المقالات
الشعر
أسماء الجنيد
ديك الحكومة !!!
ديك الحكومة !!!
06-10-2013 04:55 PM

الحمد لله على كل حال ، ابتلانا الله بي رئيس بهلواني بحق وحقيقة, لم اجد اي وصف له سواء ( ديك العدة ) المعذب ناس البيت والجيران ! غير الخراب ما منه فائدة! يعوعي بلا سبب ! يكورك بلا مناسبة ! يتلب يكسر كل الحوالينو!
قدر ما تحاحيهو ما بنقبض ولا بنحاش!! مافي طريقة تعمل عليه كنترول! ده بالضبط حال هذا المخلوق المدمر!
رئيس دولة يفترض يكون بخبرة الربع قرن الإتحكرها بالخج وبالزور إتعلم إصول الدبلوماسية والحوار وسياسة مصلحة شعبه وبلده!
لكن اجاركم الله فترة حكمه كلها تهديد و وعيد وجعجعة فارغة، وفي النهاية ببلع كضبو ناشف ويقوم تاني يدور ليه في كضبة تانية بلا خجلة!
كل يوم ينط بي إسلوب اقبح من القبلو! هل يعقل رئيس دولة في خلال 24 ساعة يصرح 3 مرات ؟ يهدد ويبلع تهديده !ويرجع في كلامه ؟؟
عملية زي دي غير هذا الديك الديناصوري مافي بني آدم سوي بعملها! والمصيبة كل البلاوي دي محسوبة علي السودان شعبا وتاريخ!!

إتضح جليا إن هذا المخلوق الخرافي، كل الناس الراصيهم حوالينو من قدامي العواجيز إلى حديثي العهد من عينة ناس ( حلاتو ) مجرد مساعدين إسميا، لا يهشوا لا ينشو! كلهم تابعين ليه إمعة وراصيهم قدامو زيادة عدد يسكت بيهم الحوالينو المداقرنو في الكرسي! ويحرق اعصاب و دم الشعب الممكون وصابر!! بدليل إنه تصرفاته كلها هوجاء تنم على عدم تفكير وعدم مشورة أي جهة تابعة ليه!
المشكلة الكبيرة إنه بتبجح ملوح بعصايتو في الناس كأنه بهش ليه في (بهائم الله يكرمكم ) تحلف تقول الأسد القدل في عرينه!! فجعتن يبقى نعامة و يبلع كلامو زي اي شافع جبان رعديد قبل ان تمر سويعات على تصريحه! وينقلب ديك ينطط من حيطة لي حيطة! وإعلام البلد الهامل الما عندو رقيب يصور وينشر! لا بختشوا ولا بتعظوا من تصرفات رئيسهم المحرجة جدا!!
المحير في الموضوع المعاه و العالمين فيها دكاترة ومثقفين! ما بخجلوا من التصرفات الصبيانية دي؟ واحد في إتنين يا ضاحكين عليه ومعتبرنو اراجوز يحركوه لفايدتهم زي ما دايرين ،يضحكوا ليه وفي نفوسهم مآرب اخري!
أو قاصدين يفضحوه أمام العالم ويورطوه كل يوم أكثر ، والقصد أجندة خفية يطفشوه بيها ويستلموا هم ما تبقى من حق الغلابة! لكن إن شاء الله كلكم سوف تذهبون قريبا لمزبلة التاريخ !!!
لو إفترضنا تجاهله لهم وعدم سمعان نصحهم، لماذا يسمحوا ببث تصريحاته البتتغير في الساعة مية مرة؟
سبحان الله هذا الديك زي ما عذب الخلوق من شعبه الطيب ، ربنا سلط عليه على قول أهلنا ( جدادة خلاء) جابها بي إيدو وحكرها في بيته!
وطبعا زي ما عارفين عادة ( جدادة الخلاء بتطرد ست البيت ) لكن من سواد نواياه ( حفر إيدو غرق ليه ) وكانت(جدادة الخلاء )اكتر تسلطا منه ! تحكمت في ست البيت وسيدالبيت العوعاي! وتسلطت وتجبرت ( وداد الخلاء) بحق الغلابة ونتفت ريش الديك الكان يتبختر ويرقص طربا بقدومها الميمون ! طلعت اشطر منه و نتفت ريشو حتى بح حلقو وفقد البوصلة! واصبح يتخبط بين جدران الحي والجيران ,يعوعي بدون مواعيد ويتلب ايضا بدون مواعيد!! فرجت فيه الله وخلقو وذهبت في حال سبيلها تتسوق باموال البلد في الأسواق العالمية تظن ان لا رقابة عليها! ناسية ان هناك رقابة وعدالة من السماء و سوف تحاسب حسابا عسيرا إن شاء الله بحق كل المظلومين .
الحمد لله دنت النهاية التي سوف يكون مسرحها عريضا ، جمهوره هذا الشعب الصامت وصابر!
نتمنى ان يقتص الشعب اولا من ديك العدة وكل ديوك الحكومة خاصة الفراريج اليانعة التي تتبختر هنا وهناك تغيظ الغلابة بنعومة ريشها المنفوش من دم وعرق المطحونين !!!

متاوقة
نقول لكل الديوك المتجبرة ومتسلطة مى دوامة ( بصلتكم بكشنوا فيها ) ودنت ساعة الصفر!
يمهل ولا يهمل
أسماء الجنيد
[email protected]


تعليقات 13 | إهداء 2 | زيارات 3549

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#694277 [اسماعيل العباسي]
2.63/5 (6 صوت)

06-11-2013 09:57 PM
معليش يا أسماء الجنيد، شوفي ليك تسمية أخرى....
ديك العدة، هي اسم الرئيس الأسبق المرحوم جعفر نميري،
لكن يمكنك إضافة الرقم (2) إن أصررت


#693941 [murtada]
2.94/5 (5 صوت)

06-11-2013 02:36 PM
مصطفي محمد صالح
اسم ثلاثي ووووووووواضح
خلاص اسيادك عرفوك
الساعه 6.pm
بصرفو ليك قريشات
قدر شكرك


#693862 [OSAMA]
4.07/5 (5 صوت)

06-11-2013 01:19 PM
I would like to see your atricle in top of alrakoba's front page because your amazing/

Good job


#693825 [على كرار]
2.63/5 (11 صوت)

06-11-2013 12:53 PM
يا بت الجنيد كلامك مضبوض 100 فى 100 ,زمان درسونا أن الحيوانات الثدية تنقسم الى فئتين, واحدة ذات الدم الحار و ألأخرى ذات الدم البارد, يا جماعة الخير ريسنا و جماعته ديل لا هم من الحار و لا البارد ديل دمهم تقيل مرة واهد.


#693725 [القافل على كرت ميت]
2.00/5 (3 صوت)

06-11-2013 11:26 AM
تقدري تقولي لي بصلتهم البكشن فيها منو يا بت الجنيد حتى نطمئن ويصحى فينا الامل من جديد؟


#693675 [محموم جداً]
2.55/5 (9 صوت)

06-11-2013 10:39 AM
المحير في هذا البلدأن تخرج القرارات الاستراتيجية بفورة حماس في لقاءات جماهيرية الغرض منها افتتاح مستشفى أو توصيل خدمات الكهرباء أو حتى نقطة أو مركز للشرطة و بعدها بعدد من الساعات تنعقد المؤسسات التشريعيةو التنفيذية و تتخذ من الفورمان الحماسي الهتافي وثيقة و ديباجة عمل لا يمكن أن يستبدل فيها حرف و غدا تنثني القوانين و دور القضاء و المحطات الاعلامية و ينبري كبارهم للدفاع عن الافكار و الحكمة في قرار الحماسة و الجوقة تبشر بالعصي المرفوعة أحيانا كثيرة أعلا من عصا الرئيس نفسه في حفل البطان و السوط ما في من يركزله و الفاتحة على القضاء و الاعلام في كل بلاد الدنيا تصدر القرارات الاستراتيجية من قصر الرئاسة بعد الحسابات الدقيقة لكل كلمة ترد في القرار و حتى سلفاكير (و د أمبارح) تعلم الرزانة في اصدار القرارات الرئاسية في المواضيع الاستراتيجية و بالرجوع الى تصريحه فقد نبش في القرار حتى أحسست بالصغار من نفسي لماذا؟ و ربط بين التفلتات الامنية عندهم و دعم الجيش السوداني و بأدلة مهما كانت صحتها من عدمه و الجنائية و موقفهم منها و اللجنة الافريقية و عملها و الانتخابات في ابيي بدون أن يقول لنا هذا الخط ألوهه عمة و اللا أحشوه تراب و اللا أعملوا منه سجوك .. دايرين حكمة .. يا ناس دايرين حكمة .. حلجتم صواميل القفل و الفتح و وجعتم إيدين المسكين البيقفل و يفتح دا.. و الدولار نفسه ما عارف يرتفع و اللا يقيف هنا دا مشتكيا من انخفاض درجات الحرارة و ارتفاع الضغط الجوي.. و القصر المن زمن جدي دا ما فيه منبر إعلامي أو متحدث باسمه عشان يقرأ القرارات الاستراتيجية عشان هي ما رخيصة تصدر من الكبير في موضوع كبير و من مكان كبير و لا داعي لانعقاد المجالس و الحوار بين رؤساء التهرير في برامج ممجوجة و يحللوا في الرؤساء سيكولوجيا و دينيا و عمري لم اسمع صوت بشير محمد سعيد بل قرأته كثيرا !!!


#693422 [ود موسي]
2.63/5 (4 صوت)

06-11-2013 01:45 AM
يا جماعة أسامة ده يمكن أسامة سيد الإسم.. بلي يخمكم كلكم يا كيزان يا منافقين ..يا حطب .


#693341 [عادل السناري]
3.00/5 (4 صوت)

06-10-2013 10:57 PM
البشير اصبح كلامه لا يعتد به ( ظراط حمير )ساكت .


#693333 [مصطفي محمد صالح]
3.63/5 (4 صوت)

06-10-2013 10:44 PM
الفي البر عوام .....سنوات الانقاذ جابهت فيها الانقاذ كل الصلف والجبروت العالمي والخيانه والعماله والارتزاق من قطاع الشمال والحركات الدارفوريه المسلحه ده بالاضافه لتسير دولاب عمل الحكومه وتنفيذ عدد مقدر من مشاريع التميه والبنيه التحتيه رغم الصلف والحقد الغربي الصهيوني .... .....لايستاهل الرئيس منك هذا التهكم لو كنتي الرئيس ومرت بك نفس الظروف لفعلتي ما فعله البشير .....انا ضد الكيزان الفسده اللصوص لكن هنالك ظروف استسنائيه مرت بيها البلاد كان يحب علي الرئيس التصرف بما املته تلك الظروف مشكلتنا في المعارضه نعارض دون معرفه حقيقيه ما يجري علي الملعب السياسي .............؟؟؟؟


ردود على مصطفي محمد صالح
United States [مدني الحبيبة] 06-11-2013 03:38 PM
يحب علي الرئيس التصرف بما املته تلك الظروف------الظروف الفي السودان دي الخلقها منوا ياابوا المفهومية ، انا ماداير استرسل في الحديث لاني شاكي في انك شخص تريد اثارة المعلقين ، لانو حاليا البشير بينوا وبين نفسوا عرف انوا ضيع البلد ، لكن مشكلة لاهاي مخلياهوا فاقد البوصلة وخايف من مصيروا لي قدام ، حاليا البشير لايثق في اي شخص حتى النائب الاول لو استلم الحكم في اي لحظة في ظرف اسبوع سوف يتم تسليم الرئيس لمحكمة الجنايات الدولية ،

European Union [فضلابي] 06-11-2013 01:58 AM
فعلا الفي البر عوام ...زي كلامك ده بقولوا زول عاقل ؟؟ عليك إنت جادي في كلامك ؟ الإنقاذ الجابهت الصلف والجبروت، ولا اهلك في كل ربوع السودان جابهوا الصلف والجبروت والتسلط والقتل والسحل من ناس الإنقاذ البتدافع عنهم بالنفاق؟؟ يااخي إنت راجل غريب جدا! يا إما إنك كوز تبعهم أو مسترزق منهم!وفي الحالتين ربنا بسألك من شهادتك الكاتبها فوق دي يوم الوقفة العظيمة.
يا عالم اتقوا الله .اي خيانة وصلف جابهتها الإنقاذ من حركات دارفورية؟ أهلك يا في دار فور قتلتهم الإنقاذ عشرات الآلاف، ورئيسك بعضم لسانه إعترف بجريمته النكراء! برضو تجي إنت تدافع عنه؟ وتنتقد من يدافع عن اهلك وعرضك؟ يا عالم خافوا الله . إن لم تستحي فقل وأفعل ما تشاء!!!!!!!!!!!!!!!!!!!

United States [Elmeidan] 06-11-2013 01:39 AM
we have seen many dictators.they are all respectful
no president shakes his booty
and lies more than his breath
the bazaar and hysterical behaviour of your president made him a clown .


#693327 [Huyam Abdullah]
3.38/5 (11 صوت)

06-10-2013 10:36 PM
كلامك جميل ولغتك العامية رصينة ولايهمك رأي الرعاع ، بساطة لغتك تليق في محتواها لأهلنا البسطاء لفهم أوصاف الشاويش ديك العدة والكلام عن البشكير لايستحق كبير عناء أو إجتهاد في اللغة لتوصيف شاويش منافق كذاب يلهث بكل ما أوتي من قوة ليكون ذيلاً للفراعنة وغداً سنراه يقلب الصفحة لأشقائنا الأثيوبيون في سد النهضة ويداهن الفراعنة... مجرد سؤال هل يستطيع الشاويش حفر ترعة من غير أخذ الإذن من الفراعنة ولماذا وانت محنط في الكرسي لمدة ربع قرن من الزمان لم تكن لك الجراءة بالتلويح فقط بتنفيذ قناة جونقلي ... الأثيوبيون رجال عرافوا حقوقم المغتصبة لقرن من الزمان ومصممون على إستردادها ... الفراعنة خدعوناعبر العصور بإسم الدين والقربي والكلام المعسول وشربوا كل حصة السودان وفي النهاية ظلوا يستهزئون من لون بشرتنا وطيبتنا ووجدوا ضالتهم في الحكومات الضعيفة التي تعاقبت على حكم رعايا السودان !!!


#693189 [اسامة]
2.69/5 (5 صوت)

06-10-2013 06:51 PM
بغض النظر من خلافك مع البشير اكتبي كلام موضوعي يليق بك ككاتبه نقرأ لها
ولا تكوني كمن يوصف بالمثل القائل : كل إناء بما فيه ينضحُ .
عفي قلمك عن المهاترات والسباب.


ردود على اسامة
United States [مدني الحبيبة] 06-11-2013 03:43 PM
هذه الكاتبة وبلغتها العامية المعبرة ، تحدثت بصدق عن سلوك هذا الرئيس الغير محترم ، وهي لم تاتي بشي من عندها هذه اخلاق رئيس اخر الزمان ، الذي لم يحترم شعبه ، هذا ليس خلاف سياسي كما تدعي يااخي الفاضل هنالك امة بحالها ضاعت بسبب ذلك الرئيس وانت تتحدث عن خلاف سياسي ، اي جهل هذا ياجماعة الخير ؟؟؟؟

[ABU SHAWARIB] 06-11-2013 02:11 PM
اسامه
كل اناء بما فيه ينضح
وده الفى اناء العزيزة بت الجنيد
انت اناءك فيهو شنو؟!

ولو ده الفى اناءك فهو أفرغ من فؤاد أم موسى

بلا عنطظة فارغة

[حليم - براغ] 06-11-2013 01:06 AM
الأخت أسماء الجنيد كاتبة شجاعة ...كتبت وبتكتب الحقيقة وبتقول رأيها بكل شفافية وأمانة!! أبقي إنت راجل وأكتب ذيها وأشتم في النظام الإرهابي !! ووصف الأخت أسماء للبشير بديك العدة في حد ذاتوه وصف جميل ومؤدب !! أنا دائماً بوصف البشير با الأحمق الغبي المجرم عدو نفسه وجاب لينا المصائب والبلاوي وأصبحنا من بلد يشار اليه بكل الكلمات الجميلة إلي بلد يشار اليه بالإرهاب والتخلف.. المهم يا أسامة في إنتظار مقال قوي من طرفك لكن خليك شجاع وأكتب إسمك وعنوانك وأرسل صورتك مثل الشجاعة أسماء الجنيد.. وله إحترم نفسك وما تعلق تعليق سخيف ذي تعليقك ده..بعدنين يا أسامة مافيش لسان أوسخ من لسان البشير حبيبك لعنة الله عليه.

United States [ممتاز] 06-10-2013 10:57 PM
اسامة بتنا قالت الكلام البعجبنا وبريحنا لو ما عاجبك كلام بت الجنيد امش موقع سائحون وله مجاهدون والراكوبة راكوبتنا خلينا ليكم البلد القطعتوها جاين لحقنا في الراكوبة بلي اخمك واخم ديك العدة بتاعك .

European Union [السنجك] 06-10-2013 09:40 PM
يا اخ أسامة ماهو الكلام الغير موضوعي في هذا المقال؟ أين المهاترات وأين السباب؟
عبارة كل إناء بما فيه ينضح ، ليس هذا مكانها على الإطلاق!كل ما ورد في المقال يشبه البشير بالكربون، لم تأتي الكاتبة بشئ من عندها. اسمح لي ان اختلف معك فيما ذهبت إليه. قلم بت الجنيد عفيف وحاد كألسيف في رقاب الكيزان.يفترض ان نشجع اقلامنا الشابة وأن لا ننتقدها نقد المكاجرة.ملاحظة اخيرة. لماذا لم تنتقد البشير في افعاله والتي بسببها كتب هذا المقال؟ انظروا للب الموضوع يرحمكم الله..


#693170 [..... جعلتي من كبشتي .....]
4.00/5 (6 صوت)

06-10-2013 06:33 PM
ديك الحكومة !!!


يعوعي وبصلته في النار!!!


#693099 [chinma]
3.98/5 (11 صوت)

06-10-2013 05:04 PM
والله يا بت العم إنتي بتريحيني راحة شديدة بكلامك ومقالاتك الجميلة تجاه هؤلاء الإنكشاريين الأجلاف


ردود على chinma
United States [yassom] 06-10-2013 05:15 PM
رئيس دولة يفترض يكون بخبرة الربع قرن الإتحكرها بالخج وبالزور إتعلم إصول الدبلوماسية والحوار وسياسة مصلحة شعبه وبلده!


أسماء الجنيد
أسماء الجنيد

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة