قنقر الرئيس الما كمل !!!
04-06-2013 03:26 PM


كونو المبادرة للحوار الأخيرة تجي بحيلة ثعلبية جديدة من ناس اللآوطني، ابدا ما غريبة ! ياها حالهم البتغني عن سؤالهم!
من يومهم بدايتهم ما كانت حميدة، وجيتهم للحكم كانت بمباركة كبيرهم العلمهم السحر،شيخهم السرو باااتع جدكم الترابي قدس الله سره!!!
لكن البحير المخ وبحرق باقي الدم والأعصاب الفضلوا للشعب الهائم في الضلام ده ، مباركة خطوة الحوار وتصديقها من جهات كانت واقفة ألف أحمر في وجه الكيزان!!

مررررة واحدة يرخوا الحبل ويفرشوا الأرض بساط أحمر للبشير من تاااااني عشان يقدل في باقي الجماجم الفضلت دي!!
هو زاتو ما قنعان، بل مصر إنه يتحكر في سدة الحكم ويأكل ويقسم باقي قنقر الغلابة.
و يهرس عضام الفضلوا إن شاء الله بي خمسة ولا ستة سنة بي باقي معاشو الفضل !!!
حكاية إنه ما داير يترشح والكلام البصرح بيه ده، حيلة واااضحة يفهما الطفل العمره خمسة سنة!!!
لو اصلا ناوي ما يترشح الجعجعة لزومها شنو؟ ما تتخارج من سكات وترحم الصبروا عليك ربع قرن من الغلابة والمطحونين ديل!!
كملت القنقر كلو يا رئيسنا !! حقك وحق غيرك ولسة ما شبعت ؟؟ القنقر!! الملبن،واليابس،وحتى الباقي المسوس أكلتو للجراد!!!

حيلة خبيثة لتغيير جلد الأفعى والإستمرارية،لتكملة باقي الفتنة والدمار وتشتيت وتقسيم البلد الماليهو وجيع!!!
رغم إنه لا القانون ولا الدستور بسمح ليه يترشح، اللهم إلا بنفس طريقة خج الإنتخابات ، يكسر رقبة الدستور ويعوجو في مصلحته!!
ودي طبعا ما غريبة ولا جديدة عليهم.
ما مهم عنده دستور ولا قانون ولا كل الحبر المشتت في الورق، المهم يفطس هو في رأسنا ويفطس معاهو الشعب الشاب وخرف في وسط الظلم والفساد!!

فحانين بي شوية شروط ومطالب وجاريين بي خبر الحوار ،الإبتدروا العدو المو صليح !!! كأنكم جبتوا الديب من ديلو على قول المصاروة!!
مافي زول عاقل برفض لغة الحوار والتفاهم ، لكن اللغة والتفاهم دائما مع ناس عقلاء وناضجين فكريا وفاهمين هم وين ودايرين شنو !
واهم شيء الضمائر نضيفة والنية سليمة وللمصلحة العامة !!
لكن من الله خلقكم سمعتوا بي تفاهم وتحاور مع عدو يصب غضبه كلو على شعبه وماهاميهو شيء في الدنيا دي غير مصلحته ومصلحة شركاؤه وبس؟
الرسول صلى الله عليه وسلم ما آمن للأعداء. وصى في الصلاة لازم يكون في ناس واقفين يحرسوا البصلوا خوفا من بطش الأعداء الما ليهم أمان.
الكيزان اسوأ من مرا على تاريخ البسيطة من بشر! لا توجد خانة بوصفهم غير إنهم مجرمون بكل ما تحمل الكلمة من معاني!
وخونة بدرجة شرف، يعملون بخبث ضد ارضهم وعرضهم جهارا نهارا وأمام رؤوس الأشهاد !

الشروط الختيتوها للحوار ،من قبل البداية مرق ليكم نافع وقال ليكم الحسوا كوعكم ،والمرة دي لحنها ليكم بالمقلوب!!!
بتصريحه الما غريب عليه وتأكيده على حد قوله إنه البخرج عن الوطني بحاسبوه !! أها ده معناها شنو ؟؟
حالتو لسسسسة ما بدأ الحوار ولا إتعرف توقيته ومكانه !!
الشيء المعروف لأي بني آدم عارف الناس ديل وقارش ملحتهم ، إنه الناس دي ماليها أمان ابداااا!!
ومستحيل يجي منهم خير! والدلائل والبراهين زي الشمس!!

عشان كده نقولها بكل ثقة ويقين إنه العالم دي عندها أجندة خبيثة دايرة تمررها عليكم بي طريقة (الكيشة غيرلوا )!!
والحوار معاكم ما عشان سواد عيونكم،و لا عشان مصلحة الفضل من البلد؟؟
لكن الناس دي اتزنقت لامن قالت الروووب،و بفتشوا ليهم في مخارجة بالدهاء والخبث البائن في مبادرتهم ! عشان يفلتوا من المحاسبة
وعشان يضمنوا يخلي ليهم(رواب) من عقابهم يخمر ليهم باقي الفضل من مال الغلابة ويقضوا عليه زي النمور!!
ضاحكين عليكم بي نفس الناس ونفس العمم والدقون, ونفس الحيلة المشرورة في السهلة بالعرض والطول!

يعني معقول حكايةإطلاق سراح السبعة معتقلين تحل أزمة المعتقلين السياسيين في كل البلد؟
وييين باقي الشباب والحرائر في سجون النظام الخائن؟
في ناس إتسجنوا قبل المجموعة الأخيرة دي! ولسة محجوزين وكتير منهم ما معروف مكانهم!ده غير السجنوهم وفكوهم ما عارفين سبب جريمتهم الحبسوهم فيها!وقبضوا بعضهم من المطار زي كأنهم قاتلين ليهم رقبة!!
في حين قاتلين الرقاب ساكنين في ناطحات السحاب، بنهب البلد والخراب!!

والمبادرة للحوار الجات في الزمن البدل الضائع تفتكروا حاتحل مشاكل ال 23 سنة الفاتت ؟
من دمار وقتل وسحل ونصب وإغتصاب ؟ ده كلو دايرين تحلوه بالمطالب الكتبتوها في ربع الصفحة دي؟
وييين محاكمة اللصوص؟ ويين حق البلد الراح وما زال رايح قدام عيونكم وفايت اضانكم بي هناك؟
قبل ما تقعدوا لي حل مطالبكم إتبرع أسد البراري رئيسنا النتر لي جارة الوادي وشقيقة بلادي.
بي 2 مليون فدان منطقة صناعية جنوب الجيلي!! حسب ما جاء في الشريط الإعلاني في التلفزيون القومي !!!
شاورت الشعب يا رئيسنا في الهدايا البي الجملة دي؟المصريين ديل ممكن في يوم يدوك شبر واحد في الصحراء الهاملة ؟
ولا حتى درابة من تراب بلدهم؟ والله إن مت في بلدهم يبيعوا ليك شبر القبر!!!
ثم تانيا هل المصاروة ديل رجعوا ليك حقك من تراب بلدك؟ ليه بترضى بالحقارة من ناس سي مرسي؟ وبتقابلها بالهداية الثمينة !!
وبتحقر بي الغلابة من شعبك الصبر عليك صبر أيوب؟؟ طالباك مغسة في الشعب ده وداير تعدموا التعريفة؟ وتخرب الفضل ؟
ما خلاص خربت واصبح باب النجار عادم المسمار! وبرضو بتجود على الجيران والشعب عدمان ومرضان وجيعان وطفشان!!!
حسبي الله ونعم الوكيل.... يمهل ولا يهمل

متاوقة
يا ناس الحوار راجعوا مواقفكم ، ما تنطلي عليكم حيلة الثعالب !!مع إحترامنا ليكم ما تبقوا زي حكاية الكيشة دقوا واتعضرلو!! أي ما معناه (( إعتذرلو))
التغيير واجب وطني بإزالة النظام من جذوره بدون شروط ومحاسبة كل المفسدين!!!



[email protected]


تعليقات 10 | إهداء 3 | زيارات 2184

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#631710 [Fenkooosh]
0.00/5 (0 صوت)

04-08-2013 12:18 AM
عجبنى امبارح ود البرير استقال على طول و فى مؤتمر صحفى و قال حاول يمشى بالهلال لى قدام و لكنه لم يوفق ....عشان كدة داير يفسح المجال لغيره....زولك دا يا بت الجنيد كان اصلو ما داير يترشح تانى ماكان يكتم الموضوع دا فى صدره و يختو تحت طاقيته لامن يجى زمن الترشيح و يتقدم كل المرشحين النازلين ضده ....حتى البجيبوهم كديكور للمنافسة من احزاب الفكة او حتى من المؤتمر الوطنى زاتو .... و يدخل دار المفوضية فى اخر تلت ساعة و الجماعة يدفعو الرسوم و يجهزو الأورنيك و فجاة يقول انا داير أخاطب الناس بتاعين الأعلام ديل قبل التوقيع على الأورنيك (المعبى) من بدرى و عندما يصطف ناس الأعلام المحليين و العالميين و تنصب مايكروفونات القنوات المحلية و الأجنبية....يقوم (دلللللللل) يفجر القنبلة و يعلن عدم ترشيحه و عزوفه عن خوض تجربة أخرى فاتحا الباب بذلك لمن يأنس فى نفسه الكفاءة بل و يحلف بالطلاق انه ما حيتراجع عن الكلام دا .....و على بال ما الجماعة يجيبو الأجاويد... و يلقو ليهم فتوى للطلاق دا... عشان يثنوه عن قراره هذا يكون زمن المفوضية الأصلى و الأضافى للترشيح انتهى و ال (سيستم )قفل ما أصلو زى بتاع الفيفا... زولكن دا يابت الجنيد ما أظن سمع بى أوباسانجو الرفض الترشح مرة أخرى و قال داير يكمل تعليمه و لا أظنو سمع بى مانديللا ...اعتبرى يا بت الجنيد دى متاوقة تانية زى كسرات جبرا التانية.....و سلامى ليك يا بت الحلال.


#631450 [mansour]
0.00/5 (0 صوت)

04-07-2013 05:55 PM
هي ماها الكيشه دقو واتعضرلو هي اللضينه اكفتوا واتعضرلولكن جنس رجالتك اكان لقوها ناس التجمع اكان قالوا غير كلامن الناعم دا واللخير منو اكان سكتوا


#631247 [عبد الله]
0.00/5 (0 صوت)

04-07-2013 03:18 PM
اسد البراري دا البقلعوا منو بعد ما الشباب كلو هاجر والباقي ملهى فى التنقيب عن الذهب
اقولها صريحه للاسف البشير سيظل رئيسا الى ان يتوفاه الله وبعدئذ سيكون ريئسنا نافع على نافع الى يتوفاه الله وبعدها سيكون ابنه محمد


#631015 [fadeil]
0.00/5 (0 صوت)

04-07-2013 12:13 PM
هذا هو الرأى السديد يا بنت الجنيد وعلي ععقلاء القوم الاهتداء به لأن الشعب السوداني اليوم يرقد في غرفة الانعاش منتظر النقاله الي القبر .


#630657 [mohamed]
0.00/5 (0 صوت)

04-07-2013 03:31 AM
اسم الدلع الجديد للبشير ابوقنقر بدلا من بشبش الذي اهلكه حتي اصبح بشبوش


ردود على mohamed
Sudan [mansour] 04-07-2013 05:56 PM
بالعكس يامحمد اسم الدلع الجديد شبشب


#630584 [سودانى غير منفرج الأسارير]
0.00/5 (0 صوت)

04-07-2013 12:47 AM
ولعلمك يا بت الجنيد اسد السودان مشى اثيوبيا يحضر افتتاح مركز تخليد ذكرى ملس زيناوى واتبرع باتنين
مليون دولار للمركز .. والسيسى - الما عندو وجود دستورى ولا عندو سلطات او مهام محدده فى الدستور او فى اى قانون - ضارب الرورى يلهث ويجرى يمين وشمال داير قروش .. يعمل بيها شنو ..؟.. وكل ولايه عندها والى وحكومه وبرلمان وميزانيه ومسؤوليات محدده وما شاغله نفسها بيهو ولا بحكومتو الما معروفه وين.. ويطلع شيطان الكوشه كدا فجأة ويقول انو اهل دارفور معتمدين على تبرعات المانحين (اللى قطر عاملا ليهم مؤتمر يبدا باكر ألأحد) لتنمية واعمار دارفور ... دارفور اللى كانت بتكسى الكعبه المشرّفه يجى آخر الزمن شيطان الكوشه يخليهم يعتمدوا على الهبات والمنح اللى حيروح تلاته ارباعها فى جيوب الشياطين والأبالسه الفاتحين خشومن وراجين المانحين .. همن المانحين ديل الآ يكون فى روسينم قنابير وريالتن سايله .. شايفين رئيسكم يتبرع بمليونين دولار لأنشاء مركز لزيناوى فى اثيوبيا .. عجبى!!!


#630409 [omda]
0.00/5 (0 صوت)

04-06-2013 08:17 PM
صدقتى والله ربنا يحفظك لقلمك لكن المشكلة انو الحكومة وناس الامة وناس الميرغنى الثلاث احزاب دى عبارة عن اصهار ونسائب وشركاء فى البزنس ومصايف لندن وماليزيا اهل رسمى كده نحنا محتاجين ثورة اومصيبة تاخدم كلهم هم وشوية احزاب الفكة


#630369 [البعير]
0.00/5 (0 صوت)

04-06-2013 07:35 PM
أحييك بنت الجنيد لشجاعتك وقول الحق واعجبني هذا الكلام (ثم تانيا هل المصاروة ديل رجعوا ليك حقك من تراب بلدك؟ ليه بترضى بالحقارة من ناس سي مرسي؟ وبتقابلها بالهداية الثمينة !!
وبتحقر بي الغلابة من شعبك الصبر عليك صبر أيوب؟؟ طالباك مغسة في الشعب ده وداير تعدموا التعريفة؟ وتخرب الفضل ؟
ما خلاص خربت واصبح باب النجار عادم المسمار! وبرضو بتجود على الجيران والشعب عدمان ومرضان وجيعان وطفشان!!!
حسبي الله ونعم الوكيل.... يمهل ولا يهمل)


#630185 [karkaba]
0.00/5 (0 صوت)

04-06-2013 03:50 PM
اشد من ازرك اوفيت وكفيت


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة