نفسك فى شنو؟ا
12-06-2010 11:44 AM

ساخر سبيل

نفسك فى شنو؟

الفاتح جبرا

نفسك فى قروش كتيرة؟ ياخى القروش دى فتنة أخير ليكا الفقر الإنتا فيهو ده .. لو هسه عملتا ليكا شوية قريشات وبقيت غنى ح ترتكب آثام وح تدخل النار

نفسك تكون مسئول؟ لازم تراجع الطبيب النفسى .. ده هسه كلام يقولوا زول عاقل !

نفسك فى لحمة؟ : اللحمه يا أستاذ ثبت علمياً إنها مضرة بالصحة وبتجيب أمراض كتيره خاصة اللحمة (الكيرى) الأنتا بتاكل منها دى لأنها ما معروفه لحمت شنو؟ والناس بقت ما عندها ذمة ممكن تضبح (أى حاجة) عشان كده خليك فى السليم وأبعد عن الحاجة دى ! وبعدين ياخى الفول ده مالو؟ عيبو ليا ؟ ما برضو فيهو (بروطين) !

نفسك تتفسح إنتا وخطيبتك ؟ ما عندك أى مشكلة طوااالى وعلى حدائق (حبيبى مفلس) ما ح تكلفك الشغلانه خمسة جنيه .. كيسين تسالى .. كيسين فول حاجات .. كبايتين شاى .. إتنين حاجة باردة .. بس لو لموا فيك ناس النظام العام إحتمال المسألة تكلفك أكتر شوية !

نفسك تتوظف؟ : بسيطة .. تمشى طواالى تقابل المسئول القال ح يوفر للخريجين (مليون فرصة وظيفية) وتقول ليهو بالله خلينى أكون (واحد فى المليون) !

نفسك تتزوج؟ : ما تتزوج ليه؟ مش ما عندك التكتح ؟ تتزوج ونص وخمسة وأهو أخوانا العلماء بارك الله فيهم وأثابهم ثواباً كثيراً سهلوا ليكا المسألة وعندك زواج المصواب وزواج المسيار وزواج المصياف ، وزواج المسفار، وزواج المطيار ، وزواج المصياع وزواج المحجاج ، وزواج المسياق .. المهم ما مطلوب منك فى كل الأنكحة المشروعة دى غير (مجهودك الفردى) !

نفسك يكون عندك قطعة سكنية؟ ياخى والله إنتا متفائل جداً .. هو لمن السودان (كان) مليون ميل مربع ما لقيت ليكا قطعة فى الخطة السكنية عاوز تلاقى ليكا قطعه بعد ما بقى مليون متر مربع ؟

نفسك فى ملابس أنيقة؟ يا خى عشان تلبس ليكا لبسة أنيقة عاوز ليك مرتب شهرين بى حالهم .. ياخى ألبس من (المرحوم كان قدرك) هدوم سكند هاند لكن قيافة وآخر وجاهه وتناسب دخلك المهدود

نفسك فى تلفزيون ملون؟ والله الظاهر إنتا ح تجيبوا لى نفسك براك .. ح تجيك المذيعة أم كشاكيش كتيرة ديك وتقعد كل دقيقة تأشر ليك بى أيدا عشان تشوف نقشة الحنة ويجيك بعدها المذيع القاعد يسبل فى عيونو وكل دقيقتين يقعد يقهى ليكا فى سقف الأستديو .. والمصيبة تقوم تشاهد ليك مباراة (غمة) !

نفسك تتعالج ؟ يا أستاذ الشافى الله .. خليك من مسألة الأطباء والمستوصفات دى عشان ممكن يعالجوا ليكا حاجة ويبوظوا ليكا عشرين حاجه ! المهم لو ما سمعتا كلامى وربنا سهل ليكا ومشيت ودخلتا عملية فنصيحة أخوية أعمل جرد لأعضاءك قبل العملية وأكتبهم (للورثة) عشان يراجعوا (العدد) وهم بيغسلوا فيك !

نفسك تلبس كويس؟ : طوااالى ييم وجهك شطر (خلف الجامع الكبير) حيث سوق الحرامية وألبس من (المرحوم كان قدرك) .هدوم مستعمله وآخر وجاهة..و رخيصه.. وقدر ميزانيتك (ده لو عند ميزانية) من أساسو



نفسك أولادك يتعلموا؟ ح تجيب ليهم كل يوم قروش طباشير وقروش كهرباء للمدرسة وموية للمدرسة وقروش فطور للأساتذة وقروش طباعة إمتحانات وقروش مش عارف ايه من وين؟ وبعدين أفرض قعدت تصرف كده لحدت ما إتخرجوا ح يشتغلوا وين؟ أسمع كلامى خليك من مسألة التعليم دى خلى الأولاد يكبروا شوية وبعدين يترشحوا للبرلمان !

نفسك تسافر ؟ ممكن بس لازم تدخل ليكا صندوق وتشيل الصرفة الأولى .. إنتا عارف إستخراج الجنسية والبطاقة والجواز بى كم؟ خليك من تذاكر الطيارة (الفيها تصل وفيها تتحرق) فى المدرج قبل ما تقوم !

نفسك تغترب ؟ شيل الفكرة دى من راسك بأسرع ما يمكن .. هو مرتبك هناك ده (لو إشتغلتا) ح يكفى ال ح ترسلو للأسرة وللا الح تدفع منو للقسط بتاع الفيزاء وللا طلبات الأقارب والأهل والجيران وللا تجديد الوثائق والضرائب والمساهمة (الإلزامية) والزكاة وترعة

كنانة والرهد وقناة الخرطوم ودمغة الشهيد و الجريح والغريق ...وجاياكا كمان (دمغة الإنفصال) ؟

كسرة :

نفسك تموت وترتاح من الدنيا دى؟ إستمع لتصريحات بعض المسئولين من نوعية (أوروبا تستهدف السودان !) .. يعنى مش بلد بلدين .. لا .. (أوروربا كووووولها) تستدف السودان .. يعنى (قارة كاملة بى حالها) ... أااخ يا مرارتي !!!


تعليقات 17 | إهداء 8 | زيارات 4714

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#55549 [ملاك فتوار ]
0.00/5 (0 صوت)

12-09-2010 10:16 AM
ياجبره انت عجيب ... بتضرب فى الوتر الحساس


#54724 [عمار محمد]
0.00/5 (0 صوت)

12-07-2010 07:46 PM
والله كفيت ........... شكرا


#54721 [عمار محمد]
0.00/5 (0 صوت)

12-07-2010 07:41 PM
والله كفيت ........... شكرا


#54689 [المهاجر]
0.00/5 (0 صوت)

12-07-2010 05:45 PM
والله أنا لي تلطاشر سنة ماشفت السودان وقاعد في السعودية دي أها أعمل شنو وعندي كوم عياااال ؟؟؟؟
دي واحدة من ضحايا التوجه الحضاري ؟؟؟؟؟


#54601 [جدو]
0.00/5 (0 صوت)

12-07-2010 02:06 PM
(دكتور وليد) حقيقة كفيت و وفيت . فعلا دا حال الدكاترة


#54349 [tarigosman]
0.00/5 (0 صوت)

12-07-2010 02:23 AM
يا جبرا .الماراثون دة شاق عايز ليهو نفس طوييييييييييييييييييييييييييييييييييل0


#54313 [الدكتور وليد]
0.00/5 (0 صوت)

12-06-2010 11:19 PM
اذا نفسك تمشي الدكتورفاعمل حسابك لانو دكاترة الزمن دة بقو سماسرة وجزارين رأسمالية واذا كنت مصر ومشيت فبرضو اعمل حسابك فاذاقال ليك استعمل الدواء دة وتعال بكرة معناها ماعارفو وعايز يعرف مفعولو واذاقال ليك استعمل الدواء دة وتعال بعد يومين معناها ما عارفو اصلا ف يومين كفاية يسأل منو ويعرف واذا قال ليك امشي وتعال بعد شهر معناها انك ماعنك شي وصحتك زي الحصان بس يمكن بعد شهر يبقي عندك ويكون مسبقا ضمن حجزك واذا قال ليك اعمل التحليل دة في المعمل الفلاني لأني بثق فيهو معناها عندو 40% (كوم ميشن) اذا سألك من التاريخ المرضي لحالتك معناها عيز يعرف اسماء الدكاترة الكنت بتتعالج عندهم شان يعرف انك دفيع ولأ قيحة واذا قال ليك الزم تعمل العملية دي الليلة قبل بكرة معناها خايف انك بكرة تبقي نصيح براااااااك وما تجيهو واذا قال ليك لازم تتدفع رسوم العملية كاااااملة قبل العملية معناها واثق انها ما ناجحة ومية المية رايح فيها وعيز يضمن حقو واذا قال ليك علاجك ماعندي امشي الدكتور فلان الفلاني لانو شاطر وبفهم في حالتك احسن مني معناها عندو دكتور صاحبو مزنووووق في قرشين وعايزو يسترزق ويفك زنقتو........


كسره....
لوفي دكتور ما بعمل جنس العمايل دي معناها انو دة لا مكانو ولا زمنو......


ردود على الدكتور وليد
United States [ادروب] 12-07-2010 09:00 AM
والله دا ما هزار ولا ضحك والله دا الواقع ذاتو. الله يفتح عليك يا جبرة انت دوحة ظليلة امنة نستظل تحتها من هجير وسموم المؤتمر الوطنى.
البغيظ الواحد مننا مرات يكون قريبك شديد ومسئول كبير فى الحكومة تقر ا ليهو كلام جبرا يتفقع ضحك لا من دموعو تسيل تتمنى الضحك يقتلو اتخيل يفرحو بعمايلهم دى ;) ;) ;)


#54299 [مسلم غيور]
0.00/5 (0 صوت)

12-06-2010 09:43 PM
رااااائع يا جبرة .....امد الله في عمرك ومتعك بالصحة والعافية ..لكن ياريت لو تصبق بعض الجدية في بعض مقالاتك والتي هي بلا شك تناقش وتعالج امور كثيرة خاطئة تحدث في بلادنا...عشان الجماعة الدمهم قرادة ديل يحسوا شوية ..طبعا هم اكيد بنظروا ليك على اساس انك مهرج ليس الا ...لك التحية مرة اخرى .
كسرة :
نفسك تموت من الغيظ ...شاهد نشرة الاخبار الرئيسية في تلفزيون السودان ويا حبذا لو كان فيها تصريح لنافع او كمال عبيد ....


#54244 [بت ملوك النيل]
0.00/5 (0 صوت)

12-06-2010 07:33 PM
نفسي اشوفك يا استاذ واقول ليك انت اكتر من رائئئئئئئئئئئع..والليلة بالذات انا كنت محتاجة لمقالك ده..وانا شخصيا نفسي الآقي نفسي ;( ;( ;( ;(


#54218 [عمار]
0.00/5 (0 صوت)

12-06-2010 06:04 PM
حلوة( مجهودك الفردي) دي. . كمان خاتيها بين قوسين ؟! الخوف بعد ده يحسبو ليك الهدف تسلل ويلحقوك امات طه!!!!!!!! بين قوسين النظام العام


#54200 [المسافر]
0.00/5 (0 صوت)

12-06-2010 05:14 PM
نفسي يحصل الحصل سنة 1985


#54195 [ابو احمد]
0.00/5 (0 صوت)

12-06-2010 05:06 PM
نفسك تمشي السودان زيارة احسن ليك ماتمشي وموت قبلك
لك التحية الاستاذ الفاتح جبرة


#54099 [نادر محمد]
0.00/5 (0 صوت)

12-06-2010 02:10 PM
نفسك ترجع تاكل كسره بدون ملاح اسال وزير الماليه كيف


#54086 [ام الحسن]
0.00/5 (0 صوت)

12-06-2010 01:40 PM
غايتو دمغة الانفصال دى الكفينا احنا المغتربين ديل شرها.....كسرتك الليلة مبااااااااااااااااااااااااااااااااااالغة


#54074 [عبدالمنعم ]
0.00/5 (0 صوت)

12-06-2010 01:15 PM

جبرة الله يجزيك ياخي بالخير
دايما مخفف علينا الغم والهم
امس عندنا واحد مات من الغم عارف سمع شنو ؟؟؟؟
الصوارمي قال قوات مني بقت قوات مستهدفة وعدو للجيش السوداني !!! وولاة دارفور عزلوا مني وعينوا واحد منهم بديلا له !!!!
وابوجا راحت شمار في مرقة
ودارفور ماشة في سكة المؤتمر الوطني الانفصلالية !!!

والله ديل مش يفقعوا المرارات ، ديل يفقعوها ويشيلوها منك يسمسروا فيها وتتباع في سوق المواسير بالحبة مرارة مرارة !!!!!!!

دمت لنا متنفسا عميقا ،،،،


#54044 [خالد المبارك]
0.00/5 (0 صوت)

12-06-2010 12:12 PM
ياخي قفلت نفسنا بحق و حقيقي
بارع


#54042 [محمود عطية الله حسن]
0.00/5 (0 صوت)

12-06-2010 12:10 PM
نفسك تفش غباينك من البحصل فى البلد عشان ماتنفقع مرارتك؟ أفرا مقالات جبرا


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة