المقالات
منوعات
حكاية مدينة
حكاية مدينة
03-05-2013 09:15 PM

حكاية مدينة

لامن لاح البرق القبلي ……… شقّ دياجي العتمة وشعّ
ولينا اتناهي مع الآذان ........ صوت قمرية في ساعة هجعه
اتنسمنا علايل أبروف ....... واتلحفنا سحاب البقعه
المغني (من علايل ابروف للمذالق .... من فتيح للخور للمغالق)
اتذكرنا بلدنا ونيلها
الانسام الهابة عليله
راشة دعاشها نهارها وليلها
حمائم هادلة في روضة ظليله
في الآصال يسكرنا هديلها
حليل أم در وملوكها حليله
يدخل المغني :
(الليلة كيف أمسيتو ياملوك أم در .. بالسقام لي جسمي وخليل أكسيتو مالو لو بالطيف الخيال آسيتو .. )
كم من نيمه ... تعانق غيمه
وجدول كابي في موية ترعه
الأغنام السارحة بترعى
وفي الوديان طاب ليها المرعى
وشيخ ( دفع الله ) كبر و صلى كم من ركعه
سعى لي الله ..وطاب المسعى
اتحزمنا واتلزمنا
واتوكلنا علي الرزاق
أفواج .. أفواج
إتْشعبطنا علي التُرماج
هدومنا ملانة تراب وعجاج
والكمساري يكورك فينا
خُشْ لي جوه... وحاسب أوعى !!!!!!

كم من كارو ولوري سفنجه
وخلف الزنكي وسوق الملجه
تكاسي الطرحه تفضي وتملا
بيع قطاعي وبيع بالجمله

وجنب (التُمَّنه)
عالم جالسة بتلعب "ضُمنه"
جنب ( شاشاتي) وناس ( حجار)
(ديمتري البازا ) وصوت ( زنقار)
يدخل المغني: ( من بف نفسك يالقطار ورزيم صدرك قلبي طار وينو الحبيب انت شلتو جيبو يا القطار ..)


بياعين في كل مكان
ند وعطور وبخور تيمان
حدادين .. و برادين..
كهربجيه وكم نجار
كومسنجيه
وصنايعيه
وأفنديه
قابضه بتحسب في الماهيه
وبالله عليك
ياماري علي سوق أمدرمان
أهدي سلامي الى الأعيان
فضل المولى وحاج عتمان
ولو لاقاك عباس رشوان
سرور وهريدي
وعم شلقامي وشيخ سلمان
وود(الأغا وكزام كمان )
اتلقاهم بالأحضان
احجز كرسي
في مطعم برسي
وبرد جوفك من خيرات
وميامي العامر بالخيرات
وقول (للسنجك) ولي( ود بني)
أفخم شيلة
في شارع العدني
ريح حبه.. تابع الجوله ..ولف بي غادي
علي التنقاري والعبادي
وخليك ماشي..رايح وغادي
في الشنقيطي وشارع الوادي
أغشى( تبيدي) وأولاد (مله )
وخُد لي عروسك خاتم ودبله
وأحفظ مالك
وبص في يمينك ... وبص في شمالك
شوف واتملي ... في خلق الله
أحمد الله وريح بالك
وأملا عيونك بهجه ومتعه
وفجأة ونحن في ساحة( الشهداء )
طلت لينا بدور " القلعه "
آخر بهجة وآخر روعه
يدخل المغني : (العيون النوركن بجهرها..غير جمالكن مين السهره يابدور القلعه وجوهره .. )
سرنا معاها عريس وعروس
سيره وزفه
لشارع النيل
اتباخخنا بموية السيل
وكم غنينا في عز الليل
موجه تغني ... وموجة تشيل
يدخل المغني :
( عريسنا سار البحرٍ ياعديلة .... وقطع جرايد النخل .. ياعديله )

ولما سمعنا
دق النوبة في حمد النيل
ونقر الطار
رحنا نقزنا كبار وصغار
اترحمنا علي االأبرار

إنشاد ديني....( لوح من النور البراق)
واختم قولي بالصلاة معظما
أيا ربنا صلي وبارك وسلما
على المصطفى والال والصحب دائما
صلاة تفوق المسك عطرا مفخما
يطيب بها كل الوجود ويتلألأ
(اللهم صلي على حبيب الله )

وهفت لينا نهدي شويه
نحي الراتب في (البلديه)
ونقرا المولد والليليه
في حي (مكي) و(المهديه)
وجينا دار الاسبتاليه
نغشى في يوم الزياره
ناس عزيزه علينا غا ليه
النساوين والصبايا
العواميد جاية ماليه
وفي الدهاليز الأنيقه
مارقه (سيستر) وداخلة دايه

(دوبيت) من أشعار الخليفه/ يوسف الحسن
(شهرين أدرجين راقد علي كوعي ،،،،،،، عليل في العنقريب اتطبقو ضلوعي ..
الاهل الكبار ماعرفوا موضوعي ،،،،،،، والهدم الجديد فشيتو بي دموعي )
بالملازمين احتفلنا
واتقدلنا في ود البنا
وكم دندنا
مع الفرجوني وود البنا
يدخل المغني : (امتى أرجع لي أم در وأعودها)
اتسامرنا في بيت المال
واستبشرنا بحسن الفال

واتحكرنا قعدنا لعبنا
(كونكان عشره )
تحت (الدومه) و(سوق الشجره)
وكان في النيه ..
يبقي مقيلنا في دار (الهجره)
وقبل ماتمغرب علينا
شلنا خطوتنا ومشينا
جينا داخلين (المظاهر)
والكهارب من بعيد
في ( المسا لمه ) نورها باهر
وقفنا في (حي العرب)
نحيي بي كل الأدب
لي أساطين الطرب
عزفنا مزيكة قرب
يدخل المغني : (أنا في شخصك بحترم أشخاص)

اتذكرنا أماسي نديه
أعادت لينا مشاهد حيه
جرتق وعرضه
في حي (العرضه)
و(الردميه)
صندل فايح من صبحيه
في (الهاشماب ) و( العباسيه )
يدخل المغني :
(أطرد الحلام ياجميل واصحا)
اتهندمنا ... واتعطرنا
ورحنا سهرنا
اجمل سهرة في حي (الأمراء )
هناك صباحي
بي خلف الله .. ورمضان زايد
والمأمون وأحمد جمعه
وقمنا لحقنا صلاة الجمعه
يدخل المغني : (هات لينا صباح .... يخمد البدر ويخجل المصباح )
وعدنا نكمل للصبحيه

حليل المولد و( سوق الزلعه )
والتهليل في يوم العيد
وسط الحي ....... والناس مجتمعه
وسالت دمعه ..
أهاجت فينا كوامن لوعه ..
لما طرينا شوارع الحَلّه
ولعب البلي والكرتله
سينما برمبل والوطنيه
(وعنتر وعبله)
شراب (القله ) و (موية الزير)
سوق (المويه ) ومقهى (الزيبق ) و (أحمد خير )

دكان موسي ... وبرعي الترزي.......
سعيد العربي .. و(سمك السبكي)
الليمون في حي البوسته
وباسطه ( بيِّن) و (باباكوستا)
طرينا في وهله
زمن الجهله
وضل النخله
ونوم السهله
حاجة حنينه
وخالتي سكينه
وغنوة حنينه
يدخل المغني : (الزهور صاحية وانت نائم ....)

(يتداخل مع أصوات اطفال )
(الله خلق للنعجةضنب.. الكوم بقرش والدقة بلاش)
الأنداد أولاد الدفعه
سعيد وكرومة وتنقو وسمعه
(الدافوري) صباح الجمعة وفي العصريه
وقون المغرب .... لما تمغرب
للمغلوب احسن من ميه
ويا ما ضحكنا .. لما بكينا
يوم سكتنا كلاب (الحلبه)
ومن الخلعه وكتر العجله
اترادفنا تلاته في عجله
وتاهت بينا دروب الرجعه
اتدلينا في حي العمده
وطابت لينا هناك القعده
جنب الزول النام واتمد
وخاتي ضراعو تحتو مخده
يدخل المغني : ( قوم بي وخد سندة ، بالدرب التحت .. تجاه ربوع هنده )
ريحة المستك مالية الفجه
وفنجان قهوة يفك الصدعه

وست الشاي الراصة العده
ومنقد نارها مولع ولعه
وطفله صغيره في عرض الشارع
قايده أبوها وماده القرعه
وصوت المادح
جنب الجامع
باكي ونائح
(ياراحلين الي منيً بقياد ...هيجتموا يوم الرحيل فؤادي)
حليلهم اهلنا
الكان ليهم شنه ورنه
أهل الوجعه
ربنا عالم
كانوا معالم
شامخه أبيه
لا باسبورت ولا جنسيه
وفي القاسيات
كان ليهم فزعه ......
يدخل المغني .. صوت أبو داؤود ..
(حليل الفرقه من بكره .. حليل الأصبحت ذكرى ... )
***********************

تاج السر يوسف الحسن (أبو العائلة)
[email protected]
الإمارات العربية المتحدة- أبوظبي / فبراير 2012م


تعليقات 0 | إهداء 0 | زيارات 1438

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




تاج السر يوسف الحسن (أبو العائلة)
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة