أيه السرعة دي؟
04-27-2013 10:55 AM


لاحظ المواطن عبدالقادر على حامد علامات المرض على طفلته ذات العام فحملها للطبيب الذي قرر بعد الفحوصات أنها مصابة ببكتريا في البطن فكتب لها العلاج .. دخل المواطن إلى أقرب صيدلية حاملاً الروشتة وجد صيدلى وصيدلانية في حالة (ونسة) .. أمسك الصيدلي بالروشته وقام بصرف الدواء .. ولأن المواطن عبدالقادر يعمل في شركة تعيد لهم قيمة الدواء فقط طلب من الصيدلي إستخراج فاتورة وقد كان .
قام عبدالقادر بإعطاء الجرعات المكتوبة .. فلاحظ بعد الجرعة الثانية أن طفلته بدأت تهتز وترتجف بصورة غير طبيعية .. قام بالتدقيق في الدواء فوجد الكارثة .. الدواء الذي كتبه الطبيب هو أمبولار
Ambolar بينما الذي قام بصرفه الصيدلي هو أموكلان Amoclan .. قام المواطن عبدالقادر بإسعاف طفلته ثم عرج على الصيدلية ليجد نفس الصيدلي والصيدلانية :
- ياخي أنا جيت قبيل هنا واديتك الروشته دي وأديتني الدواء ده
- وأها ..
- أها شنو؟ دي ما كارثة ..
- أسمع يا خونا إنتا جاي زعلان كده مالك .. إنتا عاوز تحل مشكلة وللا تعمل مشكلة؟
- (الصيدلانية) : الظاهر عليهو جاي يعمل مشكلة
- (الصيدلي) : خلاس اليمشي محل ما عاوز !!
وخرج المواطن عبدالقادر وهو ما عارف يمشي وين .. إلى أن هداه أحد أصدقائه بتقديم شكوي بهذه الحادثة (للمجلس الطبي ) .. وبالفعل تم تقديم شكوي حملت الرقم (1017/2010) – لاحظ معي سنة 2010 – تم أخذ أقوال المواطن عبدالقادر وعرض الدواء والفاتورة وقام المسئولون بالمجلس بإعلامه أنهم سوف يتصلون عليه عند الفصل في الشكوي .
وتم الفصل في الشكوي بالرقم (م ط/ا/ب/13) وتسليم المواطن عبدالقادر صورة منها .. وذلك بتاريخ 24/3/2013م أي بعد ثلاث سنوات من تقديمها وقد جاء في قرار المجلس أنه قد تيقن تماما ثبوت إدعاء الشاكي وتقرر إدانة الصيدلية أما (الجزاء) يا أحبتي الكرام فهي كما جاء في ذيل الخطاب فهو (الإنذار) .. ولم يوضح في الخطاب اهو إنذار الصيدلية أم إنذار الصيدلي أم إنذار المواطن عبدالقادر !! وما هي طبيعة ومحتوى الإنذار هل هو من شاكلة (هووووي أخير ليكم ما تعملوا كده تاني) وللا من نوع ( والله والله تسووا كده تاني ما يحصل خير) .. !!
العبدلله شخصياً لم يلتفت إلى هذا (الجزاء) الهذيل التي لا يتناسب و (الخطأ) الذي وقع وإنما شده أمر هام وهو الوقت الذي أخذته هذه الشكوي الحساسة والتي تتصل مباشرة بحياة المواطنين وصحتهم وأرواحهم وأرواح أطفالهم .. 3 سنوات .. نعم ثلاث سنوات .. أي حوالى ألف يوم إستغرقه (البت) في هذه الشكوي .. ألف يوم يكون فيها ذلك الصيدلي (المهمل) قد قام بصرف مئات من الأدوية (الغلط) والما عاجبو يمشي محل ما يمشي (زى ما قال) !!
هل يري أخواننا (الدكاترة) في المجلس الطبي أن هذا وقت قياسي للتعامل مع مثل هذه الشكوي؟ أوليس من البدهيات ان يتم أيقاف هذا الصيدلي بمجرد قبول الشكوي شكلا إلى ان ينظرها مجلسكم الموقر ويبت فيها حفاظاً على أرواح بقية (الشعب الفضل)؟


كسرة :
يا ناس المجلس الطبي .. أيه السرعة دي ؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟



[email protected]


تعليقات 22 | إهداء 0 | زيارات 9015

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#649875 [نبيل أبو نادن]
1.00/5 (1 صوت)

04-28-2013 04:40 PM
أخي جبرة .. من لم يمت بالسيف مات بغيره .. هكذا هو الحال و هكذا هي الحياة في السودان .. فأنت واصل في فتح الجروح .. و رصد المخالفات و التجاوزات و اللامعقوليات التي تحدث حاليا في السودان ..شئ لا يصدق .. طبعا لا تعد ولا تحصى .. على أي حال أنت أكتب ونحن نقرأ .. فلا أنت بخاسر لشئ ولا نحن بخاسرون لشئ .. لأن الخاسر الوحيد .. وللأسف هو الوطن و إنسان الوطن .


#649643 [Anya O]
0.00/5 (0 صوت)

04-28-2013 12:26 PM
لا حول ولا قوة الا بالله


#649126 [musa]
4.94/5 (5 صوت)

04-27-2013 11:51 PM
قبل اربعة سنين كنت فى اجازة احتجت امشى للصيدلية اديت الروشتة للصيدلى قراها وختاها على الكونتر غاب دقيقة وجاء بعلبة كبيرة وبهل الحبوب على الكونتر بعد اللحظة طلع كيس تمباك دنكل ليهو سفة جامدة ويبدو انو قشة من قش التمباك علقت فىشفتو السفلى وبدى يتفتف تجاة الكونتر والحبوب تعالوا شوفو الادهى والامر قام يحسب من الحبوب ديك بيدو تعال شوف الحبة الاولى والتانية لونهم بقى كيف من التمباك بنى عديل سالتة انت الحبوب دى لمنو قالى ماليك انت ~ ياخى معقول حرام عليك ~ طبعا اخذت الروشتة ومشيت بلد متاخرة فى مل شى


#649089 [أبوكرشولا]
5.00/5 (5 صوت)

04-27-2013 11:07 PM
يأخي جبرا:تحيه طيبه باخ روق ال(G)وكبر ال(D)إنت مالك زول مستعجل كده؟الناس ديل ماقاعدين ينقذو فينا 23 سنه بس جات علي ال3 سنه


#648838 [سودانى منفرج الأسارير]
5.00/5 (1 صوت)

04-27-2013 06:09 PM
يا اخ يا محترم يا اللى فاتح جبرا ومقفّل هندسه ولوغاريزمات .. تسائلنا عن توجيهات الرئيس وانت اكيد لعليم بها.. ونقول لك كما شئت: ايهم.. ايهم .. فهمو كثر! ونحن برضو نتساءل معك زى تساؤل الشريف ود بدر عن خط "هو جدع -He threw" وين هو صاحب التوجيه .. ورحم الله ابعاج .. ولمعلوميتك يا صاح والشيء بالشيء يذكر .. فقد جاء فى الخبر ان معلمة تدعى انها تعلم "بنات المدرسه" انقليزى سمعوها تدرب البنات على نطق كلمة "ثرو ألأنجليزيه - THREW " وهى تتصايح وتتلوّى امام تلميذاتها وتقول: تهرو .. تهرو (بفتح حرف التاء وسكون الهاء) .. فتأمل .. موش احسن وزيره التعليم تسرع فى تحويل مدارس ألأساس كووولها ( ما 25% منها)الى مدارس قرآنيه قبل ما بعلها امين عام الحركه الأسلاميه يغيرو ليهو الموقع .. بالمناسبه هوّ ديمه زعلان وصارّى وشّو كدا ليه..


#648829 [تمساح]
5.00/5 (1 صوت)

04-27-2013 06:03 PM
دا ما بكون صيدلى ويمكن بياع خضار لان فى السودان اى واحد ببيع ادوية.. والله ووالله واقسم بالله بعرف واحد كان استاذ ابتدائية وفاتح صيدلية باسم دكتور ولكن هو اللى ببيع ويبدل الدواء على حسب مزاجه


#648758 [الدندور أبو عوه]
5.00/5 (2 صوت)

04-27-2013 05:12 PM
أتظن أن كلاب المجلس الطبي يهمهم أمر المواطن هؤلاء يرون الأخطاء الطبيه عيانا بيانا ولا يفعلون شيء إلا أن تكون فضيحه بجلاجل كفضيحة عشميق التي لم يستطيعوا حجبها لأنها وصلت الاعلام وعرفها الداني والقاصي اغلب اصحاب الصيدليات أطباء إذا أن القانون لايسمح لفرد غير صيدلاني بالترخيص إلا أن يكون حرامية الانقاذ غير القانون وإستفاد منه أصحاب الحظوه ثلاثة سنوات للبت في قضيه حياة أو موت قضيه كان من الممكن أن تفقد الطفلة حياتها لكن ما أرخص حياة المواطنيين لدي كلاب المجلس الطبي!!!!!!!


#648725 [ام الحسن]
5.00/5 (1 صوت)

04-27-2013 04:39 PM
الحمد الله القرينا طب زمن ما كان الطب بخيرو 000عشان مافى جهلول زى الصيدلى ده يدقسنا 000لانو الدقسة هنا بتودى فى ستين داهيه000 مش ناس القبول الخاص ديل هم الغطسو حجر الصحة فى البلد000ده لو كان حصل فى اى بلد تانية كان اقل عقاب هو ايقافه عن مزاولة المهنة


#648723 [ام الحسن]
5.00/5 (1 صوت)

04-27-2013 04:37 PM
الحمد الله القرينا طب زمن ما كان الطب بخيرو 000عشان مافى جهلول زى الصيدلى ده يدقسنا 000لانو الدقسة هنا بتودى فى ستين داهيه000 مش ناس القبول الخاص ديل هم الغطسو حجر الصحة فى البلد000ده لو كان حصل فى اى بلد تانية كان اقل عقاب هو ايقافه عن مزاولة المهنة


#648688 [murdas al- hag]
5.00/5 (2 صوت)

04-27-2013 04:13 PM
طبيب بحب مرضة وخجلان يوصل ليها حبه قام قال لممرضة صاحبتها فنصحته ان يكتب لها خطاب ولكن يقصر الكلام يعني بدون رتوش وحبكان كثير. ولما شالت الخطاب وادته ليها لم تستطع قراءته فنصحتها بالقول ان ما في زول بعرف اقرأ كتابة الدكاترة الا الصيادلة فذهبت الى اقرب صيدلية لمعرفة ما الخطاب. قام الصيدلي اداها حبوب منع حلم مع وصفة كاملة لمتى وكيف تستخدمها
قال ثورة تعليم قال


#648648 [مظاليم الشعب]
3.00/5 (2 صوت)

04-27-2013 03:17 PM
هو شكلوا داقي الراندوق مع حبيبتي مافاضي لي التركيز بين ambolar ولي amoclan الله يكون في عون المواطن محل مايقبل البؤئس معاهو .. هسع البنت الصيدلانية دي تلقي وشها ذي المركوب القديم والصيدلاني تلقاهو من الناس ديلك استغفر الله


#648642 [إبن السودان البار ***]
5.00/5 (4 صوت)

04-27-2013 03:09 PM
ياأستاذ جبرة ما تفهمها سريع ؟؟؟ ال3 سنوات دي للتحقق من أن الصيدلانية أو الصيدلي دا يكون أبوه من الجماعة اياهم الذين يسميهم أخوانا الجزائريين ( أبو لحية ) يعني يكون الشيخ دفع الله أو الترابي أو حاج نور( أذكروا محاسن موتاكم ) وهلم جررررر ؟؟؟ أو تكون الصيدلية فرع من فروع شركات أخوان الأسد النتر ورقص لامن فتر وغلبه المشي ؟؟؟ وذلك حتي لا يقع المجلس الطبي في حرج لا يحمد عقباه ويجرر أعضائه لبيوت الأشباح بتهمة الزنا ؟؟ وأخبار خط هيثروو شنووووو ؟؟؟ تصور ياأستاذ جبرة هنالك دولة إسمها فانواتو بالقرب من استراليا مساحتها قدر مساحة بورسودان وتعداد سكانها قدر حارة في الثورة وليس لها أي موارد مالية غير السياحة وعاصمتها بها شارع رئيسي واحد وسوق واحد عندها شركة طيران محترمة تصل لعدة قارات بالعالم ؟؟؟ والسودان الحبيب الطوله طول النخلة وعقول حكامه قدر عقل السخلة شركة طيرانه لحقت أمات طه كما تعبر؟؟؟


#648641 [هيكل]
5.00/5 (1 صوت)

04-27-2013 03:08 PM
والله اكثر من مره تم صرف دواء خطاء لوالدي من مستشفي الزيتونه وبقينا قبل صرف اي دواء نتأكد ونسأل ذي الشفع هو يزوال عين كويس دا الدواء ذاتو كدي اتأكد والصيدلي يأكد دي يهو ونعتذر ونوريهوالقصه


#648624 [أسامة عباس]
5.00/5 (2 صوت)

04-27-2013 02:45 PM
والله ياجبرا كلاب أروبا اذا حصل ليهم الحصل للمواطن عبدالقادر كان طارت فيها رقاب ... حكومتنا حكومة السجم والرماد آخر اهتماماتها المواطن الغلبان المسكين ... اذا كان هنالك حساب ومسائلة ماكان الصيدلى يقول ليهو امشى محل ماعاوز ... ماهى خرابانه من كبارا ..
انا لو كنت فى محل عبدالقادر كنت قبضت الصيدلى وكتفتو وبلعتو باقى الدواء


#648602 [عبداللطيف]
5.00/5 (3 صوت)

04-27-2013 02:25 PM
بعد التفكر في احوال العدالة عندنا اقترح علي السادة المواطنين البدء بأخذ العدالة بايديهم فمثلا كان بامكان المواطن هذا ضرب الصيدلي كفبن امام الجكس حقو الصيدلانية وانتهى الموضوع .


ردود على عبداللطيف
Russian Federation [احمد ابونصر الشمالي] 04-27-2013 05:58 PM
دا الكلام المظبوط


#648576 [على كرار]
5.00/5 (2 صوت)

04-27-2013 01:56 PM
أخى جبرا, الصيدلى من إياهم و الصيدلانيه من إياهن, كدى ورينا الصيدلية بتاعت منو من إياهم؟


#648541 [omda]
5.00/5 (1 صوت)

04-27-2013 01:27 PM
ههههههههههههههههههه ديل صيادلة ثورة البحث العلمى مقعولة ده اكبر عين انو صيدلى فى اسهل حاجة انو يصرف دواء ده الواحد بتاكد خمس مرات على الاقل ومفروض اعرف الدواء لى منو ولى شنو حتى اعطيه للمريض على فكرة صرف الدواء ده مادة تدرس فى السنة النهائية ههههههههههههه سبحان الله صحى صيدلى سودانى مع احجترامى لاساتذة والزملاء الشرفاء والذين يعملون لخدمة المواطنين


#648510 [يحيي العدل]
5.00/5 (1 صوت)

04-27-2013 01:04 PM
أها يا جبرا والطفلة حصل ليها شنو ؟؟؟؟
والفلوس الدفعها المواطن للدواء الغلط مشت وين ؟ يكون خاتنها أمانات ؟


#648491 [وضح.. أبن... أفصح]
5.00/5 (3 صوت)

04-27-2013 12:53 PM
برضو أنا بشوف إنو في جزئية ما ذكرتها يا أستاذ... وهي من الأهمية بحيث يجب ذكرها والتنبيه عليها... عشان تزيد أوجاعنا أوجاع.
فمسألة قول الصيدلي للمواطن صاحب الروشتة: (خلاس اليمشي محل ما عاوز !!).
دي جملة بشوف فيها مربط الفرس (ومقتلو)... فأي واحد بيمارس أي مهنة أو متخصص في فن من الفنون بيعرف واجباتو وحقوقو المتعلقة بالمهنة أو الفن البيمارسو... فبالضرورة إنو الصيدلي ده بيكون عارف الجهة البتحاسبو (أو المفروض تحاسبو وتشرف عليهو)... لكن (والوجع الكبير هنا)... فوق لي معرفتو دي بيها ما هاميهو.. لأنو عارف إنو الجهة دي خيال مآتة... ولا تندرج تحت أي بند من بنود مهامها الاهتمام بالمسئوليات الموكلة ليها بما فيها حماية المواطن فيما يتعلق بالخدمات الطبية المقدمة.
و(الخيال المآتي) ده منحسب على كل الهيئات والمؤسسات الخدمية الباقية.


#648480 [عباس بن عباس]
5.00/5 (2 صوت)

04-27-2013 12:46 PM
الاستاذ العزيز جبره...لم توضح لنا اذا كان الانذار انذارا عاديا ام انذارا شديد اللهجة.. تقول لي وايه الفرق...تفرق كتير يا سيدي...اذا كان انذارا شديد اللهجة ..هذا النوع من الانذارات يحتاج لوقت طويل لصياغته وكتابته ومراجعته وعرضه علي الجهات الدنيا والعليا..ثم اعادة صياغته..ثم عقد عدة اجتماعات للنظر في كيفية ارساله..الخ الخ..الخ..وحسب تقديري وبما انه قد نمي الي علمي ان هذا الانذار كان شديد اللهجة وعليه اعتبره انجازا تم بسرعة فائقه ولا ادري سببا لتعجبك... لا تبخسوا الناس اشئاءهم يا عزيزي...مش تحمدوا الله انهم ردوا..ده جزاؤهم..


#648413 [أبوالكجص]
5.00/5 (1 صوت)

04-27-2013 12:11 PM
مثل هذا التقاعس للفصل في شكاوي المظلومين وفي بعض الأحيان التجاهل ورمي الشكاوي في سلة المهملات، دفع غالبية هذا الشعب الصابر للتوجه إلى الله والشكوى له وحده. اللهم إنا نسألك إنصاف المظلومين فلا رقيب ولا حسيب على من ظلمهم.. اللهم آمين.


#648404 [خضر الطيب / الرياض]
5.00/5 (2 صوت)

04-27-2013 12:04 PM
مامون حميد قال (الإعلام شوه صورة الأطباء عند المرضى) الله المرض اللي إكتلك


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة