وقائع
01-09-2016 08:09 PM


*علم نفسك ما تحتار.. وصدق كل الما معقول..
خلي المنطق بره حسابك.. وأوع تخطط للمجهول..
ما في ظروف بتوافق ظنك.. وبكرة تقيف في الصف مذهول..
كم قبالك ياما اتخذلوا.. عادي بتحصل لي كم زول..
كم في الدنيا غرام اتبدد.. وكم في الريد احتاروا عقول
علم الحب ما عندو نتائج.. ولا في المدرسة ليهو فصول..
ممكن فجأة حبيبك يقسى.. بعد الحب الكان مبهول..
ولو ظنيت الفرقة خرافة.. تبقى براك إنسان مخبول..
دون أسباب الناس تتغير.. مهما سنين الريدة تطول..
وحسن الشاطر ينسي الفكرة.. وفاطمة السمحة تحب الغول!!
***
دايماً خلي في خطة بديلة.. وافتح برضك خط للرجعة
علشان تبقى الصدمة خفيفة.. وما تتحكم فيك الوجعة
ممكن طعنة تجيك في ضهرك.. وألمك يصبح ضيف الهجعة
فجأة بدون انذار يستوطن.. وإنت تفتش سكك النجعة
سهام الغدر قريبة وجاهزة.. وبكرة حمامنا يجافي السجعة..
****
واحذر أكتر من أحبابك.. أصلو عدوك في الآخر ظاهر..
كعب الزول الياكل ملحك.. وعشرتو ليك في الأصل مظاهر..
ياكل لحمك كل ما يقدر.. ووين ما يلقى حضور منابر..
يكشف كل أسرار أيامك.. ويكسر فيك الروح والخاطر..
وقدر ما كنت مثالي وعادل.. زولك يصبح ظالم وجائر
أصلو الزول تحترمو يدوسك.. وتأمنو يصبح خاين وغادر..
ويوم تديو بالجزمة يدورك.. ويضحك ليك لي ضرسو العاشر..
الإنسان مخلوق متناقض.. مرات صافي ومرات ماطر..
وأوعك تأمن جانب واحد.. وثقتك كلها بيها تغامر..
أي علاقة مع البني آدم.. ما مضمونة.. وليها مخاطر..
مهما يكون في خاطرك غالي.. ومهما يكون في ظنك نادر..
برضو ضروري تعود نفسك.. كيف تتريث.. وكيف بتحاذر..
أصلو حياتنا دروس ومواعظ.. وقدر ما تربح برضك خاسر..
وقدر ما تدرس برضك جاهل.. مهما كنت حصيف ومعاصر
و(الأفلام) لابد حتصادفك.. القدامك هسه مناظر !!
تلويح:
لا تأمن دهرك.. فكل شيء في هذه الحياة محتمل الحدوث.. لا سيما الوقائع التي لم تتوقع حدوثها من البعض أبداً

اليوم التالي


تعليقات 5 | إهداء 0 | زيارات 3084

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1399346 [السايس]
0.00/5 (0 صوت)

01-12-2016 10:34 PM
هذا تفكير سيى و عقلية رديئة تحرض و تدعو الى سوء الطن بالناس - يا استاذة مفروض تدعى على حسن الطن بالناس و ليس العكس .

[السايس]

#1398553 [مصطفى]
0.00/5 (0 صوت)

01-11-2016 03:05 PM
اجمل طريقه للتعبير عن الواقع وقد كسرتى مقولة اعزبه اكزبه وقد جمعتى بين صدق الشعر وروعة جماله

[مصطفى]

#1397905 [سوداني حتى النخاع]
0.00/5 (0 صوت)

01-10-2016 08:12 AM
لك التحية أستاذة/ داليا-فما ذكرتيه هو فعلاً ما يحدث من بعض البشر الذين لا يقدرون المعروف . و أحياناً يتنكر للمعروف أقرب الناس إليك.
إن العيب في البشر وليس في الزمان. وفد صدق الإمام الشافعي حين قال:
نعيب زماننا والعيب فينا++++و ما لزماننا عيب سوانا

[سوداني حتى النخاع]

#1397888 [يحىى هارون جبريل]
0.00/5 (0 صوت)

01-10-2016 07:30 AM
الله عليك يااستاذه دالياالله يخليك ويزيدك فهما وعلما

[يحىى هارون جبريل]

#1397804 [السيد محمد حسن]
0.00/5 (0 صوت)

01-09-2016 11:45 PM
سلمت يداك استاذة داليا ولا فض فوك وانتي تنشرين هذا الالق والجمال ولا تهتمي بنظرات المتشائمين والمثبطين فالاشجار المثمرة غالبا ما ترمى بالاحجار وخاصة في هذا الزمان الغابر

[السيد محمد حسن]

داليا الياس
داليا الياس

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة