الحكومة أم شعوراً حي !!!
03-19-2013 03:35 PM


والله فيها الخير حيكومتنا ما قصرت ضـــمة ،إتحسست ودخلت في اضافرينا بي شعورها الحي وأحاسيسها الرهيفة أرهف من طرقة الكسرة المعدومة في البلد الما ليهو وجيع!
قالت والله يكفينا شر القول،قالت حيكومتنا إنها بتراعي مشاعر الغير وبتضغط على روحها وداخلة ومتحسسة, في شان شنو ؟
في شان مشكلة حلايب،غلبهم كلو كلو في الظروف الراهنة دي وحالة مصر جارة الوادي وشقيقة بلادي،حالتها لا بتسر عدو ولا حبيب!

عشان كده هي مأكلها في خاترها، ما بتقدر تجرح مشاعر ناس سي مرسي و تساكك ملف حلايب!ومصر بتمر بي ظروف صعبة!!
ونحن نحمد سيدنا ونشكر فضله،بلدنا المقسوم ومشاكلو بالكوم ! ما بمر بي اي أزمة ولا عندنا ظروف عصيبة!
مرتاحين ومتجدعين والواطة واااسعة وماهلة عندنا، نقسمها زي ما دايرين،والداير اي قطعةأرض في كل حتة يشيل طوالي وإذنه معاه
وحتى الخير بااااااااسط نحمد سيدنا، نحن معروفين اجوادين وكريمين وعبطاء على قول جيرانا المصريين!!
يموت الشعب وينعم بي خيرنا الجيران الضاحكين على هاشميتنا الرقبتها معووجة وما بتشوف عوجتها..!!
كيييف ما شعورنا حي وما بموت كلو كلو ,, يموت الشعب ويحيا شعور الحيكومة بت الهرمة!!
ويعني شنو حلايب مي صقيعة وبعييييدة من الخرتوم،اكان شالوها ما يشيلوها!هي الصقيعة العندنا فيها شنو غير الجراد والفقر والمرض؟

اصلو حيكومتنا بتهمهاالخرتوم بس!محل العصابة بتنوم والهبر بالكوم! لكن الباقي الينقرض شن شغلتهم فيه!!
وطبعا الحيكومة ام شعورا حي ورهيف دي، شعورها ده شالتوا الهاشمية هسسه في عهد مرسي شقيق بني كوز.
لكن زمان زمن مبارك الما بتشارك كان الشعور نايم نومة أهل الكهف في مثلث حلايب. خيـــفة سااااااااي ورجفيبة !!!
ولما يصحا بصحا بي قرونو وبقلع سنونو للشر،ومبارك ده كان ما الله مادي في عمره،كان زمان لحقوا امات طه في الحبشة جارتنا بي غادي!!

والشعور الحي ده اصلا ما بعرف الغبش ولا الفطائس الماتوا زمان في الجنوب على قول شيخهم الكبير!!
ولا بحس ولا بشعر بي جرائم الإغتصاب للجهال من شيوخ الضلال في كل زاوية حاجزنها بإسم الدين!!
ولا الضمائر دي بتصحا في مرض الفقراء وتسلط وزير صحتهم الضلالي وإستهتاره بي صحة الغلابة !
والضمير ده برضو بنوووم وبيأخدلو شخرة تحت شدرةالقصر الجمهوري وحوش كافوري بي مزااج .
خاصة لما تظهر جريمة تهز عرش البلد الإتشلع كلو واصبح زي الراكوبة في الخريف ما فضل فيه غير الشعب البالية تاكلاهو بي قدرة قادر!!

أما شيوخ حيكومتنا ناس فقه السترة، بقت عينهم قوية وشعورهم حية في الحاجات البتكوي الشعب الفضل ده!
يسافروا يتفسحوا بره ويتعالجوا برة و يعلموا اولادهم برة ، ويتجدعوا في منتجعات اوربا وامريكا وكندا،ويرجعوا يرفعوا شعاراتهم الغريبة وعجيبة!!!

مثل تصريح الشيخ عبدالحي يوسف، بأن يمنع منعا باتا سفر الطلبة من أجل التعليم في اوربا وامريكا خوفا من المخدرات!!!
والله عجيـــــــبه، طيب ما سمعت بي الخمور والممنوعات البوزعوها بإسعاف الحكومة نص النهار وفي قلب العاصمة؟
الإسعاف المفروض ينقذ ارواح الناس؟ ناس بتموت امام المستشفيات!والإسعاف يلعلع بي خطراتو عينك عينك وفي بطنو ممنوعات!!
هو وينو تعليم البلد وتوعيتها وصحتها البتخليكم تتكلموا بي عين قوية؟

ومنو القال ليكم البسافروا قسرا لأمريكاأو،أوربا،أو كندا،كايسين العلم بس؟؟ عشان تخافوا من المخدرات!!
وينها الحكومة البترسل الطلبة للتعليم؟ ما كلو زيتكم في بيتكم وبتسفروا جنا حشاكم اولاد المصارين البيض!!
الحكومة جوه البلد مقرطة التعليم ومقفلةالمستشفيات! وكلو بقى تجارة وشطارة ليهم براهم !!
الناس البتهج براهادي كايسة اللقمة وحق الدواء للقاعدين جوة وعايشين بالبركة!
العالم البتطفش دي طافشة من سوءالأوضاع ومن الظلم الباين والجوع والمرض!!

عليكم الله يا ناس الحيكومة شعوركم الحي ده وفروه لي رقبتكم!
الشعب ده خلوه بالوجع الفيهو،هو شديد على رقبته والله وكيل بيه إن شاء الله.
وإنتو خلاص إنكشف سركم البديع وظهرالمستور زمااان من زمنا خدو مشلخ!
دحين اسكتوا وعوسوا عواستكم برا تصريحات وبرا نفاق زائد!اصلو الناس خلااااااااااااص كوفرت تــــــب والبطون بقت متمسحة ومورمة هم !!
نسأل الله ان يفك فيكم الشعب الفضل ده بي كوفارتو دي،ويخمكم كلكم إلي مزبلة التاريخ..
يمهل ولا يهمل ..

متاوقة
دحين شيخ عبد الحي ده مو سوالو عملية في المانيا؟ المانيا دي مي في اوربا ؟ ولا يا ربي المانيا دي بي ورا حواشات الجنيد جمب الكنار ؟


[email protected]


تعليقات 9 | إهداء 2 | زيارات 1715

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#615124 [بو المحضار]
0.00/5 (0 صوت)

03-21-2013 07:52 AM
تسلمي يا الاصيله وربي لا يحرمنا من طله ذي دي اشهد انك بت بلد اصيله واسلوبك البسيط بساطه اهلي الطيبين اقريك السلام يا بت الجنيد ودحين ما تشوفي لي عروس من نفس شاكلتك دي البريد مع ناس الراكوبه


#614965 [مريود]
0.00/5 (0 صوت)

03-20-2013 11:31 PM
أنا حاربتك لأنني ما أقدر أقرأ لك بسرعة .

من يوم الليلة فكة فكة.


#614657 [مدحت عروة]
0.00/5 (0 صوت)

03-20-2013 03:44 PM
انتو عبد الحى يوسف ده بى صحوا؟؟؟؟
هو الدول بترسل ابنائها للغرب والدول المتطورة عشان يكتسبوا العلم والمهارات والتكنولوجيا عشان يكونوا الاساس البشرى لتقدم دولهم زى السعودية مثلا !!!!
عليكم الله شوفوا الناس البيفتوا ديل !!!!
غايتو السودان مصيبته كبيرة فى حكامه وشيوخه واعلامييه وسياسييه!!!!
لا تستغربوا مش النائب الثانى لرئيس الجمهورية عايز يحارب اسرائيل بالسواطير؟؟؟؟ويحارب المعارضة السودانية بالطائرات والاسلحة الحديثة؟؟؟؟؟؟!!!!!!!!!!!!!!!


#614413 [المدشر]
0.00/5 (0 صوت)

03-20-2013 12:22 PM
والله يابت الجنيد مدشر انا من الحيكومه دي ونفسي والله ادشر في وش عمر البشير ونافع وبعد الدشيره افك قيهم الكوفاره لانه مافي مكان اصلح غير وشهم ، الهم اجعل كيدهم في نحروهم ، وبدلنا بخير منهم أمييييييييييييييييييييييييييييييييييييييييييييييييييييين


#613986 [amin]
5.00/5 (1 صوت)

03-20-2013 12:43 AM
عفارم عليك...........والله دا النضم ...بنيّه اخت رجال بالصح


#613917 [ود الفاضل]
5.00/5 (1 صوت)

03-19-2013 10:35 PM
تسلمي يا بت الجنيد. مقال قوي وموجع ومبكي جدا،إن شاء الله يكونوا بقروا كلامك الدغري ده.
أكيد ما فاضيين ومشغولين بي السلطة ولم الفكة.
اما صاحب الإنجليزي المعولق التحت ده، بنقول ليك امشي اتعلم عربي كويس بعدين تعال اتناقش مع الناس، ياكوز يا مسترزق.قال كلام عوارة. في عوارة عليك الله غيرك وناسك المرسلنك؟


ردود على ود الفاضل
Egypt [towrshen] 03-21-2013 08:14 AM
يا اخوانا صاحب الانجليزى يقصد ان سومى قالت كلام جد صحيح ومن شدة الصاح لمن فات الصاح وبقى عوير


#613908 [أبو توفيق]
5.00/5 (1 صوت)

03-19-2013 10:13 PM
عفارم عليك آ بت الجنيد


#613845 [النزيل]
5.00/5 (1 صوت)

03-19-2013 07:09 PM
عفيت منك


#613804 [abukvakk]
0.00/5 (0 صوت)

03-19-2013 06:02 PM
I A not in Arabic country sorry for hat lkin kalam awara shadid ya miss asm ajuned


ردود على abukvakk
Saudi Arabia [سغييل وكاره المؤتمر الوطني] 03-21-2013 01:06 AM
كلامك انت العواره ياعوير الاخت اسماء بتتكلم عن لب المشكله الحاصله للمواطن .انت مواطن؟؟

Ireland [طارق هباش] 03-19-2013 11:55 PM
مشكلتك لا بتعرف عربي ولا انجليزي


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة