ولا راسمالو
06-02-2013 04:52 AM


صباح الأمس زارني إبن الجيران (طارق) وهو يعمل موظفاً صغيراً بإحدي المرافق الحكومية .. بعد التحية والسلام أعطاني صحيفة كان يحملها وهو يقول لي :
- ما معقول يا استاذ؟ معقوله بس يا استاذ؟
بعد أن هدأته قليلاً طلبت منه أن يشرح لي الموضوع فأخذ من يدي (الجريده) وطلب مني قراءة المانشيت الرئيس والذي كان يقول (زيادة تكلفة الحج 6 آلاف جنيه) ، بعد قراءتي للمانشيت سألته :
- يعني هسه تكلفة الحج هسه عملت كم ؟
- عملت 20 (مليون)
- تقصد حج (سياحي)
- سياحي شنو يا استاذ .. الحج الواااحد العادي ده
- إنتا عندكم زول عاوز يحج السنة دي؟
- يا أستاذ ده ذاااتو الجابني ليك
وبدأ ولدنا (طارق) يحكي لي في أسى عن رغبتهم منذ سنوات في تحجيج (والدتهم) .. كانو في كل عام يقوم هو وإخوته بجمع (القروش) فيفاجأون بانها (مقصرة) وأن التكلفة قد إرتفعت (ما المواد زادت وكده) ..
- أها السنة الفاتت الحج كان بي 14 مليون والقروش قصرت معانا وجمعنا 12 مليون بس .. أها المسئواين قالو السنة الجاية (اللى هي السنة دي) ح يقوموا يخفضو التكلفة من 14 .. (يعني قلنا ممكن يعملوها الإطناشر الجمعناها دي) قمنا فرحنا والحاجة ذاااتا فرحت وقالت خلاس المنادي نادا ها
- وبعدين؟
- بعدين المسؤولين الليلة يا أستاذ فاجأونا إنو زادو التكلفة تاااني وبقت 20 مليون
هسه يا أستاذ بالله الواحد يعمل شنوووووووو !
إنتهي حديث ولدنا (طارق) ولم تنته دهشتي وإستغرابي من هذه الزيادات غير المبرره في تكلفة أداء هذه الشعيرة الإسلامية .. ولأن العبدلله ليست لديه فكرة عن التكلفة الفعلية لأداء مناسك الحج فقد قمت بالإتصال بصديقنا (حاج الوسيلة) فهو (خبير حج) إذ يقوم بأداء هذه الشعيرة بصورة شبه سنوية (أقل حاجة يكون حج ليهو 30 حجة) .
- إذيك يا حاج !
- أهلا يا أستاذ
- يا حاج بس عاوز منك معلومة عن تكلفة الحج السنة دي تكون زي كم؟
- شوف يا استاذ تكلفة الحج ما بتفوت ليها خمسة ألف ريال كان بالغت !
- يعني بالسوداني كم؟
- زي 10 مليون كده !

هنا تضاعفت دهشتي .. هل يعقل أن تتربح الدولة من (شعيرة دينية) وتقوم بزيادة تكلفتها وتضاعفها كمان (100%)؟ إلا ان دهشتي قد زالت بعد أن فكرت في الموضوع بصورة شموليه .. فللحج وزارة .. والوزارة أكيد عندها وزير .. والوزير عندو أقسام والأقسام أكيد عندها رؤساء أقسام ورؤساء الأقسام عندهم موظفين والموظفين أكيد عندهم رواتب والرواتب أكيد عند الناس الفوق ديل كووووولهم .. والناس الفوق ديل كوووولهم عندهم عربات والعربات أكيد عاوزه صيانه وبنزين وزيوت وسواقين .. أها أيه رايكم علي اليمين الحج ده كده بالخسارة على الوزارة .. يعني 20 مليون دي ولا راسمالو !!

كسرة :
اقترح ضم وزارة الحج لوزارة الإستثمار

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)


تعليقات 40 | إهداء 0 | زيارات 7536

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#687111 [sudani aseel]
1.00/5 (1 صوت)

06-04-2013 03:01 AM
والله العظيم نفس المشكلة المشكلة معاي عمتي ناوية السفر ليها كم سنه كل ماتجهز ليها قريشات تقص السنة جهزت 13 مليون لكن المفاجئة بقي ب20 مليون لكن الشكوي لله


#686922 [Abu Ahmed]
0.00/5 (0 صوت)

06-03-2013 08:45 PM
وكلهم راجيهم حساب ربنا

وربنا يأخذ حقنا

يا ربنا يا ربنا


#686723 [عباس التحت اللباس]
0.00/5 (0 صوت)

06-03-2013 03:59 PM
هوالحج براهو اي حاجة زايدة 10%عندي جاري حج في 1985 باع بقرة واحدة وبي قروشو حج


#686597 [ابو ايمن الحلاوى]
0.00/5 (0 صوت)

06-03-2013 01:55 PM
فظيع ياجبره فى التغلغل الدارجى !! عافيه عليك والكلام فيك زاااتو راس مال..


#686581 [الكترابي]
0.00/5 (0 صوت)

06-03-2013 01:35 PM
السلام عليكم ارجو الجدية في مناقشة هذة الامور لانكم سلطة ولو مغيبة لان عدم الجدية هو الذي جعل اهل الانقاذ ( الغطاس ) يصدقو انفسهم واستطاعوا يقنعوا اهلنا الغبش بان القوم ليس بهم راشد ( مع العلم بانهم هم انفسهم من استخدم حلمنتيش للوصول الي عقول الناس البسطاء ) ولكن لكل مقام مقال فالبلد بالجد محتاجة لشي من جدية


#686422 [action]
0.00/5 (0 صوت)

06-03-2013 10:58 AM
قبل بضعة ايام حجيت وقابلت ناس لقو تاشيرات حج فى الوكالات باقل كتير جدا من سعر الحكومة لكن بدون خدمات رغم ذلك التكلفة اقل هل سمعتم فى الصحف تصريح السفير السعودى وهو يحزر من الفساد فى التاشيرات من اين تتسرب التاشيرات نهاية الموسم وماحدث العام الفائت كان مخجلا والحكومة قالت هذه فرص الجنوب الفائضة كيف تم بيعها بعلم الجميع


#686404 [علي خميس]
0.00/5 (0 صوت)

06-03-2013 10:41 AM
مع التقدير والإحترام للأستاذ الفاتح جبرا .... إلا أن الأمر لم يعد موضوع زيادة رسوم الحج أو الكهرباء أو جمع النفايات ... ولا الفساد أو خط هيثروا ... ذلك كله أصبح ممجوجا ولا يعني شيئا البته ... الموضوع هو الجبهة الثورية والفجر الجديد ... وإسقاط هذا النظام الفاسد أو تمكينه حسب ما جاء في دعوة الميرغني والمهدي لجماهيرهم (إن وجدت) للإنخراط في صفوف النظام لمواجهة الجبهة الثورية... وفرز الكيمان كما قال نافع.... فهل للأستاذ رأي في هذا الصدد!!!!


#686397 [mansour]
0.00/5 (0 صوت)

06-03-2013 10:35 AM
ديل اسمهم تجار الدين والزول تاجر الدين ده عايز يربح في كل حاجه
هاك دي ديل بقو خاتين ليهم صناديق في الجوامع واحد دعم القرءان الكريم وواحد دعم الزكاه وواحد دعم المابعرفوا شنو داك وغايتو انت لمن تمشي المسجد وتباري الصناديق دي تلقي نفسك صليت ودفعت ليك اكثر من عشرين جنيه ذي التقول دخلت ليك سينما ولا مسرح


#686126 [ماهر بدرالدين]
5.00/5 (1 صوت)

06-03-2013 12:32 AM
اولا استاذناالفاتح جبرا لك اكيد وكل الاحترام وثانيا يبدوا ان بن جيرانكم طارق ليس هو الوحيد الذي اصيب بخيبة امل عند معرفة تكلفة الحج لهذا العام وبكل امانة اقول لك اني ايضا احبطت كل الاحباط لاني كنت انوي ان اقوم بتحجيج الوالد وقد جمعت لهذا الامر مبلعا كنت اخاله سيغطي التكلفة قياسا لتكلفة العام المنصرم وكنت اتوقع ان تكون هناك زيادة ولكن ليس بهذه الصورة الجشعة ويبدوا ان كل السلع والحدمات يزيد سعرها الان وبضوره غير مببرة وحسب اهواء المسئولين دون النظر لحال هذا الشعب المسحوق


#686100 [محمد عثمان]
5.00/5 (1 صوت)

06-02-2013 11:42 PM
يا أستاذ والله ربنا يقبل دعائنا وعلى ما كتبت اليوم يدخلكم جنات عرضها السموات والارض وحسبنا الله ونعم الوكيل على الظالم امين يا رب


#686038 [المعتز]
0.00/5 (0 صوت)

06-02-2013 10:11 PM
السنة الجاية ب 40.000 جنيه


#685926 [ماهر]
0.00/5 (0 صوت)

06-02-2013 07:04 PM
قال السفير الهندي لدى البحرين د.موهان كومار إن 6 ملايين عامل هندي في دول التعاون يقومون بتحويل 40 مليار دولار سنويا إلى الهند، وهو ما يمثل أكثر من نصف تحويلات الهنود في العالم التي تقدر بحوالي 69 مليار دولار في 2012 بحسب تقرير البنك الدولي.
وأكد كومار أن هذا مبلغ ضخم يؤثر ايجابياً في الاقتصاد الهندي ونحن نعي أهمية هذه التحويلات المالية، ونتفهم أهمية الحفاظ على هذا المصدر الاقتصادي المهم ونقدّر دول مجلس التعاون لهذا الأمر تقديراً كبيراً.


كم عدد المغتربيين السودانيين؟ وهل طورت الدولة اليات مناسبة و استخدام شفاف لاستقطاب مدخرات المغتربيين؟


ردود على ماهر
United States [ابو ايمن الحلاوى] 06-03-2013 01:59 PM
ياخوى عند ناس الانقاذ مافى حاجه اسمها سبيلا .. عندك كاش كتير تمشى بيت الله ؛ماعندك اقعد لقط شويه شويه وكان مت النيه واصله...

European Union [المعتز] 06-02-2013 10:20 PM
السنة الجاية لمن استطاع اليه سبيلا،يعنى ممكن يبقوه ب 40.000 جنيه بالجديد


#685834 [الخيرجبارة]
0.00/5 (0 صوت)

06-02-2013 05:01 PM
بدون تعليق !!!!!


#685823 [الخيرجبارة]
0.00/5 (0 صوت)

06-02-2013 04:46 PM
كلام والله عجيب خلاص ....ربنا يولي ويحفظ


#685760 [تختخ]
5.00/5 (1 صوت)

06-02-2013 03:27 PM
أقعد ياستاذ جبرا اقترح ليهم كدا لحدي مايعينوك وزير,ههههههههههههههههههههههههههههههههههههههه


#685758 [نوال خير السيد]
0.00/5 (0 صوت)

06-02-2013 03:27 PM
لكن ناس المؤتمر الوطني ديل بمشو سنوياً على حساب منو / وكمان بحجو حج سياحي والهدايا بتاعت الرؤساء يجبوها ليكم من وين كان ما زادو التكلفة علما بأن السوق العالمية في زيادة / ربنا يورينا فيكم يوماً أسوداً كيوم عاد وثمود


#685740 [أسامة عباس]
0.00/5 (0 صوت)

06-02-2013 03:02 PM
اقتراح ياجبرا تنسى لينا موضوع الكسرات ده .. ياخى ديل مطنشين رئيسم ذاتو شوف الكسرة الجديدة ماشيه وين !!!!!


#685736 [north kordofan]
0.00/5 (0 صوت)

06-02-2013 03:00 PM
ياخى ديل لو لقو طريقة دخول الجنة ذاتو يفرضوا عليه رسوم!!.. يعنى الواحد لما يزفوه الملائكة للجنة يلقى ناس الدمغات واقفين فى باب الجنة.. عايزين دمغة جريح وزاد المجاهد ودعم القوات المسلحة لتحرير ابوكرشولا مرة تانية من ثوار كاودا!!..


#685735 [غفاف عدنان]
5.00/5 (1 صوت)

06-02-2013 02:59 PM
قال الرسول عليه أفضل الصلاة والسلام (إن لم تستح فافعل ماشئت ) ولعمرى أن ماء الحياء قد غاض من وجوه هؤلاء القوم ...فصارت إحدى شعائر الإسلام الحنيف سلعة تباع فى السوق الأسود وبالمزايدة ...ونسوا يوما لا ينفع فبه دولار ولا يورو ...ولا وزارة ولا كلاب أمن تنبح فى وجه الحق ....قاتلكم الله يا هؤلاء ولشعبى الصبر وإله كريم قدير ذو بطش وعقاب ...


#685729 [غفاف عدنان]
0.00/5 (0 صوت)

06-02-2013 02:52 PM
حسبنا الله نعم الكيل ...صدق المثل (ياكلوا مال النبى )


#685723 [انسان بسيط]
0.00/5 (0 صوت)

06-02-2013 02:43 PM
كان بس بقت للحج من استطاعه اليه سبيلا خوفنا الاوكسجين لو لقو طريقة يعملو ليهو رسوم دوله ماجديره بالاحترام ديل كوم حراميه


#685704 [3Atel]
0.00/5 (0 صوت)

06-02-2013 02:08 PM
يا ابان دقون افتونا ...الا يعتبر هذا صدا عن سبيل الله والبيت الحرام؟... لماذا تتكسبون من العبادة؟ ...لماذا تتاجرون بالدين ...؟ انتم تفسدون علينا ديننا وتكرهون الناس فيه , اخشى ان يأتى علينا يوم ندفع فيه التذاكر حتى ندخل المساجد والفتاوى دائما عندكم حاضرة .اللهم يسر لحجاج بيتك الحرام وأزل العوائق والعوارض وقطاع الطرق من طريقهم ..اللهم آمين.


#685694 [عاطف ابو الشام]
5.00/5 (2 صوت)

06-02-2013 01:59 PM
الحج بالاستطاعة وطالما النية واصلة عند الحاجة ام طارق وسعى طارق واخوانه لن يضيع سدى


#685670 [محمد سكر]
0.00/5 (0 صوت)

06-02-2013 01:42 PM
يا دكتور جبره متعك الله بالصحه والعافيه الحج فى القران لمن استطاعه اليه سبيلا لكن جماعه المؤتمر الوطنى بحجو باولادهم حسبى الله ونعم الوكيل


#685624 [عبد الله]
0.00/5 (0 صوت)

06-02-2013 01:04 PM
انت تستغرب من زيادة مصروفات الحج فى بلد فقير ومتقشف ثم نجد ان به 2540 من وزير وززير دولة !!!!
اموت واعرف يعنى ايه وزير دوله !!!!


#685607 [المغربي]
5.00/5 (1 صوت)

06-02-2013 12:44 PM
الحاج السوداني اعلى تكلفه وادنى خدمات بين حجاج العالم . الهم انا نشكو اليك قلة حيلتنا وهواننا على الناس .


#685585 [ود الجد]
5.00/5 (3 صوت)

06-02-2013 12:30 PM
استاذي الكريم جدا الفاتح جبرة
نكلفة الحج تشمل تكلفة حج الحاج زائدا اثنين من حزب المؤتمر الوطني علي حسابو يعني الحاج الواحد بدفع تكلفة ثلاثة حجاج وكل الجماعة الفي السعودية يعلمون هذا الامر ايه راي الحجاج بقي اقترح ان لا يحج احد هذا العام عشان نشوف الحرامية ديل بعملوا شنو


#685571 [Mohd]
0.00/5 (0 صوت)

06-02-2013 12:21 PM
( فللحج وزارة )

قصدك وزارة الحج والاوقاف

اللبعت اموال الاوقاف السودانية بجده (وزارة حج بالله شوفوا ودين) وتطوع وحلال وحرام

تجي تركب الحرام من أعلى هرمه

للاسف الزمن دا تخاف من الملتحين والمتحدثين باسم الدين اكثر من خوفك الشخص العادي


#685570 [علي ود أمروابة]
5.00/5 (1 صوت)

06-02-2013 12:21 PM
ممكن كمان تسميتها وزارة الاستثمار في سبيل الله!!!


#685515 [حاج قدس]
5.00/5 (1 صوت)

06-02-2013 11:41 AM
ده حالتو ما حسبتوا حق الامراء و البعثة المرافقة الذي يدفعه الحاج الغلبان .


#685514 [Ivory]
0.00/5 (0 صوت)

06-02-2013 11:41 AM
انت نسيت تكلفة بعثة الحج الرسمية الحكومية وعدد أفرادها من الرسميين والمقربين والتي يحتاج كل منها لتذاكر سفر ونثريات وإقامة وتسوق واعفاءات جمركية وحوافز ومكافآت والله فعلا ولا راسمالو مع ان بعثة الحج دي الحاج لا بشوفها ولا بسمع بيها وكضاب من يقول لبك قدمت ليهو خدمة او حتي ردت عليهو السلام


#685489 [سن ألفيل]
0.00/5 (0 صوت)

06-02-2013 11:19 AM
بالفعل بقت وزارة الحج والاستثمار من 14 مليون ل 20 مليون يعني 6 مليون في كل حاج في 36 الف حاج تطلع رقم كبير جدا كارباح في هذه السنة وكم كانت ارباح لسنة الفائتة والقبلها والقبلها الي 24 عام من الارباح
ياريت لو الناس تنضم للجبهة الثورية لكنس الفساد بقوة السلاح افضل من انشاء صندوق دعم الحاج او بعنى الحل الدائم افضل من الحل المؤقت


#685481 [عبد الواحد الميت من الاستغراب ولا معين!!]
3.00/5 (1 صوت)

06-02-2013 11:09 AM
الفاتح جبرا السودانيين ديل يا جنو ..يا ما عارفين أصول دينهم فمثلا معلوم أن إلتزام المسلم بأركان الاسلام الخمسه كفيله بإدخاله الجنه بأمر الله بالمزيكه وده الهدف الاسمى عند كافة المسلمين وكما هى الرغبه عندأصحاب الديانات الاخرى وكريم المعتقدات ودخول الجنه بالنسبه للمسلمين وهذا هو الاهم مشروطه بتمسك المسلم بل بتشبثه بالاركان الخمسه المعروفه لدى كافة المسلمين ولا سيماإذا ماإتبعت بحقها دون إرتكاب أى كبيره!! وإذا كنت محظوظا ثمة حوافز آخرى كثيره تتمثل فى (إبتلاءات) ما أنزل الله بها من سلطان تماما كهذه الابتلاءات التى يعيشها كافة السودانيين بإستثناء اولئك الذين يعيشون بين ظهرانينا وسوف يكونوا سببا مباشرا فى دخولنا الجنه ونساق اليها زمرا !!وسبحان الله الذى جعل ألاستطاعه الماليه شرطا لإقامة شعيرة الحج ،وبصراحه التشرف بزيارة بيت الله الحرام فى زمننا هذا محتاجه الى فهلوه وشطاره ولصوصيه مبتكره وجلابيه بيضاء مكوية وملفحه من القماش الفاخر ومركوب جلد نمر اصلى وعصى مصنوعه من الابنوس وكام قطعة ارض وفيلا وسياره آخر موديل والاهم من كل هذا محتاجه الى (حنجره مكربه وسبابه منتصبه كما قال أحدهم نحو السماء!!)...وياجبرا قول لولد جيرانكم إذا كانوا عايزين يحججوا والدتهم ما عليهم غير التوجه الى أقرب صيدليه تابعه للجماعه وصرف الروشته المذكوره أعلاه او إذا تعذر الامر ما عليهم غير الالتحاق بأقرب فوج ذاهب لقتل أبناء جلدته ربما يجدون وجدوا هناك نهيبه ينهبونها قد تمكنهم من تحجيج والدتهم!!وإذا تعذر أيضا ما عليهم ووالدتهم غير (الصبر) على ما أبتلينا به!!وليتكم عرفتم جزاء (الصابرين)فى الدنيا والآخره.. ولد جيرانكم ده يا جبره ما شايفنا ونحن بنقضم فى الحصرم صباح مساء؟!!


#685469 [zahi]
0.00/5 (0 صوت)

06-02-2013 10:57 AM
و اهم حاجه يا استاذ الجيوش البتحج سنويا مجاااااااااااااااااااااااااااني دي من رئيس الجمهوريه لحدي الفراش البتقع ليهو القرعه في وقايه النباتات يسدوا تكلفتم دي من وين ؟؟؟ مااااااا من المساكين ديل وبعدين ما تنسي كمان بتاع الاوقاف اللهط قروش الوزاره يعني تاني نجيب ليكم اوقاف من وين ؟؟؟ بلا يخمكم شعب نقناق خلاص .......


#685458 [shaima]
0.00/5 (0 صوت)

06-02-2013 10:52 AM
استاذ جبرا كله فساد في فساد يوم القيامة جاي وبعدين حسابهم علي الخالق بس دايراك تعمل لينا كسرة عن الشيخ دفع الله ( الشيخ المثير ) ونعمل تخمين في تصريحاته يعني المرة الجاية حيقول شنو ونعمل جائزة تعادل جائزة نوبل للشيخ دفع الله اتوقع ان يقول المرة الجاية ان تخصص حافلات او بصات او طائرات حتي واحدة للنسوان وواحدة للرجال للماشين الحج وفي الحج النسوان يحجوا يوم والرجال يوم حتي لو يوم عرفه اها رايكم شنو


#685381 [فارس عبدالرحمن]
0.00/5 (0 صوت)

06-02-2013 09:43 AM
يعنى قبل ما يعملو الوزارة دى الناس ما كانت قعد تحج ؟
وقبل ما يعملو جهاز شئون العاملين بالخارج الناس ما كانت قعد تغترب ؟
هاذان جهازان حكوميان للسرقة المقننة كغيرهما من اجهزة الدولة التى حشر فيها اسم الاسلام حشرا ولو واحد فتح خشمو واتكلم عنها يقولو عليهو كافر ولا يريد تطبيق شرع الله استغلوا الدين لتحقيق مآربهم الدنيوية والسرقة اصبحت بالفواتير المختومة والتى تحمل شعار الدولة
قبل كم يوم نشرت صحيفة الراكوبة صورة لرئيس هيئة الذكر والذاكرين المدعو الصافى جعفر (مهندس مشروع سندس الزراعى الذى حتى وقت قريب كنا لا نعلم الى اين ذهبت اموالناولكن الآن عرفنابعد مشاهدة هذه الصورة) وهو يرتدى التى شيرت مستلقيا على اريكة حول احد حمامات السباحه
مجرد سؤال : يعنى شنو الذكر والذاكرين
اجيبونا رحمكم الله
تقول لى يا استاذ جبرا الحج بقى بعشرين مليون جنيه والله يا بلاش حمام السباحه الواحد تكلفته 700 مليون جنيه دا براهو داير ليهو كم حاج ؟


#685341 [فرح ودتكتوك]
0.00/5 (0 صوت)

06-02-2013 09:02 AM
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)

استاذنا ، لقد أسمعت لو ناديت حيآ !!!!!!!!!!!!!!!!!!!!!!

يا أستاذ جبرا ، لا نشك وجود طابور خامس داخل المنظومة الحاكمة ضد السيد الرئيس ولصالح جبهة القوى الثورية . دول بيتعمدوا الاساءة للريس بإصرار شديد ، بالله كم قرار وكم توجيه صدر من السيد الرئيس وتم رميه فى سلة المهملات ؟؟؟؟؟؟؟؟؟؟؟ . بالله فى حقارة أكتر من كده ؟ . أنا لو فى مكان السيد الرئيس ، كنت قد استبدلت كل المناصب السيادية بالدولة بقادة من الجبهة الثورية ، ليموت حقارى توجيهات الريس بمغص !!!!!!! ، ولو هم رجال خليهم يمشوا يشيلوا السلاح فى كاودا . دهية تشيلهم ، وتشيل .............. ! .


#685307 [1121]
0.00/5 (0 صوت)

06-02-2013 08:00 AM
دى صكوك الغفران


#685299 [salmon]
5.00/5 (1 صوت)

06-02-2013 07:52 AM
كترت واواتك ياودجبرا في كسراتك ياودجبرا مواد الحج زادت ياودجبرا وأخلاقنا ضاقت ياودجبرا يلا معانا يا ودجبرا نشوف بركاتك يا ودجبرا ماتخذلنا ياودجبرا كبر عضلاتك يا ودجبرا ما تفارقنا يا ودجبرا تفقد كفراتك ياود جبرا الفي سيارتك ياودجبرا.


#685294 [ابو ابراهيم]
0.00/5 (0 صوت)

06-02-2013 07:33 AM
صدقني يا استاذ ديل بعد شويه (ان لم تكن معمول بها الان) حيدفعوا الميت ثمن دفنه في المقابر


ردود على ابو ابراهيم
European Union [mansour] 06-03-2013 10:59 AM
واسمها منظمه حسن الخاتمهوالله يابو ابراهيم الجماعه ديل الله يطول في عمرهم ماخلو حاجه اي حاجه بتجيب قروش عملوها شحده وشحدو نهبه ونهبو وسرقه وسرقو احتيال واحتالوووووووووو.

United States [fadeil] 06-02-2013 07:05 PM
ألم تسمع بيها من قبل ، دى معمول بيها منذ سنين مضت ولها مسمي عند الكيزان ، راجع دفاترك جيدا .


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة