المقالات
السياسة
ارشيف مقالات سياسية
الشلاقة الورطت إشراقة !!!
الشلاقة الورطت إشراقة !!!
03-29-2013 02:39 AM


كشفت وزيرة تنمية الموارد البشرية في حكومة السجم والرماد، إشراقة سيد محمود.
كشفت بشلاقتها فساد رؤساها بعدما زرزرت وانعصرت ومرقت الجواها كلو في السهلة، ويا روح ما بعدك روح!!
لكن يا إشراقة الشلاقة دي الليلة جابت آخرك تـــــب !!
الله ما كريم يا أهلي الغبش، كريم ورحيم عليكم من فوق نحمدو ونشكر فضله.

بعد الإعلان الفضيحة وبعد الإحتجاجات والغضبة الإسفيرية التي شنت عبر راكوبتنا الوريفة.
تنحنحت إشراقة وتمخضت وولدت زرزور وغتست حجر زلط شيخ الطيور الديك المذعور!!
يعني يا إشراقة يا وزيرة الهنا ، في ظمتك دي يوم مسكوك مفاتيح الوزارة ما ختيتي يدك في كتاب الله وقسمتي على الأمانة!!!!
تجي في أول إمتحان تقعدي ملوص في نص الحوش؟ الله من فوق ماك خايفة منو؟ ولا ماك طارياهو كلو كلو ؟؟
يا عالم إختشوا !! تخافوا رؤساكم وتخافوا على مناصبكم، وتخافوا رأس حيتكم الكبير ، وما تخافوا الله؟؟؟
يعني شنو سكتي عن الظلم بسبب سلطات عليا؟ عليا دي وين؟ في ياتو شدرة؟ ناولينا الزرزور ده من عشو خلي الشعب ده يقرشو!!
ليه تسكتي عن الفساد؟ طيلة الفترة الفاتت ؟ وإمكن لوما الزرة دي ، كان واصلتي سكاتك إلى ما شاء الله !!!
يعني لوما طلع الإعلان ده ولوما وقفنا ليكم شوكة حوت في حلاقيمكم البالعة حق الغلابة، ما كان مرقتي المكندك وملبد زي المارقوت؟؟؟
بالله يا عالم شوفوا الحال وصل وين ؟؟؟؟

((وكشفت اشراقة النقاب عن فساد قالت انها صمتت عنه الفترة الماضية بناءً على توجيهات عليا، وهو عبارة عن نافذة بالوزارة!
تأخذ مبالغ كبيرة مقابل خدمات اجتماعية خارج اورنيك (15) بعكس النافذة الحقيقية للوزارة التي تأخذ مبلغ 200 جنيه فقط،.!!
مبينة أن حجم المبالغ التى تؤخذ من النافذة تقدر بنحو 300 مليون جنيه شهريا، واكدت وجود خلل وفساد اداري ومالي كبير بالوزارة .
تسبب فيه المدير الاداري والمالي للوزارة السابق، الذي ارتكب (14) مخالفة مالية وادارية ابسطها حافز شهري يصل الى (26) الف جنيه،))
وواصلت إشراقة الشلاقة في كشف المستور بلا إحم ولا دستور وقالت:
((وقطعت بأن الموظف الذي وقفت معه النقابة لحماية اموالها واستثماراتها ليس موظفا بالخدمة المدنية.
بجانب أنه ترقى خلال سنوات من الدرجة الثامنة الى الثانية بتزوير مستندات!
وأضافت «لو بقي لفترة ثلاثةاعوام اخرى لصار وكيلا للوزارة))!!

شيء عجيـــب يا اهلنا المطحونين !300 مليون؟؟ وفي كل الشهر كمان ؟؟
في ظمتك ياإشراقة كان اديتوها لي مرضى الكلى ولا لي الأطفال المجدعين في المستشفيات ما كان قضت غرض؟
وأكيد المخفي وما معلوم ،، كتير ومردوم بالكوم في بطن الخرتوم !!!
وقال شنو ؟ قال كشفت إشراقة!!! إشراقة ما كشفت المستور إلا بعد خوفها من لبع الساطور!
خافت على وظيفتها وعلى قريشاتها وعلى الهنا المتجدعة فيه!!

يلا امرقي الفضل من باقي الفضيحة يا بت يا إشراقة يا تفتيحة !
ورينا منو الحاميك تتكلمي وتغطغطي ليه الفساد في التلاتة وزارات!!
ومنو الزور المستندات ومن الدرجة التامنة طفر بردلب وتلب بقدرة قادر وصل التانية؟من الدرجة التامنة!!
و خلال اقل من 4 سنة يبقى وكيل وزارة؟!!!
معناها العساكر البقبضوا في الشباب في الشوارع وبحلقوا ليهم بالقوة!!
قطع شك ضامنين ليهم رتبة ضابط أمن كبير وبعدها لواء!!!ما كلو بي تمنو !!

العالم دي بقت لا بتخاف ولا بتختشي! كل يوم بلية وكل يوم فضيحة وكل يوم مصيبة اكبر من القبلها!!
وكل واحد فيكم يجي يفوت القبالوا في الفساد بمليون سنة ضوئية !!
الغريب قلنا رجالهم في سدة الحكم كلهم شبه واحد وقلوبهم متحجرة وجاريين ورا المال والسلطة!
وعندناأمل في قلوب بنات حواء(( حتى ولو كوزات ))
يتعاطفن مع السجينات والمغتصبات والمظلومات في عهد بني كوز الذي ذل واهان نساء بلدنا الحرائر!!

جيتي إنتي طلعتي فوق العوج وإتحكرتي وطبقتي كراع في كراع؟؟
وبدل تقيفي في صف بنات جنسك! سكتي على الإساءة لهن عيانا بيانا!!
ولو فاكرة إنك قشيتي العوج في الجهات العليا دي! وفاكرة الناس حا تتعاطف معاك،تبقي غلطانة ومليون غلطانة!
لأنك إنتي الجهة الوحيدة الكشفت الفساد وسكتي عليه,البتستر على الجريمة مجرم وأكتر من مجرم!
وبي تصرفك الغريب ده،أصبحتي إنتي غرقانة معاهم في وحل الفساد لي إضنيك!!
ومين عارف ربما سكتوك ناس الجهات العليا دي بي رشوة!والله اعلم شنو تمن سكاتك على فساد بلدك ! ترقية ولا عمارة ؟
حلفتوا كتاب الله تصونو أمانته !مش تخونوها!!!
كلو من أجل مركزك المرموق الخائفة عليه! وصل بيك الطمع تمرير أجندتهم وتتستري على فسادهم؟
ولو ما رأس الصوت هبشك ما كان جبتي آخرك !!!

الجهات العليا السمعتي كلامها وعشان خاطرها إتسترتي على الظلم والهوان أعلا من عدالة السماء!! ؟
مافي اعلى من عدالة السماء.
اتقوا الله وخافوا يوم لا ينفعكم وزير ولا رئيس ولا قصور! يوم تنحشروا لوحدكم في القبور!!

حسبي الله على كل ظالم وعلى كل متسلط وعلى كل من سكت عن قول الحق!!
حسبي الله ونعم الوكيل عليكم جميعا..

متاوقة
اها يا شروق اسمعي كلام ناسك الفوق ؟ لامن يجيك الوجع مطبوق !!!
أوأحفظي ما بتبقى من ماء وجهك،وأستقيلي!ومي دوامة الزايلة أم قدود!!!
يمهل ولا يهمل

أسماء الجنيد


[email protected]


تعليقات 14 | إهداء 5 | زيارات 3696

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#623944 [هدهد]
0.00/5 (0 صوت)

03-30-2013 07:15 PM
نعلم جميعا فى قرارة انفسنا ان هؤلاء الكيزان معظمهم حرامية ومختلسين وما ذكرته هذه السيدة اشراقة ما هو إلا قطرة من بحر الفساد الحاصل وبعدين يا جماعة سعادة الوزيرة دى لسع ما اتهنت بالوزارة ولسع عايزة تشطب عمارتها وبعد التأسيس حاتقول ليكم على كل شيى لأنها تعلم تماما بعد ذلك سوف تكون اقالتها من الوزارة ، لذلك نبقدر ظروفك يا سيدة وكملى باقى مشوارك بالسكوت على هذه البلاوى وربنا يكمل ليك العمارة وتتهنى بيها باقى عمرك انت ووليداتك لكن لن تستطيعى العيش فيها باريحية وراحة ضمير لأنها من نبت شيطانى حرام فالدار يا سيدتى هى دار الاخرة والبيت بيت الاخرة وليس هو بيت الدنيا الزائلة . يمهل ولا يهمل صبرك


#623842 [الوجع الخرافي]
0.00/5 (0 صوت)

03-30-2013 04:51 PM
لا نزال نقبع في ...

نفس المكان ..

ليس من جديد ...


#623350 [بو المحضار]
0.00/5 (0 صوت)

03-30-2013 06:43 AM
تسلمي يا شجاعه وسودانيه قحه ليك التحيه واللي الامام وربي اوفقك يا بت البلد الاصيله ونعم القلم


#623179 [hmamizo]
0.00/5 (0 صوت)

03-29-2013 09:57 PM
خلاص يعني كلهم شرفاء وبقت علي اشراقة ؟؟ ماالبلد كلها من غفيرة لي مديرة حرامية وعفن في عفن وريني زول ماحرامي وعفن ووسخ ؟؟


#623057 [عمر الامام]
0.00/5 (0 صوت)

03-29-2013 04:57 PM
اها وهسه الحصل شنو ولا حاجه والامور ماشه زى الما حاصله حاجه كل فى موقعه وقابضين رواتبهم وغير رواتبهم لا محاكم ولا غيرو وانتو تكتبوا وتجقلبوا وبعد شويه يظهر ليكم نصاب تانى وتنسوا القديم وتمسكوا فى الجديد ( خط هيثرو ) نسيتوا ومسكتوافى اشراقه وهكذا الى ماشاء الله


ردود على عمر الامام
Sweden [hmamizo] 03-29-2013 09:58 PM
صدقت ياعمر .


#623049 [سامي عيسي]
5.00/5 (1 صوت)

03-29-2013 04:45 PM
كفيتي ووفيتي


#623039 [مواطن]
5.00/5 (1 صوت)

03-29-2013 04:26 PM
يسلم قلمك وفكرك يابت الجنيد لو في اتنين متلك في الحكومة كنا حسي من الدول المتقدمة


#623003 [ود الحاجة]
5.00/5 (1 صوت)

03-29-2013 03:40 PM
وجهة نظر: بالرغم من أوامر "الجهات العليا" فان مدام اشراقة لم تقصر و كشفت بعضا مما حجب عن العامة من الفساد و الطامة .
هي أفضل من مسار و غيره ممن تم طردهم و لم يقوموا بتوعية غيرهم


#622857 [Abu Samahir]
5.00/5 (1 صوت)

03-29-2013 12:16 PM
يا بت الناس ماذا كنت تتوقعين ممن حملتهم الدناءة ووضاعة النفس من منتسبي ( أحزاب الفكة) الذين إنشقوا من أحزابهم ووضعوا أيديهم فوق الأيدي الملوثة بالدماء و الفساد لأهل الحكم ؟ لماذا لم يكونوا أحزاب جديدة بأسماء جديدة عندما ذهبوا للإنضمام لنظام الإنقاذ الفاسد ، ببساطة لأنهم باعوا أنفسهم للشيطان لإضعاف أحزابهم الأم و تصويرها للرأي العام على أنها أحزاب منقسمة و متفككة


#622752 [noba]
5.00/5 (1 صوت)

03-29-2013 08:58 AM
الشى لغريب والاغرب انو الصحاقة وكاتها تؤزن فى مالطة يعنى الكلام الاتكتب واتنشر يهز عروش السماء وليس الارض لكن اين الاستجابة يعنى من يهمهم الامر سادين اضان بطينة واخرى بعجينة والبرطعة مستمرة الى مالانهاية بدون خوف وخجل يعنى ياستاذة الرئيس المزواج هذا لم يؤدى فسم للمحافظة على وحدة السودان والسودانيين والان السودان مقسم ولايوجد سودانيين بل يوجد جعليين ودينكا ونوير ومسيريةلملذا حنث الرئيس بالقسم ومازال يسمى رئيس من المفترض ان تكون الصحافة قوية وفعالة حتى لاتفقد دورها يعنى كشفت وزير حرامى تخت كل تالمستندات امام الناس بالاسم والصورة كشفت فنان مخنس تخت الصورة والاسم الرئيس عمل مزرعة تصور بالفيديو للناس وهو جالس هناك حتى يختشى على عرضه وداد بابكر استلمت قروش من فطر توضح للناس لكن صحافة جبانة وتكشف الفساد بشكل نكته وهذار للصوص ماعندهم حياة ده خطاء مفروض وكيل وزارة العمل وبتاع الشئون المالية وابوقناية يتختو فى السجون ويسلط عليهم قضاء الحق ليوروهم نجوم النهار مش تنشر تصريحاتهم وفضائحهم انت حرامى محترف داير شنو تانى تستمر فى سرقة او تهدد عرض الناس بالله شوفو الكلب ده


#622745 [فرقتنا]
5.00/5 (3 صوت)

03-29-2013 08:42 AM
تسلمي يا سودانية يارايعه يافخر البلد والناس لغه واماتنا واهلنا تكاد تكون علامة جوده من اصدارك اسلم خشمك واسلم كل كل الحولك كلام نابع من اصل اهز كل المشاعر البارده واهيج الزول البحس عاد شن بتقولوا ..................يا......كيزان السجم الله لا بارك فيكم


#622742 [كوزستان وسخ الضبان]
4.00/5 (3 صوت)

03-29-2013 08:33 AM
بت الجنيد سلمت يدك تستاهلي تكوني مكانا


#622699 [عبدة الشيخ]
0.00/5 (0 صوت)

03-29-2013 04:31 AM
اشراقة حامية نفسها تعك وتلج الكلام اما الشعب لا صوت له خلو اشراقة في حالها في واحد من كهربايي في المهجر الي معتدفي دارفور الكلام ليكم اشراقة منورة خرجت عبرت اما حنان وحليمة


#622679 [الجمبقلى]
5.00/5 (1 صوت)

03-29-2013 03:04 AM
بلد فوضىىىىىىىىىىىىىىىىىىىىىىىىىىىىىىىىىىىىىىىى


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة