المقالات
السياسة

04-29-2013 09:31 AM


* (الكردافة) الكلمة بين القوسين مصطلح يطلق على سكان كردفان الغرة ام خيراً جوة وبرا ..
لو ما قادرين يحمو البلد مالهم مكنكشين فيها يتنازلو يدوها لى راجل بولد العوين ، هكذا بادرنى حاج اسماعيل الرجل السبعينى ثم استرسل كرهونا العيشة البترول اربعة وعشرين سنة مضيعين قروشو فى الحبشيات والماليزيات والهنود
واصل نعم هسه الرئيس فى بحردار جا امبارح عندو شنو فى بحردار ..؟؟؟
اجبتة يرتاح من الهموم شوية .؟.؟
هموم شنو ياوليدى .؟؟ هو عندو هموم ..؟؟
انت يا حاج اسماعيل قايل حكم البلد دى ساهل ...؟؟
اولاد ما عندو هموم شنو ليهو .؟.؟
الاولاد قسمة من ربنا وربنا ما قسم ليهو .؟.
عشان ما عندو اولاد ماعارف قيمة الجنا بكتل فى اولادنا ساى هسه امبارح دى بلد عندها وجيع (اشارة الى احداث ام روابة )..؟؟
ياعم اسماعيل الرئيس ما قاصد يكتل اولادكم بس دى الحركات المسلحة براها البتكلتل اولادكم .؟.
ضحك ضحكة ثم اعتدل من اتجاهه فى الجلوس وادخل يدة فى جيبة واخرج منها (حقة) الكلمة بين القوسين تعنى وعاء لحفظ ادوات الكيف الشخصية ثم دنكل منها سفة عمارى الفاشر مرسى ثم قال لى والله العظيم : انت عارف الماتو فى احداص ام روابة كم .؟؟؟
فقلت : كم ..؟
رد عشرة نفر بس الله يرحمهم والكتلوهم ناس الثورية ..؟؟ ثم واصل شوف يا ولدى فى احداث مروى الكتلتهم الحكومة كم .؟.؟
وناس بورتسودان الماتو الكتلتهم الحكومة كم .؟.؟ واضافة هسه يا ولدى احداث ام دوم بتاعت الخرطوم دى كتلو ليهم صبى عمرو سبعطاشر سنة بس .. واشار الي الكتلو منو .؟؟ ماهم ناس الحكومة البيكتلو فى الخرطوم . ؟؟
ولا انت قايل الناس ما عارفة كضب الحكومة ..
وهاك تانى كمان الاطفال الباعو مستشفيتهم وطردوهم عيانيين المات منهم المسئول منو ، منو .؟؟اشارة الى الدكتور طيب الذكر (ابنعوف) ..
حاج اسماعيل رجل يفهم فى السياسة والاقتصاد والفنون والزراعة والادب .
ثم قال لى الحكومة دى ما بتخجل ساى .؟.؟
فى شنو تخجل من شنو .؟.
ثم قال لى والله لو فى زول فى الحكومة دى عندو دم ساى كان قدم استقالتو رجااااالة ساى لكن صحى الاختشو ماتو ..؟قاطعتة كيف الكلام دا .؟.؟
قال لى نحن دولة ذات سيادة .؟؟ فقلت صحيح .
طيب الان وينى السيادة الان حلايب عند الحلب.الفشقة عند الحبش .؟؟
ياعم اسماعيل دى قضايا استراتيجية للدولة .؟؟ رد على خلينى من الكلام الكبار دا وكلام المتفلسفين وناس الزلنطحية وافهم كلام الشاعر القدال (تانى ما يخموك على الدفافير والكناتر للحروب). انتو عيال الزمن دا عندكم ازمة وعي .؟.؟
كيف ياعم اسماعيل ازمة وعى فى شباب السودان .؟.
اى ازمة وعى والله .؟.؟ قاطعتة ورينى ..
انتو مش البغشوكم بالجهاد والحور العين والجنة .؟. طيب فى زول ما داير الجنة البشير يقود متحرك وعلى عثمان يقود متحرك والحاج ساطور برضو يقود متحرك ونافع ابو لسان طويل دا ودوهو متحرك النيل الازرق وعبدالرحيم اللمبى ادوهو متحرك والترابى الجابهم زاتو ادوهو متحرك الموضوع بقى جنة ديل مالم ما دايرين الجنة يمشو الجنة ..؟؟
حقيقة هزمنى بالحجة والمنطق.؟.؟ لكنى قلت اكابر عليهو شوية .؟. كيف ديل يمشو والبلد دى البحكمها منو .؟.؟.
رد على البلد طايرة فى السماء .؟.؟
يودو اولاد المساكين الحرب والجهاد وهم نايمين فى الخرطوم اليبقو رجال زمان خليل دخل ام درمان والان الحلو دخل ام روابة خلى البشير يدخل كاودة القال بدخلها الجمعة قبل سنة ليوم الليلة كادوقلى بتقول الروووووب ...
طيب البيحصل شنو .؟.؟
البيحصل انو اى زول يفتش اكل عيشو وين نخن ما عندنا مشكلة مع الجبهة الثورية ولا كمان مستفيدين من الحكومة اى حاجة المعصور يمشى الجهاد ..؟؟ قاطعنى لكنى خلوهم براااهم يمشو يكاتلو ويدخلو الجنة البقولوها دى وانا اى واحد من اولادى ديل خضرة ما يجيبه لى وما عافى منو لو بقى عضو فى جمعية قران كريم ساى ولا كوز
وبنصحك وبنصح الشباب القدرك وبقول ليهم : الله يوم القيامة بيسألك من عمرك اوعاااااك تتغشى فى مشروع الجهاد السودانى جاهد بالعلم والقراية وابقى زول زجاهد بالعرس وجاهد بالعمل الحال (اوع يخموك على الدفافير والكناتر للحروب)..
انتهى كلام عم اسماعيل نقلته لكم كما هو ..
مضمون كلام يتلخص فى .
ارحل ان لم تستطيع حمايتنا سعادة المشير عمر حسن احمد البشير ومن معك ..
..يوسف الناعم البزعي

[email protected]


تعليقات 7 | إهداء 0 | زيارات 2945

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#650730 [الكردفانى الاصيل]
0.00/5 (0 صوت)

04-29-2013 12:23 PM
ابداااااااااااااااااااااااع يا يوسف ........ بس دايرنك تواصل الحوار مع عم اسماعيل وتشوفو بقول شنو في رده فعل مواطني ام روابه الابطال وطردهم للوالي و..........و..............و,,,,,,,,,, منتظرنك يا مبدع


#650726 [lwlawa]
0.00/5 (0 صوت)

04-29-2013 12:21 PM
تخيل ان الذي حدث في ام روابة هو العكس... وان مليشيات النظام هي التي اجتاحت ام روابة ..؟؟..والعرف عندهم هو ان كل من بالمدينة وما بها هي غنائم وفييء وسبايا..ومن ثم يعم القتل والسحل والتشقي والتشريد والحرق للمأكل والمشرب والمسكن وكل ما طالتها ايديهم ..؟؟
هل هذه دولة تدعي الانسانية والاسلام والتدين .؟؟..هل هكذا دولة ترجو من الله ان ينصرها على اعدائها ...؟؟..
كما لا ننسى ان جل الثوار، هم من تلك الهوامش الممتدة، من الجنينة والى طوكر ..؟؟..لذا لا يتوقع منهم انتهاج الفوضى والطيش.


#650697 [علي ود أمروابة]
0.00/5 (0 صوت)

04-29-2013 11:42 AM
كفاية أنقذتونا كتر خيركم ، قبل الإنقاذ زمن الجيش جيش كانت الأمهات لما أن يكون إبنها ذاهب إلي الجنوب تحاول منعه بكل السبل ، لما يقول لها أن عمله بمدينة جوبا أو واو تطمأن وتقول له هذه مدن آمنة أذهب وفقك الله ، أما الآن لا توجد مدينة آمنة في السودان حتى القصر الرئاسي نفسه، أين الإنقاذ؟؟؟


#650695 [سنوي]
0.00/5 (0 صوت)

04-29-2013 11:37 AM
والله هذا لسان حال اغلب اهل السودان ، الله يديك العافية


#650692 [مهاجر]
5.00/5 (1 صوت)

04-29-2013 11:35 AM
علمت من مصدر موثوق أن النسوة في أم روابة قمن بخلع ثيابهن وقدمنهالوالي شمال كردفان وقلن له هو الأجدر بلبسها إن كان لا يستطيع القيام بحمايتهن من الهجوم الذى كان يعلم به قبل خمسة أيام من وقوعه كما قال بعظمة لسانه.


ردود على مهاجر
Russian Federation [الحقيقة] 04-29-2013 07:25 PM
الوالى يستاهل لبس الطرح بس صدقونى ناس ام روابة ديل لو كانو قالو ليو نحنا بديرية كان حماهم


#650687 [lwlawa]
0.00/5 (0 صوت)

04-29-2013 11:33 AM
حكمة والله وحكاية..؟؟.. كل متسلط على السودان، يحرم من الخلفة ..؟؟..ربما من سوء عملهم وظلمهم لهذا الشعب المسكين ...؟؟


#650632 [مهمش]
0.00/5 (0 صوت)

04-29-2013 10:48 AM
كلام صاح


يوسف الناعم البزعي
يوسف الناعم البزعي

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة