وتسافر من غير وداع
11-27-2010 04:39 PM

حاطب ليل

(وتسافر من غير وداع)

عبد اللطيف البوني

فناننا ابراهيم عوض غنى لوداع الحبيب كثيرا، فاسمعه يغني للطاهر ابراهيم.

(ساعة وداعنا انا دايرك تحضر
ماتقول نسيت لازم تتذكر
الناس تتباكى والدموع تتقطر
بتقطع قلبي انت لو تتأخر)

ثم اسمعه وهو يشدو

( قطاره اتحرك شوية شوية
من بعيد بإيدو لوح لي
بكت عينيهو وبكت عيني
يالله متين حلمك علي)

اما ابراهيم عبد الجليل فغنى من كلمت تلودي

(من بف نفسك ياالقطار
ورزيم صدرك دمعي سال
وينو الحبيب انت شلتو جيبو ياالقطار)

وسيد خليفة غنى من كلمات سيف الدسوقي

(اودع اودع كيف
اودعكم اغادركم وتبقى عشرة الايام)

واضاف لها سيد من عنده (لا لاما بقدر) لزوم الجملة اللحنية
ويمكننا ان نعدد الكثير من الاغاني التي تتكلم عن الوداع وغرضنا من ذلك ان نثبت ان وداع المسافر امر متجذر في ثقافة وسط السودان فهو يدل على طيب العشرة التي سبقت وأمل اللقاء، فإبراهيم عوض غنى
(متين ياربي تاني تلمنا قريب ياربي ان شاء الله تلمنا ).
هذة الرمية قفزت الي ذهني وانا اقرأ في مقال للاستاذة الكاتبة الصحفية رشا عوض تحدثت فيه عن عدم الوداع الذي حدث للجنوبيين الذين غادروا للجنوب في الايام القليلة الماضية والذين كتبنا عنهم في هذا المكان مقالا بعنوان (رصوا الهديمات عدلوا وركبوا اللواري وقبلو) وهذا المقطع مأخوذ من اغنية شايقية باكية للاستاذ السر عثمان الطيب .

قالت رشا ان الدكتور جعفر كرار المقيم في الصين نبهها لهذا الامر وتمنت رشا لو ان منظمات المجتمع المدني والاحزاب خارج السلطة قامت بوداع هؤلاء المغادرين للجنوب ولاشك عندي ان هذا الامر في غاية الاهمية وتشكر الاستاذة انها كتبت عنه وذكرت الناس به والعبد لله مثلها يتمنى لو ان كان هذا الوداع قد حدث لأنه يعبر عن البعد الانساني في العلاقة ولأنه يشعر هؤلاء المغادرين بأنهم كانوا يقيمون مع اناس يحفظون العشرة، هذا بالاضافة للمغزى السياسي لعملية الوداع، فقد كانت ستوضح ان الانتماء الوطن اهم من الانتماء الحزبي. معروفة الظروف الموضوعية التي ادت الى ان يأتي هؤلاء الاخوة الى الشمال ويمكثوا فيه ماشاء الله لهم ان يمكثوا ويرجعوا دون ان تنمو علاقات انسانية مع الشماليين، فاللاسف علاقة الشماليين بالجنوبين والعكس كذلك ظلت متأثرة بالبعد السياسي ولم تنشأ علاقة انسانية، فقد ذكرت من قبل قصة الشاب الجنوبي الذي طلبت منه ان يساعدني في رفع زجاج العربة فقال لي انه طوال مكثه في الشمال لم يطلب منه شمالي ان يساعده في فعل شيء حتى ولو كان (دفرة عربية).

ربما تكون ظاهرة وداع المسافر لاوجود لها في الثقافة الجنوبية بدليل ان الجنوبيين الباقين في الشمال لم يودعوا اولئك المغادرين ولكن هذا ماكان يمنع ان تقوم المؤسسات المدنية الشمالية بإظهار مشاعر الوداع الطيبة لهؤلاء المغادرين عسى ولعل ان تزرع بذرة امل لعلاقة مستقبلية طيبة . هؤلاء المغادرون كانوا من قاطني الاحياء العشوائية فيبدو لي ان الامر سيكون مختلفا لو كان هؤلاء العائدون من قاطني الاحياء المخططة لانه حتما كانت ستكون لهم علاقات طيبة مع جيرانهم ومن المؤكد أنه كنا سنرى (الناس تتباكى والدموع تتقطر) فإذن الخطأ كان في عدم احترام المؤسسسة الرسمية لهؤلاء العائدين الآن فقد كان ينبغي ان يميزوا تمييزا ايجابيا ويعاملوا معاملة مواطنين درجة اولى من حيث الخدمات التي تقدم لهم في العاصمة، لكن قل لي ياصاح لو كان هذا قد حدث لما كان هناك تقرير مصير وتسجيل للاستفتاء وعودة من غير رجوع.

السوداني


تعليقات 11 | إهداء 0 | زيارات 4493

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#51931 [Gamar]
1.00/5 (1 صوت)

12-01-2010 10:26 AM
بس تعالو نعترف باننا ننظر للجنوبي بانه جنقي
للان بداخلنا الناس مقامات
احسن يعملو دولتهم لوحدهم
بعديين لما نحس انو احنا لاشماليين والجنوبيين محتاجيين لبعض نرجع نركبه باسس جديدة تحفظ لكل واحد حقه
مع لاسلامة


#51338 [المهندس ]
1.00/5 (1 صوت)

11-29-2010 08:04 PM
استاذ البوني الا تعتقد ان الوداع يعني اقرار الشمال بالإنفصال


#50743 [mmm]
1.00/5 (1 صوت)

11-28-2010 10:58 AM
هم المفروض يشكرونا على الاستضافة ومشاركتهم لنا كل شئ ..مش نحن نودعهم... ناس ماشين اهلهم يودعو ليهم شنو...اضافو شنو للشمال


#50742 [ام الحسن ]
1.00/5 (1 صوت)

11-28-2010 10:58 AM
ما فات شىء لسه الجموع بتسافر ،،، ممكن نعملوا شىء حتى ولو رزمى يعكس ما في القلوب من اسى،،
لكن ما تنسى الناس خايفة ومافي امان حتى الشعور الطيب ناس الأمن والحكومة لا يحتملوه


#50677 [واحدة من الناس]
0.00/5 (0 صوت)

11-28-2010 08:29 AM
لك التحية استاذنا البوني
انا ما عارفة ليه كل مقال او عمود بيتكلم عن الاستفتاء وانفصال الجنوب الاقي التعليقات معظمها بيعبر عن انو الجنوبيين عرفو ياخدوا حقهم الدور والباقي علي التانيين .
نحنا مش كلنا عارفين الوطن دة حقنا كلنا شمال وجنوب وشرق وغرب .والشمالي ليه حق في ياي زي مالجنوبي ليه حق في حلفا والعكس صحيح
يا جماعة الانفصال عايش جوانا لازم نتخلص من العقدة دي في الاول.
المصيبة انو بعد شنو؟


#50671 [الغضبان]
0.00/5 (0 صوت)

11-28-2010 08:09 AM
د البوني .. عدم وداع الإخوة الجنوبيين من الجهات الرسمية هو تغييب متعمد ومفتعل للشعب الشمالي بطريقة ممقوتة لأن الحكومة لا تريد إظهار أي رحمة أو شفقة في طريقة الطرد والشعب السوداني يعلم تماما أن المؤتمرجية والحركة باعا الوطن من أجل مصالح شخصية ضيقة


#50661 [somer]
0.00/5 (0 صوت)

11-28-2010 07:06 AM
الأخ الدكتور البوني أنا أقيم في الخارج ولدي طفلة عمرها سبع سنوات ونحن في طريقنا للمدرسة طبعا عمك مشغل قناة الجزيرة لأنه صارت عادة بالنسبة لي وهي أن أتعاطي صباح كل يوم جرعة من الأخبار المحبطة عن السودان قبل التوجه للعمل. وطبعا جاء الخبر المحبط عن السودان حسبما أتوقع وقبل الخبر كانت البنت تحاول أن تحكي لي عن بعض ما جرى في الفصل يوم أمس وهي تحاول أن تجرني لأسمعها وخبر السودان يجرني من الطرف الآخر لكي أسمعه وفي النهاية قلت لها دعني أسمع هذا الخبر لأنك أنت معي في السيارة ولكنها زعلت ثم جرىبيني وبينها هذا الحوار الذي أنقلهلك حرفيا كما جرىا:
البنت: هو يا بابا ليش أخبار السودان الأيام كتيرة كدة في التلفزيون كل شيء السودان السودان السودان؟
أنا: لأن السودان فيه مشكلة.
البنت: المشكلة بين منو ومنو؟.
أنا: المشكلة بين الشمال والجنوب. البنت: جنوب شنو وشمال شنو؟ أنا: جنوب السودان وشمال السودان. البنت: ونحن ساكنين وين؟ أنا: نحن ساكنين في الشمال. البنت : المشلكلة في شنو؟ أنا: المشكلة أنه الناس في الجنوب بتقول أنه ما عندهم مدارس ولا مستشفيات ولا شوارع. البنت: كمان نحن يابابا الحي الساكنين فيه ما فيه مدارس ولا مستشفيات ولا شوارع. وصدقني أخي البوني نحن نسكن أحد أحياء الخرطوم بصراحة أسوأ شيء في الدنيا أن تتهم بشيء أنت بريء منه ويصر الطرف الآخر أن يلبسك الجريمة.


#50629 [Amin]
0.00/5 (0 صوت)

11-27-2010 10:25 PM
يا بوني والله انت راجل طيب واصيل ولسه بتفكر بطريقتنا الزمان !!عليك الله شفت ليك زول الزمن ده بودعوه غير المتوفي والرئيس؟؟؟ياخي والله نحن نجي الاجازات السودان محملين بالهدايا والدولارات والله لما نجي راجعين قرد يهببو ليك مافي!!!


#50599 [ود المقرن]
0.00/5 (0 صوت)

11-27-2010 08:54 PM
يا دكتور الظاهر عليك نسيت أغنية الراحل المقيم محمد أحمد عوض طيب الله ثراه
مع السلأمة و ما تنسي لي ترسلي يكفيني أنك تذكريني و عني دائما تسألي مع السلأمة مع السلأمة .
وصعب فراق الزول بعد ما يوالف .


#50591 [حامدابوعبدالمجيد]
0.00/5 (0 صوت)

11-27-2010 08:11 PM
مساء الخير عليكم
ذكرتنى مره عمى الله يرحمو جابو ليهو خبر وفاة اخوهو الصغير قعد يبكى ويصيح باعلى صوتو سكت شوية وبدا السكليبا تانى مالك ياعمو بتبكى مالك تانى قال ماقاعد ابكى اخوى ببكى على حالى انا الدور فطانى مشى لى اخوى وجاينى تانى
الله يرحمهم وموتا المسلمين جميعا هسع نحن نودعهم عرفو مصيرهم شين زين المهم عرفو مصيرهم كعب نحن الفطانا ديل بودعنا منو وببكينا منو ذاتو مع الطالبان ديل الرفع بعد الدفن والفاتحه نهييي ممنوع اصطحاب السيدات
.................تصبحوا على وطن


#50578 [monim musa]
0.00/5 (0 صوت)

11-27-2010 06:59 PM
للأسف ما برأهم الجنوبيين مهمشيين كل الشعب السوداني مهمش في الجنوب في الشمال في الشرق في الغرب بس الحاصل ان أخوتنا الجنوبيين عرفوا يأخذوا حقهم من الحكومات الشمالية المتعأقبة من الأستقلال والي الأن الدور بأقي علي اهلنا البأقيين هل حيعرفوا يأخذوا حقهم ولا حيظلوا تحت نفس المفاهيم القديمة البالية الرجعت البلد مليون سنة لوراء


عبد اللطيف البوني
عبد اللطيف البوني

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة