كرت ضغط وكده
06-18-2013 09:17 AM


من مزايانا دون شعوب الله أننا لا نحسن الترتيب لما هو آت رغم علمنا بأنه لا محالة آت فالطالب عندنا لا يرتب حالو (بالتحصيل والمذاكرة) وهو يعلم علم اليقين بأن الإمتحان آت لا ريب فيه فيقضي معظم العام الدراسي في (الكافتيريا) وأركان النقاش والشنو ما عارف حتي إذا ما إقترب الإمتحان إمتلأت محلات تصوير المستندات وكل يحاول أن يستذكر في(يوم) ما تم تدريسه في (سنة) !!
وتعد عملية الإستعدادات للخريف مثالا يضرب لعدم الترتيب والتجهيز لما هو لا محالة آت فتجد المحليات في إنشغال دائم بالتحصيل والكشات والمرور على ستات الشاي والمطاعم والكافتيريات حتي حتى إذا ما جاء الخريف (فجأتن) ظهر التجهيز وبان وعرفت أنك في (السودان) حيث تمتلئ الميادين بالمياه والأسواق بالبرك والأحياء بالمستنقعات !
هكذا هو حالنا .. لا نحسن التجهيز والترتيب لما نعلم انه لا محالة آت .. ومقالنا هذا خير شاهد ودليل فقد علم المسؤولون بالحكومة أن خيار إنفصال الجنوب هو الخيار الراجح إلا أنهم لم يجهزوا أنفسهم لذلك فتضرر الكثيرون من عدم التجهيز هذا ودونكم على سبيل المثال طلاب جامعة أعالي النيل وكلية الطب على وجه التحديد فقد كان هؤلاء الطلاب يتلقون العلم في أمن وأمان ثم جاء الإنفصال (المرجح) وبدلا من أن تكون الحكومة قد وفرت لهم جامعة بديلة مجهزة لإستيعابهم تم إنشاء جامعة على عجل تفتقر إلى أبسط المقومات الضرورية سميت (جامعة بحري) .. ولم ينتقل الطلاب مباشرة لهذه الجامعة بل قضوا عاما دراسيا كاملا (ضائعاً) بحجة أن الإنشاءآت لم تكتمل والغريب في الأمر ان الطلاب لا زالوا يقطنون في نفس المبنى القديم ولا تشييد ولا يحزنون .
وليت الأمر قد توقف عند هذه السنة التي ضاعت من أعمار هؤلاء الطلاب ولكن (كلو محصل بعضو) إذ أن هنالك عجز في هيئة التدريس ولا توجد زيارات للمستشفيات والجو العام غير مهيأ للدراسة .. المكتبه مولعه نار المكيفات اتركبت ليها سنة ولسه ما اتوصلت ليها كهرباء (ليه ما تعرف؟) .. المشرحة تعاني من عدم وجود جثث جديدة (مع إنو المشرحة الحتة الوحيده التكييفا شغال كويس) … هنالك أزمة (موية شراب) بسبب تعطل وعدم كفاية (مبردات المياه) طاولات الدراسة (لاحقة الصح) ولا تصلح للتعامل الادمي وتعتبر السبب الرئيس في تمزيق ملابس الطلاب !
لقد صبر الطلاب على هذا الوضع المزري منذ تأسيس الجامعه (تقريبا سنه ونص ) ولكن عندما علموا أنه لا توجد حتي بارقة أمل في التصحيح فقد قرروا أن يعتصموا لتوصيل رسالتهم لإدارة الجامعة (الداقه طناش) وكما قال لي أحدهم (القصة أصلو يا أستاذ ما فارقه معانا لو قفلوا لينا الجامعة يعني شنو ما قفلت قبل كده) !
وإختار الطلاب أن يكون إعتصامهم بصورة حضارية فقد تم إختيار لجنة من طلاب سنه تالته (انترميديت ) لحمل وتسليم عريضة بها جميع المطالب للسيد مسجل الكليه الموقر والذي وعدهم بتنفيذها .. ولكن بعض مضي أسابيع (والحال في حالو) إتضح إنو (إدارة الكليه) لم تشرع في تنفيذ أي مطلب من المطالب وهنا صاح الطلاب (إذن هو الاعتصام ليس سواه) وأعتصموا ليهم (يوم واااحد) خاطبهم فيه السيد مدير الكليه شخصيا قائلاً لهم (أدونا مهله ١٠ ايام ننفذ ليكم فيها مطالبكم او ع اقل تقدير نبدا في التنفيذ) فقال الطلاب سمعاً وطاعة والنشوف آخرتا .
نشوف حصل شنو؟ اثناء المهله (الفوق دي) ونظرا لكثرة أعداد طلاب السنة الأولى (ما مفتوحة قبول خاص بالملايين وكده) والذين لا تستوعبهم قاعات الكلية بالخرطوم تلاته فقد تم تخصيص قاعات لهم جوار المشرحه بمستشفى امدرمان .. ولسبب أو أخر قامت مواسير المشرحه فتحت في مواسير الكولرات) والطلاب شربو ليك داك يا الفورملين (ماده تستخدم لتحنيط وحفظ الجثث) .. وبدأوا يعانون من ضيق في التنفس وتم تسجيل 33 حالة تسمم تم إسعافها بواسطة العناية الإلهية بعد أن رفضت بعض المستشفيات إستقبالها .
طيب .. نجي نشوف تعليق إدارة الكلية على قصة تسمم الطلاب دي شنو؟ لقد صرحت إدارة الكلية المبجلة بأنو القصة دي حركة من الطلاب ساااكت وانو هم الختوا الفورمالين في المويه ككرت ضغط وكده عشان ينفذوا ليهم مطالبهم !!

كسرة :
بحري مين ؟ تعالوا المقال الجاي نشوف الحاصل في صيدلة الخرطوم !! .. هو التعليم إنتهى من شوية !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)؟


تعليقات 13 | إهداء 0 | زيارات 8230

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#701449 [الفكى عبدالرحمن البطحانى]
1.00/5 (1 صوت)

06-19-2013 08:25 PM
اخى الفتتح الله يديك العافيه هى لوبقت على جامعة بحرى بسيطه - المصيبه في ان الشعب الصابر ما عارف حتفرج متين ومامواله النهبوها ثوار 89 حاترجع ليه متين - الله يصبروا ويصلح حالو


#700362 [عبد الواحد الميت من الاستغراب ولا معين!!]
0.00/5 (0 صوت)

06-18-2013 04:51 PM
ياجبرا بالله عليكم (كفاية) تنظير وأسئله على هامش مقالاتكم لاتجد إجابه،،تخيل أنا بعرف كذا واحد إتولدوا بعد يونيو 89وقضوا نحبهم والبشير ما (أنفك)حاكما للسودان ثم أتذكر جارى العزيز الذى راح ضحيه فى اول كشف أعدته الجماعه وأحيل بموجبه الى المعاش ما لسبب إلا لانه كان يعاقر الخمر فى غير ساعات دوامه الرسمى والرجل خرج رغما عن أنفه كما الالاف من الخدمه رغم كفائاتهم النادره وشرب الخمر أتخذه نظام الانقاذ سببا وحجه وأستطاع أن (يفور على رأى المرشد السابق مسيو عاكف لجماعة الاخوان المسلمين فى مصر!!)والهدف كان تأمين نظامهم بعشيرتهم الذين جاؤا من كل حدب وصوب حتى أشقاء (المايتسماش وخاله العزير الذى لا يرد له طلب كان من ضمن جوقة العائدين)وبالعوده لقصة لصديقنا الذى تم (تفويره) كان أمنية حياته أن يكون أحد الشهود على سقوط النظام والرجل كان يقول لنا عقب كل (كأس كان يتجرعه) أن النظام لم يبقى فى الحكم أكثر من أسبوع وظل على هذا الحال الى أن وافته المنيه ولم يمهله القدر لرؤية النظام وهو يتهاوى!!وأخشى ما أخشاه عليكم وعلينا يا صديقى أن ينعانا وإياكم الناعى ونكون (لبانه) فى نشرة السادسه والنصف فى إذاعة جمهورية السودان ونحن ننتقد ما أنتقدناه بالامس والاول من أمس وهكذا دواليك!!ونصبح ذكرى لابنائنا وأحفادنا والنظام فى حاله لا يتبدل ولا يتغير ..لا يموتوا ولا يفوتوا !!وحتى نترك للابناء والاحفاد ذكرى عطره ما علينا غير تغيير (الاستراتيجيه)التى أثبتت فشلها كأن نؤسس نحن او ندفع الشباب الى تكوين تنظيم أشبه بالتنظيم القائم الان فى مصر الشقيقه يدعوا الى (التمرد)على النظام وأن تبداء الدعوه من موقع الراكوبه وتصمم إدارتها كشف يستطلع فيه رأى الشباب إذا كانوا يقبلون تنظيم يحمل هذا الاسم وطرحه وسط الشباب ثم تنداح الفكره لتشمل الفئويون والعمال ومنظمات المجتمع المدنى المختلفه ومن ثم تفعيل (التكتيك) السودانى المجرب من قبل ألا وهو إعلان (العصيان المنى)..والله نفسى أعيش وارى كيف سيسقط هذا النظام وإن كانت ستحال اوارقه الى مفتى الجمهوريه قبل أن تدركهم (لاهاى)..ديل كدايس وبسبعه ارواح!!.


ردود على عبد الواحد الميت من الاستغراب ولا معين!!
United States [عبد الواحد الميت من الاستغراب ولا معين!!] 06-19-2013 09:39 AM
ياشيخنا طبعا لم يغيب عن بالى وانا أتقدم بإقتراحى المجهود التى تقوم بها الجبهه الثوريه ولكن عز علَى أن أراهم وهم يصفقون بيد واحده!!ولا بد لنا من تقديم يد المساعده حتى يكتمل الايقاع ويغور هذا النظام الى جهنم وبئس المهاد بإذن الواحد القهار.

[Rebel] 06-18-2013 07:08 PM
* يا اخى و الله إنت بالك واسع بجد.. شنو تانى نؤسس تنظيم، و الراكوبه تصمم إستطلاع..إنت قايل عمرنا كم؟ و الآ عايزنا نحصل صاحبك بتاع العرقى ده قبل ما نضوق "حلوهم"؟
* يا اخى ما اهو فى تنظيم الجبهه الثوريه جاهز و مقنطر و قرب للخرطوم، ما ننضما ليهم و خلاص. الجماعه ذاتم اقتنعوا و بحضروا فى 27 معبر، التقول نحن فى فلسطين!


#700317 [ود امبعلو]
0.00/5 (0 صوت)

06-18-2013 04:09 PM
قريب يالفاتح يا اخوي حتكون الكسرة التانيه علي النحو التالي
اخبار توجيهات اارئيس ( السابق ) بخصوص ملف هيثرو شنو ( و )+( و) +( و )+( و) ؟
اها دحين جهز نفسك واردح ساي ماها ديموقراطيه حرم زول يسالك مافي


#700228 [AMJAD]
0.00/5 (0 صوت)

06-18-2013 02:14 PM
يا ود جبره النظام فعليا سقط و هم اعلنوا ذلك , فى هذه الظروف يجب ان تتكون حكومة ظل للمقاومه ممكن يكون مقرها كاودا و الحكومه للاتى;-
١-مسئوله من تنظيم الثورة
٢-للاتصال و الدعم الداخلى و الخارجى
٣-طرح برنامج الثوره و الية الحكم بعد حكومة الانقاذ
٤-التجهيز للدستور
٥-توحيد الشعب بكل اطيافه حتى لا تحصل فوضى بعد الثوره
٦-التنسيق مع المنظمات الدوليه لدعم الثوره
٧-وضع برامج اسعافية للخدمات المتدهورة من تعليم و صحة
٨-تجهيز برامج لاعادة المفصولين من المدنيين و العسكريين فى بناء مؤسسات الدوله المنهارة
بعدين موضوع الجامعات بتعالج برواقه و على اسس علميه , حاليا خريج الطب واقف فى صف التوظيف و الدور له بعد ٥ سنوات و بقانون مزاولة مهنة الطب لا يحق له مزاولة المهنه لانو راسو صار فارغ قرعوبه كدى ثبت شويه و نحرك ناس كاودا للخرطوم و بعدين العرجه بترجع لمراحها يا ودجبره


#700175 [ابو علاء السنارى]
0.00/5 (0 صوت)

06-18-2013 01:14 PM
خط هيثرو للذى لا يعرفه هو عباررة خط للطيران السوادانى فى بريطانيا منذا ايام الاستعمار وقامت ال حكومة ببيعه عام 2006


ردود على ابو علاء السنارى
United States [fadeil] 06-19-2013 11:32 AM
خط هثرو الذى تتحدثون عنه هو خط طيران بمطار هثرو تم اهداؤه لحكومه السوان من ملكة بريطانيا ابان عهد الاستعمار ليمكن الطائرات القادمه من السودان الهبوط عليه .

United States [المتفائلة جدا] 06-19-2013 12:01 AM
خط الخرطوم لندن هيثرو أفتتح منذ عام 1947


#700148 [ابوايمن الحلاوى]
4.50/5 (2 صوت)

06-18-2013 12:52 PM
الاستاذ ود جبره! اقترح عليك باضافة حرف (ك) فى اخر الواوات وبعدين تضرب السكلى!!!!


#700095 [8855]
3.00/5 (2 صوت)

06-18-2013 12:14 PM
لا حول ولا قوة الا بالله العلي العظيم وكل هذا يحصل في بلادي وبرضوا تقول لي ثورة التعليم العالي اقصد التأليم العالي
ليه كل العذاب ليه كل الالم ولسه...... الثوره ماشه وبقاسي الالم
مع الاعتذار للاغنيه


#700055 [فهيمه]
5.00/5 (2 صوت)

06-18-2013 11:42 AM
والله ان بقترح يا استاذ الفاتح يكون عندك عمود ثابت في كل الصحف السيارة عشان المواضيع والمواجيع كثيرة ولو مسكتها واحده واحده عايزه ليها سنين وكفاية علينا الخمسه وعشرين سنه الحاتتكلم في مواضيعها


#700038 [mansour]
5.00/5 (1 صوت)

06-18-2013 11:34 AM
ده كلام فارغ والحكومه مافاضيه من نهب المال العام والذي اصبح بقدره قادر مال خاص يخص المتنفذين كل في مجال عمله فالاستثمال تخص ايراداتها الوزير الطفل المعجزه والماليه ايراداتها تخص الوزير تاجر المواشي سابقاوالطاقه والزراعه وكل واحد ينهب ومافاضين


#700024 [حمدان]
0.00/5 (0 صوت)

06-18-2013 11:24 AM
الاخ الفاتح جبرا هل من الممكن ان نعرف شنو خط هيثروالذى تضعه في اخر مقالاتك؟افيدنا افادك الله


ردود على حمدان
United States [hanankokoabas] 06-18-2013 04:09 PM
الاخ حمدان بالغت عديل لكترة ما الحكومة ضاربة طناش نسيت خط هثرو انت بقيت زى الزول البقرا الجريدة لامن يصل السطر التانى من المقال ينسى السطر الاول

United States [fattah] 06-18-2013 01:55 PM
خط هثرو ده كان خط مواصلات السجانه بالنص ويربط السوق العربى بسوق السجانه ومنه الى السوق الشعبى على طول وبسبب العولمه والحداثه توقف فى الوقت الحالى وانشاء الله سوف يتم تشغيله قريبا عندما تعود الحياه كما كانت زمان ايام سينما الوطنيه جنوب والوطنيه غرب ولو ماعجبوك ديل تتوكل على الله وتدخل النيلين اصلهم جميعهم قريبين من الخط أنف الزكر وحمدلله ع السلامه كنت نائم فى كاب الجداد ولا ايه

[abdo] 06-18-2013 01:37 PM
انت قاعد وين يا استاذ ورينا عشان نفهمك لانو الخط ده اشهر من 999 الظاهر انك كنت بعيد شديد

[ابوعلي] 06-18-2013 12:37 PM
ياحمدان امشي ل عمك قوقل واكتب[ملف خط هيثرو] ح يشرح ليك القصة من البداية


#700010 [لينا الله وعيشة السوق]
5.00/5 (1 صوت)

06-18-2013 11:16 AM
مالي أراكم تكرهون الجنة !!
الم تسمعوا حديث (من جاءه أجله وهو يطلب العلم لقي الله ولم يكن بينه وبين النبيين إلا درجة النبوة)
.
..
...
....
...
..
.
اها بعد دا بتدورو شهادة الدنيا ياجماعة ولا اخيرلكم شهادة الآخرة ؟؟
يا اخونا الدنيا دي دار فناء والآخرة زي ما انتو عارفين دار بقاء
دحين نتعولق يعني ونختار الفانية وديك عينا ع دار البقاء؟؟ بتبقى؟؟
ثم يا اخوانا يمكن انتو كلكم عارفين انو نحنا مستهدفين والكفار ديل
ما حيهدا ليهم بال إلا لم يدمرو عقيدتنا واسلامنا ولكن هيهات ونقوليهم
مش لو شربتونا الفورملين يمين لو شربتونا السم الزعاف يمين من
ذينا ما بنحيد و البتجينا من الله قبلانيننها والليلة ياموت يا حياة وخاتي
البختار الوسط.
.
.
.
.
.
أوووو نسيت " الله اكبر الله اكبر " في سبيل الله قمنا نبتغي رفع اللواء, فليعد للدين مجده وليعد للدين عزه, ولترق منّا الدماء ولترق منّا الدماء, لا لدنيا قد عملنا نحن لدين فداء


ردود على لينا الله وعيشة السوق
[سادا] 06-18-2013 04:09 PM
الكفار علاقتهم شنو بي اخطاء المسلمين؟ والله انت غريب الاوار ومافاهم اي حاجة


#699882 [مصطفي حسين]
4.00/5 (2 صوت)

06-18-2013 10:04 AM
الاستاذ الجليل . حقآ نحن شعب لايحسن الترتيب والا لماذ لم نتحول الي جامعات اخري ونحن نعلم ان الحكومه لن ترتب لتوفبق اوضاعنا .


#699844 [abufulla]
0.00/5 (0 صوت)

06-18-2013 09:38 AM
يا استاذ جبر
سلام
انت تاعب نفسك
ساكت
الناس ديل دمهم تقل شدييييييييييييييييييييييد
والكلام مابودى ولابجيب معاهم شىء
بس شوف ردة فعل كلام
المائة يوم كان كيف


ردود على abufulla
United States [khairbarakat] 06-18-2013 04:18 PM
اللهم أكفنا وأكف الإنغاز شر المرجفين الزين يريدون أن يسغطو الإنغاز


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة