أوكامبو ذاااتو
04-20-2013 11:59 AM


في الدول الراقية والمتقدمة يتم منح الأوراق الثبوتية (بطاقة شخصية،جنسية،رخصة قيادة،جواز سفر) برسوم رمزية شبه مجانية وذلك لأن تلك الدول تعلم تماماً أن وجود هذه الأورا ق الثبوتية يساعدها على رصد ومعرفة بيانات مواطنيها ومن ثم تسخير هذه المعلومات في مجال إستتباب الأمن وتقديم الخدمات للمواطن .
لدينا الأمر مختلف تماما .. عاوز تطلع (جواز) أربعمية وخمسين ألف .. عاوز تعمل بطاقة كم وكمين ألف .. عاوز تطلع (رخصة قيادة) مليون وشوية .. والعجب لو واحده فيهم إنتهت وعاوز تقوم بتجديدها .. تلاقي رسوم التجديد (أقل شوية) من رسوم الإستخراج !
لماذا يدفع المواطن كل هذه الألوف لقاء (بطاقة) صغيرة لا تكلف طباعتها وموادها (الخام) أكثر من مية جنيه؟ الإجابة بالطبع ما عايزة ليها درس عصر .. فهذه الأوراق الثبوتية مهمة في تعاملات المواطنين والمواطن مجبر على إستخراجها لذلك لابد من فرض رسوم باهظة عليها عملا بمبدأ أن الحكومة يجب أن (تحلب) المواطن وتطلع (زيتو) وزيت الخلفوهو !
العبدلله شخصياً (رخصتو مفوتة) وجواز سفرو (كذلك) وبطاقتو (نفس الشئ) ليس تهاوناً منه بالقانون لا سمح الله فهو أكثر الناس إلتزاماً بالقانون ولكن لأنو عشان الواحد يقوم بتجديد الحاجات دي (إلا يدخل ليهو صندوق) !
من الواضح أن مسالة إستخراج وتجديد الأوراق الثبوتية أضحت مصدر رزق (للحكومة) إذ لا تتناسب الرسوم المفروضه والخدمة المقدمة لكن خلينا نقول إنو المواطن ممكن يستغني عنها .. مواطن ما عندو بطاقة شخصية يعني شنو؟ (هي ذاااتا الشخصية وينا) ، مواطن ماعندو جنسية (يعمل بيها شنو ما بقينا الجالية السودانية في الخرطوم) ، مواطن ما عندو جواز (القروش البسافرو بيها هي وينا) ، مواطن ما عندو رخصة قيادة .. (يعني شنو لو قبضوك بيدفعوك الغرامة وتمشي تسوق عربيتك) !
إذا كان من الممكن للمواطن ان يستغني عن إستخراج الأوراق الثبوتية الفوق دي كووولها إلا ان هنالك (وزقة ثبوتية) لا يمكنه الإستغناء عنها إذ أنها تدل على حقه في التعليم والعمل والميرات وخلافه وهذه الورقه هي (شهادة الميلاد) والتي أبت حكومتنا (الغاقلة الرشيدة) إلا أن تجعل لها رسوما تجاوزت الأربعين الف !
أليس من العيب والخطأ و(اللا وطنية) أن يطالب المواطن بدفع أكثر من 40 ألف جنيه من أجل تسجيل (مولوده) ألا يعتبر هذا غلواً وشططاً كان على (الحكومة) أن تربأ به إكراماً لهذا المولود الجديد
ودفعا له لمواصلة مشوار حياته (المن غير ملامح فييما يبدو)!
لا أظن على الإطلاق ان هنالك دولة واحدة في العالم تفرض مثل هذه الرسوم الباهظة على شهادات ميلاد مواليدها (ده لو كان في رسوم من أساسو) لكن نعمل شنو لو (الحكومة) بقت زى (النشال) عينا بس في(جيب) المواطن !!
تقول الطرفة أن أدروب (رقيق) الحال قد وضعت له زوجته مولوداً ذكراً باحدي المستشفيات الحكومية (شبكوهو ليك) جيب شاش (يمشي يفتش ويستلف ويجيب) .. جيب حقن .. (يمشي يفتش ويستلف ويجيب) .. جيب دربات (يمشي يفتش ويستلف ويجيب) .. يوم الخروج لم يصدق أدروب انه إنتهي من هذا الفلم (المتعب) فذهب إلى مكتب السجل المدني الملحق بالمستشفي لإستخراج شهادة الميلاد حيث فوجئ بالموظف يطلب منه 40 ألف قيمة الشهادة ، (طنطن ادروب) .. وخرج من المكتب راسو ضارب .. عند إنتصاف النهار وبعد جهد جهيد تمكن أدروب من جمع المبلغ وتوجه لمكتب السجلات :
- أهو ده القروش؟
- (وهو يملا في الشهادة) : إسمك منو؟
- أدروب طاهر على
- أها المولود ده عاوز تسميهو منو ؟
- (بحرقةوإنفعال) : نسميهو أوكامبو ذاااتو
كسرة :
(الجباية) في شهادات الميلاد شئ يدعو إلى الخجل والكسوف .. ده لو فضل فيها كسوف !
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟


[email protected]


تعليقات 32 | إهداء 0 | زيارات 7520

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#643840 [rami]
0.00/5 (0 صوت)

04-21-2013 09:20 PM
بعد السلام
روى عن السلف وقيل عن الامام على كرم الله وجهه مايلى
( ان سكوت أهل الحق عن الباطل يجعل أهل الباطل يتوهمون أنهم على حق )


#643673 [الكومندان]
0.00/5 (0 صوت)

04-21-2013 05:19 PM
لك التحية والتجلة أستاذي الكبير الفاتح جبرا ،،،، الناس ديل بيعملوا أقبح وأكتر من كدا وبيعكسوا بتصرفاتم دي نتانة وعفن معدنهم وصدق من قال ( الإستحوا ماتوا )


#643627 [قاعد برة زيك]
0.00/5 (0 صوت)

04-21-2013 03:56 PM
يا اخواااااااااااااااااااانااااااااااااااا عليكم الله و علييييييييييييييكم الله بس شوفو المقطع دة تقول لي حكومة و دولة السودان يلا قومو بلا عفن

http://www.youtube.com/watch?v=MnmXrc9AYcM


#643512 [قاعد برة زيك]
5.00/5 (1 صوت)

04-21-2013 01:38 PM
يا اخواااااااااااااااااااانااااااااااااااا عليكم الله و علييييييييييييييكم الله بس شوفو المقطع دة تقول لي حكومة و دولة السودان يلا قومو بلا عفن

http://www.youtube.com/watch?v=MnmXrc9AYcM


#643344 [fattah]
0.00/5 (0 صوت)

04-21-2013 11:02 AM
والله يااستاز جبره نحن مواطنى جنوب الخرطوم اصبحنا الجاليه السودانيه فى الديم وماحوله بحيث اصبحت كل العقارات المعروضه للاجار محتله بواسطة الاحباش ومن فى شاكلتهم والشى الغريب جدا انهم قوه شرائيه ضاربه ودونكم سوق الديم ايام الجمع صباحا تجد 90% من الذين يشترون اللحوم من اؤلئك الاجانب وبكميات مهوله بستحى عندها المواطن الذى اتى لشراء نصف او ربع كيلو انها بالفعل ظاهره تستحق الدراسه والحزر من الساده المسئولين ان كان هنالك بالفعل مسئولين مهمومين بهذا الامر الخطير


ردود على fattah
United Arab Emirates [ضل الفيل زاحع] 04-21-2013 04:11 PM
مال ثش

United States [محمد] 04-21-2013 02:42 PM
الاخ Fattah من هو الذى اجرهذه المنازل للاجانب اليس هم نحن اصحاب هذه المنازل اذا كنا لا نريدهم فلماذا نستاجر لهم واذا امتنع الناس عن الايجار والبيع لهم هل سيظلون موجودون في البلد نريد ان نسترزق منهم ونحمل الحكومه تبعات ذلك . المساله تكامليه بين المواطن والحكومه فلا نتنصل من مسؤلياتنا ونلقى اللوم على الحكومه


#643221 [الحكيم]
5.00/5 (1 صوت)

04-21-2013 09:08 AM
أنا خايف الحكومة تفرض رسوم على كل من يقرأ مقالات الاخ جبرا لان روادها كتار أعمل حسابك يا استاذ جبرا الحكومة يمكن تستهدف مقالاتك أى حاجة فيها لمة يعنى عند الحكومة بجيب قروش


#643137 [للأذكياء فقط]
0.00/5 (0 صوت)

04-21-2013 05:12 AM
مواطن ماعندو جنسية (يعمل بيها شنو ما بقينا الجالية السودانية في الخرطوم)
------------------------------------------------------------------------

دى أخطر جمله فى الموضوع !

هنالك من يعمل على تغيير التركيبه السكانيه للسودان , لأسباب لا تخفى على أحد, الجنسيه السودانيه أصبحت تمنح لكل من هب و دب !

و إذا إستمر الحال على هذا المنوال , أبشر السودانيين بالإستعمار الجديد.


#643128 [خليها مشتورة]
0.00/5 (0 صوت)

04-21-2013 04:43 AM
الحقنا يا جبراااااااااااااااااااااااااااااااااااااااااااااااااااااااااا

الناس دي جابت لينا ضرائب والمشكلة ما الضرائب المشكلة جابوها بالارنيك بتع 15 دي يحلوها كيف


#643111 [واحد غبي على رأي الانقاذ في الشعب]
0.00/5 (0 صوت)

04-21-2013 02:25 AM
قالها الهالك الزبير محمد صالح زمان

يموتوا ثلثين الشعب ويعيش ثلث وكأنه هو من خلقهم

وجعله رب العزة في الثلث الاول
من ضحايا عصابة الضلال والسرقة والنصب والاحتيال
الله ينتقم منهم فردا فردا ويشغلهم في انفسهم


#643082 [قطر عجيب]
0.00/5 (0 صوت)

04-21-2013 01:30 AM
قرأت هذا الموضوع بجريدة الخرطوم وكان عنوانه (حاجة تكسف) ولما سئل الأب عن اسم المولود قال نسميه (حاجة تكسف) بينما هنا تغير إلى أوكامبو ذااتو. ويبدو لي أن الأصل هو أوكامبو ولكن لأن اسم أوكامبو عامل حساسية لناس الرقابة القبلية استبدلوه دون أن يدركوا أن الاستبدال أوقعهم في مصيدة الحاجة التي تكسف. أليس كذلك يا استاذ الفاتح؟


#643054 [الفاتح]
0.00/5 (0 صوت)

04-21-2013 12:15 AM
طيب أخي الفاتح اسمع هذه الحكاية : قبل مده وفي هذا الزمن الظلامي الدامس وأنا في الرياض ذهبت للسفارة الأردنية بالرياض لأخذ تأشيرة دخول للأردن فطلبوا مني أن أحضر خطاب موافقه بدخولي الى الأردن من السفارة السودانية فذهبت الى السفاره السودانية بالرياض والسفارتين بحي السفارات بالرياض فطلبوا منى بالسفارة السودانية أن أدفع مائة ريال كرسوم للحصول على خطاب الموافقه لدخول الأردن دفعت المائة ريال وأخذت الخطاب وذهبت السفارة الأردنيه وتحصلت على تأشيرة الدخول للأردن دون أي رسوم ... إيه رأيك


#642997 [مكتوي]
0.00/5 (0 صوت)

04-20-2013 10:55 PM
40 شنو يا ود جبر انا هنا في السعوديه عايز اضيف ولدي في جواز امه قال لي الا تمشي السفارة السودانية عشان ترسل لينا خطاب موافقة منك انت ابوه توافق عشان تضيف ابنك في جواز امه قلته اوكي ذهبت للسفارة السودانية بالرياض دفعوني في الورقه دي مبلغ 110 ريــال اي ما يعادل 175000 ألف بالقديم عندكم تقولي لي شنو وتقولي منو؟


#642981 [sawaleef]
0.00/5 (0 صوت)

04-20-2013 10:27 PM
(لا أظن على الإطلاق) أن هنالك دولة واحدة في العالم تفرض مثل هذه الروم..........ألخ
ياود جبرا ماتقول على الإطلاق ولكن قل علي الطلاق ... بقلب ثابت


#642962 [lwlawa]
0.00/5 (0 صوت)

04-20-2013 09:44 PM
في دولة الانقاذ هذه، هل هنالك اية خذمة تقدم للمواطن بدون مقابل..؟؟.. كما تفعل الدول..؟؟.. دولة (الخر) فيها بمقابل...؟!!.. وواحدة من الجبايات ، وهذا لم يفعلها حتى المستعمر الاجنبي الذي كان يشيد المراحيض في كل مكان حتى في الاقاليم البقيدة..؟؟


#642869 [ام الحسن]
0.00/5 (0 صوت)

04-20-2013 06:52 PM
الحكومة قالت الشعب ده جوعنا ابا يموت 000عذبنا ابا يموت 000مرضنا ابا يموت 000لما يئست قالت اخير نقطع خلفو عشان ينقرض ويريحنا


#642840 [ودابزيد]
5.00/5 (4 صوت)

04-20-2013 05:56 PM
هى دحين شهادة الميلاد مامكتوب عليها مجااااااااااااننن؟


#642839 [Abu Areej]
3.50/5 (2 صوت)

04-20-2013 05:55 PM
ودفع الله دة تخصص نساء؟؟؟ ما شاف الحاجات دي ولا سمع بيها؟؟؟


#642836 [alsudani]
5.00/5 (1 صوت)

04-20-2013 05:51 PM
يا أستاذ الشغله دى قديمه
بس انته راسك قوى
يا أخى أنا زمان رفدونى من شغلهم
مشيت أجدد الجواز
قالوا لى جيب أوراق الضرائب ،،،، أخرجت لهم
خطاب الرفد وانا رغم كل البلاوى أنا كنت أدفع الضرائب
على مرتبى ،، قالوا لى لا نشوف ضرائب ابوك ((أتخيل انا زول
متخرج وشغال أكثر من 5 سنوات تقريبا ،، قلته اوكى طلع ابوي
عليه رحمة الله دافع ))) الموضوع لك انت كترت قروش وهناك جانب
العرقلة والإزلال ... ربتا يفكنا منهم أستمرارهم صعب زى إنتظار
مريض السرطان


#642771 [ابو مبارك]
3.50/5 (2 صوت)

04-20-2013 04:19 PM
انا في السعودية وعندي ولدين اتولدوا هنا طلعت ليهم شهادات ميلاد ما شالوا مني ريال واحد


ردود على ابو مبارك
[الساكن جوبا] 04-21-2013 11:27 AM
شنو يعنى ما إنت كوز من شاكلتهم ..


#642760 [دايخ فى زمن بايخ]
5.00/5 (1 صوت)

04-20-2013 03:57 PM
والله فعلا مشكله تتستحق الوقوف عليها


#642741 [عبد المغيث ابو شيخة]
5.00/5 (1 صوت)

04-20-2013 03:26 PM
واحد بلدياتنا يا استاذ جبرة - لم يرزقه الله بمولود - مرته استهبلت عليه وقالت عندها نزيف - رقدت في المستشفى يومين تلاته - وهو يساسق بين العنبر والاجزخانة - مرة شاش ومرة درب ومره حقن - اخرها قاوا ليه ادفع حق السرير - حاججم وقال انتو القاليكم رقدها مونه - ورفض يدفع حق السرير - في الآخر قالو ليه تعال استلم مرتك - قابلته الفراشة - طلبت من يدفع جنيه - سالها قاليها جنيه في شنه - فردت عليه - عايزه البسها هدومها - قال ليها خليها زي ما هي ( القادر يملص يقدر يلبس )


#642689 [kayletoud]
5.00/5 (1 صوت)

04-20-2013 02:18 PM
المضحك والمؤسف أنا عندي (4) اطفال وعندهم شهادات ميلاد !!! وربنا أراد أسافر بــ اولادي !! أنقروا ما طلعوا ليهم شهادات ميلاد جديدة وحتى القسيمة كانت موثقة بالخارجية ووثقوها ثاني !!!

وغير الجواز والجنسيات وخلافه .... خراب بيت عديل !


ونقول .... منكم لله يا ظلمه ! نشوف فيكم يوم ...

يمهل ولا يهمل .


#642667 [عماد احمد]
0.00/5 (0 صوت)

04-20-2013 01:57 PM
اخى الفاتح التحيه والود الشى لايختلف عليه عاقلان ولو فضل في واحد عاقل مس اثنان ان الاوراق الثبوتيههى مستندات تتابع البنى ادم - لوفضل بنى ادم- حتى مماته حتى عند الدفن ان لم يطلع على اثباته فهو لن يدفن مما يعنى باهميتها - والرسوم عندنا حكايه وعند الاخرين شى اخر الهند كمثال صلاحية الجواز 10 سنوات وبقيمه اجماليه قدرها 231SR والاطفال مجانا بصلاحيه خمسه سنوات
واما جواز سفرنا اطال الله في عمره ونسال الله ان يرفع غضب الغرب عنه حتى يعامل كبقية الجوازات الاخرى- حتى في بعض البلاد العربيه على الرغم من حصولك على تاشيرة دخول من سفارات الدول المقصوده بالزياره ولكن عليك بالانتظار حتى يتم التاكد من انك لست ضمن قائمة الممنوعين طالما انك سودانى كما حدث معى شخصيا في تونس والمغرب- صلاحية الجواز سنتان وهى مده بعمر الزمن قصيره وعلى الرغم من ان المسئولين فى السفارات والقنصليات يبذلون قصارى جهدهم في سرعة تجديدواستخراج الجوازات الجديده اذا توفرت الدفاتر - ليت الاخوه في ادارة الجوازات يعيدون النظر في صلاحيه الجواز واتمنى ان ان تكون 5 سنوات على اقل تقدير ولو تضاعفت القيمه


ردود على عماد احمد
Russian Federation [alsudani] 04-20-2013 05:55 PM
والله عشان أجدد جواز ذهبت لأرسل الجواز زصادف أن ألتقيت بزميل
فسألنى عند مدة الجواز فقلت له سنتان ضحك وقال لى جواز كلب


#642650 [البصير أبو حمد]
2.00/5 (1 صوت)

04-20-2013 01:33 PM
ورسوم شهادة الوفاه كم ؟ ولا آه أخدوها مقدما.


ردود على البصير أبو حمد
Russian Federation [[[] 04-20-2013 04:11 PM
هو فى الحقيقة المرحوم دافعها مقدم كمان تالت ومتلت قبل الوفاة وكمان يكون مات بسبب الدفع الكثير لكن اهله لازم يدفعوا تانى زى 20 او 30 الف كدة موش كفاية بدوكم قبر مترين فى متر مجاااان يعمولولكم ايه اكثر من كدة


#642631 [خالد حسن]
4.50/5 (2 صوت)

04-20-2013 01:13 PM
ياجبره اوكامبو ظاطو مابحلكم من المعمعه دي
الاتقطعوا راس الحيه وتسقطوا النظام الاقطاعي الحاكمكم ده


#642629 [ود اللالح]
4.66/5 (7 صوت)

04-20-2013 01:12 PM
بالمناسبة يا استاذنا الكبير والحريض على حقو وحقنا اكثر مننا-لاننا كلنا كسودانيين مشكلتنا انا بنتنازل عن حقوقنا - ومثال على ذلك لو في قلع حاصل وحاولات تعترض عليهو وكنت واقف في صف تعرف الح يهرشك منو تخيل ما ح يهرشك البيقلع فيك ح يهرشوك الناس البينقلعوا معاك يا اخينا يا ما تدفع هى كلها كم ، يا اخينا يا امشي بس نحن بندفها ليك . وتاكيدا لكلامي هذا نحن معشر المغتربيين بندفع رسوم الخروج والعودة مرتين مرة سعر الورنيك والان اصبح ملف - طبعا بدون اورنيك 15 خبت راسوا عديل - ومرة رسوم التاشيرة ، كل ما اجي السودان اعترض عليها واكون الوحيد واتهرش من معشر المقلوعين وادفعها صاغرا وامشي . وبالمناسبة قبل كم يوم ذهبت لاستخرج توكيل لاخي بالسودان بكتابة العدل بالسعودية وطلعوا لي التوكيل بدون اي رسوم وذهبي ووثقته بالمحكمة ايضا بدون ما ادفع ولا شلن . تخيل انو لو مشيت سفارتي كم بيدفعوني - 115 ريال - مع العلم انو انا دافع ضرائب اكثر من الراقص ، ودافع رسوم خدمات سنوية وكمان دافع زكاة على الراتب الما قعد يحول عليه الاسبوع خلي الحول .
المصيبة فينا نحن البنفرط في حقوقنا واىلمصيبة فينا القاعدين نمشي ليهم اي حاجة واعتقد ان المصيبة في تربيتنا كمان .
نقول شنو لا حولة ولا قوة الا بالله .


#642625 [north kodofan]
3.63/5 (4 صوت)

04-20-2013 01:09 PM
زمن نميرى برغم طغيانه كان موفر حاجات اساسية للمواطن.. شهادة الميلاد مجاناً.. التعليم مجاناً ويصرفوا ليك الكتب مجاناً وكمان كراسات.. الرحلات المدرسية مجاناً ومعاها وجبات.. التعليم الحكومى لكل المواطنين فقراء واغنياء و المدارس الاهلية تعد بالاصابع.. العلاج مجاناً والادوية باسعار رمزية.. المعلم كان ليه هيبة والموظف ميسور الحال.. استقرار اوضاع البلد بعد اتفاقية اديس 72 انعكس ايجابياً على جميع نواحى الحياة وتشوف الابداعات فى الفن والرياضة والثقافة.. والاهم من دا كلو لا كراهية لا عنصرية..

زمن الانقاذ؟؟.. اسأل اوكامبو بيوريك الحاصل شنو وكده..


ردود على north kodofan
Russian Federation [البلد مزنوقي] 04-20-2013 05:35 PM
لاتنسي حتي الحبر والمراتب والعناقريب والبطاطين والملايات في الداخليات واللبن شرابه إجباري وطازج والطبيخ كان بالسمنة مرة اعترضنا عشان السمنة جمدة بسرعة أتخيل البلد زمان دلعتني كيف وعايز ادفع لها وارد جمايلها نحوي لكن الكيزان شردوني وعملته جواز أمريكي ولكن الدين حقها مابروح انشاء الله نجد العافية لدره بعد زوال الحرامية الكيزان


#642615 [المقهور]
5.00/5 (2 صوت)

04-20-2013 01:01 PM
ههههههههههههههههههههههههههههههههههه
هههههههههههههههههههههههههههههههههه
هههههههههههههههههههههههههههههههههه

اوكامبو اللي يقطع رأس البشير ذاتو - اللهم ارحم السودان - وشعب السودان ... ومغتربين السودان ...


#642614 [gameel]
5.00/5 (1 صوت)

04-20-2013 01:01 PM
ياجبرا مابالغتا عديل كدا (البطاقة) البتقول تكلف طباعتها وموادها (الخام) أكثر من مية جنيه؟ والله انا الليلة عشان احيرك ذاتو البطاقة دي مابتكلف اكتر من (10) جنيه شنو ليك، واما بخصوص استخراج الجواز والرخصة والحاجات العجيبة دي بقت تجارة سوق اسود واسطات عندك واسطة تصوؤ لي الجواز قبل ما تسحب الارنيك تجي بالدرب العديل عينك ماتشوف الا النور تسحب الارنيك دا لقيتو بعد الساعة 9 علما بانو في جوازات المقرن تجي الساعة 5 صباحاً ولمن الساعة 7 تجي يقولوا ليك الـ0100) ارنيك بتاعت الصباح كملت وانت تكون نايم في باب الجوازات (قصة عجيبة) ولو ربنا سهل ليك وسحبتا ارنيك بعد تملاه يقولوا ليك امشي تعال بكرة لانو نحنا شغالين في حق امبارح لانو عشان ادخلوهو ليك لانو الكمبيوتر جايبين ليهو ناس ماعندهم علاقة مع الكمبيوتر ولو ما اخاف الكضب تقول اتعلمو في الادخال بتاعم دا المهم في الموضوع انو اجي زول وإسالك انت من شباك الفحص وين بعد شوية تشوف الزول ذاتو المابتغباهو عينك مارق من التصوير مع انو التصوير دا اخر مرحلة وبالرغم من انو الناس دي تكون قاعدة ليها يومين قصاد الادخال يقولو ليك الشبكة طاشة والشبكة جات والشبكة مشت وعينك لي ناس الواحد فيهم شايل ليهو ارنيكين تلاتة ويخش ويملاهم رغم انو الشبكة مافي والشبكة طاشة حكمتو بالغة، وناس تشتلم في اسبوع وناس تستلم في 3 يوم وقصة عجيبة وغريبة.
والاغرب من دا كلو ياجبرة انك بتملا بيانات الرقم الوطني القطعوه من راسم دا ونفس البيانات مفروض تكون قاعدة عندهم في الشبكة لانو (الغم الوطني) دا برضو بتنزل في الشبكة ، طيب كان ماعندكم شبكة وقدرة لي الحاجة دي الجابركم شنو يكون عشان الرسوم القديمة بتاعت الجواز القديم شوية قلتو كدي نعمل حركة حركتين كدا ونعمل فيها جواز جديد عشان يكون السبب مقنع لي زيادة الرسوم، دا غير خريطة السودان الكاملة في معظم الجوازات الالكترونية الحايمة دي.
اللع غالب وماشية بالسالب ...


ردود على gameel
Russian Federation [غريبة والله] 04-20-2013 05:36 PM
غريبة والله واحد مطلع جوازات الكترونبة منفصلة لكل من زوجته وولديه وابنته .
نجح الآن فى استخراج جواز وآحد أخضر ( القديم )لزوجته واضافة ابنائه ( لغرض الزيارة الخارجية وتقليل تكلفة تجديدها خارجيا ).
يعنى مافى سجل / لعب واختراق / قال رقم وطنى .
الحقوا الداخلية - السجل المدنى فساد !!!!!!!!!


#642602 [عبد الله]
5.00/5 (1 صوت)

04-20-2013 12:51 PM
وين ناس تزكية المجتمع القاعدين يطاردو فى النسوان من هذه الاشياء المخجلة ؟
بس فالحين فى النسوان بس ؟


#642600 [ود امدرمان]
3.25/5 (3 صوت)

04-20-2013 12:50 PM
يعني ياجبرا الحيكومة السمها فاير دي تجيب دلا من وين وكل الموارد ناشفه بعد التجنيب وكدا











تخريمة:
شيل شيلتك ياجبرا ناس المرور عرفوا رخصتك منتهيه حايلبتو ليك في راس الشارع بعد كدا الا تاجر ليك عجله


#642581 [tarig]
0.00/5 (0 صوت)

04-20-2013 12:29 PM
ومصداقا لكلامك انا رزقت بمولود فى الصين الصينين طلعوا لى ليه شهاده ميلاد مجانية لمن مشين السفارة اطلع ليه السودانية تعال شوف الحلب!!!


ردود على tarig
Russian Federation [abdelmonem] 04-20-2013 05:11 PM
كان طوالي تطلع ليه الجنسية الصينية!!!!!!!

Russian Federation [صالح عام] 04-20-2013 03:41 PM
هم الصينين ناقصين كمان تمشى من السودان تلد ليهم هناك يا راجل حرام عليك


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة