نفايات الفاتح
03-07-2013 05:49 AM


نظرا لتنافس مدينة الخرطوم الشديد على لقب المدينة النموذجية ووسام المدينة الأنظف على مستوى العالم مع ناس هونج كونج الممنوع فيها اللبان و سنغافورة القالو كان الزول فيها تف تفتو ما بتدق الأرض، أنا أوافق على تشدد الحكومة في حكاية النفايات واعتبارها جريمة لا يشفع لها القانون، لأنو كان جا خواجة زيارة ساي داير يمشي السوق العربي مثلا قام لقا ليهو باقة "مازا" مجدوعة في الأرض، دا لمن يرجع بلدو هيقول علينا شنو؟ ما دفعو حق النفايات؟ دا كلام دا؟

وبصراحة الحكومة ما قصرت في تذكير الناس بموضوع النفايات دا أبدا. أنا أكاد أحلف وأجزم أن عدد الناس المكلفين بجمع جباية النفايات أكتر من عدد الناس المكلفين بجمع النفايات نفسها. تكون في البيت يرن الجرس. تطلع برا تشوف منو تلقا بت ماسكة ايصالات واقفة جمب أكياس القمامة المردومة ليها كم يوم (ولا حياة لمن تنادي) ، السلام عل.. تقاطعك قائلة "نفايات"، تدفع وتدخل بيتك وبعد برهة يرن الجرس مرة أخرى، تخرج لتجد بنت أخرى في انتظارك بنفس الكلمة "نفايات"، تحك راسك ولا تدري أين الأصل وأين الحرامي. تدخل بيتك وبعد كم يوم يدق الجرس. مين؟ المحلية .. "نفايات"!

تذهب إلى دائرة حكومية لغرض ما تجد نفسك مجبورا بدفع الضرائب والزكاة والخدمات. الزكاة طبعا ركن من أركان الإسلام الخمسة. الصلاة ممكن ما تصلي.. بي جازك، لكن الزكاة إن ما دفعتها "والعياذ بالله" ما بنسوي ليك أي اجراء. الضرائب واللتي "الرجاء تصحيحي إن كنت مخطئا" تؤخذ من المواطن لتفعيل الخدمات الأساسية واللتي تتضمن النفايات. ثم تجد أمامك أمام شيء اسمه الخدمات. دي شكلها خدمة لا تتضمن خدمة جمع نفاياتك بل تتضمن خدمة توصيل الأورنيك إلى المنازل وجمع قروشك من باب بيتك. فمن ناحية توفير النفايات الحكومة ما مقصرة ومن ناحية توفير جامعي الجبايات الحكومة ما مقصرة. في نهاية الشهر تجد نفسك دافع النفايات 5 أو 6 مرات لجهات مختلفة وسعادة النفايات تكون لسة مصنقرة قدام بيتك ومابية فراقك.

على حسب التصنيف العام للنفايات هنالك نفايات قابلة لأعادة تدوير مثل البلاستيك والأكياس والباقات وما شابهها و هنالك نفايات غير قابلة لاعدة التدويركالنفايات العضوية. وهنالك التصنيف الجديد للحكومة السودانية وهي النفايات المافي زاتو. النفايات البتخليك تتلفت يمين وشمال و تدق جرس وتقول لبتاع النفايات ياخي أنا فاتح مكتب هندسي وماعندي إلا كمبيوترين بس وحتى ديل ما فيهم ملفات محذوفة.. "يا أستاذ دا القانون" .. ياخي أنا مكتبي نضيف وبستحم كل يوم قبل ما أجي والجزمة بورنشها وبعد دا كان في غبار ساي قدام المكتب بقشو قبل ما أبدا شغل! في هذه الأثناء بتلقى عمك ما شغال بيك كتير وقاعد يتلفت ويحسب حسابات في راصو ويطنطن "خمسطاشر متررر.. كمبيوترين.. شارع رئيسي" ينكت ليهو الة حاسبة من جيبو ويديك كم سؤال ما ليهو علاقة .. فاتح ليك كم انت؟ صافي أرباحك كم؟ اسم أمك منو؟ قريت وين؟ .. ويبدا يطنطن تاني "الأهلية.. عشة.." كم من دقة في الالة الفي يدو دي ويقطع ليك أورنيك.. يا أستاذ عليك 73 جنيه ونص، مشينا عليك الله ورانا شغل!

السؤال اللذي يطرح نفسه، هل في زول جا لافي يوم بورقة و الة حاسبة ودق الجرس بتاع القصر الجمهوري أو وزارة الدفاع وقال "نفايات"؟ هل أورنيك 15 دا كدة خلاص حفظ حق الشعب وحلل السرقة؟ للأنو ممكن بعد شهر شهرين تلقى الحكومة عملت "دمغة نفايات" لأي زول داير يجدد رخصة سواقتو. في بلدا سلطة محكمة النفايات الجنائية فيها أعلى من سلطة الرئيس ما تستغرب يوم تجي تلقا ناس النفايات ركبو ليك عداد نفايات في كل بيت ويضيفوها لينا مع الكهربا والموية. لكن برضو.. أصلها النفايات قاعدة كدة ولا كدة.. من غير أورنيك 15 الريس قال أحفظ حقك وماتدفع!

ياسر عبدالرحمن حاج الخضر
[email protected]




تعليقات 5 | إهداء 0 | زيارات 2125

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#604666 [اللمبي بمسي]
0.00/5 (0 صوت)

03-07-2013 06:51 PM
ياخي احسن يدخلوها معا الكهربة ويتم تجنيبها عند شيخ اسامة بتاع السدود احسن يمكن يعرس ليهو مرة تانية وله يدفع بيها رواتب الشغالات!!!ماالراجل تعبان من الشغل!!!وحرامي تعرفوا احسن من حرامي جعان هفتان قرفان لابينظف لابيتزوج نسوان!!! او ممكن نديها المتعافي برضو تعبان وبيدفع للكيزان عند كل انتخابات او لوكان البنك فلسان!!او ممكن نضيفة للبترول لابو جلمبوا ابوجاز حيران ومواسيرو فاضية بعد ناس تعبان شفرو وفرزوا الكيمان!!!ممكن يشتري لينا بيها زيت اصلو مابحب النسوان عايز دولار ناشف مش لعب غيلان!!! او ممكن نديها ام جضوم تعمل بيها جمعية مش خيرية حمعية لحنة النسوان!!!! او نديها ابوكوع يشتري بيها سيطان !!!لمنو !!العارف يرفع الكيعان!!!! المهم نحنه بندفع زي ماقال عادل امام خايفين علي العده!!!!


#604373 [بلاك بلوك فرع السودان]
0.00/5 (0 صوت)

03-07-2013 12:31 PM
يااااخ هي نفايات نووية ..


#604160 [ود أبكر]
0.00/5 (0 صوت)

03-07-2013 09:38 AM
اللتي ام الًّتي ؟


#604108 [fatmon]
5.00/5 (1 صوت)

03-07-2013 07:37 AM
لما شفت إسم كاتب المقال ياسر عبد الرحمن حاج الخضر قلت أكيد ده ود محافظ الخرطوم عمل ليهو شركة وسماها نفايات الفاتح آسفين على الخلط ده ، لكن والله عملوا لينا لوعه وهلع وطبعا هو المحافظ ما مقصر شركاتو كان في السوق الشعبي ولا في سوق العربي معروفة وكمان آخر إهتمام بالطاقة الشمسية وما أدراك ماالطاقةالشمسية والمكيفات و تلقاهو أصبح ملياردير بالدولار طبع
فما محتاج يعمل ليهو شركة نفايات أصلوا موضوع بالنسبه ليهو ثانوي جدا المهم زي ما قلت الدخل المترتب عليها


#604102 [هدهد]
0.00/5 (0 صوت)

03-07-2013 07:22 AM
يعملوها الكيزان غدا تجد فاتورة الكهرباء ومعها فاتورة النفايات واذا لم تدفع النفايات لا تستلم كهرباء . كل شيىء وارد فى ظل حكومة الجبايات واللهف والسرقة هذه هل هنالك جراد اكثر من هذا الجراد البشرى ؟؟؟؟ الذى فاق اليهود فى كنز وجباية الاموال وغش الناس واكل اموالهم بالباطل !!!!!!!


ياسر عبدالرحمن حاج الخضر
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة