المقالات
منوعات
يا بت الجنيد كسرت سنها !!!
يا بت الجنيد كسرت سنها !!!
04-05-2013 09:44 AM



وصلني إميل من إحدى الأخوات تحكي موقف جدا مؤثر ـ
لا عرفت أبكي على الزمن الكعب والبلد الهامل و لا أضحك على تصرفها الغريب ونبيه في آن واحد!
وإليكم ما سردته لي بالضبط:
سلام اختي بت الجنيد..
انا والله رسلت ليك عشان تحكي القصة دي لي اخواتنا وبناتنا في الراكوبة ربما يستفدن من الموقف في وضع بلدنا البقى ماليهو أمان..
انا موظفة وعايشة مع اختى فطين وعيالها الإتنين في إحدى الأحياء السكنية النائية،لا نملك في الدنيا دي غير كرامتنا وعزة نفسنا..
اشتغل واساعد شقيقتي فطين في تربية عيالها الإتنين في المدارس.ابو عيالها سافر ليبيا ولم نسمع عنه شيئ بعد مشاكل ليبيا الأخيرة !!
وهي تخيط الملابس لنساء وأطفال الحي ونقتات برزق اليوم والحمد لله.

ذهبت كالعادة لعملي في صباح ذلك اليوم وتركت فطين بين هموم المعيشة وجوطة العيال .
بعد رجوعي نهاية اليوم وجدت فطين رابطة رأسها من الصداع و مغطية فمها بقطعة منديل باين في طرفهاآثار دماء !!!
قبل ان اسألها وسط دهشتي حكت لي فطين هذا الموقف الغريب :
طلع الأطفال للمدرسة وذهبت فطين لتشتري بعض الأغراض من دكان قريب من البيت، لم تجد ما تريده, توكلت على الله وإستمرت تبحث بين دكاكين الحلة،وفي طريقها اعترضتها سيارة أمجاد ، وطالبها السائق بالركوب !
استغربت في بداية الأمر لأنها لا تعرفه ولم تأشر له! وواصلت سيرها!
لكنه اصر بإلحاح يريد ان يوصلها لأنه الواطة حارة على حد قوله(( وبلاش بدون قروش))
كررت له عدة مرات بأن البيت قريب وهي مرتاحة تمشي، لكنه واصل في إصراره بعوارة شديدةان يعترض طريقها!

لم تفكر لحظة وركبت معه ،وعرفت قصده من أول مرة .
و خطرت لها فكرة غريبة وصمتت قليلا، بعدها عرفت إنه نواي أن يسرع في إتجاه آخر قبل ان يسألها عن وجهة منزلها!
وبكل برود قالت له:
ياخوي انا عارفة قصدك ، لكن لو داير تهرب بي لمكان بعيد وما معروف، احسن نمشي بيتنا فااااااضي وانا براي.
منها توصلني ، ومنها تأخد تمنك ..
تهللت أسارير صاحب العربة وإطمأن لها ووصفت له بيتها وذهب معها برضا وقناعة!!
وصلت البيت طلبت منه الجلوس في الصالة لكي تجهز بعض الأشياء ,, جلس في كرسي ينتظرها!
وفجأة شبت عليه كالنمر واصبحت تعضعض بحرقة في كل جزء من وجهه و رأسه ثم رقبته حتى إنكسرت سنها وسال دمها في وجهه!
إستغرب وحشية هذه المرأة ، واصبح يئن تحت غضبتها!
وطلب منها ان تسمح له بالذهاب وأنه تاب ولن يكرر فعلته هذه معها أو مع غيرها.
لكنها اصرت ان تعلم وجهه تحديدا لكي يتووووب ويكون عظة لغيره.
واخيرا رفضت ان تسمح له بالذهاب إلا بعد ان أخذت ارقام عربيته، مؤكدة له إن رأته مرة اخرى في المنطقة كلها سوف تبلغ لجنة الحي
وحاتتكرر العلقة بصورة أكبر، ده إن ما لحقوه أمات طه، كما طلبت منه أن يقسم أمامها ان لا يعترض على بنات الناس مستقبلا!!!!
أو سوف تصرخ وتلم عليه الناس والجيران ليتموا باقي ضربه، ودليل وجوده داخل البيت متهجما عليها يثبت جريمته!!

واخيرا سألت شقيقتي فطين،وهي تئن من ألم رأسها و سنها، ليه عملتي كده ؟كنتي تبلغي عنه وخلاص!
ردت فطين ببرودأبلغ لي منو ؟ ومنو الحا يسمعني ؟ وإمكن هو زاتو من الناس البنشكي ليهم قرفنا ومرنا؟
احسن أأدبو برااااااي واتوبو وأخلص حقي وحق غيري منه !
سمح يا فطين هسي ما كسرتي سنك البعالجا ليك منو؟ نحن ما لاقين علاج وجع الرأس!!
اخير اكسر سني ولا ضهري وشرفي ؟ أخير ابقى شروم ولا مكسورة شرف ؟
وجع السن والرأس مقدور عليه، لكن وجع القلب وهمه البقدر عليه منو ؟؟
سني الله بعوضها لي،إن ضحكت بضحك ورأسي مرفوع، لكن إن حصل لي الشين ،أقبل ويين؟
القى الضحكة والقى شرفي وكرامتي وين ومتين؟

متاوقة
عفيت منك يا فطين، قسم تكيلي العين ، صدقتي والله، كسرة السن لا تعادل كسر الشرف !!
تسلم البطن الجابتك يا خية!!
لو كل واحد بيأخد علقة ساخنة زي دي من اصحاب الوجعة زاتها كان إنعدل الحال المائل ..
لكن السؤال المهم إن نجحت فطين بحكمتها ومساعدة الله سبحانه وتعالى لها، هل سوف تنجح الكرة مرة أخرى مع أخريات؟؟
السؤال متروك للقرآء , حفظ الله بناتنا وإخواتنا من شرور الزمن الخراب,,
والله لا بارك في كل من تسول له نفسه بهتك عروض بنات الناس!
حليل زمنا السمح وحليل طبع إبن البلد ضرا البنوت وضل الفريق , ركازة أخواته وسند اماته وضهر القبيلة!!

أسماء الجنيد
[email protected]



تعليقات 4 | إهداء 4 | زيارات 2116

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#629442 [um amed]
0.00/5 (0 صوت)

04-05-2013 09:52 PM
والله نسلمى يا اخت فطين ما قصرتى دافعتى عن شرفك هذا هو طبع السودانيه بت الرجال السبناه فى السودان .الان غير ومن الامثله ما قراناه فى الراكوبه قبل يومين عن بنتين استدرجوا شباب ليفند الله يستر على بناتنا واخواتنا واماتنا


#629226 [mohd]
5.00/5 (1 صوت)

04-05-2013 03:41 PM
من الواضح انها قصة خيالية عن بنت سودانية شريفة وعفيفة بل و(عضت) عليهما(الشرف والعفة) فطين حتي انكسر سن واتشتت الدم. هذا ليس غريب علي الفتاة السودانية بصورة عامة ولكن!! مثل صاحب الامجاد يعرف طرقا اسهل وبيوت اسر (محترمة)في الاحياء السكنية صارت تستاجر في داخلها غرفا لممارسة الرزيلة مع تقديم الخدمات كاملة بمقابل وبعلم رب البيت. لاشئ يجعله يجري وراء امراة(كشت) تراب الدنيا كله وهي جائلة من دكان لدكان في حرارة جو السودان وعرقها سائل حتي صدرها الا اذا كانت قصة لتمجيد المراة التي تحمي شرفها حتي لو فقدت روحها وليس سنها


ردود على mohd
European Union [عمرالامام] 04-08-2013 05:19 PM
ليه قصه خياليه ممكن تحصل وحتى صاحب الامجاد ولو اعتبرنا ماتقوله صحيح من وجود اسر تستأجر غرف وووممكن يفكر يوفر ثمن استئجار الغرفه ويشق الخلاء ويتم غرضو ويلحق السوق . وبعدين البستأجروا الغرف ديل ما اظنهم اصحاب الامجاد البسطاء


#629155 [سامي عيسي]
0.00/5 (0 صوت)

04-05-2013 01:27 PM
والله يابت الجنيد مواضيك دائما في الصميم نامل مواصلتك الكتابه وربنا يحفظك


#629129 [القرم تفاحة أبل]
5.00/5 (2 صوت)

04-05-2013 12:26 PM
((((((((((((((برافو بت الجنيد ,,, وألفين برافو أخت فطين ,,, وتسلمي ايتها البطله فطين , ويا بت الجنيد والله لو خليتي كتابتك المباشرة وبقيتي تكتبي الايميلات البتجيك يكون أحسن ,, لأنه الموضوع ده يعتبر من أروع ماصاغه وخطه قلم بت الجنيد ))))))))))))))))))))))))


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة