المقالات
السياسة
أخوان المتعافي..!!
أخوان المتعافي..!!
05-17-2013 01:03 AM

لم يتوقع السيد روجر كلنتون ان تكلفة طبخة وجبة ارز ربما تكلفه نصف مليون دولار..الاخ غير الشقيق للرئيس كلنتون اتفق مع السيدة ناديز كونلى على مساعدته في اعداد وجبة ارز مقابل مائة وخمسين دولار...قبل ان تنجز الطباخة مهمتها كانت تلاسنت مع سيدة اخرى ذات لسان سليط..الملاسنة تحولت الى مشاجرة..كلنتون الصغير امتثل للمثل السوداني (ابتعد عن الشر وغني له)..الحياد السالب جعل السيدة ناديز ترفع دعوى قضائية مطالبة بنصف مليون دولار كتعويض..ما كان لهذه القضية ان ترفع لولا ان صاحب الدار شقيق لرئيس سابق.
اللواء عبدالله البشير يروي لنا حادثة جديرة بالتوثيق..اللواء المتقاعد كان قد ظهر في نشرة عشرة في معية مستثمر عربي قابل وزير المعادن..أحد اصدقاء الطبيب البشير هتافه بعد المشاهدة ممازحا "حقنا وين"..منطق اللواء عبدالله انه ذهب الى ذلك اللقاء المهم مجاملا أحد اصدقائه وفي خاطره جلب استثمار اجنبي لبلد في حوجة ماسة لكل دولار أخضر.
أمس ألأول كانت الزميلة الانتباهة تنشر خبرا رئيسيا ان الشرطة اعتقلت شقيق وزير الزراعة..بالطبع الشرطة تعتقل كل يوم مئات الاشخاص في جرائم اكثر خطورة من جنحة سليمان المتعافي..لكن المقبوض عليه شقيق وزير مثير للجدل..المتعافي الصغير اوضح للاهرام اليوم ظروف الاعتقال التي جاءت عطفا على نزاع حول مشروع زراعي تراه حديقة الدندر داخل حدودها ويرى المستثمر المتعافي غير ذلك.
شقيق اخر للمتعافي كان ينازع حكومة النيل الابيض في تعويض ملياري..المتعافي الشهير ب(ابوجاكومة) كان قد اشترى قطعة ارض عادية واقام عليها مشروع..هذه القطعة تحديدا مر عليها جسر الدويم..الرجل طلب تعويضا تحدثت عنه المدينة الوادعة طويلا..تعاقبت السنوات ولا ادري ان كان الرجل قبض ام مازال في الانتظار.
للمتعافي شقيق ثالث لم يدخل دنيا الاستثمار..الدكتور التيجاني اسماعيل لا يستخدم الماركة التجارية (المتعافي)..هذا العالم المتخصص في اكثر من لغة يجلس بهدوء في المركز الاسلامي للترجمة بالخرطوم جنوب..عدد قليل من الناس يدرك ان للرئيس البشير شقيق اسمه صديق حسن يعمل طبيا في المملكة المتحدة..الاستشاري صديق من فرط حساسيته لايستخدم اسم العائلة الرابح في تقديم نفسه.
في تقديري ان المنصب العام في كل مكان يفرض تبعات سالبة على شاغله..هذه التبعات تمضي حتى تخوم العشيرة..صحيح من حق اخوان المتعافي بالمفهوم التنظيمي ان يسعوا لكسب الرزق ولكن في ذات الوقت مراعاة الحساسية التي تحيط بتجارتهم في السوق..ابناء واشقاء كبار المسئولين عليهم الانتباه انهم مشروع جاهز للتكسب الحلال وغير الحلال.
نحن مطالبون الان بتقدير حق اقرباء الكبار في العمل في (سوق الله أكبر).. وهم مطالبون بالابتعاد عن مظان استغلال البريق السياسي لذويهم في السلطة.
www.facebook.com/traseem
تراسيم
عبدالباقي الظافر
[email protected]


الاهرام اليوم


تعليقات 14 | إهداء 0 | زيارات 4005

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#668649 [وحيد]
1.00/5 (1 صوت)

05-18-2013 05:08 PM
ياشيخ ازيدك من الشعر بيت اسرة المتعافى اليوم لا فقير فيها لا من قريب ولا بعيد والفضل يرجع للحرامى الكبير اقصد المسؤول الكبير ......اما قطعة الارض دى كانت منحة زراعية ايوة اوراقها طلعت كدا بعدين بقدرة قادر اتحولت لى شهادة بحث باسم المتعافى واليوم المزرعة دى يا اخوانا وامسكو نفسكم ماتقعو من الجاى عليكم تضم اجود انواع الابقار فى العالم وكلفتها تساوى ديون السودان الخارجية والداخلية ...المهم طال مافى موت عوجة مافى تب .............؟


#668386 [zahi]
1.00/5 (1 صوت)

05-18-2013 01:05 PM
و الله يا اخوانا الزول ده في كل مقال ( يخش بي حمد و يطلع بي خوجلي ) و ...... الجرح القديم بتاور .................................... بلا يخمك ................


#668024 [أبو عمر]
1.00/5 (1 صوت)

05-18-2013 04:47 AM
انتي أخو خليل الظافر بتاع حي البوسته في امدرمان ولا انا غلطان


#667910 [A.Zumam]
3.00/5 (2 صوت)

05-17-2013 11:26 PM
( أبعد عن الشر و غنيلو ) مثل مصري مشهور و ليس سوداني ، و قد أسأت إلى الشعب إلى الشعب السوداني لعدم إدراكك لما يعنيه المثل الذي يتناقض مع صفة المروءة التي يتمتع بها الشعب السوداني و أخيراً أنت كصحفي يجب أن يكون لك مخزون جيد من المعلومات العامة و الثقافة ، و إيه أخبار صاحبك بتاع الزبادي و العدس شايفو لافي في جبل الداير يحمس في القوات المسلحة !!!


#667888 [خضر عابدين]
5.00/5 (1 صوت)

05-17-2013 10:40 PM
اوع تكون الظافر اخوان الي في حي البوستة


#667715 [الغضنفر]
5.00/5 (1 صوت)

05-17-2013 05:06 PM
و اله لو لقيت لي طريقة أكلم خالد ساتي عشان ما يبجيب خلقتك دي في البرنامج الناجح ( صالة تحرير) . ما هذا النفاق يا .... كأنك لا تعرف من أين اغتنت هذه الطغمة و أذيالها.

يا أخي جاي يوم لا ينفع فيه مال و لا بنون و لا واسطة و لا نفاق، و قبل ذلك يوم حساب الشعب السوداني لهؤلاء اللصوص ... اتق الله إن كنت مسلماً بحق

الشعب الصابر الكريم لن يحاسب فقط الساسة الذين دمروا البلد ، بل حملة أقلام الغفلة يا الظافر


أعوذ بالله


#667704 [ود فارس]
5.00/5 (1 صوت)

05-17-2013 04:55 PM
الظاهر ياود الظافر الربضته التحت التربيزة كانت كبيرة


#667675 [مناضل عجوز]
5.00/5 (1 صوت)

05-17-2013 04:15 PM
معليش يا ود الظافر ، أديتك سماح ، لان ناس الركوبة المعلقين تحت قاموا بالواجب . لكن عليك اللة خلي اللازمة بتاعة الافتتاحية
بتاعة أمريكا دي ، عشان ما يبقى موضع انتهازيتك ظاهر ،

وإنما متنا شقينا المقابر يا عبد الباقي


#667616 [الحقاني]
5.00/5 (1 صوت)

05-17-2013 02:30 PM
شرطة الحياة البرية قبل عامين قبضت وحاكمت وصادرة من مزارعين لهم مشروع موازي لاخوا الوزير وانتظروا كل هذه الفترة ليغبضوا على الوزير !!!!


#667450 [مساكين المعذبين في الارض]
5.00/5 (1 صوت)

05-17-2013 10:50 AM
والله انك ساذج او تدعي السذاجة!!يعني ابو عبدة واخوالمتعافي اصبحوا من الاسرة الراسمالية بقدرة قادر والان يمارسون التدميرالمنظم للغابات!! ياخي لوانهم اسر راسمالية شبعانة(المابتشوفوا في بيت ابوك يخلعك) لما احتاج الامر للشرطة ولناؤي بانفسهم عن السجال!!ولكنهم نبت شيطاني يسرع في النهب قبل الطوفان!!! فمن اين له اولاخيه تجارة بالمليارات وقد كانوا قبل السلطة اقل من عاديين!! ام ان السماء تمطر ذهبا علي وزراء الانقاذ بينما تمطر كدرا وطين علي المواطن!!!(وبمبدا العمريات ابل من هذه الا اذا كان وزراء للبعث او الوطني المصري) احترم عقولنا رجاء !او كلف نفسك بتحقيق بس من سماسرة العقار في الصحافة ونمرة اتنين!!! وستعرف او سل في وكالات العربات !!!


#667322 [مهاجر]
5.00/5 (1 صوت)

05-17-2013 08:02 AM
إخص على كده !!!


#667306 [Sraser]
5.00/5 (1 صوت)

05-17-2013 06:26 AM
عدد قليل من الناس يدرك ان للرئيس البشير شقيق اسمه صديق حسن يعمل طبيا في المملكة المتحدة..الاستشاري صديق عدد قليل من الناس يدرك ان للرئيس البشير شقيق اسمه صديق حسن يعمل طبيا في المملكة المتحدة..الاستشاري صديق من فرط حساسيته لايستخدم اسم العائلة الرابح في تقديم نفسه الرابح في تقديم نفسه.

هاهاها من فرط حساسيته لايستخدم اسم العائلة دة ياعمى هو عارف انو اسم البشير فى بريطانيا ما بجر لية الا البلاوي من اللاجئين و الناس الشردهم أخوة , الشينة منكورة ,

بعدين عندو مستشفى خاص فى بريطانيا جاب قروشة من وين , لو قلنا دكتور كويس ! فى كم دكتور اقدم واشهر منو فى بريطانيا عندهم مستشفيات؟
دى قروش الشعب ! نفس التربية بتاعة البشير وأخوانة شبع بعد جوع (شرفة),


#667297 [الدنقلاوي]
5.00/5 (1 صوت)

05-17-2013 05:07 AM
يا راجل اختشي وبطل البعمل فيهو دة لانو اسوأ من البيعملو الكيزان ,,, ولا زي ما قالوا العرجا لي مراحا


#667263 [ناديه فضل المولي ادريس]
5.00/5 (1 صوت)

05-17-2013 01:51 AM
والله خجلتنا!!!!!! عملتها واضحه شديد المتعفن دفع ليك كم ياود الظافر عشان تبرر افعاله وأفعال اهله القذره والتي بالطبع تجد منه كل الرعايه والحمايه والتسهيل ؟ مافي زول في البلد عندو قمبور
ياود الظافر !!!!!


عبدالباقي الظافر
عبدالباقي الظافر

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة