هيثرو تاااني
03-10-2013 08:20 AM


إحتل خبر توجيهات السيد رئيس الجمهورية بخصوص فقدان خط هيثرو والذي وجه فيها سيادته بمحاسبة الجهات الضالعة في فقدان السودان لخط هيثرو الجوي وإعادته أو إعادة قيمته إحتل الخبر الصفحات الأولي بالصحف كما إحتل صدر النشرات الإعلامية وتناقلته وكالات الأنباء العالمية وأثار كثيراً من التعليقات على المنتديات والمواقع الأسفيرية .
العبدلله توقف كثيرا في عبارة (أو إعادة قيمته) يعني الجماعة الباعو (الخط ده) يرجعو القروش الإستلموها .. العبدلله يعتقد أن الأثر كان سوف يكون أكثر وقعاً طيباً لدي المواطنين لو أن السيد الرئيس إستخدم كلمة (محاكمة) بدلاً عن (محاسبة) ولو أن الكلمتين تعطيان نفس الدلالات إلا أن القانونيين قد درجوا على إستخدام كلمة (محاسبة) عند النظر في الأخطاء الإدارية والإجرائية وفق اللوائح المنظمة للعمل .. وتكون دائماً جهة الفصل في هذه الأخطاء مجالس يشكلها رؤساء الإدارات المعينة من أجل تطبيق اللوائح على الشخص المحاسب (بفتح السين) والذي غالباً ما يكون قد أهمل في اداء واجبه بشكل أو آخر (يعني كثير الغياب) .. ما قاعد يحترم الرؤساء. ساق عربية المصلحة مشوار خاص .. !
اما مخالفة القانون الجنائي في أي دولة فالآلية التي تتم بها معرفة إن كان الشخص قد خالف القانون أم لا فقد درجوا على تسميتها (محاكمة) والمكان الذي تنعقد فيه (محكمة) !
لست خبيرا قانونياً ولكن من قاموا ببيع هذا الخط قد إرتكبوا أفعلاً يعاقب عليه القانون الجنائي وقد خالفوا كثيرا من مواده ، ولو القصة بقت (شريعةوكده) نشوف هل (العلماء أطال الله أعمارهم) بيشوفوا إنو دي هل دي (سرقة حدية) وللا أقل من النصاب؟
بغض النظر عن الحاجات دي كووولها .. طيب في حالة إنو الشعب السوداني (سيد الخط ده) وافق على إستعادة القروش وإنو الخط راح (في حق الله) طيب هي القروش الإتباع بيها الخط هي ذااااتا كم ؟ ونعرفا كيف؟ لو المال المسروق ده إستلمو زول داخل السودان إحتمال الزول كان نقبضو و نعمل ليهو (الطيارة قامت) يقوم يعترف ويقول أنا أشتريتو من الجماعة ديل بالمبلغ الفلاني .. لكن الإشتروهو خواجات وهم خارج السودان وحتى لو قالوا أشتريناهو بي كده.. نصدقهم كيف؟ أها كيف العمل ؟ نمشي (للتومة الوداعية؟) التومة زمااان قالت قولتها المشهورة (قضية الخط دي أقنعوا منها)
ممكن (واحد ألمعي) يقول ما نسال الجماعة ديل ذاااتم نقول ليهم بعتو الخط ده بى كم ؟ الناس ديل مش مسلمين وعارفين إنو (الكضب حرام) والقبر قدام؟
عموما مسألة الخط إتباع بي كم والبائعين قبضوا كم و(السماسرة قبضوا كم) وتحديد الرقم الحقيقي دي العبدلله يعتقد إنو لا توجد طريقه لمعرفتها والتثبت منها ! وبعدين مش ممكن (الجماعة ديل) يكونو باعوه (كسر) وده مش سعرو الحقيقي ؟ في الحالة دي (الشعب الصابر) ده مش راحت عليهو ملايين الدولارات فرق سعر؟!! أها دي يعملوا فيها شنو؟
طيب نقول مفترضين أفتراضا لا أساس له من الصحة بأنو واحد منهم عندو (ذمة) – أقر وأعترف بالقيمة الحقيقية للصفقة طيب (قروشنا دي) لي هسه بعد ستة سبعة سنين (خاتنها عندهم) بقت كم؟ القروش دي لو وضعت كوديعة متراكمة في اي بنك أجنبي ح تكون عملت فايده كم؟
إن عدم المطالبة بهذه الفوائد لهي دعوة صريحة لكل مؤتمن على مال أن يلهط أكبر كمية منه ويختفي عن الأنظار لسنوات ثم يعود ليقوم (بإعادته) بعد أن تتم (محاسبته) ويا دار ما دخلك شر !!
إن التعامل (بسرية) في هذه الجريمة وعدم تقديم المتهمين إلى محاكمة علنية يهزم تماماً قاعدة عدلية عامة شدد عليها الإسلام وهي تساوي الجميع أمام القانون فلا يمكن أن تقطع يد (محاسب مدرسة وادي سيدنا) من الكف لإختلاسه 1200 جنيه (بقروش ذلك الوقت) وتتناول إسمة ومحاكمته الصحف ثم يتم (التفاهم) مع هؤلاء اللصوص (من وراء حجاب) !! وكما قال مكارثي (1924) "Not only must Justice be done; it must also be seen to be done."
ليس فقط يجب إقامة العدالة ولكن أيضاً يجب مشاهدتها وهي تنفذ !
العبدلله يري ان هذا الملف سوف يوضح تماما وبدون أي (لف ودوران) مصداقية (الحكومة) في تعاملها مع الفساد والمفسدين وهو ملف لا يحتمل (أى واوات زيادة) بعد توجيه السيد رئيس الجمهورية كما لا يحتمل (التسويات) فيجب أن يقدم كل من ضلع وولغ في هذا الجرم الشنيع إلى القضاء فوراً في محاكمة علنية يراها كل أفراد هذا الشعب (الفضل) المغلوب على أمره الما عارف يلاقيها من وين وللا من وين !

كسرة :
وأهو منتظرين !!

كسرة ثابتة (قديمة) :
أخبار خط هيثرو العند النائب العام شنو(وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو؟



[email protected]




تعليقات 36 | إهداء 0 | زيارات 6323


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


التعليقات
#608047 United States [shigaish]
0.00/5 (0 صوت)

03-11-2013 09:03 PM
جبرة يا اخوي بديت تهبش محل العقارب
كل شئ ولا سعادة الرقيص
و زي ما قلت في اول مقال الخط دا لقيتة ما دايرة كواسة
رقيصنا يفتش في التعريفة الرايحة وهو عافصة


#607826 United States [أبو العوكر]
0.00/5 (0 صوت)

03-11-2013 03:22 PM
حصل مرة شفتو اوامر أو توجيهات صدرت من بشبش
نفذوها...ياخ ده يقول لغينا الجبايات بتكون شغااااااااااالة وكمان من سلطات
ولائية...ما عندو حاجة قاعد سااااكت..لو فرفر للجماعة بيسلمو طوالى ديل ما عندهم
اخلاق ...عشان كده ده كلام للاستهلاك ساااى.


#607262 United States [ابوخالد]
0.00/5 (0 صوت)

03-10-2013 11:54 PM
انت ياود جبرة بتكتب سنين فى الخط دة
يعنى دابم الجماعة سمعو بيهو؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


#606899 United States [ود الفاضل]
3.25/5 (3 صوت)

03-10-2013 03:09 PM
الفاتح جبرا أنت صحفي جيت فى الزمان الغلط هذا ليس زمان امثالك لانه البلد اصبحت لابسة جلد تمساح وفوق ليه جلد فيل ميت عشان كدى مافي زول بشعر بالوخز او حتى الطعن زاتوا وانت ياخوي بتتباكى على خط هيثرو - بالله عليك نحن عندنا طائرات او حتى طاقم كباتن او فنيين بيشبهوا مطار هيثرو - دا كان زمان لما كانت البلد هي السودان فالان اصبحت البلد لاتزيد عن مستوى بوركينا فاسو ولعل بوركينا فاسو فيها كثير من القيم والمثل بس ضربنا المثل بضئالة الدولة وعدم تأثيرها فى العالم اما جماعتنا حقهم يوجهوا طائراتهم التالفه دي الى مطار بانقي اذا كان وصولها مضمون او مقديشوا ومطار تشاد هذا اصبح مستواهم - اما مطار هيثروا سواء باعوه الجماعة او طردوهم منه فالبلد كلها انباعت وضاعت الجنوب وبترولوا وينه وين التعليم ومجانيته وين العلاج وين دعم السلع الضرورية ووين حديقة الحيوان ووين مستشفى العيون ووين القرند هوتيل قالوا باعوه لواحد هندي ووين المدارس حنتوب ووادي سيدنا وخور طقت وين حوادث دكتور ابن عوف وين مشروع الجزيرة وين الامانة وين قفة الملاح اصبح الشعب يحلم باللحمة وتحول كيلوا اللحمة الى مسيكول الجزار وآخر الموضة بقوا الجماعة هناك بشتروا القوانص والكوارع وما كان يرمى للكلاب 00 كما أن كمشة مويت الفول وصلت الى خمسمائة جنيه 0 اما الفول المصلح فقد اختفى فى ظروف غامضة مابين سعد قشرة والفتيحاب ولا يزال البحث جاري عنه 000 نحن على قناعة بانه لايمكن نجاح حكم مالم يكن مقبولا عالميا - وجماعتنا بدؤا نظامهم بحديث يونس السياسي 0 ماترك دولة فى العالم الا نجضا نجاض -امريكا دنا عذابها والباقي معلوم وبعد ان اصبحت الواطا جماعتنا لقوا نفسهم فى السهلة كلما قبلوا على دولة قالت ليهم الترابة فى خشمكم وبعيدين رفعوا شعارهم المتهالك ( نأكل مما نزرع وناكل مما نصنع) وهو شعار يتطلب جعله امرا وقعا نظام لايوجد به عسكري واحد 00لان العساكر فى السياسة وادارة الشعوب هم أس البلاء 00 وشعبنا السوداني لولا الملامة لقلنا يستأهل كل البحصل ليه - لانه كلما وصلت حكومة ديمقراطية الى الحكم لم يصبر عليها لشهور ومن جهله يتخيل ليه ان الرئيس المنتخب يستطيع بعصى سحرية اصلاح مااتلفه حكم العسكر فى عشرات السنين فى عام واحد 0 وها نحن مندفع الثمن من جراء سكنات الكاكي حيث جاء الترابي يركبهم فى الوصول الى القصر المنكوب 00 والترابي هو مركز كل بلاوي السودان والشيئ الذي يجعل اللبيب حيرانا قناعة السودانيين بهذا الرجل المشعوذ فى كل شيئ 00 واخيرا حتى نستطيع معرفة من باع خط مطار هيثروا علينا التفكير فى حل المعادلة الاتية:
اولا على الشعب ان يحسب راتب رئيسه منذ ان نط الحيطة مع الترابي بالليل واستملوا البلد - ثم ينظروا لقيمة منزله بكافوري وقصره بالمنشية وشقته ومزرعته بالسليت القيمة النقدية لهذه الممتلكات تؤدي الى إباحة بيع خط هيثروا 00 اذا كان رب البيت للدف ضاربا فشيمة اهل البيت الرقص والطرب 000


ردود على ود الفاضل
United States [Dokom] 03-11-2013 11:45 PM
تعاليم الاسلام تنهانا عن ان نسخر من أي قوم.


#606868 United States [عبد الجبار أحمد]
2.25/5 (4 صوت)

03-10-2013 02:32 PM
شوفو وتعرفوا النجيضة مني

أي عملية فساد كبيرة في السودان والله ورءاها مسئول كبير . أبدأوا من بيع شركة موبيتيل التي كانت عمولتها مئات الملايين من الدولارات ذهبت كلها للحرامية . اهم شيء في الانقاذ انك لما تفسد ما تاكل لوحدك وادي المسؤلين الكبار معاك . اصبح الوضع انو اي مسئول كبير وراءه جيش جرار من المفسدين تابعين له . وطبعا اذا كنت تريد ان تفسد وتحمي نفسك أدخل اخون البشير معاك وبعدها برطع زي ما عاوز


#606865 United States [aaa]
0.00/5 (0 صوت)

03-10-2013 02:31 PM
ياجبره ديل ضيعو السودان وين ثلث السودان وين مشروع الجزيرة وين السكك الحديدية وين النقل النهرى وين مصانع السكر وين وين وين ديل لو حاكموهم بالشريعة الاسلامية وكل قوانين الاديان السماوية والقوانين الوضعية بشوفو قليل فيهم .


#606857 United States [siddig]
0.00/5 (0 صوت)

03-10-2013 02:26 PM
ياجبرة..إنت قلتا لي القاضي في المحكمة بتاعت النفايات حقتك قال ليك شنو بخصوص القرارات ؟:(........................................................................)


#606821 United States [عادل نقد]
0.00/5 (0 صوت)

03-10-2013 01:44 PM
يا ود جبره الكسره التانيه دي البتوديك للجماعه...............


#606809 United States [alkafish]
5.00/5 (5 صوت)

03-10-2013 01:18 PM
عثمان عبد الحميد


قرأت بمزيد من الدهشه مداخلات اولي امر سودانير بصحيفة الصحافه عن خط هيثرو و محاولاتهم البائسه تغبيش الحقائق تمهيدا لمخارجة المتهمين وهاكم الحقائق :-
اولا كابتن شيخ الدين دا عايز يداري سوءة جماعتو وكلامو دا مقصود منه التبخيس لان الخط البيتكلم عننه هو (مسار رحله) بينما خط هيثرو المقصود هو حق سودانير في الهبوط بمطار هيثرو الذي هو خط تأريخي يرجع الي ايام شركة ايرويرك مع سودانير بطائرة الفيسكاونت و الكوميت وتقلص حق الهبوط من 7 رحلات اي 7 حقوق هبوط الي 3 ثم الي 1 رغم توقف طيران سودانير لاسباب سياسيه بأعتبارها من حرس هيثو القديم ( اولد قارد كريار)مثلها مثل اير انديا وساوث افريكا ايرلاينز و بريتش اوفر سيز وبريتش ايرويز و بريتش كالدونيان.

افرزت الزياده الكبيره في عدد رحلات خطوط الطيران والتي زادت بنسبة %245 بواقع 4 طائرات في الدقيقه بين هابطه و مقلعه ادي الي تقلص ذلك الي نشوء سوق مهنيه متعارف عليها باسم الاسلوط تايم بروسيس وتم تقسيم ال 24 ساعه خلال اليوم علي عدد الطائرات بالثانيه و الدقيقه وعلي كافة الخطوط الاتزام بمواعيد الاقلاع و الهبوط مما ادي الي نشوء سوق تأجير و بيع حقوق الهبوط بملايين الدولارات

اها ناس سودانير ديل ادوهم مواعيد هبوط يوم الثلاثاء من كل اسبوع في تمام الساعهالساعه 2 و 33 دقيقه للوصول و الساعه 6 و 33 للقيام

الخط دا هو الذي تم بيعه لشركة بي ام آي البريطانيه وتم البيع يوم 30 مارس 2008 ووقع علي عقد البيع مايكل بيشوب مدير ال بي ام آي و من سودانير الشريف عمر بدر بشهادة العبيد فضل المولي و عبدالله محمد ادريس و بمباركة الوزير كمال عبداللطيف و ياسن الحاج عابدين من مجلس الاداره

كل هذه الاسماء و الوثائق المتعلقه بالصفقه يمكن الحصول عليها من وكيل البيع بواسطة استصدار امر قضائي من اي موظف قضائي بمبني الاولد بيلي في لندن مقابل دفع رسوم قدرها 30 جنيه استرليني
واسم وكيل البيع هو شركة ايبورت كواورينيشن ليمتد ومقرها مطار هيثرو


ردود على alkafish
United States [المظلوم السوداني] 03-10-2013 03:43 PM
اعتقد ان هذه المعلومات مهمة جدا و يجب علي الحكومةاذا كانت جادة .. و لا اعتقد انها كذلك.. ان تستفيد منها لتحقيق العدالة و بشكل علني كما طالب جبرا ...

United States [عبد الواحد المستغرب أيما إستغراب!!] 03-10-2013 03:19 PM
يا ربى...قيادات معارضة السجم والرماد دى عندها فكره عن الموضوع ده ولا هم زينا واحد مجرد متلقين؟ وإذا كانت عندهم فكره لماذا لم يسعوا لتمليكها للرأى العام ؟.. ولا..إكتفوا بمتابعة الموضوع زينا كده من خلال مقالات جبرا وتخيلوا أن جبرا (بيهظر ساكت!!)وبالمناسبه إنشاءالله صلاح عووضه يكون إقتنع بفكرة القناة الفضائيه ..ولا.. لسه معصلج؟!!وليت كاتب التعليق سعى وراء الحصول على الوثيقه وأفتكر 30جنيه الاسترلينى ما كتيره على الشعب السودانى__وما تقدموا لانفسكم من خير تجدوه عند الله__ووثيقه لله يا محسنين تقوا بيها ظهر أخوكم جبرا!!.


#606799 United States [sebak mino]
4.75/5 (5 صوت)

03-10-2013 01:05 PM
مشكور جبرة ولكن الموضوع دا شكلو حيكون استهلاك ضمى ساااااااااااااااى ورئيس الجمهورية عارف انو الموضوع قروشو مشت وين ....وبعدين انا عندى سؤال هو الموضوع بالضبط حصل متين؟ وبعدين الناس البسيطسن عايزين توضيح لماهية هذا الخط؟ وكيفية بيع خط فى الهواء؟ ومن هو هيثرو المذكور فى الخط؟ وما هية اهمية هذا الخط؟ وكم عدد القريشات البجيبا فى السنة للسودان؟ ..اسئلة مشروعة يكون جيد لو وضحا الفاتح فى مقبل الايام....
قرارات وتوجيهات البشير كلها (بيش ) وما ملزمة لاى سودانى ...قل بربك كم هى المرات التى وجه فيها البشير ابطال الرسوم فى خطوط المرور السريع ؟ وكم هى القرارات التى اصدرها البشير بشان المفسدين والفساد؟ يا اخى الرجل دا لين العريكة والمواضيع مرقت من ايدو ولا عندو حيلة يكافح بطانته السيئة دى ؟؟واحلف ليك بالله ثلاث ليس بمقدور الريس محاسبة احد حتى يلقى الله ...فهو فاسد وبطانته فاسدة والكل الى الله صائر....


#606797 United States [alkafish]
5.00/5 (2 صوت)

03-10-2013 01:04 PM
يا جبرا الرئيس قال يا يجيب الخط يا ثمنه
ده ياتو ثمن ده : تمن البيع ولا زايداَ الربح
و بالجنيه ولا بالدولار: وبي دولار البنك ولا دولار العكد ولا سوق اسود
ياخ القروش دي لو ختوها في تلاجة بيض لي هسه كان فقست و كبرت وعنقدت و بيضت كمان
قال تمنه قال
dated march 7th


#606750 United States [محمد الريّح محمد]
5.00/5 (3 صوت)

03-10-2013 12:20 PM
جبرة تسلم والله .... وربنا يجزيك خير الجزاء عن كل الشعب المغلوب على أمره


وأظن وليس كل الظن إثماً إن توجيهات رئاسة الجمهورية هي لذر الرماد في العيون .... لا أكثر


ودمتم في حفظ الله ورعايته


#606741 United States [تربال]
0.00/5 (0 صوت)

03-10-2013 12:10 PM
ياجبره اخبار قضيتك مع النفايات شنو؟ وانا شايف انت من ما خليت ناس الرأي العام و بعتهم عشان جريدة الخرطوم وعادل الباز امورك ماماشة لي قدام وطريقك اصبح كله شوك، الجماعة ديل عايزين يدمروك.


#606696 United States [ود شريف]
5.00/5 (2 صوت)

03-10-2013 11:43 AM
الاخ الفاتح جبرة كتر خيرك على متابعة الملف بس هل تعتقد انه توجيهات السيد الرئيس حاتجيب نتيجة ؟ مثال \ الرئيس ماقال مافى اى تحصيل للجبايات على الطرق وبين الولايات اها اتنفذ !!!!
ياخوى يالفاتح الواوات حاتكتر وما حنصل لى نتيجة الا بعد زوال هذا النظام الفاسد وما اظن المفسدين ممكن تجى منهم عدالة وانا معاك وكل اهل السودان منتظرين توجيهات الرئيس والله يكضب الشينةوانحنا ماعايزين قروش عايزين خطنا زاتو


#606687 United States [مجدي احمد]
4.00/5 (2 صوت)

03-10-2013 11:39 AM
علي الطلاق تشبع انتظار..شفت ليك حرامي حاسب حرامي..و بعدين شوف الطريقة ذاتا طريقة حرامية علي وزن "ابو القاسم" يعني امير المؤمنين قال يرجعو القروش دي ما طريقة ابو القاسم ذاتا يعني الموضوع مجابدة يقولو خلاص بنرجع نصها و السماسرة يتدخلو و كدا....
بلد مبتلية 4 ولاة و عدد من الوزراء و من ارتزق برزقهمو ولغ في نهبهم و حرامهم مشكوك في قوامهم كرجال و عايزا تعمل محكمة لحرامي
انعوا الاخلاق في السودان...كما قال بدرالدين لؤلؤ عندما ارسل اليه التتر للمنجنيق و ارسل اليه المستعصم للراقصات وهو رجل عميل خائن لكن قال كلمة حق : انظروا للطلبين و انعوا الاسلام


ردود على مجدي احمد
United States [المظلوم السوداني] 03-10-2013 03:50 PM
اعتق ان الحاح الاخ جبرا و اصراره هو الذي دفع برئاسة الجمهورية الي ذلك التصريح و الهدف منه ذواضح و هو التخدير و ذر الرماد في العيون معتمدين في ذلك علي ضعف ذاكرة الشعب السوداني ... لذلك يجب علي جبرا الاصرار و مواصلة الامر حتي لووصلت الواوات الي ما لا نهاية ... ولن يضيع حق وارئه مطالب ...


#606676 United States [محموم جدا]
5.00/5 (1 صوت)

03-10-2013 11:28 AM
أولا الحساب لي يوم الحساب و المحاكم لك فيها تجربة النفايات و أورنيك 15 الراح في حق الله بين البديل و المطابع الخاصة و عدم التوريد في المالية يعني عايره و مدينها سوط و بالطريقة دي ستحتاج لكمية من الواوات المستوردة و كيف حا تدخلها الى البلد عن طريق الجمارك أم تهريب لأنه الواوات المستوردة من نوع الواو الضكر يعني محاكم جنائية و مجلس امن و غيره من صناع الواوات الضكر بكرة يزيدو لك الجمارك 200% على الواوات أحسن شئ تورد واووو صينية و هو القطن قامتلو قايمة ما زرعوه في صلعة الصمت الاداري و قبل ما يحاكم أو يحاسب حقوا الرئيس يطلب تقرير الاسبوع القادم عن الخط من يوم ما ضاع و حتى اليوم لأننا سمعنا كلام كتير عن التحقيقات التي لم تكتمل من البرلمان و لجانه النايمة تحت كبري النيل الابيض لأن الشعب ضاعت عليه المعرفة و لابد من أن يعرف مجريات العدالة العاجزة(للتنفيذيين) عكس الناجزة ( للفقراء و المساكين) قال مشروع حضاري بلا خط هيثرو شيئ عجيب!!! يا حاج الفاتح جبرا ما تجبر خاطرنا و تفتح صفحة لينا عن النيل الابيض القابضة و دي ملايين من الدولارات من عرق المغتربين في التسعينات قبضوا منها الهوا و الكضب و اللولوة و ما قالوا الراجل بمسكوه من لسانه لكن ربنا بمسك الراجل من .....


#606658 United States [المشتهي الكمونية]
4.19/5 (5 صوت)

03-10-2013 11:13 AM
إنت صدقت يا جبرة ولا شنو ؟ دا كلام تخدير ساكت ما تصدقه ، عمر البشير قبل كدة حاسب منو وحاكم منو؟ وخط هيثرو براهو الاتسرق؟ الشعب السوداني سوف يصدق البشير لو بدأ بي نفسه ، من وين جاب القروش البنا بيها الفلل والعمارات والمزارع ، وأخوانه من وين جابو المليارات بعد ما كانوا معدمين ، ورينا يا جبرة زول واحد في الحكومة أو عصابة المؤتمر الوطني مسكين وعدمان وما عنده حاجة، نتحداك أن تذكر لنا اسم واحد ، إذا ذكرت لنا واحد بس تكون دي معجزة وعلامة من علامات الساعة، خط هيثرو برغم أهميته يبقى قطرة صغيرة في بحر فساد العصابة


#606653 United States [Abu Adeela]
4.50/5 (2 صوت)

03-10-2013 11:07 AM
والله ياجبرة ده شنبى لو لقيت اى جواب على أسئلتك المتناسلة .
مسآءلة مين ومحاكمة مين يابا؟ هو إنت صدقت ؟
واصل ياحبيب فى واواتك ما شاء لك المواصلة...وخلوها مستورة.


#606644 United States [محمد احمد]
5.00/5 (1 صوت)

03-10-2013 11:01 AM
ود جبرا خلينا من خط هيثرو وانت عارف تصريح الريس لتسكين آلام الشعب وما في محاسبة ولا زعيط
ورينا الحصل ليك شنو بالتفصيل في محكمة النفايات وخلينا معاك في الصورة في الجلسة القادمة عشان نرسل ليك وحدة محامية جميلة يقوم مولانا يريل قدام الحسناء ويطلعك براءة


#606636 United States [hafiz]
5.00/5 (1 صوت)

03-10-2013 10:55 AM
وإذا ثبت بالقانون البريطانى او السودانى ، أن البيع تم بطريقة : بيع من لايملك ، فرضا وبعدإعادة قيمته، هل يضيع حق فترة عدم إستخدامنا للخط كل هذه الفترة؟ أم نأخذ عنها فترة تأجير للخط الذى كانت تستخدمه الشركة المشترية بالباطل ؟ وتأجير الخط يعد بملايين الدولارات ، إعادة الخط أو إعادة قيمته لا يكفى لابد من حساب فترة تأجير للخط كل هذه الفترة وهو خارج حضن الوطن ، وتقديم الخونة إلى المحاكمة بقطع الرأس بحد السيف عبرة لمن يعتبر ..

واحذورا من مقولتنا الفاسدة : ( المال تلتو ولا كتلتو)...


#606634 United States [Zoul sakit]
5.00/5 (1 صوت)

03-10-2013 10:53 AM
توجيهات السيد الرئيس لا يتم تنفيذها ولاتوجد متابعة لها قبل سنوات عديدة وجه السيد الرئيس بعدم تحصيل رسوم العبور ولا زالت هذه الرسوم تحصل بل وتتم زيادتها من عام لآخر حسب قيمة الجنيه والظاهر ان واواتك ستزيد من يوم لآخر في التساؤل عن اخبار تنفيذ التوجيهات وبعد التوجيهات جاءت خجولة استخدمت فيها عبارات مثل اعادة القيمة والمحاسبة يعني جيب القروش تتبعها قرصة في الاضان واوعك تعمل كدا تاني والموضوع خلص


#606631 United States [ابو ابراهيم]
5.00/5 (2 صوت)

03-10-2013 10:51 AM
سمعنا قالو زمان سيبويه مات وفي نفسه شئ من حتي انا خايف ياستاذ جبرا مع الناس ديل تموت (بعد عمر طويل) علي قولة اخوانا المصريين وفي نفسك شئ من خط هيثرو


#606629 United States [سوداني ويس]
5.00/5 (1 صوت)

03-10-2013 10:51 AM
والله انا خايف واواتك الفوق ديل ينزلو تحت


#606620 United States [سودانى غيرمنفرج الأسارير]
5.00/5 (1 صوت)

03-10-2013 10:45 AM
يا استاذ الفاتح .. السلام عليك "يتنزّل" والتحيات اليك "تنداح" ..
(1) حقيقةاحسن خلينا مع الودّاعيه .. هوّ الموضوع كان عاوز ليهو توجيه رئاسى؟ وبعد كم من الزمن !! "احسب ان هناك كثير من المواضيع عاوزا توجيهات.. وان جاز لنا ان نتساءل كم من التوجيهات اللى صدرت تنزّلت الى ارض الواقع؟؟
(2) يا اخى الخط اسمو "هيثرو" بالأنكليزى طبعن لأرتباطه باسم بالمطار .. بالعربى يكون اسمو ايه.."هو رمى .. هو جدع (موش ابن لبون) .. هو القى ( بسكون اللام وفتح القاف).. هو فنّن..هو زقل (بفتح حرفى الزين والقاف)" الا ترى ان من كان الخط وسودان اير تحت مسؤولبتهم تعاملوا مع الموضوع فى اطار ألأسم ألأصلى للخط .. "رموهو بيعا .. او باعوه رميا"...( موش مرات فى بضاعه بتتباع مرميه (يعنى رخييييسه)
(3)انطلاقا من حسن الظن الجماعه (ايا كانوا هم) كانوا ناويين يشترو خط "Gatwick" بدلا من الباعوه رميا
عندما تعود سودانير الى سفرياتها المشرقه..ان شاء الله سبحانه وتعالى
(4)يا سيد.. موش جايز بيع الحط كان واحد من شروط بيع سودان اير ذات نفسها .. وهى كانت سودان اير من اساسو اتباعت ليه... الا ترى انو يتوجب اولا ان نسأل من الأصول .. طيارات.. مبانى.. موظفين .. مراكز صيانه.. زبعدين نسأل من الفروع
(5)اخيرا الا يكفى ان السيد اللى كان مسؤول عن سودان اير وما عندها من خطوط رحّب ايما ترحاب بالتوجيه الرئاسى؟؟؟


#606597 United States [حسكنيت]
0.00/5 (0 صوت)

03-10-2013 10:30 AM
لا حيتحاكموا بتاعين خط هيثرو ولا حتى خط 18 ، لكن خلى واحدة تلبس جكسا فى خط ستة ..قدو قدو جاهز


#606588 United States [عبد الواحد المستغرب أيما إستغراب!!]
5.00/5 (1 صوت)

03-10-2013 10:22 AM
ياجبرا هما الجماعه ديل كانوا (ركبوك البوكسى دبل قبين!!) لاغراض المحاسبه ولا..المحاكمه؟!!والله العظيم حاجه تحير وتجنن كمان!!أيهما أكثر ياترى من حيث المردود المالى لصالح الدوله قروش خط هيثرو ..ولا..قروش النفايات ؟!!..ولا..المسأله حيطه قصيره وحيطه حدها السماء مافى زول يقدر يتاوق لما بعدها؟!! وعمنا جبرا طلع من ذوات الحيطه القصيره!!يادوب ..كده(مدماق..مدماقين)..يعنى لسه فى طور (الساس).. أما الجماعه الهبرو هبرتم وصدقونى الطقه الطقوها من العمليه دى تساوى ما تجبيه الولايه قسرا وقهرا من كافة القطاعات السكنيه والمرافق والشركات إبتداءا من العوائد ومرورا بالنفايات والغرامات التى تتحصلها من ستات الشاى والدكوه وإنتهاءا بالرخص التجاريه لمدة 10أعوام ماضيه على الاقل !! وبمناسبة التصريحات التى أطلقها فخامة الرئيس الديمه نائم فى العسل على مايبدوا إنها (صحوة موت!!)والزول ده عاين (لشافيز) والحصل ليه فى لمحة بصر وأحس بدنو أجله وقال يعمل حاجه يقابل بيه ربه وركز فى (خط هيثرو) وكأن خط هيثرو هى القضيه الوحيده والمسكين ما درى بأنه يحتاج قدر عمره عشره مرات كى يحلل ذنوبه التى صمت عليها عمدا،وبما أن جبرا صمت طويلا حتى تراكمة عليه ديون النفايات فالرئيس قال إشمعنى جبرا؟!!..وصمت على الفساد ويبدو إنه فهم مقولة (الشعوب على دين ملوكها) على إنها (الملوك على دين شعوبهم)والبعيد كما تعلمون لامؤاخذه (من بهيمة الانعام!!) ولو لا تراكم الفساد فى عهده البهيم بهذا الشكل المخيف والمفزع كان قد حل مشكلة النفايات .. نفايات شنو؟ هى النفايات براها؟!! كان حل مشاكل البلد كلها..لكن تقول شنو ..أهو ده..ربنا..وأهو ده.. حكمتو !!وياجبرا ما تسكت خليك وراهم لغاية ما يركبوهم البوكس دبل قبين ومافيش حد أحسن من حد وكلنا اولاد تسعه !!.


#606570 United States [ياسر عبدالصمد عبدالله]
0.00/5 (0 صوت)

03-10-2013 10:06 AM
الشريف عمر بدر رئيس مجلس ادارة سودانير والعبيد فضل المولي مدير هجليج هم اعضاء مجلس ادارة مجموعة عارف الكويتية التي باعت الخط .... ولكن لم تكن لتبيع الا بموافقة الحكومة السودانية وممثلي الحكومة ود بدر والعبيد لا يوافقون الا بعد موافقة النائب الاول راعي سودانير ، وودبر يتعد هو اداء من ادوات فساد علي عثمان يحركه من سودانير الي مشروع الجزيرة. مسكين ود بدر يرضي ب(الحاسات) فقط


#606562 United States [ثائر ضد الفساد]
5.00/5 (1 صوت)

03-10-2013 09:54 AM
هههههههههههههههههههههههههههههه لقيت ليك كسرة تانية لو كانت كسرة بكسر الكاف كان افضل ليك في زمن المجاعة دي


#606550 United States [Tahreer]
5.00/5 (1 صوت)

03-10-2013 09:48 AM
يا بن جبرة يبدو ان واواتك لن يوقفها الا الواو الضكر وكلهن انتايات عشان كدة ما جابن زيت


#606544 United States [البشير على نافع الجاز الفللى]
0.00/5 (0 صوت)

03-10-2013 09:45 AM
مش خلاص (حاينقذوهو؟)نقذا نقذا
عدا نقدا ؟


#606541 United States [orass]
5.00/5 (1 صوت)

03-10-2013 09:45 AM
خبار تنفيذ توجيهات السيد الرئيس بخصوص ملف خط هيثرو شنو ؟؟؟؟؟

بالله يا جبرة ما قالوا ليك ؟؟؟؟ النائب العام غرق !!!!!!!!!!!!!!
عليه العوض ومنو العوض يا خوي - عظم الله أجركم في البلد كلها.


#606533 United States [ابوعبدا]
5.00/5 (1 صوت)

03-10-2013 09:42 AM
استاذ جبرا لا تتفاءل بهذه التوجيهات


#606524 United States [ابو بطن فاضية تكركر]
5.00/5 (3 صوت)

03-10-2013 09:40 AM
الله ينصرك وينصر دينك انت رجل ما قصرت في حق الشعب السوداني ناضلت وجاهدت بالكلمة


#606506 United States [Fato]
5.00/5 (1 صوت)

03-10-2013 09:28 AM
متعك الله بالصحة والعافية أخى الصحفى الهمام/ الفاتح جبرة والله أنت عارف الجماعة ديل ما ينفع معاهم ألا واحد عكليت يبقى ليهم فى رقبتهم لايهمه تهديد ولا وعيد ولا شوية شفع صيع(ناس الأمن)وقلة أدبهم.أستمر أخى الفاتح فى هذا الملف عشان نشوف اخرتهم هل بقدموا التماسيح الكبار لمحاكمة علنية أم الأمور تبقى دغمسة فى دغمسة وكمان عايزين نسمع رأى علماء السلطان فى هذا الموضوع خصوصا الكرور(الكارورى)وعصام البشير وعبدالحى برادوأهو منتظرين نهاية الفلم.


ردود على Fato
United States [عبداللطيف] 03-10-2013 04:04 PM
بالله شيخ عبدالحي راكب برادو بالغت يا شيخنا وين التقشف وين السنة وربط الحجارة صحي علماء سلطان


#606504 United States [ايوب شرفي]
5.00/5 (1 صوت)

03-10-2013 09:27 AM
احييك جبرة لو باريت الناس دول المساحة كولة راح تكون كسرات اللة يعين الشعب الفضل مع دوول


#606465 United States [أرنيك 15]
5.00/5 (3 صوت)

03-10-2013 08:32 AM
ياعمو الموضوع ده ادغمس خلاص الرئيس خو سبب الفساد وهو راس الفساد والكذب العيب في الرأس شخص الفساد في إخوانه وزوجته وخاصته ونفسه فلاتعشم في محاسبة أو محاكمة ده كلام بتاع تنفيس عن الموضوع انا الرئيس ده والله عارفه ذي جوع بطني ده لابهش ولابنش


الفاتح جبرا
الفاتح جبرا

مساحة اعلانية

تقييم
9.54/10 (7 صوت)




الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة