العولاق
11-23-2010 12:38 PM

بسم الله الرحمن الرحيم

حاطب ليل

العولاق

عبد اللطيف البوني
[email protected]


عندما قدم السيد ابو بكر عبد الله مارن المراجع العام السابق تقريره للمجلس الوطني العام السابق اشفق عليه الكثيرون لانه كشف الكثيرمن الذي لايود اهل النظام كشفه اذ اوضح الجهات التي لم تقدم حسابها الختامي والجهات التي رفضت رفضا باتا ان يهوب المراجع العام ناحيتها وبالفعل صدق حدس الناس ففقد الرجل منصبه وحل محله السيد الطاهرعبد القيوم ابراهيم ويكون من الطبيعي ان يعتقد الكثيرون ان في تعينه (ان) كبيرة ولكن اتى تقريره السنوي الذي قدمه للمجلس الوطني ليثبت ان الرجل مهني و(دوغري ) لقد كان تقريرا يقول للتقارير السابقة (انتي شن بتعرفي)
لقد كشف ا لتقرير بلاوي متلتلة تعج بها دور ودواوين الحكومة فبالاضافة لعشرات الوحدات الحكومية التي لم تقدم حسابها الختامي وتلك طردت فريق المراجع العام فقد جاء في التقرير ان هناك اموالا ضخمة تدار خارج الموازنة وان وزارة المالية لم تعد صاحبة الولاية على المال في كثير من الممارسات فكثير من الرسوم تفرض دون علم المالية وتصرف كذلك دون علمها وان هناك مشروعات تنفذ دون عطاءت اي تعطى( ام غمتي) واثبت التقرير ان مخصصات الدستوريين غير دستورية (ابو الزفت) واكد التقرير ما ذهب اليه تقرير مارن من ان شهامة (شغالة بالخسارة) وقال التقرير ان صادرات النفط تتم بدون فتح خطابات اعتماد (امسك ياسلفا) ولم يترك التقرير حتى البيئة التي اثبت ان هناك ممارسات اضرت بها
الذي بصدده اليوم من هذا التقرير الصريح الجهير هو ماجاء عن الخدمة المدنية فهو مما يشيب له (السودان بحق وحقيقة) فقد جاء ان هناك حوافز وبمسميات مختلفة تصل محصلتها عدة اضعاف المرتب (عشان كدا يعتبر المعاش اعدام مبكر) وان هناك فسادا في تمليك العربات الحكومية . كيف ياسيد طاهر؟ ان الاقساط لاتسدد ويحصل على الوقود والصيانة مجانا ثم تؤجر للحكومة(دي عربية ولامراح بقر جاموسي؟) وهناك الجمع بين وظفيتين (بالطبع ليست وظائف في ادنى السلم انما من مدير ولى فوق) وهناك من يسكن في بيت حكومي او بيت تستاجره له الدولة ويصرف بدل سكن ومالم يذكره التقرير انه قد يكون صاحب المنزل الذي تدفع الدوله ايجاره هو ذات الموظف الكبير الذي يتقاضى بد ل السكن(دي تلاتية وقدها عشريني)
اذن ياجماعة الخير يمكننا القول وباطمئنان شديد ان الاموال التي تنفقها الدولة على موظفي الخدمة العامة كبيرة جدا وكافية جدا ولكن يكمن عدم العدالة في توزيعها فالكبار في الخدمة لهم الصدر والاوراك والجلد والراس ولم يتركوا للصغار الا (الاضلاف) بعبارة ان بعضهم يصل دخله الشهري (لانقول مرتبه) عشرات الملايين واخرون عشرات الجنيهات فقط (اي والله العظيم عشرات فقط) فالخدمة العامة اصبحت متضخمة في راسها مع هزال وضعف شديدن في ارجلها وهذا يذكرنا بالسجعة التي كنا نقولها في طفولتنا لاصحاب الرؤس الكبيرة والارجل الرقيقة (راسو كبير/ وكرعيهو رقاق/ مما سمو/ سموه العولاق)


تعليقات 12 | إهداء 5 | زيارات 2120

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#49743 [sudani]
0.00/5 (0 صوت)

11-25-2010 11:48 AM
سيادة الرئيس أتكلموا معاهو قبل كدة فى الموضوع ده قال أى زول عارف فساد يثبت بالمستندات والأدلة وهو سيتخذ اللازم .........ياربى المراجع العام ده ماعنده مستندات وأدلة؟؟؟؟؟؟؟


#49631 [بنانكو]
0.00/5 (0 صوت)

11-25-2010 09:21 AM
ياamin شوف ليك حل مع الزاي والذال


#49149 [kavim]
0.00/5 (0 صوت)

11-24-2010 09:09 AM
يا ساتر استر نظام اخذ السلطة بليل واستباح البلد طولا وعرضا اللهم اللعنهم فى البر والبحر والسهل والجبل 0833389


#49091 [Amin]
0.00/5 (0 صوت)

11-24-2010 06:52 AM
يا استاز البوني بات الكل يعلم بحجم الفساد المهول الزي يعم كل اركان الحياة في السودان ومامن مرفق الا وضربته عصا الفساد لو مشيت السوق كله سمسرة وحرمنه وفساد لو مشيت المستشفي تتعالج تدفع دم قلبك لو سايق عربيتك في الشارع ناس الحركه ينهبوك!!!بس في نقطه واحدة ياريت اعرف رايك فيها شنو؟ليه الشخصية السودانية سهلة الفساد والافساد؟؟


#49014 [Dokom]
0.00/5 (0 صوت)

11-23-2010 09:50 PM
لا فض فوك يا ألبوني! يحمد للنظام أنه يأتي بمن لا يخاف في الله لومة لائم وينصيهم مقاليد الحكم، ولكن هذا لا يعفيهم من المساءلة. وكما أنهم ريسوا المراجعين الأكفاء، يجب الآ \"يتيسوهم.\"!;)


#48953 [عبدالمنعم ]
0.00/5 (0 صوت)

11-23-2010 05:25 PM
دكتور البوني اتخيل معاي انك شلت مقالك دة ومشييييت دنقش ... دنقش دقيت بيت النائب الاستاذ علي عثمان واديتو المقال قراهو وقال ليك كدي بالله يالبوني اخدمني كمان وامشي شوف لي نسخة من التقرير زاتو بتاع الطاهر دة النشوفو (طبعا عامل ما مصدق وكدة ) وانت تاني مشيت حفرت وبحثت وجيتو تاني دنقش دنقش شايل التقرير جابو النسيم عطر سماء الخرطوم فساد ... واستلموا منك طبعا لانك انت من الاخوان البدريين بتاعين زمان المعروفين لكنك حميت نفسك بنظافة اليد وابتعدت ،، بعني ما بقدر يقول ليك لا وكدة ,, المهم قرأ التقرير ثم مقالك الخطير دة وقال ليك واحد من الردود التالية :

1- ياخي السودان دة ما القدح الكبير بكفينا نحنا وانتو وكمان بكفي الجيران !! مالك زعلان يابوني ؟؟ كان داير ليك شي قول لي بس !!! او
2- شوف يالبوني انحنا من يوم اتشقينا في رمضان ولي حسة ما عارفنك شايت وين !! يا خليك معانا يا امشي المنشية بي وشك وخلينا من مسك العصاية من النص .او
3- عندك مستندات ؟؟؟؟؟؟؟!!!!!!!!!!
طبعا انت ما حتعرف ترد كيف ومن باكر حتفكر جاد في الهجرة من البلد ولا ترجع لي اهلك الطيبين في الجزيرة وتعتكف في اقرب مسيد وتعلن اعتزال الصحافة والعمل الاكاديمي وتشجيع الهلال وتقاطع منى ابوزيد وقناة النيل الازرق او تدخل بحر ازرق الجنبك دة وتلحق امات طه .....!!!!!


#48911 [ابو طارق]
0.00/5 (0 صوت)

11-23-2010 03:23 PM
خلية يراجع مين سائل فية ولا مين سائل فى الشعب السودانى هم اهل البلد كتر خيرهم سامحين لينا نقعد معاهم


#48904 [واحدة من الناس]
0.00/5 (0 صوت)

11-23-2010 03:06 PM
انا وانت وكل سوداني بيقرا الكلام دة وبيحس انو قدييييييمة دي ما عارفنها ؟

وشليل وينو أكلو الدودو


#48902 [ابو طارق]
0.00/5 (0 صوت)

11-23-2010 03:04 PM
ازا لم تستحى فافعل ما تشأ ,المؤتمر الما وطنى بقى ما بخجل كل يوم فضائح وما فى زول منهم برد ولابعلق والبشير كالعادة لا يودى ولا يجيب (؟) ;( :D ( ) ;) :o


#48896 [منو]
0.00/5 (0 صوت)

11-23-2010 02:59 PM
وبعد كل هذا نسال لماذا انتشرت الجرائم لان المجتمع اصبح طبقتين طبقة تمتص دمائنا وطبقة تسال الغير اعطوها او منعوها فتسلك الطريق المظلم اسال الله ان يراعى كل شخص ضميره لان الحرام يذهب من حيث اتا


#48865 [مابهمك]
0.00/5 (0 صوت)

11-23-2010 02:03 PM
عليك الله بعدة نقعد فيها نسوى شنو نخليها لبريسين كبيرة امكن يموتو من التخمة


#48845 [بت الخرطوم]
0.00/5 (0 صوت)

11-23-2010 01:08 PM
ثم ماذا يا جماعععععععععععععععععععععة الخيييييييييييييييييييييير لاتقرير مراجع عام ولا خاص ولاقومى ولا ولائى ولا عام ولاداخلى كلوا ما نافعععععععععععععععع وخلوها مستتتتتتتتتتورة


عبد اللطيف البوني
عبد اللطيف البوني

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة