المقالات
السياسة
وا أسفي لأني سوداني
وا أسفي لأني سوداني
06-22-2013 10:10 PM

لقد صرنا نحن معشر السودانيون ملطشة العالم ,, للاسف الشديدفى هذا العهد الكئيب البائس ,حتى صار أسم السودانى مدعاة للاستهزاء والازدراء في جميع مطارات العالم ,, لان حكومتناالرشيده لم يعد يهمها المواطن السودانى ولاتهمها كرامته التى صارت ملطشه حتى إستهامها كل حقير ,, الدول تعمل ألف حساب لرعايا الدول التى تهتم بمواطنيها ,, كالولايات المتحده وبريطانيا وحتى الدول الافريقيه التى كنا نضع لهاالدساتير ,, لرعاياها حرمه وخط أحمر ,, وماحدث بالامس للدكتوره السودانيه في مطار القاهره ابلغ دليل على هوان الشعب السودانى وجوازه الاخضر ,, ولولا جوازها الالمانى لظلت تتمرمط حتى الان,, وسفارتنا لايهمها الامر ابدا,, وقصة الطبيبه السودانيه التى رمى بها زوجها من الدور الرابع,, بعدموتها إتهمها الدعاره ,, وهى أختصاصيه أمراض نساء وولاده ومشهود لها بالعفه والاخلاق الحميده ,, وذنبها لانها سودانيه وليس هنالك من يدافع عنها,, والسفاره غارقة في نومها,,وريسنا الهمام يهديهم السيارات لفوز فريقهم في كرة القدم,,ويهدي لهم الالآف الابقار و, وألآلآف الخراف ,, وهم يأخذون العطايا على مضض ولايكلفون نفسهم بكلمة شكر,, وكاننا مفروض علينا أرضائهم ,, يأتون بلدنا بلا تأشيره ,, ونحن نتمرمط في سفاراتهم لننال تأشيره دخول ,, وعند دخولنا نعامل بوحشيه ,, وعنصريه لا تخطؤها العين ,, سبحان الله !!
بالامس القريب أى قبل إسبوعبن ,, ذهبت أنا وأسرتى في إجازه إلى إندونيسيا ,, وقد كنت أنوى الذهاب إلى الهند لتحقيق أمتية راودتنى منذ زمن بعيد ( رؤية تاج محل ) وفشلت في أخذ تاشيره للهند للشروط التعجيزيه التى فرضوها ,, ومنها كتابة تأريخ الميلاد في الجواز باليوم والشهر والسنه,, لان جوازاتنا لاتحنوى على تلك الجزئيه ,, واذا أردت أن تضع التأريخ في الجواز فتلك قصة أخرى ,, لان مصلحة الجوازات تطلب منك المستحيل ,, وسوف تضيع الاجازه كلها وراء الاجراءات!!!
المهم توكلت على الله وأخذت تأشيره من سفارة إندونيسيا ,, وركبت الطائره أنا وأسرتى ,, وبعد طيران قارب ال9 ساعات متواصله,, وصلتا إلى مطار جاكارتا الدولى ,, وقفنا في الصف مثل بقية خلق الله ,, كان أمامى الانجليز والسعوديين والاماراتيين ,جنسيات مختلفه ,,كنت في غاية السرور , رغم تعب الرحله الطويله, فقد كان المطار جميلا , وبينما أنا أتأمل في روعة المطار,إذا برجل يلبس زى الامن يطلب منى جوازات سفرنا ,, والله طنت أظن أنه أتى لمساعدتى لان الصف كان طويلا وزوجتى وإبنى معى ,, ثم أمرنا بمتابعته ,, مشينا وراءه ,, حتى كدنا أن نخرج من المطار,,,
أدخلنا في غرفه ضيقه وليس بها تكييف ودخان السجائر يملاء المكان .. فأستفسرت منه عن الحاصل فلم يجيبى أبدا,, بل نظر إلى محدقا ,, وبعد قليل أحضر رجل أمن كميه من السودانيين يفوق ال12 شاب ,, سألتهم عن الحاصل,فلم يكن لديهم فكره بما يحصل,, وبعد قليل إدخلوا في غرفة أخرى وبدأت المساومه!! افرج عنهم بعد دفع كل واحد منهم 300 دولار !! وجاء دورى ,,فسألنى الضابط ,,, لماذا حضرت إلى بلدنا ؟؟ والله لحظتها إنفجرت غضبا فيه ,, وقلت له ,, أهذه معاملتكم لمن ياتى لزيارة يلدكم ؟؟ وبعد نقاش طويل ,,ختم جوازاتى ,, طبعا بدون أن أدفع له مليماواحدا ,, ولكنى شعرت بالهوان في غرارة نفسى ,, وباظت أجازتى لان الالم والمهانه تملكانى ,,
وبا أسفى لوماكنت سودانى!!!!


د. الدخري عزالدين
[email protected]


تعليقات 7 | إهداء 0 | زيارات 1856

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#704798 [ABOALKALAM]
0.00/5 (0 صوت)

06-24-2013 02:17 AM
يايها المسافرين والمسافرات كل دول افريقيا وكل دول اسيا

يستطيع عمكم ابو الكلام اللدخول والخروج منها والتاشيره هي ورقة

الخمسين دولار جاهزة في جيب القميص والحكاية ليس سوداني او خلافه

الحكاية ان هذه الدول مرتشية والرشوه موجودة ومعترف بها من الحارس الصغير

وحتي رئيس الوزراء الواحد فينا ما داير يدفع رشوة ولكن العالم لن يتغير

كما نريد


#704613 [الحردان]
1.00/5 (1 صوت)

06-23-2013 08:26 PM
لأول مرة ايها الاعزاء اكتب في موضوع مرتين .. فقط لأزيل الالتباس عند البعض .. لكن لاحظوا معاي في كل تعليقاتي لااميل ابدا لاستخدام الالفاظ البذيئة ... والرد لمن رد علي تعليقي لكاتب المقال .. اولا انا لاعلاقة لي بالنظام في السودان واتمني زواله اليوم قبل بكرة نهائيا من الوجود بكل افراده وحكمه الجاثم علي صدر السودان ربع قرن ... لأني منذ 20 عام خارج البلاد ... وليس خارج السودان لأنه في دمي ووجداني اعيش واتنفس به ... اما كاتب المقال فقد اساء للجميع بعلم او بدونه .. بداية من عنوان المقال (وا اسفي لأني سوداني) وهذه الراكوبة مقروءة للسودانيين ولغيرهم ... وكون الرجل يشعر بالهوان وتبوظ اجازته ده شئ طبيعي مما تعرض له هو .. وياريت لو في تلك اللحظة استشعر بأنه سوداني عزيز لتخف عنه المهانة ... ثانيا ماكل من يخالفك الراي يبقي كوز ياابن السودان ودي سقطة كتير من الناس بستخدموها ... انا افرق بين الوطن السودان .. وبين النظام وكون النظام سيئ لايعني ان يسوء الوطن العزيز ابدا .. لأن النظام يغور ويبقي الوطن .. اعتزازك بأنك سوداني رغم ظلم البعض للسودانيين بسبب النظام يجعل لك شأن ولسودانك مفخرة وعزة منحك اياها ... لااشك في ان سوداني في اي مكان يقبل الاهانة مهما كانت ولنا حوادث كتيرة في كل البلدان بأن السوداني رجل سخن وحقاني ولايرضي الحقارة ... فلماذا الحقارة والاستخفاف بالجنسية السودانية من بعض السودانيين كلما تحصل لهم عتره في مطار ولا صف اي حاجة في الدنيا ... والكاتب نفسة يقول انه عندما انتفض لكرامتة ورفض الدفع تم التأشير له وادخالة البلاد .. هذا مااعنية انا كن سوداني ولاتدع لقرد ان ينظر اليك من عل وشيل حقك حمرة عين فأنت لم تخطئ ... هو الشخص الناقص والمرتشي الجبان ... كن انت العزيز والسوداني وصدقني نفس الضابط سوف يحكي بأن هناك سوداني نفسه عزيزة ويعتز بجنسيتة رفض دفع الاتاوه ... في ناس ملخبطه عندهم الصورة والنظام دمغ نفسة بالسودان تماما فأصبحوا لايرون السودان بل النظام الحاكم وتوهم البعض ان ذكر السودان يعني البشير والحزب الحاكم ... افيقوا يابشر السودان اكبر من اي رمز ولو ماحافظنا علي صورة الجنسية السودانية نقية كما ورثناها فلن تبقي لنا كلمة ولاشخصية امام العالم بعد زوال النظام ... وانا لما قلت تركيا وماليزيا فهذه دول من حجم اندونيسيا المشاها الكاتب ويحكوا عنها خير للسودانيين ... ولبقية الاخوة المعلقين انا سافرت كتير جدا وواجهت مشاكل بداية من مصر وغيرها وتم توقيفي بدون سبب في وصدقوني كنت أشعر بفخر اني سوداني وكنت انظر لهم بإستحقار فهمه بعضهم وتركوني .. الكاتب قال لي "أرجو من الله أن يصرفكم ,, وبعدها سوف ترجع للمواطن كرامته ,, ويفتخر بأنه سودانى , رغم أنفك " طبعن هو رد بإسم اب دفسه اسم جميل لأنه دفس كل المواضيع مع بعض ... كرامة المواطن لن ترجع لأنها لم تسلب ولن تسلب ابدا ياأب دفسه .. واذا انت قررت ان لاتفتخر بأنك سوداني فأنا وكثيرون نفخر بأنا سودانيين رغم انف الضابط الاندونيسي ورغم انفك يااب دفسه.. ودمتم


#704215 [alkaser]
0.00/5 (0 صوت)

06-23-2013 11:36 AM
منز ان اتي هؤلاء المجرمون الي السلطة اصلح اي سوداني ارهالي في نظر العالم


#704090 [أب دفسه]
5.00/5 (1 صوت)

06-23-2013 09:29 AM
لاشك إنك إنسان جاهل يا الحردان ولاتعرف حتى أدب الحوار ,, وإحترام وجهات النظر ,, وهذا لعمرى ما جعل بلدنا متاخرا ويرزح دائما في زيل القائمه .. وأمثالك هم المصيبه الحقيقيه التى ابتلى بها هذا الوطن المنكوب ,, فقد خربتموه في الداخل والخارج ,, وصار السودانى مهان وتداس كرامته في الخارج والداخل ,, وأنتم تلغفون في خيراته ,, والمواطن مسحوق ,, وتنطون علينا لتلووا عنق الحقيقه ,التى أصبحت غائبه تمامافى عهدكم البغيض ,, وكمان بتشتهد بأقوال لوثر كنق!! سبحان الله !!!يامن ركبتم على ظهر الشعب وخلفتم رجولكم كمان ,, أرجو من الله أن يصرفكم ,, وبعدها سوف ترجع للمواطن كرامته ,, ويفتخر بأنه سودانى , رغم أنفك , وحسبنا الله ونعم والوكيل


#704051 [hamad]
0.00/5 (0 صوت)

06-23-2013 08:28 AM
استاذ الدخرى اتخيل فى ناس فى بلدان يعتبروننا جوعى وفقراء ومعدمين ولانفقه فى الللغة العربية شى
اتينا من ادغال افريقية
ولكن عندما نريهم ثقافتنا و ونطلعهم على الانترنت من هو السودان
يعتذرون لنا تتصو!!!
المشكلة فى اعلامنا وليس فينا كسودانيين والمشكلة الكبرى فى سفاراتنا


#703923 [Nubawi]
4.00/5 (1 صوت)

06-23-2013 12:04 AM
who is in a sound mind takes vacation in indonsia?flying 9 hours to face shame and mistreatment.
if you have donated your money to the people in blue nile or darfur would have been better .long live sudan down with omer Albashir who is behind your misfortune and disgrace.


ردود على Nubawi
United States [السوكى موكى] 06-23-2013 10:13 AM
Dummy Darfur and Blue Nile, their first-Bashir and the state, not O colorless understanding of citizen


#703899 [الحردان]
3.25/5 (3 صوت)

06-22-2013 10:44 PM
يااخوانا الملاحظ انو في سودانيين كتير متعقدين من جنسيتهم ... عندهم عقدة انو زول سوداني ولو ماحظ اللون ومرات الجواز كان ينكر سودانيته جهارا نهارا ... ويخلي طرفه منها في اقرب لفة .. هسي الراجل ده مشكلتو انو الضابط الاندونيسي الحرامي سحبه من الصف وعاوز يدفعه قروش والجماعه دفعو واتخارجو ... ولو انت فاكر انو السوداني بس البلاقي مشاكل في المطارات تبقي غلطان والابتزاز ده متواصل من سنوات مع الخليجيين وقرفوا منو ... اما مطارات دول العالم التالت دي ففيها مافيها من الابتزاز ... هسي دي مشكلة السودان !!! وجاي تقول الدكتورة الكتلوها والدكتورة المسكوها في مطار القاهرة ... نتبرأ نحن من سودانيتنا عشان كده ... وانت لافي في المطارات مالك ومن متين السودانيين قاعدين يمشوا اندونيسيا للفسحة .. شوف الدول البحترموا جنسيتك وامشي ليهم تركيا ماليزيا وغيرها كتير ... وماعشان انت وقتك ضيق واجازتك صغيرة والهنود رفضوا جيتك .. تقوم تقول نحن السودانيين هاملين وملطشة العالم .. انت الملطشت نفسك في بلد الناس وقاعد تحوم زي المودر ليك حاجه ... ياخوي نحن اعز من اكبر كبير في اندونيسيا وكل دول العالم والمابحترمنا ندوسه ونرجع رافعين راسنا لبلدنا وجوازنا نرفعه في عين اتخن تخين والماعجبوا بنقد ليهو عينو ... انت اعمل لنفسك شخصية يحترمك الجميع لاترضي بالاهانة مهما علت حاجتك يركع لك الرئيس زاتو .. وبالله عليكم العندو مشكلة في نفسو مايحشر الجنسية السودانية في الموضوع ... وزي ماقال عمك مارتن لوثر لوماحنيت ضهرك لن يستطيع احد ان يركب عليك ... ارفع راسك فوق وشم نفس طويل وقول انا سوداني


ردود على الحردان
United States [تربال] 06-23-2013 11:07 AM
ياحردان الراجل داء كلامو صحيح وكل سوداني بيزعل من المعاملة السيئة من الجنسيات الاخرى فهو سوداني غيور بيحب بلده واصله، اما انت شكلك زول بارد مابتنفعل وتتقبل الاهانة والزلة بدون ان تحرك ساكن.. مسألة السودانيين بيلاقوا تعامل سئ داء امر متفق عليه وانا عندي مواقف كثيرة مرت بي اثبتت انه السوداني مهان ومبهدل خارج بلده.

[سودانى] 06-23-2013 03:51 AM
كلامك دا غش بى نفسك السودانى مهان فى اى مكان فى العالم بسبب حكومتو التافة الفاسدة الملوثة .. سمعتنا اتلوثت جرب اطلع امشى اى مطار فى العالم و شوف البحصل ليك .. تعال مصر القريبة دى و بعدين شوف كان تقول فصاحتك دى

United States [سغيل وكاره المؤتمر الوطني] 06-23-2013 03:48 AM
شكلك ياحمدان يا اخوي ما اتغربتا وﻻ سافرت برا السودان
هو بديك فرصه تتكلم؟
الضابط حاكم علي السوداني من قبل ما يﻻقيه
السودانين معروفين رجال واصيلين
لكن سمعتنا اتدهورت في زمن اﻻنقاذ

United States [ابن السودان] 06-23-2013 01:59 AM
تركيا و ماليزيا بيحترموك انت بس يا كوز يا حرامي يا اكل السحت

[زكريا أبو يحيى] 06-23-2013 01:26 AM
لا والله يا عزيزي هان الرئيس فهان معه شعبه .

United States [ود الزين] 06-23-2013 12:14 AM
و الله يا حبيبنا يا الحردان..مع كل الود و الاحترام و التقدير لشخصك الكريم...انت شكلك لا سافرت برة لا لي شغل و لا لي سياحة و لا لي عمرة زاتو.......الكلام البقولو عمك ده 100%.و التحية للجميع

[الدنقلاوي] 06-23-2013 12:10 AM
أنت يا الحردان خليك منطقي الراجل قال رأيو وتجربتو أنت قول رأيك بدون ما تسيء ليهو ولا تتدخل في خصوصياتو ..يأجز في اندونسيا في انجمينا انت مالك، بعدين سيبك من الأفراد البلد المصريين شايلين منها كتف وحتة من القلب والأثيوبيين شايليين كلوتين، والتشاديين حايميين في عفشتها وجيش الرب اليوغندي ماسك الكوارع ملطشة ولا ما ملطشة؟؟ والبركة في الكيزان

[الوجع الخرافي] 06-23-2013 12:06 AM
gaaaaaaaaaaaaaaaaaaaaaaaaaaaaaaaaaaaaaaaaaaaaaaaaamid


د. الدخري عزالدين
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة