رسوم دخول السوق
05-06-2013 12:12 PM



العبدلله له كتاب إسمه )جباية في حكاية) جمع فيه عدد مقدراً من الجبايات (المتخيلة) وكان لسان حاله عندما قام بكتابة تلك المقالات يقول ) والله ما فضل ليكم إلا تعملوا كده) .. والغريب في الأمر أنه وعلى الرغم من أن فكرة تلك الجبايات التي وردت في المقال تبدو خيالية وبعيدة التنفيذ (كرسوم عدم إقامة حفل) و (رسوم الهواء النقي) إلا أن بعضها قد نفذ مما جعل البعض يتهمني بموالاة الحكومة والعمل على تزويدها بتلك الأفكار العجيبة !
لكن يبدو أن (أمنا الحكومة) برضو ما ساهلة ولديها من الأفكار التي (تحلب) بواسطتها المواطنين حتى يستغيثوا .. هل سمعتم سادتي برسوم (دخول السوق) .. في كل بلاد الله الواسعة الشاسعة يدخل المواطنون إلى الأسواق ويخرجون منها (عادي) إلا في اسواقنا حيث يترتب على الداخلين إلى السوق المركزي الخرطوم والسوق المحلي دفع الرسوم التالية :
ركشة 10 ألف
أمجاد 15 الف
بوكس 30 ألف
دفار 50 ألف
لوري 60 ألف
ولا مجال لك (بالزوغان) فالمداخل (محروسة) وإن إستطعت الإفلات عند الدخول فلا مجال للإفلات عند الخروج إذ يقوم الجباة بسد المخارج يسألونك عن الإيصال .. والإيصال يا سادتي الأماجد بالطبع ليس (إيصال 15) الذي يذهب إلى خزينة الدولة بل هو إيصال تذهب قيمته لشركة تسمي (شركة الكندي) !!
الرسوم دي عبارة عن شنو؟ والمواطن بيستفيد منها شنو؟ والكندي ده منو؟ والشركة دي الاداها الحق (لو هو حق) منو؟ دي كوووولها اسئلة ليس للمواطن الحق في أن يسال عنها او يبحث عن إجابة لها .. فالمواطن (الغلبان) من المفترض ان تكون هنالك (حكومة) تحميه وترعي مصالحة وتمنع عنه (الأذي) إلا أن واقع الحال يقول أن المواطن قد أصبح ضحية (للحكومة) والمتنفذين فيها الذين أصبحوا يتفننون في فرض رسوم ما أنزل الله بها من سلطان وما رسوم دخول السوق إلا واحدة من هذه الرسوم .
هل يعلم السيد والي الخرطوم عن هذه الرسوم (رسوم دخول السوق) شيئاً؟ أم أن هذه الشركة تحتال المواطنين؟
بفرض ان السيد الوالي يعلم ما هو كنه هذه الرسوم السؤال : هل أجيزت من المجلس التشريعي؟
بفرض انها أجيزت من المجلس التشريعي السؤال : هل تم طرح الشركة المنفذه في عطاء فاز به هذا (الكندى) وللا جرت المسالة بالغمتى؟
بفرض انها طرحت في عطاء وفازت به (شركة الكندي) السؤال : كيف يتم التحقق حسابياً من إيرادات هذه الرسوم والإيصالات تخص الشركة؟
ربما لا يعلم المسئولون الذين يعيشون في أبراج عاجية وعربات فارهة مكندشة يحجب تظليلها الرؤية أن حياة المواطنين اصبحت جحيماً لا يطاق وأن سبل كسب العيش لديهم قد اصبحت (ما بتعمل حاجة) في ظل إرتفاع تكاليف الحياة فكيف بالله يستقيم أن تفرض رسوم على دخول الأسواق؟ وكيف بالله تعطي مهمة تحصيل هذا (المال العام) لشركة خاصة ؟ هل من (رجل) رشيد يفهمنا (الحاصل) فقد (كمل فهمنا) ونحن نتابع مثل هذه الأمور التي تجعل المواطن يحس بأنه من فصيلة الحيوانات الأليفة في بلد تهيمن عليها أسود مفترسة تفرض ما تفرض من أتاوات وتعطي من تعطي لتحصيلها لتزداد أعداد (الفلل) في قاردن سيتي والمعمورة وكافوري والمنشية وتقل أعداد المواطنين في أحياء أنقولا وكرتون كسلا ودارالسلام بفعل الموت جوعاً ومرضاً ومسغبة !!
السيد الوالي نحن في إنتظار ردكم على أسئلتنا الوارده في هذا المقال ونأمل ألا يكون الرد بطريقة (سياسة بسمارك) .
كسرة :
بينما كان يضغط على (جرس) الباب ليفتح له احد أبنائه تقدم منه شخص يضع على كتفه شنطة سوداء ويمسك بيده دفتراً وقلم :
- معليش يا حاج بس الرسوم
- رسوم شنو؟ النفايات دفعناها والعوائد كمان
- لا يا حاج دي رسوم جديدة
- كمان رسوم شنو يا ولدي؟
- دي (رسوم جرس الباب) !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)؟


[email protected]


تعليقات 47 | إهداء 1 | زيارات 7937

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#659778 [8855]
1.00/5 (1 صوت)

05-08-2013 11:13 AM
شكرا لك الاستاذ جبرا ولكن كما قال احد الاخوه هو اورنيك 15 زاتو البضمنو منوا ؟ وطبعا انت عارف انو الجماعه كيف ضالعين في حكاية التزوير دي وغايتو بس الله يحلنا من الجماعه ديل ويتخارجو ال غير ماسوف عليهم


#659729 [زول ساكت]
0.00/5 (0 صوت)

05-08-2013 10:48 AM
الله حيرونا معاهم ؟؟؟؟؟؟؟؟؟


#659292 [ibrahim saeed]
0.00/5 (0 صوت)

05-07-2013 11:40 PM
انا الحاجة البعرفه دعاء الدخول الي السوق عن رسول الله -صلى الله عليه وسلم- يقول: (من دخل السوق وقال: لا إله إلا الله وحده لا شريك له، له الملك وله الحمد، يحيي ويميت وهو حي لا يموت، بيده الخير وهو على كل شيء قدير).


#658994 [عبد الرحمن مبشر]
5.00/5 (1 صوت)

05-07-2013 05:18 PM
الأخ والكاتب الكبير الاستاذ الفاتح جبرا ، التحية والود الكبير لك وللهم الكبير الشايلو في راسك من أجل أبناء هذا الشعب الأصيل الذي يستحق أفضل من ذلك أولا جبر الله كسركم في خطا هيثرو وأرفعوا الفراش لانو القاتل ا انعرف. وثانياً طلب خاص جداً أرجو أن تدس أنفك في مدارس الموهوبين وتورينا الحاصل فيها شنو ولك الشكر والتقدير.


#658849 [الصابر]
5.00/5 (1 صوت)

05-07-2013 03:12 PM
لا تبكي إذا ضاع العدل وانهدرت الحقوق
بل ابكي إذا جاك إسهالوانت في السوق


#658836 [Mohd]
5.00/5 (1 صوت)

05-07-2013 03:03 PM
السؤال هل ايصال او اورنيك 15 غير قابل للتزوير؟

كم سمعنا وسمعنا بلصوص الضرائب والكهرباء والموية والنفايات يحملون دفترين والعساكر الحارسين الكباري والاسواق والكلام الفاضي دا كله شايلين دفترين دفتر حقه ودفتر حق الحكومة

اذا كان الرئيس نزيها ويريد محاربة الفساد عليه ان يخصص حسابات بنكية واي رسوم تسدد بالصراف الالي او في البنك في الحساب مباشرة الى وزارة المالية

وكدا حتجي سااااااااااقطة للحرامية الكبار الوزراء ناس الجاز والمتعافن واشكالهم ويخموووها يودودها ماليزيا

ان مسألة محاربة الفساد اصبحت مثل دعوة الشيطان الى دخول الاسلام

ومحاربة البشير للفساد دي من سابع المستحيلات والسبب انه اخوانه ونسابته كلهم فاسدين ولصوص واستغلاليين

هل سمعتم برئيس سجن اخوه او صهره؟

الحل انتفاضة شاملة ، بناء عشر سجون جديدة سعة 2000 نزيل وحراسات شبيهة ببيوت الاشباح


#658775 [المصحح الساقط]
5.00/5 (1 صوت)

05-07-2013 02:03 PM
لا يا استاذ جبرا. الكلام ده غلط منك! انت داير حكومة البني آدميين التي قبلت وتنازلت ان تحكم البهائم التي تسمي الشعب السوداني ان تكون منطقيةً معاهم كمان؟؟!! الحس كوعك بقي.
هذه الحكومة الرشيدة ما قصرت معانا يا اخي وشغالة في تصريف أمورنا مع العالم وبالتالي لا يجب ان تشاور احد.


#658593 [فارس الصياد]
5.00/5 (1 صوت)

05-07-2013 11:32 AM
الفاتح جبرا كل مرة تقول لينا ايصال 15 ايصال 15
هل تضمن لينا ان الرسوم المتحصلة بايصالات 15 بتخش خزينة الدولة
على حسب التسمية افتكر 15% بس منها تدخل الخزينة و15% من ما دخل الخزينة بينصرف على وجه حق بنسبة 15%


#658553 [A,M]
5.00/5 (1 صوت)

05-07-2013 10:58 AM
لامتين ولامتين .


#658476 [شكاك]
0.00/5 (0 صوت)

05-07-2013 09:42 AM
نحن راضين بالجماعة الظالمة دى
شان شاكين انو حيجوا احسن منهم
اهو نخليهم قاعدين ونبتبزهم
يعنى رسوم ابتزاز وكده


#658167 [ايكوسان النعسان]
3.00/5 (2 صوت)

05-06-2013 09:50 PM
اقترح الرسوم التالية:
1. رسوم اصطحاب زوجة:اذا اردت اصطحاب المدام و زيارة بعض الاهل و كدا... و لازم تكون معاك صورة من القسيمة في جيبك عشان ناس النظام العام ما يخمشوك برضو.
2. رسوم شراب شاي: و دي للجماعة البقعدوا عند ستات الشاي لانه الارض تابعة للحكومة و (دي زي خلو بنبر كدا) وحتكون نقاتطها الف الالف لكثرة الجالسين
3. رسوم حلو مر: و دي بتكون قريب رمضان كدا لانه عواسة الحلو مر بتعمل دخان و ريحة و لازم وزارة شئون البيئة تحمي الناس و كدا
4. رسوم تشجير: و دي لو داير تزرع ليك كم شجرة قدام البيت و دا ما عندو علاقة برسوم الموية و النفايات
5. رسوم بطانية: دي ساي بدون سبب
6. رسوم زيت: و دي برضك ساي بدون سبب
8. رسوم تربية حيوانات في المنازل: و دي لناس وزارة الصحة و وزارة الثروة الحيوانية لو داير تجيب ليك طيور زينة او اسماك او كم عنماية كدا و اذا اولادك بلداء في المدرسة حتظطر تدفع رسوم تربية حيوانات برضك.
9. رسوم دافوري: و دي لازم الشباب يدفعوها قبل بداية الدافوري و بعد نهايته و دي قريبة لرسوم شراب الشاي.
10. رسوم جكة: و دي للناس البحبو يجكو الصباح و يعملوا شوية رياضة لزوم اللياقة و كدا و دي ما مشكلة ممكن نقسطها ليك في المحلية حسب عدد الجكات في الاسبوع و مسافة الجكة.


ردود على ايكوسان النعسان
Saudi Arabia [ibrahim saeed] 05-07-2013 11:46 PM
الظهار عليك شغال في المحلية

United Kingdom [abubak] 05-07-2013 01:07 PM
رسوم التشجير دي اساسا موجودة ورسوم تربيه الحيوانات دي برضو في شكل تصاديق

Sudan [ود يعقوب] 05-07-2013 10:59 AM
نسيت يا اخونا

11- رسوم بكاء على الحال الاعوج دة

Sudan [ود يعقوب] 05-07-2013 10:58 AM
نسيت يا اخونا

11- رسوم بكاء على الحال الاعوج دة


#658126 [شرش]
0.00/5 (0 صوت)

05-06-2013 08:53 PM
انت الدخلك السوق شنو؟


#658121 [mohammad saad]
0.00/5 (0 صوت)

05-06-2013 08:46 PM
غايتو ما عارف لو كان الناس ديل حاكمين على ايام (ابو صليب) و (سعد قشرة) ولا مؤاخذة كان نس الكندي ديل اغتنو غنى عجيب


#658120 [كارثة]
0.00/5 (0 صوت)

05-06-2013 08:43 PM
اسع بتسمع رسوم معاشرة زوجية(طبعا جى بيرفضوها ناس دفع اللم ود حسبو لانو عندو اربعة وهو راجل كما ذكر بيعمل اكتر من دورين....)وياييد لغير المتزوجين...

فاتت عليك دى ياود ياتفتيحة

قال رسوم معاشرة زوجية قال


#658117 [كوكاب]
5.00/5 (2 صوت)

05-06-2013 08:41 PM
اكرمكم الله رسوم دخول الحمام دي نسيتها ولا فاتت عليك يعني لو شربت ليك كوز موية من بتاع الزير الفي شارع بمية جنيه لو انزنقتا بولندا وانت في السوق ومشيت الحمام لازم تدفع خمسمية جنيه عشان تفك الجزرة . واذا ضربتا ليك سندوتش طعمية بالف وانزنقت وداير تفور بتشديد الواو بنزي برضو لازم تدفع خمسمية جنية يعني بحسابات بسيطة وكدة مدخلات كوز موية زائد سندوتش الف ومية ومخرجات حمام خمسمية يعني نصف التكلفة تقريبا .


#658077 [Fato]
5.00/5 (1 صوت)

05-06-2013 07:27 PM
الأخ/ جبرة تحية وأحترام. لى سؤال الحكومة طفشت كل أنسان للمهاجر بسبب أفعالها هذه وأظنها ناوية تشرد العجزة والأطفال عشان يخلو ليهم السودان لهم فقط .طيب لوهاجرت بقية الناس الفضلت دى أها بحكموا منو وبفرضو أتاواتهم وقلعهم ده من منو؟ أرجو أن توجه هذه الأسئلة لوالى السجم والرماد ده ولأبوجاعورة الكبير.حسبى الله عليهم والله اليهود ماعماوا العملوه الكذابين بأسم الدين.


#658076 [شخلول]
5.00/5 (1 صوت)

05-06-2013 07:26 PM
هاههاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاههههه الفاتح جبرة انت راجل عسل


#658066 [ابو اسيل]
5.00/5 (1 صوت)

05-06-2013 07:10 PM
يا الفاتح جبرا عذبتنا برسومك دي كل يوم طالع بي رسوم جديد يا خي انت الوداك السوق شنو قروشك كتيرة ولاشنو كده اقعد في البيت شوف اليجيك منو غير طبعا بتاع النفيات والعوائد بس برضو بتدفع رسوم قعاد جنب المرة ؟؟؟؟؟؟؟؟؟؟؟؟؟؟؟؟؟؟؟؟؟


#657970 [نبيل أبو نادن]
5.00/5 (1 صوت)

05-06-2013 05:38 PM
و الله ما تستبعدها ياأخ جبرة .. توقع من هؤلاء القوم .. أي شئ .. وهذه ذكرتني بنكتة.. ( واحد سأل محشش .. الثعلب ببيض ولا بيولد ؟ أجابه المحشش : الثعالب دي مكّارة .. إتوقع منها أيّ شئ ) ..فتوقع ياجبرة .. رسوم على جرس الباب .. رسوم على أداء الصلوات في المساجد .. رسوم على ضرب بوري عربيتك .. رسوم على سماع الأغاني في عربيتك .. رسوم على ضرب بوهية لباب بيتك أو حيطة بيتك .. رسوم على الضحك والفرفشة .. ده لو كان في ضحك وفرفشة .. لأن النكد و القهر و العبوس و فوران الدم .. أصبحت هي الطابع العام للإنسان السوداني في هذا الزمن الأغبر .. توقع رسوم لا ولم ولن تخطر على بال أي سوداني في يوم ما .. لك الله يا سودان ..لك الله يا سودان .. لك الله يا سودان .


#657952 [تختخ]
5.00/5 (2 صوت)

05-06-2013 05:17 PM
بس إنت أقعد وريهم في الافكار دي عامل عمتك الكبيرة دي .إن شاء الله يجوك دايرين فيها رسوم


#657933 [حسن مصطفى]
0.00/5 (0 صوت)

05-06-2013 04:47 PM
عندنا صديقنا توفي ابنه الوحيد نسال الله ان يجعله لهم سلف و يعوضه الذرية الصالحة . ذهب للسفارة بالرياض علشان يشطب الولد من الجواز واحضر معه شهادة الوفاة فطلب منه الموظف سداد رسوم الالغاء فانفجر صديقي المكلوم من الغيظ و ذهب الى الضابط و قال له لا داعي لدفع الرسوم يعني مجانا


#657915 [sudani 100%]
0.00/5 (0 صوت)

05-06-2013 04:30 PM
يا سيد جبر
و الله انت ذى بتتكلم لغه غربيه.... انا دايرك بدل تطلب رد من السيد الوالى تطلب مكتب فى احدى المحليات لمده اسبوع و تشوف و تسمع كيف يفكرون هولاء العباقره و بعد داك انا متاكد لغتك ح تتغير
مثلا (سيدى المعتمد نحن عارفين الربط للسوق المحلى كبير جدا لكن شويه ارفعوا يدكم من ناس الركشات اصلهم عضمهم طرى و وراهم ايتام و مشاكل شيل من الركشات و خت على الجامبو).
دى اللغه المفهومه عند الحكومه لكن لغتك و الله بعد يقروا مقالك بيقولوا الاتى (جبر كان نايم من زمن عبود قام صح اليومين ديل نحن نجيب موارد زاتيه من وين نصرف على الحكومه من جيوبنا و لا كيف)


#657908 [الشحمان مغسة]
0.00/5 (0 صوت)

05-06-2013 04:24 PM
استاذنا الفاتح جبرا ... ياخي انت داير الحكومة تحميكم ببلاش شعب جاحد أقعد نكت لينا في البلاوي كده لمن حكومتنا الحنينة دي تفرض علينا رسوم خروج من السوق
كسرة على كسراتك : أخبار زيادة المرتبات الأعلنها الريس شنو و+و+و+و
كسرة في كسرة: مطار هيثرو وخطو راحو شمار في مرقة بعد البرنامج التلفزيزني
كسرة قديييييييييييمة خالص : الشحمان مغسة فرع القمردينة القديمة الكانت منورة ... لك التحية


#657880 [واحد محتار]
5.00/5 (2 صوت)

05-06-2013 03:35 PM
رسوم دخول السوق ... بدلا من دعاء دخول السوق .. لزوم توجه حضارى وكدة ....


ردود على واحد محتار
Saudi Arabia [ibrahim saeed] 05-07-2013 11:42 PM
انا عندي صاحبي عندو دكان بتاع فول ناس المحلية جابو ليهو رسوم قدرة فول 20 الف في الشهر


#657857 [مهاجر]
0.00/5 (0 صوت)

05-06-2013 03:11 PM
شوف يا أستاذ جبرة أساليب أكل أموال الناس بالباطل أضحت متعددة : بالأمس ذهبت مع صديقي لمكتب كهرباء مدينة الدبة لتقديم شكوى فحواها ( أن عداد الدفع المقدم في منزل صديقي أصبح ممسوحا وليس به كتابة ولا يتمكن صديقي من إنزال كهرباء في العداد حال نفادها ) لم يقم المسؤول بتسجيل البلاغ والسؤال عن رقم العداد ورقم المنزل وموقعه كما توقعنا .بل طلب من صديقي الإتصال على الرقم 4848 فى الخرطوم فقال له صديقي يا أخي أفرض أنا ما عندى تلفون وفى النهاية لو أتصلت سيتم تحويل الأمر إليك لتقوم باللازم ثم يا أخي أنا جيتك بكراعي تقول لى إتصل بالتلفون . رد الموظف بان شركة الكهرباء لها نصيب متفق عليه من قيمة اتصالك مع شركات الإتصالات . بالله يا أستاذ في تفنن في أكل أموال الناس بالباطل أكثر من كده.ودي ما يا ها ذاتها وقدرناه منازل ورسوم جرس الباب .نرجو من أي مسؤول في شركة الكهرباء التعليق على هذا الأمر .طبعا حتعلقوا يا ناس أسامة ها .هاه


ردود على مهاجر
United Kingdom [سن ألفيل] 05-06-2013 06:13 PM
الى الاخ مهاجر الموضوع وما فيه انك بالاتصال على الرقم 4848 سوف تقوم بدفع ضريبة صيانة العداد في شكل مكالمة هاتفية فلن تخسر شركة كهرباء اسامة بدفع صيانة العداد عليه يتم الاتفاق مع شركة الاتصالات بتحصيل قيمة الصيانة. وشكرا هكذا تذداد كروش وقروش الكيزان على حساب المواطن الضعيف


#657856 [محموم جدا]
5.00/5 (2 صوت)

05-06-2013 03:09 PM
تتبجح كأنك دافع رسوم كتابة هذا المقال؟ و لو داير تفهم لازم نلحس كوعك و حتى لو لحستو لازم تجيب الدليل على لحسك .. و الكسرة الثابتة مين وين جبته لك قروش توصلك لحدي السوق المركزي الخرطوم والسوق المحلي و داخل ليه؟ الاسواق دي للفرجه بس ما لي البيع و الشراء ... كسرة ثابتة (جديدة) :
العطاءات في أقفاص الاسود فقط؟؟


#657847 [سودانى منفرج الأسارير]
5.00/5 (2 صوت)

05-06-2013 03:00 PM
بالله يا ابن جبرا موش حقو يفرضوا عليك انت "بزات" (1) رسوم لبس نضاره (2) رسوم لف عمه على راسك (3)رسوم تنازل عن لبس العمه ان قررت التخلى عنها ..(4) الرسوم الوارده فى البند (3)تتضاعف بنسبة 50% فى حالة تحايلك لتغطية مساحة انحسار الشعر بلبس الطاقيه بس (5)رسوم فئه مضافه 75% الى رسوم البند (4) اذا ختيت العمه وهى مكويه مطبقه على كتفك (6) رسوم لبس جلابيه بيضاء ..(7) رسوم استهلاك طريق لأنك لابس جزمه!!! (8)لا بد من رسوم اضافيه يتم تقديرها عند توضيح اسباب اختيارك لأن يكون اسمك "فاتحا للجبرا دون الهندسه اوالحساب بانواعو مع اللوغاريزمات"..
واخيرا وليس آخرا: مواكبة للتطور والتاهيل وعشان ما تنسى لازم تعرف الحقيقه .. الحقيقه ان هناك مستجدات - حقيقة - قد تظهر ضروراتها لفرض المزيد من الرسوم كلما تفتقت عبقريتك واوحت الى اهل القيادة والرياده لتتنامى لديهم ألأسباب للأعتقاد ان مصفوفات مقترحاتك التوعويه المتواليه الموصوفه بالمهنيه تنداح اليهم بصورة غير مسبوقه كحزم معالجيه فى اطار تفعيل الدور الرقابى الذى يتوقع ان ينعكس ايجابا على توسيع مواعين التحصيل وألأسناد ألأستراتيجى كآلية وطنيه تمثل سياسة الدوله لتأمين احتياجاتها التنمويه.. تهليل .. تكبير .. الرسوم كوووولها هى لله.


#657823 [بدر النهار]
0.00/5 (0 صوت)

05-06-2013 02:38 PM
قول ياساتر شكلها رسوم جديدة أفكارك دي حتودينالسقط لقط


#657792 [زول]
0.00/5 (0 صوت)

05-06-2013 02:11 PM
مقال رائع.


#657788 [nazar]
0.00/5 (0 صوت)

05-06-2013 02:08 PM
آآآآآآآآآه


#657776 [Jedo]
0.00/5 (0 صوت)

05-06-2013 01:59 PM
عوفيت يارائع ياجبرا
بس بصراحة الاحياء الانت ذكرتها دي فيها عدد محدود من الكيزان يعني لايزيدو عن عشرة في المائة من سكان الحي ولو جيت لقاردن سيتي مافيهو كوز غير مأمون حميدة لكن فاتتك احياء زي المجاهدين وكافوري "وكافوري دي تحتها خطين" دي احياء ثمانين في المائة منها حكومة


#657772 [على كرار]
0.00/5 (0 صوت)

05-06-2013 01:57 PM
خوى جبرا تحية و إحترام,بتاع السوق ده ألأسمه الكندى تلقاه قريب واحد من إياهم من بعيد, سخنت بيه الحاله فى قريته,قام قال كدى نمشى لي قريبنا المسؤول الكبير بالخرطوم يمكن ربنا يفكها,و وصل لى قريبه و سأله أن يعينه و كيل وزارة و أجابه المسؤول الكبير والله الكيكه ما فضل فيها حاجة,كدى هاك القريشات دى و اعمل شركة خدمات و أمشى السوق أعمل ليك كشك تحصيل و بعدين نص بالنص و ما جيب سيرتى لأى مخلوق و بالزات ألأسمه جبرا لأنه شيال حال.


#657769 [عبدو الحانوتي]
0.00/5 (0 صوت)

05-06-2013 01:55 PM
بس ناقصانا رسوم الدفن بالمقابر ..


ردود على عبدو الحانوتي
[قريب حسبو] 05-06-2013 08:51 PM
لا دايرين رسوم معاشرة جنسية ...كل اول شهر تخصم من المرتب وما يرجعوها ليك الا بعد ماتحلف كمان او تجيب شهادة صحية او يحلفو الحاجة ...
يازول دى اخر مقترحات وزير (قالها بعد قراء كلام ود جبرة الشفت...)

ماقلنا ليكم ود جبرة دة بيوديكم فى ستين

Sweden [حاجة تجنن] 05-06-2013 07:09 PM
ناس منظمة حسن الخاتمة ديل بيعملوا فى شنو؟؟.. رسوم دفن للقبور الجاهزة ورسوم للبلوك ولبنة الطين وحتى الموية!!.. ولو جبت الحاجات دى كولها من بيتكم برضو تدفع صدقة الزامية..


#657759 [كمبال عيد الواحد]
5.00/5 (2 صوت)

05-06-2013 01:51 PM
نحن في الشدة بأس يتجلي
ومن هذا المنطلق نتقدم لوزير الماليه بحزمه من المعالجات الاسعافيه للاقتصاد الوطني

1_ادخال المقابر ضمن الخطه الاسكانيه و ذلك لارتفاع عدد الضحايا المضطرد يوميا.
2_فرض رسوم اضافيه علي حوادث القتل و ذلك نسبه لان (عدادها سريع ومربح).
3_انشاء وحدات تحصيل في المستشفيات و تحذير مستشفي الزيتونه من التجنيب.
4_اعفاء موتي التصريحات الحكوميه .
5_انشاء مواقع استثماريه و تحديد فئات( قبر ناصيه ) (قبر بفتح بفتح علي قبرين) و كدا.
6_مقابر فاخره بالنسبه للمغتربين و التقديم عن طريق السفاره وعمل خصم بالنسبه للذين فقدوا اراضيهم في الدنيا بالاحتيال الحكومي.
6_المسؤليين هم اكثر الفئات تضررا لانهم اثروا الموت في الجو عشان كدا فرصتهم ضعيفه


#657743 [NASRELDEEN ALI]
0.00/5 (0 صوت)

05-06-2013 01:38 PM
لا حول ولا قوة الاّ بالله

طيب افترض انى جيت سوق السجم ده وما لقيت الحاجة الجيت عشانها تكون الرسوم دى طارت على ساكت !!!!!!!


#657742 [شقى ومجنون]
0.00/5 (0 صوت)

05-06-2013 01:38 PM
ليس مستبعداً!!!!!


#657741 [lwlawa]
5.00/5 (1 صوت)

05-06-2013 01:37 PM
بلد العجب العجاب بلد كل شيء فيه يحير ..!!
بلد تريد ان تحفر ترعتي الوهد وكنانة بأبوراسين ..وتسير لها القوافل وتجمع الاتاوات بينما الواحد منهم يحفر مرحاض منزله ب (بوكلين )..؟؟
بلد تجمع رسوم الحرب والسلام معا ورسوم الحي والفطيس ..؟؟
ربما الآن يفكرون جديا في ايجاد وسيلة بالتعاون مع الصين وسيلة لتوزيع الهواء الطلق وكذلك صوء الشمس والقمر ..؟؟..وما ذلك عليهم ببعيد.؟؟


#657734 [المقهور]
0.00/5 (0 صوت)

05-06-2013 01:30 PM
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي
ههههههههههههههههههههههههههههههههههه هاي


#657733 [عز]
0.00/5 (0 صوت)

05-06-2013 01:29 PM
الاستاذ الفاتح جبرا ارجو البحث عن الشركة التى كانت تحتكر سوق العمل بعربات الدرداقات في اسواق ولاية الخرطوم ومن هم المالكين وكيف كانت حياتهم الاقتصادية قبل هذه الشركة وكيف اصبحوا بعد فترة وجيزة من احتكار العمل بعربات الدرداقات في اسواق محليات الخرطوم وما مدى الظلم الذي وقع على الصبية اللذين كانوا يعملون على هذه الدرداقات وماذا كانت تفعل المحليات لحماية هذه الشركة وكم كانت الشركة المحتكرة تدفع للمحليات مقابل هذه الخدمة- ستجد العجب ! الفترة في بداية 2000 وحتى .... الدرداقة عربة دفع صغيرة ذو ثلاثة ارجول انتشر العمل بها في اسواق الخرطوم في التسعينات بواسطة اطفال في اعمار مختلفة لكسب رزق اليوم.


#657730 [أسامة عباس]
0.00/5 (0 صوت)

05-06-2013 01:28 PM
ياجبرا أنت كتبت قبل كده تقول لو واو الكسرة الثابتة الجديدة ( كسرة الرئيس ) بقو 2 تبقى كارثة .. اها رأيك شنو بقو 2 وماشين على 3 ... ياأنتا بتنفخ فى قربة مقدودة ... يا السيد الرئيس توجيهاتو بقت زى عدما وأنا أرجح الثانية


#657716 [أشرف دهب أحمد]
5.00/5 (3 صوت)

05-06-2013 01:18 PM
الأستاذ الكبير، جبرا

أنا معك، و لا أظن أن أحدا يختلف مع ما طرحته هنا، و لكن إلى متى يكتفي الناس بالإستفهام و التعجب و التوجه للحكومة بالأسئلة؟

لماذا لا يفعل السودانيون ما تفعله شعوب العالم كلها، و هو الإحتجاج العنيف على هذه الجبايات؟

ألا يعلم الجميع عدم شرعيتها؟
ألا يعلم الجميع أين تذهب؟

بلا، الكل يعلم ذلك! و لكن الكل، أيضا، يمد يده و يدفع و هو (يطنطن) بدلا من الرفض التام و الدخول إلى السوق عنوة!! ماذا سيحدث لو دافع شخص أو أثنان عن حقهما في عدم الدفع، و تقدما بسيارتيهما داخل السوق رغم أنف المحصلين؟ هل سيحدث تشابك بالأيدي؟ فاليحدث!

إننا عندما لا نستطيع رد الظلم الواضح و البائن عن انفسنا، و ننصاع له بهذا الشكل، فاننا بالتأكيد لا نستحق الحياة الكريمة! كيف ندعي أننا نستحقها و لا نعمل من أجلها؟

إذا كانت المظاهرات صعبة، و المعارضة السياسية صعبة، و إبداء الرأي في القضايا الحساسة صعبا، فهل الإعتراض الشعبي البسيط على هذا النوع من الفساد بنفس الصعوبة؟!

لا يجب علينا بذل أي جهد إعلامي في هذا النوع من الظلم. من يرى أنه فساد فاليمتنع و ليتحدى الشركة الخاصة هذه.

هذا كل ما هنالك، و غياب هذا النوع من رفض الظلم و هذه الاستكانة هو (الجايب خبرنا) من زمان


ردود على أشرف دهب أحمد
United Arab Emirates [قلبي على وطني] 05-07-2013 02:46 PM
صح لسانك يا ود دهب ... والله والله لو الناس كلها اتبعت هذا الاسلوب في دفع الرسوم الما عندها اصل ولا معنى لما تجرأ هؤلاء بفرض اي رسوم غير مستحقة ... لكن نقول شنو آآآآآآآخ ثم آآآآخ


#657694 [الفاتح مقبول]
0.00/5 (0 صوت)

05-06-2013 01:00 PM
حديث شريف : دعاء دخول السوق
،،،،،،،،،،،،،،،،
عن أبي سعيد عن حماد بن زيد عن عمرو بن دينار مولى آل الزبير عن سالم عن أبيه
عن عمر رضي الله عنه قال : قال رسول الله صلى الله عليه وسلم :
من قال في سوق لا إله إلا الله وحده لا شريك له له الملك وله الحمد بيده الخير يحيي ويميت وهو على كل شيء قدير كتب الله له بها ألف ألف حسنة ومحا عنه بها ألف ألف سيئة وبنى له بيتا في الجنة

الظاهر الناس ديل نسوا الشريعة


ردود على الفاتح مقبول
Saudi Arabia [ABUSHAWARIB] 05-06-2013 03:31 PM
هم لو أصلهم ذى ما بقولوا انهم جو عشان يطبقوا شرع الله كانوا يجعلوا الحديث اجبارى عند دخول السوق موش يفرضوا على الناس رسوم دخول السوق وينسوا كلام الله ورسوله

غايتو رسوم دخول السوق دى ما سبقهم عليها لاجن لا بشر

لو كان الكندى ده نسبة الى كنده القبيلة العربية تبقى الرسوم راجهع الى منبر السلام العادل بتاع الخال الرئاسى
نظام عنصرية وكده
هاك التور البنفسجى ده


#657688 [Heron]
0.00/5 (0 صوت)

05-06-2013 12:55 PM
الغولة الحكومة الكيزانية الشيطانية اللاانسانية اكلت كل شي حتى عرق الناس التعابة الكادحين.بعدين يا استاذ جبرا هي لا تحتار في ابتكار الافكار لجني مذيد من الاموال لان هذه الحكومة الن من الشيطان نفسو.


#657680 [البعير]
5.00/5 (1 صوت)

05-06-2013 12:53 PM
الاستاذ/ الفاتح جبرة - تحية طيبة وبعد
انت يااستاذ بقيت عندك شعبية وجماهير اكثر من شعبية وجماهير الصادق المهدى ، لذلك بقترح عليك دعوة جماهيرك الي النزول الي الشارع لكنس هذه الزبالة وتكون ريحت الشعب الفضل من رسوم جبابات ورشاوى وفساد وربنا يجازك خير والشعب السوداني يشكر فيك الليل والنهار كونك ساهمت في ازاحة هذه العصابة الفاسدة الظالمة.


#657662 [omar tomsah]
0.00/5 (0 صوت)

05-06-2013 12:42 PM
طيب لو خش وماطلع ..بات جوه .. دا بتحاسب كيف في فتوي بخصوص الموضوع دا؟
بعدين الحركة دي اساسا في الاسلام في ... يعني دعاء دخول السوق .. دعاء الخروج من البيت وهكذا.. يعني هي لله. بعد شويه بعملو دعاء دخول المدن التي لم يتم الدخول بها من قبل (الوالدين)


#657634 [العمده]
5.00/5 (1 صوت)

05-06-2013 12:28 PM
وطبعا يالسيد جبرا هذه الرسوم على حساب محمد احمد الغلبان لأن المبلغ الذى يدفعه صاحب السيارة المحملة بالخضار ولا بأى سلعة هو زاتوا بيخت حقه وكل واحد بيذيد بالدبل واذا كان المفروض سعر كوم الليمون بجنيه فتلقائيا يبقى بجنيهين وانا المحيرنى الناس دى ساكته تقول رشوهم بجمكسين 00


#657626 [كمبال عيد الواحد]
0.00/5 (0 صوت)

05-06-2013 12:24 PM
نحن في الشدة بأس يتجلي
ومن هذا المنطلق نتقدم لوزير الماليه بحزمه من المعالجات الاسعافيه للاقتصاد الوطني

1_ادخال المقابر ضمن الخطه الاسكانيه و ذلك لارتفاع عدد الضحايا المضطرد يوميا.
2_فرض رسوم اضافيه علي حوادث القتل و ذلك نسبه لان (عدادها سريع ومربح).
3_انشاء وحدات تحصيل في المستشفيات و تحذير مستشفي الزيتونه من التجنيب.
4_اعفاء موتي التصريحات الحكوميه و اسر المعتقلين السياسيين.
5_انشاء مواقع استثماريه و تحديد فئات( قبر ناصيه ) (قبر بفتح بفتح علي قبرين) و كدا.
6_مقابر فاخره بالنسبه للمغتربين و التقديم عن طريق السفاره وعمل خصم بالنسبه للذين فقدوا اراضيهم في الدنيا بالاحتيال الحكومي.
6_المسؤليين هم اكثر الفئات تضررا لانهم اثروا الموت في الجو عشان كدا فرصتهم ضعيفه


ردود على كمبال عيد الواحد
United States [بميار] 05-07-2013 08:39 AM
فجاه رن جرس الباب.....من انت؟؟؟ انا عمو حرامى ه اغنيه لطيور الجنه للاطفال


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة