..
التانى ماتسلم على الزول ده فى ايدو...اخاف عليك ..الجماعة ديل قاعدين فى الوظائف دى بالسقلى..التالتة..اتحصن كويس واختمها باية الكرسى؟؟

وحبوبتىبتسلم عليك ودى نصيحتها ليك..الله يكفيك اولاد وبنات الحرام( وشيوخهم) الاخيرة دى منى انا


#603250 [ود الجد]
0.00/5 (0 صوت)

03-06-2013 11:37 AM
الشيء المحيرنا والمطلع ميتينا انو الناس ديل مابشبعوا والسؤال ماهي كميةالفلوس التي لموها والي اين ذهبت واين الرئيس ووزارة المالية ولجنة الفساد وووووو . حينما استلم الكيزان الحكم اطلقوا استراتيجية التمكين وهي بالعربي المفتهم التمكن من الثروة عن طريق الجبايات من المواطنين الشرفاء فاغتنوا وتدلت كروشهموالسؤال الي اين ومن المحاسب فاخونا جبرة تابع الموضوع وطلعوا الجماعة حرامية (بس مركبين لحي للتمويه ) صرخة اطلقها مؤيدا للجميع ان يمتنعوا عن دفع هذه الرسوم لهؤلاء الفاسدين حتي نعرف اين تذهب هذه الأموال وغيرها وهذا يعني لو ما في كشف حساب ما في دفع ولا شنو الرأي.........................


#602911 [أب زرد]
5.00/5 (1 صوت)

03-06-2013 03:01 AM
مافي دفع نفايات لا بي أورنيك 15 لا يحزنون
و كان ما شالوا الزبالة كل بيت يلم النفايات و يرميها قدام بيت رئيس اللجنة الشعبية
دي فوضى


#602869 [sadiq]
0.00/5 (0 صوت)

03-06-2013 12:38 AM
تمكن تمكنناوهو متمكنن ودى من التمكين فى دولة التمكن. وليكم تمنننا كما قالوا وخدعوا هذا الشعب الطيب المسالم ولكن اخيرا استيقظ الشعب من سباتة العميق جداكم يقو ل الكل ويشبهوننا باهل الكهف من حبنا للاستكانة وعدم السؤال عن ابسط حقوقنا نحن ندعى باننا افضل شعب على وجه الارض ونحن نعلم اننا مخدوعين او متوهمين او نتوهم ذلك حيث اننا لا نعلم ما هى ابسط حقوقنا لكى نعيش ونناضل بشرف من اجلها ومن اجل ان يكون لنا صوت بين العالمين. هولاء المجرمين يعلمون تماما من نحن وكيف يمكن خداعنا باى كلام معسول وحتى من خلال الدين فصدقناهم ودفعنا بخيرة فلذات اكبادنا الى ميادين الشهادة المزعومة بغير وعى منا وكنانتشرف بان فى كل بيت وحارةعدد من الشهداء من اجل وحدة هذا الوطن المعطاء وهذا الشعب. لم نفكر لحظة باننا نحارب انفسنا فى وطننا نحارب ذاتناولم نعلم قط باننا كنا نساعد تلك الطغمة الفاسدة فى الاستمرار على كراسى الحكم ولو على جثثنا وجثث احفادناوبعد انا اقتطعوا جزاء عزيزا من هذا الوطن المعطاء انقلبوا عليناوحاربونا حتى فى ابسط حقوقنا الاساسية. افيقوا انظروا حولكم كم من الامم تعيش فى امان وسلام ويتساوى الغنى والفقير فى ابسط حقوق المواطنة وفى اساسيات الحياة الكريمة التى هى من صميم واجبات كل حاكم غيور على وطنه.


#602864 [جدادة خلا]
0.00/5 (0 صوت)

03-06-2013 12:25 AM
يقول القدماء م الكبار انها اخر ايام الانقاز والتى تتشابه كثيرا مع ايام خليفة المهدى الزي لم يبقى حوله الا الجهاديه فكانو يغيرون علي المنطقه ويقتلون الاطفال ويغتصبون النساء ويكشحو العيش لحصينم ودوابم وباقيلى نحنا هسي دي حالتنا العايشنها يغيرو علينا الجهاديه مره بي اسم النضافه من الايمان ومره من اجل نضافة الجيوب ومره من اجل الجيوب الانفيه ولكن هناك رب كريم يمهل ولايهمل ولكل ظالم يوم ولو طالت لحيته


#602850 [fox]
0.00/5 (0 صوت)

03-05-2013 11:51 PM
تاني ما حاندفع رسوم النفايات لمتحصلة النفايات الا باورنيك 15 وبد ابراز التعريفة الرسمية
مش نرة تشيل 10 ومرة 15


#602776 [لالوب]
0.00/5 (0 صوت)

03-05-2013 10:17 PM
يا شعب السودان جاتكم مقشرة

خط هيثرو ما حتقدروا تعملوا فيهو حاجة، لكن موضوع النفايات ده بداية كويسة، كلكم ما تدفعوا النفايات الشهر ده

هل ح يقدروا يحاكموا الشعب كلو؟؟

يللا يدكم معانا يا شباب ما في زول يدفع نفايات ابتداء من الشهر ده


#602724 [معز مختار]
0.00/5 (0 صوت)

03-05-2013 08:44 PM
كــده الشفافيــــــــــه ول بلاش يا جبرا .. وأحمد عبد الرحمن احتمال يركب التونسية .. خليهو يركب وليه لا . ولسع منتظرين الباقى .. شد حيلك متعك الله بالصحه والعافية


#602721 [azeez]
0.00/5 (0 صوت)

03-05-2013 08:38 PM
ياالفاتح الدوغري العديل
شايل شموعك في الدروب
ماضل قلمك ياجميل
يابشارة الزمن السمح
راجنو اشرق ياالدليل
راجنو ضي حميد اطل
الزاهي ذي وش الرسول
موهو المدغمس بالضلال
امرق كما الفارس النبيل
الباهي غنالو الخليل
الصافي ذي النيل يسيل
فرسا مجمر بالثبات
املا الجهات قوة صهيل
امرق من الغبش العدال
ماادنسو وسرقو البلد
غبشا ولا ضلو السبيل
سراق وباسم الله اخون
ياويلو من غضب النبيل
باكر يقع بنيانو رب
وباكر بجي المهر الاصيل
مالشعب جائي وهو العديل
ولابد من هذا السبيل


#602439 [ALOOBA]
0.00/5 (0 صوت)

03-05-2013 02:39 PM
هل صحيح ام أعتقال الاستاذ الفاتح من داخل المحكمه


#602125 [Fato]
0.00/5 (0 صوت)

03-05-2013 10:11 AM
الأخ/ الفاتح جبرة الله معك ونحن الغلابة معك ظاهرا وباطنا فقد رميت حجرا فى بركة الماء الأسنة ولعل على يديك تنفتح كوة الفساد التى أستشرت فى كل مرافق ومؤسسات الدولة الخربة كالنار فى الهشيم,لعل القراء والمتابعين قد بانت لهم سلوكيات حكامنا الفاسدين وأتمنى من كل صحفى له أنتماء حر وشجاع أن يفتحوا ملفات الفساد مثل(جبرة والطاهر ساتى) وأن يحركوا بركة الفساد الساكنة.


#602115 [سودانى طلعتو دينو]
0.00/5 (0 صوت)

03-05-2013 10:06 AM
الله يعينك عليهم ديل ناس ما بتخاف الخالق


#602099 [ود البوب]
0.00/5 (0 صوت)

03-05-2013 09:53 AM
في أحد الأيام وأنا جالس مع الوالد ( الله يطول عمره ) قدام البيت ، جاهو بتاع النفايات شايل دفتر الايصالات:

- يا حاج يلا ادفع رسوم النفايات .
- قلت شنو ؟؟؟؟؟
حقت شنو ؟؟؟

- حقت النفايات !
- نفايات في عينك .... يلا أمشي ما عندنا نفايت ذاتو ... قال نفايات قال ...


آخ يا وطن ..... دي من عندي!!!!!@!


ردود على ود البوب
United States [aviv] 03-05-2013 11:33 PM
هههههههههههههههههههههههههههههههههههههههههههههههه , والله ابوك دا ظريف لكن


#602089 [sas ya nas]
0.00/5 (0 صوت)

03-05-2013 09:46 AM
الواوات بقت 16 يعني بطنتين إلا شهرين أو البطنة الأولى قربت تدخل الروضة والثانية لو جنى 7 تكون المرة إتحلت ولو جنى 9 باقي ليها شهرين ... ربك يسهل علينا ويطلق فيهم إسهال...قول آمين ياجبراقول قول ماتقول ياخ.


#602029 [sabile]
0.00/5 (0 صوت)

03-05-2013 08:35 AM
والله يا استاذ عكليتة لكن ياجبرا عندنا موضوع اسمو القناة الفضائية كان سكيتو لينا برضو بيكون عملت خير


#601909 [عمر عثمان]
1.00/5 (1 صوت)

03-05-2013 12:05 AM
انا اقترح تكوين رابطة مشجعى الفاتح جبره واول اجتماع ليها بكره فى المحكمه


#601908 [ابو صالح]
0.00/5 (0 صوت)

03-05-2013 12:03 AM
يا استاذ كدا عدد لينا كمية المخالفات اللى واقعة فيها هذه الهيئة وقس على ذلك بصراحة انا مهما يكن لم اتوقع انو ( الاسلامييين ديل) اقصد ( الانقاذيين دووول) بهذا السوء وبكرة ( النشوف اخرتها)


#601901 [ابو العينيين]
4.00/5 (1 صوت)

03-04-2013 11:49 PM
والله ياجبر نحن الايصال كان بجينا باسم زميلك في المهنه شركة دكتور ياسر محجوب للنظافه تقول لي اورنيك 15 وكده اسال دكتور ياسر ممكن يديك النجيصة ويورك القروش دي بتتلهط كيف لان خبرهفي الموضوع ده


#601883 [محجوب عبد المنعم حسن معني]
5.00/5 (1 صوت)

03-04-2013 11:13 PM
تعرف يا خال موضوعك ده لو نجح ، ثاني ما اظن في سوداني حا يدفع التكتح لناس النفايات ديل


ردود على محجوب عبد المنعم حسن معني
United States [محجوب عبد المنعم حسن معني] 03-05-2013 07:40 PM
والله يا مراكب المستحيل اخوك كان ليهو كم يوم برة الشبكة وما عارف الحاصل شنو، الجماعة ديل جنو عديل كده

United States [مراكب المستحيل] 03-05-2013 11:55 AM
يامسكين النفايات حتكون في ايصال واحد مع الموية والكهرباء...


#601871 [ابواحمد]
5.00/5 (2 صوت)

03-04-2013 10:50 PM
الفاتح يا اخوى...الحكاية من جابت ليها...متأخراتك بنحلها ليك دى..( عرفنا حاجة.) اصلا" سبب توهان السودان هو الفساد الباين والمستتر.نصيحة منى ،واصل الطريق.هسع هيثرو خلها.شوف لينا اخرة السانة دى...


#601723 [كوكاب]
5.00/5 (1 صوت)

03-04-2013 06:30 PM
والله من ما جابت ليها (كركدى) وطاتك اصبحت ديل فى الانتخابات كبو المحاية فى الصهاريج خلاص قنعنا من الموضوع...بعدين انت زول ممغوص وموجوع البخليك (تبرد) وتتفشى (بحق الحرام)الكركدى دا مال عام ولا (حق حبوبتو)؟؟؟؟؟ عليك الله يا استاذ جبرا شوف لينا موضوع العيش واللحم عشان نقدر نسوى (نفايات)
كسرة
انت يا جبرا موضوع النفايات الذرية (خلص) ولا لسه؟؟؟؟ والنفايات الطبية؟؟ونفايات زيت الطعام ؟؟؟والله سكك دا لو كان مع نافع او على (عصمان)كان مرقنا معاك انت فى المائدة دى كلهههههها ساكة (النفايات) ؟؟؟ الله يديك العافية


#601709 [ابوبكر]
0.00/5 (0 صوت)

03-04-2013 06:18 PM
التحايا للاستاذ جبره...موضوع الكركدي يااستاذي الجليل ذكرني بعادل إمام في فلم مرجان احمد مرجان ، عندما يحب يرشي شخص ويطلب له شاي بالياسمين..لك التحايا وربنا يوفقك.


#601707 [ظهر الفساد]
5.00/5 (2 صوت)

03-04-2013 06:16 PM
كان فى واحد مدير نظافة قطاع الثورة هو كان ضابط إدارى فى الديوم جابو المعافى مدير للنظافة الشاهد فى الامر اجر بيت جنبنا وبعد ستة شهور قام رحل سالنا منو قالو بنى بيته فى المهندسين تخيل خلال ستة شهور من استلام وظيفة مدير النظافة لقطاع الثورة اشترى القطعة فى المهندسين وبناها كمان وغدا أحدثكم عن الباقى


#601658 [ود الحاجة]
0.00/5 (0 صوت)

03-04-2013 05:36 PM
مبروك قال يعقب على حديث أحد المتداخلين :
خط حلايب وشلاتين دا خط أحمر عمك جبرا لا يستطيع الاقتراب منه فلا تكلفه ما لا يستطيع واترك عمك يلعب ويضحك وينبسط بالكلام عن هيئة النظافة ورسوم القمامة وعن ملف هيثرو المافي زول جايب خبرو واللا شغال بيهو.. خلي الراجل يسترزق ويعيش في سلام وتبات ونبات.. وشكرا.


والله انت باين عليك كوز ........... ولو لم فيك جبرا ده الا ............. وطبعا ح تقول ليهو بالله تاني

قال ايه خليهو يسترزق


ردود على ود الحاجة
United States [taj alsafa] 03-05-2013 12:39 AM
انا احد المدمنين لتعليقاتك على ما يُكتب في الراكوبة. أرى خطوك قد تباطء بعض الشئ رغم تكاثر ما يستحق المداخلة. عموما مرحباً و ما تنقطع بالله عليك يا ولد اختي الحاجة.


#601541 [التعيس و خايب الرجاء]
5.00/5 (2 صوت)

03-04-2013 03:47 PM
مشكلة السودانيين بما فيهم كاتب هذه السطور يتخلون عن حقوقهم بكل سهولة اما بسبب
تفاهة المبلغ او خوف التلتلة..أتمنى انو الناس ما تخلى حقها و تحكها لمن تجيب الدم..


#601538 [ابو مبارك]
5.00/5 (1 صوت)

03-04-2013 03:45 PM
شكلك كدا ياجبرا ح تمسك لينا الفساد الحاصل في البلد دي من ضنبو
يلا يا جماعة ساعدوا جبرا شوية عشان نمسكوا من قرونو كمان
ونبشركم الضبح قريب ان شاء الله


#601506 [Hamad]
0.00/5 (0 صوت)

03-04-2013 03:12 PM
الشكر للأستاذ/جبره والشكر أيضالمدير/هيئة نظافة الخرطوم لصراحته

الخطير في الموضوع ما ورد على لسان سعادة المدير من أن هذه الايصالات تصدر من وزارة المالية

فكيف يستقيم الأمر أن تسعى المالية لتقنين التجنيب؟

مطلوب أحد يسأل المالية!!


#601453 [gobara]
5.00/5 (3 صوت)

03-04-2013 02:38 PM
والله الشعب السودانى ده لو وجد عشره جبرات كان امور كثيره اتصلحت وخاصه فى التعليم ندفع رسوم بدون عدد وبدون ايصالات


#601449 [lwlawa]
5.00/5 (1 صوت)

03-04-2013 02:35 PM
انت ودوك عشان يتحرو معاك بقيت تتحرى مع المدير ذاتو..؟!
بس ما يرسلو ليك واحد يمون معاك كما قال الاستاذ ساتي .
كما نخشى ان يلحق ملفك هذا خط هيثروووووووو..؟؟ العند النائم العام.
ولكن كما ظللنا نكرر، لن تكون هنالك نهاية منطقية او موضوعية لمثل هذه القضايا، في دولة اللا قانون.وفقه التمكن الامكن ..؟؟


#601442 [تختخ]
5.00/5 (1 صوت)

03-04-2013 02:24 PM
ونحن منتظرييييييييييييييييييييييييييييييييين ياجبرا وبدون (كباية كركدي)كل خطوة ونحن معاك


#601439 [SAMIAABDALLA]
0.00/5 (0 صوت)

03-04-2013 02:22 PM
شكرا لك استاذنا الجميل وفلوبنا معك وننتظر النهاية مع دعواتنا الصادقة لك جيب حقك وحقنا معاك


#601406 [احمد]
5.00/5 (1 صوت)

03-04-2013 01:59 PM
يا عم جبرا السلام علبك 0 ليك ستة عشر شهر وإنت ساكي خط هيثرو وما حصلت شي وحتتعب من السك عشان كده شوف لنا خط شلاتين حلايب


#601402 [wedhamid]
5.00/5 (5 صوت)

03-04-2013 01:58 PM
الأستاذ الفاتح جبره .... تحيه و عفارم عليك و قد أفحمت ذاك المديرالفاسد الغوغائى و فضحته تماما لجهله ( إن لم يكن تجاهلا متعمدا) القوانين و اللوائح الماليه لحكومة السودان ..و بل تجاهله تنبيهات و تحذيرات وزارة الماليه المتكررة بالتعامل فى التحصيلات بأورنيك 15 .... و القانون فى هذا صريح و واضح و تعتبر المخالفات فيها جريمة فى حق المال العام ..... و لعل المدير الفاسد ذاك قد أدرك بزيارتك بأن الأضواء قد تسلطت عليه و حاول رشوتك على الأقل بإعفاءك عن السداد...بقوله المتكرر....

(( يا أستاذ أنحنا قلنا ليك هسي ادفع؟ يا اخي أدفع على راحتك نحنا أصلوا ما بنحب الأمور توصل للقضاء إنتا ممكن تواصل في الموضوع زي ما عايز لكن موضوع المتأخرات ده بنحلو ليك...........
(وتاني رجع للحكاية) : يا أستاذ موضوع المتأخرات ده ممكن نساويهو ليك ! ))

و أعود ثانيتا للتساؤل /: أين رئاسة الجمهوريه من هذا الموقف ؟؟؟؟ بل و أين وزير الماليه و أركان حربه من هذا؟؟؟؟ و أين الوالى يا أولى الأمر فينا ؟؟؟؟ و أين المجالس التشريعيه الولائية و القومية و هى الجهات الرقابيه ؟؟؟؟و أين نيابة الأموال العامه ؟؟؟ و أين السادة علماء السودان الحريصين على الشريعة و الشأن الإسلامى ؟؟؟ و ينك يا يوسف عبد الحى و عصام البشير و الكارورى لا أسكت الله لكم حسا .......

و يوم الثلاثاء سنكون حضورا معك يا أستاذ بإذن الله.............


#601401 [شرقانيه]
5.00/5 (1 صوت)

03-04-2013 01:57 PM
حكها معاهم لمن تجيب الفات لكن ياالفاتح تفتكر الموضوع ده حتصل نهاتو غايتو امشى فى الدرب البسابق صوت حوافكر ىا فرس


#601396 [عبدالواحد المستغرب أيما إستغراب!!]
5.00/5 (8 صوت)

03-04-2013 01:54 PM
ياجبرا الزول ده كان عارفك (عكليته كده!!) كان جاب معاه من (المدام) حبة صبغه شعر عشان يتقل بيها لون الكركدى شويه!! الشكر كل الشكر يا جبرا وحركتك دى حنعتبرا سابقه نستفيد منها ثم نستند اليها ونطالب بحقوقنا ونكشف بيها لصوصية الجماعه البطاله دى والدور والباقى على القاضى الحيحكم فى القضيه وبالله ياجبرا لو سمحت توافينا برأى المحكمه فى الحته دى ولعله يطلب هذا اللص المسئول وياخدو سين وجيم ويرسلو آمانات فى إحدى الحراسات ، وأنا إعتقد إنو ده دور المحامين الشرفاء فى مثل هذه القضايا وهو تعقب مثل هذه القضايا وفضح الهيئات التى أخذت عهدعلى نفسهابأن تأكل أموال الناس بالباطل... والى إلامام ياجبرا ونحن وراك ولا نامت أعين الجبناء!!.


#601395 [محمد حسن]
5.00/5 (2 صوت)

03-04-2013 01:53 PM
الظاهر القصة حتكبر .. تستاهل تكون فلم أو مسرحية لأنه فيها أحداث دراماتيكية..


#601382 [سنبل]
5.00/5 (10 صوت)

03-04-2013 01:43 PM
ارجو من كل المواطنين ان يحضروا هذه المحاكمة لدعم الاستاذ الفاتح جبرا


#601363 [مكنة قندران جارى كارو]
5.00/5 (1 صوت)

03-04-2013 01:29 PM
انت المراجع العام ليه ما قاعدين يبسطوهم عشان الحكاية تكون صفر صفر زى البرلمان


#601342 [العباس]
4.88/5 (9 صوت)

03-04-2013 01:16 PM
والله خجلان انو اعلق بس ... واقعد اتفرج فيك وانت بتقاتل عشانا وعشان البلد يكون فيها قانون .. اضعف الايمان انو بكره امشي اقيف معاك فى المحكمه واشيل يافطه الا باورنيك 15 .
شكرا ليك كتير يا استاذ


#601326 [خضر عابدين]
4.50/5 (2 صوت)

03-04-2013 01:04 PM
الله عليك ياجبرة وصلتوم الميس عديل لاكن اعمل حسابك الناس ديل ما بناذلو الفارس عديل بقرصوا من تحت لي تحت , المدير هدي اللعب معاك بعد ما تمرق اتلفت كويس في الشارع والبيت انهم عقار ودبايب انت دخلت الجحر عزانا الشعب السوداني معاك


#601272 [ود البلد]
0.00/5 (0 صوت)

03-04-2013 12:22 PM
الساكت عن الحق شيطان اخرص والشعب السوداني كلو بقي اخرص واطرش وج .......


#601265 [بدر السما]
5.00/5 (1 صوت)

03-04-2013 12:18 PM
الله عليك يا رائع . وأمسك قوي ، الله معاك ودعوات صالحي الامة .


#601242 [ودضحويه]
0.00/5 (0 صوت)

03-04-2013 12:07 PM
إنتو المراجع العام قاعد يراجعكم ؟؟؟؟؟
________________________________
_______________________________
________________________________
ودا واحد تاني
_______________________________


#601211 [هيثم شهلي]
5.00/5 (1 صوت)

03-04-2013 11:48 AM
بيان بالعمل
وشكرا للاجتهاد والمثابرة


#601200 [يحيي العدل]
4.50/5 (7 صوت)

03-04-2013 11:41 AM
يا خوفي عليك يا حبيبنا جبرا !!!!!
والله البلد دي لو فيها:
عشرة فاتح جبرا
وعشرة طاهر ساتي
وعشرة سيف الدولة حمدنا الله
كان زمان غنينا للديموقراطية الرابعة .


#601172 [سالم]
1.00/5 (1 صوت)

03-04-2013 11:25 AM
بعد ما شربت الكركدي اظنك بعتنا وبكره تبقى مدير الهيئه زاتا


ردود على سالم
United States [شرقانيه] 03-04-2013 02:00 PM
كدى عاين لى وشو ده وش زول بياع ياسالم


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة