د.الخضر: من الظالم اذن ؟!
05-16-2013 10:06 PM

فى حواره مع صحيفة الراي العام الاربعاء 15/5/2013 تجلى السيد/والي الخرطوم تجلياً يؤكد ان هذا البلد المرزوء يجثم على قلبه رجال هم آخر من يتولى شانه .. لضعف الخيال وضعف الفكر وإنعدام المنهج .. فلما نسمعه يتحدث عن الإستنفار فى واقعنا الراهن ..يأخذ منا العجب كل مأخذ .. فهو من جهة ينقل المواصلات ويعذب العجزة والعاجزين والنساء والطلاب ويتركهم نهبا لقرارات بائسة تعذب وهى مستانسة بهذا العذاب ، والمواطنون يحملون لعناتهم وهم يهرولون مابين (صفا )الاستاد و( مروة) شرونى ..ليجدوا واسطة نقل تنقلهم..وهم يرسلون همهمات اللعنة اذ يرون ابناؤهم يحملون انذارات الإيقاف من المدارس لأجل الرسوم .. وتتواصل لعناتهم وهم يحملون اطفالهم الى مستشفى جعفر بن عوف المجانى ويجدون حوادثها قد اغلقت ويبدأون رحلة البحث مع اللعنات فيمن كان السبب والسبب كلمة حق اريد بها باطل ..وتمتد اللعنات وهم يدخلون الاسواق فتطحنهم الأسعار والسلع الفاسدة تملأ الأرفف بلا حسيب ولارقيب.. فى هذا الجو اللاهب وحكومة الخضر تمارس التنكيل ، يتحدث عن الاستفار وهو فى الواقع يمثل اكبر مهدد امنى .. ويتعامل مع الشعب كانه مستأجره .. متى ماارادنا يفترض انه يجدنا وهذا وهمٌ لو يعلمون كبير .. وفى ذات اللحظة التى ياتى النداء للإستنفار ويتزامن مع بشريات رفع الدعم عن المحروقات ورفع رسوم المدارس ..ويحدثنا الوالي عبر حواره قائلاً (بروف مامون مظلوم ويدفع ثمن قبوله بالعمل معنا ومتهم زوراً وبهتاناً واقول لك شيئاً : اختياره جاء على خلفية نجاحه فى انشاء مؤسسات مترابطة تخدم قضية الصحة تعليما وممارسة ولم يقبل هذا الامر بسهولة الامر الذى استدعى لأن نطلب من الاخ الرئيس تاكيد اختياره لهذه المهمة ودعمه له فيها ولا اذيع سرا ان الامر عرض على غيره فاعتذروا جميعا عنه) رحم الله بلادنا المنكوبة .. هل كل مستثمر ينبغى ان يستوَزر؟! وبنفس المنطق لماذا قبل الوالى ان يحكمنا وهو بيطري مثله مثل ملايين البياطرة وحتى الولاية التى حكمها زخرت بعديد المشاكل حتى ابعد منها فباي منطق قبل الحزب اعادة انتخابه؟ واذا قبلنا منطقه فى إستوزار بروف حميدة ..فلماذا لاياتى بالسيد بابكر ود الجبل ليسلمه وزارة التنمية العمرانية وهو من انجح رجال الاعمال ؟ واحد ابناء البرير او عددا منهم لبقية الوزارات ؟! ياسيادة الوالى انك تعترف ان ادارتك بلا منهج واضح ولاخطط واضحة بل على العكس تبحث عن المقدرات الخاصة ، وماتراه فى البروف كمالا اثبت الواقع انها منقصة ، فمؤسسته العلاجية اثبتت المحكمة انها قدتم فيها بيع الكلى وانت تنظر اليه وتغض الطرف وترى ان البروف مظلوم؟؟ وهو باق فى موقعه لا استقال ولا انت قلت له استقيل ..ومؤسساته التى تراها ناجحة ظلت فيها احشاء احدى مواطناتك اربعين يوما وكلما قاله لابنائها ( اتصرفوا) وانتقلت الى رحمة ربها ..وانت تنظر الى المشهد ولاتحرك ساكنا ..وتفجعنا بان بروف مامون مظلوم ويدفع ثمن العمل معنا ومتهم زورا وبهتانا .. يا اهل الله .. يا اهل الله .. يااهل الله ..فهمونا من الظالم ياوالينا ؟! ثق سيادة الوالى ان هذا الحديث لايطابق حقائق الواقع .. ان الدمار فى الصحة الذى حدث فى عهدك الميمون سيبقى سبة التاريخ وماساة السودان .. من حقك ان ترى وزيرك كيفما اتفق لك ومن حقنا ان نسال عن التقاء المصالح .. وعن تشابك الخاص بالعام .. فالمنازل التى تستاجرها بعض المنظمات والبيوت بيوت النافذ او النافذين .. ينبغى ان تلفت انتباهك ..طوعا او كرها.. حالنا اوصلنا لحديث لايصلح للنشر وسنواصل..
سلام يا..
حيدر احمد خيرالله
[email protected]


تعليقات 7 | إهداء 0 | زيارات 1781

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#667905 [semba]
1.00/5 (1 صوت)

05-17-2013 11:21 PM
شبل ابليس الكديس المستأسد حامى اللصوص والقتلة من احبائه الكيزان المجاهد بدماء الفقراء شباب وشيباونساء ما بين متشرد جائع ومريض يحلم بابادة سكان السودان الاصل لا الهامش كما صورت له شياطينه هامان فرعون الكيزان .


#667671 [ivan]
1.00/5 (1 صوت)

05-17-2013 04:07 PM
نحن السودانيين لدينا طبعان الاول الكسل والثاني الحسد ....يعني اي مواطن داير يطلع من بيته لازم المواصلات توصلو لغاية باب المكان الماشي ليهو ..في كل بلد العالم مع الصباح تلقي خلق الله كلها ماشي علي رجلينا اللا بس بدلة بكرفتة واللابس كاجول كلو ماشي وحتي العندو عربية بيوقفا بعيد ويمشي كداريي ..لكن نحنا لا لييييييييييه نمشي بي كرعينا نحنا لاننا سودانيين احسن ناس واكرم ناس واشجع ناس وما بنمشي بي كرعينا زي باقي الشعوب لاننا دقيقين في مواعيدنا ونحب عملنا وما نرضي نضيع دقيقة واحدة من الانتاج وده طبعا منعكس علي سعر الدولار ..المحيرني اليابانيين والكوريين والصينيين الصانعين لينا العربات دي بيمشو كداري وبيركبو عجلات ومواتر تعال هنا في الخرطوم اركب ليك عجلة عشان تلقي الكل يعاين بتافف وتسمع مية شتيمة وكانو العجلة جريمة ..ارجو من الوالي ان يشد اللجام اكتر واكتر ويركب لكل مواطن لجاااام كاااارب وياريت موقف شروني ده يودي الصحافة وموقف الستاد الفتيحاب ويصرف لكل موظف عجلة هوائية بالتقسيط عشان بعد كدة الداير يقعد بادبو اليقعد والداير يمشي الاقاليم اليمشي ..وهي المواصلات دي متيين كان بتشيليها ناس ماشين للانتاج دي يا شايلا ليها ناس متواعدين في الواحة للونسة يا ناس ماشين حفلة يا ناس ما شين يتكسرو في قراش بكا يا ناس ما شين ينتظرو خارج المستشفي راجين مريض منوم لما يخرجو شي شاي وشي قهوة وشي سعوط ....اليسمع كلمة مواصلات دي يقول البلد في حالة انتاج ياخي الواحد يخش المؤسسة من صباح الرحمن يقولو ليك الجماعة في الفطور تقعد لما الساعة واحدة تجي يقولو ليك مشو الصلاة وبعد الصلاة تعال بكرة .........بالله خلوها مستورة ويالخدر عليك الله تاني بص واحدما تدخلو الخرطوم خلي كل واحد يقعد في علبو وياريت تعمل زي الاتحاد السوفيتي زمان الدخول للعاصمة يكون بجواز سفر فيهو سبب الزيارة ومدة الاقامة .بلد طالقة والسبب المواطن .بعدين الصحفيين ديل عمرهم عمرهم ما يغلطو المواطن ولا ينصحوهو بس همهم في المسؤلين وده طبعا لانو المواطنين ما عندهم مظاريف يمدوها تحت تحت .وسلاااااااااااااام ياالخدددددددددددددددددر .


ردود على ivan
[سغيل وكاره المؤتمر الوطني] 05-19-2013 02:53 PM
معليش يا اخي وابن بلدي
انت سايق عجله؟
انا زول مسكين وساكن الخرطوم وبترزق الحﻻل في بحري اسوق عجله يعني اطلع من بيتنا الساعه كم؟واشيل معاي شنطه غيارات فيها قمصان علي شان العرق والغبار وﻻ البس مره واحده واطلع؟
اخوي بيقرا في الجامعه وبيركب المواصﻻت علي شان يكمل تعليمو وحق العجله دفعناه رسوم القرايه
عليك الله سلفنا عجله ليه وفي اﻻجازه بنرجعها ليك
والناس السايقه عجﻻت وانت بتستشهد بيهم درجه الحراره عندهم ما بتصل 50 زينا وما عندهم غبار وﻻ خيران
ومسؤليه اﻻنتاج مسؤليه الراعي ﻻنو ماقاعد ينتج وعلمو الناس اللف والدوران وناس الشغل واﻻنتاج ودوهم الصالح العام
اتمني انك تكون حقاني واﻻيدو في المويه مازي اﻻيدو في النار
انت حصل مشيت وركبتا من شروني لﻻستاد؟
امشي وشوف ابواتنا واعمانا وخاﻻتنا تعبانين كيف ودا كلو ﻻنهم ما بيعرفو يسرقو ويركبو عربات


#667515 [والي مزرعة الحيوانات!!(معليش هم شافيننا كده والدليل!!بطري)]
2.50/5 (2 صوت)

05-17-2013 12:03 PM
ده ببساطه عبيط القرية!!! والله يكفيه لعنات المرضي وكبار السن في الظهيرة الحارقة وهم يلهثون وراء المواصلات من اجل العلاج وديوان المعاشات !!!


#667203 [مهاجر]
3.00/5 (2 صوت)

05-16-2013 11:56 PM
تماما مثلما كان يحدث في مصر من تزاوج السلطة مع رجال الأعمال ورأس المال .. وحتما حتما مصيرهم مصير القذافي وحسني وابن علي والثورة الشعبية قرررررررررررربت فحتي الحبن عندما يصل مرحلة معينة فإنه ينفجر من تلقاء نفسه ..فصبرا يا أستاذ حيدر


#667175 [الوالي المأمون]
3.50/5 (3 صوت)

05-16-2013 11:05 PM
( فالمنازل التي تستأجرها بعض المنظمات و البيوت بيوت النافذ او النافذين .. ينبغي ان تلفت انتباهك .. ) .. مبروك استاذ حيدر جيت من الاخر .. و المواطن البسيط لا حديث له الا عن هذه الفهلوة الانقاذية و ان كان والينا لا يعلم فهذه كارثة .. و ان كان يعلم مكرهآ فعلي الدنيا السلام ..
وآخر الفضائح ما قام به المدير الجديد لسوداتل المهندس ايهاب بانهاء الايجارات الخارجية لعمارات كبار المافيا وارجاع الموظفين لبرج سوداتل ..


حيدر احمد خيرالله
حيدر احمد خيرالله

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة