حيطتنا ذاااااتا
03-07-2013 07:41 PM

من طبيعة الإنسان ان يحزن لمفارقة من يألف غير اني اليوم فرح وسعيد غاية السعادة لمفارقة العزيزة الغالية (كسرتي الثابتة) وكل (واو) من (واواتها) اللواتي بلغن ستة عشر .
في الخامسة مساء الأمس هاتفني الأخ رئيس التحرير الأستاذ عادل الباز ينقل لي خبر توجيهات السيد الرئيس بمحاسبة الجهات الضالعة في فقدان السودان لخط هيثرو الجوي وإعادته أو إعادة قيمته .. وما أن إنتهت مكالمة الأخ الباز حتى أنهمرت على هاتفي عشرات الرسائل والمهاتفات تخبرني بالأمر وإنتصار (الكسرة الثابتة) كما قال أحدهم .
سألني أحدهم ذات مرة (لماذا خط هيثرو بالذات) فأجبته لأنه قضية الفساد الوحيده الما عايزه ليها (درس عصر) ولا توجد فيها أي (مخارجات) يعنى القصة ما تقاوي عشان واحد يجي يقول (أنا إستوردتها سليمة وبعدين باظت في التخزين) أو نسبة الفطريات فيها شنو ما بعرف أو معدل النمو الما عارف شنو؟ حق هبوط لناقلنا الوطني وتم بيعه لشركة طيران (معروفة بالإسم) وقاشرة بيهو قدام العالم كوووولو بدون خجلة .. قضية أصغر محقق (تحت التمرين) ما تاخد معاهو يومين .. خطاب من حكومة السودان للشركة (القاشرة بالخط) : الخط ده بتاعنا من ( سنة كم) وخمسين الجابو ليكي منو وعمل ليكي تنازل؟ و(فاكس) من الشركة فيهو صورة العقد و(الإمضاءآت) والمسالة إنتهت !
لكن المسألة تنتهي بالبساطة دي؟ أكيد لا .. (المتورطون) في سرقة القرن هذه يعتمدون على ذاكرة الشعب المهترئة التي أصابها الوهن والإعياء وهي تطارد (قفة الملاح) أو إن شئت (كيس الملاح) وبقية الضرورات التي أصبحت للأسف (تبيح المحظورات) !
شهر شهرين تلاته والموضوع يتنسي .. ربما كان هذا لسان القوم (الما بخجلو) وهم يدخلون إلى خزائنهم وحساباتهم البنكية أموال هذا الشعب البائس الحزين الذي أمسي (يمشي على عجل الحديد) !
وجاءت فكرة (الكسرة الثابتة) لتنسف قاعدة (التناسي) لتزيد واوات التساؤل شهراً أثر شهر ليشاهد المسئولون المتقاعسون عن جلب المتورطين في هذه السرقة المشينة ليشاهدو بأعينهم الزمن الذي يمضى وهم (يغطغطون) على هذا الجرم النكير ! (يعني كسرة ونتيجة حائط) !
كل واو من واوات (الكسرة الثابتة) يمثل شهراً فهلا سال السيد الرئيس من هم أعضاء في لجنة التحقيق هذه فيم أنفقوا من جهد في كل شهر من هذه الواوات ؟ إنها فرصة ليست لتقديم المتورطين للعدالة وفضحهم بل إنها فرصة لمحاسبة المتورطين في (تعطيل العدالة) من أجل إكساب أجهزة الحكم المصداقية لدي المواطنين هذه المصداقية التي كادت أن تروح (شمار في مرقه) بفعل هؤلاء (ده لو ما راحت) !
في شبابي كنت أقتني عربة فلوكسواجن إشتريتها بثلاثمائة جنيه .. يوم أن إشتريتها قررت أن أقشر بها وأزور بها الأقارب (نظام إشتريت لي عربية وكده) فأخبرت الوالد والوالد عليهما رحمة الله أن يجهزوا روحم وقمت بغسيل العربة وتلميعها وعندما جاء العصر والواطة بردت خرجنا وفي أول منعطف (لاوز ليا شافع) فدخلت بالعربة في حيطة الجالوص بتاعت الجيران والتي ما صدقت إذ خرت واقعة فقد كانت فيما يبدو (على الهبشة) !
جات سلامة ولم يصب أحد بأذي .. وحيث أن جيراننا ديل بالذات (بتاعين شبك) فقد خرج أحدهم وهو يحمل ساطوراً والشرر يتطاير من عينيه
- ياخي معليش بس في شافع لاوز ليا !
- (والشرر يتطاير من عينيه)
- يا خي حيطتكم دي مش جالوص؟ أنا ح أبنيها ليكم طوب أحمر
- (والشرر يتطاير من عينيه)
- وأقول ليك حاجة؟ ح أبيضا ليكم بالاسمنت
- (والشرر يتطاير من عينيه)
- وأطرطشا ليكم كمان !
- قال لي وهو يرفع الساطور عاليا : نحنا عايزين حيطتنا ذاااااتا !

السيد الرئيس : قيمتو ما عايزنها .. قروش ما عايزين نحنا عاوزين (حيطتنا ذااااتا ) !!

كسرة :
تاني أي زول يعمل كده وللا كده نعمل ليهو كسرة ثابتة وكده !

كسرة ثابتة :
أخبار تنفيذ توجيهات الرئيس حول فقدان خط هيثرو شنو(و)؟




الفاتح جبرا
[email protected]


تعليقات 74 | إهداء 0 | زيارات 7119

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#605566 [radona]
3.41/5 (6 صوت)

03-09-2013 02:25 AM
طيب سود لاين دايري درس عصر
الحج العمرة والاوقاف دايري درس عصر
المبيدات الفاسدة دايري درس عصر
شركة الاقطان دايري درس عصر
ارى توسيع الكسرة ولو لعشرة سنوات قس الاشياء المادايرة درس عصر
كسرة
اخبار جماعة النفايات معاك شنو رجعت جباية النفايات لاورنيك 15 ههههههههههههههههههههه


#605334 [[زول]]
3.75/5 (5 صوت)

03-08-2013 06:30 PM
605262 [زول]


ياجماعة انا الشريف ود بدر طالب السترة



4.00/5 (1 صوت)
03-08-2013 03:25 PM
هذا الرجل اكبر حرامي وخط هيثرو هو من باعه واستلم العمولة حقته والبشير مش حيحاسبه خالص والدغمسة بدأت طالما دخل فيها بيشه وانسو خالص الله يعوضكم ولو في شفافية ياودبدر أو ودزفت لانه ود بدر الشيخ كان زاهد لكنت اليوم في السجن لأنك حرامي وياريت البوني يساعدنا لانه الراجل مناسب ناس البوني في اللعوته وساعدنا ياالبوني


#605219 [عماد خضر]
2.50/5 (5 صوت)

03-08-2013 03:32 PM
استاذنا جبرا حياك الله وسدد خطاك . . محمد احمد المسكين مابعرف عن هيثرو وخطها الكثير . . وبيعتبره حديث مجتمعات خاصة ! ! لكن المووجعو وقاطع قلبه وفاقع مرارته هو باصات الولاية البنات عمها ماسمعن بها ورقدت خردة . . وهو المسكين الشمس كتلتو في انتظار المواصلات في المحطات . . لذلك ارجو ان تخص موضوعها بكسرة ثابته . وتقبل تحياتى .


#605195 [سوداني ويس]
2.88/5 (5 صوت)

03-08-2013 02:53 PM
لقد هرمنا في انتظار هذه الكسرة التاريخية


#605179 [حلومر]
2.75/5 (5 صوت)

03-08-2013 02:15 PM
أفرض يا جبرا قدرت المحكمة قيمة تعويض الخط المباع بمائة مليون دولار - و فعلا تم دفع قيمة التعويض كاملا - هل تتوقع أو تتعشم تلقى منها جنيه واحد أو تتوقع يدخل المبلغ لخزينة الدولة ليستفيد منه الشعب مثلا ؟؟ ياأخى أدفع رسوم نفاياتك و أسكت ساكت بس .


#605118 [sawaleef]
3.50/5 (5 صوت)

03-08-2013 12:15 PM
إنشاء الله الواوات ماتزيد من2 وتتنفذ توجيهات الرئيس الإنتقالي فوراً


#605107 [lwlawa]
2.25/5 (5 صوت)

03-08-2013 12:02 PM
هذه بتلك ..؟
خط هيثرو اتبلع واتهضم ومهما اكثرت من واوات فلن تغير من الواقع .
ولكن ما اقدمت عليه اخيرا -موضوع القمامة - هبشت اللحم الحي ..؟! لذلك حركو ذلك الملف حتى تقوم بتهدئة اللعب في الملف الجديد..؟!
هنالك سؤال ملح .؟! من الذي امر بأعتقالك من امام المحكمة..؟؟!


#605084 [زوزو]
2.35/5 (8 صوت)

03-08-2013 11:26 AM
الوزير قاعد مع الرئيس ويحكى اخبار بيع خط هيثرو وهو الرئيس عارف البيعه وعارف حقه فيها كم بس الوزير لانه جديد داير يعرف حقو كمان بالله خلونا من الكلام الفارغ دى دى كله عشان تسكت يا جبره والله كلهم عارفين وقبضو كمان ياخى ديل باعو اى حاجه حتى الشعب ذاتو باعوه بس هو ماعارف اصبروا شويه لو ماجاو كشوكم ذى القطيع قلو اشتريناكم من الحكومه


#605077 [حجوة ام ضبيبينه بدت بتوجيهات الرئيس]
3.13/5 (8 صوت)

03-08-2013 11:21 AM
ولله اول مره اشوف لى توجيهات رئيس بتابعوها000فى اى بلد توجيهات الرؤسعا امرها نافذوقشه ماتعتر ليها ومافى شى بعرقلها لانها بتمس سيادة وهيبة الحكومة0000الا توجيهات بشبش بتاعنا دايرة ليها واسطات ودفرات عشان تمشى ده كان مابركت فى محلها


#605072 [زول]
2.35/5 (6 صوت)

03-08-2013 11:04 AM
الخط ادغمس خلاص


#605071 [جدو206]
3.13/5 (5 صوت)

03-08-2013 11:01 AM
والله لو واوات الرئيس وصلت 16 زى حقات الخط والخط رجع خير وبركه وانتصار ام اذا ظلت تتردد فى اى مقال فعلى السودان السلام


#605063 [awad]
4.27/5 (8 صوت)

03-08-2013 10:52 AM
هو الريس ذاتو عامل ابو القاسم مع الجماعة الباعو الخط.....الجفلن خليهن اقرع الواقفات....انا بس بستغرب الناس دول بشبعوا متين ؟ اديناهم سنتين تانى عشان يتموا ربع قرن...ليتهم يشبعوا....


#605023 [zayed]
3.00/5 (6 صوت)

03-08-2013 09:49 AM
مطالبنا هي

1- ارجاع الخط فقط
2- اعتبار سنين تواجده لدي الشركة المشتريه ايجار ويتم تقييم القيمة لسنين استخامها له .
3- اظهار اسماء المتورطين في هذه العملية ومحاكمتهم علنا وليس في الدهاليذ فخط هيثرو ملكيه عامة ( احمد عز في مصر اخد حكم بكم وتمنين سنه في موضوع مصانع الحديد ) ومن سرق الخط ذي البيسرق النيل ويبيعو والخط ما ملك ابوهم عشان يحاسبوهم براهمحتي الغضاء مهمتو تنفيز حكمنا كشعب ونحن نريد القصاص


#604999 [لوشية]
3.00/5 (6 صوت)

03-08-2013 09:00 AM
أسألوا النوارى
الرامى فى بيتنا


#604979 [احمد ابونصر الشمالي]
2.88/5 (5 صوت)

03-08-2013 08:19 AM
التحية لك استاذنا جبرا .. اخبار قضية اورنيك 15 شنوه . اما واواتك الجديدة انا متوقع انوا حيصل مطار هيثرو ذااااتو طبعاً من غير ان شاء الله . نحن متعودين من سعاتوا لما يقول ماحنعمل كدة نحن بنطلق انوه حيعمل وقيس كله على كدة


#604941 [كَبَسيبَه]
2.85/5 (6 صوت)

03-08-2013 04:15 AM
قال توجيه السيد الرئيس قال
ما تراهو قاعد يصدر توجيهات
قبل ٢٣ سنة . شِن سوت وشِن
نفعت غير رجعتنا الف سنة ضوئية
لورا؟ حسبي الله ونعم الوكيل


#604939 [خالد حسن]
3.12/5 (8 صوت)

03-08-2013 04:06 AM
ياجبره
كسرتنا ...
البشير الجابوا رئيس منو ؟ نحن دايرين ديمقراطيتنا زاتا .. بلاعساكر بلاسجم
ويدنا عرض كتافه وعلي لاهاي بلا .. وانجلا


ردود على خالد حسن
United States [البعير] 03-08-2013 07:47 PM
هههههههههههههههههههه والله ده اجمل تعليق ربنا يعطيك العافية الاخ خالد حسن


#604930 [سودانى منفرج الأسارير]
2.69/5 (5 صوت)

03-08-2013 03:38 AM
*ألأخ الفاتح "اريثماتيك" السلام عليك "يتنزّل" والتحيات اليك ومنك " تنداح" الى كل اصحاب الحضور الواسع المتنوع المرتكزات قومية التوجه الذين "حقيقة" قدموا لك كل اسناد استراتيجى فاعل عبّروا به عن المصالح والتطلعات ومواجهة التحديات الى ان بدأت فى الأفق بوادر الوصول الى حزمة معالجيه للكثير من امهات القضايا ذات الصله بخط (هو رمى) هيثرو.. وعقبال ما نفرح بيك يا اورنيك 15 .
* "الحقيقه" فيما يتعلق يخط هبثرو يقولون المال تلتو ولا كتلتو .."حقيقة" الحيطه الجالوص العاليه احسن منها واحده اقصر بالاسمنت (شرطا"حقيقة" يكون اسمنت كرتى الآنتاجيه) .. و "حقيقة" فى اطار قبول الذى هو اقصر دون الذى هو اعلى ما رايكم دام فضلكم فى حزمة معالجيه للموضوع ( دون الدخول فى محاكم وكشف المستور نرى التمسك بفقه الستره ويا دار ما انفقد منك خط طيران.. ذلك ان تقوم الكوادر من اهل القياده والرياده ذات التاثير الفاعل التى قامت فى تكامل ادوار غير مسبوق ببيع او اهداء الخط المحدث عنه او تسليفو الى من هم كانوا اكثر حاجة من اهل السودان فى اطار تعاونه (السودان) مع كل محيطاته ألأفريقيه وألأقليميه وذلك عندما توقفت سودن اير عن رحلاتها اللى كانت مشرقه فى سوالف ألأزمان ..نقترح ان تقوم تلكم الكوادر بشراء خط "الخرطوم--امستردام من K L M" اللى جاء فى الخبر مؤخرا انها ستوقف سفرياتها الى الخرطوم ...فهو الخط ألأقصر والأكثر مهنية .. و"حقيقة بدل ما يقعد الخط فاضى تتوجب الأستفادة منه لتأمين أحتياجات التواصل الجوى و توسيع مواعين التحصيل الذى ينعكس ايجابا على تمتين الخدمات الجويه ومواكبة التطور والتأهيل وتفعيل مسارات التعرف على الآخرين وبناء الثقه وتاصيل العلاقات الحميميه بين السودان والدول الأوروبيه ذات الرغبه والتطلع الى المشاركه فى قوافل الدعم للسودان لتمكينه من استكمال مشاريعه التنمويه واستكمال البنيات القاعديه والهيكليه لمشروعه الحضارى ان شاء الله سبحانه وتعالى..


ردود على سودانى منفرج الأسارير
United States [ود الجد] 03-09-2013 10:36 AM
والله تنداح دي بتعمل لي مغص فكنا منهاياخي


#604915 [مهندس]
2.88/5 (5 صوت)

03-08-2013 03:01 AM
قال الاصمعي رايت بالبصرة شيخا له منظر حسن و عليه ثياب فاخرة و حوله حاشية و هرج و عنده دخل و خرج فأردت ان أختبر عقله فسلمت عليه و قلت ما كنية سيدنا؟ فقال أبو عبدالرحمن الرحيم مالك يوم الدين قال الاصمعي فضحكت منه و علمت قلة عقله و كثرة جهله... هههههههه


#604910 [ود توتي]
2.88/5 (5 صوت)

03-08-2013 02:48 AM
أخشى عليم يا استاذنا جبرة أن تدخل موسوعة جينيس بكثرة الواوات .يعني ما تعشم عشان توجيهات الرقاص خلاص المشكلة انحلت


#604880 [كردفان الغرّاء ام خيراَ جوّة و برّة]
3.25/5 (6 صوت)

03-08-2013 01:15 AM
انحنا عايزين حيطتنا ذااااااااااتا!!..
وشعارنا:
الليلة والليلة دار الخوّاجة يا حليلا.. بريد هيثرو(ى)..
زولاً سرب سربة من ام در لى لندن.. بريد هيثرو(ى)..
ادونى لى شربة من ال(جيمسون) اب شرقة.. بريد هيثرو(ى)..
الليلة والليلة.. والليلة والليلة.. بريد هيثرو(ى)


#604870 [الفاتح]
3.72/5 (7 صوت)

03-08-2013 12:59 AM
مبروك أستاذ الفاتح لكن أقترح عليك كسره ثابته تكون :-

أورنيك ( 15 ) ليه ما شايلنو ناس النفايات


ردود على الفاتح
United States [أبودجانة] 03-08-2013 12:04 PM
هي النفايات براها ؟؟ كل جماعة التجنيب شغالين بدون 15


#604869 [القرم تفاحة ابل]
3.25/5 (7 صوت)

03-08-2013 12:57 AM
حمدالله علي السلامة ما وريتنا الحصل شنو في مكاتب الامن


#604863 [حسن]
3.44/5 (8 صوت)

03-08-2013 12:48 AM
نحن عايزين خطنا ذاتوووووووو
يعني يا ود جبرا عايزنا نطلع بالسواطير علي الحكومة
عشان ترجع لينا خطنا ؟؟؟؟


#604862 [كوووووووستاوي]
3.08/5 (8 صوت)

03-08-2013 12:47 AM
هو بالله الريس يادوووووووووووب شاف (واوات) جبره ؟؟


#604856 [مرفعين ام بده]
2.94/5 (6 صوت)

03-08-2013 12:35 AM
أستاذ جبرا، بعد التحية، بصراحه انا متفائل جداً و أتوقع قبل ان تصل ( واوات) الكسرة الجديده الموجوده فى نهاية المقال، قبل ان يصل عددها الى سته ( واوات) إن شاء الله سوف يحدث واحد من أمرين ! قد يستطيع اللى ما يتسمى ان يسترد خط هيثرو لصالح سودان طير، او يذهبوا الجماعه كووولهم و نرتاح من بلاويهم !! اللهم إستجب لدعائنا آميييين .


#604850 [من ذلك المكان الذى كـــــان]
3.50/5 (5 صوت)

03-08-2013 12:24 AM
(خط هيثرو)..بشرى سارة : (الرئاسة توجه الوزارة بمحاسبة الضالعين في ضياع خط هيثرو)، أوهكذا يجب أن يكون المانشيت ذكياً ومدهشاً، ونأمل ألا يعلق الأخ الفاتح جبرا على المانشيت بأسئلة من شكلة : كم هيثرو في دهاليز مؤسسات الدولة ينتظر مثل هذا التوجيه؟، وماذا لو لم توجه الرئاسة؟، بل لماذا - من أساسو - لايكون هناك خط محاسبي مباشر بين كل الوحدات الحكومية المركزية وقاعات النيابات والمحاكم، دون المرور أو الإنتظار في محطات ( الاذن أو التوجيه الرئاسي)، أي كما الحال الراهن على المستوى المحلي الذي إذا سرق فيه عامل النفايات الضعيف (حاكموه زي الترتيب)، دون علم رئيس المحلية، ناهيك عن الوالي ؟..و لماذا الكيل بمكيال الرئاسة في قضايا الفساد، بحيث هذا ضالع فحاسبوه، أما هذا فدثروه ب(فقه الستره) و (خلوها مستورها).؟..و..و..كثيرة هي الأسئلة التي إجابتها تفسد طعم الحياة أو (تخليك تلقط الورق في الشارع)..ولتجنب هذا و ذاك، فالصبر - بكظم الحزن ومكافحة الدهشة - يجب أن يسبق (طرح الأسئلة)..!!

اليكم ............. الطاهر ساتي


#604845 [ضهبان]
2.85/5 (6 صوت)

03-08-2013 12:18 AM
عرفنا اعادة أموال خط هيثرو .. بس يا ريت نعرف كيفية اعادته بعد ان آلت ملكيته لشركة اجنبية ..

ام هي حماسة و تطييب خاطر و السلام ؟؟؟ و بكرة نرجع نعد واوات انزال قرارات الريس للواقع !!!


#604837 [حاتم أب تفة]
3.10/5 (7 صوت)

03-08-2013 12:10 AM
وشنو الخلا الرقاص يصحى بعد الشهور دي كلها ويتذكر الخط، هسا بس بالتحديد بعد قضية النفايات وأورنيك خمصطاشر..؟!
نظام ميت ومنهار ونحنا زي "الجن" نخدم فيهو ونخاف منو، لحدي ما نصحى يوم ونقول: لو كنا نعلم الغيب ما لبثنا في العذاب المهين..!!


ردود على حاتم أب تفة
United States [الشعب يريد اسقاط النظام] 03-08-2013 02:48 AM
يا حاتم هو الرقاص عنده say قبل كده قال العنده مظلمه يرفعها لادارة المظالم وانا ح انظرها بنفسي وطلع كلام مريسه ورفعناها منذ سنة 2004وللان ما بته فيها وحتي ملف مظلمتنا سكن وعشعش فيها الاسبايدر والبوم والقمل وكل مصائب وحشرات الدنيا ده رئيس **** قاعد ساكت بس افلح في العرس وبس


#604832 [ربش]
3.25/5 (6 صوت)

03-08-2013 12:02 AM
أخبار تدمير و تفتيت وتشتيت شمل السودان و أهلو شنو ووووووووووووووووووووووو( عدد الواوات طبعاً 23)


#604824 [ابومصعب]
3.54/5 (6 صوت)

03-07-2013 11:42 PM
لك التحية الاستاذ الفاتح
اصلك الخط دا ما تخليه ولازم تحدد نهايته ويجينا راجع
شكرى بعد الله وتقديرى لكم


#604823 [هندسه]
2.75/5 (5 صوت)

03-07-2013 11:41 PM
وفرضا اسى الخط رجع حنعمل بيهو شنو يعني؟ خلاص حالنا حينصلح ونربطو بين مدني الخرطوم عشان ما نعمل حوادث؟

او قول شنقوهو ليك من بيتك انت يا جبرا وطزززززززز لحدي لندن اخر محطه اها حتستفيد شنو ؟

ياخي خلو الباعو يستفيد لانو زول حريف في بلد الوهم ... والشركه الاشترتو عندها طيارات ونحنا ما عندنا طيب !!!؟؟

بلاي تاني ما تفلقنا بالخط دا


ردود على هندسه
United States [malik mohd amin] 03-08-2013 07:50 AM
أسفي عليك يا وطن ,, أسفي عليك ..
طززززززز يا هندسة ؟؟؟ طُزْ يا ...
لمّا واحد يعرّض نفسه للمشاكل و المحن من أجلك يكون الشكر بـ ( بلاي تاني ما تفلقنا بالخط دا ؟ ) بلاي ؟؟
إذهبوا فأنتم الطلقاء
و اعتذاري لجبرة و الشعب المغلوب على أمره


#604818 [د. هشام عثمان]
3.54/5 (6 صوت)

03-07-2013 11:03 PM
إلى متي وأنت رائع وفنان وحقاني يا زول يا جميل ..


#604817 [ود شريف]
3.54/5 (6 صوت)

03-07-2013 10:58 PM
لك التحية الفاتح جبرا وانت تتابع اخبار خط هيثرو العند النائب العام وها قد وصل الامر عند رئيس الجمهورية بس يا اخوى الفاتح الشغلة خربانة من كباره وماتخلى معنوياتك كبيرة في انه الخط يرجع او قروشنا ترجع وجهز نفسك لى كميات من الو واوات باخبار تنفيذ قرارات الرئيس حول فقدان خط هيثرو شنوووووووووووووو ونتمنى ان لايطوووووول الانتظار بس شكلو حايكون ووووووووووووووووووووووووووووووووووووووووووووووووووووووووووووووووووووووووووووووووووووو


#604809 [اوهاج]
2.88/5 (5 صوت)

03-07-2013 10:37 PM
انا فى وانت فى والكسرة الثابته حتبقى ثابته قال تنفيذ توجيهات قال يعنى انت قلت الحكاية اصلا ما كانت محتاجه لدرس عصر وقعدت كل الزمن دى هل تفتكر انه توجيهات صاحبنا دى حتغير الخط والمسالة كلها ذر الرماد فى العيون (كبرت كلمة تخرج من افواههم ان يقولون الا كذبا) صدق الله العظيم.كيف الحكاية فاتت عليك وكمان يبدو انك فرحان بتلفون عادل الباز واصبح عندك عشم فى التوجيهات هذا ما اصابنى بالدهشة والحيرة ويبقى السؤال انت حكايتك شنو ؟اكان شفت تنفيذ توجيهات وللا اكان مر عليك خط هيثروولو فى المنام يبقى قابلنى عند خط الاستواء نتلاقى كالرياح الاسيوية على قول تاج السر الحسن


#604791 [جهادالكتروىي]
2.88/5 (6 صوت)

03-07-2013 10:02 PM
مبروك
بقيت تخت ال (و) قبل نهاية الشهر
نرجو مواصلة الواوات لحين رجوع الخط اظنها تملاء عمودك وتدخل فى عمود الجار كمان
وبمناسبة"توجيهات السيد الرئيس بمحاسبة الجهات الضالعة في فقدان السودان لخط هيثرو الجوي وإعادته أو إعادة قيمته"
انا حا اعمل كسرة : ها هاها ......... لمن الضحك يشرطنا


#604790 [بلدى ياحبوب]
3.54/5 (6 صوت)

03-07-2013 10:00 PM
والله انا حاسى ياجبره انوا الكسرة الجديدة دى حتكون الى مالانهاية.


#604789 [زميل]
3.13/5 (5 صوت)

03-07-2013 09:56 PM
شنو يا جبرا فصلتا كده , كمان بقت تجيب ليها قصص وهميه و ركيكه ,


#604778 [ابو محمد - جدة]
3.29/5 (6 صوت)

03-07-2013 09:46 PM
كسرة ثابتة :
أخبار تنفيذ توجيهات الرئيس حول فقدان خط هيثرو شنو(و)؟


ثبت الكسرة ودايرنها تكون اسبوعية لانو العمر مامضمون يمكن الشغلانية تطول .لاحظ انه حا يكونوا لجنة تحقيق واللجنة ترفع توصياتها وتنبثق عنها لجنة للمتابعة ولجنة لشنو مابعرفو وبعد مليون كسرة يفكروا فى انه الملف يتحول للنائب العام وتبدأ اعادة التحقيق وعندما تشكل المحكمة يكون المتهمين فى زمة الله وهناك الحساب عسير ! ولكن اقترح قبل كل شىء انه اى متهم يرد اسمه يجب ان تثبت ممتلكاته فى محضر منفصل عشان لو حصل امر الله تبعد من التركة وتعاد للشعب الغلبان.


#604772 [الحردان]
3.13/5 (7 صوت)

03-07-2013 09:35 PM
ياسيد جبره .. المفروض انك رجل صحفي وديموقراطي .. اولا الكسرة دي مامن حقك تلغيها الا بالرجوع لأصحاب الكسرة الحقيقيين الا وهم نحن الشعب الفضل والقراء وبعدين الكسرة دي بقت زي التلفزيون او التلاجة في البيت ماممكن زول يبيعها او يتصرف فيها الا بالرجوع لناس البيت واقناعهم او تحنيسهم اذا لزم الامر ... وبعدين من ياتو يوم المسعولين يلتزموا بتوجيهات الريس ... يعني انت من اول لفه نفسك اتقطع .. الكسرة دي لازم ترجع ولو انت عاوز تنتظر توجيهات الرئيس اكتب الكسرة الثابتة وزيد عليها وتوجيهات الرئيس يعني كده :

اخبار ملف هيثرو العند النائب العام شنووووو12 + ووو + توجيهات الريس 1 ...

وبعدين ياجبره لما واحد تاني يتصل عليك ارجع لينا ونحن بنوريك تقول ليهو شنو .


#604768 [أرنيك 15]
2.35/5 (6 صوت)

03-07-2013 09:32 PM
ياخ الرئيس بتكلم له خمسة وعشرين سنة زول بسمعه مافي وكان كده يادوب الموضوع راح ولحق أمات طه وكثر من الواو واقنع تب دخل الرئيس وبكرة الحرم وبكرة إخوانه والبركة فيك وفينا وارفع الفراش خلاص الموضوع التلحس تب


#604761 [taj alsafa]
3.25/5 (5 صوت)

03-07-2013 09:26 PM
هل معنى كده إذا رجّعوا الخط أو أدونا القروش الباعوهو بيها- طبعاً حتكون أقل من قيمة الخط لأنه مبيوع بالدس- تكون القصة أنتهت و يا دار ما دخلِكك شر؟


#604758 [مامون]
3.44/5 (6 صوت)

03-07-2013 09:22 PM
فقه الستره!
خليك مستمر فى واوات النائب العام مع إضافة توجهات الريس ال ..................


#604754 [عاطف]
2.69/5 (5 صوت)

03-07-2013 09:11 PM
حيطتنا او لحين استداد الخط


#604743 [Jop]
2.69/5 (5 صوت)

03-07-2013 08:54 PM
الله يجازي محنك يا ود جبرا(*_@)...عااااااااااااااااااااااااااافي منك.


#604739 [خالد]
3.25/5 (9 صوت)

03-07-2013 08:52 PM
خبر توجيهات السيد الرئيس بمحاسبة الجهات الضالعة في فقدان السودان لخط هيثرو الجوي وإعادته أو إعادة قيمته
والله كلام الرئيس ده لا بيأخر ولا بيقدم..
الراح ما بيرجع تاني


#604735 [عصمتووف]
2.94/5 (8 صوت)

03-07-2013 08:49 PM
كسرة ثابتة :
أخبار تنفيذ توجيهات الرئيس حول فقدان خط هيثرو شنو(و)؟
انت مصدق كلام الرئيس ده دي حبة بندول واحده صرفت لك من بند ضيافة الريس عشان ما تصدع


#604733 [kayletoud]
3.54/5 (8 صوت)

03-07-2013 08:47 PM
فعلا شئ مضحك (إعادة قيمته) وماذا نستفيد من ذلك !!!

وكما تفضلت اننا نريد حيطتنا ذاتها ولن تنازل عنها !!!


ومتعك الله بالصحة والعافية استاذنا الفاتح جبرة .


#604732 [صخر]
2.85/5 (6 صوت)

03-07-2013 08:46 PM
واخيرا صحى الرئيس من نومه؟ منتظرين معاك الكسرة الجديدة حتاخد كم من الواوات


#604728 [جلال]
3.25/5 (7 صوت)

03-07-2013 08:43 PM
والله كلامك صح يا استاذ جبرا نحن دايرين حيطتنا ذاتا لانو كم ادونا قروشها مليم احمر ما هنشوف منو والسيد االرئيس هو اول من يطالب بي حقو في الحكاية دي


#604726 [alkafish]
3.25/5 (6 صوت)

03-07-2013 08:35 PM
يا جبرا الرئيس قال يا يجيب الخط يا ثمنه
ده ياتو ثمن ده : تمن البيع ولا زايداَ الربح
و بالجنيه ولا بالدولار: وبي دولار البنك ولا دولار العكد ولا سوق اسود
ياخ القروش دي لو ختوها في تلاجة بيض لي هسه كان فقست و كبرت وعنقدت و بيضت كمان
قال تمنه قال


#604719 [mansour]
2.25/5 (6 صوت)

03-07-2013 08:25 PM
خمد الله علي السلامه ونتابع الكسره الجديده


#604715 [مواطن حر]
2.75/5 (5 صوت)

03-07-2013 08:21 PM
أنت زول فنان


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة