,وينا ذااااتا ؟
04-03-2013 03:25 PM




في أحصائيات المواليد العالمية يقولون لك أن البلد الفلاتي نسبة المواليد فيه كذا ألف في الدقيقة والبلد الفلتكاني كذا ألف في الثانية وهكذا .. كم يا تري لو عملنا إحصائية دقيقة (وما مضروبة) لمعرفة حالات التعدي على المال العام عندنا؟
وإذا قمنا بسؤال نفسنا الأمارة بالسؤ ؟ أين تذهب هذا الأموال ؟ هل لجيوب المواطنين أم لحسابات المسئولين (صغروا أم كبرو)؟ فسوف تكون الإجابة بلا شك هي إنو المواطن (الغلبان ده) ما عندو أي شغلة بالموضوع لأنو الموضوع (حكومي 100%) !
ضحكت حتى إنكفأت على ظهري وأنا أقرأ توعد السيد وزير العدل السودانى محمد بشارة دوسة شاغلي المناصب الدستورية بالمركز والولايات بتحريك إجراءات جنائية وفتح بلاغات فى مواجهتهم حال امتناع أي دستوري عن تقديم اقرار الذمة الخاص به ودون تقديم أعذار مقبولة لمخالفته للقانون !
لم يكن ضحكي (قلة أدب) لا سمح الله ولكن ألا يري (مولانا) أن مطالبة شخص بتقديم (حيازته) من نقد ومنقولات وثوابت بعد جلوسه على كرسي المسئوليه (كم وعشرين سنه) لا تخدم غرضاً وكان الأحري أن تتم قبل أن يتسنم الشخص المسئولية (عشان نعرفو دخل كيف ومرق كيف)؟
واشد ما لفت إنتباهي بعد إنتهاء نوبه الضحك هو أن مولانا قد شدد في تصريخاته على تفعيل مبدأ (من أين لك هذا) ؟ وهو مبدأ إسلامي يحاسب المسئول يوم أن كانت (المسئولية) تحتم على رجل الدولة عدم الإنشغال (بالبزنس) .. ومش رجل الدولة وبس .. أولادو ذاااتم (أنظر حادثة الأبل بين سيدنا عمر وإبنه عبدالله) !
نعم بينما ينهي الإسلام عن إشتغال المسئولين بالتجارة والأعمال (على الأقل) أثناء توليهم لمناصبهم وكذلك كل دساتير الدنيا نجد أن معظم وزرائنا (بتاعين بيزنس) وما داسين الشغلانية .. كلما الواحد يعملو معاهو مقابلة في الأجهزة الإعلامية يقول أيوه عندي شركات ومشاريع وأنا زول سوق (ختري) !
ومش كده وبس .. تلاقي وزير الصناعة عندنا عندو مصانع .. ووزير الزراعة عندو (مشاريع زراعية) ووزير الصحة عندو مستشفيات وكليات طبية ! .. يعني تحت مسئوليتو ذااااتا .. (لله درك يا عمر فقد أعدت ما زاد عن ثمن شراء إبل غبنك عبدالله إلى خزينة المسلمين) !
طيب يا (مولانا) لو قلتا لى واحد من الوزراء (المستثمرين ديل) من أين لك هذا وقال ليك (من بزنسي المدور ده) ما شايفنو؟ أها نمشي (نجيب حسابات شركاتو عشرين سنة لى وراء وللا الدبارة شنو؟) !
وإذا علمنا ويعلم مولانا كذلك أن مسألة إقرارات الذمة (دى) هي عبارة عن معرفة مقتنيات المسئول لحظة جلوسه على كرسي المسئولية (وتقديمه لإقرار ذمته لحظتها) ثم تقديمه كشفاً بمقتناياته لحظة تركه للكرسي (للمقارنه وكده) يبقي السؤال : ماذا عن الذين شغلو مناصب لسنوات وتركوها أو تركتهم ولم يقدمو أقرارا للذمة (لا في الدخول ولا الخروج) أها ديل (إستثناء وكده) ولا شنو؟ والناس الضربت (نص) ميزانية (سنار) ديل يقدموا إقرارتهم (ذمتهم) قبل الضرب وللا بعد الضرب؟
ويختتم السيد وزير العدل تصريحه عن عزمهم إنشاء موقع الكتروني لاستقبال شكاوي المواطنين حول مظان الثراء الحرام للأشخاص لكنه شدد على ضرورة أن يدفع الشاكي ببينة مبدئية ومعلومات أساسية للتحقق من صحة المعلومات.
القارئ العزيز :
عطفاً على حديث السيد الوزير الأخير هذا فالعبدلله ينبهك حتي لا تقع تحت طائلة القانون إنك أن كانت لديك (مظان) ثراء حرام حول أحد المسئولين يجب أن يكون في حوذتك وفي جهة أمينه صورة من :
(عقد) شراء فيلا المسئول .. و(عقد شراء) شقة (لندن) وشقة (القاهرة) وشقة (كوالامبور) وعمارة (الطائف) ومزرعة (بتري) ولا تنسئ كشوفات حسابه بالعملات المحلية والأجنبية في بنك التجارة الإسلامي العالمي !
يا مولانا كدي مسألة إقرارات الذمة دي بقت تحصيل حاصل لأنها مفروض تكون قبل ما الزول يمسك المسئولية ... خلونا في خط هيثرو ده !!
كسرة :
أمسك رجل الشرطة بأحد السكاري وطالبه بإثبات الشخصية فضحك (السكران) وقال مخاطباً رجل الشرطة : هي الشخصية ذااااتا وينا !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟



[email protected]


تعليقات 33 | إهداء 0 | زيارات 7871

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#637870 [المواطن غلبان]
0.00/5 (0 صوت)

04-14-2013 06:03 PM
حسبي الله و نعم الوكيل هي كل ما نستطيع ان نقول حاجه في نص الحال المكشوف ده لك يا استاذ الفاتح من اين لك هذا ده عباره عن سؤال عقيم و زي ما قال خالي الله يطراهو بالخير الناس ديل جاهم امر من جهة ما (مجهوله يعني) انو مافي حساب ولا في قيامه بدليل انو ابليس زاتو عمل تأشيرة خروج نهائي عشان بيساعد في السرقه و في النهايه مكتوب هذا من فل ربي و على قول الشيخ المصري (انو راقصه سالها المذيع عن سر نجاحها فقالت ده نوفيق من ربنا سبحانه و تعالى).
في ظل الحال المكشوف ما يكفيني غير الدعاء الله يوفقكم باللي بتعملوهو فينا يا آكلين قوت اليتاما.


#629282 [حسان]
0.00/5 (0 صوت)

04-05-2013 05:31 PM
مظان فساد!!!! له حلوه بصحيح!!
واحد كان ساكن باجوري!!!
وبقه ساكن كافوري!!!
يكون شنو السر!!
لقلالو لقيه!!
وواحد كان موجر ببري!!
بقه صاحب قصر سري!!
وواحد كان في اشلاقو!!
بقه تاجر تاجر كلو حته احلاقو!!!
وواحد ود جزارين!!!
بقة املاكو تضر العين!!!
وكل ديل ياحلوين مش سحارين!!
ديل وزرائنا المخنارين!!!
من وسط الصفوة الوضائين!!
القالو بعمر وسيرته مشائين!!!


#629128 [naser abirh]
0.00/5 (0 صوت)

04-05-2013 12:24 PM
نكتة الشرطي زكرني بدايه الأنقاذ ...وقت كشات السكاري قبضوا واحد من لفة الكلاكله متجهين الي

مركز الشرطه دارالحوار بينهم السكران سأل الشرطي كم سنه انت شقال معاهم ؟؟؟قال ليه عشره سنوات

10 سنوات وخيط واحد؟....لو كنت شقال أمام مسجد كان خلوك نبي .


#628739 [um amed]
0.00/5 (0 صوت)

04-04-2013 07:52 PM
ابن حلايب اثنى على كلامك انا كمان ضحكتنى كثيرا النكته . الله يخليكم انتا وجبرا ويديكم العافيه


#628712 [حيرتونا]
0.00/5 (0 صوت)

04-04-2013 07:07 PM
ياجبره والله لوسمعتا كلامى الكسره الاخيرة دى ما عاجبانى فيها ريحه كسير تلج .............

مع انى عارف دا ماهدفك ..........لاكن توجيهات شششششششششششششنو؟؟؟؟؟؟؟؟؟؟؟؟


#628486 [shersh]
5.00/5 (1 صوت)

04-04-2013 02:24 PM
شنو شابكنا سيدنا عمر رضى الله عنة وابل ولدو....
ياخى افهم ديك ابل ودى عمارات وبيوت واسثمار وعربات ورحلات وزواج ودولارات....ماابل يعنى لو عندهم ابل كان بيعملو ذى سيدنا عمر رضى الله عنه...
اهه
هل فى فرق بين الابل والجمال


#628381 [azama]
0.00/5 (0 صوت)

04-04-2013 12:19 PM
من النكات التى تحكى ان تلميذا قليل الفهم للحساب سأله الاستاذ ثلاثة + اتنين = كم فتلعثم التلميذ فحاول الاستاذ تقريب الفهم ان لديه تلاتة قطع زلابية +قطعتين = كم قطعة فرد عليه التلميذ نان هن وينن؟


#628377 [ود الريس]
5.00/5 (1 صوت)

04-04-2013 12:13 PM
يا أخوة تذكروا أن ذاكرة الشعب السوداني ضعيفة جداً

وهذا الفساد وهذه الأموال سوف تستغل لاحقاً لإفساد أي وضع سياسي جديد

لذلك لابد من توثيق هذا الفساد ومحاولة ترسيخ شخوصه في ذاكرة الشعب

هذا الأمر لن يتم إلا عبر وسيلة إعلامية مؤثرة عبر تقنية الفلاش باك

يعني إظهار المفسد قبل وبعد إرتكابه لعملية الفساد

لذلك نحن محتاجون بشدة لقناة فضائية معارضة ومسئولة وذات مصداقية ومهنية

ويمكن لكل من يمتلك مستندات توثق لأي نوع من الفساد أن يسلمها لإدارة القناة

يا ناس مولانا سيف ألحقونا بالقناة

كسرة ثابتة:

أخبار القناة الفضائية المعارضة شنو ووو ووو


#628206 [الفاتح]
0.00/5 (0 صوت)

04-04-2013 09:47 AM
أن ناهبي المال العام والمفسدين يوجدون في كافة المؤسسات العمومية وشبه العمومية والمرافق العامة (مجالس منتخبة، مؤسسات ، جهاز الأمن، قطاع الصحة، جهاز القضاء، ، وغيرها من المؤسسات والقطاعات)، و المطلوب اليوم من الدولة في ظل الحديث عن دولة الحق والقانون، من خلال الشروع في إصلاحات دستورية وسياسية، أن تكف عن تكريس مبدأ عدم الإفلات من العقاب في الجرائم الاقتصادية والسياسية، وأن تتخذ إجراءات تشريعية وسياسية تحارب الفساد، وتؤسس لمفهوم الحق والقانون والمحاسبة وإعادة كل الأموال المختلسه والمنهوبه الى الخزينةالعامه لينتفع بها الوطن وليس الأشخاص ولهم حساب عسير عند رب العالمين .. وحسبنا الله ونعم الوكيل


#628165 [سامر المدنى]
5.00/5 (1 صوت)

04-04-2013 09:09 AM
(لله درك يا عمر فقد أعدت ما زاد عن ثمن شراء إبل ابنك عبدالله إلى خزينة المسلمين) !

لله درك ياجبرة .. نحن عمر حقنا ده ماعنده ولد


#628159 [قادوس]
5.00/5 (1 صوت)

04-04-2013 08:57 AM
الحكومة كلها حرامية والمعارضة كلها حرامية
الشعب فى النص يقول زى ما قال السكران
الشخصية ذاتا وينا


#628156 [التجاني مصطفي]
5.00/5 (1 صوت)

04-04-2013 08:53 AM
أخ جبرا إقرار الذمة ومع هذه المهلة الزادت من عشرين سنة صدقني برضو ماحايقدموهو لانهم لسه طمعانين في لغفات .. ولغفات .. والبير غويط ومابيتملي


#628080 [musa]
5.00/5 (1 صوت)

04-04-2013 05:10 AM
وهو دوسة ذاتو ساهل اكبر حرامى وتحويل اموال الجنوب ليست بالبعيدة لو انت نسيت انا مانست


#627992 [Nader]
5.00/5 (1 صوت)

04-03-2013 11:51 PM
يا جبرا هو وينو العدل فى السودان لما اعملوا ليه وزير ولا عدل ناس لا لدنيا عملنا


#627942 [مؤمن]
0.00/5 (0 صوت)

04-03-2013 10:34 PM
أخبار تنفيذ توجيهات السيد الرئيس بخصوص ملف خط هيثرو شنو(و)؟ هو السيد الفان دا زاتو وينو ؟؟؟


#627938 [darfury]
5.00/5 (1 صوت)

04-03-2013 10:26 PM
لكل ظالم نهايه
القروش دى حا يطيروا بيها وين؟
بره حا يجمدوها الامريكان والاوربيين وجوه هنا حا نطرشم ليها قرش قرش.
انى ارى اياما يتمنى فيها الفاسدون الموت ولا يجدونه.


#627910 [wedhamid]
5.00/5 (2 صوت)

04-03-2013 09:37 PM
يا سيد جبرة .....سلام.....خليك من حكاية المسئولين و إكتنازهم للسلطه و الثروه و كلام المسئولين الغير مسئولين ديل.... ولأن أى شكوى بدون مستند إدانه ما بتنفع ....و لا يمكن إثباتها بشكل قانونى مكرب !!!! لكن ما كنت أتمنى معرفته أن يرد السيد وزير العدل هذا ( د. دوسه) على سؤالى : ماذا حدث فى موضوع السيارة الكرسيدا و التى طاردتها رجال السلطة أيام تبديل العمله فى منطقة جبل الأولياء..... و لاذت بمنزل السيد دوسه وزير العدل نفسه و عند ضبطها إتضح بأنها سيارته و لكنه نفى ما تم ضبطه من حموله فى داخل السياره و كانت بها كم مليار جنيه مهربه من الجنوب( و دى جريمه مكتملة الأركان) و قال إنها تخص قريب له يعمل فى وزارة العدل.....فماذا إتخذ من إجراآت حيال هذه الجريمه أم تم معالجتها كدأب الإنقاذيين بفقه الستره؟؟؟؟


#627891 [برتقال ابو صرة]
5.00/5 (1 صوت)

04-03-2013 09:02 PM
ديل من طينة ثانية ديل دمروا امة بحالها
يا جماعة كل صباح تقرا فلان مقتول من قتله
شقيقه فلان اغتصب فلان سرق فلان انتحر فلان المصائب دة كلوا
بعدما السجم ديل والشعب السودانى بتستاهل اكثر من كدة لانو
من حجر لا يتحرك صنم


#627886 [abu khaled]
5.00/5 (1 صوت)

04-03-2013 08:52 PM
أنا عندي إقتراح كل ناس المعارضة والقانونين والشعب السودان يطالب بإنشاء هيئة تسمى هيئة الرقابة والتحقيق وتكون مستقلة ومحايدة وتبدأ بالتحقيق في البداية مع الرئيس واسرته وباقي القيادات المعفنة والناس ديل لو شعروا بأن الحكاية قربت سوف يهربوا وكل الاموال التى نهبت خارج السودان والان كل الشعوب التى نهبت لم تجد ولا دولار حتى المصرين والناس ديل ابالسة وما بسرقوا إلا عن طريق أناس اخرين وفي مقابلة مع والى البحر الاحمر مع الطاهر عندما سأله بأن مشاريع الولاية مقفلة على اولادك واهلك فذكر بأن القانون لايمنع ذلك .
او من الاخر نبيع ما تبقي من الوطن وكل واحد يأخذ حقه لانه بعد شوية سوف يبلعون الوطن وما فيه وانا عندي مشتري او هم عندهم في الموضوع دة خبرة كبيرة والله بكرة ابيعو الوطن والشعب معاه ولا عزاء للشعب
خلاص تعبنا وطلع زيتنا وابراء ذمة قال هم ديل عندهم ذمة ولا نحنا عندنا شعب


#627883 [ابن حلايب]
0.00/5 (0 صوت)

04-03-2013 08:47 PM
لى زمن ما ضحكت لكن كسرة الشرطى اللى سأل السكران عن إثبات الشخصية و رد السكران هى الشخصية ذاتا وينا أضحكتنى كثيرا الله يعطيك الصحة و العافية .


#627871 [الحاج ود عجبنا]
5.00/5 (1 صوت)

04-03-2013 08:22 PM
استاذنا الفاتح جبرا اولا لك كل الود وثانيا الا تري ان مطالبة وزير العدل لاي موظف بتقديم (اقرار ذمه او كشف حساب) بعد بعد تقلده لاي منصب ولو كان بعد ثانية واحده ينم عن عقلية سقيمه و خربهللوزير نفسه و الاتوافقني ان هذا الامر يمثل ايضا نوعا من الاستخفاف بعقل المواطن


#627854 [solli]
0.00/5 (0 صوت)

04-03-2013 08:06 PM
واالله الحكايه ظنيته جد يا جبره لانه خط هثرو دخل الميس (دي لغه البلي وكده) وواحدين عارقين الحاصل ولابدين وواحدين شايلين الهم من الجاياهم لانه القصه جابت ليها موازنات بين الفرق في الدرجه الاولي بتعرف طبعا لعبه الشده كان الاختيار بين الفريقين يتم حسب مستوي اللاعب نفس الشئ الحاصل بين خطوط الطيران ومياه النيل كسره اخبار خط عرض 22 شنوووو


#627850 [mansour]
5.00/5 (2 صوت)

04-03-2013 07:55 PM
راحت شمار في مرقه وهم قايلين بضحكوا علينا سوي ان كان النائم العام اوغيرو نحن عارفين ديل اكلو لمن شبعوا واحد عندو مزرعه ماعارف وين وشقه وين ومنزل في كافوري ونحن عارفين لو ظل طابط فقط في القوات المسلحه ماحيقدر يبني بيت في الاحياء الشعبيه الفقيره اما فيلا فهذا من المستحيل


#627829 [اسير الشوق]
4.00/5 (3 صوت)

04-03-2013 07:28 PM
يا جبره والله الكلام غلبنا والقومه غلبتنا والنوم طار من عيونا ياخي الناس ديل مخلوقين من شنو ووين مخلوقين زينا ولا من طينه تانيه والله والله يا جبره راسي داير افرطق من هولا الابالسه المصيبه لي اهسه بغشو في الناس احححححححححححح يا مصراني اح جبره تكلني بالله اللهم يا الله اخسف بهولا الارض واولهم نافع الكير


#627818 [فهيمه]
0.00/5 (0 صوت)

04-03-2013 07:06 PM
والله وأجيرا أنا بقترح تعمل ليك عمود كسرات ثابت عن الفساد الكثييييييييرده


#627812 [هميم جابر]
5.00/5 (1 صوت)

04-03-2013 07:02 PM
الضرائب والجبايات والرسوم المهولة التي تفرضها الدولة على المواطن المسكين وتعفي منها منسوبيها والتجار التابعين لها هي أموال مسلمين أخذتها الدولة منهم بغير حق فهي حرام ولذلك تذهب إلى جيوب الفاسدين، وقد قال صلى الله عليه وسلم (يذهب الحرام من حيث أتى) أموال حرام أخذتها الحكومة من المواطن الغلبان بالحرام ودخلت بالحرام إلى جيوب الحرامية الإنقاذيين! استدراج إلهي لطائفة غافلة من الناس إسمها مسئولي المؤتمر الوطني أو (المؤتمرجية) وسينالوا عقابهم في الدنيا قبل الآخرة! أما إقرارات الذمة فهي محاولة فاشلة لذر الرماد في العيون وانصح المؤتمرجية أن يتركوها لأن الناس عارفة أمور هؤلاء المؤتمرجية تمااااااااااااااام!!


#627801 [radona]
5.00/5 (1 صوت)

04-03-2013 06:47 PM
ما رأي سعادة وزير العدل في الملفات الاتية
التقاوي والمبيدات الفاسدة
سودانير - هيثرو
سودان لاين
الحج العمرة الاوقاف
شركة الاقطان
مشتريات شركة الكهرباء التي رشحت مؤخرا
وزارة الشئون الاجتماعية وماكشفته الوزيرة اشراقة
دي ماكلها مفاسد واضحة والادلة فيها دامغة ولاتحتاج الا محكمة
ارجو من السيد وزير العدل ان تكون المحاكم شفافة مفتوحة للجمهور وتنقل صوت وصورة وصحافة


#627780 [كركاب مطر بلا سحاب]
5.00/5 (1 صوت)

04-03-2013 06:19 PM
يا أستاذنا الجماعة ديل نحن ما حقوا نصدق البقولوه خاصة وعندهم بند إسمه فقه التصرف وده بسمح للواحد بكل شىء يسرق يهبر يخطف يكذب ..ويعمل زى ماعايز ويغش أى زول خاصة لما يحس بشوية زنقة يقوم يطلق تصريحاته الكلها كذب فى كذب ويلحنها كده بحبة دين ..الدين البتاجروا بيه ده ديل يا أخوىمش أخوان الشياطين ديل معجونين عجن بموية الشياطين ..ديل زى ما بتقول حبوبتى قهرهم النجرهم


#627758 [salam55]
5.00/5 (1 صوت)

04-03-2013 05:57 PM
قصه : يحكي ان احد وزراء العدل انه قرر علي المسؤلين تقديم اقررات ذمه , وانه جاد في ذلك الموضوع ةالحماعه قالو ليهو مالك علينا نا تخلي الحكايه عايمه ساي وكدي حتخرب علينا وهو ما اشنغل بيهم وقال ليهم الكلام دي نهائي وان ما بتراجع منو, المهم الجماعه قام فكروا في مصيبه يلهو بيها قام ورطو السواق بتاعوه في عمليه بنقو ترويج وكده وقام عملو ليو كمين بي نا س الامن والحكايه انتشرت وطبعا صاحبنا الوزير اتورط في القصه دي , المهم قام فكر وقرر وشاور نفسه انه يخلي موضوع اقررارت الذمه دي واهو الحكايه مشت وما في ذول سألو تاني . اها انتو رايكم شنوفي القصه دي ؟ انشاء الله عجبتكم ياشباااااااب .


ردود على salam55
[shersh] 04-04-2013 02:30 PM
وزير عدل سابق ...قبضو ولدو بيسرق الغنم بالبوكسى
طبعا تمت مساومتة بين تقديم الاستقالة او تقديم ولدو للمحاكمة..

فرضى بالاولى

افسد ذاتو لقوهو مندسى فى وزارة العدل


#627711 [عبده الحاج حسن]
5.00/5 (2 صوت)

04-03-2013 04:52 PM
عندي حبوبتي لمن تسمع ليها زول بقوليهو في كلام أو قال كلام هي ما قِدرت تستحملو، بتقوليهو كلامك دا أول شئ لوكو وأمضغو حتي قولو،
نحن جماعتنا ديل بدوكم الكلام كدا قدرتو بِلعتوه ـ بلعتوه ما بلعتوه إنشاءالله تطرُشوه،ما بهِمهم منو البسمع ليهم ولا البيقرا ليهم،هم الكُل في الكُل،هُو الشعب دا فيه زول بيفهم غيرهم ،
هو الوزل دا مش قبل كِدا قال داير إمنع الإخطلاط في الجامعات ؟ وإمنع تدريس اللغة الإنجليزية في الأساس والداير إدرس أولادو إنجليزي إوديهم للمعاهد الخاصة ، مش ياهو الزول دا زاطو،دي تصريحات للتمكين وكدا،
قول يادوسة ودوووووووووووس ،هذا زمانك يامهازل فأمرحي،


#627700 [سودانى منفرج الأساريرجدا]
0.00/5 (0 صوت)

04-03-2013 04:44 PM
هوّ يا سيد جبرا .. لنفترض ان كوووول المسؤولين ( القدامى والمحدثين (فى كلا حالتى فتح وكسر حرف الدال) استجابوا واودعوا اقرارات ذممهم المتنوعة المرتكزات منضدة السيد الوزير انطلاقا من وطنيتهم والتزاما بقوانين الدوله التى هم يجلسون على قمتها او خوفا من وعيد السيد النائب العام وزير العداله ,, نامل ان تتكرم اصالة عن نفسك ونيابة عن قرائك بسؤال السيد الوزير .."ثم ماذا بعد ايداع كافة المسؤولين اقرارات ذممهم منضدة سيادته واطلاعه هو عليها واصدار توجيهاتو بتصويرها "من اعلاها الى اخمص قدميها" مثنى وثلاث اورباع وتزويد اعضاء لجان التدقيق والانترفيو بمصفوفات الصور المنسوخه من تلك ألأقرارات ليقوموا بفحصها .. و من ثم (بفتح حرف ألثاء وليس رفعها) قام رؤساء تلكم اللجان بايداع نتائج فحوصاتهم وتقاريرهم عن كوول ما توصلت اليه اللجان المنبثقه عن اللجنة "ألأم" منضدة سيادته .. حيحصل شنو!!
ما هو المنتظر او المتوقع حدوثو!! ليكون "محدّث عنه او قيد معنى"؟
ايسمح للشعب السودانى ان يخرج بقيادتك يا ابن جبرا وتنادوا وانتم تجوبون الشوارع مهللين مكبرين ..قائلين " ياسلام على مسؤولى ودستوريي بلادنا السودان اللى اودعوا اقرارت ذممهم منضدة وزير عدلنا دون تهديد ووعيد .. ياسلام على امانتهم فهم الفقراء ونحسبهم ألأعنياء.. يا سلام على نائبنا العام .. نحن والله ما شفنا ناس زى ديل ..ليت شعرنا.. (الشين مكسوره والعين مسكونه والراء مضمومه) " ثم ينصرف هولاء المشيدون بالنائب العام والمودعين اقرارات ذممهم منضدة السيد النائب العام.. الى اهليهم والى صلاتهم ليرحمهم الله.. سبحانه وتعالى .. ويا دار ما دخلك شر موش كووولو زول شاف شغلو وقام بيهو على ابيض الوجوه!!!


ردود على سودانى منفرج الأساريرجدا
United Arab Emirates [سيبويه العجمي] 04-03-2013 09:05 PM
عشان قادينا بالعربي نصلح ليك دي (هولاء المشيدون بالنائب العام والمودعين اقرارات )المودعون وليس المودعين يعني مرفوعة مش منصوبة لانو المعطوف يعرب(بضم الياء) كما المعطوف علية
شكلك بقيت نصاب زي الجماعة الكسرو الشعب بعد ان رفعوه ونصبوه


#627676 [خالد حسن]
4.50/5 (5 صوت)

04-03-2013 04:21 PM
دوسه قايلنا داقسين
اقرار ذمه بعد اللبع والشبع
والله الكيزان ديل اشرف منهم دولة اسرائيل
علي الاقل اسرائيل تحاسب من يختلس
ودولة الكيزان الرساليه تتستر علي المختلس وتقنن له القوانين لتحمي فساده


#627672 [ود ابليس]
5.00/5 (4 صوت)

04-03-2013 04:18 PM
اقرار ذمة شنو يا جبرا ؟ ما شفت المتعافي بيقول ايه في الصحف ؟ دي تجارة اخوانه وهو مشارك بس !
فالابالسة ديل عاملين حائط صد لنوعك ده .. فمعظم البزنس ان لم يكن كله باسماء اصهارهم و اقاربهم البعيدين عن الملاحقة القانونية و حكاية من اين لك هذا ..


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة