أنا عارف وانت عارف
06-24-2013 06:02 AM



انتقلت الإنقاذ من مرحلة (ألحس كوعك ) أو ما يسمي ( النبز) المباشر ، إلي التورية والغمز والهمز بلغة ( نحن عارفين وهم عارفين ) ، ولسنا ندري هل هو تطور جديد في دورة حياة الطفيلية أم تشرنق وبيات شتوي علي طريقة ( القعونجة) .

وعلي خطي المثل الانتهازي القائل الناس علي دين ملوكهم ، يمكن الإستفادة من حكاية أنا عارف وانت عارف للخروج من المطبات والمنعطفات الخطيرة في كل زمان ومكان .

اركب المواصلات ، وانت لا تمتلك الواحد جنيه وهو أدني قيمة مواصلات من الخرطوم لأمدرمان . واجلس في الكرسي المنفرد قرب الباب كيما تكون مجاوراً للكمساري المتشعلق علي باب الحافلة .

حالما تخرج الحافلة من الموقف ، سيبدأ الكمساري ( الطقطقة ) ، وعندما يأتيك الدور ، صهين من الدفع وانشغل بالنظر من الشباك للشارع المتسخ أو المياه الراكدة ، وعندما يلح في الطقطقة وينظر إليك بعض الركاب بغرابة أو بشماتة ، رد علي الكمساري بصوت جهوري أنا ما بدفع ، وعندما يسألك ليه ؟ قول ليه أنا عارف وانت عارف .

سيبتلع الكمساري الطقطقة ، وسيحتار السائق ، ويصمت الركاب وستصل إلي قواعدك سالماً .

وادخل رأساً علي سعادة ( المدير) دون أن تستأذن سكرتيرته الحسناء ، وعندما تعترضك فقل لها أنا عارف وهو عارف ، ثم خاطب المدير الغارق حتي أذنيه في حل الكلمات المتقاطعة بنبرة حادة علي شاكلة ( ليه ما طلعت لي حافز الشهر دا ؟)، سيقول لك المدير أن ظروف الشركة المادية بطالة ، فقل له بلهجة واثقة لكن ظروفك ( كويسة ) ، وعندما يستغرب قول ليه أنا عارف وانت عارف ، عندما سيخرج القلم والورقة ويكتب لك خطاباً للمدير المالي بشأن الحافز ( المدنكل) .

وعندما تذهب للمعاينة ( المضروبة ) ، قل لرئيس اللجنة قبل أن يسألك أي سؤال ، أنا ح اشتغل غصباً عنك ، وقبل أن يرد عليك قول ليه أنا عارف وانت عارف ، وبعدها ستنال الوظيفة دون معاينة .

أتدرون لماذا يحدث ما يحدث في بلادنا ؟ لأن في راس كل سادن وتنبل ريشة ، وقديما قيل ( الحرامي في راسو ريشة ) ، وحكاية أنا عارف وانت عارف قديمة . اتنين دفعة في قوة دفاع السودان جمعتهما الظروف بعد الحرب العالمية التانية ، فجلسا يتسامران فسأل أحدهما الآخر ( تتذكر لما كنا قاعدين جنب خور أبوعنجة ؟ ) تتذكر لما سلفتك خمسين قرش وانت ما رجعتها لي ؟ فقال له المسؤول ( نحن وين وخور أبو عنجة وين ) ، ولو كان سادناً لقال له أنا عارف وانت عارف وخور أبوعنجة عارف.

الميدان


تعليقات 3 | إهداء 0 | زيارات 1570

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#705231 [مصطفي سعيد]
1.00/5 (1 صوت)

06-24-2013 02:28 PM
والله محن استاذنا وانت عارف وانا عارف


#705186 [الجن البخلى الناس تنوني]
0.00/5 (0 صوت)

06-24-2013 01:45 PM
إنت عارف وهو عارف والله عارف وكفانا وهم ومقارف46


#704841 [b]
0.00/5 (0 صوت)

06-24-2013 07:37 AM
انا عارف وانت عارف اه صبرى فات حد الصبر


كمال كرار
كمال كرار

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة