الأمن .. يجرح ويداوي (3) – (3)
03-09-2013 10:27 AM


دخلنا عبر البوابة الداخلية الزجاجية للمبني الفخيم حيث طلب منا (الأولاد) الدخول إلى أحد المكاتب .. المكتب واسع عليه كراسي جلوس وثيرة ويجلس عليه شاب (لونو فاتح) يرتدي بدلة سفاري (بيج) ما أن رآني حتي (وقف حيلو مبتسماً) قائلاً:
- أهلا بالاستاذ جبرا … وعدد من عبارات الترحيب ثم أشار لنا بالجلوس ملتفتاً إلى (بت وراق) قائلاً لها :
- أهلاً يا أستاذه
- فأجابته بت وراق : ما سلمتا عليا بإسمي ليه ما إنتو بتعرفو أى حاجة
إرتبك الشاب وسألها :
- الأستاذه إسمك منو يا استاذه؟
- فقالت له : (إسمها الحقيقي)
في هذه الاثناء جاء من يطلب مننا هواتفنا الشخصية (للفحص طبعن) ، إستنكرنا ذلك بحجة أن ذلك غير قانونى ولكن (القانون هو ذاااتو وينو) ، حملها شخص وخرج إلى جهة غير معلومة . ثم بعد قليل طلب مني احدهم أن أرافقه فذهب بي إلى مكتب آخر وجدت فيه شاباً في منتص الثلاثينات تقريباً نحيفاً طويل القامة ، حياني بأدب وطلب مني الجلوس فجلست على الكرسي المقابل له :
- يا استاذ أنا عندي مهمة ولازم أقوم بيها
- مافي مشكلة أعمل إجراءاتك ولازم تعرف إنو نحنا ما تجاوزنا القانون
- ممكن أعرف الحاصل شنو يا أستاذ؟
- (حكيت ليهو القصة كووولها)
- كويس إنك أديتني خلفية عن الحاصل .. ممكن بس شوية معلومات .. ثم بدأ يسأل وأجيب ويكتب
- الإسم
- العمر
- المهنة
- المعاك دي منو؟
- كنتو بتعملو في شنو؟
وهنا دخل إلى المكتب شاب خوالي الأربعين من العمر معه بعض الأشخاص .. وقف له الجميع إذ يبدو أنه المسئول حياني قائلا:
- إذيك يا أستاذ يا قامة !
- في قامة بيركبوهو في ضهر البوكسي ويتعاملو معاهو كده ؟
- لم يجب على حديثي ودلف مواصلاً :
- موضوع النفايات ده بيهم كل مواطن لكن يا استاذ إنتا عارف الحاصل في البلد عشان كده الوقفات الإحتجاجية والتجمهرات دي عندنا خط أحمر خاصة منطقة السوق دي يعني لو حصلت أي حاجه ممكن تحصل فوضى لا يمكن السيطرة عليها !
- ياخي أنا لو عاوز اعمل فوضي ومظاهرات أنا عندي 125 ألف شاب رهن إشارتي بس عاوزني أأشر ليهم بصباعي لكن نحنا برضو عندنا فهم إنو ده ما يحصل في الوكت الحالي عشان ما تحصل الفوضى البتتكلم عليها دي .. أنا أولادي ديل أكتر من كل الأحزاب الكرتونية الشايفا دي
- عموما يا استاذ نحنا بس التجمهرات والوقفات الإحتجاجية دي عندنا خط أحمر ّ
- ما مشكلة خلاس نوسع مواعيننا التانية
- خلاس ممكن يا أستاذ تمشوا
ونده على أحدهم قائلاً : رجع الاستاذ بعربيتي !!
وعند خروجنا مررنا على المكتب الذي تم فيه إستجواب (بت وراق) وجدتها تنتظرني .. قام أحدهم بإعطاء (الهواتف) إلى (المسئول) الذي سلمها لنا وخرجنا من المبني وهو يرافقنا إلى ان ركبنا في العربة (الأكسنت) ..
- سألني السائق : نرجعك المحكمة يا استاذ
- لا ودونا محل عربيتي لو سمحتا
في الطريق كانت المكالمات تنهال علي هاتفي للإطمئنان وعلمت حينها أن الخبر قد تناقلته الأسافير !!
كسرة :
(الأولاد الصغار يهينوك) ولمن تجي للمسئولين (يحترموك) ويعملو فيها ما عارفين (الإهانات دي) … سبحان الله !!!!

كسرة ثابتة (قديمة) :
أخبار خط هيثرو العند النائب العام شنو(وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو؟


تعليقات 14 | إهداء 0 | زيارات 7031

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#606131 [الحردان]
5.00/5 (1 صوت)

03-09-2013 06:41 PM
ياعم جبرا كده انت ماشي تمام .. الحصل ده عشان انت قلت حاتوقف الكسره .. اولا نشكر لك اهتمامك بتعليقاتنا وترجيع الكسره الثابتة واضافة كسرة الرئيس ( ماكسرة وزير المالية ) وانشاء الله الكسرات دي نوصلها للهكساديسميل وده نظام عد الكمبيوتر .. واكان الصفحة ماشالت حنعمها بالنظام اليوناني يعني الخمسة v و VII والحكاية عاوزه شوية مناهزة وقومة نفس وخلي بالك من صحتك يااستاذنا بتهمنا كتير ... والوليدات الفاقد التربوي المسكوك ديل يومهم قرب انشاء الله .. تحياتنا للاستاذه بت وراق والجاتك في البوكس سامحتك .

في معلومة صغيرة جاتني وعاوز اتأكد منها .. الجماعة هكروا علي سيرفر الراكوبة وتحصلوا علي كمية من الايميلات بتاعت الكتاب والمعلقين وبالتالي دخلوا علي عدة ايميلات منها ونسخ الجزء الاخر بطريقة هاكر ناعم .. نرجو من ناس الراكوبة عمل المزيد من الاحتياطات .


#606111 [صخر]
5.00/5 (1 صوت)

03-09-2013 06:07 PM
والله يا استاذ جبرة انا خايف ان توجيهات البشير يكون زى توجيهاته فى موضوع الاستثمار - بيحكوا انو واحد مستثمر استورد بعض مدخلات لا ستثماراته وناس الجمارك وقفوا الف احمر لازم يسدد الجمارك وعندما ابرز ليهم المستندات الخاصة بألاعفاء الصادر من رئيس الجمهورية - قالوا ليه لو ماعاجبك امشى لرئيس الجمهورية يعفيك من الرسوم ولكن نحن ما نعفيك من دفعها - المعنى يااستاذ جبره قالوا ليه كلام رئيس الجمهورية بله واشرب مويته- ده كلام ده وتقولى اورنيك 15 وخط هثروا ما خربانه من كباره


#606109 [Fato]
5.00/5 (1 صوت)

03-09-2013 06:02 PM
الأخ المناضل/ الفاتح جبرة حمد لله على السلامة.أنت دخلت بيوت الأفاعى ومشيت تهبش فى موضوع النفايات ده والشركة هى ملك(العباس)الشقيق لمجرم السودان الأول(عمر البشير) وطبعا الأمن أتته تعليمات تقول لهم الزول ده أدوه حبة هرشة عشان يبعد عن حكاية أورنيك 15 دى لأنه العباس لحدى الان ماشبع وبعد مايشبع يأمر سعادة / المشير بالقطع من خلاف على كل من لا يتعامل بأورنيك15 بس فى هذه الفترة عاوزنك تبعد شوية من موضوع النفايات دى وكمان لا تنسى كسراتك بتاعت ملف هيثروا دى أستجاب أخيرا أمير المؤمنين وأمر بأرجاع الخط أوأرجاع فلوسه وطبعا دى مقصود بيهاالشريف ودبدر وشريكه على عثمان ودى حرب داخلية بين الصقور والحمائم.المهم أنتبه أخوى الفاتح من الناس ديل مايقوموا يركبوك أنتنوف ولا برادو ويلحقوك أمات طه.


#605935 [خالد حسن]
5.00/5 (2 صوت)

03-09-2013 02:06 PM
حجة كلاب الامن الممجوجه ( انت عارف الوضع في البلد والتجمعات ممنوعه)
24 سنه ماسألت هذه الكلاب نفسها والوضع في البلد دي ليه مامستقر؟
في بلد في الدنيا حالة الطوارئ استمرت فيه 24 سنه؟
حجه واهيه ياكلاب الامن ( الدواعي الامنيه) دي شماعتكم البتتستروا بيها وتحموا سيدكم
بعدين حجة الامن دي مفتعله من النظام العاوز الباد تكون في حالة عدم استقرار عشان يلقي ليه اسباب
تعضي بيها كلاب الامن الناس البحتجوا
ولمن اسرائيل تضربنا مانلقي اثر لكلاب البتهوهو فينا!
الامن في بلاد العالم معمول لحماية البلد من العدو الخارجي
لكن عندنا معمول لحماية****اسمه البشير


#605933 [ali saleh]
5.00/5 (1 صوت)

03-09-2013 02:06 PM
قبضوك يا جبرة!!!!

سحروك ولا أدوك عين


#605927 [الكيزان من بغايا الأندلس]
4.88/5 (4 صوت)

03-09-2013 01:56 PM
هذه الأرنايك التي تتحصل بها رسوم النفايات تصب في خرينة شركة (كي ستون) المملوكة لعباس حسن البشير ، الأخ الأصغر للرئيس البئيس ، وكان موقعها - المعلومة قديمة من السنة الفاتت تحتاج تحديث من الفرد الراكوباب - أركويت ، تقاطع القسم الشرقي ، مقابل مكتبة ريم بوكشوب...


#605905 [رضوان الصافى]
5.00/5 (5 صوت)

03-09-2013 01:26 PM
والله يا جبرا خائف عليك ينكسر ضهرك وخط هيثرو يروح شمار فى مرقه
الكسرة الاولى حلوه ( يقتلوا القتيل ويمشوا فى جنازته )
هيثرو باعوه زى ما ببيعو الكمونيه
وكانو ما حصل شئ .. بس فى زمتك يا جبرا هيثرو ولا مشروع الجزيرة ؟
هيثرو ولا الصحه .. هيثرو ولا التعليم .. هيثرو ولا الخدمة المدنية .. هيثرو ولا السكة حديد ..
انت ماسك ام ضبينينه واحده وتلولح فيها .. والبلد كلو بقت ام ضبيبينه
خط هيثرووو عملتو عليه شنو ؟؟؟ بعناااه يا جبرا كما نبيع الكمونية
لك التحية يا جبرا ..


#605878 [المغربي]
5.00/5 (2 صوت)

03-09-2013 01:00 PM
من أخذ الاجر حاسبه الله بالعمل . الرئيس بياخد اجره كامل . من عمله مراقبة تنفيز اي قرار يصدره بحق كان ام باطل لكنه لايفعل ذلك . اذن نقول عليه شنو .


#605869 [naser abirh]
4.50/5 (2 صوت)

03-09-2013 12:49 PM
والله يا أستاذ جبره ذكرتني بي مسرحية عادل أمام اما تدفع أونشيل العده ....؟؟؟بيني وبينك أنا


خفت من أرنيك 12 ديه...ما أنا عااااااارف مش بتاعتنا ...


#605854 [مكسر في كسرات جبرا]
5.00/5 (2 صوت)

03-09-2013 12:34 PM
فاتت عليك حاجة يا أستاذ لما سألك الضابط وقال ليك : ( عموما يا استاذ نحنا بس التجمهرات والوقفات الإحتجاجية دي عندنا خط أحمر ّ).
موضوعك كان دفع رسوم النفايات , عايزين نعرف ماذا تم بخصوص هذاالموضوع هل ألزموك بدفعها ؟؟


#605853 [ود شندي]
4.88/5 (4 صوت)

03-09-2013 12:34 PM
ما هو دا الفن ذاتو يهينوك بره ويحترموك جوه حتى يخلخلوا قناعات الناس المجهجهة ولكنك بتفهم اللعبة كويس طبعا


#605836 [أبوالكجص]
4.88/5 (5 صوت)

03-09-2013 12:19 PM
ليه تورط نفسك كده (بذكر أنو عندك مائة وخمسة وثلاثين شاب يمكنك تحريكهم برهن إشارة) هؤلاء سوف يأخذونها عليك وإذا اشتعلت مظاهرات في أي وقت لا تستبعد أن يجعلوها موضوع لزوم تشتيت الأفكار (ديل أولاد جبرا . لا ... ما أولاد جبرا .......... وهكذا دواليك.)
كان تخليهم دايرين في دورانهم (هم وليدات وعايزين يوروا أنهم شغالين وخلاص). يا جبرا إنت كبير والكبير كبير ونحن محتاجين ليك عشان بتمثل صوت الشارع والناس ديل حا يقصدوك بعد كده وزي ماقال ليك الوليد داك رئيسهم إنو المظاهرا ت في السوق عندنا خط أحمر.


#605793 [الفاتح]
5.00/5 (4 صوت)

03-09-2013 11:40 AM
اخبار اورنيك (15) العند ناس النفايات شــنو ؟؟؟؟


#605754 [hafiz]
5.00/5 (3 صوت)

03-09-2013 10:59 AM
السؤال يفضل قائم رأى الرئيس والمجلس الوطنى شنو فى التفاويض التى تلغى قوانيين الدولة ؟؟؟!!!
وكل وزير يعمل على كيفو ؟


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة