المقالات
السياسة
هو فضل فيها خميس؟
هو فضل فيها خميس؟
06-14-2013 05:35 AM

* قديما قالوا إن أهل الغرب يأكلون الدخن وأهل الجنوب يأكلون البفرة وأهل الشرق يأكلون الذرة الرفيعة أما أهل الجزيرة فيأكلون الخميس. فهل مازالوا كذلك رغم وجبة السبت الدسمة؟ لاحظ أحدهم أن كل الانقلابات الناجحة والفاشلة ليس لأبناء الجزيرة فيها نصيب لأنهم يسافرون لأهلهم وكل التخطيطات تكون في أمسيات الخميس أيام كانت الخميسات هاجة ماجة بالصفقة والرقيص وحاجات تانية حامياني.
* طلب من صديق له أن يأتيه مساء الخميس لكي يمضيا معا سهرة مبهجة فقال له خميس وين دا؟ هو فضل فيها خميس؟ انت ما قاعد تسمع أخبار أبو كرشولا وأنبوب النفط وسد اللألفية وغنماية ناس بهية؟ فرد عليه ومع ذلك في ناس تعرس وتنبسط وتبتهج وتعمل السبعة وذمتها.
* قال له والله نفسي أعرف البلد دي ماشة على وين؟ فرد عليه بالقول تعرف عشان تعمل شنو؟ بس عشان أكون على علم؟ وافرض إنك ما علمت حيحصل شنو؟ ولا شئ كل حاجة حتمضي وفي النهاية الباقي باقي؟ والله معاك حق وبيني وبينك الجهل بالشيء ولا العلم به وأصلو العلم ممحوق وكتر الفهم ما بحوق.
* شفت المكان الواقفين فيهو دا؟ تقصد الكافتيريا دي؟ نعم. الحتة دي كانت واقعة في مملكة اكسوم ثم وقعت في مملكة نبتة ثم كوش ثم مملكة مروي ثم مملكة علوة وبعداك كانت في دولة الفونج والإمام المهدي ذاتو وقف في الحتة دي بعد شهر من موت غردون. ثم انتقلت للسودان التركي المصري ثم السودان الانجليزي ثم سودان المليون ميل مربع ثم سودان 750 الف ميل وبعد خمسمائة سنة ممكن تكون واقعة في دولة تانية. فرد عليه خمسمائة سنة كتيرة شوية خليها خمسين سنة. برضو أحسن من الخمسة.
* واحدين قالوا في خلايا تتبع للحركة الثورية ومنتظرة ساعة الصفر وواحدين قالوا في حسنينات تابعة لإيران ومنتظرة إشارة من حسن نصر الله وواحدين قالوا في خلايا نائمة تابعة لإثيوبيا من أجل السد وواحدين قالوا في خلايا تابعة لمصر لهدم السد وواحدين قالوا ضامر هافا وواحدين قالوا شفنا الشافا وما شوفتوها ياخلايا,,, آمنة....
* مع لام أكول
الدكتور لام أكول من السياسيين الذين جاءوا للسياسة من الهندسة الأمر الذي أورثه دقة ومطالبة الآخرين بذات الدقة ففي يوم قريب مضى ذهبت إليه معزيا في شقيقه وتجاذبت معه أطراف الحديث وفقال لي إنه من أخطاء الخرطوم أنها تتعامل مع جوبا على أساس أنها مجموعات منقسمة على بعضها البعض ولكنني وفي مقال نشر يوم الأحد الماضي في هذا المكان قلت من أخطاء الخرطوم أنها لا تدري أن الحركة الشعبية على قلب رجل واحد في دعم الجبهة الثورية وأسست ذلك على قول الدكتور لام حيث ذكرته بالاسم مع أن الكلام معه كان عاما ولم نتعرض للعمل المسلح من قريب او من بعيد الأمر الذي أزعج دكتور لام كثيرا وأقلقه عليه نعتذر له ونأسف لما سببناه له من إزعاج.

السوداني


تعليقات 8 | إهداء 0 | زيارات 2775

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#697716 [سارة]
0.00/5 (0 صوت)

06-15-2013 07:33 PM
هذا البوني مشكوك في درجته العلمية ...
والدليل واضح قدامكم ..
دي طريقة بروف ؟


#697000 [نجم]
0.00/5 (0 صوت)

06-15-2013 12:19 AM
الكيزان ديل ساوين ليك شنو يادكتور؟! على كل انت معذور لانه ما عندك حيلة.. أما هم فملعونون لانهم لا يتورعون عن فعل شئ وان قبح..


#696923 [سودانى سوى و معتدل]
0.00/5 (0 صوت)

06-14-2013 09:45 PM
يا بونى و الله انا بخاف منك.. تذكر يوم هزيمه الهلال من مازيمبى كان هناك لقاء على الهواء مباشر فى اذاعه امدمان مع الارباب و مجموعه من الهلالاب و الرشيد بدوى عبيد و الكل متفائل مازمنبى دى كان مرق مننا بى نص دسته شويه و بعدين انت عملت مداخله و قلت (يا اخونا الثقه الشديده دى اناشايف وراها كارثه) و بالفعل كان يوم كارثى لا ينسى فى تاريخ الكره السودانيه


#696886 [سودانى Not منفرج الأسارير]
3.00/5 (1 صوت)

06-14-2013 08:35 PM
يا د. يا عبلطيف يا بونى.. بعد كلام نافع دا عن "الخميس" اللى الناس كانو فاكرنو "عرمرم" ومتهيبنو بأسانيدو ألأستراتيجيه بانواعا ..قوات نظاميه متعددة المرتكزات بمواعين تحصيل مشرعه ومترعه: شرطه.. دفاع شعبى.. شرطه شعبيه..جمارك .. حرس صيد وبيئه واخيرا بنيان مرصوص ولسّا ساقية التعبئه والنفره الدفاعيه مدوّره ..وبعد دا كووولو نافع يقول .. "الخميس موش حيقدر على الجبهه الثوريه!!! دا كلام اصلو ما معقول .. يعنى اتاريها الناس قاعده "mother of his jaw" حسب آخر صيحات الترجمه..بعد دا باقيلك فضّل فيها "خميس" .. ابناء بمبه بيؤولو انو الحكايه خلصت و"مؤرفه" وآخرون من الناطقين بغير العربيه يقولون : "The game is over" وانت وناس اللعوته نقولو قول واسحق احمد فضل الله عندو قول وودالوالى ومصطفى استثمار وسنداس فداسى قاعدينلهم فوق راى .. والشعب الودانى يقول :"والليالى من الزمان حبالى .. نحن قولنا خلّو.. ما ضرورى.." بس من يعش ير..
وفى النهايه: القول قول الله".


#696786 [ابعنجه]
4.50/5 (2 صوت)

06-14-2013 06:24 PM
وحتتك دى ذاتا مر بيها غردون والمهدى والخليفه وابعنجه الكبير والصغير وكتشنر وونجت وازهرى ونكسون والملكه وبرزنيف وشوين لاى وهيلاسلاسى وتيتو ونهرو وشاوسيسكو وعبدالناصر والقذافى والملك فيصل. و و ...
وخربانه ام بناية قش*


#696732 [راصد متابع]
3.00/5 (1 صوت)

06-14-2013 05:06 PM
كلما اقرأ للبوني كلما تأكد لي صدق مقولة ان المثقفين الذاتيين اشد اعداءالتغيير ضراوة واخطر عقبة يستخدمها المستبد لتطفيش جهودالاصلاح..هذا البروف دائما يسمكر تغليقاته وتلميحاته لمصلحة النظام او للمجموعة الاجتماعية التي تبادل النظام السند والمصالح...


#696545 [التــــــــــــــــــــــــــــــــــــــــــــائه]
5.00/5 (2 صوت)

06-14-2013 11:34 AM
طيب يابونى الراجل قال ليك كلام عابر فى بيت عزاء .. إنت فى داعى للشمارات
يوما ما الخرطوم كان فيها كارلوس وكان فيها بن لادن وكان فيها عمر عبدالرحمن
ومافى اى شئ مستبعد خلايا من حماس من حزب الله من الاحباش من المصريين كل شئ وارد
فى عهد ناس على عثمان ونافع والجاز .. ربك استر ياود اللعوتة تحمد سيدك التلاجه
مليانه لحمه ضأن وفاكهه والعربيه تنكيها مليان بنزين ويوم الجمعه الجلابيه
الزبده والشال وتوزيع الابتسامات للناس الحلوه وربنا ازيد .. ولكن للاسف الشديد السودان لحق امات طه ..


#696431 [سادا]
4.50/5 (2 صوت)

06-14-2013 08:23 AM
كيف تتهم الحركة الشعبية بتفجير الخط؟تفجير الخط تم بواسطة مجموعة متمرده من المسيرية, بعد اعلانهم عن ذلك , انت دائما تطلق اتهامات بدون ادلة , وكلنا نعرف السبب وهو موقفك الجبان مع الانقاذيين وهذا ليس بجديد عليك وفي رأي هذا المسمى الهندي عز الدين برغم غبائه وعنصريته يعتبر اشجع منك لانه حدد موقفه بتأيده هذا النظام ولكن اصحاب المواقف الجبانة مثلك هم اكثر خطوره علينا في زرع الفتن من هذا الطفل المسمى الهندي, ارجو منك في مقالاتك الاستعانة بأدله دامغة وواضحة, حسبنا الله ونعم الوكيل صحفي في عمرك ويقول ان الدليل على تفجير الانبوب بواسطة الحركة الشعبية والتخطيط له بواسطة حكومة الجنوب هو ارهاصات لام اكول لانه دخل السياسة من باب الهندسة ؟ يعني بهذه النظرية اي تصريح سياسي يأتي من الدموي صلاح قوش لابارك الله فيه يعتبر كلام قانوني ويعول عليه لانه دخل السياسة من باب الهندسة ايضا, اللهم ارحمنا من هؤلاء الناس الذين يبنون اتهاماتهم من تحليلات كان مصدرها ونسات في بيوت البكيات.


د.عبد اللطيف البوني
د.عبد اللطيف البوني

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة