في بريد إشراقة
03-29-2013 01:14 PM

في بريد إشراقة
ياوزيرة
لما تتعرى المعاني
ولما تنهزم الكرامه
ولما كل العفه فينا
تبقى في نظرك صغيرة
ياوزيرة
مالو صوت عزتنا واطي
ومالو باب سترنا فاتح
وكنا قايلنك غفيرة
ياوزيرة
حوا دايما لابسه توبها
وديمه تحلم بالعديلة
ياوزيره ..
.وكيف بتتكشف البنية
بقوامها وبشره فاتحه
وفي الفنادق يكون مقيلها
...ياوزيرة
وكيف يكون شرط المعلم
صورة مختلفة الزوايا
عشان يمتع فيها نظرو
وعينك انتي تكون ضريره
ياوزيرة
لما تصغر فجأة عمه
على العقال كانت كبيرة
ياوزيرة
لما ماتصدق نوايا
ولما ماتصفى السريره
ياوزيرة
لما تعلو الكلمة باطل
ولما تتكسر الكرامه
ولما ماتنفع جبيره
ياوزيرة
لما تبقى البت زبونه
ولم يبكي المبدأ حسرة
ولم تتحبس القيم
وفي الملاهي تكون اسيره
ياوزيرة
لما نرفع ايدنا دعوة
ولما نشكي المولى حالنا
ويوم نقيف في يوم نطالب
بي حقوقنا وبي عرضنا
وبي كرامتنا وشرفنا
انتي مشكلتك كبيرة
ياوزيرة

صباح محمد الحسن
[email protected]


تعليقات 6 | إهداء 0 | زيارات 1634

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#623782 [سونو]
0.00/5 (0 صوت)

03-30-2013 03:28 PM
تكمله :
شيلن يا بنات الكرباج
وادوا الوزيرة 100 سوط
لانها ناسيه نفسها من
سوادنا وحسانا
واذا كانت ناسيه بأنها داكنة
ومدركنةتعالن تاني
وادوهاتاني 100 سوط
وإذا كانت عارفة ولا ما عارفة
حاجة في بنات بلدنا العفيفات
ولا في وزارتا تبقي دي مشكلة
وفي كل مرة ادوها 100 سوط
واحسبن ليها كم
من خميمة وكم من خبثيه
دفعت وضربت وشردت منهم
وبترفع ايادينا لرب المولي
استركن من ظلمها ومن حقدها
لأنها لا بتشبه بنات بلدي
الطيبات وعفيفات
في زمن اشراقة اصبح الحلال
ملوث بدم الحرام سابح
في دلهم
... مشكورة صباح على النص


#623234 [سوداني متابع]
0.00/5 (0 صوت)

03-29-2013 11:32 PM
ملحــــــــــــــق في بريـــــــــد اشراقــــــــــة


مين بيسأل في الوزيرة ,,,
و العيون الحايرة مكسورة و حسيرة ,,
الله ليك يا حوه انتي
اصلوا في سنك صغيرة,,
من وعيتي الدنيا كنت
طفلة في عقلك كبيرة ,,
طفلة طوعتي المشاعر ,,
و الدموع زاخة و غزيرة ,,
من زمن تيراب و دقنة
من زمن امك مهيرة ,,,
صاينة شرفك و حافظة ذاتك
و في جلالك زي اميرة ,,
اليلة جوك ناس ينقذوك
الا بس خلوك اسيرة ,,,
بقيت جارية من الجواري
رجوع زمن الحريرة ,,
مين بيسأل في الوزيرة ,,
,,,,,,,,,,,,,,,,,,,,,,,,,,,,,,,,,
اسألوا ايام بعانخي
عن امة كيف في الدنيا خيرا,,
امة مسنودة باصالة
امة محروسة بضميــــرا ,,
اليلة جوك ناس التوالي
و اتشـــــتت كل العشيرة ,,
غزالة في وسط الضواري
و الزوايا تجيبا صورة ,,
اهلك الاسلام نسوه
وزينوك حنـــة و ضريرة ,,
و سيروك ياريت بس لو عريسك ,,
وجهوك بيعة و كســـيرة ,,
ما بهم فيك الشهادة
المهم صورتك خطيـــــرة ,,
و مين بيسأل في الوزيرة
,,,,,,,,,,,,,,,,,,,,,,,,,,,,,,,
الله قادر يرد مكانتك
و اقهر الكسروك مهيرة ,,,
مرة جاركم بغوي طفلة
ومرة صاحب خلوة غيرا,,
نوعدك ح نرد كرامتك
والدنيا ح يرجع سرورا,,
و ترجعي في عينينا طفلة
حلوة صايناك العشيرة ,,,
ح نكنس الاحزان و ناسا
وننضف القلب و السريــرة ,,
و نطلع الوسخ البينا
و ح نبدي بيك انت الوزيرة ,,,,,


ردود على سوداني متابع
United Kingdom [FedUP!!!!!] 03-30-2013 04:34 PM
ابلغ رد يصف حال المرأه السودانية المكسورة !!!


#622966 [احمد البجاوى]
0.00/5 (0 صوت)

03-29-2013 02:39 PM
الاستاذه / صباح مجمد الحسن
اسعد الله صباحك بكل خير وجعل جمعتك تستجاب فيها كل الدعوات الصالحات

استاذتى الكريمه انا من المتابعين لموضوع الاعلان المشين الذى اتفق معك فيه قلبا وقالبا فى انه مهين بكل المقاييس السماويه والارضيه

ولكن اراك كل ما كتبتيه فى هذا الموضوع انك تصبين حممك على الوزيره وكانها الموظف الذى مرر هذا الاعلان ونسيتى ان الموضوع تم فى اطار الاداره التى تختص بالبت فى هذه الامور
دعنى اسلم جدلا ان اللوم يقع على الوزيره بحكم انها الراس المسؤول عن كل اخطاء ومحاسن الوزاره , اين حلولك او اقتراحاتك التى ان كان يجب ان تسوفيها للخروج برؤيه تصلح ان تكون مقياس لخطى ثابته للوزيره او لمن ياتى بعدها

ان شخصتى الداء فلابد من وصف الدواء


ردود على احمد البجاوى
Sudan [عبدالله] 03-31-2013 12:08 PM
انا معك في كل ماذهبت له اخي احمد لان كثير من المسؤولين علي راس اي وزارة او مصلحة لايكون لهم
دراية ببعض التفاصيل فمن العيب ان نحملها ما حدث ..ولك ودي.


#622964 [ابومصطفى]
0.00/5 (0 صوت)

03-29-2013 02:32 PM
الدينار بولع النار وبزيد البوبار
الكاش بقلل النقاش
هسي بالجد كدة الاعلان السخيف ده بكون قبضوا قصادوا كم ؟؟؟؟؟؟؟؟؟
عالم عدمانة الضمير


#622936 [مريود]
0.00/5 (0 صوت)

03-29-2013 01:58 PM
كفابة ماتخوفوها زيادة خلوها ( تعتم ) لينا تاني.


#622933 [ود المناقل]
0.00/5 (0 صوت)

03-29-2013 01:56 PM
انا برشح الوزيره ونساء المؤتمر الوثنى للسفر الى الكويت والعمل بفقه الضروره ويذدن باجسادهن كيل بعير على خط هثرو


صباح محمد الحسن
صباح محمد الحسن

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة