04-17-2013 11:54 AM


ما أن تطل قضية تخص (النساء) حتي ينبري لها العضو البرلمان المثير للجدل (هكذا أسموه) .. دفع الله حسب الرسول .. في ظاهرة تبدو فريده عصرها إذ أن الاعضاء البرلمانيون لا يعرف لهم تخصص فالعضو البرلماني هو المتحدث عن جميع القضايا التي تمس مواطنيه الذين قاموا بإنتخابه .
سجل العضو البرلماني (المثير للجدل) يقول انه لم يثر يوماً أي قضية تتعلق بالفساد المالي أو الفساد الإداري أو الإحالة الجبرية للصالح العام أو الغلاء الطاحن أو أي من أنواع الخلل الأخري التي تستوجب المحاسبة والمسائلة .. كل هذه الاشياء لا تجعل (دم) العضو المثير للجدل يثور ويفور ويغلي وفمه يرغي ويزبد وأعصابة تنهار وتفلت .. لكن ما أن يكون الحديث عن (النسوان) حتي (تجيهو الحالة) ويخرج عن الطور صائحاً ومحذراً وذات مرة حاول أن إستخدام العضلات لولا أن أعضاء البرلمان (حجزوهو) !
العبدلله من خلال متابعته للصحف والأخبار قام برصد هذه الظاهرة الغريبة منذ وقت طويل وكتب فيها عدة مقالات كان آخرها بعنوان (يا دفع الله ما حيرتنا) وها هو (دفع الله) يحيرنا اليوم وهو يتابع (هوايته) في السكوت عن (كل المظالم) ويتابع مسيرته القاصدة في الكلام عن (النسوان)!
يقول الخبر: طالب النائب البرلماني (دفع الله حسب الرسول أثناء التداول حول بيان الثقافة والسياحة بالبرلمان وزير السياحة بتنظيف ما أسماه (وسخ) ملفات وزراء السياحة السابقين وقال أنه كان يسميها في السابق وزارة (الصياعة) وأكد أن دليل السياحة في عهد وزراء السياحة السابقين كان يشمل كل ولايات السودان يشار في كل ولاية منها إلى فتاة جميلة وتابع (ده معناتو شنو وداير الناس يجو لشنو؟) !
إنتهي حديث النائب البرلماني (تخصص نساء) والذي يفسر وضع صورة لفتاة جميلة على دليل سياحى أنه دعوة للسياح من مشارق الأرض ومغاربها أن تعالوا فلدينا هذه البضاعة التي سوف تروق لكم .. وهذه والله العظيم فرية يجب أن يعتذر عنها هذا العضو (المتخصص) لجميع أفراد الشعب (الفضل) إذ لم يعرف مجتمعنا السوداني حتي في أحلك (أيامو) وأنضبها أن يستبيح (السياح) فتياتنا ويعد في حكم النادر جداً أن تجد فتاة سودانية تسير في الشارع العام أو تجلس مع سائح في مكان عام (في العاصمة) خليك من الأقاليم !
وحاشا لله أن يكون أحد وزراء سياحتنا السابقين قد قام بوضع مثل تلك الصور لهذا الغرض الدنيئ الذي جال بخيال العضو (المريض) ولو كنت وزيراً سابقاً بالسياحة لما توانيت في فتح بلاغ (قذف) ضده
(عشان يعرف الله واحد) !
أن يقصر العضو البرلماني (دفع الله) مداخلاته ومساءلاته البرلمانية في (تخصص) واحد لا يخرج عنه فهذا شانه وشأن الذين قاموا بإنتخابه ليمثلهم ولكن أن يصف وزراء السياحة السابقين بأن ما قاموا به (وسخ) يحتاج إلى (تنظيف) وأنهم يقومون بوضغ صور الفتيات من أجل غايات دنيئة (كما جاء في سياق السؤال) فهذا أمر يتوجب فيه أن يقوم هذا العضو (المحترم) بالإعتذار عنه امام الملأ وهو أمر لا يمت إلى (الدين) بصلة إذ أن الله تعالي يقول في محكم تنزيله :
(وَمَنْ يَكْسِبْ خَطِيئَةً أَوْ إِثْمًا ثُمَّ يَرْمِ بِهِ بَرِيئًا فَقَدِ احْتَمَلَ بُهْتَانًا وَإِثْمًا مُبِينًا (112) (سورة النساء).

كسرة :
كدي يا شيخ دفع الله خلينا من (النسوان) وشوف لينا نص ميزانية سنار مشى وين؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟



elfatih.gabra@gmail.com


تعليقات 29 | إهداء 0 | زيارات 7623

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#641609 [hajabbakar]
0.00/5 (0 صوت)

04-18-2013 06:22 PM
دفع الله حسب فهمو


#641416 [azhari]
0.00/5 (0 صوت)

04-18-2013 02:20 PM
ينصر دينك يا ابو جبرة.. ايوووووووووووة كدة قعد كل زول فى علبووووووووو... دة شنو الطالع لينا فيها دة؟؟ بعدين يا استاذنا الواحد لو داير يتكلم فى امور زى دى او ما زى دى عموما يعنى... لازم يتخير الالفاظ والمفردات وصياغة الكلام بحيث لا تجرح مشاعر اى بنى ادم دة الاسلام علمنا كدة,, مش كدة يا ابو الدفاع هههههههههههههه؟؟ قال ختان قال؟؟؟؟؟؟؟؟؟؟؟؟؟؟؟؟؟؟؟؟؟


#641150 [شقى ومجنون]
0.00/5 (0 صوت)

04-18-2013 10:41 AM
لكن ما أن يكون الحديث عن (النسوان) حتي (تجيهو الحالة)...هههه


#641016 [ام الحسن]
5.00/5 (1 صوت)

04-18-2013 08:27 AM
الكيزان كان ماوهم صحى يمسكو السياحة لانصار السنة ما بلحقوها امات طه

بكره العضو المثير للجدل ده ح يطلع ليهم ويقول نبنى لينا كعبه فى السودان ونسوى معاها مسجديين على طراز المسجد النبوى والمسجد الحرام الشريفيين وتبقى فى سياحة دينية فى السودان

ياخى ياوهم فى حاجة اسمها سياحة ثقافية ودى عايز ليها اهرامات وآثار وزباينها الخواجات

وفى سياحة ترفيهيه ودى عايزة منتجعات ونسوان ودى زباينها معظمهم من اثرياء الخليج وطبعا نحن والحمد لله مابنقدر عليها مش لانو ماعندنا نسوان سمحات لكن لانو ماعندنا منتجعات عشان كده خلى دفع الله يطمئن

السعودية الله رحمها بالسياحة الدينية والمصريين الشداد اللضاد الله رحمهم بالثقافية لكن لانهم عالم بتاعين فهلوة زادو عليها الترفيهية عشان يقبضو من الخواجات ومن العرب شفت الشغل بتاع الشفوت


ردود على ام الحسن
Russian Federation [بت ام الحسن] 04-18-2013 03:32 PM
آآى والله عشان كدى الملك يشيل ويوسع فى الحرم 00وفى حتة السياحةدى ناس السعودية شغالين بالآية الكريمة --انا جعناكم شعوبا وقبائل لتعارفو ان اكرمكم عند الله اتقاكم ---الناس تتعارف كيف بلا سياحة


#640832 [عطشقى سفرى]
0.00/5 (0 صوت)

04-17-2013 10:37 PM
الزول ده عندو كم مرة الله اعلم واحدة وان كانت واحده تساوى اربعة عشان كدة دى العقدة من النسوان ؟؟اما الناس الانتخبوة يكونو عارفين نقطة ضعفو ...وبعدين ناس المؤتمر لوطنى عندهم تخصصات دى واحدة منها رجل متتخصص حريم ولا يمكن تالتن؟؟
الزول محتاج لاخصائى امراض نفسية


#640791 [kamal mousa]
0.00/5 (0 صوت)

04-17-2013 09:32 PM
اعجبني جبت ليهو اية من نفس تخصصه نساء وتوليد..


#640758 [واحد تفتيحة]
0.00/5 (0 صوت)

04-17-2013 08:37 PM
كسرة :
كدي يا شيخ دفع الله خلينا من (النسوان) وشوف لينا نص ميزانية سنار مشى وين؟ هههههههههههههههههه
الزول ده يا عم جبرة ما بقدر علي الوالي الحرامي احمد عباس فالح في الفارغة .


#640737 [دبوس]
0.00/5 (0 صوت)

04-17-2013 07:55 PM
عمك ده بره الشبكه عديل


#640668 [احمد ابونصر الشمالي]
0.00/5 (0 صوت)

04-17-2013 05:41 PM
حلينا من دفع الله نسون دا ياجبرا .. انت اخبار ناس النفايات وارنيك 15 شنو


#640644 [الجن الارقط]
0.00/5 (0 صوت)

04-17-2013 05:09 PM
كسرة رابعة النائب ده رايو شنو فى اعلان الدعارة بتاع جريدة الخال الرئاسى!؟


#640643 [radona]
0.00/5 (0 صوت)

04-17-2013 05:09 PM
اولا لكي يكون السودان بلد سياحي ينبغي نظافة المدن واولها العاصمة من الاوساخ ثم نتحدث عن السياحة
ثانيا مع السيد النائب دفع الله كل الحق الناس لا تأتي للسياحة لمشاهدة الحجر انما البشر كذلك
ثالثا فات على العضو المحترم باننا شعب محافظ لا نرضى ان تتعرى امام رجالنا السائحات الفاتنات
رابعا ارى توفير وزارة السياحة وحلها وتوفير مخصصات ومرتبات موظفيها في توفير محلول غسيل الكلى وادوية الملاريا
خامسا عيب ونحن دولة تحكم بالشريعة الاسلامية وندعو للسياحة
ولاشنو


ردود على radona
Russian Federation [الدنقلاوي] 04-18-2013 05:54 AM
شنو

Russian Federation [واحد تفتيحة] 04-17-2013 08:39 PM
الله بسالك نحن دولة تحكم بالشريعة ؟


#640607 [امين الشريف]
0.00/5 (0 صوت)

04-17-2013 04:18 PM
قالوا في المثل عينك في الفيل تطعن في ظلو)) يعني الزول ده لا شاف ولا سمع بالاعلان الانتباهة ؟؟؟؟


ردود على امين الشريف
Russian Federation [Abu Areej] 04-17-2013 09:15 PM
كده يقدر يقول (انتبا) وما يكمل الكلمة انتباهة .. كان يشوف النحوم نصف النهار ويبقى في نظر الجريدة رويبضة .. دي عالم جبانة يا اخي .. يعيشون على وتر الدين والشرف ويوظفوها حسب هواهم ..


#640601 [ابو طربوش]
5.00/5 (1 صوت)

04-17-2013 04:12 PM
العضو دفع الله مالاقاهو ليه موضوع من المواضيع التالية:
الاعلان المسئي للمراة السودانية
احتكار الغاز من قبل تجار الجبهة
الاغتصاب اليومي
اعلانات طلب الطلاق للاعسار


#640596 [الكومندان]
0.00/5 (0 صوت)

04-17-2013 04:07 PM
مثل هؤلاء الأعضاء الوهم هما المضيعين البلد ودا مريض وعندو مركب نقص ومابتكلم في الفساد المالي الحاصل دا لأنو أرزقي وبس


#640575 [ابو الليل]
5.00/5 (1 صوت)

04-17-2013 03:19 PM
دا مش قال ال ما بعرس 4 ما راجل؟؟؟؟ ... والله لكن وريتنا يا فحل ... فحل علي وفي السكوت عن الحق نعامة ...ههههه.. كدي دق صدرك وقول خط هيثرو بس مشى وين .. بكرة تلقى نفسك في وزارة المرونقا في محلية شعيرية جنوب دارفور ...


#640551 [سالم]
5.00/5 (1 صوت)

04-17-2013 02:49 PM
والله الزول دة كل ما اشوفو يجيني غثيان


#640544 [ahmmed]
4.00/5 (3 صوت)

04-17-2013 02:34 PM
دفع الله متخصص نسا
وماخدلو كورسات في الولاد
دفع الله عارف الدغمسة
واكل الكتف وكتل الجداد
مااصلو شغل البرلمان
كسير تلج وخم للرماد
ودفع الله ياناس زول حريف
بعرف يدوده للعباد
شان اصرف الانظار لا بد
اعرف فنون دس الفساد
وعارف دراويش البلد
مشغولة بالفارغة ام قداد
مشغولة بي صبق الحمير
واخبارو نوح وبقوم عاد
وما حاسة بي موت البلد
وسرقت قريشات العباد
وماهمها السوس النخر
جزع الوطن هلك الحصاد
وماهمها الاطفال تموت
وود بن عوف يلقي البعاد
والزينة تنزف بطنها
شان اتخنو الناس الغلاد
والحرب تاكل في البلد
والموت يجيك من غير ميعاد
دفع الله مشغول بالمهم
بالكندوم اللبس النهاد
عرس الكواعب والنفاس
دفع الله مهموم ياعباد
مااصلو متخصص نسا
وامكن كمان كورسات ولاد


ردود على ahmmed
Russian Federation [saleh] 04-17-2013 06:49 PM
الزول ده جيهتو جيهه تمام يا ابوحميد , الملاحظ انو الاشكال العبيطه دي مالقت متنفسها وطلعت تردح الا في زمن الغفله ده .


#640543 [سوداني]
5.00/5 (1 صوت)

04-17-2013 02:33 PM
ده معقد من النسوان تلقاهو كيسو فاضي شوفوا ليه فياغرا ولا شي طبيعي زي المورنغا


#640532 [NASRELDEEN ALI]
5.00/5 (1 صوت)

04-17-2013 02:22 PM
اشارة الى موضوع ا×ونا حيدر المكاشفى عن بدرية سليمان :

دفع الله ده خلوهوا يشوف لينا موضوع بدرية وحكاية اشتراكها فى انقلاب الجدعان ديل عشان كده المسألة بتدخل حوشهم وكد


#640510 [nasereddin]
5.00/5 (1 صوت)

04-17-2013 02:03 PM
تصويب ميزانية سنار الوفقودة( ثلثن ولي النصف)... عضو البرلمان -المريض ، يظهر في جوانب عديدة من في شخصيته ، منذ البدابة لاحظوا عندما يقدم مداخلته ، فينطق اسمه بالدلالة الصوتية :(دفعواللهي حسبو الرسول،حيث الحاء مفتوحة والسن ساكنة اوالباء مضمومة في حسبو).. بالله دا ما مريض ، لو ذهب الي قريته التي هي صغيرة ونطق اسمه كما ينطقه في البرلمان لضحتكت عليه الجدات والجدود الي اخر سن...قرانا التي لم تتمدد في هذه الارض الشاسعة في حدود بيوت علي أصابع اليد وكلبين تلاتة وشوية غنمايات وحمارين تلاتة.. الله بيسألك يا دفعو اللهي ، عشان تغيير حالة قريتكم دي بدل ما تفكر في أشياء الله كفيل بها أكثر منك.. والسلام


#640496 [مشاتر]
5.00/5 (1 صوت)

04-17-2013 01:53 PM
يا شيخ جبرا عمك دفع الله يعمل بمبدأ الفيك بادر بها .. و الفي راسو حرقص براهو يرقص ..
فاين هو من وسخ الخلاوي شبه اليومي ؟ و فلل رمضان ذات الدفع الرباعي ؟ و مصيدة 26 تلميذ بالمدرسة ؟ و دلكة زواج المثليين ببحري ؟ ؟ و .. و ...


#640492 [Abu Areej]
5.00/5 (1 صوت)

04-17-2013 01:47 PM
دفع الله ثاني وثالث ورابع ... ما عنده شغلة ولا مشغلة .. راتبه ماشي ومخصصاته بالكامل وكندشة .. وما عنده شغلة يعني عايزه يعمل شنو؟؟ لازم يترصد الاشياء التي تمس الانسان مباشرة ويتاجر فيها ..


#640487 [ابوعديلة]
5.00/5 (1 صوت)

04-17-2013 01:44 PM
أخبار ملف خط هيثرو العند النائب العام شنو(وووو وووو وووو وووو)+(و) يادفع الله حسب الرسول ؟

أخبار تنفيذ توجيهات السيد الرئيس بخصوص ملف خط هيثرو شنو(و) يادفع الله حسب الرسول وبلاش هيافة معاك؟


#640478 [ممغوص حتى النخاع]
5.00/5 (1 صوت)

04-17-2013 01:40 PM
الحكاية فى البرلمان تخصص اى واحد عندو تخصص معين و كمان ما برضو غير ليه عشان عندو خبرة فى المجال دا زايد الصفقة الحارة قال شنو صورة فتاة لكل ولاية نفس اعلان الانتباهة البشرة داكنة ولا فاتحة حدد


#640466 [ود البلل]
5.00/5 (1 صوت)

04-17-2013 01:21 PM
دة أكيد عندو عقدة أوديب


#640465 [عبد الله]
5.00/5 (1 صوت)

04-17-2013 01:21 PM
دفع الله دا لا يهمه الفساد ولا يهمه شرف النساء ولا يهمه السودان فى شي
همه الوحيد هو ان يصل صوته لنافع على نافع لان دماغه فارغة زيو كدا
( الان فهمتو ؟ )
ربنا يريحنا منكم قادر يا كريم


#640462 [سوداني مكلوم]
2.00/5 (1 صوت)

04-17-2013 01:19 PM
الجماعة ديل انتخبناهم للمعاش ،،، ايوة انتخبناهم لي امور الدنيا الزائلة دي ذاتا، فلو ركزوا لينا عليها يكون احسن، لانو لو مسألة انتخاب النواب هي مسالة اخرة كان ما حننتخبم هم، في شيوخ طرق صوفية، وائمة ودعاة وناس ممكن يكونوا مؤهلين لقيادة الوطن لصلاح الاخرة اكتر من جماعتنا ديل بما فيهم شيخ الكوندم دفع الله ذاتوووووووووو.
اشان كدة لو ركزوا لينا في الشغلة الجبناهم عشالنا يكون احسن، وحقوا البجيب سيرة الاخرة في البرلمان مع الغلاء والردى النحن فيهو دا يطرد طوالي ،،،


#640448 [محمد سكر الجودابى]
5.00/5 (1 صوت)

04-17-2013 01:05 PM
متعك الله يادكتوربالصحه وكثر الله ميمانهمن امثالك فى هذا الذمن الغابر وامثال المعتوه دفع الله واخوانه من علماء السطان وهمهم الوحيد النساء وهو من اصحاب الدفع الرباعى بشغيه وماملكت ايمانهم فى وزبر سياحه فى العالم سلفى له ماادوهم الارشاد والاوقاف ولا هاتين بهم المسفوفه


#640446 [خالد حسن]
5.00/5 (2 صوت)

04-17-2013 01:03 PM
انت ياجبره كمان ماتشطح .. شنو انتخبوا ؟ هي وين الانتخابات عشان ينتخبوا
هسع دفع الله ده كان قاعد في زريبه مع غنم بنتخبوه عضو للبرلمان ؟
عينة دفع الله وبقية البجم الصفاقات الفي البرلمان ديل ماكان لهم ان يدخلوا برلمان لولا ان البلد يحكمها بهيمة انعام
سمحت لهم بالمشاركة


#640436 [المشتهي الكمونية]
4.00/5 (2 صوت)

04-17-2013 12:57 PM
هذا المخلوق غريب الأطوار يحسب نفسه فحلا وغيره من الرجال مجرد شواذ تنقصهم الرجولة ولذلك يرى نفسه وصيا على صنف الحريم ومسئولا عن تقويمهن وتأديبهن وتأديب أزواجهن الذين لا يعرفون حرمة ولا دين ،، يعتقد في نفسه الشهامة والرجولة والوصاية على الآخرين وهو لا يعلم أو لا يدري أنه مجرد كبش ساقته ظروف البلاد المطينة إلى قبة البرلمان ، هل كان من الممكن أن يصل هذا الأبله إلى الجهاز التشريعي في غير هذا العصر المشئوم؟ لعنة الله على الكيزان وعلى آفاتهم وعللهم التي ابتلانا الله بها في هذا الزمن القبيح


#640424 [radona]
0.00/5 (0 صوت)

04-17-2013 12:43 PM
الممثل المصري القدير عادل امام في فيلم الواد بتاع الوزير عندما صار عضوا بالبرلمان كان يكشف فساد الوزراء فقط بتقديم وجبة حمام محمر لسائق الوزير .. ويستدعي الوزير للمساءلة باليرلمان .. ثم اصبح يستدعي عدد من الزراء في جلسة واحدة ... وكان الفساد هو الموضوع ...
نحن لا نريد برلمان يصفق لزيادة الاسعار ويهتف كوراليا مجاز .. مجاز قبل ان يتلى عليه بيان زيادة اسعار المحروقات .. نحن نريد برلمان يتلاكم اعضاؤه ويضرب بعضهم البعض بالجودو والتايكندو من فرط تباين وجهة نظرهم .. هذا هو البرلمان الراشد الذي نبتغيه .. الاان يبرز لنا مثل هذا (العضو ) كل فينة واخرى دي لابسة مس كول ودي لابسة بنطلون ودي ما لابسة ... ولكنه مع ذلك على حق لان السياحة ليس فقط السواح يقصدون التفرج على الحجر انما اكثرهم ياتي للبشر .. لذلك حسما لهذا الجدل يتم الغاء وزارة السياحة ثم اننا لانملك بنية تحتية للسياحة لاننا مدننا وعلى رأسها عاصمتها متسخة ومدعاة للسخرية ومثال لا يشرف ابدا ... كدي نظفوا الوساخة ثم اعملوا سياحة ... ولا شنو


#640415 [ابو ابراهيم]
5.00/5 (1 صوت)

04-17-2013 12:34 PM
اخوانا السعوديين عندهم مثل بقول ( كل يري الناس بعين طبعه )


#640413 [الشطة الكنداكة]
5.00/5 (1 صوت)

04-17-2013 12:30 PM
ودا الجنن دفع الله


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة