المقالات
السياسة
ارشيف مقالات سياسية
إسرائيل والجراد الأبابيل ... الله أكبر ... السودان يرد
إسرائيل والجراد الأبابيل ... الله أكبر ... السودان يرد
03-12-2013 08:14 AM

ظلت دويلة بنى صهيون التى هى حتماً الى زوال تبرطع وتفنجط فى سماء ترابنا الوطنى ضاربة بعرض الحائط كل التحذيرات التى كانت تترى عقب أي هجوم تشنه هذه الدويله على جمهورية السودان . وعندما أعلن الناطق الرسمى بإسم الحكومه الدكتور أحمد بلال عثمان أكثر من مره بأن السودان يحتفظ لنفسه بحق الرد فى الزمان والمكان المناسبين سخر العديد من المعلقين وخبراء الإستراتيجيه فى العالم من هذه التصريحات وأعدوها بمثابة ذر للرماد فى عيون الشعب الذى لا يدرى الى الأن بإي ذنبٍ قٌصف . بيد أن قيادات جمهورية بنى كيزان كان لديهم فهم تأصيلى فى الرد على البغيان مستندين فى ذلك الى شيمة العفو عند المقدره فالإمكانيات الماديه المخبؤه والجاهزيه القصوى التى ظلت عليها قوات ومليشيات الجمهوريه كانت تنتظر مجرد إشاره لمسح دويلة بنى صهيون من على ظهر البسيطه . وبتلويح الحكومه باللجوء الى إستعمال سلاح السواطير المحرمه دولياً إرتعدت فرائض دويلة بنى صهيون ولجأت لحيل حربيه أخرى وإنتقلت لتطبيق الخطه (ب) وهى حرب الجراد ! . فميزان القوه فى هذه الحاله الساطوريه تميل كفته لصالح بنى كيزان وذلك قياساً على نسبة السكان ونوعية السواطير نفسها والتى لم يخترع العالم مضادات أرضيه أو جويه لها حتى الأن ، عدد سكان الدوله العبريه سبعه ملايين نسمه ، منهم أثنين مليون عربى فلسطينى ومليون ونصف يهودى حبشى ونسبه مقدره من العرب والمسلمين والدروز وبعض المهاجرين الروس وهؤلاء وبحسب التوراة خارج دائرة التصنيف اليهودى . بخصم هؤلاء ستجد نفسك فى مواجهة حوالى أثنين مليون صهيونى أصلى ! هولاء أنفسهم أخصم منهم نسبة الأطفال والعجزه والمعاقين والذين يعانون من الأمراض النفسيه والمنضوين سراً تحت لواء حزب المؤتمر الوطنى الأُممى الحاكم وبعض المتعاطفين مع الحركه الإسلاميه والنساء والمخنثين الذين لا يمكن الإتكال عليهم فى مثل هذه الحالات . عليه سوف ستجد قوات دولة بنى كيزان نفسها فى مواجهة بنيامين نتنياهو وتسيبى ليفنى وكم مجنده إسرائليليه كده لا أكثر . يعنى بإختصار يمكن لشعب جمهورية بنى كيزان ومليشياتها المليونيه إجتياح أسرائيل ( كدارى !) ، وفى هذه الحاله وبقوات السواطير المحموله أرضاً والمزوده بحوالى عشرين مليون جوز ( مركوب فاشرى الصنع !) ينتعلها عشره مليون مجاهد ، وسكين ! دايرالها ضراعاً قوى ! ( هاك جون سينا ده !) وكم سفروك وباسطونه أو عصايه من نوع ( أم كرتبو !) المحرمه دولياً أيضاً ، بهذا العتاد الحربى المهول سوف تحتاج قوات بنى كيزان الغازيه لحوالى سبعه ساعات ، سبعه ساعات فقط لاغير منها ثلاثه ساعات تكبير وساعه ونصف تهليل ومثلها للهجوم ثم الساعه الأخرى المتبقيه فهى للتمشيط وإعادة التنظيم ! وبعدها لو وقعت عيناك على يهودى واحد يتنفس أو حياً يمشى على قدمين ( تٌف لى فى وشى !!) ... الله أكبر ... على باليمين إن إسرائيل قد دنا عذابها .
ما أوقف هذا السيناريو المرعب وقوف دول عديده فى العالم يهمها بقاء دويلة بنى صهيون على قيد الحياة ، لذلك فقد هرعت الدبلوماسيه العالميه متجهة صوب العاصمه السودانيه الخرطوم لتهدئة الخواطر وإرغام جمهورية بنى كيزان على ضبط النفس وترك مساحه للسلام وترجتها أن لا تنزلق لأتون مواجهة غير متكافئه سوف تغضب الله وتثير حفيظة العالم على أثر حرب الإباده الشامله التى كانت ستقوم بها كتائب السواطير . بيد أن إسرائيل التى لا تستبين النصح إلا ضحى الغد وهى الدويله اللئيمه ما لبثت أن هاجمت فى الأيام القليله الماضيه أراضى دولة بنى كيزان بجيش جرار من الجراد الصحروبرى ماىئ . جراد تيتاوى الإسرائيلى أفنى وأباد محصول سنه . وأحق أضراراً فادحه بمحاصيل بنى كيزان لدرجة إن سعر الرغيفه قد وصل فى بعض الولايات الى جنيه سودانى كامل . كان يمكن لهذه الخدعه اليهوديه أن تمر على إعتبار إنها غضب ربانى على التمور التى تستخدم فى الصناعات التحويليه والتى تعد خصيصاً للإستهلاك المحلى وتغطية النقص فى الوارد من الحبشه إلا إن عبقرينو الفيلد مارشال صحفى أركانحرب والخبير الإستراتيجى فى مجال الحرب غير التقليديه الدكتور (ماحى الدين تيتاوى ) لم تنطل عليه هذه الحيله وكذلك لم يقتنع أبداً بإن هذا الدمار قد نجم عن شراره من ماكينة عامل لحام ! ( لم توضح الجهات المسؤوله إن كان هذا اللِحام لحام بارد ولا ستلين !! ) وبمجرد علمه بنبأ غزو الجراد ووصوله الى أراضى الولاية الشماليه بالذات كان سيادته يشير بأصابع الإتهام الى غريمه اللدود بن جامين نتن ياهو والذى كان ( طيش الفصل ) فى مدرسة ذات النطاقين فى الشماليه قبل أن يهاجر الى إسرائيل ويصير رئيس وزراء ! وعلى طريقة ( على هامان يا فرعون ) أصدر الفيلد مارشال صحفى ومهيب ( ركن ) الصحفيين فرماناً فى شكل مقال أشار فيه بوضوح تام الى دولة بنى صهيون متهماً زميل دراسته السابق وطيش الفصل الحاقد على الولاية الشماليه نتنياهو بالضلوع فى هذه الهجمات وعلى أثر تلك الإتهامات الصريحه حركت دولة بنى كيزان خبراء فى هذا المجال وصدرت لهم أوامر تحرك الى مناطق العمليات . فور وصول هذه القيادات الى الى الصفوف الأماميه للقوات المرابطه هناك وبعد الإطلاع والمعاينه الميدانيه عقد فريق التفتيش القومى مؤتمراً صحفياً طارئاً أكد فيه وبالمستندات صحة الإتهامات الموجهة لدويلة بنى صهيون مستندين فى ذلك الى إن ( تفويج ) و (تشوين ) قوات جراد بهذا الحجم (عشره مليار جراده بنات حُفره !) كما قال ... تقنيه لا تتوفر إلا لإسرائيل . هذا وفى السياق ذاته فجر رئيس فرق التفتيش والمعاينه مفاجأه من العيار الثقيل متهماً المنظمه الأمميه ( الفاو) بالضلوع فى عمليات تجسس واسعة النطاق داخل الحيازات الزراعيه السودانيه ! وزاد !!! ( أنا مش عارف الصحفيين ديل العباره المسيخه دى جابوها من وين !!) ( قدونا بيها قد فى الصفحات الإخباريه للصحف التى صارت أرهف من الرغيف ) !! وزاد المهندس أركانحرب قائد فريق التفتيش بإن الفاو لم تكتفى بذلك فحسب بل زودت أسرائيل بمعلومات حساسه للغايه تتعلق بشفرة الإطلاق الذاتى للمبيدات الأرضيه لوقاية النباتات الشىء الذى أدى لتكثيف التشويش على عمل منظومة حركة طائرات الرش بدون طيار وظلت مرابطه فى قواعدها لحين إنتهاء موجة الغارات الجويه لأسراب الجراد التابع لقوات العدو ! على أثر هذه الإيضاحات الهامه للغايه تحركت كتائب الردع الإلكترونى والمتخصصه فى رصد الإنتهاكات الصحفيه والإعلاميه الجسيمه ضد حكومة الكيزان وتحولت مهامها وتحت إشراف الخبير الأممى ملك ملوك التنظير وعميد الصحفيين العرب الفيلد مارشال ماحى الدين ليقود جحافل المقاومه بنفسه إنطلاقاً من غرفة عمليات ألوية الردع الإلكترونى ... وبواسطة تقنيات فائقة الحساسيه تم التحكم فى منظومة الأقمار الصناعيه الموجهه للجراد وتغيير شفرة الإتجاه من الشماليه الى تل أبيب !! التغيير المفاجىء للخارطه اللوجستيه أربكت بعض الأسراب فتوجه جزء منها الى مصر وبالذات الى العريش وسيناء والضفه الغربيه والجولان ونهر الأردن والتى طلبت تفسيراً عاجلاً من حكومة دولة بنى كيزان لهذا العمل العدائي وفى الوقت الذى باتت فيه أسراب الجراد الأبابيل على مشارف دخول أجواء دويلة بنى صهيون وبإتخاذها الأن للوضع الهجومى وإعادة الإنتشار بغية إكتساح دويلة بنى صهيون لجأت السلطات هناك الى إعلان حالة الطوارىء وطلبت من المواطنيين الدخول الى المخابئ . ويقول شهود عيان فضلوا حجب هوياتهم إن مقدمة الطلعات الجويه للقاذفه السودانيه الرهيبه سارى الليل قد بدأت بقصف مواقع التحكم والسيطره وضرب خطوط الأتصالات لعزل القوات الإسرائيليه عن غرفة العمليات وقطع خطوط العدو ... وزادت !! تلك المصادر إن صافرات الإنذار دوت أرجاء تل أبيب سته مرات هذا المساء دون أن يتثنى لها معرفة الوضع على طبيعته نظراً لتكتم السلطات هناك والتى يقال إنها قد طلبت المساعده من بعض الدول العربيه الشقيقه بالتوسط لدى حكومة بنى كيزان لوقف هذا العدوان الغاشم الذى تتعرض له دويلة بنى صهيون وإن الرئيس المصرى المنتخب محمد مرسى قد رد عليهم بالقول إنه بالفعل قد أجرى إتصالات بهذا الصدد مع العديد من النافذين فى دولة بنى كيزان وإنهم قد طلبوا منه الإتصال بالفيلد مارشال صحفى الدكتور ما حى الدين تيتاوى القائد الميدانى وأمر السرب للتفاوض معه بهذا الخصوص وعندما فعل جاءه الرد الألى بإن هذا المشترك لا يمكن الوصول إليه حالياً ولترك رساله إضغط نجمه عند سماع الصافره ومن ثم أبدأ فى تسجيل الرساله وقال مرسى أيضاً إنه وبالرجوع مره أخرى لتلك القيادات النافذه وإبلاغهم بإن ماحى الدين لا يمكن الوصول إليه حالياً قالوا له ( خلاص حاولوا مره تانيه ) !! يمكن الشبكه طاشه ! ولأن مرسى لم يفهم حتى الأن كلمة الشبكه طاشه هذه فقد عدها تنصل ورد دبلوماسى ليس إلا من قيادات بنى كيزان فما كان إلا أن أبلغ نتنياهو بذلك مضيفاً ( أُكلوا ناركم !!)

ياسر قطيه
[email protected]


تعليقات 9 | إهداء 0 | زيارات 1700

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#609244 [عصام الجزولى]
5.00/5 (1 صوت)

03-13-2013 10:00 AM
ياقطية هو جراد يونيو89 خلى حاجة لجراد فبراير2013 بعدين مادلالة تصريح لسيد رئيس مكافحة الجراد الذى قال فيه ان أول مزرعة دخلها الجراد هى مزرعة وزير الزراعة المتعافى ؟ هل يريد أن يؤكد لنا كلام تيتاوى بأن الجراد مرسل من اسرائيل فعلا ؟؟


ردود على عصام الجزولى
United States [ياسر قطيه] 03-15-2013 03:52 AM
ههههههههه والله يا ود الجزولى إنت حاكيها حك مع الجماعه ديل ، تصدق أنا حكاية أول مزرعه دخلها الجراد هى مزرعة المتعافى دى فاتتنى ههههههههههه والله إنت زول مصيبه ولو داير يؤكد لينا أنو الجراد مرسل من إسرائيل يا الجزولى يكون المتعافى ده عندوا مشكله مع نتنياهو لما كان فى الشماليه ولا كيف ؟ أشكرك يا صديقى على هذه اللفته الرائعه فى تعليقك يمكن ربنا يلهمنا نكتب فيها مقال ونهدى ليك هههههههههه شكراً عصام .


#609134 [خالد نجم لدين]
5.00/5 (1 صوت)

03-13-2013 06:07 AM
شكرا السيد ياسر .. اشير الي رد اخونا ..انا سوداني .. فعلا انا قرات المقال بعد اتصال من الاخ طارق عثمان ولديه مداخله في موضوع سابق للسيد ياسر بهده الصفحه.. ولظروف عمل اخونا طارق وعدم تمكنة من التعليق علي المقال اعلاه ..طلب مني التعليق كما ورد سابقا.. وانا في خاطري الاخ طارق سهوا كتبت اسمه بدلا عن الاخ ياسر ..ويعجبني اكثر كما وضح الروح العالية للاخ ياسر ورده علي التعليقات .. مع كل الود لرواد الراكوبة ..


ردود على خالد نجم لدين
United States [ياسر قطيه] 03-15-2013 03:46 AM
أسعد الله مقامك حيثما كنت أخى خالد والتحيه عبرك موصوله لأخى وصديقى طارق عثمان وأنا فى الحقيقه أشكر الأخ طارق الذى وجهك لقراءة المقال أياً كان فقد أكسبنى قارئاً بوزنك ودماثة خلقك وهذا هو ما يحفزنا للمضى قدماً فى كتاباتنا والتى هى محل رفض وقبول وكذلك محل شد وجذب وهذا هو الإعلام التفاعلى الذى نصبوا إليه ووفرته لنا هذه الصحيفه الرائده الراكوبه يسعدنى للغايه التواصل مع الشباب وإختلاف الرأي لا يفسد للود قضيه فنحن فى النهايه أهل بيت واحد لكن ما يغيظك أنو واحد بيكتب مسطول بالصاد وينتقدك !! يا أعرف أكتب عشان تعرف تقرأ ودى علتنا فى الكويزات الصغار ديل ثم يخش فيك واحد شمال زى عمك سودانى ون ده وهو يكون ليهو شهر مسطح لا عارف جراد ولا بعوض ولا الحاصل شنو ذاتو ويشبكك بالله قطيه ده منو!! فى ناس بيرفعوا ضغطك للأحمر لأنو بيكون الكاتب قاصد حاجه وخيوطها مربوطه مع بعض وده يجيك داخل توووووش بلا إحم ولا دستور ... لكن نسوى شنو يا أخوى يا ها دى مهنة البحث عن المتاعب . ونلتقى


#609041 [خضر عمر إبراهيم]
5.00/5 (1 صوت)

03-13-2013 12:20 AM
يا ياسر أخوي الجراد دة سارية ون ؟ صنع في سارية تحت الأرض ولا جياد؟
عشان كدة العربية جياد الكورية وقفت. ومنتشرين الصينية. ،،، لكن اقوليك،،، الجراد دة باين عليهو صيني. عشان كدة ارتد علي المصدر هههههه
الرسالة الجاية سرب وطاويط. وكمان ديجتال


ردود على خضر عمر إبراهيم
United States [ياسرقطيه] 03-13-2013 05:00 AM
ههههههههههههههه والله يا خضر يا أخوى ضحكتنى وأنا فى قمة الدبرسه الله يديك العافيه خففت علي كتير والله وربك يستر زى ما قلت من سرب الوطاويط الديجتال ههههههههههههه . ياخى عمك تيتاوى فضحنا مع العالم ولو دخلت على المواقع الإسرائيليه تجدها محتفيه بمقاله الجرادى داك وهم ميتين من الضحك إذا كان ده زول صحفى ليهوا قرابة الخمسه وتلاتين سنه فى الصحافه ونقيب الصحفيين كمان والأدهى والأمر إنو حامل لفب دكتور ؟ قال الجراد ده تكون مرسلاهوا إسرائيل قال . ههههههههههههههههه دنيا يا خضر يا أخوى وشكراً على مرورك الذى أثلج صدرى .


#608774 [Abu Adeela]
5.00/5 (1 صوت)

03-12-2013 04:26 PM
الله أكبر (السبابة مرفوعة).
أيوه كده . لازم نلقن العدو الصهيونى ومن وراءه امريكا درسا لن ينسوه . تحسبو لعب ؟
نحن فى دولة بنى كيزان صاحين ومصحصحـين ومفنجلين عيونا, ضبانة ساكت ماتقدر تخترق حرمة سماءنا سيبكم من جراد.
العالم دى فاكرين عبدو ابوريالة نايم ولا شنو؟


ردود على Abu Adeela
United States [ياسرقطيه] 03-13-2013 05:07 AM
هلا هلا بالفارس المغوار أبو عديله ههههههههههه أيوه صحصحوا معانا شويه عشان نقدر نحرس البلد دى كويس وفنجلوا عيونكم زي ما قلت لأنو الدفاع بالنظر ده داير ليهو عين حاره ههههههههههه أشكر لك مرورك وتعليقك الظريف الذكى والناس ديل خلونا بقينا ملطشه للعالم ، جراد إسرائيلى ، وطيارات طافيه أنوارها ، وضربونا وقت صلاة العشاء !!! وجهاز تجسس هديه من منظمة الفاو وغايتو ... جنس عواسه يا مان ، الله يطولك يا روح .


#608707 [hamid]
5.00/5 (1 صوت)

03-12-2013 03:11 PM
الله يجازي شيطانك يا قطية حلوة تنزع الإبتسام من مجموع المأساة التحية لماحي العقل و التعقل طوط طاوي


ردود على hamid
United States [ياسرقطيه] 03-12-2013 07:41 PM
الله يطول لى عمرك يا حامد وطوط طاوى دى فقعت مرارتى من الضحك ... أشكرك على مرورك الجميل . أحياناً شر البلية ما يضحك يا أخى .. ودمت .


#608493 [حجو]
0.00/5 (0 صوت)

03-12-2013 11:39 AM
كاتب مصطول ليس الا..........


ردود على حجو
United States [ياسرقطيه] 03-12-2013 07:33 PM
مسطول بالسين يا مان وليس مصطول يا عمك إنت قريت مرحلة الأساس وين ؟ الظاهر عليك كويز ساكت وكويز على وزن فعيل وهى تصغير للكوز ههههههههههههه هاك ( الصطله دى)


#608421 [Ana Sudani]
5.00/5 (1 صوت)

03-12-2013 10:46 AM
سبحان الله
ى اخوانا قطية دا منو وهو أصلا ظريف ولا بستظرف ولا الحاصل شنو بي الضبط....
دا شنو الهرج والمرج الكاتبه الراجل دا؟
ياخ احترم إنه في عقول منتظره كتابات هادفة مش مسخ .... نحن الفينا كتير وما ناقصين ظرافة...
لو عندك مشكله قلت عاوز تحلها في قالب فكاهي كما يفعل الاستاذ القامة جبرا يكون خير وبركه وهو أسلوب من أساليب النقد المتبعة والبتنفس عن الناس
لكن الواضح إنه إنت المشكلة في حد ذاتها مامحدد ملامحها شنو عشان تجي خاشي لينا في قالب الظرافة طوالي كده..
في الحالة دي بضيع القضية الأساسية ... كما فعلتها الأن في عمودك ...
اتق الله فينا ياخ واحترم عقولنا برضو.... واعرف أنه قضايانا أكبر من شكل الكتابة بي الطريقة دي


ردود على Ana Sudani
United States [ياسرقطيه] 03-13-2013 05:26 AM
يا أخونا سودانى ... قطيه ده هو ياسر ضيين محمد قطيه العبد الفقير الى الله سبحانه وتعالى ومن أهالى ولاية شمال كردفان نواحى الأُبيض . شغلى ياهو البضاعه المعروضه قدامك دى وشكلها كده ما عاجباك لأنك ما أشتريت لحدى هسه ... مدير مكتب صحيفة أجراس الحريه بولاية شمال كردفان وما زلت رغم إنو الجريده شلعوها جماعتك ناس كمال عبيد وعبيد مروح قبل إعلان الإنفصال الرسمى لدولة الجنوب بسته ساعات ! أكتب الأن حصرياً لهذا الموقع الرائد وأعمل فى الوقت عينه فى صحيفة القرار ... عمرى المهنى فى دهاليز الصحافه 25 سنه ولسه بعتبر نفسى فى أول السكه ، أرجع لما كتبه قريبك تيتاوى عن غزو الجراد الإسرائيلى للسودان قبل حوالى عشره أيام شكلك كده راكب من نص السكه ففى هذا المفال رد على تيتاوى وعلى الجراد ذاتو لأنو رجع هاجم إسرائيل . شوف الراكوبه عدد أمس والصور المرفقه مع التعليق كده حتفهم شويه أنا قاصد شنو ، بعدين يا أخوى متعب روحك معانا مالك ؟ تانى لو مر عليك مقال بإسمى إتجاوزوا طوالى عشان ما نرفع ليك ضغطك ساكت مع ذلك أكرر لك شكرى وتقديرى رغم ردة فعلك العنيفه تجاه مقالى الساخر المتواضع

United States [ياسرقطيه] 03-12-2013 07:38 PM
أسعد الله مساءك يا سودانى ... محسوبك قطيه سودانى برضو زيو زيك واحد وفى الحقيقه أنا بستظرف ومعليش ياخى أنا أتفهم قضايكم الجاده ومتأسف إذا حاولت أخفف دمى فى الظروف الصعبه دى ، خلاص المره الجايه نكتب ليكم فى قضايا جاده ... مافى هزار تانى ..... شكراً لنقدك المهذب البناء ( أنا جادى والله )


#608352 [خالد نجم الدين]
5.00/5 (1 صوت)

03-12-2013 09:48 AM
برافو .. السيد طارق مع كل الود ..


ردود على خالد نجم الدين
United States [ياسرقطيه] 03-12-2013 07:46 PM
يا خالد صحبك سودانى ون ده شايفو صحح ليك الإسم يعنى مبارينا مبارينا وياسودانى أنا أسمى طارق يا أخى وخالد ده زول صحبى وبيعرفنى كويس يعنى أنت مصر تسمينا من جديد والله الواحد حقو يحول شريحتو لـ إم تى إن .

United States [Ana Sudani] 03-12-2013 01:25 PM
يا باشا اسم الكاتب ياسر وليس طارق
شكلك قريت عمود لي زول اسمه طارق عشان كده قلت برافو لانه لو كنت قريت المقال أعلاه للاخ ياسر قطية ما كان قلت البرافو القلتها دي.... ودي


ياسر قطيه
ياسر قطيه

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة