المقالات
مكتبة كتاب المقالات والأعمدة
الفاتح يوسف جبرا
مسلسلات
مسلسلات
06-24-2013 12:38 PM


تتميز المسلسلات التلفزيونية المكسيكية عن نظيراتها التركيه والمصرية والسورية والخليجية بأنها ذات نفس طويل إذ أن أقصر مسلسل مكسيكي يفوق عدد حلقاتة المائة حلقة .
لا تستغرش يا عزيزي القارئ أن لدينا من المسلسلات التي تفوق أعداد حلقاتها حلقات المسلسل المكسيكي بل هي إن صح التعبير مسلسلات ذات حلقات لا نهائية (يعني ما معروف تنتهي متين) فدعونا نستعرض بعضاً من هذه المسلسلات والتي يتابع المواطنون حلقاتها منذ ربع قرن :
- مسلسل مجانية التعليم :
وهو مسلسل سنوي يبدا مع إقتراب فتح المدارس وبداية العام الدراسي إذ يقوم المسؤولون بإطلاق التصريحات من شاكلة (يا جماعة التعليم مجانن واي زول يقولوا ليهو جيب قروش ما يدفع) ! مع إنو المسؤولين عارفين (زي عدم جوع بطنهم) بإنو ليس لتصريحاتهم (المجانية) هذه أي مصداقية على أرض الواقع وإنو المدارس بتشيل قروش تسجيل وقروش طباشير وقروش طباعة إمتحانات وقروش الكهرباء وقروش الموية وكمان مرات (فطور المدرسين) .. وتفتح المدارس وينتهي العام ومع بداية العام الذي يليه يبدأ المسلسل (يا جماعة التعليم مجانن واي زول يقولوا ليهو جيب قروش ما يدفع) !

- مسلسل إكتملت التجهيزات :
هذا المسلسل يبدأ قبل شهرين تقريباً من بداية (الخريف) إذ تتناقل الصحف تصريحات المسؤولين عن إكتمال التجهيزات لمواجهة فصل الخريف ووضع كافة الترتيبات له .. ومن أول (مطرة) تبتلع المياه كل تلك التصريحات فتمتلئ الشوارع والميادين والحفر والمطبات بالمياه ويصبح الدخول إلى الأسواق أصعب من الدخول في (خرة إبره) وتنهار المنازل لعدم وجود التصريف وتنتشر (الحشرات) من مختلف (الفصائل) والحركات ويصاب المواطنون بالملاريا فتمتلئ المستشفيات التي سرعان ما (تفضا) بسبب إنتقال المصابين إلى أماكن أكثر أماناً (المقابر طبعن) .. وينتهي فصل الخريف .. وقبل شهرين تقريباً من الخريف الذي يليه تتناقل الصحف تصريحات المسؤولين عن إكتمال التجهيزات لمواجهة فصل الخريف ووضع كافة الترتيبات له .. ومن أول (مطرة) تبتلع المياه كل تلك التصريحات فتمتلئ ....

مسلسل تقرير المراجع العام :
يبدأ هذا المسلسل بعد نهاية السنة المالية حيث يقوم المراجع العام بتقديم تقريره للبرلمان مشيراً إلى أن بلاغات حالات التعدي على المال العام في كل السودان (مش في محلية واحدة) كم وأربعين حالة وإن المبالغ المعتدى عليها كم مليون كده (بالسوداني طبعن) وأن (كم طاشر) بلاغ تم شطبهم (ليه ما تعرف؟) وأن (يا خمسة يا ستة) بلاغات تم الفصل فيها وإن (يا إتنين يا تلاته) بلاغات قيد التحري ثم يجيز مجلس الوزراء التقرير .. وتنتهي السنة المالية وتأتي السنة المالية التي تليها والتي عند نهايتها يقوم المراجع العام بتقديم تقريره للبرلمان مشيراً إلى أن بلاغات حالات التعدي على المال العام في كل السودان (مش في محلية واحدة) كم وأربعين حالة وإن المبالغ ......

مسلسل مجانية علاج الحوادث:
يبدأ المسلسل عند إرتفاع صيحات المواطنين التي تطالب بمجانية العلاج في (دولة الإسلام) فيبادر المسؤولون بالتصريح (يا جماعة علاج الحالات في أقسام الحوادث مجانن) مع أن المسؤولين يعلمون (مع إنو ما بتعالجو فيها) بإنو الكلام ده ما حاصل والمواطن بجيب الحقنة والشاش .. وتهدأ المسالة حتي إذا ما إرتفعت صيحات المواطنين تطالب بمجانية العلاج في (دولة الإسلام) بادر المسؤولون بالتصريح (يا جماعة علاج الحالات في أقسام الحوادث مجانن

مسلسل تعديل وزاري:
وهو مسلسل يبث حسب الحاجة من أجل التغيير (وكده) وهو مسلسل لا علاقة للمواطنين به فهو مسلسل (لي ناس البيت) إذ يقوموا فيه بحركة تنقلات .. البواب يمشي جنايني والجنايني يمشي سواق والسواق يمشي طباخ والطباخ يمشي بواب .. حتي إذا ما أصابهم بعد فترة (ملل) قاموا بحركة تنقلات .. الجنايني يمشي طباخ والطباخ يمشي بواب والبواب يمشي سواق والسواق يمشي جنايني ..

مسلسل الزارعنا :
هو مسلسل يبث حسب الظروف المناخية السياسية فما أن تعلو وتيرة المعارضة وتململ المواطنين إزاء تدهور الأوضاع وتحدث أحداث شغب هنا وهنالك حتى يبدا المسلسل بتصريحات بعض المسؤولين (الزارعنا غير الله يجي يقلعنا) وكأنما ناس (حسني ومعمر) زرعتهم (مصلحة البساتين) .. تنتهي حلقة المسلسل بإنتهاء (فورة المعارضة الهذيلة) وإستتباب الأمن .. وما أن تعلو وتيرة المعارضة وتململ المواطنين إزاء تدهور الأوضاع وتحدث أحداث شغب هنا وهنالك حتى يبدا المسلسل بتصريحات بعض المسؤولين .. الزارعنا شنو ما عارف كده !

كسرة :
بالمناسبة دي : مسلسل خط هيثرو ده حلقاتو كم يا وزير العدل؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)؟


تعليقات 15 | إهداء 0 | زيارات 8813

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#705766 [ابو خالد الدمام]
0.00/5 (0 صوت)

06-25-2013 09:23 AM
يا جبرة ماتجي تقول لينا كمام (( التجهيزات اللي من بدري لموسم الحج والعمرة ))لانو فعلا الناس ديل ما مقصرين في الحتة دي وبعدين ما تجيب لينا سيرة الناس اللي ما توا في القضارف انت عارف الولايات خارجة عن نطاق التجهيزات لانو التجهيزات لولاية الخرطوم بس زي الفيضانات والخريف ... عمرك سمعت تجهيزات للخريف لاي ولاية مثلا يعني العدد البسيط اللي ماتوا ديل في القضارف ديل ماتوا وراحوا شمار في مرقة بس هم ازكي منك ومن غيرك لانهم قالوا الناس ديل شهداء وكده طبعا انت عارف اي زول مات من سنة 1989 شهر ستة فهوشهيد حتى اذا دهسك قدران فهو شهيد ديل التدافع كتلم مش الحيطة الاصلو كانت مايلة وبالمناسبة الحيطة كان ممكن تقع علي التلاميذ بس ربنا لطف وجات على شهداء الانقاذ .. بعدين يا جبرة شنو حكاية لبن سمك تمر هندي ده ياخي ايش اللي جاب مجانية العلاج مع الفيضانات هسع في زول بيتعالج بي فلوس تعال الحالات الصعبة والفقراء اللي ينظروا اليهم بعين الرحمة العطف خاصة في المستشفيات الخاصة للمثال لا الحصر مستشفى الزيتونة حتى لو مت يدفعوا ليك حق الجنازة


#705686 [سماسم طيبة]
0.00/5 (0 صوت)

06-25-2013 04:59 AM
طيب يا أستاذ مسلسل الإنقاذ الوطني حا ينتهي متين ساربي


#705644 [koko]
0.00/5 (0 صوت)

06-25-2013 01:02 AM
وين المسلسل الشهير -- شدو الحزام --
الميزانية قادة و الترلة الكنا جارنها اتفكت مننا و حننطلق و الحيكومة السمها فاير ارهقها المواطن المفلس ده و التعبت من دعمه طول الفترة الماضية و رفع الدعم و شدو الحزام .... يا أخي الله ما تخافو ؟؟؟!


#705583 [خلدون جيلاني]
0.00/5 (0 صوت)

06-24-2013 11:13 PM
مسلسل تعديل وزاري:
وهو مسلسل يبث حسب الحاجة من أجل التغيير (وكده) وهو مسلسل لا علاقة للمواطنين به فهو مسلسل (لي ناس البيت) إذ يقوموا فيه بحركة تنقلات .. البواب يمشي جنايني والجنايني يمشي سواق والسواق يمشي طباخ والطباخ يمشي بواب .. حتي إذا ما أصابهم بعد فترة (ملل) قاموا بحركة تنقلات .. الجنايني يمشي طباخ والطباخ يمشي بواب والبواب يمشي سواق والسواق يمشي جنايني ..

وطبعاً دخول أبطال جدد في هذا المسلسل من سابع المستحيلات ، لأن الشعب الفضّل لا يوجد فيه ممثل بجدارة ممثليهم.


#705375 [ابو مبارك]
0.00/5 (0 صوت)

06-24-2013 06:15 PM
ياجماعة انا عندي ليكم اقتراح خطير
طبعن نحنا كلنا منتظرين الحكومة دي تتقلب مش كدا ؟
بس لكن المشكلة ما فينا زول قادر يقلبا ، صح ؟ طبعن ح تقول لي ايووه صح
خلاص وقت نحنا ما قادرين نقلب الحكومة
ايه راييييكم نقلب الشعب؟!!!!
وبي كدا نحير ليك الحكومة ذاتا


#705352 [سن ألفيل]
5.00/5 (1 صوت)

06-24-2013 05:33 PM
بالله ياود جبرا افيدنا افادك الله اي من المسلسلات السابقة اكثرهم أثارة وافضلهم للمتابعة وشكرا ؟؟؟؟؟؟؟؟؟


#705342 [صرخة شعب]
0.00/5 (0 صوت)

06-24-2013 05:13 PM
الاستاذ الهلالى (طبعن ومجانن ) على حسب نطق الوزير الاستاذ الفاتح جبرا ما غلطان معظم الوزراء غير مؤهلين لمناصبهم هل تصدق ان وزير الشئون الهندسيه فى احدىل الولايات دكتور ورسالة الدكتوراه بتاعة الوزير فى غسل الجنابه


#705304 [المبشتن]
4.96/5 (10 صوت)

06-24-2013 04:14 PM
(الزارعنا غير الله يجي يقلعنا) وكأنما ناس (حسني ومعمر) زرعتهم (مصلحة البساتين)

دى شديدة ي جبرا


#705296 [مقتنع]
3.94/5 (6 صوت)

06-24-2013 04:08 PM
وهل تغيرت طبيعة نبات الضريسا؟.


#705293 [الصادق محمد علي]
3.97/5 (6 صوت)

06-24-2013 04:03 PM
لك التحية الاستاذ جبرا -- وزي مابتقول حبوبتي الله يرحما لمسلسلات - المسللة جات ما عايزين تحضروها يا شفع وكنا الوقت داك شفع -- بس خبرنا الحياة وعرفنا الفيها وعرفنا المسلسلات الاجنبية والعربية والخليجية ومسلسلات جماعة ديل اولاد بني صهيون وابشرك يا جبرا بانهاء ف الحلقات الاخيرة وشكلها بقي ماسخ ومكرر ، ممكن الجيل الجديد او بالاحري الذي ولد وعاش في زمن هذا البعبع الاسمو الانقاذ بعجبوا هذا التكرار الممل .. لانة تربي ع كدا ولسه يانعين ولكن سرعان ما ينضجوا ويكونوا اقوي من خميرة العيش - لانو ببساطة شديدة الذي زرعهم -- بزرع غيرهم وزي ما بقول المثل حواء وااااالدة
وشكرن متناهيا وعميقا ومزركشا لابداعتك والله يخضر ضراعك واقول لك هانت بس طول بالك
يمهل ولا يهمل مع خالص المودة


#705242 [توفيق صديق عمر]
4.29/5 (6 صوت)

06-24-2013 02:45 PM
يا جبرة انت ما عاوز تقتنع ليه يااخ
انا شخصيا اقتنعت من زماااااااان انو الناس ديل البسو فيهو دا
كلللللللو مسلسل سل الروح ممكن نسميهو وانا اها بحلف ليك عديل انو
الهم الوحيد الشاغل بالهم هي كيفية ملئ الجيوب متين ووين وكيف وبي ياتو اسلوب

وعشان الشعب الما مسكين دا لكن روحو محرقاه وبس وما فرقت معاه هم واولادهم
يموتو بالجوع او بالمرض او بالسيف او بغيره اويهادرو من البلد
ويتيهو في متاهات اوروبا ويفتشو علي اقامة اصبحوا فنانين في الخصول عليها
البقول ليك انا من كجبار البقول ليك انا من دارفور عشان الشعب المسكين دا يتلهي باي كلام من قبل هؤلاء الحراميه اهو يتلعب عليه ضمن الالاعيب الكثيرة بي مسلسلات ذي الذكرتها دي
في حين انو التركيز الما خمج من قبل الحرامية لا في ما يهم الناس او ما يقض مضاجعهم او
يخفف اي ضائقة مهما كان كبرا او صغرا عليهو لا لا لا يااخي التركيز الما خمج هو في كيفية البلع والاستحواذ والكنكشة وتكديس المنهوب خارج البلد لغاية ما بنا يفكهم من الشعب السوداني العكليته دا مش لغاية ما ربنا يفك الشعب السوداني دا من عكلتتم
وين وين وين تلقو وي دا الامام شحد الله واالله ادا


#705229 [shersh]
0.00/5 (0 صوت)

06-24-2013 02:26 PM
وما ان تقع مصيبة من السماء كان جراد ولا حيطة وقعت فوق الحجاج ولا بذور واسمدة الا وكان معاها اسرلئي وامريكامع انو كا سنة تحصل مصيبة ..رايك شنو فى زيادة السكر كل سنة قبل شهر رمضان .زالسنة دى الدور(الربح) حق منو


كسراتك دى حقو تغيره الى فتحة( كل فتحة=12 كسرة)


#705175 [ابن السودان]
4.29/5 (6 صوت)

06-24-2013 01:28 PM
يوم الكيزان قرب ان شاء الله


#705152 [ود البلد]
4.16/5 (6 صوت)

06-24-2013 01:01 PM
اها والسدود الذي عاوزين يعملوها ماكلة دا شنو


ردود على ود البلد
European Union [alex] 06-24-2013 04:09 PM
ياخي احترم نفسك اقرا و بس ,,,, مالك و ما التعليق


#705146 [الهلالي]
2.57/5 (5 صوت)

06-24-2013 12:57 PM
الاستاذ جبرا كاتب ساخر وجيد ولكن ما يستوقفني في كتاباته الكلمة التي بين القوسين (طبعن ومجانن) وفي كل كتاباته يكتب هكذا يعني الحكاية ليست سهواً ... والصحيح: طبعاً ومجاناً... ايه مشكلتك يا استاذ جبرا مع التنوين زعلان معاه والا شنو؟


ردود على الهلالي
European Union [الماعاجبو العجب ولا....] 06-24-2013 09:50 PM
شوف يالهلالى ...يا تقرأ وتصم خشمك وبلاش التفاسير واللولوة النحويةولا أنت أصلك ما هلالابى وتكون مريخابى (مندس)بغرض تشتيت الكورة !!! وخايفك تقوم تم تقوم تقول لى أت=نا ما هلاللابى أنا هلالى من جماعات أبوزيت الذى لسع ماغزا ، ولا من بقايا المندلسيين ونكون غرقنا فى كوم من النفايات النحوية الألكترونية!!سامحك الله ولو على التصحيح صفحة البلاغة والقواعد بى هناك الغلطات الحقيقية والغير مفتعلة تكتل سيبويه بالضحك!

European Union [كرباج] 06-24-2013 05:20 PM
طبعن إنت زعلان إنو التعليم مجانن

أنت قلت الكاتب ساخر إذا مافى داعى لتصحيحك ده

United States [الكلنكحي] 06-24-2013 04:53 PM
مستهبلن

United States [أبو درر] 06-24-2013 04:01 PM
(طبعن) الأستاذ جبرة قاصد حكاية (النون) دى يا أخ الهلالى ... دي إسمها لزوم ما لا يلزم

[طفشانه حمد حمد امو] 06-24-2013 03:53 PM
يا شيخ الهلالي طبعن ماسهوا وهي مقصوده من باب السخرية وكدا

[8855] 06-24-2013 03:28 PM
الاخ الاستاذ الهلالي تحيه طيبه , ليس الاستاذ جبره بهذه السطحيه وهو يقصد ذلك كبعا لزوم السخريه والدليل علي ذلك فهو يضعها بين قوسين دائما فالتحيه للاستاذ جبره .

[حليل السودان في زمن الانقاذ] 06-24-2013 01:23 PM
با خونا الهلالي دي ماياها السخرية ذاتا.............وطبعن لو ماكتبها كده تكون كتاباته بقروش ومامجانن


الفاتح جبرا
الفاتح جبرا

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة