من أول وجديد
05-01-2013 10:40 AM


بين الفينة والأخري يطالع المواطنون كشفاً بـ(تنقلات السادة الوزراء) ، لابد أن متخذى القرار ينفقون الكثير من الوقت والجهد ليقوموا بوضع (التوليفه) النهائية لهذه (التنقلات) التى دأبت الحكومة على إجرائها بين الحين والآخر ، ولان (العبدلله) مقتنع تماما إنو المسألة ما (محتاجة) و(مش بدها) كما يقول إخواننا (الشوام) فقد تفتق ذهنه عن إقتراح بسيط يعفي أولى الأمر عن مسألة الجهد دى ويقوم بحسم المسألة بدون أى (تعب) أو إهدار وقت يحتاج إليه (الوطن) من أجل بلوغ ذرى المجد والعلا !!
والإقتراح وما فيهو هو ان تضع (الحكومة) جدولاً دائرياً (سنويا) على مدى (الثلاثين سنة القادمة) يتم بموجبه (تنقل) الوزراء فيه (أتوماتيكياً) يعنى وزير (الزراعه) السنة الجايه يمشى وزير (داخليه) والسنة اللى بعدها وزير (خارجية) واللى بعدها وزير ( ثقافة) وهكذا على أن يذهب وزير (الثقافة) إلى (الخارجية) والسنة اللى بعديها وزير (داخلية) واللى بعديها وزير (إعلام) وهكذا .. ولا غبار أن يرتاح الوزير بعد تنقله عبر كل (تلاته وزارات) وياخد ليهو (إستراحة محارب) إسبوعين تلاته يرتاح فيها من (وعثاء السفر) و (طراوة المنظر) ، ولا شك أن وضع هذا (البرنامج الأتوماتيكى) له من الفوائد التى تجنيها الدولة والمواطن على حد سوا الكثير على الأقل فإن الوزير الفلانى ح يكون عارف روحو (فى السنة الفلانية) ح يكون وزير شنو!! وعلاوة على عدم إهدار الوقت فى التشاور و(التناصح) والتحنيس واللازم منو وإصدار المراسيم عند كل تعديل ففى هذا البرنامج يتم إصدار (مرسوم واحد) فى بداية البرنامج يحدد لكل وزير (جدول بإسم الوزارة التى سوف يعتليها فى بداية كل عام خلال الثلاثين سنة القادمة)
ومن إيجابيات هذا البرنامج أنه سوف يتيح (للوزراء الأماجد) التنقل بين كل بقاع الدنيا والأخذ من تجاربها مما سوف يكون له بالغ الأثر فى إثراء تجربتهم فالمسئول عن وزارة (الصناعة) لابد أنه سوف يقوم بزيارة البلاد الصناعية كاليابان والصين وسينغافورة ولكن بعد توليه فى العام التالى لزمام وزارة الطاقه فسوف يشمل جدول زياراته أمريكا وكندا وفنزويلا وكافة الدول المصدرة للبترول أما عند تقلده (للحج والأوقاف) فهو بلا شك إلى (البيت الحرام) سائراً وبإسرته معتمر !!
ولعل من أبرز فوائد هذا التنقل الأوتوماتيكى هو قلة الأخطاء التى يرتكبها الوزير وهو يضطلع بمهام الوزارة المعنية (فى سنة واحدة) إذ انها بلا شك سوف تكون أقل كثيرا ما إذا كان وزيراً لتلك الوزارة لأعوام طويلة ..
يعنى كل وزير ممكن (يجلط) جلطه جلطتين تلاته فى السنة ومفيش حد يحس بيهم لحدت ما يروح يمسك الوزارة التانية !!
ومن أبرز فوائد ومميزات هذا البرنامج الأتوماتيكى لتنقل السادة الوزراء هو إتاحة الفرصة كاملة لمعرفة فى أى وزارة يجد السيد الوزير نفسو ... فالوزير بلا شك (بشر) .. والبشر لديهم ميول ومواهب ومقدرات لا يمكن التعرف عليها إلا عن طريق (الممارسة) الشئ الذى يقوم به هذا البرنامج (الأتوماتيكى) فبعد أن يقوم (السيد الوزير) باللف على جميع الوزارات (التلاتين) يمكن أن يحدد (لقى نفسو فى ياتو وزارة) ويقول :
- بس خلاص ... انا لقيت نفسى فى (المالية) دى !!
ولأن إنتقال الوزير (لدينا) يواكبة إنتقال لكل (الطاقم المساعد) لديه إبتداء من (السائقين) مروراً (بالسكرتارية) وإنتهاء بمدراء المكاتب فإن هذا البرنامج الأتوماتيكى من شأنه إنعاش سوق (الأثاث) فسكرتارية وزير (الخارجية) ستعمل فوراً على تغيير ألوان مكتب (سكرتارية وزير النقل) فور إنتقالها إليه لأن (أثاث النقل) ياعينى إندونيسى بينما هى تموت فى (الإيطالى)
بعد أن تكتمل دورة البرنامج بعد (تلاتين سنة) هى عدد الوزارات التى قام الوزراء باللف عليها يتم إصدار قرار بجعل ذلك اليوم (عطلة رسمية) تسمى عطلة إنتهاء (البرنامج الأتـوماتيكى لتنقلات الوزراء) ويقام على شرف ذلك احتفال ضخم يتم فيها تكريم الوزراء على أنجازاتهم إبان توليهم لتلك الوزارات ومنح كل وزير (تلاتين) نجمة ( إنجاز) هى عدد الوزارات التى تولاها إبان برنامج التنقلات الأتوماتيكى .... ثم يعلن فى نهاية الحفل عن بداية (الدورة التانية من البرنامج) .............. تاااانى من أول وجديد
كسرة :
هذا المقال تم نشره قبل خمس سنوات نعيده اليوم بمناسبة الأصوات التي تنادي بإقالة وزير الدفاع عقب الأحداث الأخيرة وليست (الجلطات) السابقة!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)؟


[email protected]


تعليقات 34 | إهداء 1 | زيارات 7492

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#653685 [GREEN VALLY]
1.32/5 (5 صوت)

05-02-2013 11:33 AM
الله يخزي شيطانك يا أستاذنا جبرا (قول آمين).. إنت قايل الجماعة ديل بيفهموا قصدك من الكلام دا .. والله لو فهمو جنس الكلام دا ما في واحد منهم نلقاهو على كرسي الوزارة..
بالمناسبة إنت ما تمشي ليهم يعينوك بحكم خبرتك : وزير التنقلات الوزارية.. بشرط تسافر مع أي وزير مسافر.


#653344 [2]
0.00/5 (0 صوت)

05-02-2013 01:19 AM
طبعاقبل ماالثلاثين سنة تنتهي , الجماعة حيطالبوا بالتوريث


#653303 [بت حبوبتها]
5.00/5 (2 صوت)

05-01-2013 11:54 PM
أنا ما عارفة ليه الناس منزعجة من عدم استقالة وزير الدفاع "الحارس مالنا ودمنا !!" بعد الأحداث الأخيرة ! لو استقال ألف مرة واعتذر للشعب مليون مرة, ماحيتغير شئ لأنه هو واحد ضمن عصابة المجرمين,,,أماالوزراء البنسمع باستقالاتهم في العالم المتحضر, بيكون واحد أخطأ/أجرم ضمن وزراء محترمين, فيستقيل ليحفظ ماء وجهه...شفتوا الفرق !


ردود على بت حبوبتها
[منطق] 05-02-2013 03:32 PM
والله كلامك صاح ميه الميه لكن نسيتي انو المجرم ده هم البفتشو ليه علشان ينفذ البرنامج بحذافيرو. والله المستعان


#653220 [المتفائلة جدا]
0.00/5 (0 صوت)

05-01-2013 09:15 PM
تلاتين سنة ياأستاذ جبرة؟ تلاتين سنة وين؟؟ الله لاقعدهم أكتر من كدة الله يكضب الشينةوأنشاء الله ينكشحوا فى باقى السنة دى قول آمين


#653167 [Fato]
0.00/5 (0 صوت)

05-01-2013 07:02 PM
تطير عيشتنا ياجبرة يعنى مقعدهم 30 سنة وكمان مطبوقة بأخرى وأنت وأنا وبقية الشعب نبقى سماد ولا بترول واولاد أولادنا يدعو علينا عشان ماشلنا العفن ده.جبرة والله سخريتك حلوة وأهو تدينا حبات ضحكات فى زمن عز فيه الضحك.متعك الله بالصحة والعافية.


#653130 [radona]
0.00/5 (0 صوت)

05-01-2013 06:27 PM
بموجب ما كتب الاستاذ الفاتح جبرة وهي حقيقة الامر
فان اكثر واحد حيكون مروق وزير السياحة لانه سيزور بلاد سياحية كتيرة حول نقل تجربتها للسودان
انت يااستاذ جبرا الناس ديل ما بينظروا حولهم وما بستفيدوا من الدول البزوروها دي حاجة ياكافي البلاء ... هسع قبل يومين قريت والي الخرطوم في جنوب افريقيا عشان التمويل الاصغر والنافذه الموحده للجبايات والمكوس واظنه ما شي لدولة تانية اظنها المرة دي عشان النظافة .. عليه افيدك بانني بدون ما ازور ولا دولة عندي رنامج طموح لمسألة النظافة دي بالذات .. لكن الجماعة ديل ما بدخلوا غريب ولعبة الكراسي دي مدورة .


#653107 [altahir]
0.00/5 (0 صوت)

05-01-2013 06:10 PM
كل سنة نغير اللافتات وخلي الجماعة قاعدين في محلهم نريحهم من تلتلت الفارات ولا رايك شنو يا جبرا؟


#653106 [wedhamid]
0.00/5 (0 صوت)

05-01-2013 06:10 PM
يا أستاذ جبره .. سؤال .... عوض الجاز دا عمرو كم سنه الآن ؟؟؟؟ و بمقترحك دا بعد عشره سنوات تانى حيدق فى الميّه!!! أها يحلّوها كيف ؟؟؟


ردود على wedhamid
Sudan [ابسلوكة] 05-02-2013 07:36 PM
احلها ليك انا يا ودحميدالناس ديل ماملكو اي حاجة حتى عمرم ملكوة عشان كدا لاستاز جبرة ما غلطان ودا طبعا من الوهم الفيةهم


#653011 [altahir]
5.00/5 (1 صوت)

05-01-2013 04:39 PM
طيب يا استاذ جبرا نحن ما نقوم نخلي كل وزير في محله وكل سنة نغير ليه اللافتة علشان نريحه من البحث عن الإلفة للموقع الجديد...


#652954 [مواطن إفريقي]
0.00/5 (0 صوت)

05-01-2013 03:42 PM
الله يجازي محنك يات جبرة ده كل كان مخبي وين


#652919 [محمد]
0.00/5 (0 صوت)

05-01-2013 03:10 PM
الاستاذ الفاتح جبره ما اسهل ان تفجر طاقاتك في التهكم والسخريه مما يقوم به رجالات السودان في الحقب السابقه والحاليه وان كرهتم (الانقاذيون ) وان وٌضعت انت مكانهم لما راينا حتى الذى تسخر منه انت الان وغالبا ستكون مثلهم ان لم تكن اسواء منهم . افيدونا مما تكتبون حتى ينصلح حال البلد بهم او بغيرهم لا بالسخريه التى لا ترسخ في اذهان من يقراء بعد 10 دقائق من قراءته لا نه يضحك ولا يفيد. وقد تعتقد بان الحل يكمن في ابداء الراى السخريه ولكن لا ارى في مقالاتك حلولا يمكن ان يعتمد عليها احترم سنك ونفسك . ولمن ياتون مدافعون الرجل ادرى وقادر على الدفاع عن نفسه ....


ردود على محمد
Russian Federation [Malcom X] 05-02-2013 01:31 AM
الله يخيبك يا محمد ( سلامة الاسم ) عاجبك لعبة الكراسي البيلعبوها اسيادك ديل ؟ طوال 24 عام ..

و كمان عاوز حلول ؟ الحل في الحل و يتركونا محل ما لقونا في 89

Russian Federation [ودالحاجة] 05-02-2013 12:14 AM
هسه شغلانيتك دي راجل بيشتغلها ؟ وبعدين لمن تتكلم عن الاستاذ تتكلم بإحترام مفهوم يا حثالة لانه اكتر زول محترم في البلد الما عنددها وجيع دي .. وصنفك ده الاستاذ ما بيرد عليهو بنرد عليك نحنا الصعاليك ديل يا كديانه يا غبيانه.. قال ايه .. لاأرى في مقالاتك حلولاً .. الله يحلحل ك. ..ك

Russian Federation [abo feras] 05-01-2013 11:55 PM
ومن ادراك امكن يكون احسن لكن المتشاثيمين زيك وما بتكلمو نهاي احسن يسكتو يا ****


#652902 [mansour]
5.00/5 (1 صوت)

05-01-2013 02:58 PM
لكن ماوريتنا مصير الزوجات في هذه اللفه ومصير الارامل وخاصه التي يتوفي زوجها اثناء هذه اللفه ويكون من حقوا وزاره الماليه اوالطاقه او التعدين


#652865 [نبيل أبو نادن]
0.00/5 (0 صوت)

05-01-2013 02:30 PM
هي في الحقيقة لعبة كراسي فريدة من نوعها .. لأن الذين يلعبون هم نفس الأشخاص و نفس العدد .. و الغريبة في هذه اللعبة أن الكراسي على قدر عددهم .. بس اللعبة حا تكون في منو يقعد جنب منو .. و منو شمال أو يمين منو .. لكن في النهاية كلهم قاعدين قاعدين .. وممكن الكراسي تزيد .. و الأشخاص يزيدوا .. وتتسع دائرة اللعبة .. ولكن من المستحيل أن تنقص الكراسي .. أو تكون أقل من عدد اللاعبين .. ولو بكرسيي واحد .. ألم اقل لكم انها لعبة كراسي فريدة من نوعها !!!


#652849 [الغريب عن وطنو]
0.00/5 (0 صوت)

05-01-2013 02:25 PM
- بس خلاص ... انا لقيت نفسى فى (المالية) دى !!
ههههههههه قطعت مصاريني بالضحك يا أستاذ ..
المقال ده ضارب ليه شنو يا معلم؟ بالغت فيه عديييييييل كده..
ربنا يمتعك بالصحة والعافية ويطول لينا في عمرك يا جبرا ..


#652848 [سامر المدنى]
0.00/5 (0 صوت)

05-01-2013 02:25 PM
هذا المقال تم نشره قبل خمس سنوات نعيده اليوم بمناسبة الأصوات التي تنادي بإقالة وزير الدفاع عقب الأحداث الأخيرة وليست (الجلطات) السابقة!


وكمان سيعاد نشره بعد خمسة سنوات تانية بعد ضياع دارفور وانفصالها وخروج اهلنا الطيبين مطالبين باقالة وزير الدفاع (وزير بتاع مراقبة بالعين المجردة ) وتكرار جلطاته..
كسرة : هو وزيرده بيجيب ريالة بتاعو ده من وين ؟ مابيكمل ريالة بتاعو ده ؟


#652840 [الاصم]
5.00/5 (1 صوت)

05-01-2013 02:19 PM
والله الحكاية صعبت علينا من كثرة طلة الوزراء الهبنقات ديل واقتراحك اريحنا لحد ما ياتى يوم الخلاص ونرتاح من الغول الجاسم على صدورنا .................. اللهم فك اسرنا ودمر الكيزان عاجلاغير اجل اللهم شتت شملهم ............ اللهم جرجرهم .............. آآآآآآآآآآآآآآآميييييييييييييييين


#652826 [سيد البشير]
0.00/5 (0 صوت)

05-01-2013 02:05 PM
مقترح جيد .. لكم المشكلة ح تكون في التطبيق .. يعني لو في وزير عجبتو وزارة معينة(البترول مثلا) .. وعنقد وحلف طلاق ما يتنقل منها.. معناها البرنامج اللأتوماتيكي ح يجوط وح يكون (يدوى) تاني .. أها يحلوها كيف !!


#652798 [bustawi]
0.00/5 (0 صوت)

05-01-2013 01:39 PM
من الملاحظ في النظم الدكتاتورية الشمولية مثل الانقاذ انها بفضل الله تحمل عوامل فنائها في داخلها ، بمعنى انها تحتفظ بجميع الوجوه منذبدء النظام وحتى سقوطه ، حيث لا يتم اي تحديث لهيكلة النظام مما يعني بقاءه ببقاء الاشخاص والامثلة كثيرة ، نظام صدام ، نظام القذافي ، نظام مبارك ، نظام الاسد ، كلها احتفظت بنفس الوجوه حتى النهاية ، يعنى باذن الله كلهم حيسقطوا مع البشير الى جهنم وبئس المصير.


#652797 [على كرار]
0.00/5 (0 صوت)

05-01-2013 01:38 PM
يا خوى يا جبرا مالك علينا, تانى تلاتين سنة, و أرجو منك تعمل مؤتمر صحفى تقول فيهو إنك بتهظر بى كلامك ده لأن الجماعة المكنكشين بالكراسى ياخدوها جد و يقولوا أهو واحد كاتب محترم إقترح لينا البرنامج ده و العنده أى إعتراض يجى يقابلنا بعد تلاتين سنة.


#652796 [كبشور]
0.00/5 (0 صوت)

05-01-2013 01:37 PM
بعد الثلاثون هذة يكون كل وزير عرف نفس اي وزارة تصلح لة ثم يستمر ثلاثون اخرى مش كدة يا جبرة


#652787 [um ahmed]
0.00/5 (0 صوت)

05-01-2013 01:29 PM
فقرة عند تقلده للحج والاوقاف فهو بلا شك الى البيت الحرام سائرا وباسرته معتمر دى احلى نقطه فى المقال .غايتو حجا وعمره بالشكل دا مشكوك فى امرهم


#652775 [محمد احمد]
0.00/5 (0 صوت)

05-01-2013 01:14 PM
البرنامج ناقص من البداية لانو ما اشتمل علي السقوط الي القبر وكيفية ملئ الفراغ الناجم عن الهبوط الي حفرة القبر، وللا ما في احتمال خلال تلاتين سنة واحد فيهم ما يغادر المغادرة النهائية
ارجو ان تسد الثغرات في البرنامج الاتوماتيكي حتى نتمكن من التعليق بصورة علمية
،،،، كسرة ثابتة شنو الحصل في موضوع البت بتعت رسوم النفايات ومحكمة النفايات الانت متهم فيها عووووووووووووووك ورونا الحصل شنو وللا غتوه ببطانية؟؟؟؟؟


#652759 [مهاجر]
1.00/5 (1 صوت)

05-01-2013 12:59 PM
تاااانى من أول وجديد رجعنا لحكاية الجهاد وزاد المجاهد وأعراس الشهداء! أول أمس شاهدت في التلفزيون واحد من ناس الحكومة قال : عربة الجبهة الثورية التي ضربت الخلوة فى أبو كرشولا قام منها وفيها لقم فجرها هي زاتها ..أبو الزفت !!! لكن والله ....الله بسألني ما سمعته قال القرود حاربت معانا!!!!!!!


#652743 [د.على محمد احمد الفضل]
0.00/5 (0 صوت)

05-01-2013 12:43 PM
المهم الدولة تلتزم بالبرنامج مش بكره يغير بي واحد تاني لانو مافي حبر اوايصال15 وهي سوداناير ملتزمه بالمواعيد وهى ذت في


#652694 [رواب]
0.00/5 (0 صوت)

05-01-2013 12:13 PM
قدرنا ان نظل فئران تجارب خلال السنوات الخمس من مقالك ..و لم يتعلموا@ والسؤال هل نضمن الخلود لهذه الدائرة العنكبوتية لربع قرن قادم لاتمام الثلاثون دورة ؟؟ الله يكضب الشينة و يبدلنا بخير منهم


#652679 [سراج الدين]
0.00/5 (0 صوت)

05-01-2013 12:03 PM
البرنامج الاتوماتيكى حقك دا ناقصو حاجة . وين الاحزاب . انا بقترح يتعمل برنامج اوتامتيكى للاحزاب فى سدة الحكم والفترة تبقى اربعين سنة ونقسم السودان لاربع احزاب.طائفية/حركات مسلحة/اسلامية/متأسلمين وكل حزب نديهو عشرة سنة . والحزب الحاكم ينفذ البرنامج الاتوماتيكى بتاع الوزراء فى عشرة سنة وبعداربعين سنة نطلع منهم حكومة وحدة وطنية بمشاركة الاحزاب الاربعة ونكون ارتحنا اول حاجة من الصرف على الانتخابات


#652677 [سودانية]
0.00/5 (0 صوت)

05-01-2013 12:01 PM
ولو نارا نفخت بها اضاءت ولكنك تنفخ فى رمااااااد



خلاص بطل نفخ عشان الرماد ما يعميك وتجيك لوز من كترة النفخ


#652676 [أبوالكجص]
0.00/5 (0 صوت)

05-01-2013 11:59 AM
يا جبرا إنت دائماً تفتح لي ناس الحكومة ديل آفاق ولن نستبعد أن تلفق معاهم هذه الفكرة الجهنمية ويطبقوها.


#652655 [hafiz]
0.00/5 (0 صوت)

05-01-2013 11:44 AM
حايرجع وزير للداخلية حسب البرنامج الأوتوميكى !! وانت الصادق يا أخوى الفاتح ..
ولا توجد وظائف شاغرة فى القصر الآن وذلك وفقا للبرنامج الأوتوتاتيكى ...!!


#652649 [احمد ابونصر الشمالي]
0.00/5 (0 صوت)

05-01-2013 11:37 AM
طيب يا استاذ لو واحد واتنين قول عشرة اطناشر من السادة الوزرة ديل ماتو نعمل ايه نجيب وزراة من وين .. اِنت اورنيك 15 بتاع ناس النفايات اخباره شنو


#652600 [سعيد شاهين]
2.00/5 (2 صوت)

05-01-2013 11:06 AM
بس يا سى الفاتح سعالات وكده
عامن اول
وزراء الدوله وضعهم (ككيف) فى الدورانيه بتاعتك دى
وسعالا تانى
انتا الشى دا ما فيه احتياطى لزوم بدل فاقد والذى منه
ومسعلا اخيره البيوت ذات نفسها خاشه فى الدويره لانو طبعا (المدامات) يغيروا شويه
قبال ما يغيروهم وكمان عشان يكتسبوا خبره اجتماعيه وكده وكده كده يا هثرو
اها اسا فى داعى لسيرة البحر دى
مع تحياتى


#652594 [friend]
0.00/5 (0 صوت)

05-01-2013 11:03 AM
تسمي هذه اللعبة بالكراسي الموسيقية


#652579 [Petro]
0.00/5 (0 صوت)

05-01-2013 10:54 AM
يا ريت برنامجك دة يكون فيهو حق الاختيار لسادة الوزراء من البداية طبعا ولو الناس كلها اتكبت في المالية والبترول والتعدين يقوموا يعملوا قرعة


#652577 [المقهور]
1.00/5 (1 صوت)

05-01-2013 10:53 AM
وزير الدفاع أبو خشيمن عريض ده - زي أبو الهول - أحتلو هجليج - ضربو أم روابه - ضربو كرشولا - برضو قااااعد ما عايز إستقيل - أصلها لعبة شطرنج لما يروح الملك كووووووولهم بروحو - وقريب بتم إصطياد الملك وبعده الوزراء والحاشية - خليهم يلبعو بينا كده ... لكنه يمهل ولا يهمل ....


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة