السودان وعرب ايدول ..
04-13-2013 04:45 PM

قرات قبل ايام موضوعاً للاخ الموسيقار الموصلى عن بهدلة المشتركين السودانيين فى مسابقة عرب ايدول . ألمنى الاستهتار بالمبدعين السودانيين اللذين يحاولوا ان يوصلوا رسالتهم الفنية للعالم العربى . قبل اكثر من عشر سنوات اثرت موضوع الفن السودانى والاستخفاف العربى , فى مواقع الكترونيه عديده .اذكر ان الاخ الموصلى والاخ الفنان عبد العزيز خطاب ، الذى يتواجد فى هولندا . قد تداخلا معى وادلى الكثيرون بدلوهم . المؤلم اننا نحن السودانيون لا نحترم انفسنا . ونسمح للآخرين ان يهينوننا وان يمرمطوننا .
قبل فترة ادت مغنيه سورية اغنيه سودانيه . واتت الى الخرطوم بفرقتها . وانطربنا وفرحنا وهللنا . وهذا جهد رائع تشكر عليه الفنانه السوريه . وكنت انا احد المهللين لان الاداء كان رائعاً . ولكن الزخم الذى احيطت به المناسبه كان ضخماً جداً . الاثيوبيات والاثيوبيون لاكثر من نصف قرن يرددون اغانينا ولكن لا يفوزون بهذا الاهتمام . واغنية عزه فى هواك تعتبر الاغنيه التى تجمع كل الاثيوبيين . وتعزف فى كل المناسبات . والاثيوبيون على اقتناع كامل بانها اغنيتهم الوطنيه .
اذا لماذا وجدت الفنانه السوريه كل هذا الاهتمام . هل لانها فاتحة اللون . وترديدها للغناء السودانى يعتبر تنازلاً , بينما اداء الاثيوبيات يعتبر تطاولاً .
الفتاة التى قدمت اغنية سودانية فى عرب ايدول قالت لها احدى اعضاء لجنة التحكيم , بانها لم تفهم كلمات الاغنية . فقامت الفنانة السودانية بتقديم اغنيه عربية . لماذا ؟ . عندا اخذ الموسيقار اسماعيل عبد المعين الاستاذ احمد المصطفى لمعهد الموسيقى فى مصر ، قدم بعض الاغنيات . فطلبوا منهم ان يقدم لهم بعض الاغانى باللغه النوبية . واستغربوا عندما قال لهم بانه لا يفهم اللغه النوبيه . وعندما استغرب الاستاذ احمد المصطفى قال له اسماعيل عبد المعين ان المصريين لم يصدقوا انه تعلم العزف فى السودان وكان يحسبون انه قد تعلم العزف فى مصر .
عندما غنى الاستاذ الرائع الكابلى ، كلمات اغنيه غنتها ام كلثوم كان العرب وكثير من السودانيين يقولون . كيف يتجرأ فنان سودانى على ترديد كلمات غنتها الست . وسمعت احد السودانيين يقول ، عيب الكابلى يتغنى بكلمات ام كلثوم . الكلمات ليست كلمات ام كلثوم . فهى ليست بشاعره . ودورها لا يزيد عن انها مغنيه . الاستاذ الكابلى متعه الله بالصحه شاعر ، مفكر ، ملحن وباحث فى التراث وانسان ذو ثقافه عالية . ام كلثوم لم تزد عن كونها مغنية جيده . والدليل ان العرب يحبونها . ولم تكن ملكة او اميرة . كان زوجها يهينها ويضربها ويطالبها بغسل قدمية . وعندما حضرت الى السودان عاملناها وكأنها امبراطوره .
فى الخمسينات كان هنالك فلم مصرى يغنى فيه الاستاذ احمد المصطفى . وكانت كل دور السينما فى السودان تمتلئ لان صباح المغنية اللبنانيه كانت تغنى ( دويت ) مع الاستاذ احمد المصطفى ، اغنية اهواك يا ملاك . وكان هنالك فتيات يرقصن وكان الاداء رائعاً . واحببنا تعطيش الجيم بواسطة الشحروره صباح .عندما كانت تغنى اهواك يا ملاك هواك ملكنى هلكنى ملكنى وجننى . واحب السودانيون صباح جداً . فى الستينات عندما حضرت صباح للسودان مع مجموعة ضخمة من الفنانين كان هناك تجمع فى حديقة المقرن . وعندما حضر الاستاذ احمد المصطف رحمة الله علية هرعت نحوه صباح وقابلته بود واحترام لانه كان يستحق الاحترام . الاستاذ احمد عبد الرازق وهو موسيقار جيد هو اول من غنى اغانى للدعايه التجاريه مثل اغنيه البيبسى كولا وكوكا كولا وصابون صافى . واوبريت بايدينا نبنيك يا بلدنا . ذهب باغنية الريده الريده وطرق بيت الفنانه عشه موسى احمد فى العباسيه ( الفلاتيه ) وطرح لها فكرة الاغنية فغسلته بنظره بارده وقالت له جر .فقالت شقيقتها عازفه العود جداويه , خلى الحلبى ده يخش كان ما بعرف يغنى بس نعاين ليه ساكت . وكانت الاغنيه التى هى اول دويت سودانى . احمد عبد الرازق تعرض فى العباسيه للاستخفاف لان لونه فاتح . وهذا كذلك خطاء .
اذكر ان احد الصحفيين قد كتب قديما بان كل فنان او فنانه عربيه يأتى يقابل باقل شئ بوكيل وزارة . وان الفنان السودانى فى مصر لا يقابل حتى بوكيل نيابة . فعندما كان ابو حسبو وزيراً الاعلام بعد اكتوبر وجدت صباح والفنانين العرب زخماً اعلامياً لا مثيل له . واذكر ان وكيل وزارة الاعلام وقتها كان مولانا محمد صالح عبد اللطيف وقيع الله الذى لم يكن مهتماً كثيراً بالفن . اذكره يقول لى انه لم يكن مرتاحاً لذلك الزخم ومقابلة صباح التى كانت ترتدى ملابس قصيره جدا ، الا انه كان يؤدى عمله كوكيل لوزاره الاعلام ( الاستعلامات والعمل ) .
اين هى صباح الآن التى نصب لها السودانيين تمثالاً . انها تعيش الآن فى بنسيون رخيص فى لبنان وتعيش على صدقات الفنانين الكبار . وعاشت حياة عاصفه لم تخلو من المشاكل والاضطرابات . فقد فشلت كل زيجاتها . اغربها كان زيجتها من الفنان مايز البياع . فلقد اكتشفها فى الصباح فى سريره وسأل عن سبب وجودها . وعرف منها انهما قد تزوجا فى الليل بعد حفله سكر ضمت الكثيرين . واكتفى بان طلقها فى نفس اللحظه وطردها . كما تزوجت الشحروره كذلك بفادى لبنان الذى كان ( دباك ) وتعنى راقص دبكة . وآخرين .
نحن نحترم الجميع وكما قال الاخ مأمون عوض ابو زيد عضو مجلس قيادة مايو باننا كسودانيين نحترم اى انسان ونبالغ فى احترامه . لان هذه طريقتنا . ولكن العرب يعتبرونها كمركب نقص فى شخصيتنا ولهذا يتعالون علينا . نحن نحترم فنانات العرب ونقابلهم بحكامنا وكبارنا والعرب لا يحترمون مشاهيرنا او فنانينا . الغلط غلطنا .
فيجب ان لا نستخف ان نحترم الفنان بسبب لونه او اصله ولكن بسبب فنه وما يعنى لنا . فليس كل الغناء العربى مرفوض وليس كل الغناء السودانى مقبول .
.............................................
الموضوع المرفق نشر قبل اكثر من عشر سنوات . ارجو ان يكون فاتحه لنقاش هادف .


المسكوت عنه....لماذا يتجنب العرب الفن السوداني


في ابريل 1993 حضرت الي القاهره للزواج . و اخذني الصديق الاخ اسامه ناصر و زوجته مهوش في جوله بالسياره في القاهره مع زوجتي و شقيقتها و قال ( حسمعك شريط لنجاة الصغيره ، طبعا بتحبها ) فقلت ( لا ) و واصل ( طيب اسمعك الست . مافيش حد في الدنيا ما بحبش الست ) فقلت له ( انا ، ما بحبها ) .
ان الامر ليس فقط عدم حب ، بل عدم احترام كذلك من جانبي . فعندما اتت للغناء في المسرح القومي في امدرمان سنه 1967 استورد السودان اجهزه و مكرفونات خاصه للمناسبه . و عندما طلب المسرح القومي من الست الحضور لنصف ساعه لتجربة الاجهزه ، لم تحضر و قال -مدير اعمالها ( الست مش فاضيه للحاجات ديه ، ده شغلكو انتو ) .
ام كلثوم كاغلب العرب يتغيرون عندما تصيبهم نعمه او شهره و نسيت انها فلاحه بنت فلاحين من طماي . و عندما اراد احد اقرباء الملك فاروق ان يتزوجها ، رفض البلاط لانها من اصل وضيع .
و لقد اظهرت الصحف المصريه صورة شخص تحت عنوان ( سوداني يصر ان يسجد لام كلثوم ) . و الشخص في الصوره لم يكن يبدو كسوداني بل مصري .
عبدالحليم حافظ الذي مات بالبلهارسيا، عندما حضر للسودان في نفس الايام مع فرقه اضواء المدينه بعد مؤتمر الخرطوم الذي مد في عمر جمال عبدالناصر ،( شخط ) في وجه المعجبين في الخرطوم الذين تجمعوا امام القراند هوتيل و هم يصرخون ( نار يا حبيبي نار ) و كلهم من بقايا المصريين او شباب الخرطوم الذي تأثروا بفلم الوساده الخاليه رواية احسان عبدالقدوس ابن فاطمه اليوسف صاحبة مجلة روزاليوسف . لقد صرخ فيهم ( روحوا في ستين الف داهيه و سيبوني في حالي).
هذا امام الصحفيين ، منهم عبدالرحمن مختار و لقد تطرق لهذه الحادثه في كتابه خريف الفرح . و استفذ لدرجه انه قال للشباب ( انسوه و احرقوا اسطواناته ) .
الناس يوردون كل الاسباب لعدم انتشار الموسيقي السودانيه في العالم العربي و يتفادون ذكر الحقيقه . السبب سيداتي سادتي ان الانسان لا يستمع لموسيقي شخص يحتقره . فلهذا نحن الشماليون لا نستمع الي موسيقي الجنوبين و لا نعرف فنانينهم . و لا نعرف اي شئ عن الغناء او الفنانين التشاديين . و العرب يحتقرونا ، و نحن نلهث جريا وراء حبهم .
من المؤكد ان بعض السودانيين يحبون الاغاني المصريه و العربيه عن حق . و لكن هنالك الكثيرون الذين يتظاهرون بحب ام كلثوم كنوع من الرقي و التطور و استيعاب الثقافه . و لقد كان و لا يزال هنالك الاف مؤلفه من السودانيين يتحدثون باللهجه المصريه و هم لم يضعوا قدمهم في مصر .و بعض الاخوه يعود من السعوديه او الخليج بعد سته اشهر و يتحدث عن السياره و الهاتف و ابقي قرشه كوكاكولا .
بالنسبه لي ليس هنالك ما يعادل روعة عشه موسي و هي تغني ( عني مالو) او اغنية الحمام الزاجل بواسطة مني الخير او الاستماع الي سميره دنيا و عابده الشيخ و سميه حسن .
في 1987 و في داخل مطار كوبنهاجن قابلت المغني الامريكي بيري وايت و فرقته و زوجته و هي تحمل طفل رضيع و سيده امريكيه سوداء اخري و كان بيري وايت يرتدي بالطو ضخم و شبشب منزلي و ذهب ليغير بعض العمله لشكل قطع معدنيه من فئه خمسه كرونات لاستخراج عربات لحمل الامتعه و هو يضحك و يمازح عازفيه قائلا ( صاحب المطار قد اصاب ثروه منا بسبب عرباته ) و دفع لي باحدي العربات و سألني( ماذا يعمل الاخ في اسكندنافيه ) ، و واصل ( اها ، سمعت ان النساء الاسكندنافيات رائعات ) فنهرته زوجته متظاهره بالغضب .
بيري وايت من اشهر المغنين في العالم ، ليس هناك محطه في العالم في المكسيك او نيوزيلندا او شيلي او جنوب افريقيا لا تذيع اسطواناته . اين عبدالحليم حافظ من هذا .
في الثمنينات و في مطار جنيف تحدثت مع اثنين من الجمايكيين و سألوني من اين انت يا اخ و عندما قلت السودان . صرخ الاثنان ( يا جيمي ..يا جيمي ) و كان ذلك جيمي كليف الذي خلق لنفسه اسم في الموسيقي و الغناء سبق بوب مارلي كمغني عالمي . و جيمي كليف كان يسكن في الخرطوم لفترات و يشاهد ماشيا في شوارع الخرطوم . و لقد احضره شخص لابن اختي دكتور المهدي مالك في المستشفي في الخرطوم لانه اصيب بجفاف فلقد كان صائما و اكثر من الحركه و المشي .
في بداية التسعينات شاهدت مغربي وسيم انيق الثياب في مطار بلغراد . و كانت مسؤولة الطيران تقول له بالانجليزيه و اليوغسلافيه بانهم لن يدفعوا اجر الهوتيل و انه ملزم بدفع الهوتيل و هو يهز اكتافه و يقول بالفرنسيه ( لا افهم ) و عندما عرضت مساعدتي ، فرح قائلا ( ساعدني يا اخي، انا لا افهم الانجليزيه ) . و عندما تأكد لي عدم احقيته و انه لا يملك ثمن الفندق لليله واحده اقترحت ان يكون ضيفي في فندق سلافيا .
و عندما رجعت بعد تغيير بعض الفلوس ، وجدته يقف مع فتاة يوغسلافيه كانت ترمقه من البعد باعجاب . و فجأه صار المغربي بلبلا يتحدث الانجليزيه . و الفتاة التي كانت عائده من اقامتها في استراليا تدعوه للسكن معها .
و عندما استغربت من معرفته المفاجئه للانجليزيه صرخ في وجهي بانه لا شئ يجمعه مع السود من امثالي و ان لا اتدخل في اموره . و بعد ان شتمته ، سالت الفتاة اليوغسلافيه عن المشكله فقلت لها ان صديقي يقول انه سيذهب معك و .....ثم يسرق نقودك ، و لكن لا يريد ان يقتسم معي .و انتهي الامر بان الفتاة شتمته و ذهبت لحالها و صار يترجاني لاخذه معي .
في نفس اليوم تعرفت في الفندق بامريكي اسود لا يقل طوله عن مترين و عشره سنتيمتر مما جعل الناس في شوارع بلغراد يتطلعون اليه و قضينا يومين رائعين ، العيب الوحيد ان صديقي الجديد كان يقول دائما عندما ندخل اي مطعم او ملهي
Man , i hat to break them 100 dollar bills
وبعد سنتين من هذا التاريخ و انا اتنزه في الشارع مع زوجتي السودانيه اسمع شخص يصرخ باعلي صوته
Hi , shoug , come and say hallo to Little Richard
و كان ذلك هو صديقي من بلغراد و هو الحارس الشخصي للمغني العالمي و النجم السينمائي من الخمسينات ليتل ريتشارد و يسكن في بفرليهيل هوليود. و يذكر عادة باغنيه توتي فروتي التي احبها كل العالم و مكياجه الثقيل حتي عندما يكون ماشيا في الشارع .
عندما اراد ليتل ريتشارد ان يصافح زوجتي ، هربت مزعوره بسبب مكياجه في وسط النهار . و لم يغضب بل قال ( لماذا خافت الاخت الصغيره ) و عندما قلت لزوجتي بانه مغني عالمي قالت ( و انا العرفني شنو ! ) .
البلاترز من اكبر الفرق الغنائيه في العالم خاصه في نهاية الخمسينات و بداية الستينات و هم خمسه من الامريكان السود . و لا يزال النساء الكبار في السن يذبن عندما يسمعن اغنية
I am the Grate pretender
كانوا يحضرون عدة مرات في السنه لاسكندنافيه . و ربطتنا معهم صداقه لدرجة ان مور كان يفاجئني بالحضور لمكتبنا في وسط البلد حتي قبل ان يبدأ عرضهم في قاعة الكرونبرنس . و منه تعلمت ان ارفع امشاط قدمي اليسري قبل تسديد ضربة البدايه القويه في لعبة البلياردو . و لقد قابلهم حسين ودالحاوي في منتصف التسعينات في جزيرة مايوركا في البحر المتوسط.
انا لا يمكن ان احب ثقافة شخص يحتقر ثقافتي بل يحتقرني انا كأنسان و بينما الاخرون ينادوني باخي سمعت ضابط الجوازات المصري يقول لزميله في سنه 1995 مايو ( البرابره دول تخليهم ملطوعين ) بالرغم من انني و سيف نحمل جوازات اوربيه .
يمكن ان تخدع نفسك و تتظاهر لكن الاكل و الذوق يعتمدون علي النشأة الي حد كبير . فشركة وينفيلد انترناشونال و مقرها الطابق67 في نيويورك مبني امباير ستيت بلدنق اقاموا لي حفل في ديسمبر 1978 و كانت الفاتحه حاويه ضخمه في داخل كتله من الثلج و كضيف شرف اعطوني قطعه من البسكويت عليها بعض الكافيار الروسي الاسود . و انا لا ازال اقلبها في يدي هجم المدعوون علي الكافيار فتشجعت و وضعت المصيبه في فمي ، و لكن لم استطع ان ابلعها فهرعت الي الحمام و اصابني الحنين الي طعمية ام مستوره في امدرمان التي قال عنها صديقي عثمان ناصر بلال المكنيكي ( طعمية زي الدبرياش ) طارة الكلتش .
ال ام كلثوم ال
التحية.......
شوقي .....
[email protected]


تعليقات 31 | إهداء 0 | زيارات 6452



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


التعليقات
#681402 [سرور]
1.00/5 (1 صوت)

05-29-2013 10:47 AM
يا شباب .. الاغاني السودانية واضحة جدا جدا .. اسه مثلا غنية " عازة في هواك " كلماتها واضحة و كذلك اغاني الاساتذة وردي و مصطفي سيد احمد و غيرهم كثير ..


#638524 [قاعد برة زيك]
5.00/5 (1 صوت)

04-15-2013 11:12 AM
مالكم ايها السادة لا تعقلون؟
والله يا اخوانا السودانيين وصلو الدرك الاسفل و كلو بسبب الحكومة. انحنا برة بقي الناس ما بتحترمنا و بقولو علينا جعانيين حتي الهنود و البنغالة و الفلبينين بقو يعاينو لينا بحقارة و دة كلو عشان الحكومة. لو شفتو الاحترام و الدهنسة للناس العندها قروش ديل لمن تخجل من روحك مع انو الناس العندها الفروش ديل العلمهم السودانيون و الصلحو ليهم بلدم السودانيونز احححححححححححححححح نحن انتهينا يا هلنا والله انتهينا و المشكلة انو مافي طريقة نرجع تاني لمكانا الزمان No any way to recover again NO WAY beleive me


#638348 [ابووليد]
2.00/5 (3 صوت)

04-15-2013 09:05 AM
استاذ شوقي نكون منصفين معظم الغناء السوداني ارتجالي بدليل ان كل الفنانين عندنا مغنين وملحنين في نفس الوقت بل بعضهم يفتخر انه لحن الاغنية فيخمسة دقايق ام كلثوم كان كبارر كبار الملجنين مثل السنباطي مثلا يحتاج لسنة ليكمل لها لحن ‏


#638272 [kuku]
4.00/5 (1 صوت)

04-15-2013 08:27 AM
التحيه لك الاب او الاخ شوقى على هذا المقال الرائع انها اقيم هديه لهولاء الذين لديهم مركب نقص .نسوا و تناسوا بانهم( Black) يعنى لست بعرب حتى دخولنا للجامعه العربيه كانت بالواسطه لماذا كل هذه المهزله. حقيقا انها ازمة الهوية عند هؤلاء المرضى . على العموم الاخ شوقى ربنا يطول من عمرك ويرد غربتك حتى يعرف ويعلم هؤلاء المرضى هويتنا من نحن ولمن نتمى حتى لا يحتقرنا مثل هؤلاء الاعرب الذين لا يقراؤن كتاب( ابن خلدون) مقدمات بن خلدون. لا اريد ان اسئ لانهم اجلاف.
لا اريد اطيل العم شوقى بدرى ارجو ان يقراء هذا المفال هولاء الانغاذين لانهم اصبحوا لعبه فى يد العرب


#638211 [ADvacer]
1.00/5 (2 صوت)

04-15-2013 07:41 AM
مواضيعك كلها تافهة ...فنانات وفتوات وكلام فارغ... انتبه لآخرتك يا غافل.


#638056 [ودالخير]
4.00/5 (1 صوت)

04-14-2013 07:11 PM
شكرا يا استاذ على تسليطك الضو وكشفك للفوارق الثقافيةواللونية بينناوبين الاعراب المستعربةلهجتهم عكس لهجتنا ولونهم غير ومفهومهم للفن حاجة تانية آمل ان يفهم زنوج السودان مدعى العروبة المتفاخرين بها أن لا أمل لهم فى بلاط الاعراب المستعربة غير البوابات والمكانس عودوا لاصلكم ولاتتنكروا لآستر الحبشية عائشة الفلاتية مريم ماكيبا وسنغور جماع سوينكا الطيب صالح ملكة الدار والاسود اجمل الالوان بدرجاته فيها البارد الحار خلق الله الذى احسن اى شىء خلقه .


#637989 [محجوب عبد المنعم حسن معني]
3.00/5 (2 صوت)

04-14-2013 05:38 PM
العم العزيز شوقي
تحياتي
حقيقة الموضوع كبير ومتشعب والكل يدلي فيه بدلوه ما بين موافق ومعارض ومتحفظ ، حقيقة الاستماع للاغاني هي في اعتقادي مسألة ذوق في الاول والاخر وذكريات معينة مرتبطة بحدث معين تجعل شخص يميل لتلك الاغنية التي توصف حالة معينة قد تكون مرت به.
الاعلام المصري يعتبر اقوى اعلام في الدول العربية ولذلك تجد جل الفنانين العرب بداية انطلاقهم تبدا من مصر وناخذ مثال للمسلسلات المصرية في السودان وفي كل الوطن العربي اذكر في السودان اثناء عرض المسلسل المصري تجد الشوارع خالية من الساعة الثامنة الى الساعة التاسعة وغس على ذلك، الشعب السوداني تجده كله في الصيف في مصر براً وجوا وبحرا، السودانيين اكثر الشعوب امتلاكاً للبيوت والشقق في مصر ، هل تصدق ان هناك حوالي الثلاثين الف شقة في مصر يمتلكها سودانيين.
سوف اعود لاحقا للفنان جيمي كليف وزيارته للسودان واغنية بانغو مان الشهيرة.


#637873 [عوض عبدالله الزين]
3.50/5 (2 صوت)

04-14-2013 03:04 PM
يا أخي انت رائع وكتابات عميقة وجادة وممتعة في نفس الوقت ,,واتفق معك تماما في كل ما ذهبت اليه .متعك الله بالصحة والعافية.


#637743 [سودانية]
1.50/5 (2 صوت)

04-14-2013 12:36 PM
حكاية الفن والغنا دى مامربوطة بالحقارة واللون بدليل انو كل العالم عربه وعجمه يستمتعون باغانى مايكل جاكسون الى حد الهوس ...الحكاية كلها انو سلمنا خماسى والعرب سلمهم سباعى عشان كده بشوفو غنانا اشتر وزى ماقلت الذوق بيعتمد على النشأة 000وغنانا ده لو تعبنا وطلعنابو لى بره بعجب الخواجات جدا لانو سلمنا خماسى قريب من ذوقهم...اها اخير غنانا يعجب الخواجات وللا يعجب العرب والحلب ...وانا ذاتى ام كلثوم ابت تقع لى كلو كلو ...فى حين انو احلام الخليجية غناها برفع لى مودى طوالى خاصة اغانيها القديمة زى احسن احسن ولاتصدقونة 000يكون السبب لون احلام الاسمر وللا غناها سمح وللا السبب شنو ياربى


#637635 [alnileabdalla]
0.00/5 (0 صوت)

04-14-2013 10:52 AM
ياجماعة نحن ليس عرب ولا نتشرف بيهم لان الاعراب اشده كفراُ وانفاقاُ ويكفينا الدم السوداني الافريقي .


#637634 [محمد علاء]
3.00/5 (4 صوت)

04-14-2013 10:52 AM
يا جماعة الناس تكون منطقية شوية, يعني انتو ما ختيتو احتمال ان الغنا السوداني فعلا ما مفهوم لباقي العرب ؟ و السودانية ما اتهانت ولا حاجة, في ناس عرب بيض من جنسيات شامية وخليجية اهانوهم جد, بعدين منو القال السودانيين بيسمعوا للغنا العربي؟ انا من الشباب و ما بعرف لي زول منهم بيسمع غير الغنا السوداني و الاجنبي, ممكن يتفرج علي فيديو كلبات عربية (لاسباب معروفة) لكن يسمع بس؟ ما بيحصل الا نادرا, بعدين في سودانيين بيسمعوا للغنا الحبشي و انا بعرف ناس بيسمعوا للفنا الكيني, حسي انحنا ما بنسمع للغنا الصيني, هل ده معناهو اننا محتقرين الصينيين؟ و بعدين يا اخوي(محمد السوداني) حكاية الامة العربية دي ما بقيسوهابالجينات لانو لو عملت كده ما حيفضل ليك الا قبايل بسيطة جدا في السعودية بطابق الشروط , الحكاية لغة وعادات و ارتباط و ثقافة, ودي حاجات بتحصل بتراكمات علي مر العصور , الناس ماليها دخل فيها, يعني السودانيين ما صحوا في يوم من الايام و عاينوا حواليهم و قالوا( ياسلام العرب ديل ناس ممتازين والله يلا نمشي ليهم) , يعني المطلوب شنو من السودانيين يا استاذ شوقي؟ نلغي اللغة العربية و نتعلم لغة تانية؟ نقطع العلاقات مع كل الدول العربية؟ نغير عادات اخوانا الجعليين و الشكرية و البطاحين؟ نخلي لبس العمة والجلابية و نشوف لينا زي تاني؟, يا جماعة,الحقارة الانتو بتتكلموا عليها ما ليها علاقة بالون و السماحة, حسي اللبنانيين المعقدين العرب كلهم لمن يجي ليهم فنان امريكي اسود بيوقفوا ليهو البلد, و اكبر دليل الرقص و اللصيق العملتو هيفاء وهبي للفنان (شاغي) , بعدين الجامعةالعربية نطلع منها ليه؟ يا خي قول انحنا ما عرب, ليه نطلع؟ ما استفدنا منها؟ سكر كنانة و سد مروي , ودعم مالي لدارفور و كل سنه يدعموا في ميزانية الكيزان عشان ما تفلس وشوارع و مشاريع , اها ده كلو كنا حناخدو لو ما كنا في الجامعة؟الناس تكون منطقية, لو نحنا اتطورنا و بلدنا بقت متقدمة العالم كلو حيحترمنا, احسن نصلح بلدنا بدل مانقعد نقضيها نخش الجامعة ولا نطلع من الجامعة لان ده موضوع انتهي خلاص.


ردود على محمد علاء
Saudi Arabia [مجودي] 04-15-2013 06:22 AM
بس يا خونا محمد ، اللي قلت عليها دي كلها كان ممكن تجينا

من العرب من دون ما نكون في الجامعة العربية. العرب مش بيرموا

قرشم علشان سواد عيون السودانية العرب . دا إستثمار وعندو عايد. الليلة

هم نفسهم إستثماراتهم في اسبانيا وانجلترا واندونسيا والباكستان

وحاليا في اثيوبيا وفي جنوب افريقيا دي كلها اكبر من إستثماراتم

في السودان. لكن كلامك صاح : خلينا فعلا نشوف هل وجودنا كدولة عربية

افادنا أو نحن الخسرنا. مش موضوع الاستثمارات المالية فقط ّ، من كل

الجوانب ... الوحدة الوطنية مثلا ... هل اذا كان تعليم اللغة العربية

إختياريا مثلا هل كان الأصلح لنا أم لا (حتى في المستقبل). ليه نحنا بنخاف

من التغيير .


#637569 [dalia]
4.50/5 (2 صوت)

04-14-2013 09:59 AM
تسلم استاذنا الكبير شوقي بدري .... فشيتني و ريحت بالي .... لا اسكت الله لك حساً


#637538 [[email protected]]
3.50/5 (2 صوت)

04-14-2013 09:21 AM
ياشوقي بلاش مبالغة يعني كيف فنان اوفنانة سودانية يظهرو في عرب ايدل
1- اولا نحن مش عرب
2- اشكالنا حقيقة قبيحة
3- اصلا ماعندنا فن
4-


#637503 [AMMAR]
0.00/5 (0 صوت)

04-14-2013 08:52 AM
نحن يا ناس افضل عند العرب واكثر احتراما وتقديرا من المصريين ..كنت في مصر لفترة طويلة وقد ذكر لي احد الاخوة المصريين وهو رجل كبير في السن ذلك و بكل تجرد ..وقال لي بالحرف الواحد .انا مش عارف ايه السبب ..لكن في كل الدول العربية اللي اشتغلت فيها الناس بيحترموا السودانيين اكثر مننا ..ودائما يقولوا علينا بتوع الفول والطعمية ..تلقي العسكري العربي يندهلك تعال يافوال..يا بتاع الطعمية وفي نفس الوقت يعامل السوداني باحترام...انتهي...المشكلة في السوداني الذي يهتم اكثر من اللازم بكلام الجهلاء من المصريين ..والمصريين فيهم ناس طيبين حقيقة ومحترمين حقيقة وفاهمين ...نصيحة لكل سوداني يتعامل بها في اثناء تواجده في مصر .......اعرض عن الجاهلين .


#637501 [AMMAR]
0.00/5 (0 صوت)

04-14-2013 08:49 AM
نحن يا ناس افضل عند العرب واكثر احتراما وتقديرا من المصريين ..كنت في مصر لفترة طويلة وقد ذكر لي احد الاخوة المصريين وهو رجل كبير في السن ذلك و بكل تجرد ..وقال لي بالحرف الواحد .انا مش عارف ايه السبب ..لكن في كل الدول العربية اللي اشتغلت فيها الناس بيحترموا السودانيين اكثر مننا ..ودائما يقولوا علينا بتوع الفول والطعمية ..تلقي العسكري العربي يندهلك تعال يافوال..يا بتاع الطعمية وفي نفس الوقت يعامل السوداني باحترام...انتهي...المشكلة في السوداني الذي يهتم اكثر من اللازم بكلام الجهلاء من المصريين ..والمصريين فيهم ناس طيبين حقيقة ومحترمين حقيقة وفاهمين ...نصيحة لكل سوداني يتعامل بها في اثناء تواجده في مصر .......اعرض عن الجاهلين .


#637369 [موسوعى]
4.00/5 (3 صوت)

04-14-2013 07:39 AM
والله ياعم شوقى بشوف صورتك بس وقبال ما أعرفك بتكتب عن شنو ,, بفتح الموضوع .. ياخى إنت كنز .. وبالنسبة للعرب ديل أنا بعبرهم مساكين خالص ومنغلقين على ذاتهم وما عارفين المطرة كابة وين !! والتحية للسودانى الموسوعى الذى يستسيغ غناء كل العرب والخواجات وبوب مارلى ,, ونلومه على تجاهله لبنى جلدته الأفارقة ,,


#637295 [مجودي]
5.00/5 (3 صوت)

04-14-2013 06:49 AM
يا جماعة خلينا نكون منصفين شوية :

مافي واحد اشاد بكلام راغب علامة.

أولا التركيز الشديد اللي كان بيستمع فيهو للبت ، ساعة الأراجوز المصري

والهبلات اللي جنبو كانوا بيضحكوا. وتانيا قال لعجرم : ما تفهمي

الغنا ماهي المشكلة المهم البت ما نشزت .. ودا رأي فنان واعي فعلا.

بعدين " لا تنهى عن خلق وتأتي مثله" ... إنتو يا السودانية ما إحتقرتوا

غنا الجنوبيين وكلامهم الما مفهوم لحدي ما إنفصلوا منكم.. إنتو آخر الناس

اللي يتكلموا عن العنصرية... صلحوا بالأول بيبانكم المخلعة بعدين تعالوا

إتفاصحوا في الناس التانيين.

البت دي انا بحترم شجاعتها جدا إنها دخلت "عش الدبابير" وهي عارفة ممكن

يحصل ليها شنو . دا إختيارها الخاص الشجاع في برنامج جزء من جماهيريتو

إنو بيسخر من المشاركين . لكن في نفس الوقت اللي بحي فيها شجاعتها كمان

ما داير أخنق فطس أخلي العرب يحبوا اللون السوداني اللي هو ابعد ما

يكون من اللون الموسيقي الغربي.


#637142 [شليق شلاقة الورل الفيهو اربعة كرعين ويمشي علي بطنو]
5.00/5 (3 صوت)

04-14-2013 12:17 AM
"الناس يوردون كل الاسباب لعدم انتشار الموسيقي السودانيه في العالم العربي و يتفادون ذكر الحقيقه . السبب سيداتي سادتي ان الانسان لا يستمع لموسيقي شخص يحتقره . فلهذا نحن الشماليون لا نستمع الي موسيقي الجنوبين و لا نعرف فنانينهم . و لا نعرف اي شئ عن الغناء او الفنانين التشاديين . و العرب يحتقرونا"

دا الزييييت يا شوقى


#637130 [انا افريقي انا سوداني]
0.00/5 (0 صوت)

04-13-2013 11:46 PM
لك الشكر الاستاذ بدري .. لعلك تحدثت في موضوع لم يسبقك فيه الا الاستاذ موسي حامد في صحيفه حكايات وتطرقت الاموضوع في غايه الاهميه ومسكوت عنه من الجهات الرسميه والمسؤلين والاخوه اهل الفن بصوره عامه فنحن السودانيين شفانا الله مفتونين بالفن العربي اوممكن تقول اللون ... بعد داك الباقي هين .... المطاعم المليانه ناس بيض مصريين اوسوريين اولبنانيين شغاله شغل الجن حتي لو كانت رديئه ... حتي في الصناعيه المصري لو سباك اونقاش وماناقش حاجه يقدمو عليك في بلدك .... الموضوع اكبر من كدا ... بس كان نتمني من الزعيم الازهري ايام الاستقلال يسحب فكره دخولنا في جامعه الدول العربيه... او كما قال رئيس سنقالي سابق (السودان بدلا من ان يكون اول الافارقه اختار ان يكون اخر العرب)..
ولم نسلم حتي في الرياضه...ففي دوري ابطال العرب الكل ضد السودان ابتداءا من التحكيم مرورا بالتعليق انتهاءا بالتشجيع حتي يخرج هذا الوحش المسمي السودان (ياخ نحن الجابرنا شنو)....
اما في ارب ايدول فحتي المتسابقه السودانيه لم تجد دباجه تحمل اسم السودان فاعطوها دباجه تحمل اسم مصر (قالو البلاوي دي اولي بيهم جيرانم)عموما لك الشكر الاستاذ بدري ونتمني ان تكون عظي وعبره لكل سوداني اوسودانيه حدثته نفسه بالمشاركه في هذه المهازل ... ولوكانت لدي سلطه كنت منحت امنيه_المتسابقه السودانيه _ وسام الافلاس واربعين سوط سيوبر...


#637081 [دروغبا]
5.00/5 (1 صوت)

04-13-2013 09:36 PM
شكرا الاستاذ شوقي على المقال الرائع و اؤيدك جدا في عدم اعجابك بأم كلثوم
فصوتها عادي جدا و اقرب للنشاز و كلو جرجرة و نياصة فارغة ممزوجة مع شكل اشبه بالغوريلا

بالنسبة لي الفنانة الحالية شيرين عبدالوهاب افضل من كلتوم هذه بملايين المرات


#637051 [ابودربا ماكن]
3.25/5 (3 صوت)

04-13-2013 08:26 PM
شكرا استاذ شوقي ليتنا نلتفت الي ارثنا الضخم الحضاري الثقافي فنحن شعب عريق ابتلينا بحكام فاقدي الهويه اضاعونا واضاعوا كرامتنا بتبنيهم لثقافات اقوام يحتقرونا اشد الاحتقار ونلهث خلفهم لنثبت لهم اننا منهم يا حسرتا


#637050 [العــــــــــــــــــــــــــــــــــــزابـــى]
3.00/5 (3 صوت)

04-13-2013 08:26 PM
مقالك دايما بقراقهو بى نفس واحد .. انت رجل ممتع .. متعك الله بالعافيه وجمع شملنا والسودان
عزيز مكرم .. امنيتى اعرف ماذا قال لك صديقك الجديد فى المطعم وفى شوارع بلغراد حينما صرخ ..
الانجليزى بقرأ كلماته لكن الترجمه ضرورى ياشوقى حتى تتم فرحتى بالمقال .. عموما لك الحب والود والسلام ..


#637020 [Mohamed Osman]
5.00/5 (2 صوت)

04-13-2013 07:30 PM
استاذ شوقي جزاك الله خير وانت تصيب كبد الحقيقة الفن السوداني له معجبين بالملايين خارج السودان اذكر في سنة ٢٠٠٩ عندماكنت في كمبالا كنت بستمع للكابلي وفجاة سالني زميلي جيمس عن هذا الفنان الرايع ومن اين فقلت له انه سوداني جيمس لوم السودانيين لانهم لم يعرضوا هكذا فن لهم العيب فينا نحن
لما كنت في النيجر لاحظت انو الاغنية السودانية لها جمهور كبير جدا في اقاديز شمال النيجر سمعت صوت ندي
القلعة في المطاعم والسيارات وعندماقدمت نفسي في اجتماع مع مسؤل في وزارة الصحة بانني من السودان قال لي محمد وردي ما قصر معنا ابدا ولكي يؤكدلي كلامه فتح حاسوبه ووجدته يعرف اغاني وردي اكثر من كثيرمن السودانيين ويشهد الله كلما اسافر الي السودان وصية الاخوان في اليجرمزيد من الاغاني وكنت بشعربفرح ما بعده فرح
قبل سنة التقيت الدكتور سام المستشار الصحي المقيم بلندن وقال لي هو نيجيري من لاغوس وعاش ٧ سنوات في السودان حيث اتقن العربية وحدثني عن السودان واقسم لي بان امنيته الوحيدة ان يقضي اخر ايامه في السودان لانه احب كل شئ في السودان وخاصة الفن وعندما اسمعته اغنية الملهمة للتاج مصطفي تذكر ايامه في السودان وكاد ان يبكي امافي مالي والكمرون وتشاد الفن السوداني فحدث ولا حرج


#637019 [ahmed]
2.00/5 (1 صوت)

04-13-2013 07:29 PM
من يشاركون في Arab Idol من يختار هؤلاء لكي يشاركوا باسم السودان؟؟السودانيون الذين يشاركون باسم السودان في مثل هذه البرامج يذهبون من تلقاء انفسهم؟؟ انهم هواة جدا وغير ولا يعرفون الغناء بشكل جيد.. وخير مثال فتاة تسمي أمنيه شاركت اخيرا قبل اسبوعين علي الاقل وتم الاستهزاء بها والسخريه منها..
الي حد كبير يمكن ان تكون هناك نظره استصغار من هؤلاءالعرب نحونا.. الا انني اوجه اللوم اولا الي الاعلام السودان المنكفئ جدا ولا يستطيع ان يبتكر برامج تجذب الانظار نحو الموسيقي السودانيه الغنيه جدا بمختلف النغمات والسلم الخماسي العريض والمرن جدا, والذي يختلف عن السلم السباعي الخفيف كوزن الريشه وهو سلم محدود حسب رايي..
نحن نتكلم اللغه العربيه علي طبيعتنا في السودان افضل من كثير من هؤلاء العرب.. واللهجه السودانيه التي ينظرون لها بشئ من الاستعلاء هي اقرب اللهجات العربيه الي اللغه العربيه الفصحي وهذه حقيقه بشهادة العالمين باللغه العربيه وعلي راسهم بروفيسور عبدالله الطيب..
مؤلمه هذه النظرة تجاهنا وتجاه ثقافتنا وموسيقانا.. لكن اعتقد ان المشكله تكمن في التعريف بالموسيقي والاغنيه السودانيه ومفردة الاغنيه السودانيه..
اخيرا الاعلام هو الحل..!!
وشكرا..


ردود على ahmed
Canada [الدنقلاوي] 04-13-2013 11:06 PM
(مؤلمه هذه النظرة) يبدو أنك ح تتألم كتير لحدي ما تبطل التشبه بالعرب


#637009 [Ahmed mohd. tahir]
3.00/5 (1 صوت)

04-13-2013 07:18 PM
الاستاذ شوقي ..حكاياتك السندبادية حلوة وتفسحنا لكن شايلا تقيل كدا مع المصريين مالك؟؟؟
اخذهم علي قدر حالهم..وانا غايتو شفت الممتازين منهم


#637005 [كتاحة]
5.00/5 (2 صوت)

04-13-2013 07:13 PM
والله يا عم شوقي مقال في غاية الروعة

و انا عن نفسي لي اربعة فنانين رئيسيين افضلهم و هم بالترتيب

محمد وردي
مصطفى سيد احمد
احمد المصطفى
عثمان حسين

و لا احب الغناء العربي ابدا و ان كنت استمع احيانا لمحمد منير و احب ان اعرف فنانك المفضل
محليا و عربيا و عالميا


#636951 [لاحس الكوع]
4.50/5 (2 صوت)

04-13-2013 05:42 PM
الاستاذ العزيز شوقي
تحيه طيبه وبعد
بعد السلام والاحترام اقول احب ان اقول لك ولا ادري ااضحك ام
ابكي لما وصلت اليه درجت الاستلاب الفكري عندنا خصوصا تجاه
الثقافه الشرقوعربيه ..
رحم الله ابروفيسر الطيب عبدالله

حقيقه لا ادري ماذا اقول فقط شكرا علي هذا المقال الجميل


#636945 [محمد السوداني]
5.00/5 (1 صوت)

04-13-2013 05:29 PM
لا اعتقد ان المشكلة هي عند العرب او المصريين فالمشكلة لدينا نحن الذين تهربنا وفشلنا في فهم ذاتنا...

فالسودانيون بمختلف اعراقهم هم افارقة يتحدثون اللغة العربية , وهذا الخليط هو الذي خلق المكون الذي يسمى (( السوداني)).

شئت ام ابيت فأن الشكل واللون هو الذي يخلق الانطباع الأول ولو شاهدتك في احد مطارات أوربا أو امريكا فأن اول ماأشاهده فيك هو بشرتك السوداء ولن افكر بأنك سوداني أو (اماراتي أو مغربي) اسود البشرة .

لماذا تريد من الآخرين ان يحترموك عندما تخجل انت من اصلك !!

هل تعلم بان هناك بحث جيني اشترك فيه خبراء سودانيون بالتعاون مع بعض الجامعات الاوربية والامريكية اثبت ان الجين العربي هو الاقل في تكوين الانسان السوداني وللمفارقة كانت القبائل النيلية العربية أكثر افريقية في جيناتها العربية من بعض القبائل المصنفة علي انها غير عربية ولا زال أهلي الرطانة في اقصي شمال السودان يصرون علي ان جددوهم من الخزرج !!!


ردود على محمد السوداني
Canada [الدنقلاوي] 04-13-2013 09:06 PM
نعم يالسوداني أفارقة يتحدثون العربية ... وهذا لن يجعل منا ولا نريده أن يجعل منا عرباً، فالماليين والسنغاليين الذين هم ذو ثقافة فرنسية كاملة الدسم لا يقولون أنهم فرنساوية .. والانحوليين بثقافتهم ولغتهم البرتغالية لا يقولون انهم برتغاليين... نحن فقط ناقصي العقل واحترام الذات نتمحرك بالعرب وهم يتنكرون منا وينكروننا ويعتبرونا _ في أفضل الأحوال _ من بقايا بلال رضي الله الصحابي ... احترموا انفسكم يحترمكم الناس


#636938 [الفهد الاسود]
5.00/5 (1 صوت)

04-13-2013 05:15 PM
والله أمتعتنا ياعم شوقي متعة وحكمة وفكامه رغم عنت المستعربين الذين جعلونا أضحوكة


شوقى بدرى
شوقى بدرى

مساحة اعلانية

تقييم
6.25/10 (9 صوت)




الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر.
علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة