أقرع ونزهي !!!
04-08-2013 08:29 PM

من يهن يسهل الهوان عليه ! البلد هانت على شبابها والشعب هان على أولي الأمر !!
والخلاصة إنتهى البلد كلو للأسف داخليا وخارجيا!
لكن الوجعة في ضياع السمعة الخارجية الكانت زي الدهب الذي لا يصدأ ابدا!!!

علاقتنا الخارجية إنتهت نهاية مؤسفة، قدر الدمار الحصل في البلد وقطعوا الشعب في بطونه المهرودة مغائس !
الشعب الممكون وصابر على الرئيس وسياسته وناسه الملقطهم بعناية حسب فهمه وتصرفه وإشباع غرائزه!
لكن الموجع المبكي ما دمرته الحكومة فقيرة الدبلوماسية في علاقات البلاد الخارجية !
مرمطت سمعة السودان في الوحل بالشحدة مرة والتصرفات الهوجاء مرة أخرى.
وعدم المسؤولية ووضع الشخص الغير سليم في مواضع حساسة مثل وزارة الخارجية!

البلاد الفاهمة معنى الدبلوماسية، بعرفوا يختاروا الرجل السليم في المكان السليم.
لأنه وزير الخارجية هو البغير أوضاع بلده للأحسن، وبحلو الخلافات والمشاكل وبصفي النفوس مع كل الدول بحكمة ودراية.
من أجل مصلحة بلده وشعبه ، بإسلوب الدبلوماسية والحكمة! حتى الإنفتاح في كل المجالات مع الدول الأخرى بكون على عاتق وزير الخارجية.

لكن نحن نحمد الله وزير خارجيتنا تاجر سيخ وأسمنت, همو كلو الأسمنت بي كم ؟ وكوم الحديد بي وين؟
شحدتو زاتها البشحدها بي إسم البلد، ما بشحدها من الحكومات زي باقي الدول الفقيرة !!
حتى شحدتهم من الأفراد ورجال الأعمال والقطاع الخاص ! يعني حتى الدبلوماسية في الشحدة ومد القرعة ما بعرفوها !!
قعدة زي الناس ما بعرفوا يقعدوها!! ناهيك عن لباقة الإسلوب وفن الخطابة والدبلوماسية المحنكة!

حكومة مرتجلة وناسها مرتجلين،العمل الدبلوماسي ما حاجة ساهلة،يفترض شهاداته تكون من نفس المجال وفوق للجامعية.
لأنه الموظف الدبلوماسي قنصل أو قائم بأعمال لي سفير لي وزير خارجية ،هو واجهة الوطن ولسان حال كل الشعب.
يفترض يعكس جمالياتنا وثقافتنا وخلقنا الرفيع واخلاقنا السمحة، مش اي موظف ولا عنقالي يختوه في مركز حساس زي ده !!

حليل الدبلوماسية في عهد رجالنا الراحوا مع الزمن العديل وسمح !كان السودان الساس والرأس،من زمن جيل البطولات والتضحيات ورجالنا الكانوا رجال مشيتهم في الواطة محسوبة، وكلمتهم لها صدى في كل الأوساط!
ناس المحجوب والأزهري وعبد الله خليل وعبود وغيرهم من الأبطال الأشاوس العلموا الغير معنى لغة الحوار ومعنى الدبلوماسية المحترمة .
رفعوا إسم البلد وعلموا في العلالي بالعزة والكرامة والشجاعة والشموخ والحكمة .

لكن الكيزان دخلوا تجار بإسم الدين , وبدوا يحلقوا في البلد ,, بدوها من فووووق, حلاقة صلعة! من خط هيثرو والشعب ساكت !!
نزلوا شوية شوية حلقوا ونضفوا البلد من مجاميعو وبرضو شعبنا ساااكت وبعاين بس بي عيونو !!
ولسة طالباهم مغايس في الشعب المستكين ! بقوا يمسكوا الشباب في الشارع ويجزوا فيهم زي البهائم الله يكرمكم!! مذلة ما بعدها مذلة !!
حتى لو داير توجه الشباب , إحترم آدميتهم وإنسانيتهم, بدل ما تهجروهم في الشوارع زي النكرة وتعولقوهم أمام خلق الله !!
أتقوا الله ديل برضو مارقين من بطون الشعب الصمت عليكم ربع قرن!!!

ده كلو هين إستحملنا الوجع الجوةالبلد والأمر منه!! لكن الما قادرين نبلعه العلاقات الخارجية الوصلت مرحلة الأضحوكة .
حتى الرئيس الفرحانين بي زيارته ليهم ، من نفس طينتهم ، زولهم و منهم وفيهم! توأمة في كل شيء ، صورة وصوت ومضمون وهدف !!!
مشية في الواطة ما بعرفها سي مرسي!. بالله إنخلع وإتهجم من الحرس المرافق في لحظات وصوله البلاد، وقف متنح على قول سمير غانم !!
وبعد ده حقارة معتبرة من إعلامهم وشعبهم الما داسيها ابدااامصرحين بيها وماليين بيها كل صفحاتهم الإعلامية!! كل إعلامهم وشعبهم يردد حلايب وشلاتين مصرية !!
ودي ما أول مرة من جيرانا المصاروة، قبل كده في مباراتهم مع فريق الجزائر في وسط بلدنا، فتح ليهم البشير المطار على مصراعيه! حتى الفيزا المعروفة في كل البلدان, دق صدره وحلف منها !! مع إنه ظروف زي دي الناس بتستثمرها لمصلحة البلد، وده شيء طبيعي!

وغير إسلوب إستفزاز إعلامهم وتصريحاته ومقالاته الكتبها في المجال ده، من جانبنا صحفى واحد ولا صحيفة ما إتصدت وكتبت تصحيح معلومات أو رد عليهم على أقل تقدير من باب الوطنية !!
أخدوا راحتهم على الآخر أتبجحوا طيلة أيام مباراتهم مع الجزائر وهزيمتهم, فشوا غبنهم فينا وسبونا عينك عينك بي تصريحات تلفزيونية مصورة ومعلومات كلها كاذبة في حق الشعب السوداني الإستضافهم بي طيبة خاطر
!!
ايضا صحافتنا وإعلامنا سكت وعمل رايح ! خاصة الصحف وقنوات التلفزيون! اللهم إلا بعض ردود الفعل الفردية في بعض المواقع اللإلكترونية.
عشان كده ليهم حق يأكلوا حقنا ويستوطنوا جوة بيوتنا زاتها ويستفزونا!
ويجي زي الحضري لاعب عقاب عمر يضرب ليه كم مليار ويضحك على أهل الدار، لا لعب ولا كلمة طيبة ولا تقدير للعشرة والزمالة !
ويرجع بلده كسبان ويخلي ناسنا يعضوا في أصابع الندم الما بتفيدهم ابدا !!!


الإتنين مليون فدان اللسة بنات عمها ما سمعن بيها طبوها وسكتوا عليها لا شكرة ولا حمدة، بل العكس مصرحين بي قوة عين وبجاحة في إنه حلايب وشلاتين حقتهم براااهم!
لسة رئيسهم قاعد في بلدنا ومتفسح وشبعان لي إضنيهو وطابي الهدايا لي بلده ،وشعبو وإعلامو ضاحك علينا وعلى عبطنا وهملة حقوقنا ومذلة الرئيس لشعبنا!!

والله البعمل فيه البشير ده من هدايا ومنح من حق الشعب لي جيرانه! لو كان ربعه عملوا سي مرسي ! كان شعبه شنقوا واقف طولو في ميدان التحرير!
رغم الوجع ده والحقارة دي ، لكن اثبتوا إنهم شعب مصادم ووطني حد النخاع, لو البشير طبق السودان بي النيلين الإتنين.
وطب الشعب ده كلو واداهو ليهم, هم ما بتنازلوا ولا بفرطوا في حقهم وحتى الما حقهم البلقوا فيه فرصة!!
السر شنو في إنبطاح البشير وهوانه للشعب المصري ورئيسه بالصورة المخزية ومخجلة دي؟ يا ريت لو بتجيه براه! لكن للأسف بتعم كل الشعب المغلوب على أمره

ليه ما سأل الشعب نفسه حسني مبارك لم يزور السودان في عهد الكيزان ؟ وكان كارهم ومعلنة صريحة ؟ حتى قبل حادثة محاولة إغتياله؟
منو الرئيس ولا المسؤول المحترم الزار البلاد في فترة حكمهم؟ وين الإنجازات المهمة القامت بيها وزارة خارجيتناالمن يومها في وادي والدبلوماسية في وادي آخر؟
اي وزير عينوه كان اهم شيء كيف يعرف يقول ادوني ويمد القرعة!!! نشحد ونقسم !! إنطبق علينا المثل البقول أقرع ونزهي !!
دار فور محتاجة لي اي مليم طائر بعدما دمروا أي ركن فيها, والرئيس يهدي 2 مليون دولار لمؤسسة ملس زيناوي!!!
2 مليون دولار؟؟؟ عليكم الله في ظلم وحقارة أكتر من كده ؟
مدام اصلا في مبالغ زي دي للهدايا والهبات مش أولى بيها الشعب الجيعان ده؟
واولى بيها مؤسساتنا الصحية الأصبحت عبارة عن مراحيض مهجورة الله يكرمكم، رائحتها تطفش الذباب !
البعمل فيه الرئيس ده شيء واحد ما ليه شريك, هو ممغوس على الشعب الأبدا ما فوزو في إنتخابات.
ممغوس على الشعب المثقف ومتعلم،عشان كده طفش الخيرين منه!
وبدأ يربي جيل زي نوع البمسكوه من الشارع ويهجروه ويحلقوا ليه ما يقول بغم!!

شكل شريحة معينة من الشباب وشغلوا في إمور هامشية ، وطلق الفساد فيه زي النار في الهشيم!
ونجح تماما في تدميرنا داخليا وخارجيا ! تدمير كل شيء من صحة وتعليم وإقتصاد, حتى المعنويات دمرها وقضى على كل شيء!!!!
محتاجين تعمير من نقطة الصفر وتغيير كامل من الجذور لكل شيء، حتى المناهج الدراسية محتاجة تغيير وتنقيح من أجل جيل واعي في المستقبل.
نسأل الله ان يخلص الوطن منهم ومن مكرهم،وأن يسهل على أهلنا الغلابة،ويبدل هؤلاء القوم بأفضل وأبرك منهم، من أبناء البلد الصالحين المخلصين المتعلمين ومثقفين يقودوا البلد لضفة الأمان.
لذلك نكررها ونعلنها صريحة للملأ لا حوار ولا تفاهم مع أي كوز ولا مع أي حزب ولا أي أتباع لهم ! يجب جزهم جميعا من الجذور، وغسل الوطن وتطهيره من رجزهم فورا!

متاوقة
نتمنى بعد ان يخلصنا الله من بنو كوز ! أن يتغير كل شيء يذكرنا بهم إبتداً من العلم.
يجب ان يرجع علم السودان الذي رفع يوم دحر لإستعمار.
نحتاج رفعه مرة أخرى حين نحرر البلد من إحتلال الكيزان ، قريبا إن شاء الله
يمهل ولا يهمل

أسماء الجنيد
[email protected]


تعليقات 6 | إهداء 3 | زيارات 2533

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#633391 [ابوبكرنك]
0.00/5 (0 صوت)

04-09-2013 06:08 PM
الرجل المناسب في المكان المناسب وليس الرجل السليم في المكان السليم يا بنت الجنيد


#633286 [أبو سامي]
5.00/5 (1 صوت)

04-09-2013 03:53 PM
بت الجنيد مشكورة على هذا الدرس العميق والرائع. حقيقة ما خليتي حاجة للجماعة وكله كلام في الصميم أستغرب جداً كيف ينبهل هذا النظام الخاوي من كل مضامين الكرامة والكبرياء في تعاطيه مع الخارج مهما قل شأنه؟؟! ودون أي إعتبار لمصالح بلادنا المهملة مع دول الجوار ورغم الشظف الذي يعيشه شعبنا يبدد البشير في أموال لا يملكها وكأنه ورثها من أجداده لدول لا زالت تحتل بعض أراضينا في الفشقة.. هذا هو الجنون المحض أو الخوف الأجوف ليس إلا.
أما حكايتنا مع مصر فحدث ولا حرج فلا توجد دولة عربية واحدة تدلل مصر كما نفعل بل بالعكس فالمصريون في كل دول العالم العربي لا يتمتعون بأي إحترام رغم ثقلها السياسي في المنطقة ولكن في حيكومة ناس آخر زمن أولاد الشحادين زي ناس البشير و مصطفى الذين صرف عليهم الشعب من دمه وعرقة حتى أصبحوا من الأوادم لم يتركوا إهانة للشعب إلا وبادروا بها دون أن يرمش لهم طرف... ما عارف ليه الناس ديل حاقدين على هذا الشعب كل هذا الحقد.. يا ربي يكونوا بتفشوا فينا فشلهم المستمر أم ماذا

الحل واضح وما فاضح .. يجب أن نعمل بكل الوسائل والطرق لإزالة هذا النظام الإخواني الإنتهازي اللصوصي وكل شلة الحرامية بكل الوسائل المتاحة ... لوكان هناك فكر دبلوماسي سليم كان يمكن للسودان أن يلوح فقط مجرد تلويح لمصر بإحتمال تضامنه مع دول منبع حوض النيل فيما يخص إتفاقية مياه النيل وكنا حانشوف الجماعة يجقلبوا كيف

أرفع لك قبعتي إجلالاً وإحتراماً لقلملك الغيور وربنا يحميك


#633024 [هادي]
5.00/5 (1 صوت)

04-09-2013 11:41 AM
غايتو كلامك دا لو قروهو السودانيين كلهم باكر تقوم ثورة ،، نحن محكومين من مجموعة ناس عويرين -أي والله- انظر لهم كلهم من اولهم لآخرهم، من البشير العوير وعبدالرحيم الخلاقة وامينهم العام الاهطل،والبقية الباقية من الهبل الخايسين، والله زي وزير الدفاع دا ما ينفع وزير عريس،،ديل عايزاهم يطلع منهم دبلوماسي نافع؟ يدبلهم في رقابهم الاتنفخت من مال الشعب الغلبان دي،،والله والواحد من الزعل ما قادر يكتب ،،،


#632640 [ود يعقوب]
0.00/5 (0 صوت)

04-08-2013 11:44 PM
يا بت الجنيد
كل شئ الا العلم
علمنا دة اجمل علم فى الدول
وما ليه اى علاقة بأى حكومة او جزب

خلونا من العصبيات الفارغة
عاوزين ترجعونا للعلم القديم ؟؟
عليك الله حطى العلمين قدامك وانظرى ليهم
مرتين وقارنى .


ردود على ود يعقوب
Saudi Arabia [مدحت عروة] 04-10-2013 10:28 AM
ياود يعقوب العلم القديم هو علم الاستقلال ومهما كان شكله فهو يمثل عزة وكرامة واستقلال السودان واتى بموافقة الجميع فى نظام ديمقراطى حر ولم يفرض من قبل نظام ديكتاتورى فردى!!!
العلم الحالى فرضه النميرى بحجة ان الجامعة العربية وصت باتخاذ الدول العربية اعلامها من هذه الالوان وهو قرار غير ملزم واختيارى طوالى نميرى قام بتغيير العلم على اساس ان السودان هو دولة عربية وهذه هى مصيبة السودان التخلى عن هويته المميزة والتى هى خليط من الافريقية والنوبية والعربية وغيرها واللهث وراء الهوية العربية التى ياتى فى مؤخرتها!!!!هسع عليك الله العلم القديم والسوداناوية واتباع النظام الديمقراطى زى الهند مثلا وبنكهة سودانية واسلام وسطى متعايش مع بقية الاديان مش كان بقينا دولة محترمة ينظر اليها العرب والافارقة باعجاب بدل هذه البهدلة والبشتنة اللى نحنا فيها؟؟؟
ياخى حريقة فى الكلية الحربية التى هى سبب كل هذه البلاوى وحريقة فى السودانيين البيزينوا للعساكر ان حواء السودانية ما جابت زيهم لحكم السودان وعاين ليهم اكثر من 45 سنة والبلد منزلقة الى الهاوية ولم تستقر سياسيا لحد هسع!!!!
شفت لى صورة فى استاد الخرطوم فيها نميرى والقذافى وعبد الناصر قربت اطرش!!!!

Sudan [الكوشى] 04-09-2013 02:20 AM
يا ود يعقوب كىف حالك

الظاهر عليك انت ما حضرت الاستقلال و رفع العلم

اولا العلم الاصلى رفع مع اول ديمقراطيه

ثانيا العام الحسه ده علم الدكتاتور نميرى

انا و الشعب كلو مع العلم القديم

وتحياتى خالصه لك

Sudan [أبواحمد] 04-09-2013 01:55 AM
يا ود يعقوب كفاية علي علمنا الاصفر و الازرق و الاخضر ان فتحنا عيونا عليهو مع خروج المستعمر .. و فرط فيه نميري بالوانه البسيطة الزاهية في تضامن مع بعض الدول العربية .. حتي بات من الصعوبة تفريق علمنا الجديد من اعلام اليمن و العراق والاردن و فلسطين ومصر التي تزدرينا شعبآ و حكومة باحتلال حلايب .. و لبنان التي صوتت ضد انضمامنا للجامعة العربية .. بينما تمسكت دولآعربية اخري باعلامها القديمة كالسعودية و قطر وليبيا و تونس و المغرب و الجزائر .. ولسخرية الاقدار فقد استحوذت دولة الجابون علي علمنا القديم بعد استقلالها .


#632608 [كاره جدا للكيزان والمتأسلمين]
0.00/5 (0 صوت)

04-08-2013 11:03 PM
يسلم قلمك يابت الجنيد والله انك قلتي كل الكلام البدور في عقولنا ...بس نسأل الله ان يخلصنا من البشكير الاهبل العوير وزمرته من المنتفعين تجار الدين المنافقين لعنهم الله اينما حلوا...


#632603 [سودانيه زعلانه بالحيل زيّك]
5.00/5 (1 صوت)

04-08-2013 10:58 PM
واللاهى الذى لا اله غيرو ..ما فضل شي مانقال يا اسما يا بتّى.. لاكين كدى النسألك المانحين الفى الدوحه مجتمعين ما سمعو بالمليونين المشن لا ايدين لا كراعن للمركز الثقافى العملوه " ألأثيوبيين قالو يتذكرو بيهو رئيسن المات ما مسلم .. هو جابن من وين .. دفعن من جيبو قروش حاضرات ولا شيك .. يشكك اللآ نام ولا اكل الطعام زى شكة الغزافى يا بعيد... غايتو .. جنس .. غايتو .. دا شي اصلو ما معقول ..زى ما كانو بغنّو زمان .. "البغيته تعمل كدا فى زول" !!.. المليونين ديل ما كان سوّن وسوّن الكتير وبالزايد شويه لناس دارفور الطيبين اللقرأن حافظين الشردتهن انت والمجنون السيخه والعوير الودّيتو ليهن حاكم وبكل عواره قاليهم يا ناس دارفور حقّو تنبسطو جاكم حاكم بروفسر.. دارفورى سأل اخيّو .. بروفسر دا شنو يا خيي؟ اخيّو قاليهو : برفسر قالو تقرا تقرا تقرا لمّن تشوطن .. كم بير كانن حفرنّها المليونين ديل .. الراجل دا الا كان جنّ ساكت .. هو من سغرتو ما كان نصيح .. البضرب امو الولدتو ورضعتو .. الله ينتقم ليها حق شطورا وحكورا .. نحنا السودانيين هينين .. وشوفو عليكم النبى كمان اب تفه .. قال شنو .. قال تعمير دارفور منتظر قروش المانحين .. يقرش لى حليقيمك يا يابا ..عساكر الديش مالن ما شايفين تفتو دى.. مالن ما مسكوه وختوه فى الواطه وزعطوها ليه وخلّوهو صلعه !!! يا كان اندسّ من الناس و كان ظهر تانى الناس ما كانت عرفتو بعد خليقتو ما تتغيّر..


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة