القادم أسوأ
11-24-2010 12:23 PM

ساخر سبيل‏

القادم أسوأ

الفاتح جبرا

على موقع صحيفة الرأى العام الإليكترونى يتم نشر مقالات كتاب الصحيفة وأعمدتهم ويتم التعليق والتعقيب عليها من كافة القراء الذين يتابعون الموقع على الشبكة العنكبيوتية ، هنالك من القراء من يفهم ماذا يود الكاتب أن يقول وما هى المرامى التى يرمى إليها ولكن هنالك أيضاً من ينطبق عليه القول بان (الفهم قسمة) وخير من يمثل هذه الفئة قارئ سوداني يدعى (مبارك) يقيم فى (فلادليفيا) بالولايات المتحدة الأمريكية قام بالتعليق على مقالى الأخير عن ربط فاتورة المياة بفاتورة الكهرباء ... وهاكم تعليقه :

(ياسيد والله انا ما فاهم انت عايز تقول شنو ؟؟ الظاهر انت عايز تكتب اي حاجة وخلاص ! البلد يمر بظروف إستثنائية ولسع عندنا من يتحدث وكأن الامر لايهم ! فاتورة موبايلي ! شاي صاموتي ! والبركة ماقال كسرة وزير المالية ! أحلفك بالله ان تشاهد الفضائيات او بس نصف ساعة علي النت (الميديا )علي المستوي العالمي و الاقليمي كيف هي مشغولة بامرنا والمخاطر المترتبة علي القارة برمتها وانت لسع مشغول بادم سيد الكان ! والله اخشي ان لا تجد ادم ولا دكانة ! عشان كدة البلد قبل خمسة سنين مقبل علي مخاطر وقادة الرأى ماشاء الله عليهم ! اخر فصاحة في مالايفيد !!!)

إنتهى حديث أو تعليق أخونا المقيم بفلاديلفيا ... والذى يعتقد بأن مقالنا عن دمج فاتورتى الماء والكهرباء يندرج تحت باب الكتابة (الأى كلام) بل صرح (صاحبنا) صراحة فى تعليقه الموجز هذا بأن ما كتبناه يعد (فصاحة فى ما لا يفيد) !

وإذا كان (صاحبنا) يرى أن تبصير المواطن بحقوقة القانونية كما ورد فى المقال (شئ غير مفيد) فهو بالتأكيد يحتاج إلى فهامة (حجم عائلى) وإن كان يرى بأن التطرق لأى موضوع (حتى وإن كان يهم المواطنين) فى هذا الوقت يعد عبثاً لأن البلد كما قال مقبلة على مخاطر ظاناً بأن (مقالات العبد لله) يمكنها تخفيف هذه المخاطر أو المساهمة فى حلها فى هذا الزمن (بدل الضائع) فأنا أنصحة بتوفير (قروشو) وعدم شراء الفهامة لأنها لن تجدى حتى وإن كانت ذات معالج من فصيلة (البانتيوم) !

فهذه المخاطر الذى يتحدث عنها (صاحبنا) كأني بها تطل برأسها الآن (فجأتن) على الرغم من أنها مخاطر تم (التوقيع عليها) قبل سنوات خمس ظن سياسيو هذا البلد بأنها سنوات طوال لن تنقضى وعندما إنقضت راح البعض يولول والآخر يذرف الدموع السخان وصاحبنا ينعي علينا عدم التطرق لهذا الأمر الذى لن يغيره مقال أو عمود أو نشيد حتى وإن كان من شاكلة (منقو قل لا عاش من يفصلنا) أو (سودانى بليدنا وكلنا إخوان) !

نعم لم أتطرق أبداً فى كتاباتى لمسالة الإستفتاء أو (الإنفصال) أو تقرير المصير أو حتى وحدة (الزمن بدل الضائع) الجاذبة ، لعلمى بأن مسألة تقرير المصير التى نصت عليها إتفاقية نيفاشا فى أحد بنودها هى فرصة قد أتت على طبق من ذهب للإخوة الجنوبيين لتكوين دولتهم التى يريدون ولأمريكا (التى قد دنا عذابها) من أجل تطبيق أجندتها غير الخفية ولذلك فهما لن يفرطا فيها وسيعملمون بكل عزم للوصول إليها وإن إستدعى ذلك إستخدام كافة السبل بما فيها (اللعب غير النظيف) !

إن (جقلبة) و(ولولة) و(دموع) أمثال (صاحبنا هذا) لن تفيد وكما يقول المثل (العملتو بى إيدك يغلب أجاويدك) وها هى البلاد تواجه خطر التقسيم الماثل الذى لن يستطيع كل (كتاب الأعمدة فى الدنيا) منعه أو التصدى لتبعاته بعد أن أصبح الإنفصال هدف (قانوني) مشروع (للجنوب) على الرغم من الدماء التى سالت والأرواح التى بذلت من أجل أن تظل (خريطة) الوطن بذلك الشكل الذى حفظناهو عن ظهر قلب !

نعم لم أتطرق لهذا الأمر لأن الموضوع جاد وخطير ولا يحتمل أى (سخرية) ولأننى أرى بأن تقسيم (أى وطن) هو خط أحمر لا يجوز الإقتراب منه وأن مجرد وجود بند فى إتفاقية (نيفاشا) يمكن بموجبه تقسيم البلاد هو خطأ لا ولن يغفره التاريخ لأن وجود أى بند فى إى إتفاقية يعنى إمكانية حدوثه ، نعم كان يمكن التوافق على أى حل يضمن للإخوة الجنوبيين إدارة شئونهم بأنفسهم لكن أن يذهب هذا الجزء العزيز من الوطن (منفصلاً) هكذا فهذه بداية البداية وإذا كانت المقولة تقول بأن (القادم أحلى) ففى ظل هذا الذى نراه ونشاهده فإن القادم بلا شك (أزفت) !



كسرة :

الجفلن خلهن أقرع الواقفات .. يجب أن تجعلها الحكومة شعاراً لها فى هذه المرحلة حتى لا يأتى يوم نجد فيه أن مساحة البلد أصبحت مليون متر مربع


تعليقات 20 | إهداء 2 | زيارات 4360

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#60221 [abo faisal]
1.00/5 (1 صوت)

12-17-2010 04:09 PM
تحياتى استاذناجبر

ياجماعة الخير الكرواعو فى البر مازى الغرقااااااااان ونحنا والله غرقانين تب لو مامقالا ابو ناجى بتخفف علينا شويه هس كان بقت فى ازمه فى الصوانى والجن كتلنا
واخونا مبارك كان بقدر يعمل حاجة فى الوحدة الموضوعا اتحسم قبل 5سنوات حبابو عشره يبقى جاى والله كل لبصحف والقنوات تستقبلو بس هو كيييييييف يجى
الجفلن خلهن اقرع الواقفات المقوله دى قالا الكاتب مقدم ذو النون فى كتابو دارفور حقيقة الثوره والاباده قبل 5سنه ولحد هس ناس الحيكومه جارين ورا الجفلن


#50012 [موجوع]
1.00/5 (1 صوت)

11-26-2010 07:49 AM
الجفلن خليهن اقرعى الواقفات.....والله كلام


ردود على موجوع
Sudan [ود الحاج] 12-07-2010 11:50 PM
صـــــــــــــــح لسانك يا أستاذ جبرا


#49952 [سودانية مية المية]
1.00/5 (1 صوت)

11-25-2010 10:25 PM
استاذ جبرة يا راااااائع واصل ابداعك...كلام السودانيين لابقدم ولا بأخر واسألني انا بس نقة وتنظير ولماضة في الفاضي ..وآه يا مرااااااري;( ;( ;( ;( ;(


#49877 [عاطف]
1.00/5 (1 صوت)

11-25-2010 05:26 PM
ياخوانا مبارك بتاع فلادلفيا مرطب وماعارف الحاصل للشعب السودانى بس انا احيه لان خلاك تتكلم فى موضع الانفصال والوحدة


#49853 [سوداني]
0.00/5 (0 صوت)

11-25-2010 04:33 PM
السلام عليكم . مشكور الاستاذ فانح جبرا علي الموضوع.....و.انا اتفق مع كلام القارئه سودانيه .......في كل كلمه
ولل القارئ معتصم هارون ......صدقني انت ما عارف ظروف الناس عشان تحكم عليهم
وقطعا اي سوداني (في اي مكان )بهتم لي امر السودان لانها في النهايه بلدوا

وشكرا..................


#49811 [سوداتية]
0.00/5 (0 صوت)

11-25-2010 02:47 PM
اختلف معك في اسلوب التعريض بالقاريء فلك انسان الحق في نقد ما يقرأه من ذاويته الخاصة وايضا لا اتفق معك في اليأس من مناقشة قضايا الاستفتاء لان التاريخ لن يرحم الجيل الحالي من ساسة ومفكرين وادباء واعلاميين وكل من يمكن ان يدلو بدلوه في هذه القضية سلبا ام ايجابا وكما قال الرسول (ص) اذا قامت القيامة وفي يد احدكم فسيلة فليغرسها واعتقد اننا كمواطنين علينا غرس هذه الفسيلة


#49767 [معتصم هارون]
0.00/5 (0 صوت)

11-25-2010 01:06 PM
وزولك ده كان مهتم بوحدة السودان المقعدوا في البلد الدايرة تقسم السودان شنو ما يجي هنا ويساهم في وحدة البلد والله نحن مستعدين نخصص ليه الف عمود في الصحف ونقراها ليه عشرة مرات كان تعمل حاجة


#49734 [ود بشري]
0.00/5 (0 صوت)

11-25-2010 11:31 AM
يا استاذنا ابو جبرا قوليه قلطان يابوي البص ده ماشي جبرا ورجع ليه قروشوا خليه ينزل


#49566 [odabdiga]
0.00/5 (0 صوت)

11-25-2010 03:29 AM
دا ذى صاحبنا الاتصل على برنامج ما والموضوع كان عن رفقاً بالقوارير قال للمذيع والله القوارير ملت شوارع الخرطوم


#49483 [jangy]
0.00/5 (0 صوت)

11-24-2010 08:49 PM
التعليق دا للمعلقين..انتو قايلين الزول دا من وين؟ دا يا اخوانا من الشعب الفضل الساكنين ابروف امدرمان مع ناس الشعب الكمل امثال عبد الخالق وخالد الكد والا دباء والمثقفين وهم كثر..يعنى لو كان بترسل ليهم الدكان ساكت يبقى وطنى من الدرجة الاولى..لا ازكر جيدا التاريخ بداية التسعينات او اواخر الثمانينات كان اخونا جبرة شبة مغترب معانا فى السعودية..وتقابلنا بدون سابق معرفة ولا لاحق معرفة حتى الان..سالنى انت ساكن وين لما عرف انا مسافر السودان..قلت ودنوباوى ..قال خلاص عليك اللة شيل معاك القروش اديها للاهل بابروف..عملة صعبة جدا وقتها..دا فعل ما يسوية الا سودانى حتى النخاع وحتى الثمالة زاتا


#49477 [المسافر]
0.00/5 (0 صوت)

11-24-2010 08:18 PM
السودان اصبح يبكي ويتباكي علي ما فاته لكن اكيد القادم هو اسوء
الانقاذ لن تتركه حتى لو تقلص حكمها لولاية الخرطوم فقط


#49454 [فلاديفيا]
0.00/5 (0 صوت)

11-24-2010 06:59 PM
انا كدة يادووبك عرفتك قاصد شنو بمقال تشابه اسماك ياجبرا.!.!.!.!.!.!.!.!.!.!.!.!.!.!.


#49373 [ام الحسن]
0.00/5 (0 صوت)

11-24-2010 03:14 PM
اقول لحكومة السجم والرماد المختصر المفيد..والقالو الاستاذ الفاضل جبرا الجفلن اخليهن اقرعى الواقفات


#49369 [ام محمد]
0.00/5 (0 صوت)

11-24-2010 03:05 PM
صمت دهرا ونطق عجبا.....اتاريها العمة دى فوق راى....عمتك دى زمان غايظانى وشايفاها زى الكلمة الشاذة....لكن الليلة اثبت انك قدرها وبتستاهل تلبسها..وعمتك دى اتاريها التحتها ماساهل والله


#49355 [طارق]
0.00/5 (0 صوت)

11-24-2010 02:43 PM
اولا متعك الله بالصحة والعافية الاخ جبرا
ثانيا التحية للاخ مبارك الذي اثارك واخرج لنا فهمك بكل وضوح ومن غير تورية في مسالة الاستفتاء وتقرير المصير للاخوا الجنوبيون ووجدناك تحمل هم تقسيم الوطن
ثالثا نختلف معك في عدم تطرقك لهذة المشاكل لانها انتهت وحسم امرها وهذا هو عين اليأس ولكن نامل ان تناضل بقلمك لكي يكون السودان واحد موحد ويحفظ لك التاريخ موقفك بانك كنت مدافع عن وحد السودان


#49327 [موتور]
0.00/5 (0 صوت)

11-24-2010 01:54 PM
عوووووك اتاريك فوق رأى يا سلا م على مثل هذه المواقف الوطنية ما تقول كده ياخى من زمان كان مسحنا صورة صاحبك الامنجى فهنالك مصادفات عن مواضيع يخبرنا بها قبل النشر وتاتى كما يقول بذات اعرض واسماء ذات دلالة عموما تحيا مثل هذه الاراء الجريئة ( لا لسلطة ولا للمال )


#49318 [ابوعلا]
0.00/5 (0 صوت)

11-24-2010 01:42 PM
تعرف يا استاذ جبرا زمان كنا بندرس فى العربى ادب التوريه والبلاغة وغيرها من ضروب اللغة العربية وما تكتبه انت انا وغيرى نبحث عنه فى اضابير الصحافة حتى نجده ليكون اول ما تبدا به يومك لانه من الصاحة بمكان اولا امر سياسى مهم فى قالب كوميدى يعنى تضحك وتنبسط وتفش غلك من القاعد يحصل فى السودان ولذلك جايز الاخ ما قدر يفهم ما ترنو اليه لانو احيانا بعض الكتابات تستعصى على القوم الذين لهم فى غربة الصقيع سنين عددا ولكن اقول لك لو كتاباتك هذه والله الواحد كان اتفقع . فالى الامام ونرجو ان تتحفنا بالجديد فى ما يحدث من امور تهم المواطن لانو الحكومة لا يهمها الا نفسها .
دمت اخينا جبرا وربنا يطول لينا فى عمرك وان شاء الله الواحد لو جاء السودان اول حاجة افكر فيها هى مقابلتك شخصيا بس اوعى تنفصل انت كمان وما نلم الا فى نصف ما تكتب . ولك كل الود

اخوك
د. ابوعلا


#49303 [محمد أحمد]
0.00/5 (0 صوت)

11-24-2010 01:14 PM
يا أستاذ مبارك فلاديلفيا: هم الناس الكتبوا عن موضوع الإنفصال شوية؟ كل الجرايد ماعندها موضوع غيرو ..بالله خلينا مع كتابات الأستاذ جبرا التي تجعل من فسيخ المعاناة شربات


#49300 [واحدة من الناس]
0.00/5 (0 صوت)

11-24-2010 01:13 PM
لك التحية استاذنا الرائع جبرا
الحقيقة ان ما نحس به الان ينطبق عليه المثل السوداني كتلوك ولا جوك جوك فقد سئمنا من التوقعات والتحليلات السياسية التي تظن انها تتنبأبما هو فعلا آت
كلنا نعلم ان القادم أسواء حتي لو عاش الشمال في سلام فسيكون حالنا كالمريض الذي تعافي بعد أن بترت أحدي ساقيه تعصرة غصة الالم علي ساقه المبتورة وعندها لن تنفع الدموع;( ;( ;(


#49284 [بت الخرطوم]
0.00/5 (0 صوت)

11-24-2010 12:57 PM
عفيت منك ياود جبرا وخليك معانا نحن فاهمينك وعارفين كل رسالة موجهة لمنو والغرض منها شنو واصل مقالاتك والناس الخارج الشبكة ماتهتم بتعليقاتهم اصلهم معذورين بلاد الغربة نستهم لغتنا;) ;) ;) ;) ;)


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة