الشرطة وسياسة بسمارك
05-04-2013 10:33 AM

وصلنا هذا الرد من المكتب الصحفي للشرطة على مقالنا الذي كان بعنوان (حبر مافي)
السيد رئيس تحرير صحيفة الخرطوم
السلام عليكم ورحمة الله
بالإشارة لما ورد بصحيفتكم بتاريخ 29/4/2013م تحت عنوان (حبر مافي) للكاتب الفاتح جبرا (عمود ساخر سبيل) نوضخ الآتي:
• خلال شهر يناير من هذا العام واجهت الإدارة العامة للمرور نقصاً في معينات الترخيص والتي يتم توفيرها من الخارج تمت معالجة ذلك الامر بتوفير الأحبار حيث تم تسليم كافة المواطنين الذين تقدموا بمعاملات تتعلق بترخيص (وثائقهم)
- القوسين من عند الكاتب .
• كما تم التنسيق مع الشركة الموردة بتوفير معينات الترخيص لأنسياب إمدادات المرور بصورة مستمرة والآن الوضغ مستقر وتعمل كافة مراكز الترخيص بصورة طبيعية منذ يناير الماضي كما يعلم الجميع
• أما فيما يختص برسوم الملف فقد فرض هذا الملف وتحصيل قيمته بواسطة الولاية السياسية لصالح مشروع تأهيل سجلات الترخيص بمرور ولاية الخرطوم وقد تم إيقاف هذه الرسوم منذ شهر يناير 2013م
• لكم الشكر
المكتب الصحفي للشرطة

إنتهي رد (المكتب الصحفي للشرطة) والذي للأسف الشديد لم يجب على تساؤلاتنا التي وردت في المقال المشار وكأنما لسان حال هذا الرد يقول :
( المشكلة وين؟ واجهنا نقص في الحبر وقمنا جبناهو؟) وهذا بالطبع غير غريب على مؤسسات بلادنا والتي لا يمكن للمسؤولين فيها أن يعترفوا بأي خطأ أو تقصير يدفع ثمنه المواطن الذي لا حيلة له ولا قوة ، ما ذنبي كمواطن أن (أساسق) جيئة وذهابا لأكثر من مرة لمعرفة إن كان الحبر (قد وصل)؟ لماذا تتفاجأ إدارة شرطة المرور بنفاذ الحبر والمعلوم أن هنالك (نقطة زمنية آمنة) يتم فيها طلب الطلبية بحيث تصل المخازن بوقت كاف قبل نفاذ الكمية الموجوده !
مالي أنا كمواطن ومال الشركة التي تتعامل معها (الشرطة) إن تقاعست عن أداء عملها أو أهملت في توفير الحبر أو اي من معينات الطباعة؟ ولماذا أدفع من (جيبي) ومن وقتي ثمن (هذا الخطأ) والذي لم تعتذر عنه الشرطة في ردها هذا .. أما كان الأوجب أن تقوم الشرطة في ردها هذا بتقديم الإعتذار للمواطنين الغبش من أمثالي الذين (ساسقو) حتى (زهجو) لإستلام (رخصهم) مضحين بوقتهم وجهدهم ومالهم لخطأ لم يرتكبونه ؟
أوليس الواجب واللياقة تقول ان تاتينا (رخصنا) حتى اماكن سكننا الموجوده على الرخصة مع كلمتين إعتذار ؟؟ (دي في السودان واسعة شوية) !!
ويستمر رد المكتب الصحفي للشرطة ليؤكد بأن الملف (الإجباري) أبو عشرة ألف والذي لا يساوي ثمنه الف جنيه (والبدون إيصال) تقوم الولاية السياسية بتحصيل قيمته
لصالح مشروع تأهيل سجلات الترخيص بمرور ولاية الخرطوم وقد تم إيقافه منذ شهر يناير 2013م ،،
العبدلله ما عارف (الولاية السياسية دي منو) لكن عارف أن هذا الأمر مخالف تماماً للقانون من أكثر من ناحية أقلها عدم إجازته من الجهاز التشريعي ثم إن (إفترضنا أنه مال عام) فكيف تتم مراجعته أو حسابه (والقصة بدون إيصال) !! بعدين هي لو ما المسألة (هايصة ساكت) كيف يجبر المواطن إجباراً على دفع رسوم لشئ غير قانوني؟
وعلى شاكلة تلك الطرفة القديمة المتداولة التي تقول بأن احدهم في إمتحان الشهادة السودان زمان والذي كان يطلب في مادة التاريخ فيه كتابة مقال رئيس كان صاحبنا قد لعب (سياسة بسمارك الداخلية) راس .. لكنه عندما فتح الورقة فوجئ بأن السؤال المطلوب كان عن سياسة بسمارك الخارجية فما كان من صاحبنا إلا أن إبتدر مقاله قائلا (يجدر بنا قبل التحدث عن سياسة بسمارك الخارجية أن نتحدث قليلا عن سياسة (بسمارك الداخلية) وقام بدرش ما كان يحفظه !!
بنفس الطريقة فقد تحدث رد أخواننا في الشرطة عن موضوع الحبر رغم اننا ناشدناهم الحديث عن إيصالات تنقص القيمة المدونة فيها عما يدفعه المواطن وذلك في كل من السجل المدني (سنار) والجوازات (بحري) وذلك في كسرة المقال المشار إليه والتي كانت تقول :
نرجو من الأخ مدير عام الشرطة التعليق على هذا المقال .. وهل (الحبر جا) وللا (لسه) وبالمرة الرد على حكاية (سنار) و(بحري) دي والحصل فيهم شنو عشان نطمئن وكده؟
الظاهر الإخوة في الشرطة ما تموا المقال للآخر وكده (وما شافو الكسرة) .. لكن ما مشكلة نكرر السؤال تاااني .. هل لا زالت تلك المكاتب الشرطية التي أشرنا إليها تأخذ أكثر من قيمة الإيصال أم تم إيقاف (القصة دي) !!
كسرة :
الواحد مرات بيجيهو شعور إنو (ما من حقو يسأل) وكده !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)؟


تعليقات 21 | إهداء 0 | زيارات 6424

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#656931 [زول ساكت]
0.00/5 (0 صوت)

05-05-2013 06:43 PM
ده كلو كوم والرشاوى كوم تانى ؟؟؟؟؟؟؟؟؟؟؟؟؟؟؟؟؟؟


#655986 [wedhamid]
5.00/5 (1 صوت)

05-04-2013 10:51 PM
الأخ أستاذ جبره ..... ألف تحيّه....
أول هـم ...إنو منطق ذاك الذى رد على مقالتك ( المكتب الصحفي للشرطة) ينم على الغطرسة و المكابره و التعالى على ما يهم المواطن و التعمد على تجاهل كل ما يفيد بأنهم فى قطاع الشرطة فى خدمة الشعب ( تلك النكتة السخيفة كما كنا نتخيّلها ) ... و على كتمانهم للغيظ الشديد على تجرؤك و بدون وجه حق .... طرح مثل هذه الأمور الإجراميه التى يمارسونها علينا - كما نراها نحن _ و هى أمور أصيله و مستحقه لهم بحكم الهيمنه كما يرونها هم ...... فهذا هو منهج الإنقاذ الذى جاؤنا به ... فكل الأموال التى يهمبتونها من الشعب خلال المعاملات العاديه و المفروضه دون أى سند قانونى هو حق لهم - فهى رسوم و هى جبايات و هى مساهمات وهى ... و هى ,, الخ ... الخ... ( و قديما كانت إسمها الجزيه). ... و الما عاجبو يدق راسو بالحيط ... و تانى هـم يا صديقى ...و بعد ذهاب البترول و عائداتها الهاملة ( و التى ما رأينا منها التكتح ) ذهبت .... فمن أين ترى أنت أن تتنزل عليهم البركات (الأموال) كرزق يسوقها الله لهم ؟؟؟؟ فالرسوم و الجبايات دى هى البديل حسبما تزيّنها لهم عقولهم المريضه تلك .... و نموزج آخر لهذه الهمبته الممنهجه مثال ما حدث لى و للآلاف من المواطنين ... عندما فرضوا تحصيل فاتورة الماء عبر شباك تحصيل فاتورة المياه ...فرأوا تحصيل فاتورة للماء عن كل فاتورة كهرباء ..حين أن هناك العديد من المواطنين فى كل منزل عداد ماء واحد و لكن يمكن لنفس المنزل يكون عندو عداددين أو أكثر للكهرباء .... فالعباقره يتحصلون على كل عداد كهرباء فاتورة ماء ... و عندما كثرت الإحتجاجات تراجعوا من الموضوع و لكن بعد أن قمنا بسداد تلك الفواتير الزائده عدة أشهر .. و لما طالبنا بإسترداد ما تم تحصيله دون وجه حق أو إعتباره دفع مقدم للشهور التاليه..تعال شوف حركات التسويف و الإستهبال ... فهل يجوز أن يرسلونى لمنطقة أخرى لتسوية الأمر ؟؟؟؟ مثلا أمشى للمقرن للتسويه حين تحصلوا منى الفاتوره فى سوبا ؟؟؟؟؟ ليه ما يجروا التسويه فى نفس مكان التحصيل لو القصه ما همبته و مأكله يا ناس المويه و يا والى الخرطوم ... الذى ( لا يظلم عنده أحد ) على قولة طيّب الذكرعثمان ميرغنى ......


#655875 [Fato]
5.00/5 (1 صوت)

05-04-2013 07:38 PM
أخى جبرة تحياتى القلبية.خليك وراهم وراهم ونشف ريقهم زى ما نشفو ريق المواطن المسكين.والله الناس ديل ماينفع معاهم ألا الصحفى العكليت.


#655812 [محمد]
1.00/5 (1 صوت)

05-04-2013 06:02 PM
ما تزعل يا أستاذ جبر...
انت سألت سؤال ... معناهاانت فاهم السؤال
ودا نصف اإجابة... صاح؟؟
خلاص هم أدوك النص
بالتالي الاجابة بقت كاملة...


#655808 [محمد احمد]
0.00/5 (0 صوت)

05-04-2013 05:59 PM
طيب يا ود جبرا الجماعة قالو وقفنا التحصيل بتاع العشرة الف ، السؤال الناس الحصلو منهم رجعو ليهم ولا خلاص راح فشوش شمار في مرق
هذي زمانك يا مهازل فامرحي وخلينا نرقص


#655763 [بت ام الحسن]
0.00/5 (0 صوت)

05-04-2013 04:57 PM
الشرطة دى ماياها البتكتل المواطنين العزل امثال عوضية ود ام دوم الصغير وجاهل واااسواد امو واهلو فى ام دوم --والطلقة بتضربها فى الراس طوالى --يعنى قتل مع سبق الاصرار والترصد ---اعتذار ايه الانت جاى تقول عليه


#655684 [تائب]
1.00/5 (1 صوت)

05-04-2013 03:41 PM
واالله جزاهم الله الف خير أنهم ردوا ولو بكلمه؟
عشان الواحد يتخيل نفسوا في دوله ديمقراطيه تسأل الوزير يرد عليك
كم انت كبير يا جهاز الشرطه


#655663 [Amin]
0.00/5 (0 صوت)

05-04-2013 03:15 PM
البلد إتسرقت قبل 24 سنة



بقت على الأرزقية ديل


#655627 [على كرار]
5.00/5 (2 صوت)

05-04-2013 02:28 PM
يا خوى جبرا مع كل التقدير و ألإحترام,أحيانا بتدخل أنفك فى حاجات محرجة,أمال ناس الشرطة ديل يجيبو حق الزيت و الصلصة و اللحمة و البامية و الجرجير و العجور من وين, المرتب يادوب حق إيجار البيت و بعدين إنت ما شايف إنو مكتوب فى اللوحات الخلفية لمركبات الحكومة(ق م) يعنى قانون مافى و كده, و بعدين ما تناكف ناس الحكومة الأيامات دى,مشغولين تب هل الحلو مات أم جرحه بليغ, و بيضربوا عشوائى يا تصيب يا تجلى, و نحن ما دايرين نفقدك تقوم تصيبك واحده من ضربهم البيضربوه و الدنيا ضلام ما شايفين قدامهم.


#655612 [يحيي العدل]
0.00/5 (0 صوت)

05-04-2013 02:15 PM
جبرا أنت أفضل ( عكليتة) في السودان .
وأنا بصفتي هاوي العكاليت أرشحك لتكون ( العكليتة الأعظم )
و بدل ما نحتفل بالطفل الأعظم والكشاف الأعظم أحسن لينا جبرا العكليتة الأعظم


#655606 [ودهارون]
0.00/5 (0 صوت)

05-04-2013 02:08 PM
استاذنا الفاتح جبرة مقالاتك بقت كلها انتقادات عديل كدة بدون اي رتوش وساخر سبيل دي بقت ما في ليها داعي وما يكون ملف خط هيثرو خلاك تقلب بعد النجاح الحققو في لفت نظر المسئولين وتبقي لينا زي بخيت الشاف هلال رمضان وشكروه قال ليهم هداك ثاني واحد والله خايفين علي قلمك ما يكسروه0


#655589 [محمد سكر]
0.00/5 (0 صوت)

05-04-2013 01:51 PM
الاخ الدكتور متعك الله بالصحه والعافيه المثل بقول حاميها حرامبهاوهولائى فسادهم تشيب له الولدان وحكومه فاسده الى النخاع


#655542 [omar]
0.00/5 (0 صوت)

05-04-2013 01:08 PM
ههههههههههههههههههههه
ربنا يديك الصحة والعافية يا أستاذ


#655537 [بت حبوبتها]
4.88/5 (4 صوت)

05-04-2013 01:06 PM
ما فضل لرئاسة الشرطة إلا أن تذكر في بيانها المخجل أنها زمان كانت "في خدمة الشعب" وأسة هي "في خدمة النهب" عشان تاني ما نزعجهم بتساؤلات زي دي !!

المناصب أم دبابير زايلة والدنيا كلها زايلة وسبحان الحي الدائم, إنتبهوا يا قادة الشرطة قبل قوات الأوان !


#655522 [دقسة]
0.00/5 (0 صوت)

05-04-2013 12:56 PM
بتحلم يا أستاذ


#655513 [المندهش]
0.00/5 (0 صوت)

05-04-2013 12:48 PM
هههههههههههههه اعمل حسابك يا ود جبرة ناس قدوقدو ديل بختوها ليك ديل ناس جو الخدمة لانهم كيزان ساكت لا ندرج لا فهم لا راي وبعتبرو المواطن دا ملك يمين والما عاجبو زي ما قال نافع مرة لي مرة في التلفزيون شكت من عطالة ولدا قاليها ما يمرق برة البلد لو ما لاقي طريقة


#655492 [مغبون]
5.00/5 (2 صوت)

05-04-2013 12:25 PM
اليك هذه القصة
ذهبت انا وصديقي الي جوازات ام درمان سنه 2009 طلبو منا دفع رسوم الفايل في كشك داخل المبني يفتح في الشارع سالنا بعد دفعنا من الايصال .
انتو عايزين ايصال ؟ ايوه
خشوا الصاله بدوكم ليهو!!
خشينا الصالة
سالنا من شباك الايصالات
قال واحد: انتظرو هنا (لابس ملابس مدني)
مشي وجا معاهو واحد لابس زيو كده
قال: انتو بتوع الايصال(ايوه) تعالو معاي(حسيت بانو في شئ ما عادي القصة ما ايصال بس)
مشينا معاهو!
دخلنا غرفة مكتوب عليها(جمعية القران الكريم)
خشينا جوه لقينا زي ستة سبعة لابسين ملابس مدنية(طبعا لا ذكاء ولا حاجة بس فهمنا انو نحن مع جهاز الامن )
قال واحد: في شنو يا شباب
قلنا ليهو أبداً بس دفعنا فلوس بره وعايزين الايصال بتاع الحكومة؟
قال : انتو شغالين؟ لا
قريتو وين؟ جامعه .....
ايوااااااااا؟
مشكلتكم شنو ؟
عايزين إيصال للفايل ده!!!
مافي؟؟؟؟
صاحباي المعاي جاط فيهم؟
قامو بداوبالضرب والشتم؟
قلت انا اهدي الموقف : شوفو الراجل ده جاي معاي بس انا صاحب القصة وسيد الجواز لو في حاجة خلوها تكون معاي أنا!!!!
قالوا: نحن عايزينو هو.
اقعد تحت؟؟ انت اطلع بره؟ وشي دفر وشي ضرب؟
انت عامل راسك كبير..و...وزززز,,,,,,

اتخارجنا؟
النيابة طوالي فتحنا بلاغ؟
لقيناهم فتحوبلاغ قبلينا؟
المتحري قال: بلاغكم جاء متاخر وح يقولو انو مجرد بلاغ كيدي؟
ديل مش ح تجيبو منهم حاجة أنسو الموضوع؟
نسيناهو اجرائيا ولكن لن انساه ماحييت والقصاص قريب.


ردود على مغبون
Sudan [مجدي] 05-04-2013 04:36 PM
مغبوووووووون.......كلامك حاصل و انا شاهدت زيو كم مرة


#655464 [عباس بن عباس]
4.00/5 (2 صوت)

05-04-2013 12:01 PM
من حقك ان تسال لي بكرة......
لكن ما الفائده اذا ما حيجابوك او يدوك اجابه تخليك تكره اليوم السألته فيهو..ده لو ما كرهت اليوم الولدوك فيهو...

قال ايه عمنا عبعاطي...

غير أن مستشار وزارة الإعلام السودانية الدكتور ربيع عبد العاطي، قال لـ«الشرق الأوسط» إنه لا توجد رقابة أمنية بشكل ظاهر، وأضاف «معظم الصحف اليومية تنتقد الدولة والوزراء وكذلك الرئيس البشير، وليس هناك تطبيل للحكومة». وقال «أحيانا هناك مبالغة في النقد والبلاغات يتم فتحها من قبل الأفراد عند إشانة سمعة أحدهم بسبب نشر الكذب الضار وإشانة السمعة»، مشددا على أن الحرية الصحافية في بلاده تتحدث عن نفسها ونادرا ما يتم اعتقال صحافي بسبب نشره مقالا أو خبرا. وقال إن حكومته تتجه الدفع بقضايا النشر إلى المحاكم العادية، وتابع «لم أسمع بشكوى من الصحف أو اتحاد الصحافيين عن وجود رقابة قبلية يمارسها جهاز الأمن»، لكنه عاد وقال «إذا وجدت رقابة قبلية يكون سببها إجراءات احترازية لما يمكن أن يضر بسمعة شخص أو مصالح الدولة العليا حتى لا يسمح بانتهاك سمعة شخص ولا يقع الضرر».


#655458 [سامر المدنى]
5.00/5 (1 صوت)

05-04-2013 11:58 AM
وفيت وكفيت ياود جبره لكن بسمارك زاتو وبى كامل صفاتو مابيقدر يسايس الناس ديل .. غايتو ربك كريم وحقنا بنلقاهو قدام


#655429 [الردام]
5.00/5 (1 صوت)

05-04-2013 11:35 AM
والله يا استاذ جبرا
فقعت مرراتي عديييييل كدة
وده حالتي انا مواطن ساي زي زيك ،،
فما بالك بي ناس البوليس ،،
يكون حصل ليهو شنو ؟؟؟ .
لكن بيني بينك ،،
كلامك ده بالنسبة ليهم ولا بحرك ساكن ،،
لانهم من مديرهم لي غفيرهم ،،،
يا كافي البلا ،، لا عندهم دم ولا احساس ،،
والكويس فيهم داك ،، الما بلغف ،،
تلقى همو كلو ،، كيف يزيد الحافز ،،
وبدل الاستعداد ،، والمأمورية ،، وطبيعة عمل ،، وووو ...
وكلو من ضهرنا برضو ،، ربنا يقدرنا ان شاء الله ،،
ونوفر ليهم حياة كريمة ،،،


#655425 [خرخرة]
0.00/5 (0 صوت)

05-04-2013 11:32 AM
لايك


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة