المقالات
منوعات
إعلان: بُشرى لـداكنات البشرة طريقة آمنة لتفتيح اللون!
إعلان: بُشرى لـداكنات البشرة طريقة آمنة لتفتيح اللون!
05-11-2013 12:40 AM

- اتزوجن رجال ذوو بشرة بيضاء.

ـ هه!!

ـ هه شنو؟ انتن مش دايرات تنضفن لونكن بطريقة آمنة لا تسبب لكم امراض السرطان او الفشل الكلوي اوالامراض الجلدية بس خلاص اسمعن نصيحتي و(اتزوجن رجال ذوو بشرة بيضاء) وبكده لونكن ح يفتح وينضف عن طريق وليداكتن البتنجبوهن منهم! يعني حسع أولئك الرجال السودانيين الخُدر المنهزمين داخليا تطبيقا لمقولة:(نحنا نفتح في اللون وأنت جاي ترجعنا لورا) أحسن منكن في شنو؟!! ما هم زاتهم بيفتحوا وينضفوا ويبيضوا في لونهم عن طريق حرصهم على الزواج بسيدات من ذوات البشرة البيضاء لينجبوا منهم أطفالا ذوو بشرة فاتحة!! بعدين انتو حصل سمعتوا ليكم انه سوداني أخدر متزوج من سيدة بيضاء البشرة مع سبق الاصرار والترصد جاهو سرطان ولا فشل كلوي ولا مرض جلدي؟!!

فآيتها الآنسات والسيدات من داكنات البشرة كان خلاص الانهزام الداخلي بلغ مداه لديكن إحساسا بالدونية بسبب لونكن الاخدر ولا الكاكاوي ولا الاسود ولا الداكن بلون قهوة النسكافية ولا اكان بلون الشيكولا، كلو عند العرب صابون! ومن ثم سعيتن للتبرؤ منه تفتيحا له وتبييضا فحتى لا تصيبكن الامراض جراء استعمالكن الكريمات الكيماوية فـ(لتتزوجن رجال ذوو بشرة بيضاء) وبذا ستكونن أخذتن مساركن الصحيح بجانب ذاك الاخدر المنهزم داخليا والشاعر بالدونية صاحب مقولة:(نحنا ننضف في اللون وانت جاي ترجعنا لورا)!! والتي قالها ردا لطلب اخدر متلو للزواج من ابنته التي تنتمي السيدة والدتها للون الابيض بدرجة من القرابة.

ولا اخفيكم القول أنني حال تأملي وتدبري قبل أعوام خلت في هذه المقولة إلا وأدركت أن قائلها ما هو إلا زول مهزوم داخليا ولو تعلمون أن شر أنواع الهزيمة هو هزيمة المرء داخليا والتي ما هي إلا ترجمة لشعور وتعايش احدهم مع إحساس الدونية التي سعى ويسعى مجتمعه الذي ينضح نفاقا وعنصرية لم ينجح في مواراتها بذاك الاحترام الزائف! والمصيبة أنه ذاك المنهزم داخليا إن كان سعى لنضافة لونه وهو ماسك خشمه عليه لمَ اكترثنا له ولكن إعلانه وتصريحه في القبل الأربعة بأن:(نحنا ننضف في اللون وانت جاي ترجعنا لورا) أدى بدوره لان تتبنى نسبة مقدرة ـ إن لم نقل الاكثرية ـ من السودانيين أن يسيروا على دربه! فلا أخفيكم القول أنني منذ انتبهت منذ أعوام لما تحمله مقولة:(نحنا ننضف في اللون وأنت جاي ترجعنا لورا) من تقليل لشان ومكانة السيدة الخدرا بقيت ما بهببوا واصم خشمي عليّ من الغناء أو الشيل غناء مشاركة لتلك المغنية حال سماعي لها كان في مسجل العربية ولا في مناسبة اجتماعية حال سماعي لها تتغنى قائلة: طويل أخدر قيافة ولا لي أخدر في المطار ولا اكان زولي الأخدر! اغني لمنو وأشكر منو يا عم فانا إييش بيضمني انه ايا من الخدُر البشكروا فيهم ذكرا في اغاني البنات ديل ليس ممن يتبنون مقولة:(نحنا ننضف في اللون وانت جاي ترجعنا لورا)!! لتنطبق عليّ مقولة القاهرة تكتب وبيروت تطبع والخرطوم تقرا؟!! أو لتبقى علي حكاية الخيل تجقلب والشكر لحماد!!

وبالمناسبة يا داكنات البشرة الساعيات لتفتيح بشرتكن تبرؤا من لونكن! لو جاكن أيا من داكني البشرة وصرف ليكن شعارات من شاكلة: حفاظا على الهوية .. أوعكن تعرسن من غير لونا! ما عليكن إلا الرد عليه بكل شفافية قائلات: يا زول هوووي أسمع النقول ليك الهوية دي يا نقعد ونحافظ عليها ونحرسها سوا .. يا ننضف ونفتح ونبيض لونا سوا.

ومع تذكري يا داكنات البشرة لشكر وشكير وتنبر داكنة البشرة بت عمكم الامريكية السوداء المذيعة اوبرا وينفري بالممثل الامريكي جورج كلوني وشخصيته بانه أي كلوني بيحسس المرأة التي يتحدث إليها بأنها بالنسبة له أهم امرأة في العالم و..

ـ وشنو؟!! حسع شنو المناسبة الخلتك تتذكري وتطري لينا سيرة الممثل الأمريكي جورج كلوني هنا!!

ـ عاد كيفن ما اطراه واتذكره لأني أنا شخصيا لو كنت مصابة بفايروس الانهزام الداخلي تبرؤا من لون بشرتي ولكي افتح لوني بطريقة آمنة فلن اتزوج بغير وسيم مسلسل (ER) الانسان.. كلوني.
ـ لكن كلوني ده ما مسلم! فانى لك انتي المسلمة الزواج بكتابي!!

ـ البركة في فتوى الشيخ الدكتور/ الترابي .. و..

ـ هه! وشنو!!

ـ و.. إعلان: بُشرى لداكنات البشرة: لتفتحن لونكن بطريقة آمنة! .. اتزوجن رجال ذوو بشرة بيضاء.


رنا عطية
[email protected]


تعليقات 13 | إهداء 0 | زيارات 5075

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#665992 [نانسي المسيرية]
0.00/5 (0 صوت)

05-15-2013 05:55 PM
عليك الله عيبي لي اللون الطبيعي دا


#662922 [wad kordofan]
0.00/5 (0 صوت)

05-12-2013 11:53 AM
Sister Rnaa. ................i thanks you for all!


#662508 [محمد مبارك]
0.00/5 (0 صوت)

05-11-2013 10:00 PM
دي فتنة اتسبب فيها البشير والطيب مصطفى العنصري
وان شاء الله حاتزول قريب


#662255 [osaman]
3.00/5 (1 صوت)

05-11-2013 03:29 PM
والله يااختى لو عرفت المراة السودانية مافى لونها الداكن من خير وصحة وعافية ورائحة طبيعية حلوة حلوة ورائعة لما لجات لمهزلة تتيح البشرة .واسالوا المختصين عما يحمله اللون الداكن من بشريات وخير.


#662086 [عطوى]
0.00/5 (0 صوت)

05-11-2013 12:18 PM
قبال اسبوع سالنى احد الهنود وقالى لماذا البنات عنكم بيض والرجال سود (يقصد بصفة عمامة كدا ؟؟؟؟؟! وهو هندى فضولى وبصاحب السودانيين وبحضر القنوات السودانية بسبب المامة المقدر بالعربية ؟؟؟؟؟


#662072 [kamda]
4.00/5 (1 صوت)

05-11-2013 12:07 PM
رد على "محمد"

افهم مغزى مقال الكاتبة رندا

هي تنكأ المسكوت عنه و تسلط الأضواء بدلا عن الهروب بالكريمات!!!!!!
لك التحية يا سودانية يا أصيلة


#662068 [kamda]
4.50/5 (2 صوت)

05-11-2013 12:00 PM
من لا يعتز بلونه و لغته و ثقافته يجد الازدراء و الذل و يعيش حقيرا


#662048 [حزين جدا]
5.00/5 (1 صوت)

05-11-2013 11:33 AM
طيب اتزوجى راجل ابيض لو لقيتى او لو هو رضى بيك ، المشكلة ما فى اللون بس ولكن وينا ملامح الانوثة الانف افطس والشعر الله ما بفرزوكم من الرجال والعيون شخطة بس وحاجات تانية اتعفف عن ذكرها حتى ملامح البت الافريقية الجميلة ما فيكن عيون واسعة سمرة هادئة رقبة طويلة قوام ممشوق انتن يا مع الواطة يا دببة، والله كان لقيتى راجل ابيض رضى بيك انا الا امشى اعرس واحده من اخواتنا ال .........................
ارجوا من الكاتبة الا تسقط رغباتها علينا وما تحلمى كثير من الاخر كدة انتى ما فى زول ابيض بعاين ليك


ردود على حزين جدا
United States [راجل المرا حلو حلا] 05-12-2013 11:35 AM
قالو الفهم ذي العرس قسمة ونصيب
يا جاهل بامور الفهم يا المابتشوف ابعد من البتقراو عيونك اقراء كويس عشان تفهم وانت البعاين ليك منو زاتو حسع عليك الله انت حزين ولا واحدة سمراء ادتك شاكوش جااااااااامد


#661970 [أبو الكدس]
5.00/5 (1 صوت)

05-11-2013 10:08 AM
ما تتزوجو أبيض ولا بنفسجي هو المانعكم منو والوقف في طريقكم منو وأقول ليك حاجة نحن عايزنك إنتي تمشي تتزوجي من واحد أبيض زي الوسيم كولوني أشان تشجعي بقية البنات وكده بس أعملي حسابك لو ما لقيتي زيه ما تمشي تتطبي في جنس البقطعو وبرمو في بير السايفون ولا عينة البشيلو وهاك فنننن من الطابق السابع


#661954 [ibrahim]
5.00/5 (1 صوت)

05-11-2013 09:45 AM
ذكر الإمام جلال الدين السيوطي في مؤلفه ( نزهة العمر في التفضيل بين البيض والسود والسمر ) مناظرات الجاحظ في رسائله ( فخر السودان على البيضان )وهي من المضحكات والمبكيات ، وهي تستحق عنوان نزهة العمر . وذكر الصاحب جمال الدين أبو الحسن متوسطاً بين المجموعتين فقال:
أعشق البيض ولكن * خاطري بالسمر أعلق
إنّ في البيض لمعنى * غير أن السمر أرشق
وظلال الأيك عندي * من هجير الشمس أوفق
وشذا العنبر والمس* ك من الكافور أعبق
السؤال: هل تغيير لون البشرة بالكريمات أو بالزواج المختلط يغيير من الجينات ؟ ألا ترين ماذا فعل الجينات السوداء ببني عباس السودان ؟


#661904 [hazim]
4.25/5 (3 صوت)

05-11-2013 08:12 AM
كلامها فى الصميم,العنصرية ضربت جذورها فى مجتمعاتنا السودانيه...هههههههههه اقول السودانيه يعني من السود و لو دلعنا السواد و قلنا اخدر او سماره على قول المصريين..سالت نفسي ذات يوم و انا اسمع فى التلفاز عبارة:الرئيس الاسود اوباما!!!قلت اذا كان اوباما اسود نحن نطلع ايه؟؟(xxx black??)ههههههه,اغانينا,امثالنا و ونساتنا و هزارنا كلو يكرز (بمعنى يحض او يوعظ)(و ليس الخطأالشائع يكرس) للعنصرية يا عب يا خادم يا قرقور....الخ.حمل هذا ضعاف النفوس للانتحار بالكريمات و خلطات التفتيح التي لا انزل الله بها من سلطان,الواحده لو نجت و السرطان و امراض الكلى ,يصبح لونها زي الضب الانجليزي (الضب الذي صدره احمر و باقي جسمو ترابي)..التحدي الان فى السودان هو كيف نعيد للسود كرامتهم و ثقتهم فى انفسهم,تلك الثقة المنكوبة التي تكسرت امام العنصرية,,عنصرية السود للسود


#661828 [نونو]
0.00/5 (0 صوت)

05-11-2013 01:34 AM
اها هو وينو الاخضر ذاتو عشان نشطرط الابيض قبل يومين الاحصائيات في السودان قالو نسبة العنوسة 36%


#661819 [محمد]
0.00/5 (0 صوت)

05-11-2013 01:09 AM
الرجاء من الكاتبة أن تكتب ماينفع الناس والبعد عن هذه الدعوات التي تثير الكره والحقد المجتمعي فالله خلق البشر وجعله متعدد الأعراق والسنحات لا لتفضيل شخص على شخص بل لحكمة يعلمها البارئ عز وجل فإذا كان هذا تفكير المثقف فكيف يفكر الأمي .


ردود على محمد
United States [Nasr] 05-11-2013 04:35 PM
ما أجـهـلك يا (محمد)!! يبدو أنك تعاني من داء (القصـور) في الفهم وذلك لحكمة يعلمها البارئ عز وجل كما تقول..

[المصحح العصري] 05-11-2013 11:23 AM
محمد، انت اول الناس يجب ان تشكر السيدة الكاتبة بدلاً عن مهاجمتها يا اخ العرب هههههههههههههههههاي.
فهي لم تشجع علي العنصرية كما يتبادر لعقلك الناقص بل بالعكس هي تسخر من العنصرية وانهزام الذات الذي قد يهوي بصاحبه الي درك سحيق. ولا يستطيع اي كان ان ينكر تبرؤ النساء والرجال في السود(ان) من ألوانهم وخلقهم مما يعكس مدي التخلف الذي يعيشون فيه. انت مثلاً، تضع علم امريكا علي حسابك مما يعني انك متبري ومتنصل من بلدك السودان، تجد إحداهن قد غيرت لونها لتجد عريساً لكن غير جدوي! او تجد احدهم يحاول الزواج من بيضاا اللون ( ان كان يوجد في السودان بيض).


رندا عطية
رندا عطية

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة