نقول شنو؟
04-24-2013 01:24 PM


ينفع أبدأ المقال بعبارة (والله الواحد ما عارف يقول شنو؟) .. لأنو والله العظيم الواحد فعلاً ما عارف يقول شنو؟ الموضوع وما فيهو الفساد البقى عيني عينك عديييل كده .. الفساد المغتغت خليناهو .. والفساد القالو ودوهو النائب العام منتظرنو .. طيب الفساد الجديد لنج والواضح وسكوت الحكومة عنو ده يقولو عليهو شنو؟ خلاس الناس بقت تفسد بالمفتشر .. خلاس الناس بقت عينا قوية للدرجة دي؟
شنو لمن الحكومة تخصص ليها مساحة من ساحة مسجد الناس قاعدة تصلي فيها في الأعياد وتستخدمها في المناسبات عشان يبني فيها زول مدرسة خاصة الطالب بي كم مليون في السنة؟ هسه أنا الفاتح جبرا ده ولا أي مواطن ممكن يدونا الواطة دي؟ طبعن لا .. ده شغل التكتكة واللف والدوران .. المصلين رفعوا مذكرة للجهات المسئولة ؟ لكن يبدو إنو الجهات المسئولة شايفة إنو الموضوع ده موضوع عاااادي وما فيهو حاجة .. وما فيهو أي شبهة فساد .. زول قال عاوز يشتري ساحة مسجد .. قالوا ليهو جداً ياخ .. قامو (مسحوها) وعملو ليها الكروكي وأدوها ليهو .. قام عمل (الخرط) وقعد يبني !!
.. طبعا الكلام ده حصل قبل حوالي شهرين في مربع 69 بالمعمورة .. وطبعن حصل قبل كده في مواقع وأماكن كتيرة .. ميادين كرة (إنقلبت) بين عشية وضحاها قطع سكنية .. المدينة الرياضية إتوزعت (سكن) ومحلات تجارية و(جمعيات وهمية) وبقت (كمونية).. لم تسلم (ساحة) أو (مساحة) من هذه الهجمة (المغولية) ولكن أن تصل المسالة حد (بيع ساحات المساجد) فدي بتخلي الزول فعلاً ما عارف يقول شنو؟
بقي أن نعلم أن المدرسة المراد تشييدها هي فرع من مدارس كامبردج والتي يقال أنها ملك للوزير أمين حسن عمر إلا أنه نفي ذلك وقال أنه فقط رئيس لمجلس الإدارة وأن المدارس (بتاعت خالو) !
بمناسبة التغول على ميادين الكرة والساحات داخل الأحياء العبد لله يري أنها واحدة من أسباب تدهور الكرة السودانية .. فقد كانت هذه الميادين والساحات (السهلات) يمارس فيها صغار ولشباب الحي (الدافوري) وكرة (الشراب) وما أدراك ما كرة الشراب تلك الكرة التي لو تمكنت من السيطرة والتحكم بها لصار لك (الكفر) حاجة أسهل ما يكون ولكانت دقتك في التصويب و(الباصات) بالسنتي .. لذلك شئ عادي الآن أن تكون باصات اللاعب لخصمة في المباراة أكثر من باصاته لزميله وتصويباته نحو (الكشافة) أكثر من تصويباته نحو المرمي .. وده الخلانا لينا مية سنة لا شلنا لينا كأس وللا حتى (علبة صلصة) .
كسرة :
بالله بعد ما إنتهيتو لينا من(الميادين) ما تقبلو لينا على (المساجد) عشان المساجد دي هي لله وكده
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟


[email protected]


تعليقات 25 | إهداء 0 | زيارات 7014

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#647512 [ست الاندايه سابقا]
4.00/5 (1 صوت)

04-26-2013 02:46 AM
جبرة انا بوريك تقول شنو
انا كنت زمان ست اندايه وعندي زبائن شنه ورنه وحاليا كتار منهم في مناصب مرموقه اندايتي ساهمة مساهمة فعالة في ترقيتهم وتاهيلهم يعني كان الواحد ما بيخش الاجتماع الاياخد لي كاسين مني طبعا زمن البلد (ام فكو برة وجوة) هسي طبعا بقي العكس ( ام فكو بي جوي والله اكبر بي بره ) المهم اندايتي كان في موقع عجيب واحد من الجماعه جاني شرب لي كاسين و قالي لازم تقفلي الاندايه قلت لي كيف الكلام دا؟ وقال لي تسلميني البيت قلت دا بيتي قال عايزين نعملو مستشفي قال لي ماتخافي حانشوف ليك شغلةسلمتو البيت واحات نضري ياجبرة من الزمن داك لابقيت دايه لا ست اندايه ارجو حلا سريعا


#646906 [نادر]
0.00/5 (0 صوت)

04-25-2013 10:39 AM
عليكم الله زوروا حى المهندسين امدرمان عجلة ماتدخل الشارع ..للمشاهدة الدخول بقروش


#646606 [ابوعبدا]
4.00/5 (1 صوت)

04-24-2013 07:41 PM
سوف ياتى يوما وتكون كل ساحات المساجد اتباعت وبعد ذلك يخصحصوا المساجدوالصلاة تكون بالقروش


#646580 [البصير أبو حمد]
5.00/5 (1 صوت)

04-24-2013 07:09 PM
تجاوزنا والحمد لله فقع المراره والضغط والسكرى .... ياربى شلل لأطفال دا بجى للكبار زينا ؟؟
الصبر يارب العالمين


ردود على البصير أبو حمد
Russian Federation [مسلم غيور] 04-25-2013 12:59 AM
بعيد عنك وعننا الكبار بجيهم الشلل الرباعي ودا عكس الدفع الرباعي....عافانا الله واياكم


#646573 [البعير]
0.00/5 (0 صوت)

04-24-2013 07:03 PM
الاستاذ الفاتح جبرة تحية طيبة وبعد هولاء اللصوص والفاسدين اصحاب ثورة الدمار الشامل للسودان منذ يوم أنقلابهم الشؤم في 30/6/1989 وجدوا الشعب مستكين لا بهش ولا بنش ولا بحتج لابسط حقوقه، لذلك فعلوا فينا ما فعلوا من دمار شامل للسودان للشعب السوداني ، خليلك من بيع الميادين والساحات العامة ديل قطعوا ارزاق الناس بما يسمي بالصالح العام وشردهم وجعلوا السودانيين متسولين ماذا فعلنا ، فصلوا السودان الي دولتين ، اشعلوا الحروب في كل مكان ماذا فعلنا ، دمروا اكبر مشروع زراعي مشروع الجزيرة ، مصر احتلت حلايب وشلاتين ماذا فعلنا، المغس كتير يااستاذ الفاتح ، واخيرا نقول ونردد سؤال الاستاذ الكبير الطيب صالح ( من اين اتي هولاء )


#646568 [احمد ابونصر الشمالي]
0.00/5 (0 صوت)

04-24-2013 06:59 PM
الساكن المعمورة منو الحرامية القُودامى والجُداد حلى يعملوه كنيسة ان الله


#646557 [متوكل]
5.00/5 (1 صوت)

04-24-2013 06:44 PM
أمين حسن عمر (البشير)

المنكوش ده مفترض يخلص قراية عمود (جبرا) و طوااااالي يمشي يغتسل و يحلق شعره و يتف سفته و يمشي لناس مربع (69) المعمورة و يعتذر ليهم عن التغول المغولي على الميدان و بالمرة يعتذر ليهم عن (89) الأنتكاس .


#646532 [radona]
0.00/5 (0 صوت)

04-24-2013 06:09 PM
ماذا نقول وماذا يقال
المدارس حقت خالو
المسجد مسجد المسلمين
الساحات فاضية
ليس هنالك الا الصبر لايام قادمات
تراجع فيها كل الساحات وتزال المباني من عليها لتعود ساحات
اما الآن فليس هنالك مايقال وماذا يقال


#646494 [Magdi]
5.00/5 (1 صوت)

04-24-2013 05:27 PM
خليك مفتح يا جبرة الجماعة شغالين حاليا عشان يبيعوا البركس ودايرين باي طريقة يتخلصو من الداخليات الجامعية و بكرة يجيك كلامي


#646474 [بت الخرطوم]
5.00/5 (1 صوت)

04-24-2013 04:43 PM
والله العظيم تعبان على الفاضى كسرتك الاولى ما جابت عملت كسرتك التانية ما جابت فى راس التامزينة خبر الكسرة التالتة اكيد واقعة انت ما سمعت بالارض الوقف العملوها الزيتون الموتة مضمونة استعد انا بت الخرطوم خصصوا لى الارض الساكن فيها انت الفاتح جبرا عشان اعمل فيها صالة مناسبات وليك على حفلات اولادك عندى بربع التمن وبالمناسبة خالى وزير وعمتى مرة وزير اه شن قولك لو ما عجبك قولى البحر قريب اعمل العاوزوا87


ردود على بت الخرطوم
Russian Federation [الضرغام] 04-25-2013 04:19 PM
يا بت الخرطوم لو دي اطروحات ردك على موضوع حساس بهذه الصورة قولي لخالك ولعمتك وحتي جيرانك سوف ياتي يوما تستجيرون فيه بالرمضاء من النار


#646468 [ابو الرشا]
5.00/5 (2 صوت)

04-24-2013 04:35 PM
مساجد شنو يااستاذ الفاتح انت ماعرف قانون بنى كوز مصالحنا فوق كل المصالح دنيويه واخرويه والله انت عجيب


#646462 [توتة المغلوبة]
5.00/5 (2 صوت)

04-24-2013 04:29 PM
ما تحتار عمو جبرا .. فهي لله كما حدثونا والمؤمن صديق .. دعه يعمل ساحة المسجد بزنس كما سبقه كبيره بعمل مول تحت قبة مسجد ابيه .. حثي يصدق فيهم قوله تعالي ( واذا اردنا ان نهلك قرية امرنا مترفيها ففسقوا فيها ) .. و نسأل الله ان لا يؤاخذنا بما فعل السفهاء منا .


#646434 [Tajo]
5.00/5 (1 صوت)

04-24-2013 04:07 PM
اطلبوا العلم ولو في الصين. الناس ديل شفقانين عليكم ودايرين يوفرو ليكم تمن التزاكر للصين وكدا


#646428 [كركبة]
5.00/5 (1 صوت)

04-24-2013 03:57 PM
قول الروب


#646423 [Abu Areej]
5.00/5 (1 صوت)

04-24-2013 03:53 PM
والله يا (خالو) ما تقول اي شيء خلاس عرفنا قصدك.. والناس التانيين الفيهم اتعرفت


#646419 [الشريف]
4.50/5 (3 صوت)

04-24-2013 03:49 PM
محمد فؤاد نجم-
--------------

هما مين واحنا مين
هما الامر والسلاطين
هما المال والحكم معاهم
واحنا فقرا ومحكومين
حزر فزر شغل مخك
شوف مين فينا بيحكم مين
احنا مين وهما مين

احنا الفعلا البنايين
احنا السنه واحنا الفرض
احنا الناس
بالطول والعرض
من عافيتنا تقوم الارض
وعرقنا يخضر بساتين
خزر فزر شغل مخك
شوف مين فينا
بيخدم مين

هما مين واحنا مين
هما الامرا والسلاطين
هما الفيلا والعربيه
والنساوين المتنقيه.. طبعاً
حيوانات استهلاكيه
شغلهم حشو المصارين
حزر فزر شغل مخك
شوف مين فينا بياكل مين

احنا مين وهما مين
احنا قرنفل على ياسمين
احنا الحرب حطبها ونارها
احنا الجيش اللى يحررها
واحنا الشهدا ف كل مدارها
منتصرين او منكسرين
حزر فزر شغل مخك
شوف مين فينا بيقتل مين

هما مين واحنا مين
هما الامرا والسلاطين
هما مناظر بالمزيكه
والزفه وشغل البولوتيكا
ودماغهم طبعا استيكه
بس البركه فى النياشين
حزر فزر شغل مخك
شوف مين فينا بيخدع مين

هما مين واحنا مين
هما الامرا والسلاطين
هما بيلبسوا اخر موضه
واحنا بنسكن سبعه ف اوضه
هم بياكلوا حمام وفراخ
واحنا الفول دوّخنا وداخ
هم بيمشوا بطيارات
واحنا نموت في الأوتوبيسات
هم حياتهم تمضي جميلة
هم فصيلة واحنا فصيلة
حادي يا بادي يا عبد الهادي
راح تفهم قصد الغنوة دي
لمّا الشعب يقوم وينادي
يا احنا يا هم في الدنيا دي
حزر فزر شغل مخك
شوف مين فينا حيغلب مين!!!


كسرة انت محمد فواد نجم ده سوداني
كسرة تانية ود نجم ده مات زمان وكان حاسي بالكيزان ولا شنو


#646415 [sanmka]
5.00/5 (1 صوت)

04-24-2013 03:48 PM
العجيبة يا استاذنا اليوم وبالمانشيت العريض في الصفحة الأولي في صحيقة الخال الرئاسي، إن الرئاسة ترفض رفع الحصانة عن الوزير كمال عبد اللطيف، يعني المسألة أصبحت فساد، وقوة عين، وحماية من القصر، والله هذه أجواء إنقلاب عسكري يراه كل محلل سياسي، وهو ما نخشاه حتي لا يضيع كل جهدكم، وجهدنا، وجهد الآخرين سديً، ونعود الي نقطة الصفر، فنعلم كلنا أن الفساد بمثل هذا المستوي هو المسوغ الشرعي للانقلابيين، فأبشر بصبح البيان الأول ياشعبي


#646404 [الضرغام]
5.00/5 (2 صوت)

04-24-2013 03:23 PM
السلام عليكم الفاتح والله فعلا ما عارفين نقول شنو ؟؟ مقول حلو ؟ نقول جميل؟ ماهو الجمال مكملوا ؟ ولو قعدته وشفته الكم الهائل من الاراضي بتاعة الشعب التى بيعت منذ عهد الانقاذ والله ابكي دم ؟ بتقول خط هيثروا ؟ ايه رأيك فى بيع بنك الخرطوم ؟ تقول فيه شنو ؟؟ حديقة الحيوانات تقول فيها شنو ؟ و و و و وكثير جدا جدا تعمل ليك تضخم فى الكبد وانفجار فى المرارة وارتفاع فى الضغط وهبوط اضراري فى السكر وعمي ليلي كمان ؟
كل دا سيبوة بس عندي حاجو زاحدة محيراني وكاتلاني كتله ؟؟
موضوع المستشار مدحت عبدالقادر ؟؟؟ نسيتو الموضوع دا ؟؟ الحصل فيه شنو ؟ والمتورطين فيه منو؟ والموضوه دا ليه دسه ومنو وراءه ؟؟ واخر حاجة سعادة المستشار يتبرع لنادي النريخ ب150 مليون ؟؟ كمان من وين وكيف ؟؟ وتحت زنظر الحكومة و وزارة العدل و النائب العام ؟ بالله نقول شنو ؟؟


ردود على الضرغام
Russian Federation [زول مشتاق لسودان زمان] 04-24-2013 04:07 PM
الأخ الضرغام أنت عايش وين يا زول ؟؟ أنت ما كلموك ولا ما حدثوك !!! المستشار مدحت طلع براءه ....


#646397 [asd]
5.00/5 (1 صوت)

04-24-2013 03:16 PM
السلام عليكم عم الفاتح لك التحية وانتا بتتعجب علي العجب العجيب..اما بعد...انا الما عارف اقول ليك شنو؟؟سمعتا بالمثل البقول (الاختشو مااااتووواا و شبعوا موووت)؟؟؟جد الاختشو ماتو...حاجة بسيطة اعملا..قل كما قال بعض بني اسرائيل للذين اعتدوا في يوم السبت(قصة المدينة التي كانت حاضره البحر وربنا ابتلاهم )..قال القوم الذين نجو من العذاب للذين اعتدوا...(معذرة الي ربنا)بمعني ...يا رب انحنا ما قصرنا في حق القوم الذين اعتدوا..نصحناهم...ولكن لم يسمعوا نصحنا...بالمقارنه ...بين القوم الظالمين من اليهود..و هؤلاء..نجد...انك تلزم النصيحه..و تقول معذرة الي ربي..يعني الشعب ما شايف البعملو اليهود(من الكيزان)؟؟..لكن ... حتي تتوافر اشراط الساعة(يوم القيامة)..لازم الجماعة ديل يفسدوا في الارض...و هذا قليل من كثير..و غيض من فيض..حسبنا الله و هو نعم الوكيل..


#646381 [A.nasir]
4.00/5 (2 صوت)

04-24-2013 02:53 PM
قال المدارس بتاعت خالو!
وزي ما قالوا {الخال والد}
وأنت ومالك لابيك ،!
وربنا يديم التواصل وصلة الرحم في امبراطورية الأخوان والخيلان .


#646352 [ابوالهول]
5.00/5 (1 صوت)

04-24-2013 02:28 PM
...طيب نعمل شنو ..ما الاراضي والمنتزهات والميادين والفتحات كلها اتبنت ..قلنا نقبل علي بيوت الله وساحات المساجد الكبيرة دي الواسعة دي ..
ياخي انت شفت تخطيط مدينة المعمورة ؟ الشارع ما بيدخل العربية ..ضيق ...حتى بيقولو النسوان في الطوابق العالية بيتونسوا مع بعض بالبلكونات وكمان يتبادلو الطايوق وكدة..وما عندك ملاح رجلة ؟ ...سبحان الله ..
قال ساحات قال ...(نحن عايزين ساحات الفدا بس في البلد دي) ..والما عاجبو يحلق حاجبو ..بلا لمة ...


#646310 [محمد سكر]
5.00/5 (2 صوت)

04-24-2013 01:48 PM
والله يادكتور حكومه الفاسدين تعدت مرحله الفساد وافتت فىمابين افخاذ النساء كما قال البرلمانى دفع اللى حسب الرسول ان المرا المامختونه معفنه ودليل على ان الشيخ بلعب عشره بلدى


#646308 [NASRELDEEN ALI]
5.00/5 (1 صوت)

04-24-2013 01:47 PM
شفت
بكسر الشين والفاء وتسكين التاء ( بس ما فى المدينة الرياضية )


#646305 [idriss]
5.00/5 (1 صوت)

04-24-2013 01:44 PM
لا تستعجل الاخ فاتح جبره بكره تباع المساجد والمدارس الحكوميه ديل فكرو وشرعو في بيع الاوقاف ( الصدقه الجاريه التي تركها اموات ماتو وشبعوا موت من عشرات السنين واملهم ان يصل لهم اجر اوقافهم التي وهبوها لله ) ولكن في شريعه الانقاذ كل شئ بيجيب فلوس قابل للبيع لمصلحتهم الشخصيه سياسه التمكين وافراغ الدوله من اي مقدرات ممكن تصب في صالح المال العام الذي استباحوه ايما استباحه المدارس والمستشفيات والساحات كلها سوف تباع استثمار حسب زعمهم لم يعد للبلد خطوط نهريه ولا بحريه ولا جويه ولا حديديه ولا مدارس ولا مستشفيات ولا سحات عامه كلها سوف تصبح خاصه خصخصه وكده عبقريه انقاذيه ولكن لابد من يوم يصحو فيه الشعب ويسترد ممتلكاتهولا اظن ببعيد بعد ان اصبحت مهمه جهاز الامن حمايه الفساد والمفسدين والسهر علي حمايتهم ومصادره الصحف التي تنبش فيهم فبل التوزيع


ردود على idriss
Russian Federation [الشريف] 04-24-2013 03:52 PM
ولاهي يا دريس اخوي انحنا بعد الجماعة ديل ما يمشوا حا يجو القطرين اشيلونا ولا السعودين ويقولو لينا حكومة الانقاذ دي انقذتكم وباعتكم لينا
الله يكضب الشينة


#646304 [المشتهي الكمونية]
4.50/5 (3 صوت)

04-24-2013 01:43 PM
انت يا جبرة خلاص خليت خط هيثرو وداير تقبل علي مدرسة خال أمين حسن عمر ، خليك في خطك وخلي خال أمين دا علينا نحنا، والله نحنا طيلة ما قاعدين تحت الراكوبة دي ما بنخلي لا أمين ولا خاله، وانت اذا تدخلت يقوم البشير يسوي لجنة تحقيق عشان يكتل الموضوع ، عشان كدة خلي الموضوع علينا وإن شاء الله نجيب ليك خبرو


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة