ثغرة تلفزيونية
11-27-2010 08:15 AM

حاطب ليل

ثغرة تلفزيونية

عبد اللطيف البوني
[email protected]

في يوم السبت 20نوفمبر 2010 الموافق 14 ذو الحجة 1431 هجرية أي رابع أيام عيد الأضحى الأخير كان يوم (دق العيش) في حواشتنا فمنذ صباح الرحمن اصطحبت ابني وابن أختي اللذين كانا أكثر متابعة مني للموسم، حملت جوالاتي وخيوط الدبارة واصطحبت الدراسة (بفتح الدال) وهي آلة الحصاد، فالحمد لله ودعنا (الدق) اليدوي وإن كانت كل عمليات الحصاد السابقة للدق يدوية. أمضينا كل ذلك النهار تقريباً في الحواشة وكان يومياً جميلاً مع العمال والراديو والرعاة والذين يجمعون مخلفات الحصاد وطالبي (حق الله) بيد أن المحصلة كانت مخيبة للآمال فمتوسط الفدان لم يصل الخمسة جولات. علمت من صاحب الحاصدة أن المتوسط في المنطقة قد يكون أقل من خمسة جولات سألت صديقي الدكتور هاشم إبراهيم أستاذ الاقتصاد بجامعة أم درمان الإسلامية، وهو في قسم آخر من أقسام الجزيرة. فقال لي إن الإنتاجية لن تتجاوز الثلاثة جوالات في المتوسط في قسمهم.
ولما كنت منهكاً من (المقيل) في عملية الحصاد أويت للفراش مبكراً و\"بنص يقظة\" شاهدت نشرة العاشرة في التليفزيون الاتحادي ولكن فجأة طار النوم من عيني عند النشرة الاقتصادية. وسبب الدهشة أن النشرة الاقتصادية أوردت خبراً مصوراً عن حصاد الذرة من التكينة أي من ذات مكتبنا (اللعوتة) ومن حواشة على بعد كليومترات من حواشتنا وفعلاً كانت حواشة متميزة إذ رفع أحدهم قندولاً للذرة (قدر الشافع) ورأيت صديقي وقريبي ود سرالختم وهو يتحدث عن الإنتاجية العالية، وعن التقاوي والتقنيات الحديثة التي استخدمت في هذا الموسم. وقال صاحب الحواشة إن إنتاجيته سوف تصل خمسة عشر جوالاً للفدان (تبارك الله وماشاء الله وعينا باردة).
ليست هناك خطأ في المعلومات اعلاه فالتفاوت في الإنتاجية أمر معروف ولكن إن كانت ثمة مشكلة فإن التفاوت ما كان ينبغي أن يكون بالحجم أعلاه وفي ذات المنطقة. فقضيتنا اليوم هي النفاق والكذب عن طريق التليفزيون أو مايسمى الثغرة التليفزيونية. فالأمر المؤكد أن التليفزيون لم يحرك كاميراته ويأتي للتكينة من تلقاء نفسه إنما جهة ما حركته. ومن المؤكد أن هذه الجهة جهة مسؤولة تريد أن تتجمل أمام الجهات التي (فوقها)، فقامت هذه الجهة بتلك العملية الانتقائية في العرض التليفزيوني المشار إليه. نعم المعلومة المعروضة كانت صحيحة ولكن السؤال، هل متوسط الإنتاجية في كل الجزيرة خمسة عشر جوالاً للفدان ؟ أو حتى عشرة ؟ الأمانة كانت تقتضي أن يعرض التليفزيون كذلك الحواشات التي لم يصل متوسط إنتاجيتها لجوالين فقط وهي موجودة في الجزيرة، فإذا عرضت الأعلى أعرض الأدنى كذلك أو انتظر إلى أن ينتهي الموسم وأجمع المعلومات وأعرض للناس المعلومات المؤكدة. إننا نربا بالتليفزيون أن يكون أداة بيد المتلاعبين بهذه الأمور المصيرية فالقول بأن إنتاجية الجزيرة من الذرة وصلت خمسة عشر جوالاً للفدان سوف تهبط بأسعار الذرة مما يتضرر منه المنتج ليس في الجزيرة وحدها بل في كل مناطق إنتاج الذرة في السودان. فالتليفزيون إذا أراد أن يتابع الإنتاجية ويقدم سبقاً خبرياً ينبغي أن يفعل ذلك من تلقاء نفسه ويتحرك بحريته في الجزيرة ويعرض الحقيقة كما هي وليس بالصورة الانتقائية التي حدثت أعلاه . إن التليفزيون وقع في فخ أصحاب المصالح فمطلوب منه التحلي بالموضوعية وذلك بممارسة سياسة عرض الكوب كاملاً أي بنصفيه الملئ والفارغ لمصلحة البلاد والعباد .


تعليقات 10 | إهداء 0 | زيارات 2350

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#50788 [بت ابوها]
0.00/5 (0 صوت)

11-28-2010 12:50 PM
اول مرة اعرفك يادكتور انك مروق قدر دا وعندك حواشة ياخي نحن بيت ما عندنا احمد الله وزلة بيوت الايجار والتلتة من بيت لبيت وقلة ادب اسياد الملك كرهتنا -والحمدلله -الوقت دا كلو كنت متاجر باسمنا نحن الفقراء والمساكين وانا ما بقرا ليك الا لاني قايلاك مننا طلعت بتاع املاك وكمان راسمالي بتاع حواشة عدييييل-معليش-ونصيحة لود اللعوتة اذاعة لندن مافي اكذب منها ولو بتصدقها تكون بالغت اخير منها لالوبنا اقصد تلفزيونا دا -وحمدلله علي السلامة يا حامد اجر وعافية ان شاء الله


#50589 [حامدابوعبدالمجيد]
0.00/5 (0 صوت)

11-27-2010 07:49 PM
ناس الراكوبه سلام انتو مابتسالو الزول كان مرض كان مات
الحمد لله خفيفه ومن على سرير المرض نقول بعد متاوقه من خرم فتاشة العيش حليلو يايمه عيشنا فى سوق العيش لكن مامشكله خمروه اى خمروه بغطى معاكم موش قالو ناس الحركه ضغطو عليهم علشان الكشه والسلاطين زعلانيين دايرين وحده وتكشو المريسه بنمشى نسجل من جوبا تحت تحت قالو الوالى اصدر تعليماتو بمنع الكشات بل باخراج اصحاب الاندايات من السجينات لممارسة نشاطهم التجارى علشان كده يابونينا خمروه يمنع التاصيل والمؤصلين منعا باتا

زعلان منكم ناس الراكوبه مريضكم مابتزوروهو وتسالو منو

..................تصبحوا على وطن


#50573 [ام الحسن]
0.00/5 (0 صوت)

11-27-2010 06:32 PM
لمصلحتك واللا مصلحة البلاد ..حسى لو كان المحصول قمح واللا موز كنت كتبت المقال ده ....شويويلاتك ديل ما بتلقى ليهن سعر ...اخيرك تسويهن زريعة


ردود على ام الحسن
Malaysia [سوداني مخلص] 11-27-2010 08:32 PM
انت بفهمك يا فاهمه وقع ليك انو الراجل ما اتكلم عن مصلحة البلد يعني
يعني المزارعين ديل ما من البلد يا دكتوره انا ما عارف دا حقد ولا حب تعليق والله ناس تجيب مغسه انا ما عارف انتو امخاخكم دي بتشغلوها في شنو وهي ما نافعه كده


#50496 [واحد مستغرب]
0.00/5 (0 صوت)

11-27-2010 03:45 PM
كأنك يا ود البونى ماتابعت معنا طوال شهر رمضان المنصرم برنامج أسمه (فابريكانو) وقدمته الممثلة المصرية المتألقة أنتصار فى قناة نايل كوميدى0 والبرنامج كان يقدم فى ثوب خفيف الظل وكان الغرض منه أن الاجهزة التى غمرة الدنيا صارت لها من الامكانات التى تجعلك ترى قندول العيش (شافع ينطط)إذا حبيت ذلك وأقول ليك (هاردلك) التلفزيون القومى سجل فيك قون (يادايش) وانت صدقت ؟!!وفى ظل هكذا ظروف والدولة منصرفا (لاشياء تانية حاميانى) تعتقد انها تفكر فى قندول بحجم (شافع) !!وأى تمرجى يعمل بعيادة نفسية وبما انك كنت تعبان وكنت ناوى تنوم!! حيقول ليك (قول بسم الله)00دى مجردأضغاث أحلام وما كان فى أى لازمة تملا كرشتك وتنوم00وبلاش تتبلى وتشوش على التلفزيون القومى لانها ما فاضية وماسكة عدد!!


#50479 [ود رفاعة]
0.00/5 (0 صوت)

11-27-2010 02:57 PM
دكتور البوني ... انت والشعب السوداني كله يعلم أن التلفزيون الحكومي يعتبر أحد أهم أسلحة المشروع الحقاري لتضليل الناس وهذا شي معروف فمع توفر قنوات الاتصال من انترنت وقنوات فضائية يلاحظ الجميع الفرق في طريقة بث الخبر وإنتقائية الطرح وتكتمل الصورة في التلفزيون الحكومي بصراخ أبو جاعورة كلما رشحت أخبار في الاعلام الخارجي عن تحركات في المحكمة الجنائية بخصوص محاكمة المشير فيعلو صراخه وجعيرة وتلفظه بألفاظ تخدش الذوق العام والاعراف الدبلوماسية وتعكس التخلف ومثل ما يتلفظ به لا يخرج إلا من افواه الرعاع والسوقة مما يعكس صورة سيئة للعالم أجمع ويختم ذلك بالرقص الذي اتقنه حتى تقوست ارجله من كثرته والمنتفعين ومعهم المخدوعين من خلفه يرددون هي لله هي لله ... عليه ارى عدم الصواب وإنعدام الفائدة من طرح هكذا موضوع اللهم إلا إذا كنت تشارك هؤلاء المجرمين في التضليل الإعلامي لهذا الشعب بنوع من الكتابات التي ما هي إلا مسخ مشوه للسلطة الرابعة .... يعني بالمختصر المفيد التلفزيون الحكومي ما هو إلا فرع للتوجيه المعنوي للمشروع الحقاري وهذه رسالته فلماذا تنتقده؟؟


#50469 [ود اللعوته]
0.00/5 (0 صوت)

11-27-2010 02:37 PM
الاخ الدكتور البوني
هل تعتقد ان اسعار الذرة فى السودان بتعتمد على اخبار التلفزيون يا اخى الاخبار دي لو كانت فى اذاعة لندن او ما شابه ذلك كان ممكن تؤثر فى الاسعار ويصدقها المواطن او التاجر لكن من اذاعة وتلفزيون امدرمان والله الحكومة ذاتها ما تكون مصدقها ما تخليك خيالي يا ود البوني انت دكتور وعارف البئر وغطاها ولا شنو ليك بالله يا البوني شفت برنامج الملف بتاع قناة الجزيرة عن الصمغ العربي حلقة فى غاية المهنية مش تلفزبون السودان واذاعة شنو ماعارف ليك زي ما بيقول اخونا الفاتح جبرا


#50431 [عبدالمنعم ]
0.00/5 (0 صوت)

11-27-2010 12:58 PM
الحبيب البوني
المرة دي جاتك في تولايتك !!1 التلفزيون وجماعتوا هبشوك بي راس السوط وكتلوا ليك سعر الذرة دش في حواشتك !!!

زمان قلت ليك اطرق اي باب في اي مجال في اي حته في البلد دي وشوف الفساد والكذب قدر شنو !!!

مالك داير تبقى لينا زي خلف الله !!! كل يوم معذبنا بي فساد جديد ؟؟؟

تصدق في واحد قال لي البوني دة من كترت المغسة الشافا في البلد حولو ما قادر يتخذ اي قرار !! لا عارف يعتكف في المسيد الفي اللعوتة ، ولا قادر يدخل المؤتمر الاوطني بي وشو ولا قادر علي اللحاق بامات طه !!!
قال اخير بس يكتب ويكتب ويكتب حتى يكتب عند الناس كتابا !!1 والانقاذ تفسد وتفسد وتفسد ،، حتى صارت عند الناس افسادا ،،،،، شفت ليك حاجة فاسدة انقذت ليها زول ؟؟
كدي بالله ادخل باب المتعافي في مجلد الوزارة الثالثة (الزراعة) وشوف الحاصل شنو !!! صدقني يالبوني الحبيب حتمرض وتكوس للطبيب .(بس سؤال ما بريء) شنو عليك الله علاقة الحاصل دة بالاسلام ؟؟؟؟؟؟ كان لقيت جواب ورينا ليهو عشان نااااااامن زاتو يافردة .


#50425 [قرفان من الكيزان]
0.00/5 (0 صوت)

11-27-2010 12:49 PM
ماذا تتوقعون من تلفزيون اسمه (تلفزيون الحكومة) ؟؟؟هذا هو واقعنا كذب فى كذب

وتملق ونفاق _____ الى متى لاندرى ______ ليهم يوم العواليق ______


#50311 [kavim]
0.00/5 (0 صوت)

11-27-2010 08:54 AM
استاذى البونى النفاق والكذب والتملق والفساد والمحسوبية مصطلحات هى والنظام القائم يتضاجعون فى سرير واحد منذ عشرون عاما


#50306 [سوداني 100%]
0.00/5 (0 صوت)

11-27-2010 08:44 AM
اننا نعيش أزمة الأخلاق الذميمة ومنه الكذب فماذا نرجو من جهاز مهلهل تابع للحكومة كالتلفزيون، وحكومة يرأسها المشير الشرير أكبر الكذابينا


عبد اللطيف البوني
عبد اللطيف البوني

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة