المقالات
السياسة
ارشيف مقالات سياسية

11-19-2010 11:33 AM

بسم الله الرحمن الرحيم

حاطب ليل

عبد اللطيف البوني
aalbony@yahoo.com

ابو عركي ودلوكة خمجانة

(1 )
في اول ايام العيد وفي سهرة التلفزيون الاتحادي ظهر ابوعركي البخيت بكامل حلته وغنى ( سهرنا الليل وكملنا في ظلال عينيك النعاسة/ يانور النوار يانورة / يافرح الافراح يابلورة) وغنى (بخاف اسال عليك الناس وسر الريدة بينا يذيع ) وغنى (عن حبيبتي بقول لكم لونها سمرة منكم ) لقد غاب ابوعركي عن التلفزيون عشرين عاما اي منذ مجي الانقاذ في يونيو 1989 لقد غادر ابوعركي التلفزيون والشعر في لون الدجى ولكنه عاد به في (الليلة ديك) صباحا مسفرا لقد ترك الزمن بصمته على ابي عركي ولكن صوته مازال نديا و تطريبه مازال عاليا ومسيرته الصاعدة مازالت مستمرة فاسمعه وهو يشدو( ياقلب انا كنت قايلك تعبت من السفر/ ومن مخاواة القماري ومن شراب موية المطر/ اتاريك كامن لي بشيتا كتر) لم تكن جلسة فنية لكي يسال ابي عركي عن اسباب غيبته الاختيارية واسباب عودته بل كانت السهرة مسرحا على الهواء مباشرة . ابوعركي فنان كبير وانسان مرهف يعرف كيف يحسب خطواته فالرجل توقف بطوعه وعاد الان بطوعه فهو حر ولامجال لكان المفروض وما كان المفروض فالحكاية حكاية فنان مارس حريته الفنية
(2 )
التسجيل لاقتراع تقرير المصير في الولايات الجنوبية بدا بصورة قوية ابتدره الرئيس سلفاكير شخصيا وهو يسير بذات قوة الدفع الاولية وصاحبته شعارات مثل ( وداعا مندكورو) و (حرية حتى القيامة) اما في الشمال فمازالت مراكز التسجيل تشكو قلة الزوار . يبدو لي ان مشكلة الجنوبيين في الشمال انهم اذا صوتوا للانفصال سيفوزوا بغضب حكومة الخرطوم واذا صوتوا للوحدة سوف يفوزون بغضب حكومة الجنوب وبهذة المناسبة اذكر انه في برنامج عدد خاص الذي تبثه قناة النيل الازرق قمنا (الزميلة منى ابوزيد وشخصي وفريق البرنامج) بعمل ميداني وكان سؤالنا للاخوة الجنوبيين عن رايهم في حكاية الوحدة والانفصال فكل الذين يقولون بالوحدة اعذروا عن الوقوف امام الكاميرا لتسجيل موقفهم اما دعاة الانفصال فكانوا يتسابقون نحو الكاميرا كان ذلك في فبراير الماضي
(3 )
الفضائيات السودانية التي بدات تتكاثر بمتوالية عددية وبعد اعوام ان شاء الله سوف تتناسل بمتوالية هندسية احسب انها نعمة فقد حبست المشاهد السوداني في الاطار السوداناوي فقد لحظت ان المواد المستوردة فيها قليلة جدا في ايام العيد ممايشئ بان المجتمع السوداني ملئ بالحيوية والابداع واكبر عيب في هذة الفضائيات اكثارها من الغناء ثم التكرار بيد ان البحث عن التفرد بدا يظهر منذ الان وسوف تتميز كل قناة بلونية معينة فالذي يحدث الان يمكن نعزيه لصعوبة البدايات لاسيما وان هذة الفضائيات بدات كلها في الظهور في وقت واحد انها الام التسنين وحتما سوف يتم تجاوها اذا امد الله في عمرنا وفي عمر الفضائيات والاهم في عمر السودان (ذات نفسيه).
(4 )
قدمت قناة النيل الازرق سهرة كاملة بمغنيات الدلوكة وكذا فعلت قناة هارموني وفي كلا الحالتين كانت دلوكة خمجانة بحق وحقيقة لقد اعادت السهرتان الي الاذهان الطرب الفلكلوري البناتي السوداني الاصيل سهرة النيل الازرق بذل فيها مجهود كبير اما سهرة هارموني فقد كانت احسن تنظيما . طلبت من حفيدتي وهي مدمنة تلفزيون خاصة اسبيستون ان تشاهد جزء من احدى هذة السهرات فردت على بعجرفة شديدة قائلة (انا ما بشاهد حاجات ذي دي)


تعليقات 8 | إهداء 0 | زيارات 4377

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#47975 [مهاجر]
0.00/5 (0 صوت)

11-21-2010 02:55 AM
سودانيه انتى شنافه بس السهره حلوه شديد وعجبت الناس كلها الا انتى ...... وبعدين هى اغنى دلوكه وهجيج مش محاضره عن الفن السودانى ياميه الميه


#47890 [سودانية مية المية]
0.00/5 (0 صوت)

11-20-2010 05:46 PM
تصحيح واعتذار .في التعليق الاول الدندر = الدنغر


#47761 [عاطف]
0.00/5 (0 صوت)

11-20-2010 10:59 AM
استاذ البونى متعك الله بالصحة والعافية وكل سنة وانت طيب اسباب غياب ابوعركى البخيت معروفة ولا تحتاج لدرس عصر وهل نسيت بدايات الانقاذ عندما كانت تحارب الفن باعتباره فساد فى الارض والسياحة والاثار باعتارها وثنية وهل نسيت تصريحات المسؤلين (نحنا اصلا مامحتاجين فن ) وتعليق الدراسة فى معهد الموسيقى والمسرح لعدة اعوام (وانا ما حاصرف على التلفزيون وكلو اغانى حبيبى حبيى) ( وانا اقود الهجوم لتغير المفاهيم الرياضية ) وايقاف اعلانات الحفلات على التلفزيون واعتبار التماثيل فى المتحف اصنام وتمجيد للوثنية والجاهلية كل هذا ايام ( من اراد منكم ان تثكله امه فليغق متجرة او يخفى عربته البيان الشهير ليوسف عبد الفتاح ولكن الوضع افضل بكتير من تلك الايام مما استدعى لعودة المبدع ابو عركى


#47716 [سودانية مية المية]
0.00/5 (0 صوت)

11-20-2010 09:08 AM
انا عندي عقدة سماحة؟؟؟عفوا اخي سوداني مقيم في قطر فعلا وبدون غرورالما عارف يقول عدس ورز كمان..المهم ده ما موضوعنا موضوعنا السهرة ورأي الشخصي في استاذة مني وعشان اريحك مافي اتنين بختلفو في جمالها ولا في كتاباتها كمان لكن اخي الفاضل ده تلفزيوووووووووووون مش سينما واشكالكم دي هي الجابت التلفزيون وراء يعني بالذمة عليك واحدة زي اوبرا عندها شنومن الجمال بس تتمتع باحترافية عالية وبتقنعني اكتر من كل جميلات العالم وده ما بمنع انو العين ترتاح للمذيعة الجميلة ومع احترامي لاستاذة مني بس هي لا تصلح كمقدمة برنامج..وفي تجارب كتيرة حصلت لي فنانات وممثلات عربيات وفشلو كمذيعات وافتكر انا حرة في رأي وانت مامن حقك تصادرو..ثم انو رماز برضو صوت حلو وشكل احلي بس اغاني البنات ما بتشبها مع احترامي لكل مؤديات اغاني البنات بس ده تخصصهم واستايلهم اما رماز تقول الشايقي اب شنب والجعلي اب ضنب سوري انا ما اتقبلتها وبرضو انا حرة وحتي اغاني البنات فيها حاجات احلي من كدة كتيييييييييير ياريت نكون موضوعيين ونبطل نقفز فوق الاشياء ونناقش عشان نصل للاحسن وياريت نبطل ضيق الافق ده كمان ..مع تحياتي لدكتور البوني واستاذة مني;) ;) ;) ;) ;) ;)


ردود على سودانية مية المية
Saudi Arabia [ما بعجبني الحال المايل] 11-20-2010 10:08 AM
و الله العظيم إنت اللي كدة ;) و كدة ;) و كدة ;) كمان

لك التحية


#47647 [رياض عمر - الدبيبة عبدالله الكاملين]
0.00/5 (0 صوت)

11-19-2010 09:22 PM
انت يا البوني تأكل متاعيف وتبيت مسايف


#47618 [سوداني في قطر]
0.00/5 (0 صوت)

11-19-2010 06:37 PM
السلام عليكم استاذي العزيز -- كل عام وانتم بخير .. ماعندي تعليق على موضوعك بس تعليقي على سودانية الكتبت التعليق . اولا رماز صوت مميز والسهرة موضوعها اغاني البنات يعي مافي اي شيئ يعيب التغني باغاني البنات . وكلامك عن مني دا حقد على البنات الجميلات .. بفتكر انو عندك عقدة من السماحة


#47609 [خلف-بورسودان]
0.00/5 (0 صوت)

11-19-2010 05:29 PM

الاخراج برضو يا دكتور لانو مرة ندى القلعة غنت وجات قعدت قالت اححى وسعد الدين يضحك


#47586 [سودانية مية المية]
0.00/5 (0 صوت)

11-19-2010 03:55 PM
شكرا استاذ البوني..بالنسبة لابوعركي كفي ووفي كما عهدناه دائما فنان رائئئئئئئئع وصاحب مبادي وقيم.. اما بالنسبة للدلوكة الجزء التاني كانت حلقة بااااااهتة جدا واقرب للنشاز والازعاج من الغنا اول حاجة ما كان في اي داعي لحنان بلوبو والمدعوة بهاء بصراحة كانو مقرفين جدا وان كانت حنان اروق من بهاء بس حنان ما عندها صوت نهائ وهي اصلا فنانة استعراضية ومتسلبطة في الغناء..اما بهاء دى ما عندها حاجة خالص بس ازعجتنا..نصرة صاحبة صوت جميل بس كترت من الارتجال وماكان في داعي وكان الافضل معد البرنامج ينسق ويسمع كويس قبل الحلقة اما اسيا مدني عندها حضور جذاب جدا واعتقد عندها اشياء حلوة بس ما لقت فرصة كافية من ناس الفحك الفحك ديل..رماز وصباح نزلو شوية من نفسهم خاصة لمن رماز غنت للشايقي اب شنب بصراحة ما حبيتها منها ابدااااااا.اما صاحبات الدندر كانو روووووووووووعة اصوات تمام وحشمة وادب في الاداء بس برضووووووو ما اخدو فرصة كافية ..بصراحة في اغاني سيرة اصيلة جدا كانت مفروض تنطرح للناس وتنشرح زي المهيرة مثلا في فنانات بغنوها طيبك عبس وهي اصلا طيبك عبق اي فاح وانتشر ..واخطاء كتيرة زي دي مفروض تتصلح.. السهرة بصراحة كده كان مفروض يكون فيها دكتورة سارة ابو واستاذة اروي وواحد شاب كده رهيب اسمو دفع الله بتاع الفنون الشعبية ولد بفهم في الايقاعات وكان مفروض يمسكو لينا منطقة منطقة وبعدين يجيبو بنات مدني اسيا وانصاف ولا باس من نصرة وبتاعات الدندر وكفي والاغاني تكون حسب المناطق في السودان ..مش الشايقي اب شنب..وين نعومة والمهيرة والعديل والزين والعديلة والبنينة ووووووووووووووووو يا ناس النيل الازرق اتعبو شوية في الاعداد وبلاش بهاء دي تاني وبلوبلو الحسها زي المخنوق ده ..وانت يا استاذ البوني بلاش تكسر تلج للنيل الازرق نحن هنا اجمعنااااااااالسهرة كانت مش ولا بد واكيد انت سيد العارفين رغم اني بموووت في برنامجك مع مني ابوزيد ودي برضو لو شلتها يكون احسن هي صحفية مية مية بس مذيعة لا والف لا. وتسلم


عبد اللطيف البوني
عبد اللطيف البوني

مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة