المقالات
السياسة
( يخسي عليكم )
( يخسي عليكم )
06-25-2013 04:42 AM



ديوان المراجع العام قبل الاستطراد يجب أن نشهد لهذا الديوان أنه من المؤسسات النادرة التي لم تمسها يد الخراب التي طالت كل شيء ويمكن أن نضيف له هيئة او لجنة امتحانات السودان التي ظلت تدير امتحانات الشهادة السودانية بكل انضابط وكأنها في زمن الانجليز هل في بالكم مؤسسة مدنية أخرى خلقت سليمة وظلت سليمة ؟ عودة للديوان –النظامه كراسي- ممثلا في نائب المراجع العام القومي وفي ورشة بدار البرلمان مكرر ورشة بدار البرلمان قال إن هناك فساد مقنن وهو أسوأ أنواع الفساد وقال إن هناك وحدات حكومية ترفض المراجعة قائلة (امشو الحتة العايزين تمشوها) عدييييييييل كدا ثم كشف قضية المراجع مع حوافز الجمارك وقال لو أن كل الأموال المجنبة وصلت خزانة المالية لن تعاني أي جهة حكومية من مال التيسير وطالب الولاة ووكلاء الوزارات عن الكشف عن الشركات التي يملكونها حتى لا يسيئوا استخدام السلطة ولم يكتف بالقول إنهم فعلوا ما عليهم بتمليك المعلومات لنواب الشعب بل إنهم على استعداد لتقديم استقالاتهم حتى لا يتحولوا الى شهود زور. شكرا حزينا محمد الحافظ فقد أسمعت إذ ناديت حيا ولكن ...
طيب خلونا ندخل القاعة الرسمية بتاعت البرلمان لنسمع للسيد وزير المالية شخصيا وهو يقول للنواب وللمرة الألف إن وزارته ليست لها ولاية على المال العام لأن هناك قوانين تكفها أي تكفها عن ذلك وقال بالنص (ضراعنا قوية جدا .. لكن القوانين الخاصة أقوى مننا..) إذن ياسيد علي ضراعك ليست قوية إنما ملوية بدليل أن هناك قوانين خاصة تمنع ضراعك من أداء مهامها التي حددها لها الدستور وليس القانون فكيف يكون القانون او اللائحة أقوى من الدستور؟ كان يمكن أن يكون كلام السيد علي محمود معقولا لو قال (العين بصيرة واليد قصيرة ) أما أن ضراعك قوية فهذه لا مكان لها من الإعراب. إنك أردت أن تستقوي بالبرلمان بدليل قولك (خارجونا منها ) يعني إنت داير البرلمان يقوم بكنس هذه القوانين غير الدستورية وهذا تصرف دستوري منك لكن من المؤكد أنك قلت في سرك جيناك ياعبد المعين تعين .. بس من فضلك شوف محمد الحافظ نائب المراجع قال شنو فوق؟
وتكتمل الصورة عندما نذهب لوزير العدل الذي يقول إن هناك تساهلا في تنفيذ القوانين والجهاز التنفيذي ضعيف في تطبيق القوانين وحماية المال العام طيب ياسيد دوسة إنت قاعد تعمل شنو؟ ألست أنت محامي الحكومة؟ أليس في يدك مباشرة الإجراءت القانونية في حالة إذا كان الجهاز التنفيذي الرسمي مدعي او مدعى عليه ؟ لكن بيني وبينك كلامك دا أحسن مما تمشي البرلمان لأنك بتكون أخدت مشوار في الفاضي ولن تفيد دفوعات الفاتح عز الدين ولا مواساة شيخ الحبر (كل البنقول عليهو موسى نلقاه فرعون) خلاص فرعون فرعون ونحن قدامنا حاجة؟
إن سبعة أو ثمانية ملايين دولار دينق الور ومانيمبي لا تسوى أي شيء بجانب ما قاله المسؤولون الثلاثة الكبار أعلاه؟ لكن للأسف نحن دوما نخطئ في عناوين الأخبار. المسألة ياجماعة الخير لم تعد فسادا أو سرقة أو قاضي وحرامية إنما المسألة في التطبيع مع الفساد وخراب الذمم والفوضى والحواجب التي تحتاج الى عفريتة لكي ترفعها. لقد أصبحت حواجبنا غير قابلة للرفع ولا حول ولا قوة إلا بالله.

السوداني


تعليقات 12 | إهداء 0 | زيارات 3479

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#706462 [jackssa]
0.00/5 (0 صوت)

06-25-2013 09:39 PM
أنا أقول انه الجماعة ديل ما حرامية و دا ما فساد ولا سرقة ولا اختلاس لسبب ان البلد بلدهم ومن اخذ من ماله لا يعتبر سرقة .؟؟؟. دا كلام دا ..أى برلمان... وأى مراجع عام ..المراجع العام له سلطة فتح بلاغ لم نسمع ان المراجع العام فتح بلاغ ضد وزير او مسؤل كبير فقط فالح بفتح بلاغات لصغار الموظفين ...


#706263 [أزرق]
0.00/5 (0 صوت)

06-25-2013 04:57 PM
قول حواجبنا اتحلجت يا شيخ


#706240 [ام الحسن]
0.00/5 (0 صوت)

06-25-2013 04:32 PM
كان ماقادرين تشيلو الكيزان ديل بره خليكم فى اضعف الايمان وقولو النصيحة فالساكت عن الحق شيطان اخرس 000عشان كده اخيرلكم ياعجايز تدخلو قبوركم بى اضعف الايمان بدل مايجيكم الموت ويلقاكم قاعدين هبابه ساى ماعنكم ريحة الايمان 000الحكاية مامحتاجة قوة ضراع 000قوة اللسان دى فى رجال ماقادرين عليها 000كدى الضراع ده حسى خلو لرجال كررى 000وحليل زمن خوصة الضراع000وجانا زمنا كان شفنا فيهو خوصة اللسان نرفع حواجبنا ونطير عينينا


#706228 [عبيد الله]
0.00/5 (0 صوت)

06-25-2013 04:17 PM
ياد البوني زمان ونحن صغار عندنا خالتنا لمن تلقانا نلعب بي حاجة مش عاجباها تقول لينا ( يخسي لامن يخسي تكمل ) دحين خليها كدى لامن يخسي تكمل ..


#706154 [عبدالرحمن]
5.00/5 (1 صوت)

06-25-2013 02:41 PM
تفتكر يا دكتور لو الكيزان ما عاجبهم المراجع العام وديوانه كانوا خلوه؟!! بعدين انت شـهادتك مجروحة لأنك صرت معروف ومشهور لدى الناس بحرصك الزائد على مصالحك الصغيرة التافهة ولذلك لا تجروء على الحديث بوضوح في أي امر يمس بني كوز وفسادهم وسرقاتهم ولا يوجد من يعبأ بكلامك يا ود الجزيرة.


#706044 [ودالشريف]
0.00/5 (0 صوت)

06-25-2013 01:02 PM
مصيبتنا في من يدعون انهم ممثلو الشعب وهم فاسدين كما الولاة والوزراء والمحافطين ورؤساء المحليات وناس الضرائب والزكاة وووووو الفساد عزيزى د البونى يمشي ويتبخر وعينه قوية وكان ما عاجبكم البحر قريب المشكلة من يحاسب من فالكل ماسك للاخر ملفات من الفساد لذا لن ينتهى الفساد الا اذا زال النظام واصبح لدينا قضاء مستقل عن السلطة التنفذية والتشريعية وحينها ستظهر الفضائح الفساد فوق مايتصور العقل وسنندهش من حجم الاموال التى نهبت من الخزينة ومن جيوب الفقراء من شعب بلادى هولاء القوم نسو الله فانساهم انفسهم وقد انهشت لتعليق د الحبر فاين يعيش د الحبر وهل انه لايعلم والاصم والاعمى يعرف الفساد في بلادى الا يكون كان في المريخ او زحل واحسب ان فيها سكان قد سمعو بالفساد في ارض السودان الحل في ذهاب هذا النظام والخوف ليس على المال بل على وجود السودلاننا دخلنا مرحلة التفكك والانهيار فالنلحق السودان قبل ان يتفتت وحينها لن يجدى الندم


#705984 [مسكين محمد احمد]
0.00/5 (0 صوت)

06-25-2013 12:16 PM
برلمان ايه ياعمي البلد دي فيها خمسة رجال و امراءة واحدة فقط هم الكل في الكل و الباقي كلوا تمامة جرتق فقط


#705823 [ابوالمكارم]
0.00/5 (0 صوت)

06-25-2013 10:06 AM
على رأى ابوكره (فضل الله) يخسى كان يخسى نبذ؟؟؟؟؟؟؟؟؟؟؟؟!!!!!!!!!!!!!!!!!!


#705799 [النيل حمد النيل]
0.00/5 (0 صوت)

06-25-2013 09:55 AM
نعم هناك مؤسستان خلقتا سليمتان واستمرتا سليمتين وفاتك ذكرهما!! الأولي هي: هيئة المواصفات والمقايسس السودانية، إذ خلقت منذ الانجليز لمراقبة مطابقة (كوز اللبن- أو عبار اللبن) (الرطل ونصف وربع الرطل) للمواصفات واستمرت في ذلك النهج حتى عصرنا هذا عصر العولمة. وفي سبيل أداء مهاهما (اللبنية) الشاقة، فقد فاتها الكثير من الحبوب الفاسدة التي تدخل عبر الموانئ البحرية والبرية، إضافة إلى دخول العشرات من المبيدات الحشرية والنباتية التي تتسبب في أمراض السرطان وغيرها من أمراض الغدة الدرقية. كما فات هذه الهيئة في سبيل انشغالها بكوز اللبن، دخول العشرات من طرود الأدوية والأغذية الفاسدة. أما الهيئة الثانية التي بقت على حالها من الثبات والاستقرار فهي هيئة الحسبة العامة. فكلما أعود إلى أرض الوطن أجد لوحة تلك الهيئة المكتوبة باللون الأصفر على خلفية سوداء في ذات مكانها مع الصمت المهيب الذي يسيطر على مكاتب تلك الهيئة. لقد استطاعت هذه الهيئة الأخيرة البقاء ثابتة في مكانها عشرات السنين دون أن تطالها يد التغيير والتحديث لأن لا أحد منا يعرف على وجه الدقة ماهية دور تلك الهيئة، بل وحتى معنى اسمها؟؟؟؟؟؟؟؟ راجع معلومات سيدي البوني؟؟؟


#705774 [ابوالمكارم]
0.00/5 (0 صوت)

06-25-2013 09:37 AM
حياك الله شيخ البونى دا الشغل الدايرنو الكلام فى المهم والمليان وفرعنة الفاتح خليها تولى ده منهم وليهم وبنشوفا ما غريبه بس المصيبةالكبرى فرعنة موسى التانى (شيخك الحبر ) الذى كنت اعتبره مثال للديّن الورع ولكن بعد انقياده للانقاذ سقط و بإمتياز واصبح يسبح بحمد الانقاذ؟؟؟؟!!!!!!!!!


#705726 [حزب الراكوبة]
0.00/5 (0 صوت)

06-25-2013 08:31 AM
صح النوم يابوني يادوب صحيت


#705698 [سودانى منفرج الأساريرنوعا ما]
3.00/5 (2 صوت)

06-25-2013 06:32 AM
يا دكتور براك بتجيب الكلام والمشاكل لرقبتك .. تانى الخلآك تجيب سيرة البحر شنو !! ايه يعنى الجدّ" هل باب الريد انسدّ" ؟انت شنو الخلاك بعد اربعه وعشرين سنه فساد وسرقه وكضب تفكر فى "رفع" حواجبينك وليه عاوز ترفعن ؟ رفع الحواجبين دا زاتو بقى بالقروش .. ما ممكن تكون ما بتمشى بيوت البكيات وما عارف (وانت موعود سبعين) انّو فى دفع قبل "الرفع"!! او كما قال...


ردود على سودانى منفرج الأساريرنوعا ما
European Union [ابوالمكارم] 06-25-2013 08:53 PM
يامنفرج الاسارير استغفر الله الراجل دا صغير مالحق الستين داير تدخلو القبر سبعين؟ مافضلت ليهو شئ..


د.عبد اللطيف البوني
 د.عبد اللطيف البوني

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة