المقالات
الشعر
أسماء الجنيد
اتمنى اكون مسؤولة في البلد لي فد شهير !!!
اتمنى اكون مسؤولة في البلد لي فد شهير !!!
04-15-2013 10:52 PM

عاوزة أكون مسؤولة في البلد دي لي فد شهير!!! اها يا أخوانا ده طلب خطير ولا كبير؟
عشان اول بالتبادي,, اصبح ليكم بني كوز عن بكرة ابيهم في كوبر, وإن ما شالهم سجن كوبر نوديهم سجن شالا الحاضن المظاليم من الغبش!
نحن بنمشي بي مبدأ الإتظلموا في البلد دي يجب إنه الحساب يكون هنا في البلد دي.
ضد سياسة تصدير مجرمننا خارج البلاد في السجون المكندشة ومع الناس البتراعي حقوق الإنسان والحيوان !
تانيا حوش بانقا في كافوري كل العمارات والفلل اقلعها منهم بحمرة عين حقوق الشعب، واحولو لي مستشفيات خاصة بالأطفال في كل التخصصات
ما شاء الله فلل ماااهلة ومجهزة بأحدث المعدات والاثاثات وموقع إستراتيجي عجيب..

ونقول كده يا يمة ونفتح كل الموانيء والمطارات لخيرة ابناء وبنات البلد للرجعة الغير مشروطة، البلد بلدهم وهم جنا حشاها!!
لدينا خبرات ثرة من أبناء الوطن المهجرين قسرا في كل المجلات إستفادت منهم الشعوب الأخرى.
بإذن الواحد الأحد سوف يرجعون مرفوعي الرأس و يعمرون البلاد ويعيدوا بناء هيكل الوطن من جديد بحب وإخلاص وتفاني .
محتاجين تعمير لكل الوزارات وإعادة بناء وتأهيل لكل الأقسام خاصة إقتصاد البلد .

عافية الوطن تبدأ بنفض الغبار عن وزارة الصحة ثم التعليم ، وكل الوزارات الحيوية والرياضة ، والسياحة ، وألآداب والفنون الخ..
ويرجع كل المظاليم المفصولين للصالح العام بدون شرط , وترجع ليهم حقوقهم بأثر رجعي من الحرامية تجار الحكومة!
إلغاء جهاز الأمن والمخابرات ومحاسبة كل المنتسبين له!
إلغاء كل رسوم الجبايات المقطوعة من نافوخ بنو كوز, مثال دمغة النفايات وزكاة شنو ما عارف وضرائب المغتربين الهادة حيلهم،وغيرها كتير!!
إلغاء كل الضرائب المفروضة على المغتربين خاصة ما يسمى برسوم المطار الما معروفة ماشة وين؟
حرية الصحافة والرأي .

إعادة بناء وتعمير كل المستشفيات بالبلد وتغيير المعدات,, ومجانية العلاج لكل المواطنين
إعادة دراسة المنهج التعليمي وإعادة طبع كل المناهج القديمة من بخت الرضا لكل المراحل الدراسية ومجانية التعليم !
النظام الدراسي يكون كالآتي : الإبتدائي 10 سنوات من صف أول للعاشر ,, ثم الثانوي 4 سنوات،، حتى تأتي مرحلة الجامعة .
تبدأ دراسة اللغة الإنجليزية من الصف الأول الإبتدائي, عشان يرجع التعليم مؤسس زي جيل ابواتنا البارعين في اللغتين العربية والإنجليزية تحدث وكتابة!
مش زي وزراء وحكام اليوم ، الواحد ما قادر يجمع لا في العربي ولا الإنجليزي ، معلمين الله من مجاميعو!!!

ترجع وزارة التربية والتعليم زي الزمن السمح,, إسم ومضمون( وزارة التربية اولا ثم التعليم) شباب اليوم محتاج لتربية من الصفر!!
تغيير نظام الحكم في البلد كالآتي :
يكون الحكم فقط 4 سنوات لو نجح من هم في سدة الحكم في إستمرارية المحافظة على أمن وسلامة البلد والمواطنين, تمنح لهم فرصة أخرى ومدتها 3 سنوات فقط
على ان لا تزيد فترة الحكم لأي كان من السبعة سنوات ، وقابلة للتغير في أي وقت ،إن بدر اي شيء يخل بنظام أمن البلاد.
تكون هنالك لجان مراقبة دقيقة لكل وزارة ولكل جهة حكومية, وفي مدخل كل وزراة يوجد صندوق شكاوي لكل مواطن!
أي اخطاء تكون المحاسبة فورا وامام رؤس الأشهاد، لكي نبتر الفساد من جذوره,
إسترجاع كل الأراضي المغتصبة من دول الجوار. واولها حلايب وشلاتين،و إعادة النظر في تقسيم مياه النيل والتحكم في منطقة السد العالي
( واللبيب بالإشارة يفهم)

تقسيم السودان لخمسة اقاليم متساوية جنوبي شمالي وشرقي و غربي وأوسط ، لكل إقليم إدارة كاملة وممثلين يشاركون في الحكم لكل الوطن في العاصمة الخرطوم.
إعادة رفع علم الإستقلال الأول وهو العلم الذي حرر بلادنا من قيود المستعمر, يجب ان نفخر به ونعلم اجيالنا القادمة كذلك.
محاكمة كل من تلوثت يده بفساد البلد و من تستر أو ساعد على الفساد و إرجاع كل الأموال المنهوبة.
( مافي عفا الله عما سلف في الأموال العامة ).

ويلا يا جماعة همتكم معانا,, واليد الواحدة ما بتصفق , كل واحد يدلو بلدوه ابسط مقترح ربما يساعد بتقدم البلد ولو لخطوة !
همة الجميع معنا واتمنى التفاؤول وروح الأمل وعدم التشاؤم ،ومعا لكي نجهز خطة تدفع بسفينة البلد لضفة الأمان قريبا إن شاء الله.
متأكدة افكارنا جميعا مع بعض سوف تثمرفي إعمار ومعافاة البلد ، حتى ولو على الأمد البعيد,, مافي مجال لليأس ولا التشاؤوم!
خلونا نقتدي بجدودنا صناع البطولات الحافظوا على الوطن ووصية الجدود غالية ومثمرة لو اتبعناها بدقة.
مافي داعي نبكي ونتحسر على الفات من زمنا السمح في كل المجالات، الجاي أجمل إن شاء الله.

متاوقة
وما هنت يا سوداننا يوما علينا ... جدودنا زمان وصونا على الوطن، على التراب الغالي الماليهو تمن!
اها يا جماعة شن قولكم !!
أسماء الجنيد
[email protected]


تعليقات 28 | إهداء 4 | زيارات 2123

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#640027 [هدهد]
0.00/5 (0 صوت)

04-17-2013 07:17 AM
وبالمناسبة يا بت الجنيد ان مصادرة اموال الدولة التى سرقها الكيزان والاراضى التى استولوا عليها ظلما وتلك العمارات الشاهقة التى بنيت من دم وعرق المواطن تصادر للصالح العام وتدخل خزينة الدولة وتعاد تلك الشركات والمؤسسات التى بيعت للكيزان بابخس الاثمان وهى تخص الشعب . لو تم مصادرة هذه الاموال والشركات سوف يصبح السودان من اغنى دول افريقيا وسوف نستطيع ترميم ما دمره هؤلاء اللصوص وبأسرع وقت وسوف يقيف نزيف الدم فى جنوب الوطن ويتعالج المواطن المسكين بالمجان ويتعلم ابن المواطن المسكين بالمجانى كما كان قبل عام 89 المشؤوم ويبدأ السودان فى النهوض والاستقلال من جديد ويتم غسل وسخ الكيزان تماما لصالح الوطن . الله اكبر عاش السودان حرا مستقيلا من بنى كوز الكفرة الفاسدين .


#639951 [عم عبد الرحيم]
0.00/5 (0 صوت)

04-17-2013 12:57 AM
بعد التحية و الاحترام و كمان يا بت الاجاويد ما تنسي فصل الدين عن االدولة و تبقي ما قصرتي تب لو رجعتي لينا هيبة السلطة القضائية اللي ممكن تحاكمك انتي زاتك لو لفيتي دورتي او قصرتي في الواجب باعتبارك رئيسة البلد و الاهم من دا كلو يا ريت تختي جريمة الاغتصاب ضمن الجرائم التي لا تسقط بالتقادم ابدا . و كدا وردي و مصطفي ابو سامر و العطيراوي و الغلاتية و الطقطاقة و كل الشرفاء من بلادي اللي رحلوا يبقي ردينا ليهم حقهم و لكي في الختام الف سلام


#639840 [ابوبكرنك]
0.00/5 (0 صوت)

04-16-2013 05:58 PM
بس بالعقل كده كيف تكوني مسئولة عن بلد وانت لا تحملي وثيقة سفر سوداني ارجعي للجواز اللبني اوالاخضر الجديد وبعدين نخليكي تكمي مش شهر سنين وسنين .


ردود على ابوبكرنك
Russian Federation [ود الشكرية] 04-17-2013 07:23 AM
سلمى لى على الاهل والوالد والوالدة هناك فى شمال الوادى


#639694 [cola]
0.00/5 (0 صوت)

04-16-2013 03:37 PM
يا اسماء اصحي الدنيا بقت صباح ( ديل لو عينومسؤول بالاخلاق دي يكونو يا جنو يا كمان جنو واحدة من الاتنين ديل )


#639667 [عبد الحي]
0.00/5 (0 صوت)

04-16-2013 02:57 PM
برضو يا أسماء ما تنسي... تشيلي معاهم جماعة التكفير، وجماعة المنبر الما عادل، وجماعة الما أنصار سنة، وكل جيم ما راكبه عدلها.


#639661 [مدحت عروة]
0.00/5 (0 صوت)

04-16-2013 02:53 PM
مافى دولة بتلغى جهاز الامن والمخابرات بس قولى اعادة هيكلته والمهام الموكلة اليه فى العهد الديمقراطى والاطاحة بالفاسدين فيه!!!
بعدين الاهتمام بالمنتج الحقيقى فى الريف وتسهيل مهمة الانتاج له من رى وبذور محسنة وخبراء زراعيين وبياطرة ومعلمين لاولاده واطباء بشريين ونقاط شرطة لحفظ الامن وتطبيق القانون وسينمات متجولة كمان تتذكريها؟؟؟ وكمان مد الكهرباء ومخازن التبريد والتجميد والطرق القومية والطرق الزراعية وتوفير الجازولين للزراعة والنقل يعنى باختصار توفير البنية الاساسية للانتاج ويبقى بعد داك العمل والعرق والتجار الوطنيين ما بيقصروا من التمويل والنقل وتصدير الفائض لجلب العملة الصعبة بالمناسبة الكلام ده ما خيالى وكان حاصل قبل ما النميرى يدمر هذه المنظومة فى قراراته فى استاد الخرطوم لمن كان معاه عبد الناصر والقذافى الدمروا الامة العربية بالتاميم والمصادرة ودول المخابرات والمباحث الماكان عندهم شغلة غير تدمير الاوطان!!!!


ردود على مدحت عروة
Sudan [مواطن] 04-17-2013 01:25 AM
أختلف معك أخ مدحت في أن الراحلين جمال عبد الناصر والقذافي رحمهما الله دمرا
الوطن العربي .... أسأل أمير قطر وحكام الخليج من دمر ليبيا والسودان
والآن سوريا ومن سهل غزو العراق ؟؟


#639443 [زول ساى]
0.00/5 (0 صوت)

04-16-2013 11:46 AM
سوف نقف معك وندعمك حتى يتحقق المنشود


#639368 [محموم جدا]
0.00/5 (0 صوت)

04-16-2013 10:46 AM
قبل اليقظة من الحلم الكبير دا و الجميل نقول ليك انشاء الله خير .. خيرا جانا و جاك ..ما تنسي تعملي قوانين اجتماعية و جنائية تعيد الشخصية العامة السودانية الى سابق أيامها.. الرجولة الامانة.. الصدق .. الشهامة..نصرة المظلوم .. الكرم .. الشجاعة ..السوداني الكرماخ


#639327 [المقهور]
0.00/5 (0 صوت)

04-16-2013 10:17 AM
حبابك يا الكوشي,, تتبارك ما تتشارك ,, قول آمين آمين ,, والبلد والله ملانة بالخبرات الثرة وحواء السودان ولود والحمد لله ,,

هههههههههه ده كلام حبوباتنا زمان يعني ما تعرس إتنين خليك على أم العيال وما تجيب ليها واحده تانية تشاركها في راتبك ومصاريفك التعبانة دي ...

بعدين شهيرك ده تلقيهو كيف ودي النصيحة الشالت غازي صلاح الدين لحقتو أمات طه - هههه ههههه ...


#639166 [MG]
0.00/5 (0 صوت)

04-16-2013 07:10 AM
أقول ليكي نسيتي شنو:
السكة حديد وما إدراك ما السكة حديد. كان شعارهم إذا تعطلت عربة واحدة في اي أنحاء السودان تلقي الدنيا مقلوبة من المدير العام حتي أصغر عامل دريسة. علمتنا الدقة في المواعيد الي يومنا هذا. علمتنا الخوة والمروءة والاحترام وشد الحزام بل والسياسة ومكافحة الدكتاتوريات
وليه خليتي الجيش المترهل من أصحاب النفوذ والحصانات. بالله كم من واحد( محصن) في هذا البلد؟ كل إنقاذي ودستوري ورجل امن وموظف من اياهم عنده حصانة من اي مسالة هو وأهل بيته وعشيرته بل وشلته كمان
وخليتي خراب الخدمة المدنية ويا حليلها لمن كان المظلوم يلجاء للجنة الخدمة المدنية التي يرأسها ريئس القضاء لضمان حيدتها
وخليتي وخليتي الكتير. ده شى ما بينقدر
قولي يا لطيف


#639125 [أسماء الجنيد]
0.00/5 (0 صوت)

04-16-2013 03:50 AM
سلام وتحية لكم جميعا شاكرة ومقدرة مروركم الملاني فرح حد السقف يعلم الله,,
اها نبدأ بي اخوي زول النصيحة,, بالنسبة للفترة الإبتدائية عشرة سنة قصدت بها الإبتدائي والإعدادي مدموجة مع بعض,, وبيني بينكم النظام ده شفتو هنا عند الخواجات, بأسس التلميذ تأسيس تمام , وبعدها بنتقل للمرحلة الثانوية, أي ما يعادل الثانوي العالي عندنا, يكون درس التلميذ من عمر 6 سنة +10 سنة عمرة يكون 16 سنة إبتدائي وإعدادي مع بعض لكن ما مقسمة بإمتحانت من مرحلة لمرحلة ,, لما ينتقل لمرحلة الثانوي يكون واعي جدا, ويستوعب مواد المرحلة الثانوية العليا, ,يكون في بداية سن النضوج, تكتمل سن النضوج للتلاميذ والتلميذات في المرحلة الثانوية, ثم يتوجهوا للجامعة شباب واعي وفاهم معنى المسؤلية, مش زي شفع الزمن ده! 15 و16 سنة بمشي الجامعة, مسؤولية كبيرة ومرهقة ومواد اكبر من تفكيرهم، ولسة عندهم باقي شقاوة ما كملوها, لذلك الفشل مصاحبهم زي الظل,,
وبرضو الشورة مع بعض بتجيب نتيجة وباب النقاش لسة مفتوح,,
بالنسبة للجزء التاني من سؤالك يا زول النصيحة بالنسبة اتفق معاك تماما في نقطة إنه نفس الناس الجات كنست وطمعت في القروش ممكن تتكرر نفس الرواية المحزنة,, عشان كده إقترحت نظام الأربعة سنوات, والمراقبة الدقيقة وتقسيم البلد حسب الأقاليم,, اقرأ الفقرة دي برواقة بتفهم قصدي إن شاء الله,, وشكرا لمرورك الكريم

(((((

يا ابو الوليد,, الدايرة اقولوا عبارة عن وجهة نظر وطرحتها للجميع,, وحبيت مشاركتكم لي الفكرة ،عشان نحاول نعدل الحال المائل,, وكل حركة فيها بركة ..وشكرا ليك كتير

(((
يا (Ivory) حبابك والله
نحمد الله على نعمة الإسلام’’ والإسلام في السودان قبل ما يولدوا جدود جدود ناس الإنقاذ,,

(((

حبابك يا الكوشي,, تتبارك ما تتشارك ,, قول آمين آمين ,, والبلد والله ملانة بالخبرات الثرة وحواء السودان ولود والحمد لله ,,

(((

مرحب يا isic ,, والله ياخوي نحن نحاول نطرح افكارنا مع بعض ، وافكاري مع افكارك وافكار غيرنا بنبني البلد تـــب’ ديل جونا برا اي فهم وإتحكروا ربع قرن,, لو رتبنا صفوفنا كل قرد بطلع جبله إن شاء الله ..

(((
تسلم يا بوي إبراهيم الحسين,, اتفق معاك تماما دايرين قانون محنك يشيل الدغمسة الحايمة في وسط البلد تقدل فارده الظلم والفوضى,, لازم يرجع نظام البلد بي القوانين الما فيها محاباة ولا محسوبية ,, والقانون الحائم ده نقول ليه العرجا لي مراحها,,لكن مانا محتاجين لي خبرات اجنبية تب ,, ناس القانون من ابناء البلد المشردين يسدوا عين الشمس, بس يجونا صادين,, وتسلم يابا..

(((
تسلم يا كتاحة,, وتسلم ايامك , ربي يكتر من امثالك ,, ويلا همتكم ندون كل الأفكار دي ومشوار المليون ميل ببدأ بخطوة,, ومعا من أجل وطن حدادي مدادي معافي من كل جراثيم الفتنة والعنصرية والتخلف,, تظله راية المحبة والمودة والإخاء والحرية والسلام..


ردود على أسماء الجنيد
Saudi Arabia [دكتور أمجد] 04-16-2013 03:03 PM
سلمت يداك يا بت ملوك النيل ونحن معااااك قلبا وقالبا ولكن عارفه اهم حاجه نسيتيها او ربما ضمنتيها في كلامك بمعاقبة الجماعة ولكن كما تعلمين ويعلم الجميع اول حاجة وضع معالجة لكل جذور الفساد وقطع دابر الفساد من البلد لانو كل الدول سر نجاحها في انها قطعت دابر الفساد بكل انواعه من ( سرقة واختلاس وظلم ومحسوبية واستغلال نفوذ وعدم احترام مواعيد العمل وكل اوجه الفساد الاخري) حتى نتمكن من خلق ثقافة جديدة خالص اسمها النزاهة.

ماليزيا، سنغافورة،الهند، وطبعا العالم الغربي من زمان وسبقتهم اليابان وفي الطريق الان دول مثل اثيوبيا.


#639119 [ابو طربوش]
5.00/5 (1 صوت)

04-16-2013 03:12 AM
اثني ترشيحك يا بت الجنيد لدورة رئاسية .. تاتشر و بنازير احسن منك في شنو ؟
بس حكاية العشرة سنة بالابتدائي زودتيها حبتين .. فالمعيار العالمي 12 عام قبل الجامعة ..
و يا حسرة لن نستطيع استخدام علم الاستقلال لاستيلاء دولة الجابون عليه بعد استقلالها .. لكن ولا يهمك ممكن نعدل فيه .. مثلا بترك اللونين الازرق والاصفر افقيآ و يكون الاخضر في شكل مثلث جانبي .


#639098 [حليم - براغ]
5.00/5 (1 صوت)

04-16-2013 01:55 AM
ربنا يديك العافية يا أسماء بنت الجنيد..ده ياهو البيقولوه عليه الكلام البعجب ..وأنا أول واحد في صفك بس كونوا توديهم كوبر وشالا دي مابتفق معاك فيها !! ديل علي طول يا أسماء بنت الجنيد تتقطع رؤسهم ويتعلقوا في أحد الميادين ويكون أحسن قدام دار المؤتمر الوطني من كورعيهم.. ذي ماحصل للفاشي موسيليني
وماتنسي الشواذ عديمي الرجولة كلاب الأمن ..ديل كمان علي طول بعد تتقطيع رقابهم يترموه للكلاب أو يترموا في صحراء العتمور ..يموتوا براحتهم ..ويكون جزاك الله الف خير!! وشكراً كتير علي مقالك الشجاع!! شوف يا البشير شعب السودان بكرهك كيف ..لعنة الله عليكم ياأخوان الشيطان ياأوغاد ..الكل بتمني ليكم الهلاك..


#639093 [مواطن]
0.00/5 (0 صوت)

04-16-2013 01:39 AM
بس في حتة النظام الدراسي أختلف معك يا أستاذة : 10 سنوات للمرحلة الابتدائية طويلة
جدا .. حبذا لو أعدنا السلم التعليمي نظام 3 مراحل : الابتدائي 6 سنوات والمتوسط 3
سنوات والثانوي 3 سنوات ...


#639090 [أبو سامي]
0.00/5 (0 صوت)

04-16-2013 01:31 AM
لكن ما رؤيتنا حا تعملي شنو في السياسة الخارجية.......سبب كل المشاكل


#639089 [مغلوب]
0.00/5 (0 صوت)

04-16-2013 01:27 AM
دا اعظم برنامج سوداني حقيقي علي الاطلاق
لو دا برنامجك ارشحك رئيس لمده 8 سنوات


#639082 [كتاحة]
0.00/5 (0 صوت)

04-16-2013 01:15 AM
انا اول الداعمين و الناخبين لكي

هذا هو البرنامج الانتخابي المثالي الذي نحلم ان يعرضه علينا اي انسان حتى يحظى بدعمنا

و لكن لا نسمع سوى الغثاء و .. و .. تكبييييييييييييير


#639075 [ابراهيم الحسين]
0.00/5 (0 صوت)

04-16-2013 12:59 AM
والله يا بنتى تب ما قصرتى وتستاهلى تحكمى البلد سنتين
بس عندى اضافة عايزين دولة قانون ونحن ال وضعنا قوانين البلاد ال حوالينا
او نرسل نجيب ) مهاتير محمد من مليزيا يقعد معانا سنتين ويعمل لينا دولة
القانون مع السودانيين الاشراف ال خارج الوطن وتعيين قضاة يحكم بالقانون
وكل الناس سواسية امام القانون فى الوقت داك ما حنحتاج أمن الدولة ولاحرس لرئيس الدولة
بس حنحتاج لعساكر لحماية الحدود وبس الله يديك العافية وما دام زيك موجود حنبنى دولة حضارية


#639064 [isic]
0.00/5 (0 صوت)

04-16-2013 12:45 AM
والله يأختي كلامي سمح إلأ الجماعة دول سلطة لدقيقة مابدوكي بكلامك ده.


#639057 [الكوشى]
0.00/5 (0 صوت)

04-16-2013 12:32 AM
انا معاك قلبا و قلبا وقلبا

و اول من ادى صوتى لانو رايح من زماااااااااان

و احييييييك بت الجنيد


#639041 [Ivory]
0.00/5 (0 صوت)

04-15-2013 11:56 PM
ونسيتي ادخال الاسلام في السودان لان الذي كان زمن الانقاذ لم يكن الاسلام والعالم كلو قايل دا الاسلام


#639030 [ابوالوليد]
0.00/5 (0 صوت)

04-15-2013 11:38 PM
عشان تعملى شنو؟؟


#639029 [النصيحة بتودر سيدا]
0.00/5 (0 صوت)

04-15-2013 11:36 PM
كله موافقين عليهو وبنديكي كمان سنة زيادة .. يعني سوار الدهب أحسن منك في شنو ... على الأقل تنفذي أفكارك دي ...بش الشيء الوحيد الماموافق عليه عودة وزارة التربية والتعليم بنفس القديم ... لأنو القديم هو الوصلنا للنحن فيهو ده ... لكن ما في مشكلة أنو الناس تقعد وتتفاكر هل المشكلة فينا يعني نقص في التربية .. لأنو ما ممكن أي واحد يدوهو المسؤولية أول شيء عاوز يكمش ليه كمشة كبيرة ...لا بهمه الله ولا عوض الله وهل فعلا نحن بالهشاشة دي .. أيا كانت الاجابة فالمحصلة هي ما نراه اليوم .. ما تقولي يا بنت الجنيد ديل غير ولا نحن غير .. الناس ديل ما جو من السما ديل ناس مننا حتى لو تبرينا منهم فالحقيقة هي أنو الناس ديل هم نحن وإن اختلفنا .... بالله عاوزين الكنس يبدأ من أول يوم للإنقاذ من كمال ترباس مرورا بقيقم وشنان ونهاية بفرفور وعلى هذا الوزن ... بس يا أختي الناس بتكنسيهم بس النفوس بتكنسيها كيييييييييييييييييييييييف .. ودمتي ...


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة