المقالات
السياسة
ارشيف مقالات سياسية
ما بين خال الرئيس وخال فاطنة !!!
ما بين خال الرئيس وخال فاطنة !!!
03-25-2013 05:57 PM


الهوة كبيرة خلاس والمقارنة منعدمة نهااائي!!!
الفرق بين الخال الرئاسي وخال فاطنة فرق الليل للنهار،والمسافة بيناتهم بعد السماء من الأرض!
خال الرئيس الشيخ التعيس رغم إنه طاعن في السن ، لكن شكيته لي الله لم ولن يتعلم شيئا من خصال خال فاطنة،الرجل الشهم زول الحارة مقنع الكاشفات ضهر البنيات وضلهن في كل الأوقات ..
خال فاطنة معروف في عرفنا السوداني، شهامةالرجل الأصيل الحر،البفدي كل بنوت البلد, كل بنات السودان عنده فاطنة.
يتحزم ويتلزم ويتسدر لي حارتهن، يفديهن بي روحو ويقيف سد منيع من أجل عزتهن وكرامتهن.
البرشهن بالموية برشو بالدم, يعيش وسطهن مرفوع الرأس ويعيشهن عزيزات مكرمات مطمئنات و متوكلات على الخالق وعلى سندهن خال فاطنة.

لكن حليل الزمن الدعاش،الودع ختر خلانا بلا رجعة !! زمن فيه الصغير يحترم و يقدر الكبير والكبير يهدي ويوجه الصغير.
فيه راجل الحلة والفريق كلمته مسموعة ونهرته مبلوعة وشورته مشروعة!!الصغير يتدبأ يستأذن المرقة وفي مشيهو الحياء والأدب!
والكبير سلامه بي طيبه وكلامه بي هيبة !!

جانا الزمن العلالة، صغيرو يرفع صوتو بي بجاحة وقوة عين!والكبير ضهره مكسور وشايف العوج ويطأطأي رأسو لا تحت , ضارب الطناش!
لا عرفناهم مذلولين من العدم! لا عرفناهم غلبهم اليسوهو في عهد حكومة السجم!!
زمن أغبر فارد عضلاته وسط الغلابة من عينة الخال الرئاسي، هؤلاء الذين جلبوا لنا الذل والهوان وأفشوا الفساد في كل مكان!!
بي تصريحاتهم وتصرفاتهم الرعناء ، وعباراتهم التي تتبرأ منها كل منابرنا المحترمة، سواء كانت سياسية ام أدبية وحتى في ونساتنا العادية.

الفاظ على شاكلة الزارعنا غير الله يجي يقلعنا, ويلحسوا كوعهم! تطاول و تحدي على الغلابة و الضعفاء!
وإستهتار وعدم إحترام لكبارنا من امهاتنا وابواتنا!!

فرضوا علينا الفاظهم النابية وسط اطفالنا حنى ترعرعوا وشبوا عليها!! في المدارس والشارع ،وكل نوافذ الإعلام المسموعة والمقروءة والمرئية.
حتى في خطاباتهم السياسية الرسمية وفي الإعلام الخارجي وفي منابر الجامعات في كل خطاباتهم العنجهية والفهلوة والبلطجة!!
كأنه حاكمننا متنطعين الشوارع ( الله يكرمكم) .

الزارعكم الله ومؤجل عذابكم لحين إن شاء الله
إنتو ما تفتكروها رجالة ـ جيتكم دي للحكم لا شهادات ولا شطارة! جيتو بخج الإنتخابات وتلتبوا زي الحرامية ليلا!!
الله لو ما اراد ان تكونوا في سدة الحكم،ما كان جيتوها براكم فهلوة وعنترية يا جهلاء!
اراد الله أن يكشف خبثكم وفسادكم ويترككم في الأرض تعوثوا فسادا لكي يكون عذابكم عسيرا في الدنيا والآخرة إن شاء الله!

هيهات ما بين هؤلاء وبين رجالنا أخوان الحارة وخال فاطنة!الكانوا معمعمين بعمامة الرضا والقناعةوالأدب والخلق الرفيع.
وملفحين بالشهامة دوما مرفوعي الرأس!
التعليم ساسهم والفهم تاج رأسهم،عزةالنفس والكرامة ديدنهم في الدنيا الزايلة،لا يهابون في قول الحق لومة لائم.

معروف السوداني للبعيد والداني في كل دول العالم بالمعدن الدهب الذي لا يصدأ ابدا,
السوداني معروف بالأمانة، والأمانة بوصفوا بيها السوداني في كل مجال!

رجال الدين قبل عهدكم يخافون الله ويحافظون على تعاليم ديننا السمحة، سيماههم في وجوههم، والهيبة والوقار في طبعهم و ملامحهم.
جيتونا إنتو زي آفةالجراد واسوأ منه بكتير!مسحتوا ملامحنا وهويتنا وقسمتونا وبغرتوا بطون الشعب وهردتوا أحشائه !
يحلنا منكم ال لا نام ولا أكل الطعام...
حسبي الله ونعم الوكيل عليكم جميعا,,,

متاوقة
لو فضل خال فاطنة واحد في البلد ما كان قدل الخال الرئاسي بذيل الثعلب! لكن إنكسر المرق واتشتت الرصاص
ابكن يا أخوات وبنوت فاطنة وكندكن الروسين بالرماد!! كتلنا فيك يا خال فاطنة كتلنا فيك وإنحرق الجوف والحشا!!!
يمهل ولا يهمل

أسماء الجنيد

[email protected]



تعليقات 17 | إهداء 3 | زيارات 2857

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#620864 [الجوفي]
0.00/5 (0 صوت)

03-27-2013 09:12 AM
هل توافقني على تكريم الكنداكية سوما بت الجنيد


#620280 [ود الجنيد]
0.00/5 (0 صوت)

03-26-2013 03:33 PM
لك الشكر ولنا الخيبة والخذلان فلا شى يستفذ قلوبنا الميتة وابشرو يا انقازيين بطول عمركم


#620221 [مدحت عروة]
0.00/5 (0 صوت)

03-26-2013 02:47 PM
ما قلنا من زمان ان فكر الاخوان المسلمين بذرة قذرة ونتنة ومعفنة فى ارض السودان الطاهرة!!!
مقاصد الاسلام وشرعه ضاعت فى حكم هؤلاء الاسلامويون !!!
وانحنا مالنا ومال اخوان مصر او اى اخونجى عربى او عجمى!!!
اخلاقنا السودانية اللى هى خليط من عاداتنا السمحة وديننا الحنيف بتكفينا وما محتاجين لافكار الاخوان المتاسلمين!!!
والله تباروا العرب ديل تبقوا فى ذيل الامم اصلا مافى شك ولا غلاط فى ذلك ابدا ابدا!!!!
معقول ده سودان المحجوب والازهرى وزروق ويحيى الفضلى وعبد الجواد والمهدى ونقد الله مثالا لا حصرا؟؟؟؟
كنا نوارة افريقيا والعرب بمشروع الجزيرة والسكة الحديد والخدمة المدنية والعسكرية ومثقفينا وادبائنا وشعرائنا ومهنيينا والآن بقينا زبالة العرب وافريقيا ولا حول ولا قوة الا بالله العلى العظيم!!!!
بلا يخم الحركة الاسلاموية فردا فردا!!!!


#619816 [المشتهى الربيت]
0.00/5 (0 صوت)

03-26-2013 09:55 AM
خيلان فاطنة موجودين طولى بالك


#619768 [زول ساى]
0.00/5 (0 صوت)

03-26-2013 09:11 AM
بلد صقورها فاتت او ماتت يقدل فيها ابوالعفين


#619734 [هدهد]
0.00/5 (0 صوت)

03-26-2013 07:34 AM
خليك من الخال عديم الحياء لو كان راعى هذه الامه رجل غيور وشهم لمزق هذه الجريدة وقفل ابوابها بالشمع الاحمر وسجن كل محرريها !!!!!! لكن لكن ..... الحمدلله الذى لا يحمد على مكروه سواه . اذا كان الخال يعتز بشحمه ولحمه الابيض فبما يعتز البشير ذو البشرة الداكنة !!!!!! والتى ترفضها دولة الكويت ؟؟؟؟ العيب ليس من دولة الكويت لكن العيب فينا وفى دولة الفساد من يهن يسهل الهوان عليه ....... هل النخوة واظهار الفرفشة عندما يصيح الصائح ويطبل المطبل بتغريدة شلعهوها وصقيرها حــــام !!!!!!!! أين الرجولة وأين الحماس وأين الغيرة والشهامة ؟؟؟؟؟ تفلحون فى الطرب والرقص لكن ضمائركم خاوية تظهر ما لا تبطن بنى فيها النفاق وباض وفرخ ..... تبت يداكم ايها المنافقين .


#619723 [سوداني]
0.00/5 (0 صوت)

03-26-2013 07:01 AM
قال الإمام:
إن سفه الشيخ لا حلمَ بعده ولكن الفتى بعد السفاهة يحلـُم
هذه مراهقة متأخرة ، قبح الله وجهه
لله درك يا أستاذة


#619629 [اسماعيل البدين]
0.00/5 (0 صوت)

03-26-2013 12:50 AM
تسلمي أيدك يا بت الجنيد...يا روعة أخوان فاطنه قاعدين وليهم يوم مادام الشمس تشرق كل صباح


#619567 [مهند ود الباوقة]
0.00/5 (0 صوت)

03-25-2013 10:58 PM
مقال مكتوب بماء الذهب مقال اكثر من رائع ,, ناس الانتباهة ديل اظنهم ما سودانيين اصلا لان اخلاقهم و سلوكياتهم تدل على انهم .... لك خاص ودي اختي اسماء الجنيد


#619544 [ابكواميد]
0.00/5 (0 صوت)

03-25-2013 10:35 PM
الورل قدم استقالتو واستلم الضب الزمام


#619523 [mansour]
0.00/5 (0 صوت)

03-25-2013 10:08 PM
عفارم عليك والله لن يهنو ولن يضوقوا طعم النوم وهم الان في فزع شديد لانهم عارفين نفسهم حراميه واسياد الحق ملاحقنهم


#619477 [محمد]
0.00/5 (0 صوت)

03-25-2013 09:23 PM
هؤلاء عملوا على تفريغ البلد من الكفآت والناس المتعلمة بتشريدهم من وظائفهم واحتكروا الكليات العسكرية التي كانت قادرة على ازالتهم ومحاكمتهم ولا يستقطبون فيها الا كل منافق ولئيم وفاسد وذليل امثالهم

ومن تبقى من الشباب ترينهم في الشارع وفي كل مكان نشروا لهم حبوب الهلوسة والبنقو

هل تصدقين ان في الفاشر والابيض البنقو يتباع في البقالات والقصد هو تدمير الشباب ويبيعوه العساكر


وعلشان دايرين يجيبو الحلب 10 مليون مصري قبل كدا والغريبة انه الكتاب ما كتبوا عن الموضوع دا ولم ينتقدوهم

جابوا الحبش نشروا الايدز جابو المصريين نشروا التهاب الكبد الوبائي

والان انتشر السل بسبب الجوع جوعهم الله في جهنم حتى شجرة الزقوم طعام الاثيم ما يلقوها في جهنم

امين يا الله


#619448 [صديق موسى]
0.00/5 (0 صوت)

03-25-2013 08:51 PM
خال فاطمة التي تغنى بها الاستاذ الكابلي قيلت في الاستاذ محمود محمد طه عندما قاد جماهير رفاعة واقتحموا سجن الحصاحيصا في زمن الانجليز وقاموا باطلاق امرأة من رفاعة كانت قد اعتقلت بسبب ختان ابنتها.....


#619428 [الكيك أب ضلعاً مساويك]
0.00/5 (0 صوت)

03-25-2013 08:17 PM
أنا خال فطنة قاعد يا بت الجنيد... ماتحبطينا هييييييييييييييييع أصبري لي في الكيزان جاييهم زغردي ... زغردي .... أبشري بالخير نوعدك تشوفي فيهم يوم.


#619368 [محمد العبيد]
5.00/5 (1 صوت)

03-25-2013 06:58 PM
شكرا استاذة / اسماء
لقد اوفيتينا كيل بعير
وودنا لو نصون فاطنة من اشباة الرجال امثال الخال الرئاسي وكل الكيزان الذين يعملون قوادين في سوق النخاسة في الاتجار ببناتنا لكنها حكمة الله ان حكم الضعيف تجبر
ليس جبنا منا وحاتك وليست شجاعة منهم ولكني اقول ليك وبخشم مليان انو نهايتهم دنت وعما قريب ستسمعين وتستمتعين بالاخبار التي تسر بالك وكل كنداكات بلادي
عذرا نساء بلادي الشريفات العفيفات بأن سمحنا للكيزان بأذلالكن وكنا سنرد الصاع صاعين
دمتن نساء وطني ودمتي لنا نبراسا ينير دربنا استاذة اسماء


#619363 [البعير]
0.00/5 (0 صوت)

03-25-2013 06:55 PM
برافو عليك أسماء الجنيد مقال رائع ، وانت وامثالك حفيدات مهيرة ، ربنا يخليكم ويحفظكم لكلمة الحق ، انما الرجال ناس خال فاطنة ماتوا زمان ومافضلوا الا الخياباء امثال الخال الرئاسي .


#619332 [ابو احمد]
0.00/5 (0 صوت)

03-25-2013 06:33 PM
تحياتي بت الجنيد بلدا مافيها التمساح اقدل فيها الورل الغبي


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة