ما كنا كويسين
03-18-2013 10:16 AM


رسالتان وصلتي علي بريدي في نفس اليوم والغريب في الأمر أنهما تتحدثان عن نفس الموضوع مع إختلاف الأمكنة !
الرسالة الأولى (تحرش محلي) :
السلام عليكم .. والله ياعم الفاتح (واسمح لي اقول ليك عمو) ماعارفه زاتو ابدا من وين بس البقدر اقولو إنو نحنا في مشكله حقيقية في مشكله .
انا نشأت في بيئة مسالمه نقيه بسيطه انا وابوي واخواني من ناحيه دراسه كنت متفوقه وممشيه حالي ودخلتا الحياة العمليه اشتغلتا تبع الحكومه لأفاجأ بي حاجة غريبة وهي مسألة التحرش الجنسي .. زميلك في العمل عاوز يتحرش بيك .. رئيسك المباشر عاوز يتحرش بيك .. المدير (ذات نفسو) عاوز يتحرش بيك !!
حاولت اشتغل تبع كم مؤسسه سودانيه خاصه في داخل الانترفيو ومقابله العمل كنت بتعرض لعرض يا اما اقبل اني ابيع شرفي ويشغلوني يا اما انسي الفكره وكنت دايماً ببين اني قوية وبنتهي الموضوع باني بترفض
صبرت واتجهت للعمل في المنظمات الاجنبيه للاسف والحمدلله اموري ماشه وبتعرض بعد مرات لي حاجات زي دي بس برفض بي عين قوية لانو الناس دي بتقدرني لي كفاءتي ما لي حاجه تانية وقررت ابداً ما اشتغل في منظمة حكومية ومنعول ابو المعاش والتامين الصحي
بس بقت المشكله في المواصلات كل يوم انا بتعرض للتحرش بطريقه ما في المواصلات والله ياعمو جبرا انا ماسمحه السماحه ديك وبلبس محترم وكان ركبتا امجاد المرتب بخلص دا غير قصة جارتنا الاختطفا ولد قبل شهر بي امجاد ولمن قبضو بالع حبوب مخدرات) بتاعه هلوسه اسمها اكسسي )
مره كده قلتا إحتمال أنا بتخيل الكلام ده قمتا فتحتا الموضوع مع صاحباتي لقيت عندهم نفس المشكلة الناس يا عمو الفاتح ليه بقت ما بتخاف الله ومهووسه جنسياً كدا ليه؟
ونحنا البنات ديل هينين الاطفال العمرهم عشرة وخمسه وسنتين ديل ذنبهم شنو؟
غايتو أنا دي شخصياً كان عرستا بناتي قبل اولادي من سنتين بعلمهم كراتيه وكونفو وأي عنكبه طوالي كاسوري .. عشان نحنا ماناقصين ازية
وربنا يخليك لينا ... وطمنا صحتك كيف ؟
بتك مودة

الرسالة الثانية : (تحرش عالمي)
السلام عليكم يا استاذ
أنا واحدة من المعجبين بمقالاتك والتي أتابعها من خلال موقعك على الفيسبوك ، ما دفعني للكتابة لك شجاعتكم الملاحظة في محاربة الفساد بكل أنواعة والوقوف مع الحق ، القصة التي سوف أرويها لك تتعلق بنوع آخر من الفساد وللأسف من شخص يدعي تمسكه بتعاليم الإسلام والإنتماء لأحدي أحزابه.
القصة عن دكتور طبيب إسمه (..........) كان يعمل مستشاراً في السودان ً قبل أن يحضر إلى المملكة المتحدة ويقيم فيها منذ سنوات ، هذا الشخص يقوم بإغواء وأغراء الفتيات السودانيات اللواتي يعشن في المملكة المتحدة عارضاً عليهن خيارين إما أن يتزوجهن زواجاً سرياً وإما أن يقمن معه علاقة خاصة
وهو في ذلك يستخدم حيلاً وأساليب كثيرة غير آبه بسمعتنا كسودانيين بل غير أبه بكونه ينتمي لتيار إسلامي يتحدث المنتسبون إليه عن مكارم الأخلاق وفضائلها .
لقد حاول هذا الشخص التحرش بصديقة لي لكنها رفضت أي نوع من التقرب والتحدث الشئ الذي جعله يبدأ في مضايقتها وتهديدها بعدم التحدث عن الموضوع لأي شخص كان .
للأسف الشديد يا أستاذي فإن هذا الشخص له مكانته هنا والتي من الممكن أن يستخدمها للضغط على كل من لا تلبي رغباته الدنيئة .
أستاذي :
أرجو منك تعرية هذا الشخص وفضحه وطرح هذا هذا الموضوع بالشكل الذي تراه مناسباَ ، يجب أن ألا يهرب هذا الشخص من جرائمه التي إرتكبها ولا يزال وأضعف الأيمان ان تتم تعريته هذا إن لم يكن هنالك مجالاً لعقابه علي ما فعله .
عفواً يا استاذ : صديقتي الآن تعيش ظروفاً نفسية سيئة وهي خائفة مما يمكن أن يفعله بها هذا الشخص من أذى بعد تهديده لها بعد أن رفضت عرضه الدنئ .
أشكرك يا أستاذ وإذا أردت أي معلومات أخري .. أرسل لي .. تحياتي
إبنتك (س)
كسرة :
حليل مقنع الكاشفات .. نحنا الحصل لينا ده شنو؟ ما كنا كويسين؟
كسرة ثابتة (قديمة) :
أخبار خط هيثرو العند النائب العام شنو(وووو وووو وووو وووو)؟
كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو؟



[email protected]


تعليقات 38 | إهداء 0 | زيارات 9181



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


التعليقات
#613638 [حسن محمد]
0.00/5 (0 صوت)

03-19-2013 01:18 PM
والله غايتو يا اخونا الفاتح جبرا الموضوع بتاع الرسالتين ديل لا يستحق النشر في راي .. وهل بسبب حاديثتين او حتي يزيد نسمي هذه ظاهرة واشهد الله اني لسنين عددا استغل المركبات العامة بشتي انواعها لم تقابلني حادثة واحدة تمت فيها معاكسة او مضايقة لفتاه بل العكس ان يتم الامتعاض والاشمئزاز من الائي يلبسن ملابس محزقة او قصيرة .. وبعدين كدي انت شويه فارق اللاتوب ده وامشي للجهات المسئولة وانت عارف انها اسمها شنو ودعم كلامك ده بمصادر وساعتها انشروها لينا عشان نقراها ونخاف علي بناتنا واخواتنا ونقول ليهم محلكم البيت لانه بره في وحوش وذئاب تنهش لحكم ..


#613588 [سادا]
0.00/5 (0 صوت)

03-19-2013 12:14 PM
السلام على الجميع
التحرش الجنسي وغيرها من ظواهر الاغتصاب موجود وممكن يكون في تزايد هذه الايام مع العلم انه لاتوجد احصاأت قديمه تثبت انه صار اكثر من الماضي لقله وسائل الاعلام في ذلك الوقت, ولكن انا ارجح انه اكثر من الزمن الماضي بسبب قرأأت اجتماعيه بسيطه على سبيل المثال الكثافه السكانيه والعطاله ومصادره الحريات وقله الترفيه والنزوح وعزوف الشباب عن الزواج والكثير من العوامل المتشابكه, ولكن علينا ان نضع احتمال اقل من 1% ان هذه الظواهر الاجتماعيه السالبه يتم تشجيعها ونشرها بواسطه الاجهزه الامنيه مثلها مثل نشر المخدرات بين الشباب وخلق دراما الصراع الديني والقبلي في المجتمع حتي ينصرف الناس عن المشكله الكبري وهي المؤتمر الوثني وانا اقول لكل الناس انا متأكد تماما بنسبه 100% ان جهاز الامن السوداني منذ بدايه التسعينات يلعب هذا الدور ليجعل الطغمة السارقة تستمر في تدمير هذا الوطن.


#613547 [العوض]
0.00/5 (0 صوت)

03-19-2013 11:39 AM
الاخ الفاتح جبره - بماأن عمودك من الاعمدة الاكثر شعبية وبخصوص هذا الموضوع انا بقترح الاتي . ان تقوم اي طالبه عمل بتسجيل صوت المقابله - الانترفيو - في جهاز جوالها وهو داخل الشنطة . وعرض التسجيل علي الراى العام في احدى برامج المحطات الفضائية واعاده البرامج وبث التسجيل عدة مرات لفضح المخالفين والمتخلفين .... وعلى الحكومة وزارة العمل ومكتب العمل والنيابه العامة ان كانت تحمي الحقوق العامة بان تعمل كمائن لكل الوظائف المعلنة بهدف ضبط المارقين والذين يستغلون نفوذ المنصب في تحقيق مصالح شخصيه وووووو .وحتى لانلقي التهم جزافا ونضر بسمعة ناس طيبيين وربما يكون العكس بان طالبه العمل هي من حاولت اغواء الموظف المختص لقبولها للوظيفة والا ..... وحتى نكون منصفين للطرفين المدعي والمدعى عليه ... وحمايه الحقوق العامة والشخصية ... وهذا ليس بالعمل الصعب اذا كانت هنالك إراده ... والا على السودان السلام ...


#613540 [مظاليم الشعب]
5.00/5 (1 صوت)

03-19-2013 11:36 AM
نحنا قوماً اعزنا الله بالاسلام وان ابتغينا غير الاسلام اذلنا الله يجب ان يعي كل انسان هذة العبار انا في نظري الانسان الملتزم يحفظة الله وان كان نايم في العراء وممالا شك فية كثرة الفساد تولد الفاحشة والعارنسال الله السلامة والعافية لبناتنا(المسلمات) في كل العالم


#613480 [فهيمه]
0.00/5 (0 صوت)

03-19-2013 10:44 AM
أستاذنا الجليل جبرا الكسرة الثانيه دي احسن تشيلها وما تحرج الراجل اكثر لانه احراجاته كثرت وقراراته ألما بتتنفذ بالكوم وهو عارف كده بس جبر بخاطرك عشان تبعد من المطالبات المشروعه البتفتح عليهو نار جهنم وكل زول ثاني يقول مابدفع الا باورنيك وكده تقفل باب الماكله العايشين عليهو الجماعة دي عشان كده طبطبو عليك وما افتكر الحكايه بتمش اكثر من كده وان كنا تتمني ذلك ...لك الود


#613465 [خالد]
0.00/5 (0 صوت)

03-19-2013 10:32 AM
نحاسب الكيزان ب الشريعه ونشوفن سو فيهاشنو وهى حجتنامعهم فهم من يستغلون حوجه الفتاه للعلم ومن ثم العمل وهذا مدخلهم للتحرش


#613363 [سودانية]
0.00/5 (0 صوت)

03-19-2013 09:16 AM
يا اخواتي سجمنا والمرفعين كجمنا


#613332 [hanankokoabas]
0.00/5 (0 صوت)

03-19-2013 08:41 AM
التحية لك الفاتح والله بناتك ديل كان الله فى عونهن الحاصل شنو ؟ ياربى ديل ما انحنا ولا شنو ؟كسرتك الاولى احسن تعكسا وتكون كاشف المقنعات ولا تكون كاشف المقنعين


#613186 [الهبار]
0.00/5 (0 صوت)

03-18-2013 11:59 PM
انا معاك ياBABA انو قصة بت لندن مفبركه وقصة بت السودان حقيقيه لانو الاخلاق فى السودان انعدمت ياجماعه اما فى بريطانيا واروبا فى مثل هذه الحالات مكالمه تلفونيه للشرطه تجى فى اقل من دقيقه وتكلبشو وترميهو فى السجن ياخى هناك فى الدول ديك لو لمحته ليها بس تلميحه ممكن تتصل وتقول الزول تحرش بى ويصدقوها


#613129 [محمد]
0.00/5 (0 صوت)

03-18-2013 10:15 PM
والله يا جبرة الله يعينك

انا خايف بعد شوية الصفحة البتكتب فيها دي يبقى نصفها كسرات

كل يوم مئات الفضائح والقضايا

والرئيس اضان الحامل طرشا


#613073 [زول]
0.00/5 (0 صوت)

03-18-2013 09:21 PM
بصراحة واقع السودانى ليس كما كان فى الماضى نعم ليس كل الماضى كان جيدا لاننا كنا سذج والناس تقول لينا انتم طيبيين والان اصبحنا وحوش كاسرة على النقيض لان الاوضاع السياسية فى هذا العهد مهد للكثيرين بان يصبحوا وحوش وهكذا اصبحنا كلنا فى الهوى سوا علينا ان ننتظر الى اناس محترمين وعندهم اخلاق يفكونا من الانقاذيين الذين هم من مهدوا لكل من يريد ان يفسد


#613060 [عصمتووف]
0.00/5 (0 صوت)

03-18-2013 08:59 PM
اسم الزول المتحرش منو (و)


#613057 [عصمتووف]
0.00/5 (0 صوت)

03-18-2013 08:55 PM
لقصة عن دكتور طبيب إسمه (..........) كان يعمل مستشاراً في السودان ً قبل أن يحضر إلى المملكة المتحدة ويقيم فيها منذ سنوات ، هذا الشخص يقوم بإغواء وأغراء الفتيات السودانيات اللواتي يعشن في المملكة المتحدة عارضاً عليهن خيارين إما أن يتزوجهن زواجاً سرياً وإما أن يقمن معه علاقة خاصة



أرجو منك تعرية هذا الشخص وفضحه وطرح هذا هذا الموضوع بالشكل الذي تراه مناسباَ ، يجب أن ألا يهرب هذا الشخص من جرائمه التي إرتكبها ولا يزال وأضعف الأيمان ان تتم تعريته هذا إن لم يكن هنالك مجالاً لعقابه علي ما فعله .

اسم الدكتور محذوف اولا من حذفة جبرا ولا سين غير معروف الخواجات لو زوجته ادعت علية بانه يتحرش بها جنسيا واطاتوا اصبحت قوانين الشريع بالنسبة له ارحم وهنا الفضيح بتسوي شنو زول عائش بره وليس له سلطان حتي لنفسة انت جبانة وصديقتك اجين منك امشوا الشرطة عشان يشرطوا شرط بقوانينهم انت قائلة عندهم زول كبير برلسكوني مسحوا الواطه به الامثلة كتيره تل ابيب واشنطن بتاع البنك الدولي هناك الكاميرا لا ترمش مستعدين لنشر الفضائح


#613039 [ابن حلايب]
5.00/5 (1 صوت)

03-18-2013 08:30 PM
عن قصة الطبيب الموجود فى لندن القانون فى المملكة المتحده يعاقب المتحرش مهما كان التحرش بسيط عقاب ليس هينا و معه فضيحه فى كل و سائل الاعلام و لا يوجد أي شخص فوق القانون حتى لو من العائلة المالكة . القصة دى مشكوك فيها !


#612922 [محمد]
4.82/5 (6 صوت)

03-18-2013 04:59 PM
أنشاء الله وقعتنا تبقى على العدو.
زماااان أولاد التجار الكبار فى السودان كانوا مهذبيين جدا
بالرغم من قروش أهلن (طبعا مال حلال )
أسع أولاد الحرام الجعانيين ديل لموا فى قروش الحكومه دى لهط
وقبلوا على بنات الناس الله يخرب بيتكم أولاد الكلاب


#612920 [BABA]
5.00/5 (1 صوت)

03-18-2013 04:54 PM
القصة بتاعة بنت لندن لا يمكن تصديقها. اعتقد ان كاتبها شخصية وهمية
لا تعرف شىء عن انجلترا وهدفها ان توحى بان التحرش الجنسى الذى
يحدث بالسودان ايضآ موجود بانجلترا.


#612912 [Fato]
5.00/5 (1 صوت)

03-18-2013 04:48 PM
الأخ/ جبرة والله حسيت برأسى أنشطر لنصفين هل التحرش الذى ذكرته الرسالتين لبناتنا السودانيات الموجودات فى الوطن والفى خارج الوطن ومن مين ؟من سودانيين؟ للأسف أخى الفاتح فالذين أستلموا السلطة مدعى الأسلام والأسلام منهم برىء قد أدخلوا الفاحشة بدلا من الأسلام ولذا أمتلأت دار المايقوما ونزل السخط الألهى ولكن أقول لأى رب أسرة يجب تسليح بناتكم بمسدسات حقيقية ولا تخاف الواحدة منهن فالموت ولا العار والشرع الذى نعرفه يعطيهم الحق فى الدفاع عن النفس ومن لم يكن عندهم حق هذا السلاح لتتدرب على الجودو والكاراتيه كما فعلت (أخلاص برتش وسلوى مدنى ) فى فترة الثمانينات فى مدينة مدنى ومافى صايع ولد صايعة قدر يفعل فيهن شىء بل يخافوا منهن,أكيد هذا هو التوجه الحضارى الذى بشرونا به,ياجبرة الشعب أن كان به بقية من الرجال فلا بد من أن ينزلوا للشارع وكفاية وصلت للعرض فده خط أحمر دونه الموت وأنا أول النازلين لنقدم أرواحنا فداء لبناتنا وأولادنا وترخص لهم الروح.


#612903 [سوداني]
0.00/5 (0 صوت)

03-18-2013 04:31 PM
مقنع الكاشفات لا زال موجود والحمد لله ولكن ! حكي بعضهم ان هناك بت سودانية بكل أسف كانت تدرس في احدي دول اوربا الشرقية تضايق السودانيين هناك من سلوكياتها وقابلوها ونصحوها وهددوها اذا لم تلتزم في سلوكها سيبلغون السفارة. لتقوم بترحيلها للسودان تصور ردها كان شنو ؟ يا إخوانا عليكم الله خلوني وانا مستعدة كل يوم ابيت مع واحد فيكم !!! فكان ردهم الذي أعادها لصوابها
ماذا حدث لنا ؟؟؟
أتمني ان لا يياس مقنع الكاشفات وان لا نتخلي عن صفاتنا الحميدة الغيرة علي العرض رغم ما احدثه الزمن بنا*


#612877 [Abu Ahmed]
2.00/5 (3 صوت)

03-18-2013 03:48 PM
عفو تعفو نسائكم( الدين واضح ) إحفظو الله يحفظكم, والزول الشريف وعفيف وملتزم كضب لو اقدر عليهو زول (الحافظ رب العالمين)
التربية التربية هي الاساس والاب هو المسئول


#612846 [المحسى]
0.00/5 (0 صوت)

03-18-2013 03:17 PM
مااسمه ياجبرا


#612817 [واحدة]
0.00/5 (0 صوت)

03-18-2013 02:56 PM
الظاهرة دى اتفشت لانو اصلا مافى مادة فى القانون بتعاقب عليها 000الكيزان بس فالحين فى قوانين النظام العام والمفصلة مخصوص لاهانة وقهر المراة وبجلدوالواحدة وسط العلى والملى لمجرد لبسها البنطلون 0000اما اشباه الرجال البتحرشو بالحريم فاكنهم ساى ومدنهم راحتهم امعانا فى اذلال المراة وقهرها000


#612792 [قفة]
5.00/5 (2 صوت)

03-18-2013 02:30 PM
أخبار خط هيثرو شنووووووووووو
أخبار التحرش شنوووووووووووووووو
أخبار بيع التلفزيون للصين شنوووووووووووو
أخبار بيع المؤسسات الحكومية شنووووووووووووووو
أخبار شنووووووووووووووووو شنوووووووووووووووووووو
وإييييييييييييييك كترت الواوات كترة
وبعد شوية تبقى الكلمات حرف بعدو واوين حرفين بعده 3 واوات لما ربنا يلطف بينا ويجازي الكانوا السبب شر الجزاء قدر ما عملوا فينا


#612768 [خالد حسن]
5.00/5 (2 صوت)

03-18-2013 02:04 PM
في بريطانيا ويتحرش جنسيا ؟
Sexual harassment
ده عقوبته مشدده ومافي تفاهم المرأه لو قالت اتحرش بي الراجل بمشي السجن
وفي السجن لو المساجين عرفوه متحرش جنسيا بمرأه بغتصبوه هو زاتو
الكفار عندهم غيره علي بناتهم اكثر مننا لاتضرب مرا ولاتتحرش بيها ولاتغتصبها
التحرش والاغتصاب زي الكفر عندنا
البت دي ماتبلغ في الضلالي دي خلي مساجين الانجليز يغزوه برا وبحرا .. و يشوفوا شغلهم معاه


#612764 [المتجهجه بسبب الانفصال]
4.25/5 (3 صوت)

03-18-2013 02:02 PM
كنت افكر في الموضوع ده من زمان فاهل التمكين الذين باعوا حلائب والفشقة وقال زعيمهم اغتصاب مرة من القبيلة الفلانية من زول من القبيلة الفلانية شرف ليها، عقول بهذه الطريقة وكانت تعيش في فقر وفجاة وجدت القروش والسلطة في ايديها ما هو مصير بناتنا واخواتنا وبنات خالاتنا وبنات اخوانا وبنات جيرانا وقريتنا ومدينتنا وسودانا مع هؤلاء، والسلطة في ايديهم من بتاع السيكورتي الى مدراء المكاتب والمحافظين والمعتمدين ورؤساء الادارات والمحليات ومدراء الضرائب والزكوات ومدراء الجامعات والكليات الخ ممن ينتمون الى هذا الحزب الشيطاني ،،،، لا سيما أن البنت السودانية تستحي اذا تعرضت لموقف فيه تحرش سوى لفظي او غيره باخبار اسرتها بذلك وتظل تكتم ذلك خوفا من القيل والقال،، وبصراحة مفروض تطوير منظمات نسوية لمناهضة التحرش ضد النساء بكافة اشكاله سواء في العمل او الشارع وان تشرف الفتيات على مثل هذه المنظمة وانشاء فروع لها في الارياف والقرى وابعاد كل من تنتمي الى جهة سياسية منها خصوصا الكوزات وشبه الكوزات لأن اخوات نسيبة اخوانن هم سبب البلاء وعارفات وساكتات ،،، ويمكن ان تكون منظمة مكافحة التحرش بالنساء وسيلة ضغط يخاف منها أكبر رأس لو البنات اصبحن بقدر الوعي المطلوب ونشطن في هذا المجال واصبح واسع النطاق في كافة السودان،،، أما اذا ظللنا رجالا ونساء همنا وهوايتنا حضور الحفلات والتغني بصفات أصبح الواقع يكذبها (( أنا اخوك يا السرة)) (( شيال التقيلة)) (( أخو البنات )) (( والنار ولعت)) ووو ووو وو الخ نكون مجتمع مرذول وما منو فائدة وللذين يكتفون برفع ايديهم بالدعاء على الانقاذ نقول لا بد أن نسعى ونعمل كل بقدر استطاعته ولا ننسى قضيتنا في ازالة الكابوس الجاثم على صدرنا،، ولا يقول الواحد منا أنا لا دخل لي مدام اسرتي بخير وتعيش في أمان (( لم يعد هناك أمان)) فوالله لقد حكى لي أحد لخارجين من هذا التنظيم الشيطاني مواقف لاعضاء هذا التنظيم او المقربين له يشيب لها الرأس والله ان الذين كنا نسميهم زمان صعاليك لانهم بسكروا ويمشوا يسوا حاجاتم الكعبة بعيد من اعين الناس خير الف مرة من هؤلاء الابالسة ،،،


#612763 [سوداني ويس]
5.00/5 (2 صوت)

03-18-2013 02:02 PM
يا ود جبرا البت بتقول ليك في المملكة المتحدة يعني انجلترا يعني انجليز يعني خواجات يعني تقراها من الشمال لليمين (كاشف المقنعات) مش مقنع الكاشفات .نصيحتي للاخت ٍس تعمل ليهو كمين لانو هناك مافيش فقه سترة او تمكين وبكل بساطة تخلي حياتو طين في طين.الله يورينا فيهم يوم قولوا آميييييييييين


#612757 [ابو الكجص]
0.00/5 (0 صوت)

03-18-2013 01:57 PM
يابنتي الفي بريطانيا أولاً ربنا يعينكن على هؤلاء المرضى بس دواهم السوداني موجود وهو الرفض والصد والتتفيه. أحمدي ربك أنك تقيمين في بلد دستوره من أفضل داستير العالم لأنه يحمي من أمثال هؤلاء المرضى فلماذا لاتستخدمي أنت وغيرك هذا الحق وأعتقد أن رميه في الشراك ليُقبض عليه متلبساً غير صعب عليكن.


#612752 [على ابوالتيمان]
5.00/5 (1 صوت)

03-18-2013 01:54 PM
بالنسبة للمقيمات فى انجلترا اعتقد أنهن يجهلن قانون البلد هناك - لانه مستحيل هذا الشخص أن يقدر على فعل ماتدعيه الكاتبة - لانه القانون رادع جدا - وانا بفتكر فى الموضوع شىء غير واضح - استعينى باسكتلاند يارد ويجيبو ليك خبرو فى يوم واحد .


#612734 [ود الريف]
0.00/5 (0 صوت)

03-18-2013 01:38 PM
ماكنا تجار دين!!!!! انا مستغرب في الأخت الفي المملكة المتحدة التي تعتبر من أكثر الدول التي يطبق فيها القانون لية ما اشتكيتي هذا المعتوة للسلطات الانجليزية وانتي في بلد لا تعرف الالغاب ولا الدرجات العلمية في تطبيق العدالة بلد إذا سرق فيهم الشريف أقاموا علية الحد وإذا سرق الضعيف كذلك أقاموا علية الحد، انتي في بلد اكتر ردعا لكل متحرش ومتجاوز ، هو السودان دا لو فيهو عدالة كنا وصلنا للحالات القبيحة دي، نحنا في بلد الكيزان يعتبروا بناتو كلهم سباية انتي ما سمعتي بقصة النائب البرلماني بتاع البحر الأحمر في رمضان دا جابوا واحد بدلو عشان ينفزوا عليهو العقوبة دي بلد رئيسا رقاص


#612720 [صوت الحق]
0.00/5 (0 صوت)

03-18-2013 01:16 PM
ربنا ينصرك يا استاذ ويثبتك .


#612683 [aaa]
5.00/5 (5 صوت)

03-18-2013 12:22 PM
شعب جائع وشهوته الجنسية Full دى كيف تجى ماعارف .


ردود على aaa
[shersh] 03-19-2013 03:00 PM
ياخوى منو القال ليك فل............ديل الجامعة البستعملو المنشطات اما المساكيو الباقين ديل بيخلو اعذار كل خميس....ماشى عزاء فى مدنى ...طالع مامورية .....عندى وجع بطن ...مصدع .........واخيرا شكلا دون سبب

قال فل قال

[ابن السودان] 03-19-2013 02:14 AM
والله ضحكتني.

[ابكواميد] 03-18-2013 03:40 PM
واذا شبعنا بنغتصب

United Arab Emirates [المتفائلة جدا] 03-18-2013 01:40 PM
المتحرشون ليسوا من الشعب الجعان الغلبان ..بل هم أصحاب المشروع الحضارى المزعوم .. تجار الدين الإسلامى والإسلام برىء منهم ومما يفعلون.. الذين إمتلأت كروشهم لحد التخمة من أكل السحت من قوت الشعب المغلوب على أمره فأنبت السحت لحما من الحرام فكيف لقلوب تغذت بالحرام أن تعرف القيم والأخلاق الكريمة والمروءة وتدرك معنى الحلال.. ديل وين إتربوا؟؟أليس لهم أمهات ولا خالات ولا حبوبات ربوهم ؟؟ولا بنات يخافوا عليهن؟؟..حسبنا الله ونعم الوكيل..لك الله يا شعب السودان..
كسرة: هؤلاء كلهم شبعوا بعد جوع ..وقال سيدنا على بن أبى طالب كرم الله وجهه إذا أردت أن تسأل لاتسأل قوما شبعوا بعد جوع فلا خير فيهم ..
وأسال قوما شبعوا ثم جاعوا فما زال الخير فيهم..


#612676 [عبده الحاج حسن]
0.00/5 (0 صوت)

03-18-2013 12:12 PM
تعليقاً علي الخِطاب الثاني،
يا بت الناس زي دا ما ما بختشو ما بختشو من كتابة إسمه. بالعكس أكتيبهو وبالخط العريض،وبعدين إي إسلام ودين الذي ينتمي إليه هذا
المعتوه وأمثاله من حملت هذه الدرجة العلمية الرفيعة والتي أصبحت في بلادنا كالسلعة تُباع وتُشتري، وما أن حلّ حاملُها بموقع إلا وجرا ورآءه كارثة أسأءة للعباد والبلاد، أكتبي لنا إسمه ونحن أقرب إليه من جبرا سوف نصل إلي حيث يُقيم ويعمل وسوف نفضحه في كل المواقع ونُعريه ومن ينتمي إليهم ،بالرغم من أن أمرهم إنكشف وأصبحوا عُراة حُفاة من ما يتسترون به، لاتجعلومثل هؤلاء الأوغاد يعملون مثل هذه الجرائم وهم طلِقين يٌمارسون حياتهم أحراراً،


#612675 [Faroog]
5.00/5 (4 صوت)

03-18-2013 12:11 PM
الموضوع لم يعد يحتمل
أيه الحل؟
أولا يا بناتي ألزمن حدودكن الشرعية لا تسمحي لنفسك أن تكوني في خلوة مع أي شخص كان ولا تنخدعي بالمظاهر والألقاب عن التمسك بهذه الحدود, الإلتزام بالملبس المحتشم (ساتر لكل الجسم واسع)

تحلي بالشجاعة ولا تسكتي على أي تلميح أو محاولة من أي شخص وردي من الوهلة الأولى بقوة وحذار الإنكسار والإكتفاء بالإنسحاب فذلك سوف يعرضك للملاحقة

الأهم الصراحة مع الأهل (الوالد/الأخ الكبير/ العم/الخال/الأم) وإبلاغ مثل هذا المريض بأنك ستبلغي أهلك والسلطات المختصة

إذا كان الموضوع طال عدد منكن في مؤسسة تعليمية فالإتحاد مطلوب والتحدي مطلوب وتصعيد الأمر مطلوب

زمان كان الأصل العفة, الآن الوضع تغير فالكل متهم (للأسف) بالوقوع في هذا المستنقنع, عليه كان زمان الحياء مطلوب لحفظ السمعة لكن الآن الجرأة ورفض الفعل ومناهضته هي دليل العفة

إن لم يكن بالإمكان تعلم فنون الدفاع عن النفس مثل الكراتيه وغيرها فبالإمكان الدفاع عن النفس بوسائل سهلة وفي متناول الجميع من مواد سائلة تصيب العيون وتسبب تعطيل هذا المرض دون أن تفقده بصره تماما ودون أن تشوه وجهه القبيح.

أخيرا بنتي لا تضعي نفسك في موضع الشبهات ولا تثقي في أحد وأعلمي أن لا مساومة على الشرف والعفة
وربنا يحفظكن من كل مكروه


ردود على Faroog
Saudi Arabia [om hood] 03-19-2013 03:49 PM
سيد فاروق الحل انوا يكون في عقاب رادع وتجريم لكل من تسول له نفسه يتصرف كده وحمايه كامله للبنت وسمعتها من التشهير ,, لان البت البتكشف المجرم حايتشهر بيها وحا تتبهدل فاكثريه لاالبنات بتسكت وهيا بتعاني .... وصدقني الحكايه ماليها علاقه بي لبس واحتشام من غيروا

والدليل علي كده من اكثر الدول احصائيه في التحرش بلنساء إيران نعم ايران وجميع نسائها تحت خيم مش عبايات .

الحكايه دي في الفهم والتربيه والقيم الانسانيه بغض النظر عن دينك فما بالك بالمسلمين

علي الرجال ادراك ان مثل هذه الافعال غير مقبوله بتاتا

واهما شي عدم تجريم الضحيه (المراه) بوضع الاعذار مش مالابسه كويس ولابسه محزق ده كلام فااااااضي

انت مش حيوان انسان كرمك الله بالعقل وامرك الاسلام بغض البصر وبالتحكم بالنفس .

هسي في دبي الناس تلبس حسب دينا وحسب مزاجها ولانوا في عقاب رادع للبيتحرش

ناس فاهمه انوا من امن العقاب اساء الادب


#612668 [kayletoud]
5.00/5 (2 صوت)

03-18-2013 12:00 PM
الشئ المؤسف حقاً تابعت في موقع ما عن أكثر الكلمات بحثاً (بالأنترنت) كانت كلمة (جنس) وجد أن السودان أكثر الدول بحثا عن تلك الكلمة ومن اجمل التعليقات التي قرأتها ( المشروع الحضاري أنتج لنا فحول) ... ((ولا حول ولا قوة إلإ بالله ))

ربنا يحفظ نساءنا وبناتنا والمسلمين !!

ويرفع عنا هذا البلاء !!


قال تعالي: إنَّ الَّذِينَ يُحِبُّونَ أَنْ تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ ۚ وَاللَّهُ يَعْلَمُ وَأَنْتُمْ لَا تَعْلَمُونَ [النور:19].


عن أبي هريرة رضيَ الله عنهما عن النبيِّ صلى الله عليه وسلم قال: ( لا يَزني الزاني حينَ يزني وهو مؤمن، ولا يَسرقُ حينَ يَسرقُ وهو مؤمن ) رواه البخاري ( 6662) ومسلم (165)


#612663 [okan]
5.00/5 (1 صوت)

03-18-2013 11:58 AM
مالك يا دكتور كتلت هذا الموضوع وبيخته رغم خطورته وأهميته؟والله التحرش ببناتنا واخواتنارغم انه عار ولا يمت للأخلاق بصلة الاانه صار امرا يوميا , ونسيت بنتنا الاولي الاشارة الي تحرش ناس شرطة المرور بالسائقات من النساء والبنات و وما يحدث في رئاسات الشرطة ذات الأبواب المغلقة وحراساتهاأمر يشيب له الولدان
أما صاحبنا بتاع لندن , كان أبسط شئ تسألها عن اسمه ومكان عمله هناك حتي يتم فضحه بنشر هذه المعلومات وتحذير بناتنا اللواتي تسوقهن الأقدار الي المملكة المتحدة طلبا لرزق أو علم أو مجد وهن أهل له
هل من رجل حمش في برلماننا النائم يتولي عرض هذه القضية ومتابعتها؟ لا أظن , لكن أحيانا يضع الله سره في أضعف خلقه


#612653 [الدكتور المهاجر]
5.00/5 (1 صوت)

03-18-2013 11:44 AM
لا حول ولا قوة الا بالله . . اتقوا الله يا عباد الله . . وأتقوا يوماً ترجعون فيه الى الله ويومئذٍ لا تفيد متعة سويعة. . . ويجب على كل من يريد الاقدام على هذه الأفعال أن يتخيل أن ابنته أو أخته أو زوجته أو أمه يفعل بها ذلك . . والزاني يزنا به ولو بجدار بيته . . والزنا يورث الفقر. . وليقل كل منا (انه ربي احسن مثواي انه لا يفلح الكافرون)


#612613 [ابو اماسى]
1.00/5 (1 صوت)

03-18-2013 11:00 AM
الاستاذ الفاتح لك التحية والتجلة والاحترام وانت تعكس كل الصور السالبة التى يعانى منها مجتمعنا وبالحديث عن المقال السابق فاننى ارجو من الاخوات العزيزات ان يلتزمن بالزى المحتشم ومخافة الله فى زينتهن حتى لا يتعرضن الى مثل هذه التصرفات الغير مسئولة.

الناظر الى الشارع العام اليوم يجد ان السفور والخلاعه والمجون الذى وصل اليه لبس الفتيات فى الجامعات والمستشفيات والشوارع العامة والمتنزهات يدعو كل رجل الى ان يتصرف بطريقة غير طبيعه ويدعو الى التحرش.

ومقنع الكاشفات الذى زكرته وفعلا يا حليلو ولكن الكاشفات لم يتعرين فى يوم من الايام ولم يلبسن (شطفنى) ولم يعرفن (الاسكينى) ولم تتعالى ضحكاتهن فى يوم من الايام فى المواصلات والادهى والامر فى بيوت الاعراس والمناسبات عندم يتعرين ويباهين بأجسادهن وحنتهن وعندما يرى مقنع الكاشفات هذه المناظر فأنى متأكد من انه سيتحرش وسيختطف وسيغتصب.


#612606 [سمو روحانى !!]
5.00/5 (4 صوت)

03-18-2013 10:53 AM
عفوا تعف نسائكم !! الديان لايموت !!كما تدين تدان !! العدل الإلهى !! ويا سادتى عندما تنعدم المثل والمثال الذى يحتذى يكون إثبات الرجولة عبر أجساد النسوة وتناول حبوب الفياجرا والمداومة على المدايد والكوارع وهلمجرا !!! إذن هو إلغاء الكل والإبقاء على الجزء ( الجهاز التناسلى )كمحور أساسى فى الوجود والإبداع والتفوق !!! فياقبحكم الله من أمة فيقوا من هبلكم هذا وأقتلعوا هذه الحثالة من سدة حكمكم حتى تصبحوا مثل خلق الله ولاتكن كل همومكم أعضائكم التناسلية وأردافكم النتنة !! خلق الله عز وجل الخلق وكرم الإنسان لأهداف ومرامى جليلة تسمو بروحه فى عوالم ملكوته فلا ترضوا لأنفسكم بالهوان ومعاقرة الخنا والعهر كما البهائم !!!!!!!!!!!!!!!!!!!!!!!!!!!!!!!!1


#612592 [البعير]
3.00/5 (2 صوت)

03-18-2013 10:42 AM
انت عارف ياعم جبره السودانيين دخلت فيهم صفات غريبة وعجيبة منذ انقلاب ثورة الدمار الشامل للسودان في 30/6/1989 ، لذلك كل البلاوى الحاصلة في السودان دى سببها هولاء العلوج تجار الدين فمنهم لله وربنا ينقم منهم ، وكان الله في عون شعب السودان الفضل.


ردود على البعير
Sudan [قفة] 03-18-2013 02:34 PM
صاح يا بعير


الفاتح جبرا
الفاتح جبرا

مساحة اعلانية

تقييم
9.97/10 (9 صوت)




الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة